1. ¿Mbaʼe konséhopa omeʼẽ vaʼekue apóstol Pedro umi kristianokuérape, ha mbaʼérepa ikatu ñapensa imposivleha ñakumpli upéva?

 APÓSTOL Pedro ningo omeʼẽ vaʼekue peteĩ konsého umi kristianokuérape, ha upe konsého ideprovécho hína umi unhídope ha avei umi oikótavape ko yvy ape ári. Haʼe heʼi vaʼekue: “Peẽ penepotĩ vaʼerã entéro mbaʼe pejapóvape, ipotĩháicha upe penerenói vaʼekue. Ñandejára Ñeʼẽ heʼi voi: ‘Peẽ penepotĩ vaʼerã, pórke che sánto hína’” (1 Ped. 1:15, 16). ¿Mbaʼépa ñanemboʼe ko téxto? Ñande ikatuha ñanepotĩ ha ñanesánto Jehováicha, ha haʼe ohaʼarõ voi ñandehegui upéva. Péro ikatu hína ñapensa imposivleha jajapo upéva ñaneimperfékto rupi. Apóstol Pedro voi ningo heta vése ojavy vaʼekue, péro iñehémplo ñanemboʼe ñande ikatuha ñanesánto.

2. ¿Mbaʼépa jahecháta ko artíkulope?

² Ko artíkulope ñambohováita koʼã porandu: ¿Mbaʼépa heʼise ñanesánto? ¿Mbaʼéichapa la Biblia ohechauka Jehová santoha? ¿Mbaʼéichapa ikatu jahechauka ñanesantoha entéro mbaʼe jajapóvape? ¿Mbaʼérepa jaʼekuaa ñanesánto vaʼerãha Jehová haʼe hag̃ua ñane amigoite?

3. a) ¿Mbaʼéichapa oñeimahina jepi la hénte haʼeha peteĩ persóna isántova? b) ¿Mbaʼépa jareko vaʼerã enkuénta jaikuaa hag̃ua mbaʼeichaguápa peteĩ persóna isántova?

³ ¿Mbaʼéichapa la hénte oñeimahina oñekomportaha peteĩ persóna sánta? A lo mehór opensa haʼeha peteĩ persóna oñemonde diferentepáva ha hova santurrón guasúva. Péro upéva ningo ndaupéichai, pórke Jehová ningo sántonte avei péro la Biblia heʼi haʼe ovyʼaha (1 Tim. 1:11). Ha haʼe oipota avei isiervokuéra ovyʼa (Sal. 144:15). Jesús ningo okondena  vaʼekue voi umi fariséope, pórke haʼekuéra oñemonde diferentepa ha oiko oñembohústo guaʼu ojechauka hag̃uánte (Mat. 6:1; Mar. 12:38). ¿Péro mbaʼépa ñapensa ñande kristianokuéra? Jaikuaa hag̃ua oimépa peteĩ persóna sánto hína Jehová renondépe, ñande jareko enkuénta la Biblia heʼíva, ha ndahaʼéi umi hénte heʼíva. Ñande ningo jaikuaa porã Jehová ñanderayhuetereiha. Upévare ñaĩ segúro haʼe núnka nomandamoʼãiha ñandéve peteĩ mbaʼe ndaikatumoʼãiva jajapo. Upéicharõ la Jehová heʼíramo ñandéve “peẽ sánto vaʼerã”, upéva heʼise ikatuha ñakumpli ko mandáto. Péro primero jaikuaámante vaʼerã mbaʼépa heʼise upéva.

4. Según la Biblia, ¿mbaʼeichaguápa peteĩ persóna sánta?

⁴ ¿Mbaʼépa heʼise ñanesánto? La Biblia ohechauka peteĩ persóna sánta hekopotĩha, ndojeheʼaiha pe rrelihión fálsare, haʼeha Ñandejára amigoite ha oadoraha chupe haʼe oipotaháicha. Upévare ñande ñanesánto hag̃ua jajapo vaʼerã koʼã mbaʼe. Jehová ningo haʼe pe persóna isantovéva oexistíva, ha ñandéve g̃uarã tuichaiterei priviléhio ikatu haguére oiko ñandehegui iñamigoite. ¡Ajéiko tuichaite mbaʼe upéva ñandéve g̃uarã!

5. ¿Mbaʼépa ñanemboʼe Jehovágui umi ánhel?

⁵ Jehová ningo ipotĩ ha isánto entéro mbaʼépe. Upéicha voi heʼi vaʼekue hese umi serafín: “Jehová ningo umi ehérsito yvagapegua ruvicha. Haʼe sánto, sánto, sánto” (Is. 6:3, nóta). Koʼã ánhel ningo ikatu oĩ Jehová ykerete pórke haʼekuéra sánto avei. Ha ñaime segúro upeichaha, pórke peteĩ ánhel oúramo ko yvy ape ári, pe lugár haʼe oĩha opytáma avei sánto. Por ehémplo upéva oiko vaʼekue Moisés oñeʼẽrõ guare peteĩ ánhelndi pe yvyramataʼi ypýpe (Éx. 3:2-5; Jos. 5:15).

6, 7. a) Ohechaukaháicha Éxodo 15:1, 11, ¿mbaʼéichapa Moisés omomanduʼa vaʼekue umi israelítape Jehová haʼeha sánto? b) ¿Mbaʼépa Jehová omanda vaʼekue avei umi israelítape omomanduʼa hag̃ua chupekuéra haʼe santoha? (Ehecha pe taʼanga oĩva ko rrevísta apére).

⁶ Umi israelita ohasa rire pe Mar Rojo, Moisés omomanduʼa vaʼekue chupekuéra Jehová haʼeha sánto (elee Éxodo 15:1, 11). Upéva iñimportanteterei vaʼekue, pórke umi egipcio ha umi cananeo osakrifika vaʼekue umi mitã ha hekokyʼaiterei vaʼekue oadora hag̃ua umi idioskuérape (Lev. 18:3, 4, 21-24; Deut. 18:9, 10). Péro Jehová núnka ndojeruremoʼãi isiervokuérape ojapo hag̃ua álgo omongyʼátava chupekuéra, pórke jaʼéma haguéicha haʼe sánto entéro mbaʼépe. Ha omomanduʼa hag̃ua upéva umi israelítape, Jehová omanda vaʼekue umi súmo saserdótepe omoĩ hag̃ua isyváre peteĩ pláka de óro heʼíva hese: “Jehová mbaʼe hína pe santida” (Éx. 28:36-38).

⁷ Entéro umi israelita ohecháva upe pláka imanduʼáta kuri Jehová santoha. ¿Péro mbaʼépa jaʼekuaa umi israelita ndaikatúivare ohecha upe pláka, pórke oĩ mombyry pe súmo saserdótegui? Haʼekuéra ningo lomímonte ikatúta imanduʼa Jehová santoha, pórke pe léi ojelee vaʼekue enterove renondépe, ha upépe orekóta hikuái la oportunida ohendu hag̃ua upéva (Deut. 31:9-12). Ñande ñaimérire upépe pe léi ojelee aja, ñahendúta kuri ojeʼévo: ‘Peẽ penepotĩ vaʼerã, pórke che Jehová sánto hína’ (Lev. 11:44, 45; 20:7, 26).

8. ¿Mbaʼépa ñanemboʼe Levítico 19:2 ha 1 Pedro 1:14-16?

⁸ Ñaanalisamína peteĩ fráse yma ojeʼe vaʼekue umi israelítape, oĩva Levítico 19:2-pe: “Peẽ penepotĩ ha penderekoporã vaʼerã, pórke che Jehová pende Jára sánto hína”. Pedro posívlemente ositáne raʼe ko fráse heʼírõ guare umi kristiánope haʼekuéra sánto vaʼerãha (elee 1 Pedro 1:14-16). Ñande ningo nañaimevéima pe léi mosáika poguýpe, ¿péro  mbaʼépa ikatu ñaaprende Levítico 19:2-gui? Heʼi haguéicha apóstol Pedro, Jehová haʼeha sánto ha enterove umi ohayhúva chupe haʼe vaʼerã avei sánto, tahaʼe umi unhído térã umi orekóva la esperánsa oikóvo pára siémpre ko yvy ape ári (1 Ped. 1:4; 2 Ped. 3:13).

9. ¿Mbaʼéichapa ñanepytyvõta ñaanalisáramo Levítico kapítulo 19?

⁹ Ñande ningo ñambovyʼase Jehovápe, upévare jaikuaaseterei voi mbaʼépa jajapo vaʼerã ikatu hag̃uáicha ñanesánto térã ñanepotĩ entéro mbaʼe jajapóvape. Ha Jehová omeʼẽ ñandéve umi konsého ñanepytyvõtava upearã. Unos kuánto umíva apytégui jatopa Levítico kapítulo 19-pe. Peteĩ expérto idióma hebréope hérava Marcus Kalisch heʼi: “Ko kapítulo ningo isensilloiterei, oñeʼẽ diferénte témare ha posívlemente haʼe voi pe párte iñimportantevéva oĩva Levíticope, térã ikatu voi pe Pentateuco kompletoitépe”. Ñanemanduʼákena Levítico kapítulo 19 heʼiha oñepyrũvo: “Peẽ penepotĩ ha penderekoporã vaʼerã”. Upéva heʼise ñande sánto vaʼerãha. Jarekóvo enkuénta upéva, ñaanalisamína koʼág̃a unos kuánto versíkulo oĩva upe kapítulope ha jahecha mbaʼéichapa ikatu ñamoĩ en práktika umi konsého oĩva upépe.

10, 11. ¿Mbaʼépa heʼi Levítico 19:3 jajapo vaʼerãha, ha mbaʼérepa iñimportánte jajapo upéva?

¹⁰ Jehová omanda rire umi israelítape haʼekuéra sánto vaʼerãha, omeʼẽ vaʼekue avei chupekuéra ko mandamiénto: “Enterove peẽ perrespeta vaʼerã pende sy ha pende túape [...]. Che hína Jehová pende Jára” (Lev. 19:2, 3).

¹¹ Iñimportanteterei ningo ñakumpli pe mandáto heʼíva ñamombaʼe vaʼerãha ñande sy ha ñande túape. Ñanemanduʼa vaʼerã peteĩ vuéltape peteĩ mitãkariaʼy oporandu hague Jesúspe mbaʼépa ojapo vaʼerã oiko hag̃ua pára siémpre. Ha en párte Jesús heʼi vaʼekue chupe: “Emombaʼékena nde túa ha nde sýpe” (Mat. 19:16-19). Jesús ojaʼo vaʼekue voi umi fariséo umíape, pórke haʼekuéra oñembotavy nokumpliséigui upe mandáto, ha péicha ‘omboyke hikuái Ñandejára ñeʼẽ’ (Mat. 15:3-6). ¿Ha mbaʼe mbaʼépa oike raʼe ‘Ñandejára ñeʼẽme’? Upépe oĩ kuri pe quinto mandamiénto ha avei pe jalee vaʼekue Levítico 19:3-pe (Éx. 20:12).  Jahecháma haguéicha, ñamombaʼe vaʼerã ñande sy ha ñande túape heʼiháicha Levítico 19:3. Upéicharõmante Jehová heʼíta ñanderehe ‘ñanderekopotĩ ha ñanderekoporãha’ heʼiháicha oñepyrũvo upe kapítulo.

12. ¿Mbaʼéichapa ikatu ñakumpli la heʼíva Levítico 19:3?

¹² Jahechaháicha Jehová oipota ñamombaʼe ñande sy ha ñande túape. Upévare iporã ñañeporandu: “¿Chéiko mbaʼeteko hína la upévape?”. Jahechakuaáramo tekotevẽha ñamehora, jajapo vaʼerã upéva. Ndaikatúi ningo ñarremedia umi mbaʼe ndajajapoporãi vaʼekue yma, péro koʼág̃a guive ikatu ñañehaʼã jahasave tiémpo hendivekuéra ha ñaipytyvõ chupekuéra. Por ehémplo jajogua ñande tuakuérape umi mbaʼe oikotevẽva, ñaipytyvõ chupekuéra osegi hag̃ua oservi Jehovápe ha ñamokyreʼỹ chupekuéra. Jajapóramo koʼã mbaʼe ñakumplíta hína la heʼíva Levítico 19:3.

13. a) ¿Mbaʼe mandátopa jatopa avei Levítico 19:3-pe? b) Ohechaukaháicha Lucas 4:16-18, ¿mbaʼépa Jesús ojapo vaʼekue ha mbaʼépa ñanemboʼe iñehémplo?

¹³ Levítico 19:3 ohechauka avei ñandéve ótra kósa ikatúva jajapo ñanesánto hag̃ua entéro mbaʼépe. Upépe oñemanda vaʼekue umi israelítape nombaʼapói vaʼerãha sabadokue. Ñande ningo nañaimevéima pe léi mosáika poguýpe ha upévare natekotevẽi ñakumpli ko mandáto, péro oĩ heta mbaʼe ikatúva ñaaprende chugui. Umi israelita nombaʼapói vaʼekue upe díape ikatu hag̃uáicha itiempove oñemoag̃ui hag̃ua Jehováre. * Upévare voi Jesús oaprovechámi vaʼekue umi sabadokue oho hag̃ua pe sinagógape ha olee Ñandejára Ñeʼẽ (Éx. 31:12-15; elee Lucas 4:16-18). ¿Mbaʼépa ñanemboʼe ko mandáto Jehová omeʼẽ vaʼekue umi israelítape? Ñande avei ñanerembiapo hetáramo jepe ñañemotiémpo vaʼerãha ñañemoag̃ui hag̃ua Jehováre. ¿Ndépa ere ikatuha emehora upévape? Pyʼỹinte eñemotiémporamo eñemoag̃ui hag̃ua Jehováre, oikóta ndehegui iñamigoite. Ha upéva ningo iñimportanteterei, pórke upéicharõmante haʼe heʼíta nderehe nesantoha entéro mbaʼépe.

14. ¿Mbaʼépa oñemensiona heta vése Levítico kapítulo 19-pe?

¹⁴ Levítico kapítulo 19-pe heta vése oñemensiona ótra kósa ñanepytyvõtava avei ñanesánto hag̃ua entéro mbaʼépe. Versíkulo 4 heʼi opakuévo: “Che hína Jehová pende Jára”. Upe idéa ningo ojerrepeti 16 vése voi upe kapítulope. Upéva ñanemomanduʼa pe primer mandamiéntore, heʼíva: “Che hína Jehová nde Jára [...]. Chéve añoite cheadora vaʼerã ha ndereguerekói vaʼerã ótro dios” (Éx. 20:2, 3). Ñande ningo jaipota Jehová heʼi ñanderehe ñanesantoha entéro mbaʼépe. Upévare nañapermitíri vaʼerã avave ni mbaʼevete asy ñandestorva jaservi hag̃ua chupe. Ha ñande haʼe rupi testígo de Jehová ndajajaposéi mbaʼeve oheja vaítava chupe (Lev. 19:12; Is. 57:15).

15. ¿Mbaʼépa ñanemboʼe Levítico 19 umi sakrifísio jajapóvagui Jehovápe g̃uarã?

¹⁵ Umi israelita ningo oadora hag̃ua Jehovápe okumpli vaʼerã kuri heta léi. Levítico 18:4 heʼi: “Peẽ pekumpli vaʼerã umi léi ameʼẽva peẽme, ha peiko vaʼerã che haʼeháicha peẽme. Che hína Jehová pende Jára”. Ha kapítulo 19-pe jatopa unos kuánto umi mandamiénto. Por ehémplo versíkulo 5-8, 21, 22 omombeʼu mbaʼépa oreko vaʼerã kuri enkuénta umi israelita osakrifikáta jave umi animál, ha oñatende vaʼerãha hikuái ani hag̃ua omongyʼa peteĩ mbaʼe sagrádova oñemeʼẽ vaʼekue Jehovápe. Koʼã versíkulo ñanemokyreʼỹ jajapo hag̃ua umi  sakrifísio Jehovápe ogustaháicha pórke ñambovyʼase chupe, heʼiháicha Hebreos 13:15.

16. ¿Mbaʼe mandáto oĩva Levítico 19-pepa ñanemomanduʼa ñanediferénte vaʼerãha umi héntegui?

¹⁶ Jehová heʼi hag̃ua ñanderehe ñanesantoha, ñande ñanediferénte vaʼerã la héntegui. Ha upéva ikatu ijetuʼu, pórke sapyʼánte ñane kompañéro de koléhio, de traváho, térã peteĩ ñane hénte ikatu omboliga ñandéve jajapo hag̃ua peteĩ mbaʼe ndogustáiva Jehovápe. Oiko jave upéva, jadesidímante vaʼerã mávapepa ñandefiélta. ¿Mbaʼépa ñanepytyvõta upéicha jave? Ñapensamína mbaʼépa ikatu ñaaprende Levítico 19:19-gui, heʼíva en párte: “Neremondéi vaʼerã peteĩ ao ojejapo vaʼekue 2 kláse ílogui”. Ko mandáto oipytyvõ vaʼekue umi israelítape idiferénte hag̃ua umi ótra nasióngui. Ñande ningo natekotevẽvéima ñakumpli ko léi ni jaelehi umi ao ojejapo vaʼekue peteĩ télaguinte ñanediferénte hag̃ua umi ótrogui. ¿Péro mbaʼépepa si ñanediferénte vaʼerã? Umi mbaʼe jadesidívape ha jajapóvape, pórke ñande ñanediferentese umi ndojapóivagui la Biblia heʼíva, tahaʼe jepe raʼe ñane kompañéro de koléhio, de traváho térã peteĩ ñane hénte. Jahayhúngo añete la ñane hénte ha ñande rapichakuérape, péro jadesidíta jave peteĩ mbaʼe siémpre ñamotenondéta Jehovápe, tekotevẽramo jepe ñanediferénte chuguikuéra upearã. Upéva iñimportánte hína, pórke Jehová heʼi hag̃ua ñanderehe ñanesantoha entéro mbaʼépe, jaadora vaʼerã chupe haʼe oipotaháicha ha ñanediferénte vaʼerã umi héntegui (2 Cor. 6:14-16; 1 Ped. 4:3, 4).

17, 18. ¿Mbaʼépa ñanemboʼe Levítico 19:23-25?

¹⁷ Pe fráse “che hína Jehová pende Jára” omomanduʼa kuri umi israelítape haʼekuéra omotenonde vaʼerãha Jehovápe. ¿Mbaʼérepa jaʼe upéva? La rrespuésta jatopa Levítico 19:23-25-pe (elee). ¿Mbaʼéichapa umi israelita okumpli raʼe ko léi oike rire pe Tiérra Prometídape? Peteĩ kuimbaʼe oñotỹramo peteĩ yvyramáta hiʼáva, ndoʼúi vaʼerã la hiʼa 3 áño aja. Upéi katu ogueraha vaʼerã Jehovápe la oprodusíva pe cuarto áño, ha pe quinto áñope ae haʼe ikatúta hoʼu la hiʼa. Ko léi oipytyvõ kuri umi israelítape ani hag̃ua omotenonde umi mbaʼe oikotevẽva, síno omotenonde hag̃ua Jehovápe. Avei oapoja hag̃ua pe adorasión oñemeʼẽva chupe ha ojerovia hag̃ua haʼe núnka nombofaltamoʼãiha chupekuéra mbaʼevete asy. Upévare Jehová omokyreʼỹ umi israelítape ani hag̃ua okyhyje ha ogueraha hag̃ua chupe koʼã ofrénda isantuáriope.

¹⁸ Pe léi oĩva Levítico 19:23-25-pe ñanemomanduʼa avei peteĩ mbaʼe heʼi vaʼekuére Jesús pe Sermón del Móntepe. Upérõ haʼe heʼi vaʼekue:  “Anive pejepyʼapyeterei pendejehe, peikuaaségui mbaʼépa pekarúta térã perekótapa y peʼu hag̃ua”. Upéi heʼi avei: “Pende Ru oĩva yvágape oikuaa voi peẽ peikotevẽha entéro koʼã mbaʼe”. Jehová ningo oñangarekóta ñanderehe oñangarekoháicha umi guyraʼi mimíre jepe (Mat. 6:25, 26, 32). Ñande jajerovia Jehová nombofaltamoʼãiha ñandéve mbaʼeve. Upéicha rupi ndajakyhyjéi ñameʼẽ hag̃ua ñane kontrivusión ha ñaipytyvõ hag̃ua umi oikotevẽvape, péro ndajajapói upéva jajechauka hag̃uánte. Jehová ningo ohechapaite péicha ñandepojera jave ha katuete ñanevendesíta upe haguére (Mat. 6:2-4). Jajapóramo upéicha, jahechaukáta hína ñantendeha la ñanemboʼeséva Levítico 19:23-25.

19. ¿Mbaʼépa nde reaprende Levítico 19-gui?

¹⁹ Koʼág̃a ningo ñaanalisa unos kuánto versíkulonte Levítico kapítulo 19-gui, péro umíva tuicháma ñanepytyvõ jajoguave hag̃ua Jehovápe. Ha jajapóvo upéva ikatúta ñanesánto entéro mbaʼépe (1 Ped. 1:15). Heta hénte ningo ohecháma mbaʼéichapa ñande ñanekondúkta porã, ha omombaʼeguasu hikuái Jehovápe upe haguére (1 Ped. 2:12). Péro oĩ ningo hetaiteve mbaʼe ikatúitiva ñaaprende Levítico 19-gui, ha pe ótro artíkulope jahecháta umíva. Upéva ñanepytyvõta ñanesánto hag̃ua entéro mbaʼépe heʼi haguéicha apóstol Pedro.