TANE MEKUN 48
“Nyipiewekë Tro Nyipunie a Hmitrötr”
“Hmitrötre ju fe ngöne la nöjei aqane ujë i nyipunie.”—1 PET. 1:15.
NYIMA 34 Tro Jë Ngöne La Nyipici
MEKUN KA TRU *
1. Nemene la eamo hnei Peteru hna hamën kowe la itre Keresiano, nge pine nemene matre jol koi angatr troa trongën ej?
NGACAMA easa mejiun troa mel e hnengödrai maine e celë fen, ngo hetre ini hne së hna troa xom qa ngöne la eamo i Peteru aposetolo. Öni nyidrë: “Tune lo Atre Ka Hmitrötr ka hë nyipunie, hmitrötre ju fe ngöne la nöjei aqane ujë i nyipunie, ke hna cinyihane lo ka hape: ‘Nyipiewekë tro nyipunie a hmitrötr, ke ka hmitrötre ni.’” (1 Pet. 1:15, 16) Kola amaman e celë laka, ijije hi tro sa nyitipu Iehova, Akötresie ka hmitrötr. Celë hi matre, loi e tro sa hmitrötr ngöne la aqane ujë së. Ngo tha ka hmaloi kö ke, itre atr ka tha pexeje kö së. Hnei Peteru fe hna tria, ngo kola mama ngöne la mele i nyidrë laka, ijije hi tro sa “hmitrötr.”
2. Nemene la itre hnying hna troa sa ngöne la tane mekun celë?
2 Ame ngöne la tane mekun celë, tro sa ce wang la itre hnying hna hape: Kola hapeu la troa hmitrötr? Nemene la hna qaja hnei Tusi Hmitrötr göne la ehmitrötre i Iehova? Tune kaa la aqane tro sa hmitrötr ngöne la aqane ujë së? Nge pine nemene matre nyipiewekë tro sa hmitrötr matre catr la aqane imelekeu së me Iehova?
KOLA HAPEU LA TROA HMITRÖTR?
3. Nemene la mekuna itre xan göne la aqane troa hmitrötr?
3 Alanyimu la ka mekun laka, ame la atr ka hmitrötr ke, kola mama ngöne la aqane heetre i angeic, nge tha ka dredrehnyima kö nge ka lapa thaup. Ngo tha eje kö lai. Eje hi, Iehova la “Akötresie ka madrin.” (1 Tim. 1:11) Tusi Hmitrötr a qaja ka hape, ka “manathith” me madrin la itre hlue i Nyidrë. (Sal. 144:15) Ketre, hnei Iesu hna amekötin la itre ka aisapengönë angatr me itre xan ngöne la aqane heetr, me kuca la loi göi troa pi mama. (Mat. 6:1; Mar. 12:38) Ame easë itre Keresiano, easa thel e hnine la Tusi Hmitrötr, la aqane tro sa hmitrötr tui Iehova. Atre hi së laka, tha tro kö Iehova a hamëne la ketre wathebo hne së hna thatreine troa trongën. Celë hi matre, ame lo Nyidrëti a qaja ka hape: “Nyipiewekë tro nyipunie a hmitrötr,” kolo hi lai a hape, ijije hi tro sa hmitrötr. Ngo nyipiewekë tro sa pane atre la aliene la troa hmitrötr, matre atreine amaman ngöne la aqane ujë së.
4. Kola hapeu la troa “hmitrötr”?
4 Kola hapeu la troa hmitrötr? Ame la hnaewekë “hmitrötr” me “ehmitrötren” ngöne la Tusi Hmitrötr ke, kola qaja la pengöne la ketre atr maine ketre ewekë ka wië ngöne la nöjei götran. Kola wië ngöne la itre mekun, ngöne la aqane ujë me aqane hmi. Nge hna amë thatraqane la huliwa i Akötresie. Eje hi, easa hmitrötr ngöne la easa thupëne la aqane mele së, me atrunyi Iehova thenge la aja i Nyidrë, me acatrene la aqane imelekeu së me Nyidrë. Drei la ketre manathith ka tru la troa easenyi koi Iehova, Akötresie ka hmitrötr. Easa madrine la kola mama ngöne la Tusi Hmitrötr, la ehmitrötre i Nyidrë!
“HMITRÖTR, HMITRÖTR, HMITRÖTRE IEHOVA”
5. Nemene la hna amamane hnene la itre angela göi Iehova?
5 Ame Iehova ke, Akötresie ka wië ngöne la nöjei götran. Celë hi lai hna qaja hnene la itre serafi, itre angela ka cil xötreithe la therone i Iehova. Öni angatr: “Hmitöt, hmitöt, hmitöt, Iehova ne sabaoth.” (Is. 6:3) Nyipiewekë troa hmitrötr la itre angela, matre troa acatrene la aqane imelekeu i angatr me Iehova. Celë hi lai ka mama koi Mose lo kola mele la sinöe ka ithiny. Eje hi, hna traqa hnene la ketre angela, matre hmitrötre hë la götrane cili.—Eso. 3:2-5; Ios. 5:15.
Hna sija ngöne la korona gool hna amë hune la itrapetre ne la atre huuj ka tru, ka hape, “Hmitrötr koi Iehova.” (Wange ju la paragarafe 6-7)
6-7. (a) Nemene la hna qaja hnei Mose ngöne Esodo 15:1, 11, göne la ehmitrötre i Iehova? (b) Nemene la ka amekunëne la angetre Isaraela laka, ka hmitrötre Iehova? (Wange ju la icetrön.)
6 Thupene la Mose a eatrongëne la angetre Isaraela ngöne la Hnagejë Ka Palulu, hnei angeic hna amekunë angatr laka, Akötresieti ka hmitrötre Iehova. (E jë la Esodo 15:1, 11.) Eje hi, ame lo itre ka thile kowe la itre haze ne Aigupito ke, tha ka hmitrötre kö angatr. Ketre tune fe la itre ka thile kowe la itre haze ne Kanana. Hnei angatr hna huujëne la itre nekönatr me kuca la itre huliwa ka sis. (Lev. 18:3, 4, 21-24; Deu. 18:9, 10) Ngo ame Iehova, tha tro kö Nyidrëti a upe la itre hlue i Nyidrë troa kuca la itre huliwa cili ke, Akötresie ka hmitrötre Nyidrë. Celë hi lai hna sija hune la korona gool hna amë hune la itrapetre ne la atre huuje ka tru. Kola hape, “Hmitrötr koi Iehova.”—Eso. 28:36-38.
7 Kolo lai a amekunëne la angetre Isaraela laka, Akötresie ka hmitrötre Iehova. Ngo tune kaa kowe la itre ka tha öhne kö la hna sija cili? Tha nyipiewekë kö troa öhne lo lai hna sija ke, hna anyimua e la Wathebo kowe la itre trahmany, itre föe me itre nekönatr. (Deu. 31:9-12) Maine easë ju ngöne la ijine cili, tro fe sa hane dreng la kola qaja ka hape: “Iehova ni Akötesi nyipunie, . . . hmitöteju nyipunie, ke hmitöte ni.” “Tro nyipunie a ite ka hmitöte koi ni; ke hmitöte ni Iehova.”—Lev. 11:44, 45; 20:7, 26.
8. Nemene la hna qaja ngöne Levitiko 19:2 me 1 Peteru 1:14-16?
8 Ame ngöne la kola e la Wathebo kowe la angetre Isaraela, kolo fe a qaja la Levitiko 19:2. Öni Iehova koi Mose: “Qajajë kowe la icasikeu asë ite nekö i Isaraela, me hape koi angat, ‘Hmitöteju nyipunie; ke hmitöte ni Iehova Akötesi nyipunie.’” Celë hi lai xötr hna xom hnei Peteru matre upe la itre Keresiano troa “hmitrötr.” (E jë la 1 Peteru 1:14-16.) Eje hi, tha easë hmaca kö fene la Wathebo. Ngo hnei Peteru hna amexeje lo hna qaja ngöne Levitiko 19:2 laka, ngacama easa mejiun troa mel e hnengödrai maine e celë fen, ngo loi e tro sa hmitrötr ke, ka hmitrötre Iehova.—1 Pet. 1:4; 2 Pet. 3:13.
“LOI E TRO SA HMITRÖTR . . . NGÖNE LA AQANE UJË SË”
9. Pine nemene matre nyipiewekë tro sa ce wang la tusi Levitiko mekene 19?
9 Easa ajane troa amadrinë Iehova, Akötresie ka hmitrötr. Celë hi matre, easa thele troa hmitrötr ngöne la mele së. Nge nyimutre la itre eamo hnei Iehova hna hamën ngöne la tusi Levitiko 19 thatraqane lai. Öni Marcus Kalisch, ketre ka inine la qene Heberu: “Celë hi la mekene tus ka sisitria catr ngöne la tusi Levitiko. Ketre, ka nyipiewekë kö ej hune la faifi lao pane itus ne la Tusi Hmitrötr.” Easa troa ce wang me xomi ini qa ngöne la tusi Levitiko 19. Kola nyiqaane la itre xötr cili memine la hna hape, “Hmitöteju nyipunie.”
Nemene la aqane tro sa trongëne la hna qaja ngöne Levitiko 19:3? (Wange ju la paragarafe 10-12) *
10-11. Thenge la Levitiko 19:3, nemene la nyine tro sa kuca matre troa hmitrötr ngöne la aqane ujë së, nge pine nemene matre ka nyipiewekë lai?
10 Thupene la Iehova a upe la angetre Isaraela troa hmitrötr, öni Nyidrë: “Tro nyipunie a isa qouene la ite thine i nyipunie, me ite keme i nyipunie . . . Iehova ni Akötesi nyipunie.”—Lev. 19:2, 3.
11 Iehova a upi së troa metrötrëne la keme me thine së. Pane mekune jë lo ijine kola hnying koi Iesu hnene la ketre trahmany. Öni angeic: “Nemene la ewekë ka lolo nyine tro ni a kuca matre hetrenyi ni la mele ka pë pun?” Öni Iesu ka hape, troa metrötrën me hnime la itre keme me thin. (Mat. 19:16-19) Ketre, hnei Iesu hna amekötin la itre Faresaio me itretre cinyihan ke, xele kö angatr troa thupëne la keme me thine i angatr. Eje hi, angatr a “apatrene la trengewekë i Akötresie.” (Mat. 15:3-6) Nge kola qaja ngöne la “Trengewekë i Akötresie” la hnafaifine Wathebo memine la Levitiko 19:3. (Eso. 20:12) Tune la hne së hna ce wang, kola nyiqane la tusi Levitiko 19:3, ka hape, “Hmitöteju nyipunie; ke hmitöte ni Iehova; Akötesi nyipunie.” Thupene lai, kola qaja la enyipiewekëne troa metrötrëne la itre keme me thin.
12. Tune kaa la aqane tro sa trongëne la hna qaja ngöne Levitiko 19:3?
12 Loi e tro sa isa hnying ka hape, ‘Eni kö a metrötrëne la keme me thineng?’ Maine easa öhne laka, tha hne së kö hna xomi ijine troa thupë nyidro, loi e tro sa saze me thele la nyine troa kuca. Ngacama pëkö hne së hna kuca ekö, ngo loi e tro sa nue trengecatr me xomi ijin matre troa thupë nyidro me xatua nyidro. Aqane tro hi së lai a trongëne la hna qaja ngöne Levitiko 19:3.
13. (a) Nemene la ketre eamo hna hamën ngöne Levitiko 19:3? (b) Thenge la Luka 4:16-18, nemene la hna majemine kuca hnei Iesu e Sabath, nge tro sa nyitipu nyidrë tune kaa?
13 Ame ngöne Levitiko 19:3, kola qaja la ketre nyine tro sa kuca matre tro sa hmitrötr. Kola upi së troa thupëne la itre Sabath. Ngacama tha easë hmaca kö fene la Wathebo i Mose, ngo hetre ini hne së hna troa xom qa ngöne la aqane metrötrëne la angetre Isaraela la Sabath. Thenge la Wathebo, tha tro kö angatr a huliwa la Sabath. Angatre pe a xome la ijine cili matre troa acatrene la aqane imelekeu i angatr me Akötresie. * Celë hi lai hna kuca hnei Iesu. Hnei nyidrëti hna majemine tro kowe la sunago e Sabath, matre troa e la Trengewekë i Akötresie. (Eso. 31:12-15; e jë la Luka 4:16-18.) Ame la hna qaja ngöne Levitiko 19:3 ka hape, tro nyipunie a “thupëne la itre sabathing,” tre, kola upi së troa xomi ijin, matre acatrene la lapaune së koi Iehova. Hapeu, easë kö a trongëne la wathebo celë? Maine tro palahi sa xomi ijin kowe la huliwa i Iehova, tro hë së lai a acatrene la aqane imelekeu së me Nyidrë. E cili, tro hë sa hmitrötr.
TROA ACATRENE LA LAPAUNE SË KOI IEHOVA
14. Nemene la mekun ka tru hna amamane ngöne Levitiko mekene 19?
14 Ame ngöne Levitiko mekene 19, hna anyimua qaja la ketre mekun ka troa xatua së troa hmitrötr. Ame ngöne la xötre 4 kola hape: “Iehova ni Akötesi’ö.” Traqa koi 16 lao qaja la hnaewekë cili ngöne Levitiko 19. Kola amekunë së lo pane Wathebo, ka hape: “Iehova ni Akötesi’ö. . . . The tro kö eö a nyi xa haze qëmekeng.” (Eso. 20:2, 3) Maine easa ajane troa hmitrötr, tha tro pi kö sa nue la ketre atr maine ketre ewekë troa thë la aqane imelekeu së me Akötresie. Ketre, easa xome la ëje i Iehova, matre tha tro pi kö sa kuca la ketre ewekë ka troa adrone la ëje i Nyidrë ka hmitrötr.—Lev. 19:12; Is. 57:15.
15. Nemene la hna upi së troa kuca ngöne Levitiko 19, lo kola qaja la itre öni hna huujën?
15 Hnene la angetre Isaraela hna drengethenge la itre wathebo i Iehova. Celë hi aqane amamane angatr laka, Iehova la Akötresi angatr. Kola qaja ngöne Levitiko 18:4: “Qâ i nyipunie troa kuca la ite hnenge hna amekötin, me thupëne la ite wathebonge mate xöte thenge it’ ej.” Ame ngöne la mekene 19, hetrenyi fe la itre xaa hna amekötin kowe la nöje Isaraela. Ame ngöne la xötre 5-8, 21, 22, kola qaja la itre öni hna huujën. Nyipiewekë tro la angetre Isaraela a huujëne itre ej thenge la aja i Iehova, matre tha tro kö a ‘adrone la ewekë ka hmitötre i Iehova.’ Itre xötre celë a ithuecatre koi së troa amadrinë Iehova, me hamë Nyidrëti la itre huuj qa ngöne la ukeineqë së, tune la hna qaja ngöne Heberu 13:15.
16. Nemene la hna qaja ngöne la tusi Levitiko ka amamane la eisapengönene la hlue i Akötresie me itre xan?
16 Tha ka hmaloi kö koi së enehila troa hmitrötr. Maine jë, troa upi së hnene la itre sinee së, me itre sine ini së, me itre ka ce huliwa me easë, troa kuca la ketre ewekë ka tha ihmeku kö memine la hna qaja hnei Tusi Hmitrötr. E cili, nyipiewekë tro sa axecië mekun hnyawa. Nemene la ka troa xatua së? Kola qaja ngöne Levitiko 19:19, ka hape: “The tro kö eö a xetëne la ixete hna ithuenyiköne lino me pene mamoe.” Hnene la wathebo celë hna aisapengönëne la angetre Isaraela memine la itre xaa nöj. Ame enehila, pëkö engazone troa heetrëne la itre iheetr hna kuca hnei koto me lino. Ame pe, easa thupën matre tha tro kö sa nyitipune la itre ka mejiun kowe la itre ini ka isazikeu memine la Tusi Hmitrötr, ngacama itre sinee së ju hë, maine sine huliwa, maine sine ini pena. Eje hi, easa hnime la itre sinee së me metrötrë itre xan. Ngo qëmekene troa axecië mekun, easa pane thele la mekuna i Iehova, ngacama kola aisapengönë së me itre xan. Tha tro kö sa thëthëhmin laka, ame la ka hmitrötr, tre, hna amë thatraqane la huliwa i Akötresie. Haawe, maine easa ajane troa amadrinë Iehova, tha tro kö sa nyitipune la itre xan.—2 Kor. 6:14-16; 1 Pet. 4:3, 4.
Maine ju, nemene la ini hna troa xom hnene la angetre Isaraela ngöne Levitiko 19:23-25, nge nemene la ini koi së enehila? (Wange ju la paragarafe 17-18) *
17-18. Nemene la itre ini hne së hna xom qa ngöne la tusi Levitiko 19:23-25?
17 Ame la hna hape, “Iehova ni Akötresi nyipunie” ke, kola upe la angetre Isaraela troa amë panëne la huliwa i Iehova. Tune kaa? Hanawang la hna qaja ngöne Levitiko 19:23-25. (E jë.) Nemene la hna qaja ngöne la itre xötr celë kowe la atre Isaraela ka troa lö kowe la Nöj Hna Thingehnaean? Maine tro angeic a traan la ketre sinöe, tha tro kö angeic a huje la itre wene sinöe ngöne la köni pane macatre. Ame hë la hnaafoane macatre, loi e tro angeic a tro fë la itre wene sinöe nyine huuj koi Akötresie. Nge ame pë hë ngöne la hnaafaifine macatre, ijiji angeice hë troa hane ij la itre wene sinöe. Maine ju, jëne la wathebo cili, tro la angetre Isaraela a trotrohnine laka, tha tro kö a amë panëne la itre sipu aja i angatr. Iehova pe a ajane tro angatr a mejiun koi Nyidrë me amë panëne la huliwa i Nyidrë. Ketre, tro kö Nyidrëti a hamë angatr la ka ijij kowe la mele i angatr. Celë hi matre, Nyidrëti a ithuecatr koi angatr troa catre ham, me tro fë la itre huuje cili thatraqane la hmi ka wië.
18 Kola amekunë së hnene la wathebo ngöne Levitiko 19:23-25, la itre trengewekë i Iesu ngöne la Cainöj Hune La Wetr. Öni nyidrë: “Ea loi ju hë hna hnehengazone . . . göi nyine xen, me nyine ij.” Nge öni Iesu hmaca jë hi: “Atre kö la Keme i nyipunie e koho hnengödrai ka hape, ka nyipiewekë koi nyipunie la itre ewekë cili.” Eje hi, tro kö Iehova a hamën la ka ijij thatraqane la mele së, tune la aqane thuane Nyidrëti la itre waco. (Mat. 6:25, 26, 32) Easa mejiun koi Iehova, Atre nyihnyawane la mele së. Celë hi matre, loi e tro sa catre ham me xatuane la itre ka pë ewekë. Nge easë fe a kuië ahnahna thatraqane la itre huliwa ne la ekalesia. Tha sihngödri kö koi Iehova la hni ne hame së. Tro kö Nyidrëti a amanathithi së. (Mat. 6:2-4) Haawe, amamane jë së laka, trotrohnine hnyawa ha së la itre ini hna hamën ngöne Levitiko 19:23-25.
19. Nemene la itre ini hne së hna xom qa ngöne la tusi Levitiko ngöne la tane mekun celë?
19 Ame ngöne la tane mekun celë, hne së hna ce wang la hna qaja ngöne la tusi Levitiko 19 göne la aqane tro sa hmitrötr tui Iehova. Loi e tro sa nyitipu Nyidrë me ‘hmitrötr ngöne la aqane ujë së.’ (1 Pet. 1:15) Eje hi, nyimutre la itre atr ka tha nyihlue i Iehova kö, nge ka haine la itre thiina së ka lolo. Celë hi ka upi angatr troa nyihlue i Iehova. (1 Pet. 2:12) Ngo hetre itre xaa ini palakö hna hamën ngöne la tusi Levitiko 19. Celë hi lai hne së hna troa ce wang ngöne la ketre tane mekun. Tro sa ce ithanatane la itre xaa aqane tro sa “hmitrötr,” tune la hna qaja hnei Peteru.
NYIMA 80 “Demeju, Nge Atejë Laka Ate Ihnimi Iehova”
^ Tru la ihnimi së koi Iehova, nge easa ajane troa amadrinë Nyidrë. Ame Iehova ke, Akötresie ka hmitrötr, nge Nyidrëti a ajane tro la itre hlue i Nyidrëti a hmitrötr. Ijije kö troa hmitrötr la itre atr ka tha pexeje kö? Eje hi. Tro sa ce wang la aqane tro sa hmitrötr ngöne la aqane huliwa së. Tro fe sa ce wang la eamo hna hamën hnei Peteru aposetolo kowe la itre Keresiano, me itre trepene meköti Iehova kowe la nöje Isaraela.
^ Maine epuni a aja itre xaa ithuemacanyi göne la Sabath me xomi ini qa ngön, wange ju la tane mekun hna hape, “‘Hete Pui Ne La Nöjei’ Huliwa Me Mano” ngöne la Ita Ne Thup ne Diseba 2019.
