1. Aposetolo Petero be dahaka sisiba ia henia, bona dahaka dainai unai ita badinaia be auka?

ENA BE iseda helaro be guba eiava tanobada ai, to aposetolo Petero ese Keristani ginigunadia dekenai ia henia sisiba herevana amo namo ita davaria diba. Petero ia gwau: “Umui ia boiria Helaga Tauna hegeregerena, emui kara ibounai lalonai do umui helaga, badina Toretore Helagadia ia gwau: ‘Do umui helaga, badina lau be lau helaga.’” (1 Pet. 1:15, 16) Unai hereva amo ita diba, Iehova be helaga bona ia ita tohotohoa diba. Iseda kara idia helaga be namo. Ita be goevadae lasi dainai, reana unai bamona ita karaia be auka. Petero be kerere haida ia karaia, to ena haheitalai amo ia hahedinaraia, ‘ita helaga’ diba.

2. Inai atikol ai dahaka henanadai do ita herevalaia?

² Inai atikol ai, inai henanadai do ita herevalaia: Helaga karana be dahaka? Iehova ena helaga karana dekenai Baibel be dahaka ia gwau? Edena dala ai iseda kara idia helaga diba? Helaga karana bona Iehova tura henia karana be edena bamona idia hegeregere?

3. Momo idia laloa helaga tauna ena kara be edena bamona, to diba maorona be edeseni ita davaria diba?

³ Taunimanima momo idia laloa ia helaga tauna be ia kiri diba lasi, tomadiho dabua ia karaia bona ia kara auka. To helaga taudia edia kara be unai bamona lasi. Iehova be helaga bona Baibel ia gwau ia be “moale Diravana.” (1 Tim. 1:11) Ia idia tomadiho henia taudia be idia “moale.” (Sal. 144:15) Dabua namodia idia hahedokilaia bona taunimanima ese idia hanamoa totona kara namodia idia karaia taudia be Iesu ese  ia gwauraia dika. (Mat. 6:1; Mar. 12:38) Baibel ese helaga karana ia herevalaia dainai, Keristani momokani taudia be helaga ena anina idia lalopararalaia. Ita diba Iehova be ita ia lalokau henia bona ita do ia hamaoroa lasi ita karaia diba lasi gauna ita karaia totona. Unai dainai Iehova ese inai hereva, “Umui helaga be namo” ia gwauraia neganai, ita diba unai do ita karaia. Oibe, ita helaga totona namona be unai kara ita lalopararalaia guna.

4. Helaga karana be dahaka?

⁴ Helaga karana be dahaka? Baibel ese inai hereva, “helaga” be ta ena kara bona tomadiho dalana ia goeva karana ia herevalaia. Anina be, do ita helaga bema iseda kara ia goeva, Iehova ia ura henia dalana ai ia ita tomadiho henia, bona iseda hetura karana ia ida ia goada. Ita hoa badina ena be ita goevadae lasi bona Iehova be helaga momokani Diravana, to ia ura ita ia tura henia.

5. Abidadama anerudia amo Iehova dekenai dahaka ita dibaia?

⁵ Gau ibounai lalonai Iehova be helaga momokani. Bona Iehova ena terona badinai idia gini aneru, Serapi unai, ese ia idia herevalaia dalana amo unai ita diba. Idia gwau: “Tuari oreadia edia Iehova be helaga, helaga, helaga.” (Isa. 6:3) Oibe, unai aneru idia helaga dainai edia hetura karana Iehova ida ia goada. Unai dainai, aneru ese tanobada dekenai sivarai idia halasia gabudia be helaga. Mose be ia araia noho au ginigini badinai ia gini neganai, unai ia vara.​—Eso. 3:2-5; Ios. 5:15.

6-7. (a) Esodo 15:1, 11 hegeregerena, edena dala ai Mose ia hahedinarai Dirava be helaga? (b) Dahaka ese Israela taudia ia hadibaia Dirava be helaga? (Rau 1 itaia.)

⁶ Mose ese Israela taudia be Davara Kakakakana amo ia hakaua hanai murinai ia hamaorodia edia Dirava, Iehova, be helaga. (Esodo 15:1, 11 duahia.) Aigupito taudia be dirava koikoi idia tomadiho henia dainai idia helaga lasi. Bona dirava koikoi idia tomadiho henia Kanana taudia danu be idia helaga lasi. Edia tomadiho lalonai natudia maragidia idia bouboulaia bona matabodaga kara dika rohorohodia idia karaia. (Lev. 18:3, 4, 21-24; Deu. 18:9, 10) To Iehova be unai dirava koikoidia bamona lasi, Ia idia tomadiho henia taudia do ia hamaoroa lasi kara dikana ta idia karaia totona. Iehova be helaga herea momokani. Israela taudia ese unai idia laloatao totona, hahelaga tauna badana ena kwara kumia dabua dekenai medolo ta ia noho. Bona ena latanai inai hereva idia koroa, “Helaga karana be Iehova ena.”​—Eso. 28:36-38.

⁷ Unai medolo latanai ia noho herevana idia itaia taudia do idia diba, Iehova be helaga herea momokani. To, bema Israela tauna ta be hahelaga tauna badana kahirakahira ia lao lasi dainai, unai hereva ia itaia lasi be edena bamona? Do ia diba Iehova be helaga, a? Oibe! Badina Israela tatau, hahine bona natudia dekenai Taravatu idia duahia neganai, unai hereva idia kamonai danu. (Deu. 31:9-12) Bema oi be unai negai oi noho, inai hereva do oi kamonai danu: “Lau be Iehova emui Dirava, bona namona be . . . helaga taudia ai umui lao, badina lau be helaga.” “Namona be lau vairanai umui helaga, badina lau Iehova be helaga.”​—Lev. 11:44, 45; 20:7, 26.

8. Levitiko 19:2 bona 1 Petero 1:14-16 amo dahaka ita dibaia?

⁸ Levitiko 19:2 ai ia noho herevana mani ita itaia, unai be Israela taudia dekenai idia duahia. Iehova ese Mose ia hamaoroa: “Israela taudia ibounai oi hamaoroa, ‘Namona be umui helaga, badina lau, Iehova emui Dirava, be helaga.’” Petero ese Keristani taudia ia  hagoadaia ‘do idia helaga’ neganai, reana ia ese unai siri ena hereva ia gaukaralaia. (1 Petero 1:14-16 duahia.) Hari, ita be Mose ena Taravatu henunai ita noho lasi. To, Petero ese Levitiko 19:2 ena hereva ia gwauraia lou karana amo ia hahedinaraia, Iehova be helaga bona ia idia lalokau henia taudia idia hekwarahi do idia helaga totona. Ena be guba o tanobada helarona ita abia, to ita helaga be namo.​—1 Pet. 1:4; 2 Pet. 3:13.

9. Levitiko karoa 19 ese edena dala ai ita ia durua diba?

⁹ Iseda Dirava ita ura hamoalea dainai, mai ura ida do ita helaga dalana ita dibaia be namo. Ita helaga totona Iehova ese ita dekenai hakaua daladia haida ia henia. Bona unai be Levitiko karoa 19 dekenai ita davaria diba. Heberu ena diba bada tauna, Marcus Kalisch, ia gwau: “Levitiko bukana bona Baibel buka ginigunadia 5 amo unai karoa be mai anina bada.” Namona be ita laloatao Levitiko karoa 19 be inai hereva amo ia matamaia: “Namona be umui helaga.” Hari unai karoa ena siri haida do ita herevalaia, unai ese ita do ia durua dina ta ta ai ita helaga daladia do ita dibaia.

10-11. Levitiko 19:3 ia gwau dahaka ita karaia be namo, bona dahaka dainai unai be mai anina bada?

¹⁰ Iehova ese Israela taudia ia hamaoroa do idia helaga murinai, ma ia gwau: “Umui ta ta ese emui sinana bona tamana umui matauraia be namo. . . . Lau be Iehova emui Dirava.”​—Lev. 19:2, 3.

¹¹ Unai ese ia hahedinaraia, Dirava ia ura iseda tama sina ita matauraia be mai anina bada. Tau ta ese Iesu ia nanadaia, “Mauri hanaihanai lau abia totona, dahaka kara namodia lau karaia be namo?” Unai nega ai Iesu ena haere oi laloatao, a? Ia ese unai tau ia hamaoroa ena tamana bona sinana ia matauraia be namo. (Mat. 19:16-19) Iesu ese Farisea taudia bona taravatu hadibaia taudia ia gwauraia dika badina idia be tama sina naria ena maduna idia dadaraia. Bona idia ese ‘Dirava ena hereva be anina lasi gauna ai idia halaoa.’ (Mat. 15:3-6) “Dirava ena hereva” dekenai Taravatu 10 ena taravatu namba 5 ia noho, bona Levitiko 19:3 ai unai ia noho danu. (Eso. 20:12)  Laloatao, Levitiko 19:3 ena hakaua herevana, tama sina matauraia karana be inai hereva ena badinai ia noho: “Namona be umui helaga, badina lau, Iehova emui Dirava, be helaga.”

12. Edena dala ai Levitiko 19:3 ai ia noho hahegani ita badinaia?

¹² Iehova ese tama sina do ita matauraia ena hahegani ia henia dainai, reana sibona ita nanadaia, ‘Egu tama sina lau matauraia, a?’ Bema oi laloa guna unai bamona oi karaia lasi, hari be nega namona gau haida oi karaia totona. Hegeregere, edia ura gaudia oi hoia, idia oi durua Iehova kahirakahira idia lao bona ia idia hesiai henia noho. Eiava idia lalohisihisi neganai, idia oi hagoadaia. Bema unai bamona oi karaia, oi ese Levitiko 19:3 ai ia noho hahegani oi badinaia.

13. (a) Levitiko 19:3 ai edena hahegani ma ta ia noho? (b) Edena dala ai Luka 4:16-18 ai Iesu ena haheitalai ita tohotohoa diba?

¹³ Ita helaga totona, Levitiko 19:3 ese ita dekenai gau ma ta ia hadibaia danu. Unai siri ai ia gwau Sabati ita badinaia. Keristani taudia be Taravatu henunai idia noho lasi, unai dainai wiki ta ta ai Sabati idia badinaia lasi. To, Israela taudia ese Sabati idia badinaia dalana bona unai amo namo idia davaria dalana amo gau momo ita dibaia. Sabati dinana ai idia laga-ani bona unai nega idia gaukaralaia Dirava tomadiho henia totona. * Unai dainai, Sabati dinana ai Iesu be ena hanua ai sinagoga dekenai ia lao bona Dirava ena Hereva ia duahia. (Eso. 31:12-15; Luka 4:16-18 duahia.) Levitiko 19:3 ai Dirava ena hahegani be, “[Iena] sabati dinadia umui badinaia,” unai ese ita ia hagoadaia dina ta ta ai nega ita atoa Dirava ita tomadiho henia totona. Unai hahegani oi badinaia totona, oi laloa senisi haida oi karaia be namo, a? Bema hanaihanai nega oi atoa Iehova oi tomadiho henia, unai ese emu hetura karana ia ida do ia hagoadaia bona do oi helaga.

14. Levitiko karoa 19 ai dahaka mai anina bada herevana ia noho?

¹⁴ Levitiko karoa 19 ese mai anina bada herevana ta ia gwauraia loulou, unai ese ita ia durua ita helaga noho totona. Siri 4 ena hereva dokonai ia gwau: “Lau be Iehova emui Dirava.” Levitiko karoa 19 ai, unai hereva tamona be nega 16 ia hedinarai. Unai amo ita ese taravatu ginigunana ita laloatao diba, ia gwau: “Lau be Iehova emui Dirava. . . . Lau sibona umui tomadiho henia. Namo lasi dirava ma haida umui tomadiho henia.” (Eso. 20:2, 3) Bema Keristani tauna ta ia ura helaga, iena hetura karana Dirava ida be mai anina bada bona gau ta eiava tau ta ese unai ia hadikaia lasi be namo. Bona ita be Iehova ena Witnes taudia dainai, iseda kara amo iena ladana helagana ita hadikaia lasi be namo.​—Lev. 19:12; Isa. 57:15.

15. Levitiko 19 ena siri haida ese boubou gaudia idia henia karana amo dahaka ita dibaia?

¹⁵ Israela taudia ese Dirava ena taravatu ibounai idia badinaia, unai amo idia hahedinaraia Iehova be edia Dirava. Levitiko 18:4 ia gwau: “Namona be egu hahemaoro herevadia bona egu oda herevadia umui badinaia. Lau be Iehova emui Dirava.” Karoa 19 ai, Israela taudia ese idia badinaia “oda herevadia” haida idia noho. Hegeregere, siri 5-8, 21, 22 ese animal bouboulaia karana ia herevalaia. Israela taudia ese boubou gaudia idia hegaegaelaia neganai, ‘Iehova ena helaga gauna ta idia hamiroa lasi’ dalanai idia henia be  namo. Ataiai idia noho siridia ese ita ia durua, Iehova ita hamoalea bona hanamoa totona, boubou gaudia ita henia bamona, bona Heberu 13:15 ese ita ia hagoadaia unai ita karaia totona.

16. Levitiko 19 ai, Dirava idia hesiai henia bona idia hesiai henia lasi taudia be edena bamona ia herevalaia?

¹⁶ Ita helaga totona, Dirava idia hesiai henia lasi taudia amo iseda kara ia idau be namo. Unai ita karaia totona be auka. Nega haida, sikuli o gaukara turadia, Witnes lasi varavara, bona ma haida ese lalona veria gaudia do idia gaukaralaia Iehova tomadiho henia karana ita laloa maragi totona. Unai bamona idia karaia neganai, mai anina bada abia hidi ita karaia be namo. Dahaka ese ita do ia durua abia hidi maorona ita karaia totona? Mani Levitiko 19:19 ena hakaua herevana ita laloa, ena kahana ta ia gwau: “Namo lasi varo idaudia rua amo idia karaia dabua oi hahedokilaia.” Unai taravatu ese Israela taudia ia durua edia badinai idia noho besedia amo idia idau totona. Hari, ita be Taravatu henunai ita noho lasi dainai, Keristani taudia ese material idauidau amo idia turia dabua idia hahedokilaia diba. To Baibel ena hakaua dalana idia dadaraia taudia, hegeregere sikuli turadia, gaukara turadia, o iseda varavara edia kara ita tohotohoa lasi. Momokani, iseda varavara bona dekena taudia ita lalokau henia. To, ita karaia abia hidi ese do ia hahedinaraia ita be Iehova ita badinaia. Unai be mai anina bada, badina bema ita ura helaga, namona be ita hekwarahi Dirava ese ia ura henia lasi gaudia ita dadaraia.​—2 Kor. 6:14-16; 1 Pet. 4:3, 4.

17-18. Levitiko 19:23-25 ai dahaka mai anina bada gaudia ita dibaia?

¹⁷ Inai hereva “Lau be Iehova emui Dirava” ese Israela taudia ia hadibaia, edia hetura karana Iehova ida idia laloa bada be namo. Edena dala ai? Levitiko 19:23-25 ese dala ta ia hahedinaraia. (Duahia.) Israela taudia be Gwauhamata Tanona ai idia vareai murinai, unai hereva be edena bamona do idia badinaia? Mani unai ita laloa. Bema tau ta be au ia hadoa, namona be lagani toi lalonai unai au edia huahua ia ania lasi. Lagani namba 4 ai, unai au edia huahua ia atoa siri Dirava ena dubu ai idia gaukaralaia totona. To lagani namba 5 ai, unai au ena biaguna ese au huahua ia ania diba. Unai taravatu ese Israela taudia ia durua, namona be idia laloparara sibona edia ura gaudia idia atoa guna lasi. Iehova ia ura do idia abia dae Ia ese idia do ia naria bona ia tomadiho henia karana idia atoa guna  be namo. Ia diba idia dekenai do ia henia aniani be ia hegeregere. Bona Dirava ese idia ia hagoadaia dubu helaga totona harihari gaudia do idia henia.

¹⁸ Levitiko 19:23-25 ai idia noho herevadia ita duahia neganai, Iesu ese Ororo Harorona ai ia gwauraia herevadia ita laloa lou. Ia gwau: “Emui mauri lalohekwarahilaia karana umui hadokoa. Hegeregere dahaka do umui ania eiava dahaka do umui inua.” Iesu ma ia gwau: “Emui guba Tamana be ia diba unai gaudia ibounai umui abia be namo.” Ita abia dae momokani Iehova be ita do ia naria, manu ia naridia hegeregerena. (Mat. 6:25, 26, 32) Bona ma haida durua totona “harihari gaudia” ita henia neganai, haida ese idia itaia lasi. Danu kongrigeisen durua totona, mai moale ida kontribusen ita henia be namo. Iehova be unai hariharibada karana ia itaia bona ita do ia hanamoa. (Mat. 6:2-4) Unai bamona hariharibada karana amo ita hahedinaraia, ita ese Levitiko 19:23-25 ai ita dibaia gaudia ita lalopararalaia.

19. Edena dala ai Levitiko karoa 19 ena kahana haida ese oi ia durua?

¹⁹ Ita ese Levitiko karoa 19 ena siri haida ita herevalaia, bona ita ia durua iseda helaga Diravana ita tohotohoa dalana ita lalopararalaia. Ia ita tohotohoa neganai, ita hahedinaraia ita ura ‘iseda kara ibounai lalonai ita helaga.’ (1 Pet. 1:15) Iehova idia hesiai henia lasi taudia momo ese Dirava ena taunimanima edia kara namodia idia itaia. Momokani, unai ese haida edia lalona ia veria Iehova idia hanamoa totona. (1 Pet. 2:12) To Levitiko karoa 19 amo gau momo do ita dibaia. Atikol 49 ai, Levitiko karoa 19 ena siri ma haida do ia herevalaia bona unai ese ita do ia durua ‘ita helaga’ daladia ma haida ita laloa totona.