1. Nama jaku lalau ke diberi rasul Peter ngagai orang Kristian, lalu nama kebuah jaku lalau nya baka ke tusah dititihka?

BA ABAD keterubah, rasul Peter bisi meri jaku lalau ngagai orang Kristian ti dipilih ke serega. Semua kitai tau bulih penguntung ari jaku lalau tu enda ngira kitai bisi pengadang idup ba serega tauka ba dunya. Peter nulis: “Intu diri kudus dalam semua utai, laban Iya ke ngangauka kita, kudus; laban endang udah ditulis, ‘Diau kudus, laban Aku kudus.’” (1 Pet. 1:15, 16) Ari ayat tu, kitai nemu kitai ulih neladan Jehovah lalu kitai enda tau enda diau kudus. Iya teladan ti pemadu badas bekaul enggau kudus. Ketegal kitai enda sempurna, tu baka ke tusah dikereja. Taja pia, kitai ulih belajar ari teladan Peter. Taja pan iya kala ngereja penyalah, tang ari teladan iya kitai nemu kitai ulih “diau kudus.”

2. Nama tanya ke deka dipejuraika kitai ba artikel tu?

² Ba artikel tu, kitai deka nyaut tanya tu: (1) Nama reti diau kudus? (2) Nama ajar Bup Kudus pasal pengudus Jehovah? (3) Baka ni kitai ulih kudus ba ulah? Lalu (4) nama kaul entara diau kudus enggau kaul kitai enggau Jehovah?

3. Nama runding orang pasal orang ti kudus, tang dini kitai tau bulih penerang ti betul?

³ Lebuh orang berundingka pasal orang ti kudus, sida ngumbai orang nya enda kala tuchum sereta ngena gari sembiang ti spesial. Tang nya enda betul, laban Jehovah dikumbai  “Petara ti gaga ati.” (1 Tim. 1:11, NWT) Sida ke nyembah Iya deka berasai “lantang” tauka gaga ati. (Mas. 144:15) Jesus ngutuk sida ke ngena gari ti spesial sereta ngereja utai ngambika dipeda orang mayuh. (Mat. 6:1; Mrk. 12:38) Orang Kristian ti bendar nemu reti kudus laban sida belajar ari Bup Kudus. Kitai nemu Petara rinduka kitai lalu Iya enda sekali-kali ngasuh kitai ngereja utai ti enda ulih dititihka kitai. Nya alai lebuh Jehovah ngasuh kitai “diau kudus,” kitai pechaya kitai ulih ngasika pesan Iya. Tang sebedau kitai ulih diau kudus, kitai patut nemu nama reti kudus.

4. Nama reti “kudus”?

⁴ Dalam Bup Kudus, leka jaku “kudus” mai reti beresi ba moral sereta tuchi ba sembah. “Kudus” mega mai reti seseiku orang ke dikena ba pengawa sembah ngagai Petara. Tu reti iya, kitai ulih dikumbai kudus enti kitai beresi ba moral, nyembah Jehovah enggau chara ti diterima Iya, sereta ngembuan kaul ti rapat enggau Iya. Ketegal kitai ulih nyadi pangan rapat Iya, kitai berasai balat alit ati. Taja pan Jehovah nya amat kudus lalu kitai enda sempurna, tang Iya agi deka nyadi pangan rapat kitai.

5. Nama ulih dipelajarka kitai pasal Jehovah ari bala melikat ti tetap ati?

⁵ Jehovah endang Petara ti kudus. Kitai ulih nemu pasal pengudus Petara ari utai ke dipadah melikat serapim, iya nya bala melikat ke semak kerusi diraja Petara. Ku sekeda ari melikat nya madah: ‘Kudus, kudus, kudus meh Jehovah ti Pemadu Bekuasa!’ (Isa. 6:3) Bala melikat tu ulih ngembuan kaul ti rapat enggau Petara ti kudus laban sida mega kudus. Nya kebuah lebuh melikat dianjung ke dunya kena ngenataika pesan, endur sida pegari nya mega dikumbai kudus. Nya meh utai ke nyadi lebuh Moses meda babas mau laban api.—P-sut. 3:2-5; Jos. 5:15.

6-7. (a) Nitihka Pemansut 15:1, 11, baka ni Moses enggau terang madahka pasal pengudus Petara? (b) Nama nulung orang Israel terus ingat Petara nya kudus? (Peda gambar ba mua majalah.)

⁶ Pengudah Moses mai orang Israel pansut ari menua Ejip nengah Tasik Mirah, iya enggau terang madah ngagai sida pasal pengudus Jehovah. (Bacha Pemansut 15:1, 11.) Orang Ejip nyembah petara pelesu lalu sida enda kudus. Sama mega, orang Kanaan enda kudus laban sida nyembah petara pelesu. Sida sanggup nyerahka anak sida nyadika piring ngagai petara pelesu sereta ngereja ulah seks ti kamah. (Lew. 18:3, 4, 21-24; U-dat. 18:9, 10) Tang, Jehovah enda baka nya. Iya Petara ti amat kudus. Iya enda kala minta bala penyembah Iya ngereja sebarang utai ti jai. Kena ngingatka orang Israel pasal pengudus Jehovah, rambai jaku ke madahka [“Kudus enggi Jehovah,” NWT] ditebuk ba perengka emas ba labung pala imam besai.—P-sut. 28:36-38.

⁷ Lebuh orang Israel meda rambai jaku nya ba labung pala imam besai, tu terang nunjukka Jehovah endang kudus. Tang, baka ni enti bisi seiku orang Israel enda ulih meda rambai jaku nya ketegal iya enda ulih semak enggau imam besai? Kati iya agi nemu Jehovah nya kudus? Au! Laban tiap iku orang Israel tentu kala ninga Adat Jehovah dibacha ba mua orang mayuh. (U-dat. 31:9-12) Enti nuan bisi ba dia, nuan tentu deka ningaka jaku tu: ‘Aku tu Jehovah Petara kita. . . . Kita enda tau enda kudus, laban Aku kudus.’ ‘Kita deka nyadi kudus lalu diempu Aku siku aja,  laban Aku tu Jehovah, lalu Aku tu kudus.’—Lew. 11:44, 45; 20:7, 26.

8. Nama dipelajarka kitai ari Adat Lewi 19:2 sereta 1 Peter 1:14-16?

⁸ Diatu kitai deka beratika jaku ke bisi ba Adat Lewi 19:2 ke dibacha ngagai orang Israel. Jehovah ngasuh Moses: ‘Sebut ngagai semua orang Israel: Kita enda tau enda kudus, laban Aku ti Jehovah Petara kita, kudus.’ Peter engka nandu ari ayat nya lebuh iya meransang orang Kristian “diau kudus.” (Bacha 1 Peter 1:14-16.) Endang amat, kitai nadai agi dibaruh Adat Moses. Tang, utai ke ditulis Peter ngasuh kitai andal enggau utai ke dipelajarka kitai ba Adat Lewi 19:2. Ari ayat nya kitai belajar, Jehovah endang kudus lalu orang ke rinduka Iya patut bebendar diau kudus. Lalu semua kitai ulih nitihka jaku lalau tu enda ngira sekalika pengadang kitai ba serega tauka ba dunya Paradais.—1 Pet. 1:4; 2 Pet. 3:13.

9. Nama ulih dipelajarka kitai ari Adat Lewi bagi 19?

⁹ Ketegal kitai deka ngelantangka ati Jehovah, kitai keran deka nemu baka ni ngintu diri kudus. Jehovah meri kitai sekeda ari jaku lalau tu ba Adat Lewi bagi 19. Peratika utai ke ditulis seiku pakar ke benama Marcus Kalisch ti bebansa Hebrew: “Adat Lewi bagi 19 nya engka begian ti pemadu penting ari semua bagi dalam bup Adat Lewi sereta lima iti bup ti keterubah dalam Bup Kudus.” Diatu kitai deka berandauka sekeda ayat ari bagi tu ke ulih nulung kitai nemu chara ngintu diri kudus ba pengidup. Lebuh kitai meresa sekeda ari ayat nya, kitai deka beratika rambai jaku: “Kita enda tau enda kudus,” ba pun ayat nya.

10-11. Nama pesan ba Adat Lewi 19:3 ke patut dititihka kitai, lalu nama kebuah nya amat beguna?

¹⁰ Pengudah Jehovah madahka orang Israel patut diau kudus, Iya nampung baru: ‘Genap iku kita enda tau enda bebasaka apai indai kita, . . . Aku tu Jehovah Petara kita.’—Lew. 19:2, 3.

¹¹ Au, kitai enda tau enda bebasaka apai indai. Peratika tanya seiku lelaki ngagai Jesus: “Nama pengawa ti manah ti enda tau enda dikereja aku ngambika aku tau bulih pengidup ti meruan belama iya?” Jesus bisi madah ngagai  lelaki nya iya patut bebasaka apai indai. (Mat. 19:16-19) Jesus indah ngutuk orang Parisi sereta pengajar Adat laban sida ngena bemacham chara ngambika enda ibuh ngintu apai indai sida. Enggau chara tu, sida ‘udah nulak jaku Petara.’ (Mat. 15:3-6) ‘Jaku Petara’ nyengkaum pesan ti kelima ba Sepuluh Pesan enggau utai ke dibacha kitai ba Adat Lewi 19:3. (P-sut. 20:12) Kingatka, pesan ke ngasuh bebasaka apai indai ba Adat Lewi 19:3 disebut pengudah jaku: ‘Kita enda tau enda kudus, laban Aku ti Jehovah Petara kita, kudus.’

12. Baka ni kitai ulih nitihka pesan ke bisi ba Adat Lewi 19:3, lalu nama tanya ke ulih ditanya ngagai diri empu?

¹² Lebuh kitai berundingka pesan Jehovah ke ngasuh kitai bebasaka apai indai, kitai ulih nanya diri empu, ‘Kati aku bebasaka apai indai?’ Enti nuan ngasaika diri enda bebendar ngereja nya suba, anang asa ati. Diatu nuan ulih bebendar agi ngiga chara bebasaka apai indai. Nuan enda ulih ngubah utai ti nyadi suba, tang diatu nuan ulih meri mayuh agi awak begulai enggau sida sereta nulung sida. Nuan engka ulih nulung sida bebelika utai ke diguna, nulung sida mengkang semak enggau Jehovah sereta nyembah Iya, tauka meransang sida sereta ngelantangka ati sida. Enggau ngereja nya, nuan nitihka jaku lalau ba Adat Lewi 19:3.

13. (a) Nama jaku lalau bukai ke ulih ditemu kitai ba Adat Lewi 19:3? (b) Baka ni kitai kemayaharitu ulih neladan Jesus, baka ke dipadah Luke 4:16-18?

¹³ Adat Lewi 19:3 ngajar kitai chara bukai ngambika ulih diau kudus. Ayat nya bisi nyebut pasal Hari Sabat. Orang Kristian kemayaharitu nadai agi dibaruh Adat Moses. Nya alai, kitai enda agi ngintu Hari Sabat ninting minggu. Taja pia, kitai agi ulih belajar baka ni chara orang Israel ngintu Hari Sabat sereta penguntung ke diulih sida ari pengawa nya. Hari Sabat nya dikena belelak sereta dikena nyembah Petara. * Nya kebuah maya Hari Sabat, Jesus ngagai balai gempuru ba Nasaret lalu macha Jaku Petara. (P-sut. 31:12-15; bacha Luke 4:16-18.) Pesan Petara ba Adat Lewi 19:3 ti ngasuh orang Israel “enda tau enda ngintu Hari Sabat” patut meransang kitai meri awak ninting hari nyembah Petara. Kati nuan ngasaika diri patut ngaga sekeda ubah ba pekara tu? Enti nuan seruran meri awak kena nyembah Jehovah, nuan deka bisi kaul ti rapat enggau Iya. Tu beguna kena diau kudus ba mua Petara.

14. Nama pemendar ke suah ditandu dalam Adat Lewi bagi 19?

¹⁴ Adat Lewi bagi 19 suah nyebut pasal siti pemendar ke ulih nulung kitai diau kudus. Ayat 4 ngujungka enggau jaku: ‘Aku tu Jehovah Petara kita.’ Pemendar tu ditandu 16 kali dalam Adat Lewi bagi 19. Tu ngingatka kitai pasal pesan ti keterubah: ‘Aku tu Jehovah Petara kita . . . Anang nyembah petara bukai tang semina Aku aja.’ (P-sut. 20:2, 3) Tiap iku orang Kristian ke deka diau kudus patut nentuka kaul iya enggau Jehovah penting agi ari kaul iya enggau orang bukai tauka utai bukai. Lalu ketegal kitai ngarika nama Jehovah, kitai keran deka nyeliahka sebarang utai ke ulih ngenyaika nama Iya.—Lew. 19:12; Isa. 57:15.

15. Nitihka ayat ba Adat Lewi bagi 19 ke bekaul enggau pemeri, kitai diperansang ngereja nama?

¹⁵ Orang Israel nunjukka sida nerima Jehovah nyadika Petara sida lebuh sida ngasika  Adat Iya. Adat Lewi 18:4 madahka: ‘Titihka adat Aku, lalu kereja utai ti diasuh Aku. Aku tu Jehovah Petara kita.’ Adat Lewi bagi 19 madahka sekeda “utai ti diasuh” Jehovah kereja orang Israel. Ambika chunto, ayat 5-8, 21, 22 madahka pasal pemeri jelu ngagai Jehovah. Orang Israel patut nentuka pemeri sida nya enda ‘ngamahka utai ti kudus ti enggi Jehovah.’ Lebuh kitai macha ayat ke baka tu, kitai deka bebendar agi ngelantangka ati Jehovah sereta meri puji ngagai Iya.—Heb. 13:15.

16. Baka ni prinsip ba Adat Lewi 19:19 nulung kitai nemu bida entara orang ke nyembah Petara enggau sida ke enda nyembah Petara?

¹⁶ Kena diau kudus, kitai enda takut nunjukka diri bebida ari orang ke enda nyembah Petara. Tang tu ulih nyadi siti penekul. Kekadang orang ke sama sekula, sama gawa, kaban belayan sereta orang bukai engka nekan kitai ngereja pengawa ke ulih ngachau sembah kitai ngagai Jehovah. Lebuh nya nyadi, kitai patut ngaga pemutus. Nama ulih nulung kitai ngaga pemutus ti betul? Peratika prinsip ba Adat Lewi 19:19 ke madahka: “Anang ngena gari ti ditenun ari dua macham ubung.” Adat tu ngasuh orang Israel enda sama enggau bansa ke ngelingi sida. Kemayaharitu, kitai ulih ngena gari ke digaga ari dua macham ubung, baka kain kapas enggau polyester. Tang kitai enggai nitihka orang ti ngereja adat sereta ulah ke enda sejalai enggau ajar Bup Kudus, enda ngira orang nya sama sekula enggau kitai, sama gawa tauka kaban belayan. Endang amat, kitai sayauka kaban belayan kitai, lalu kitai rinduka orang bukai. Tang lebuh kitai patut ngaga pemutus ti besai ba pengidup, kitai enda takut nunjukka diri bebida ari orang bukai. Tu amat beguna laban enti kitai deka diau kudus, kitai enda tau enda nunjukka diri enggi Petara.—2 Kor. 6:14-16; 1 Pet. 4:3, 4.

17-18. Nama ulih dipelajarka kitai ari Adat Lewi 19:23-25?

¹⁷ Rambai jaku ‘Aku tu Jehovah Petara kita’ patut ngingatka orang Israel kebuah sida patut ngenuluka kaul sida enggau Jehovah. Baka ni sida ulih ngereja nya? Adat Lewi 19:23-25 nunjukka siti chara. (Bacha.) Perundingka nama reti pesan tu ngagai orang Israel lebuh sida tama Menua ti Udah Disemaya. Enti sida nanam pun kayu, sida enda tau makai buah ari kayu nya dalam tiga taun ti keterubah. Dalam taun ti keempat, buah nya deka diserahka ngagai Petara. Sida semina ulih makai buah nya dalam taun ti  kelima. Adat tu nulung orang Israel nemu sida enda patut ngenuluka pengingin diri. Jehovah deka sida pechaya Iya ulih meri utai ke diguna sida lalu sida patut ngenuluka sembah ngagai Jehovah ba pengidup. Jehovah mega meransang sida meri enggau gerah jari ngagai langkau kain Jehovah, endur alai sida nyembah Iya.

¹⁸ Adat ba Adat Lewi 19:23-25 ngingatka kitai pasal jaku Jesus lebuh iya meri Ajar ba Atas Bukit. Ku iya: “Anang irauka pasal . . . utai ti deka diempa tauka diirup kita.” Ku iya agi: “Apai kita ti di serega nemu kita begunaka semua utai nya.” Petara nyediaka utai diguna burung kena beridup. Baka nya mega, Petara ulih nyediaka utai ke diguna kitai. (Mat. 6:25, 26, 32) Kitai andal Jehovah deka ngintu kitai. Lalu kitai tentu deka “meri sedekah” ngagai orang ke suntuk. Kitai mega gaga ati ulih meri pemeri kena nyukung belanja eklisia. Jehovah meda lebuh kitai meri enggau gerah jari lalu Iya deka ngupah kitai. (Mat. 6:2-4) Lebuh kitai gerah jari, kitai nunjukka diri meretika utai ke dipadah ba Adat Lewi 19:23-25.

19. Nama utai ke udah dipelajarka nuan ari sekeda ayat ba Adat Lewi 19?

¹⁹ Kitai udah berandauka sekeda ayat dalam Adat Lewi bagi 19, lalu nya nulung kitai meda chara kitai ulih diau kudus baka Petara. Lebuh kitai neladan Jehovah, nya nunjukka kitai deka ‘ngintu diri kudus dalam semua utai.’ (1 Pet. 1:15) Mayuh orang ke enda nyembah Jehovah udah meda ulah ti manah ke diayanka nembiak Petara, lalu nya meransang sekeda sida meri puji ngagai Jehovah. (1 Pet. 2:12) Tang kitai ulih belajar mayuh agi utai ari Adat Lewi bagi 19. Ba artikel pengudah tu, kitai deka berandauka ayat bukai ba Adat Lewi bagi 19. Kitai deka nemu chara bukai kitai ulih ‘ngintu diri kudus’ ba pengidup, baka ke diasuh Peter kereja kitai.