1. ¿Chuqui ti ticʼojel tsiʼ yʌcʼʌ jiñi apóstol Pedro tiʼ tojlel jiñi i yermañujob, i chucoch wocol ti jajqʼuel yilal?

MACH yʌlʌyic mi ti panchan o mi ti Lum mi caj lac chumtʌl, ti lac pejtelel miʼ mejlel lac taj lac wenlel ti jiñi ticʼojel tsaʼ bʌ i yʌcʼʌ jiñi apóstol Pedro tiʼ tojlel jiñi xñoptʼañob yajcʌbiloʼ bʌ cheʼ ti ñaxam bʌ siglo. Tiʼ tsʼijbu: «Cheʼ bajcheʼ Chʼujul jiñi tsaʼ bʌ i pʌyʌyetla, yom chʼujuletla tiʼ pejtelel laʼ melbal, come tsʼijbubil: ‹Yom chʼujuletla come joñon chʼujulon›» (1 Ped. 1:15, 16). ¿Chuqui miʼ pʌsbeñonla iliyi? Chaʼan mucʼʌch i mejlel lac lajin Jehová, jiñi ñumen chʼujul bʌ. Mucʼʌch lac mejlel i yomʌch chʼujulonla ti lac melbal (chaʼlibal), anquese mach mejlic yilal tiʼ caj xmulilonla. Jiñi apóstol Pedro tsiʼ wen taja i sajtemal jaʼel, pero jiñi i yejemplo miʼ pʌsbeñonla chaʼan mucʼʌch lac mejlel ti ajñel ti chʼujul.

2. ¿Chuqui ti cʼajtiya tac mi caj lac jacʼ ti ili estudio?

² Ti ili estudio, mi caj lac jacʼ ili cʼajtiya tac: ¿Chuqui yom i yʌl cheʼ chʼujulonla?, ¿chuqui miʼ pʌsbeñonla jiñi Biblia chaʼan bajcheʼ chʼujul Jehová?, ¿bajcheʼ mi lac mejlel ti ajñel ti chʼujul ti lac melbal?, yicʼot ¿chucoch yom chʼujulonla mi la com chaʼan i yamigojonla Jehová?

3. ¿Chuqui miʼ ñaʼtañob cabʌlob cheʼ bʌ mi lac taj ti tʼan juntiquil chʼujul bʌ, pero baqui miʼ mejlel lac taj jiñi i sujmlel?

³ Cheʼ bʌ jiñi lac piʼʌlob miʼ ñaʼtañob juntiquil chʼujul bʌ, miʼ ñaʼtañob chaʼan juntiquilʌch michʼicña jax bʌ yilal yicʼot cheʼ bʌ i pislel bajcheʼ jiñi ñucoʼ bʌ i yeʼtel (troñel) ti ñopbalʌl tac. Pero mach i sujmic jiñi. Jiñi Biblia miʼ yʌl chaʼan Jehová, jiñi chʼujul bʌ, jiñʌch «jiñi tijicña bʌ Dios» (1 Tim. 1:11). Miʼ yʌl jaʼel chaʼan jiñi muʼ bʌ i chʼujutesañob tijicñayob (Sal. 144:15). I Jesús  tsiʼ yʌlʌ chaʼan mach weñic chuqui miʼ melob (chaʼleñob) jiñi tamoʼ bʌ i pislel yicʼot muʼ bʌ i poj melob chuqui wen chaʼan jach miʼ qʼuejlelob (Mat. 6:1; Mar. 12:38). Joñonla la cujil chuqui yom i yʌl cheʼ chʼujulonla tiʼ caj muʼ bʌ i yʌl jiñi Biblia. I la cujil chaʼan jiñi lac Dios, chʼujul bʌ yicʼot am bʌ i cʼuxbiya, maʼañic baʼ ora mi caj i cʼajtibeñonla mach bʌ mejlic lac mel. Jin chaʼan, mi Jehová miʼ subeñonla «Yom chʼujuletla», yujil chaʼan mucʼʌch lac mejlel. I sujmʌch, chaʼan chʼujulonla ti lac melbal, yom mi lac ñaʼtan chuqui yom i yʌl cheʼ chʼujulonla.

4. ¿Chuqui yom i yʌl jiñi tʼan chʼujul yicʼot chʼujul bʌ?

⁴ ¿Chuqui yom i yʌl cheʼ chʼujulonla? Yaʼ ti Biblia, jiñi tʼan chʼujul yicʼot chʼujul bʌ yom i yʌl chuqui sʌc bʌ o maʼañic bʌ i bibiʼlel tiʼ melbal yicʼot tiʼ chʼujutesaya. Ili tʼan miʼ yʌcʼ ti ñaʼtʌntel jaʼel chaʼan tʼoxbilix o yajcʌbil chaʼan miʼ melben i yeʼtel Dios. Miʼ mejlel la cʌl chaʼan chʼujulonla mi sʌconla ti lac melbal, mi mucʼʌch lac chʼujutesan Jehová cheʼ bajcheʼ miʼ mulan yicʼot mi lʌcʼʌlʌch añonla tiʼ tojlel. Miʼ toj sajtel lac pusicʼal cheʼ mi lac ñaʼtan chaʼan joñonla, anquese wen xmulilonla, mi lac mejlel ti sujtel tiʼ yamigo Jehová, jiñi junyajl chʼujul bʌ.

5. ¿Chuqui miʼ pʌsbeñonla tiʼ tojlel Jehová jiñi xucʼul bʌ ángelob?

⁵ Jehová junyajl sʌc yicʼot chʼujul. Cheʼʌch tsiʼ yʌlʌyob chaʼtiqui uxtiquil serafiñob, ili jiñʌch ángelob añoʼ bʌ tiʼ tʼejl i trono Jehová. Tsiʼ yʌlʌyob: «Chʼujulet, wen Chʼujulet Dios, i Yumet Panchan yicʼot Pañimil» (Is. 6:3). Weno, chaʼan lʌcʼʌl miʼ yajñelob ti Dios, yom chʼujulob jaʼel, i chʼujulobʌch. Jin chaʼan, cheʼ bʌ juntiquil i yángel Jehová miʼ tilel ila ti Pañimil, chʼujul miʼ sujtel yaʼ baqui an, tiʼ caj jach yaʼan jiñi ángel. Cheʼʌch tsaʼ ujti cheʼ bʌ Moisés tsiʼ lʌcʼtesa i bʌ ti jiñi alʌ teʼ am bʌ i cʼʌcʼal (Éx. 3:2-5; Jos. 5:15).

6, 7. a) Cheʼ bajcheʼ miʼ yʌl Éxodo 15:1, 11, ¿bajcheʼ tsiʼ yʌcʼʌ ti cʌñol Moisés chaʼan Dios chʼujulʌch? b) ¿Chuqui jiñi tsaʼ bʌ i cʼajtesʌbeyob jiñi israelitajob chaʼan Dios chʼujul? (Qʼuele jiñi dibujo am bʌ tiʼ tejchibal).

⁶ Cheʼ bʌ Moisés tsaʼix i cʼaxtesa jiñi israelitajob yaʼ ti Chʌchʌc bʌ mar, tsiʼ yʌlʌ chaʼan chʼujul jiñi i Dios Jehová (pejcan Éxodo 15:1, 11). Jiñi i melbal muʼ bʌ i chʼujutesañob i dios egipciojob mach wis chʼujulic. I cheʼʌch jaʼel jiñi muʼ bʌ i chʼujutesañob jiñi i dios cananeojob, muʼ bʌ i yʌcʼob alʌlob bajcheʼ majtañʌl i miʼ melob tsʼiʼlel chaʼan miʼ chʼujutesañob i dios (Lv. 18:3, 4, 21-24; Dt. 18:9, 10). Pero Jehová mach wis lajalic bajcheʼ jiñi yan tac bʌ dios come maʼañic baʼ ora miʼ subeñonla lac mel mach bʌ weñic. Jehová chʼujulʌch. Tsiquil chaʼan i sujmʌch iliyi come yaʼ tiʼ pixintib i jol jiñi ñumen ñuc bʌ sacerdote an chuqui an i chaʼan melbil (pʌtbil) bʌ ti oro baqui miʼ yʌl: «Chʼujul chaʼan lac Yum» (Éx. 28:36-38).

⁷ Jiñi tsʼijbubil bʌ yaʼi miʼ pʌsben majqui jach miʼ taj i qʼuel chaʼan Jehová wen chʼujul. Pero ¿ixcu mi juntiquil israelita maʼañic miʼ taj i qʼuel jiñi tsʼijbubil bʌ tiʼ caj maʼañic miʼ mejlel i lʌcʼtesan i bʌ tiʼ tojlel jiñi ñumen ñuc bʌ sacerdote? ¿Am ba bajcheʼ miʼ mejlel i ñaʼtan chaʼan Jehová chʼujul? Añʌch. Pejtelel jiñi israelitajob miʼ mejlel i yubiñob cheʼ bʌ miʼ pejcʌbentelob Mandar jiñi wiñicob, xʼixicob yicʼot alobob (Dt. 31:9-12). Cheʼ yaʼic añonla ti jimbʌ ora, tsaʼ la cubi ili tʼan tac: «Joñon laʼ Yumon, la Dioson. [...] Jini chaʼan yom chʼujuletla, come joñon chʼujulon», «yom chʼujul mi laʼ wajñel tic tojlel, come joñon laʼ Yumon, chʼujulon» (Lv. 11:44, 45; 20:7, 26).

8. ¿Chuqui miʼ pʌsbeñonla muʼ bʌ i yʌl Levítico 19:2 yicʼot 1 Pedro 1:14-16?

⁸ Laʼ cu lac ñaʼtan jiñi tʼan tac muʼ bʌ i pejcʌbentel jiñi tejclum Israel muʼ bʌ lac taj ti  Levítico 19:2. Jehová tiʼ sube Moisés: «Subeñob pejtelel israelob: Chʼujul yom mi laʼ wajñel, come joñon chʼujulon». Tajol jiñi apóstol Pedro woli (choncol) i taj ti tʼan ili tʼan tac cheʼ bʌ tiʼ sube jiñi yambʌ xñoptʼañob: «Yom chʼujuletla» (pejcan 1 Pedro 1:14-16). I sujmʌch chaʼan maʼañoñixla tiʼ pʼʌtʌlel jiñi i Mandar Moisés, pero jiñi tsaʼ bʌ i tsʼijbu Pedro tsiʼ pʌsʌ chaʼan i sujmʌch muʼ bʌ i yʌl Levítico 19:2: Jehová chʼujulʌch yicʼot yom chaʼan jiñi muʼ bʌ i cʼuxbiñob miʼ chaʼleñob wersa chaʼan chʼujulob jaʼel. Ti lac pejtelel yom mi lac jacʼ iliyi, mach yʌlʌyic mi ti panchan mi caj lac chumtʌl o mi wʌʼ ila ti Lum ti jumpʼejl paraíso (1 Ped. 1:4; 2 Ped. 3:13).

9. ¿Chucoch weñʌch cheʼ mi lac tsajin Levítico capítulo 19?

⁹ La com sujtel ti chʼujul cheʼ bajcheʼ Dios come la com lac mel chuqui miʼ mulan. Chaʼan miʼ mejlel lac mel, Jehová miʼ yʌqʼueñonla ticʼojel tac. Mi lac taj chaʼpʼej uxpʼejl yaʼ ti Levítico capítulo 19. Jiñi wen i cʌñʌ bʌ hebreo i cʼabaʼ Marcus Kalisch tiʼ tsʼijbu: «Ili capítulo tajol jiñʌch jiñi ñumen tsʼʌcʌl bʌ, ñumen cabʌl chuqui miʼ chʼʌm tilel i jiñʌch jiñi ñumen ñuc bʌ i cʼʌjñibal ti Levítico o tajol yicʼotto yaʼ ti Pentateuco». Laʼ laj qʼuel chaʼpʼej uxpʼejl versículo ti ili capítulo muʼ bʌ i pʌsbeñonla ñuc tac bʌ i cʼʌjñibal chaʼan laj cuxtʌlel. Cheʼ mi laj qʼuel majlel, laʼ laj cʼajtesan chaʼan tiʼ tejchibal ili capítulo miʼ yʌl «Chʼujul yom mi laʼ wajñel».

10, 11. ¿Baqui bʌ junchajp chʼujul bʌ lac melbal miʼ yʌjlel ti Levítico 19:2, i bajcheʼ yilal yom mi laj qʼuel ili mandar?

¹⁰ Cheʼ bʌ Jehová tsaʼ ujti i suben jiñi israelitajob chaʼan yom chʼujulob, tsiʼ yʌlʌ: «Qʼuelela ti ñuc laʼ tat laʼ ña’. [...] Joñoñʌch laʼ Yumon, laʼ Dioson» (Lv. 19:2, 4).

¹¹ Tsiquil chaʼan yomʌch mi lac jacʼ tsaʼ bʌ i yʌlʌ Jehová chaʼan yom mi laj qʼuel ti ñuc lac tatob. Laʼ laj cʼajtesan chaʼan ti jumpʼejl bʌ qʼuin juntiquil wiñic tsiʼ cʼajtibe Jesús: «¿Chuqui tac wem bʌ yom mic mel chaʼan mic taj jiñi cuxtʌlel mach bʌ yujilic jilel?». I junchajp i jacʼbal tsaʼ bʌ i yʌcʼʌ Jesús jiñʌch chaʼan yom miʼ qʼuel ti ñuc i tat yicʼot i ñaʼ (Mat. 19:16-19). Jesús tsaʼto i yʌlʌ chaʼan mach weñic woli (yʌquel) bʌ i melob jiñi fariseojob yicʼot jiñi xtsʼijbayajob come miʼ sʌclañob bajcheʼ miʼ melob chaʼan maʼañic miʼ jacʼob jiñi i mandar Dios.  Jin chaʼan, tsiʼ yʌlʌ chaʼan tsiʼ jisʌbeyob «i cʼʌjñibal jiñi i tʼan Dios» (Mat. 15:3-6). Yaʼ ti «i tʼan Dios» miʼ tilel jiñi i joʼpʼejlel bʌ Mandar muʼ bʌ lac taj ti Levítico 19:2 (Éx. 20:12). Laʼ lac chaʼ cʼajtesan chaʼan jiñi mandar am bʌ ti Levítico 19:2 chaʼan yom mi laj qʼuel ti ñuc lac tatob miʼ tilel cheʼ bʌ Jehová tsaʼix i yʌlʌ ili tʼan tac «chʼujul yom mi laʼ wajñel, come joñon chʼujulon».

12. Cheʼ bajcheʼ miʼ yʌl Levítico 19:2, ¿chuqui miʼ mejlel laj cʼajtiben lac bʌ?

¹² Jujuntiquil xñoptʼan miʼ mejlel i cʼajtiben i bʌ: «¿Woli ba c tsʼʌctesan ti wen jiñi mandar chaʼan yom mij qʼuel ti ñuc c tatob?». Mi tsaʼ laj qʼuele chaʼan maʼañic woli lac mel tilel jiñi yom bʌ mi lac mel, laʼ lac chaʼlen wersa chaʼan mi lac ñumen weñʼesan. I sujmʌch chaʼan maʼañix miʼ mejlel laj qʼuextan jiñi tsaʼix bʌ lac mele, pero ti ili ora majlel miʼ mejlel lac ñumen chaʼlen wersa chaʼan ñumen cabʌl chuqui mi lac mel la quicʼot lac tatob yicʼot cabʌl chuqui mi lac mel tiʼ tojlelob. Tajol miʼ mejlel lac ñumen ñusan qʼuin la quicʼotob. O tajol miʼ mejlel lac ñumen coltañob ti taqʼuin, mi laj coltañob chaʼan lʌcʼʌl miʼ yajñelob ti Jehová yicʼot chaʼan miʼ bej melbeñob i yeʼtel o miʼ mejlel lac ñuqʼuesʌbeñob i pusicʼal. Cheʼ bajcheʼ jiñi, woli lac jacʼ muʼ bʌ i yʌl Levítico 19:2.

13. a) ¿Baqui bʌ yambʌ ticʼojel mi lac taj ti Levítico 19:3? b) ¿Bajcheʼ miʼ mejlel lac lajin i yejemplo Jesús muʼ bʌ i yʌjlel ti Lucas 4:16-18?

¹³ Levítico 19:3 miʼ pʌsbeñonla yambʌ ñuc bʌ i cʼʌjñibal chaʼan chʼujulonla. Yaʼi miʼ yʌl chaʼan yom miʼ qʼuejlel ti ñuc jiñi i qʼuiñilel cʼaj o. Jiñi xñoptʼañonla maʼañoñixla tiʼ pʼʌtʌlel jiñi Mandar, jin chaʼan mach wersajix mi lac chʼʌm jumpʼejl qʼuin chaʼan bʌ cʼaj o. Pero cabʌl chuqui miʼ mejlel laj cʌn ti chuqui miʼ melob jiñi israelitajob ti jimbʌ qʼuin yicʼot chaʼan jiñi bendición tac muʼ bʌ i tajob cheʼ bʌ mucʼʌch i chʼʌmob ti ñuc. Cheʼ ti sábado mach yomic miʼ chaʼleñob eʼtel i yom jach miʼ chʼujutesañob Jehová. * Jin chaʼan, Jesús miʼ majlel ti sinagoga ti jiñi bʌ qʼuin i miʼ pejcan jiñi i Tʼan Dios (Éx. 31:12-15; pejcan Lucas 4:16-18). Jiñi mandar tsaʼ bʌ i yʌcʼʌ Dios am bʌ ti Levítico 19:3 chaʼan mi laj qʼuel ti ñuc jiñi sábado yom miʼ ñijcañonla chaʼan mi lac locʼsʌben i yorajlel chaʼan jiñi i chaʼan tac bʌ Dios. ¿Anto ba chuqui yom mi lac ñumen weñʼesan mi laj qʼuel? Mi mucʼʌch lac wen aqʼuen i yorajlel jiñi i chaʼan tac bʌ Dios, mi caj lac ñumen lʌcʼtesan lac bʌ ti Jehová. I jiñi wen ñuc i cʼʌjñibal chaʼan chʼujulonla.

14. ¿Baqui bʌ junchajp ñuc bʌ i cʼʌjñibal miʼ yʌjlel ti Levítico capítulo 19?

¹⁴ Ti Levítico capítulo 19 miʼ wen ajlel junchajp ñuc bʌ i cʼʌjñibal muʼ bʌ caj i coltañonla chaʼan bej chʼujulonla. Tiʼ yujtibal jiñi versículo 4 miʼ yʌl: «Joñoñʌch laʼ Yumon, laʼ Dioson». Yaʼ ti Traducción del Nuevo Mundo, ili tʼan o yan tac bʌ lʌcʼʌ lajal bʌ bajcheʼ ili 16 veces miʼ tilel ti ili capítulo. Ili miʼ cʼajtesʌbeñonla jiñi ñaxam bʌ mandar am bʌ yaʼ ti Diez Mandar, baqui miʼ yʌl: «Joñon a Yumon a Dioson. [...] Mach a ñop yambʌ dios» (Éx. 20:2, 3). Pejtelel xñoptʼan yom bʌ sujtel ti chʼujul yom miʼ wen qʼuel chaʼan maʼañic majqui o maʼañic chuqui yambʌ ñumen ñuc bʌ i cʼʌjñibal tiʼ tojlel, cojach bajcheʼ an yicʼot Jehová. I come i testigojonla Jehová, mi lac chaʼlen wersa chaʼan maʼañic mi lac mel muʼ bʌ i mejlel i bibʼesʌben i cʼabaʼ (Lv. 19:12; Is. 57:15).

15. ¿Chuqui yom miʼ ñijcañonla lac mel jiñi versículo tac am bʌ ti Levítico 19 muʼ bʌ i taj ti tʼan jiñi majtañʌl tac?

¹⁵ Cheʼ bʌ jiñi israelitajob miʼ jacʼbeñob  i mandar tac Dios, miʼ pʌsob chaʼan mucʼʌch i chʼʌmob Jehová bajcheʼ i Dios. Levítico 18:4 miʼ yʌl: «Yom mi laʼ chʌn mel pejtelel jini c mandar. Pejtelel jini c tʼan yom mi laʼ chʌn jacʼ tiʼ pejtelel qʼuin. Come joñoñʌch laʼ Yumon laʼ Dioson». Ti capítulo 19 miʼ taj ti tʼan chaʼpʼej uxpʼejl mandar tsaʼ bʌ aqʼuenti jiñi tejclum Israel. Jumpʼejl ejemplo, yaʼ ti versículo 5 cʼʌlʌl 8, 21 yicʼot 22 miʼ taj ti tʼan jiñi tsʌnsʌbil bʌ majtañʌl tac. Ili majtañʌl tac yom miʼ yʌjqʼuel cheʼ bajcheʼ miʼ mulan Jehová. Cheʼ mi lac pejcan ili versículo tac, yom miʼ ñijcañonla chaʼan mi lac tijicñesan Jehová yicʼot mi lac melben i yeʼtel cheʼ bajcheʼ miʼ mulan, cheʼ bajcheʼ miʼ subeñonla Hebreos 13:15.

16. ¿Baqui bʌ principio am bʌ ti Levítico 19 miʼ cʼajtesʌbeñonla chaʼan jiñi muʼ bʌ i melbeñob i yeʼtel Dios mach lajalobic bajcheʼ jiñi yañoʼ bʌ?

¹⁶ Chaʼan chʼujulonla, yom mi lac chaʼlen wersa lac pʌs chaʼan mach lajaloñicla bajcheʼ yañoʼ bʌ. Wocolʌch iliyi, come an i tajol jiñi lac piʼʌlob ti clase, ti eʼtel, lac familia mach bʌ xñoptʼañobic o yañoʼ bʌ miʼ mejlel i xicʼoñobla chaʼan mi lac mel muʼ bʌ i mʌctañonla chaʼan mi lac melben i yeʼtel Jehová. Cheʼ bʌ miʼ yujtel iliyi, añʌch chuqui yom mi lac mel. ¿Chuqui mi caj i coltañonla chaʼan mi lac mel chuqui wen? Laʼ laj qʼuel jumpʼejl principio am bʌ ti Levítico 19:19, baqui miʼ tʼox al: «Mach yomic xʌbʌl tsuts yicʼot lino ti laʼ pislel». Ili mandar miʼ coltan jiñi tejclum Israel chaʼan miʼ pʌsob chaʼan mach lajalobic bajcheʼ jiñi yambʌ tejclum tac. Ili ora, mach mulilic cheʼ an lac pislel am bʌ i chaʼan chaʼchajp pisil, bajcheʼ algodón yicʼot mezclilla o yan tac bʌ. Mach bʌ weñic jin cheʼ lajalonla bajcheʼ jiñi lac piʼʌlob muʼ bʌ i ñopob yicʼot muʼ bʌ i melob am bʌ tiʼ contra jiñi Biblia, mach yʌlʌyic mi lac piʼʌlob ti clase, ti eʼtel o lac familiajob. I sujmʌch, mi laj cʼuxbin jiñi lac familia i mi lac pʌsben cʼuxbiya jiñi yambʌ lac piʼʌlob. Pero, cheʼ bʌ an chuqui ñuc bʌ i cʼʌjñibal mi caj lac mel, la com lac pʌs chaʼan jiñi i wiñiconbʌla Jehová qʼuexeloñʌchla. Laʼ laj cʼajtesan chaʼan mi la com chaʼan chʼujul mi la cajñel, ñuc i cʼʌjñibal cheʼ i chaʼañon jachla Dios (2 Cor. 6:14-16; 1 Ped. 4:3, 4).

17, 18. ¿Chuqui ñuc bʌ i cʼʌjñibal miʼ pʌsbeñonla Levítico 19:23-25?

¹⁷ Jiñi tʼan «joñoñʌch laʼ Yumon laʼ Dioson» tsiʼ wen colta jiñi israelitajob chaʼan miʼ qʼuelob chaʼan jiñi ñumen ñuc bʌ i cʼʌjñibal jiñʌch cheʼ wen añob yicʼot Jehová. Laʼ laj qʼuel junchajp bajcheʼ tsaʼ mejli i melob cheʼ bajcheʼ miʼ yʌl Levítico 19:23-25 (pejcan). Laʼ cu lac ñaʼtan chuqui yom i yʌl tiʼ tojlel jiñi israelitajob ili tʼan tac cheʼ bʌ tsaʼix ochiyob yaʼ ti Lum tsaʼ bʌ wʌn subentiyob. Mi an majqui miʼ pʌcʼ i teʼ  muʼ bʌ i yʌcʼ i wut, uxpʼejl jab maʼañic miʼ mejlel i cʼuxben i wut. Cheʼ tiʼ chʌmpʼejlel jab, jiñi i wut i pʌcʼʌb miʼ yʌcʼ yaʼ ti tabernáculo. Jinto cheʼ tiʼ chʌmpʼejlel jab miʼ mejlel i cʼuxben i wut i pʌcʼʌb. Ili mandar tsiʼ colta jiñi israelitajob chaʼan miʼ ñaʼtañob chaʼan jiñi ñumen ñuc bʌ i cʼʌjñibal mach jiñic chuqui yomob. Yom miʼ ñopob chaʼan Jehová mi caj i yʌqʼueñob jiñi i cʼʌjñibal bʌ i chaʼañob yicʼot chaʼan jiñi ñumen ñuc bʌ i cʼʌjñibal jiñʌch cheʼ miʼ melbeñob i yeʼtel. Jehová mi caj i yʌqʼueñob i bʌl i ñʌcʼ. Tiʼ subeyob jaʼel chaʼan miʼ yʌcʼob chuqui tac añob i chaʼan yaʼ ti tabernáculo, yaʼ baqui miʼ yujtel chʼujutesaya.

¹⁸ Jiñi mandar am bʌ ti Levítico 19:23-25 miʼ cʼajtesʌbeñonla tsaʼ bʌ i yʌlʌ Jesús tiʼ Cʌntesa yaʼ ti bujtʌl: «Cʌyʌ laʼ cʼojoʼtan [...] chuqui mi caj laʼ jap yicʼot laʼ cʼux». Tsiʼ bej alʌ: «Jiñi laʼ Tat am bʌ ti panchan yujil chaʼan i cʼʌjñibal tacʌch laʼ chaʼan iliyi». Jehová mi caj i yʌqʼueñonla i cʼʌjñibal bʌ lac chaʼan, cheʼ bajcheʼ miʼ mel tiʼ tojlel jiñi xmateʼmut (Mat. 6:25, 26, 32). Mi lac ñop chaʼan Jehová mi caj i cʌntañonla. Cheʼ jaʼel, anquese maʼañic mi lac sub, mi laj coltan jiñi yomoʼ bʌ coltʌntel i mi lac chaʼlen coltaya ti taqʼuin yaʼ ti congregación. Jehová miʼ qʼuel cheʼ bʌ mi lac tʼox chuqui an lac chaʼan i mi caj i qʼuextʌbeñonla (Mat. 6:2-4). Mi mucʼʌch lac tʼox chuqui an lac chaʼan, mi lac pʌs chaʼan tsaʼix lac ñaʼta muʼ bʌ i yʌl Levítico 19:23-25.

19. ¿Bajcheʼ an i coltayet jiñi versículo tac tsaʼ bʌ ujti laj qʼuel ti Levítico?

¹⁹ Jiñi tsaʼ bʌ ujti laj qʼuel ti chaʼpʼej uxpʼejl versículo ti Levítico 19 cabʌl chuqui tsiʼ pʌsbeyonla chaʼan chuqui miʼ mejlel lac mel chaʼan chʼujulonla bajcheʼ Jehová. Cheʼ mi lac lajin Jehová, mi lac pʌs chaʼan mucʼʌch lac chaʼlen wersa chaʼan chʼujulonla tiʼ pejtelel lac melbal (1 Ped. 1:15). Cabʌl lac piʼʌlob maʼañic bʌ miʼ melbeñob i yeʼtel Jehová an i qʼueleyob jiñi wem bʌ lac melbal. I jiñi anto i ñijcayob chaʼan miʼ yʌqʼueñob i ñuclel Jehová (1 Ped. 2:12). Pero cabʌlto chuqui miʼ mejlel laj cʌn yaʼ ti Levítico capítulo 19. Ti jiñi yambʌ estudio mi caj laj qʼuel yambʌ versículo tac i mi caj i coltañonla laj qʼuel bajcheʼ tac yambʌ miʼ mejlel lac pʌs chaʼan chʼujulonla ti laj cuxtʌlel cheʼ bajcheʼ tsiʼ yʌlʌ jiñi apóstol Pedro.