1. San apostel Peitilisi be taigi den Kelesten fu a ten fi en? Saide a sani ya á makiliki?

WINSI yu abi a howpu fu go a hemel efuso fu libi a goontapu, toku na ala u sa fende wini fu den sani di Peitilisi be taigi den Kelesten fu a ten fi en. Peitilisi be taki: ‘Leti enke fa a sama di kai u santa, a letiso u hii libi mu soi taki u santa. Bika Gadu buku taki: “U mu santa, bika mi santa”’ (1 Peit. 1:15, 16). A sani di Peitilisi taki ya e soi taki u poi waka a u Dda Yehofa baka, a moo santa sama di de. A fasi fa wi e libi mu soi taki u santa. Kande yu e si enke fu di wi abi sondu, da noiti wi o poi du a sani ya. Peitilisi seefi be e meke fowtu omen leisi, ma a fasi fa a du sani bakaten e soi taki sondu libisama poi libi a wan fasi di o meke Yehofa si den enke sama di santa.

2. Sowtu akisi wi o luku aini a artikel ya?

² On ten i sa taki wan sama santa? San Beibel e taki fu a santa di Yehofa santa? San o yeepi u fu du sani a wan fasi di e soi taki u santa? Saide u mu santa, efu wi á wani wi anga Yehofa poli? Wi o luku den akisi ya aini a artikel ya.

3. San omen sama e pakisei te den yee a wowtu santa? Fa wi o du sabi san a wani taki fu de santa tuutuu?

³ Te gaanse sama yee a wowtu santa, kande den e pakisei wan sama di e wei gaan langa keliki koosi. Den e si enke te wan sama santa, da a sama ya nai piisii. Ma a sani de a ná tuu, bika winsi fa Yehofa santa, toku Beibel e kai en ‘a koloku Gadu’ (1 Tim. 1:11). Den sama di e dini Yehofa e piisii (Ps. 144:15). Di Yesesi be de a goontapu, a be e kuutu den sama di be e wei kofaliki koosi fu soi taki den santa moo ala sama (Mat. 6:1; Malik. 12:38). Enke  Kelesten, a den sani di wi e leli aini Beibel fu Yehofa e soi u san a wani taki fu de santa tuutuu. U sabi taki a Gadu fu u noiti o akisi u fu du wan sani di a sabi taki u ná o poi du, bika a lobi u. Neen meke te Yehofa taigi u taki ‘u mu santa’, a wan sani di a sabi taki wi o poi du. Ma efu u wani de santa, u mu fusutan fosi san a sani ya wani taki.

4. San a wowtu santa wani taki?

⁴ On ten i sa taki wan sama santa? Te Beibel e taki fu a wowtu santa, da a wani taki wan sama e tyai enseefi a wan kiin fasi. A wani taki tu taki a sama ya nai mokisa a dini di ai dini Yehofa anga taa sani. Son leisi a wowtu santa abi fu du anga wan sani di wan sama poti a wan se fu dini Gadu. Dati wani taki efu wi e tyai useefi a wan bun fasi, efu wi e dini Yehofa enke fa a wani, da wi e meke moiti fu toon en mati, a o si wi enke sama di santa. A nai bigi gi i taki wi enke sama di sondu poi toon mati fu wan santa Gadu noh?

5. San a sani di wantu fu den engel fu Yehofa taki e leli u?

⁵ Te u luku san den seraf-engel di e sidon koosube na a kownusutuu fu Yehofa be taki, da wi e si taki Yehofa a wan kiin efuso santa Gadu. Wantu fu den engel ya be taki: ‘Yehofa di e tii den engel fi en santa, a santa, a santa’ (Yes. 6:3). Ala sama di wani toon Yehofa mati mu santa. Dati wani taki den engel ya seefi santa. Neen meke te wan engel fu Yehofa be kon a wan peesi a goontapu, son yuu a hii peesi de be e santa. Na a sani ya be pasa di Mosesi be go koosube fu a busi di be e boon.​—Ek. 3:2-5; Yow. 5:15.

6-7. (a) Enke fa Ekisodesi 15:1, 11 e soi, da fa Mosesi be soi taki Yehofa a wan santa Gadu? (b) Sowtu taa sani be e membee den Islayelisama taki Yehofa santa? (Luku a fowtow a fesise fu A Wakititolen.)

⁶ Baka di Mosesi tyai den Islayelisama abaa a Lebi Se, a taigi den baka taki Yehofa a wan santa Gadu. (Leisi Ekisodesi 15:1, 11.) Den Egeptesama anga den Kaana-ansama be e dini falisi gadu, neen meke den á be santa. Te den sama ya be e dini den gadu fu den, den be e kii den pikin fu den enke ofaandi. Gaanse leisi den be e libi wan hululibi tu (Lef. 18:3, 4, 21-24; Deit. 18:9, 10). Ma Yehofa á be wani den sama di e dini en du sani di be o meke den á kiin moo. Te i luku a sani di be sikiifi na a gowtu banti di a gaan pilisite be e wei neen ede, da wi e si taki Yehofa a wan santa Gadu tuu. A be sikiifi taki: ‘Yehofa santa.’​—Ek. 28:36-38.

⁷ A sani di be sikiifi na a gowtu banti fu a gaan pilisite, be e membee ala sama taki Yehofa a wan santa Gadu. Ma meke u taki wan Islayelisama á be si a banti ya fu di noiti a be miti a gaan pilisite. Dati wani taki a á be o sabi taki Yehofa santa? Nono. Bika te den be e leisi a Weiti, na ala den man, den uman, anga den pikinnengee aini Islayeli be e yee en (Deit. 31:9-12). Wan pisi aini a Weiti di den be e yee na a pisi di e taki: ‘Mi a Yehofa u Gadu. U mu santa, bika mi santa.’​—Lef. 11:44, 45; 20:7, 26.

8. Saide ala sama di e dini Yehofa mu poti pakisei a Lefitikesi 19:2 anga 1 Peitilisi 1:14-16?

⁸ Meke u poti pakisei na a sani di sikiifi a Lefitikesi 19:2. Na a hii foluku den be e leisi a sani ya gi. Yehofa be taigi Mosesi taki: ‘Go taigi a foluku Islayeli taki: “U mu santa, bika mi Yehofa, u Gadu, santa.” ’ A gei enke na a sani ya Peitilisi be wani membee den Kelesten fu a ten fi en di a taigi den taki den mu santa. (Leisi 1 Peitilisi 1:14-16.) A tuu taki u nai holi a Weiti fu Mosesi aini a ten ya moo, ma toku a sani di Peitilisi taki e soi taki a sani di sikiifi a Lefitikesi 19:2 a tuu. Yehofa a wan santa Gadu, neen meke a wani useefi santa tu. Winsi wi abi a howpu fu go a hemel, efuso fu libi a goontapu, u mu meke moiti fu libi a wan fasi di o meke Yehofa si wi enke sama di santa.​—1 Peit. 1:4; 2 Peit. 3:13.

9. San wi o leli aini Lefitikesi kapitel 19?

⁹ U wani du sani di e meke Yehofa piisii, neen meke u wani sabi fa u mu libi fu a sa si wi enke sama di santa. Kapitel 19 fu Lefitikesi e soi u wantu sani di u sa du efu u wani Yehofa si wi enke sama di santa. Marcus Kalisch, wan sabiman fu a Hebrewtongo sikiifi taki: ‘A kapitel ya a wan fu den moo pelensipali wan fu a Beibel buku Lefitikesi. Nawan taa kapitel á de di e taki so finifini fa den Islayelisama be mu du sani efu den be wani Gadu si den enke sama di santa.’ Wi o poti pakisei a wantu vers aini a kapitel ya. Den o leli u wantu moin sani fu a fasi fa u mu tyai useefi. Te wi e luku den vers ya, da holi a sani di be sikiifi na a bigin fu a kapitel ya a pakisei. A be taki: ‘U mu santa.’

10-11. San Lefitikesi 19:3 taki u mu du? Saide a sani ya pelensipali?

¹⁰ Baka di Yehofa taigi den Islayelisama taki den mu santa, a taigi den taki: ‘U mu lesipeki u mma anga u dda. Mi a Yehofa, u Gadu.’​—Lef. 19:2, 3.

¹¹ Ala sama di e dini Yehofa mu e lesipeki den mma anga den dda. Kande i sabi a toli fu a man di be akisi Yesesi taki: ‘Sowtu bun mi mu du fu fende teego libi?’ Yesesi be taigi a man ya taki a mu lesipeki en mma anga en dda (Mat. 19:16-19). Yesesi be e kuutu den Faliseiman anga den Saduseiman fu di den á be e lesipeki den mma anga den dda. A sani di den man ya be e du be ‘e meke a wowtu fu Gadu lasi kaakiti’ (Mat. 15:3-6). Du fu  feifi fu den Tin Weiti di Yehofa be gi den Islayelisama anga Lefitikesi 19:3 a wan pisi fu ‘a Wowtu fu Gadu’ tu (Ek. 20:12). Baka di Yehofa taki aini Lefitikesi 19:2 taki ‘u mu santa bika mi santa’, a taigi den Islayelisama taki den mu lesipeki den mma anga den dda. A sani ya e soi taki Yehofa e si en enke wan pelensipali sani taki wi e lesipeki u mma anga u dda.

12. Fa i sa du a sani di sikiifi a Lefitikesi 19:3?

¹² I si enke yu e lesipeki i mma anga i dda enke fa Yehofa wani? Kande den ten di pasa yu á be e du a sani ya enke fa i mu du en. Yu á poi kengi san pasa kaba, ma i sa meke moiti fu du sani taa fasi nownow. Kande i sa meke moo ten fu de makandaa anga den. Efu a moni se den swaki, luku fa i sa yeepi den. Efu den abi yeepi fanowdu fu dini Yehofa moo bun, du ala san i poi fu yeepi den. Te yu e du den sani ya, da yu e soi taki yu e du san sikiifi a Lefitikesi 19:3.

13. (a) Sowtu taa sani Lefitikesi 19:3 e leli u? (b) Fa u sa waka a Yesesi baka aini a ten ya? (Lukasi 4:16-18)

¹³ Lefitikesi 19:3 e taki wan taa sani di u mu du efu u wani Gadu si wi enke sama di santa. Ai soi taki a foluku fu Gadu be mu e holi a Sabadei. U sabi taki Kelesten aini a ten ya nai wooko anga a Weiti fu Mosesi moo, neen meke u ná abi fu holi a Sabadei. Ma toku u sa leli wan sani fu a tekisi ya te u luku sowtu wini den Islayelisama be e fende te den be e holi a Sabadei. * A dei ya den be mu fika den wooko fu den, fu poti ala den pakisei na a dini di den be mu dini Yehofa. Neen meke Yesesi be lobi go na a snoga a den Sabadei fu leisi a Wowtu fu Gadu (Ek. 31:12-15; leisi Lukasi 4:16-18.) A sani di Yehofa be taigi den Islayelisama a Lefitikesi 19:3, e leli u taki winsi fa u libi e doloki, toku u mu e meke ten fu poti pakisei a Yehofa anga a dini di wi e dini en. I si enke i mu du moo na a pisi ya? Efi yu e meke ten ala yuu fu leisi i Beibel anga fu sutudeli, yu o si taki yu anga Yehofa o toon moo bun mati. Efi yu anga Yehofa a mati, a o si yu enke wan sama di santa.

14. Sowtu pelensipali sani Lefitikesi kapitel 19 e leli u?

¹⁴ Lefitikesi kapitel 19 e taki fu wan pelensipali sani di o yeepi u fu de sama di santa. A kaba pisi fu vers 4 e taki: ‘Mi a Yehofa i Gadu.’ A wan sani fu 16 leisi a kapitel ya e taki a sani ya. A sani ya e meke u pakisei a fosiwan fu den Tin Weiti di Yehofa be gi den Islayelisama. A be taki: ‘Mi a Yehofa u Gadu. Wi á mu dini taa gadu boiti mi’ (Ek. 20:2, 3). Efu u wani Yehofa si wi enke sama di santa, da wi á mu meke nawan sani efuso sama poli wi anga en. Fu di wi e tyai a nen fu Yehofa meke u mu luku bun tu fu u nai du sani di o poli a santa nen fi en.​—Lef. 19:12; Yes. 57:15.

15. San den vers fu Lefitikesi kapitel 19 di e taki fu den ofaandi di den Islayelisama be mu tyai e leli u?

¹⁵ Te den Islayelisama be e holi ala den weiti di Yehofa be gi den, da den be e soi taki a Yehofa den be e si enke den Gadu. Yehofa be taigi den aini Lefitikesi 18:4 taki: ‘U mu e du san mi e taigi u. U mu e holi den weiti fu mi. Mi a Yehofa u  Gadu.’ Kapitel 19 e taki fu wantu fu den weiti di Yehofa be gi den Islayelisama. Te i luku vers 5 te anga 8 anga vers 21 anga 22, da ape e taki fu den ofaandi di den be e tyai. Yehofa be taigi den taki te den be e tyai ofaandi gi en, den be mu santa. Den vers ya e yeepi u fu si taki te wi e tyai ofaandi gi Yehofa aini a ten ya, u mu du en a wan fasi di e meke Yehofa piisii leti enke fa Hebrewsama 13:15 e soi.

16. Sowtu toli aini Lefitikesi e soi taki son yuu wi abi fu du sani taa fasi enke den sama di nai dini Yehofa?

¹⁶ Efu u wani Yehofa si wi enke sama di santa, wi á mu e feele fu du sani taa fasi enke taa sama. A ná ala yuu a sani ya makiliki. Bika son yuu den pikin a sikoo, den sama a wookope, efuso famii di nai dini Yehofa, e wani u du sani di sa meke Yehofa á si wi enke sama di santa moo. San o yeepi u fu tan du sani anga koni? Lefitikesi 19:19 e taki wan sani di sa yeepi u. Ai taki: ‘Wi á mu wei koosi di meke anga tu sowtu tetei.’ A weiti ya be e yeepi den Islayelisama fu den á go mokisa anga den taa foluku. Aini a ten ya u ná abi toobi fu wei koosi di meke anga tu sowtu tetei. Ma toku a sani di Yehofa be wani leli a foluku fi en pelensipali ete. U mu luku bun fu u nai mokisa den leli fu Beibel anga den sani di u famii, sama a wooko efuso sikoo e biibi. U lobi den famii fu u, ma fu di u wani Yehofa si wi enke sama di santa, meke u nai feele fu du sani taa fasi enke den. U mu holi a pakisei taki te wan sani efuso wan sama santa gi Yehofa, ai poti en apaiti fu taa sani. Neen meke efu u wani Yehofa si wi enke sama di santa, u mu meke moiti fu de taa fasi enke den sama di nai dini Yehofa.​—2 Kor. 6:14-16; 1 Peit. 4:3, 4.

17-18. San Lefitikesi 19:23-25 e leli u?

¹⁷ Yehofa be taigi den Islayelisama taki: ‘A mi a u Gadu.’ Dati wani taki den be mu e poti Yehofa a fesi aini den libi. Fa den be o du a sani ya? Lefitikesi 19:23-25 e yeepi u fu fusutan a sani ya moo bun. (Leisi en.) A tekisi ya e taki san den be mu du te den be doo a Paamisi Kondee. Te den be o paandi siibon, a dii yali langa den á be mu nyan den sii di a bon be o meke. A du fu fo yali den be mu gi Yehofa den sii di a bon be o meke. Na a du fu feifi yali fosi a sama di be abi a bon be sa nyan den sii fu a bon fi en. A weiti ya be e yeepi den Islayelisama fu fusutan taki den be mu poti Yehofa a fesi aini den libi.  Den be mu e fitoow taki Yehofa be o solugu den. Yehofa be e gi den taanga-sikin tu fu gi en sani anga den hii ati, bika a so den be e soi taki den e biibi taki a o gi den san den abi fanowdu.

¹⁸ A weiti di sikiifi a Lefitikesi 19:23-25 e meke u pakisei a sani di Yesesi be taki di a be e holi a lezing na a mongo. A be taki: ‘Wi á booko wi ede moo anga san wi o nyan efuso san wi o diingi.’ Baka dati a taki: ‘I Dda di de a hemel sabi taki yu abi den sani ya fanowdu.’ Yehofa o solugu u leti enke fa ai solugu den foo (Mat. 6:25, 26, 32). Fu di wi e biibi taki Yehofa o solugu u, meke wi e poti moni fu holibaka gi a wooko fi en di e du a hii goontapu. Wi e yeepi den baala anga sisa fu u tu. Yehofa e si ala den sani di yu e du, winsi kande taa sama nai si san i du (Mat. 6:2-4). Te wi e du sani na a fasi ya, da wi e soi taki u fusutan a sani di Yehofa be wani leli den Islayelisama a Lefitikesi 19:23-25.

19. San u leli aini den vers fu Lefitikesi kapitel 19 di u luku aini a artikel ya?

¹⁹ Aini a artikel ya, u luku wantu pisi fu Lefitikesi kapitel 19. Den vers di u luku ya soi u san u mu du efu u wani Yehofa si wi enke sama di santa. Te wi e du ala san o poi fu waka a Yehofa baka, da u hii libi o soi taki u santa (1 Peit. 1:15). A omen sama di nai dini Yehofa e si a fasi fa wi e tyai useefi. Na a sani ya meke den bigin gafa en (1 Peit. 2:12). Ma a omen taa moin sani u sa leli fu Lefitikesi kapitel 19. Aini a artikel di e kon, wi o taki fu wantu taa vers aini a kapitel ya. Den vers ya o soi u wantu taa sani di u mu du efu u wani Yehofa si wi enke ‘sama di santa’.