1. Weh Peeta mi tel Kristyanz fi du, ahn wai wi mait feel laik ih noh pasabl fi mek wi obay ih advais?

WEDA wi ga di hoap fi liv da hevn er pahn ert, aala wi ku benifit fahn weh Peeta mi tel di Kristyanz eena di fers senchri. Hihn mi seh: “Unu fi bee hoali eena evriting weh unu du, jos laik di Hoali Wan weh kaal unu, bikaaz ih rait dong eena di Skripchaz: ‘Unu fi bee hoali, bikaaz Ai hoali.’” (1 Peet. 1:15, 16) Fahn dehndeh werdz, wi laan dat wi ku bee laik Jehoava, di Wan hoo da di bes egzampl a hoalinis. Wee kud bee hoali ahn wi need fi bee hoali eena evriting weh wi du. Wi mait tink dat dis noh pasabl bikaaz wi noh perfek. Di apasl Peeta ihself mi mek sohn mistayk; stilyet, fi hihn egzampl shoa wi dat wee kud “bee hoali.”

2. Weh kweschanz wi wahn diskos eena dis aatikl?

² Eena dis aatikl, wi wahn diskos dehnya kweschan: Weh ih meenz fi bee hoali? Weh di Baibl teech wi bowt Jehoava hoalinis? How wee ku bee hoali eena evriting weh wi du? Ahn weh fi wee hoalinis ga fi du wid wi rilayshanship wid Jehoava?

3. Weh lata peepl tink bowt sohnbadi weh dehn seh ak laik dehn hoali, bot wehpaat wi ku fain di karek infamayshan?

³ Wen peepl tink bowt sohnbadi weh dehn seh ak laik dehn hoali, dehn imajin sohnbadi weh noh smail fi notn, weh wayr sohn lang kloaz, an weh aalwayz luk seeryos. Bot dat da noh how peepl weh hoali stan. Di Baibl seh dat Jehoava, hoo hoali, da “di hapi Gaad.” (1 Tim. 1:11) Ahn di Baibl kaal dehn wan weh wership ahn “hapi.” (Ps. 144:15) Jeezas neva aproov a dehn wan hoo mi wayr sohn speshal  kaina kloaz ahn du gud tingz fi adaz jos fi mek adaz ku noatis dehn. (Mach. 6:1; Maak 12:38) Bikaaz a weh chroo Kristyanz laan fahn di Baibl, dehn noa weh ih meenz fi bee hoali. Wee noa dat Jehoava lov wi ahn dat hihn wahn neva aks wi fi du sohnting weh hihn noa wi kyaahn du. Soh wen Jehoava tel wi: “Unu need fi bee hoali,” wee shoar dat ih pasabl fi bee hoali. Bot fi mek wi ku bee hoali eena evriting weh wi du, wi need fi andastan weh ih meenz fi bee hoali.

4. Weh di werd “hoali” meenz?

⁴ Weh ih meenz fi bee hoali? Eena di Baibl, di werd “hoali” meenz fi bee kleen eena evriting weh yu du, inkloodin yu wership tu Gaad. Ih ku aalso meen sohnting weh set wan said fi Jehoava servis. Soh den, wi da wahn hoali persn if wi kleen eena di tingz weh wi du, if wi wership Jehoava how hihn waahn, an if wi ga wahn kloas rilayshanship wid hihn. Ih soh amayzin dat Jehoava stil waahn wi bee fi hihn kloasis fren eevn doa wi noh perfek ahn hihn hoali eena evri way.

5. Weh wi ku laan bowt Jehoava fan ih faytful aynjel dehn?

⁵ Jehoava hoali eena evri way. Dis da weh sohn seraf seh bowt Jehoava. Dehn mi seh: “Hoali, hoali, hoali! Jehoava a aamiz hoali.” (Isa. 6:3) Af koars, dehnya aynjel onli ku ga wahn kloas rilayshanship wid Jehoava, hoo hoali, bikaaz dehn dehnself hoali. Dat da wai di plays wehpaat Jehoava aynjel dehn diliva wahn mesij pahn ert ku bee hoali. Dat da egzakli weh mi hapm tu di spat wehpaat Moaziz mi deh bai di prikl bush weh neva di bon.—Ex. 3:2-5; Josh. 5:15.

6-7. (a) Akaadn tu Exodus 15:1, 11, how Moaziz mi mek it klyaa dat Jehoava hoali? (b) Weh mi rimain di Izrelait dehn dat Jehoava hoali? (Koment pahn di picha pahn di kova.)

⁶ Afta Moaziz mi leed di Izrelait dehn chroo di Red See, hihn mi mek it klyaa tu dehn dat Jehoava da wahn hoali Gaad. (Reed Exodus 15:1, 11.) * Di Eejipshan dehn hoo mi wership faals gaadz neva hoali ataal. Wi ku seh di sayhn ting bowt dehn wan hoo mi wership di faals gaadz a Kaynan. Az paat a dehn wership, dehn wuda sakrifais dehn chiljren ahn du sohn disgostin sekshwal tingz. (Lev. 18:3, 4, 21-24; Deut. 18:9, 10) Bot Jehoava kompleetli difrent fahn dehndeh faals gaadz. Hihn wuda neva aks ih servant dehn fi du eniting weh wikid ahn disgostin. Hihn hoali eena evri way. Fi rimain di Izrelait dehn a dis, di hai prees mi ga wahn kaavin pahn wahn shaini goal ban weh mi deh pan ih terban. Ih mi seh: “Hoalinis bilangz tu Jehoava.”—Ex. 28:36-38.

⁷ Di mesij pahn dis shaini goal ban mi mek it klyaa tu enibadi hoo seeʼt dat Jehoava hoali fi chroo. Bot sopoaz dehn mi ga wahn Izrelait hoo kudn si dis mesij pahn di terban bikaaz ih kudn goh kloas tu di hai prees? Yu tink hihn wuda stil geh fi noa dat Jehoava hoali? Af koars! Evri Izrelait wuda mi hyaa da impoatant mesij wen di Laa wuda geh reed owt fronta evri man, uman, ahn pikni. (Deut. 31:9-12) If yoo mi dehdeh, yu wuda mi hyaa dehnya werdz: “Ai da Jehoava yu Gaad, ahn yu fi . . . bee hoali, bikaaz Ai hoali.” “Yu fi bee  hoali tu mee, bikaaz Ai, Jehoava, hoali.”—Lev. 11:44, 45; 20:7, 26.

8. Weh wi laan fahn Leviticus 19:2 ahn 1 Peeta 1:14-16?

⁸ Mek wi foakos pahn Leviticus 19:2 weh dehn mi reed owt tu aala di Izrelait dehn. Jehoava mi tel Moaziz: “Taak tu di hoal asembli a di Izrelait dehn ahn tel dehn, ‘Yu fi bee hoali, bikaaz Ai, Jehoava yu Gaad, hoali.ʼ” Peeta mi praabli di koat fahn da sayhn vers wen hihn mi inkorij di Kristyanz fi “bee hoali.” (Reed 1 Peeta 1:14-16.) Tudeh, wee noh haftu obay di Laa weh Gaad mi gi Moaziz. Bot weh Peeta mi rait help wi fi andastan weh wi laan fahn Leviticus 19:2, dat Jehoava hoali an enibadi weh lov hihn need fi werk haad fi bee hoali tu. Ahn dis da chroo weda wi ga di hoap fi liv da hevn er pahn Paradais ert.—1 Peet. 1:4; 2 Peet. 3:13.

9. How Leviticus chapta 19 wahn help wi?

⁹ Bikaaz wi waahn mek Jehoava hapi, wi waahn laan how wee ku bee hoali. Hihn gi wi di advais weh wi need soh dat wi ku du dat. Wi ku fain da advais da Leviticus chapta 19. Wahn profesa weh naym Marcus Kalisch seh: “Dis mait bee di moas impoatant chapta fahn di buk a Leviticus ahn fahn di fos faiv buk a di Baibl.” Memba dat di buk a Leviticus mi staat wid di werdz: “Yu fi bee hoali.” Now, wi wahn diskos difrent vers fahn dis chapta weh ku help wi fi si how wi ku bee hoali eena difrent wayz eena wi laif.

10-11. Weh Leviticus chapta 19 seh wi need fi du, ahn wai dat impoatant?

¹⁰ Afta Jehoava mi seh dat di Izrelait dehn fi bee hoali, ih seh: “Eech wan a unu fi rispek ih ma an ih pa . . . Ai da Jehoava yu Gaad.”—Lev. 19:2, 3.

¹¹ Dis da wahn impoatant koman fahn Jehoava weh wi need fi obay. Memba wen wahn man mi aks Jeezas: “Wat da sohn gud tingz weh Ah need fi du fi get evalastin laif?” Wan a di tingz weh Jeezas mi tel di man da dat ih mi need fi aana ih ma an ih pa. (Mach. 19:16-19) Jeezas mi kandem di Farisee ahn di skraib dehn bikaaz dehn mi du aal weh dehn kud fi noh tek kayr ahn dehn payrents. Eena da way deh,  dehn mi “mek di werd a Gaad az sohnting weh noh wert notn.” (Mach. 15:3-6) Di fif komanment an aal weh wi reed da Leviticus 19:3 da paat a “di werd a Gaad.” (Ex. 20:12) Agen, memba dat di advais weh wi reed da Leviticus 19:3, weh da fi rispek wi ma ahn wi pa, kohn rait afta di werdz: “Yu fi bee hoali, bikaaz Ai, Jehoava yu Gaad, Hoali.”

12. How wi ku obay di koman da Leviticus 19:3?

¹² Wen wi tink bowt di koman fahn Jehoava fi aana wi payrents, wi mait aks wiself, ‘Ai aana mai payrents?ʼ If yoo feel dat yu shuda mi du moa eena di paas, wel, now da di taim weh yu ku disaid fi du beta. Yu kyaahn chaynj weh don hapm, bot yu ku du yu bes now fi spen moa taim wid yu payrents ahn du moa fi dehn. Maybi yu ku du moa fi help dehn geh weh dehn need, help dehn stik kloasa tu Jehoava ahn kantinyu fi serv hihn. Er yu ku du moa fi inkorij ahn komfert dehn. If yu du dehnya tingz, yu wahn di obay di koman da Leviticus 19:3.

13. (a) Weh ada advais deh da Leviticus 19:3? (b) How wee ku kapi Jeezas egzampl da Look 4:16-18?

¹³ Leviticus 19:3 teech wi sohnting els bowt how fi bee hoali. Ih taak bowt di need fi kip di Sabat. Kristyanz noh deh anda da Laa, soh wi noh need fi kip di Sabat weh mi hapm evri week. Stilyet, doh, wi ku laan wahn lat fahn how di Izrelait dehn mi kip di Sabat ahn how dehn mi benifit fan it. Joorin di Sabat, di Izrelait dehn mi res fahn eni kaina werk ahn dehn mi foakos pahn dehn wership tu Gaad. * Dat da wai pahn da sayhn day, Jeezas wuda goh da di sinagag wehpaat ih mi liv ahn reed fahn di Werd a Gaad. (Ex. 31:12-15; reed Look 4:16-18.) Di koman weh deh da Leviticus 19:3 weh Jehoava seh fi “kip mi sabat dehn” fi inkorij wi fi mek taim evri day fi wership hihn. Yoo feel dat yu need fi du moa fi obay da koman? If yu mek taim fi wership Jehoava evri day, den yu wahn ga wahn kloas rilayshanship wid ahn, an dis impoatant fi help wi fi bee hoali.

14. Weh impoatant chroot wi fain oava ahn oava da Leviticus chapta 19?

¹⁴ Leviticus chapta 19 menshan wahn impoatant chroot oava ahn oava. Di en a vers 4 seh: “Ai da Jehoava yu Gaad.” Dis aidyaa geh menshan 16 taimz eena dis chapta. Dis rimain wi a di fers komanment: “Ai da Jehoava yu Gaad . . . Yu noh fi ga eni ada gaad bisaid mee.” (Ex. 20:2, 3) Evri Kristyan hoo waahn bee hoali need fi mek shoar dat ih rilayshanship wid Jehoava moa impoatant dan eniting els. Ahn bikaaz wee da Jehoava Witnisiz, wi don mek op wi main fi noh bring shaym pahn Jehoava hoali naym.—Lev. 19:12; Isa. 57:15.

15. Di vers dehn da Leviticus chapta 19 weh taak bowt di sakrifais dehn shuda inkorij wi fi du wat?

¹⁵ Di Izrelaits mi shoa dat dehn mi aksep Jehoava az fi dehn Gaad wen dehn mi obay ih laa dehn. Leviticus 18:4 seh: “Yu fi obay mi koman dehn, ahn yu fi kip mi laa dehn ahn waak akaadn tu dehn. Ai da Jehoava yu Gaad.” Chapta 19 inklood som a dehndeh “laa” fi di Izrelait dehn. Fi egzampl, vers 5-8, 21, 22 taak bowt animal sakrifais. Di Izrelait dehn mi haftu mek dehndeh sakrifais eena wahn way  weh shoa rispek fi sohnting hoali weh bilangz tu Jehoava. Wen wi reed dehndeh vers, ih mek wi waahn du weh pleez Jehoava an aafa prayz tu hihn weh da laik wahn sakrifais weh hihn aksep, jos laik weh Heebrooz 13:15 inkorij wi fi du.

16. Weh prinsipl eena Leviticus 19 ku rimain wi bowt di difrens bitween dehn wan weh di serv Gaad ahn dehn wan weh noh di serv ahn?

¹⁶ Fi bee hoali, wi need fi bee wilin fi mek ada peepl si dat wee difrent fahn dehn wan hoo noh di serv Gaad. Bot dis noh aalwayz eezi. Wi skoolmayt dehn, wi werkmayt dehn, wi relitiv dehn hoo noh serv Jehoava, an adaz mait waahn presha wi fi du tingz weh wahn stap wi fahn wership Jehoava eena di way how hihn waahn. Wen dat hapm, wi ga wahn impoatant disizhan fi mek. Weh ku help wi mek di rait disizhan? Mek wi kansida wahn impoatant prinsipl weh deh da Leviticus 19:19. Paat a it seh: “Yu noh fi put aan kloaz weh mek owta too difrent kaina chred miks tugeda.” Dis laa mi mek Izrel difrent fahn di ada nayshan dehn rong dehn. Sins wee noh deh anda da laa, ih noh rang fi wahn Kristyan wayr kloaz weh mek owta difrent kaina chred er klaat laik katn, dakron, poliyesta, ahn soh. Bot wi rifyooz fi bee laik peepl weh bileev ahn praktis tingz weh goh gens di Skripchaz, eevn if dehnya peepl da wi skoolmayt, werkmayt, ahn relitiv dehn. Af koars, wi lov wi relitiv dehn ahn wi shoa lov tu ada peepl. Bot di disizhan dehn weh wi mek eena laif shoa dat wi waahn obay Jehoava, eevn if dat mek wi difrent fahn di peepl weh deh rong wi. Memba dat wen wi set wiself wan said fi Gaad da paat a weh ih meenz fi bee hoali. Ahn dis impoatant if wi di werk haad fi bee hoali.—2 Kor. 6:14-16; 1 Peet. 4:3, 4.

17-18. Weh impoatant lesn wi ku laan fahn Leviticus 19:23-25?

¹⁷ Di frayz “Ai Jehoava da yu Gaad,” mi rimain di Izrelait dehn dat dehn shuda mek dehn rilayshanship wid Jehoava di moas impoatant ting eena dehn laif. How dehn kuda mi du dat? Leviticus 19:23-25 tel wi wan way. (Reed.) * Tink bowt weh dehnya werdz wuda mi meen fi di Izrelait dehn afta dehn mi reech eena di Pramis Lan. If wahn man mi plaant sohn chree fi eet di froot dehn, ih wudn eet fahn dehndeh chree fi chree yaaz. Eena di foat yaa,  dehn mi fi tek di froots fahn di chree dehn ahn set dehn wahn said fi yooz da di templ. Da neva til di fif yaa dat di oana kuda mi eet di froots fahn aafa dehndeh chree. Fahn dis laa, di Izrelait dehn kuda mi si dat fi dehn needz da neva di moas impoatant ting. Jehoava mi waahn dehn put dehn wership tu hihn fers ahn shoa dat dehn chros dat hihn wahn tek kayr a dehn. Hihn mi wahn mek shoar dehn ga inof fi eet. Ahn Jehoava mi inkorij dehn fi bee jenaros wid dehn gif weh dehn mi kehr da di templ.

¹⁸ Di laa da Leviticus 19:23-25 rimain wi a weh Jeezas mi seh eena di Sermon pahn di Mongtin. Hihn mi seh: “Stap wori bowt . . . weh unu wahn eet er weh unu wahn jrink.” Jeezas kantinyu fi seh: “Unu hevnli Faada noa dat unu need aala dehnya tingz.” Gaad wahn mek shoar wi ga weh wi need, jos laik how ih mek shoar di berd dehn ga weh dehn need. (Mach. 6:25, 26, 32) Wee chros dat Jehoava wahn tek kayr a wi. Ahn wi redi fi help owt dehn wan weh need help. Sayhn way soh, wi redi fi help owt wid wi lee kanchribyooshan dehn fi help pay di bilz fi di kangrigayshan. Jehoava noatis wen wi jenaros ahn hihn wahn pay wi bak far it. (Mach. 6:2-4) Wen wi jenaros, wi di shoa dat wi andastan di lesn weh deh da Leviticus 19:23-25.

19. How yoo benifit fahn dis paat a di buk a Leviticus?

¹⁹ Wi diskos jos wahn fyoo vers fahn Leviticus chapta 19, ahn dehn help wi fi andastan how wee ku bee hoali laik Jehoava. Wen wi kapi fi hihn egzampl, wi di chrai wi bes fi ‘bee hoali eena evriting weh wi du.ʼ (1 Peet. 1:15) Wahn lata peepl weh noh serv Jehoava noatis di gud kandok weh ih servant dehn shoa. In fak, wahn lata dehn prayz Jehoava bikaaz a dis. (1 Peet. 2:12) Bot lat moa deh weh wi ku laan fahn Leviticus chapta 19. Eena di neks aatikl, wi wahn kansida sohn moa vers eena dis chapta an ih wahn help wi fi si ada wayz weh ku help wi fi “bee hoali,” laik weh Peeta inkorij wi fi du.