48-زەرتتەۋ ماقالاسى
«كيەلى بولىڭدار»
«بارلىق ٸس-ارەكەتتەرىڭدە كيەلى بولىڭدار» (پەت. 1-ح. 1:15).
34-ٵن مىنسىزدىك جولىمەن ٴجۇرۋ
اڭداتپا *
1. ەلشى پەتىر مايلانعان ماسىحشىلەرگە قانداي كەڭەس بەردى جانە وعان قۇلاق اسۋ ٴبىزدىڭ قولىمىزدان كەلە مە؟
پەتىر I عاسىرداعى مايلانعان ماسىحشىلەرگە بىلاي دەپ جازعان: «وزدەرىڭدى شاقىرعان كيەلى قۇداي سياقتى، سەندەر دە بارلىق ٸس-ارەكەتتەرىڭدە كيەلى بولىڭدار. ويتكەنى جازبادا: — كيەلى بولىڭدار، سەبەبى مەن كيەلىمىن،— دەلىنگەن عوي» (پەت. 1-ح. 1:15، 16). وسى تارماقتان كورەتىنىمىزدەي، كوكتە نە جەردە ٶمىر سۇرۋگە ۇمىتتەنبەيىك — بارلىعىمىز دا كيەلى بولۋدىڭ ەڭ اسقاق ۇلگىسى ەحوباعا ەلىكتەي الامىز. ٴبىز ٸس-ارەكەتىمىزدە كيەلى بولا الامىز جانە بولۋىمىز كەرەك تە. كەمەلسىز بولساق تا، بۇل قولىمىزدان كەلەتىنىن ەلشى پەتىردەن بىلەمىز. ول كوپ قاتەلىك جاساسا دا، كيەلى بولا الاتىنىمىزدى ٶز ۇلگىسىمەن كورسەتكەن.
2. بۇل ماقالادا قانداي سۇراقتاردى قاراستىرامىز؟
2 بۇل ماقالادا ٴبىز مىنا سۇراقتاردى قاراستىرامىز: كيەلى بولۋ دەگەن نە؟ كيەلى كىتاپتا ەحوبانىڭ كيەلىلىگى جايىندا نە ايتىلعان؟ ٴبىز قالاي ٸس-ارەكەتىمىزدە كيەلى بولا الامىز؟ كيەلى بولۋ مەن ەحوبامەن قارىم-قاتىناسىمىزدىڭ قانداي بايلانىسى بار؟
كيەلى بولۋ دەگەن نە؟
3. كوپ ادام كيەلى بولۋ دەگەندى قالاي تۇسىنەدى، ٴبىراق ول شىن مانىندە نەنى بىلدىرەتىنىن قايدان بىلەمىز؟
3 كيەلى ادام دەگەندە كوبىسى ٴدىني كيىممەن جۇرەتىن، ٶزىن سالماقتى ۇستاپ، ەشقاشان كۇلمەيتىن ادامدى ەلەستەتەتىن شىعار. ٴبىراق كيەلى بولۋ دەگەن بۇنى بىلدىرمەيدى، ويتكەنى جازبالاردا كيەلى قۇدايىمىز ەحوبانىڭ «باقىتتى قۇداي» ەكەنى ايتىلعان (ٴتىم. 1-ح. 1:11). وعان قىزمەت ەتەتىن «حالىق تا باقىتتى» (ٴزاب. 144:15). يسا جەردە بولعاندا ۇزىن شاپان كيىپ، ٵدىل ىستەرىن جۇرت كوزىنە ٴتۇسۋ ٷشىن ىستەيتىندەردى ايىپتاعان (مات. 6:1؛ مار. 12:38). شىنايى ماسىحشىلەر كيەلى بولۋدىڭ شىن مانىندە نەنى بىلدىرەتىنىن كيەلى كىتاپتان بىلەدى. كيەلى ٵرى ٴسۇيۋشى قۇدايىمىز قولىمىزدان كەلمەيتىندى ەشقاشان تالاپ ەتپەيدى. ول بىزگە «كيەلى بولىڭدار» دەسە، دەمەك، بۇل ٴبىزدىڭ قولىمىزدان كەلەدى. ٴبىراق ٸس-ارەكەتىمىزدە كيەلى بولۋ ٷشىن، الدىمەن ونىڭ نەنى بىلدىرەتىنىن ٴتۇسىنىپ الۋىمىز قاجەت.
4. «كيەلى بولۋ»، «كيەلىلىك» دەگەن نەنى بىلدىرەدى؟
4 كيەلى بولۋ دەگەن نەنى بىلدىرەدى؟ كيەلى كىتاپتاعى «كيەلى بولۋ»، «كيەلىلىك» دەگەن سوزدەر مورالدىق جاعىنان جانە عيباداتىمىزدا تازا، قاسيەتتى بولۋدى بىلدىرەدى. سونداي-اق بۇل قانداي دا ٴبىر ادامدى نە زاتتى قۇدايعا ارنالعان قىزمەت ٷشىن بولەكتەپ الۋ دەگەن ماعىنانى دا بەرەدى. دەمەك، مورالدىق جاعىنان تازا بولىپ، ەحوباعا ۇنامدى تۇردە عيبادات ەتىپ، ونىمەن جاقىن قارىم-قاتىناستا بولساق، كيەلى بولىپ سانالامىز. كەمەلسىز بولساق تا، كيەلى قۇدايىمىز ەحوبا بىزبەن دوس بولعىسى كەلەتىنى ٷشىن وعان قانشالىقتى ريزامىز دەسەڭىزدەرشى!
«ەحوبا كيەلى، كيەلى، كيەلى!»
5. ادال پەرىشتەلەردەن ەحوبا جايلى نە بىلەمىز؟
5 ەحوبانىڭ تۇلا بويى كيەلى، كىرشىكسىز تازا. بۇنى ٴبىز ەحوبانىڭ تاعىنا جاقىن تۇرعان سەراف دەگەن پەرىشتەلەردىڭ ايتقان سوزدەرىنەن بىلەمىز. ولار: «اسكەرباسى ەحوبا كيەلى، كيەلى، كيەلى!»— دەپ جار سالعان (يشايا 6:3). ارينە، كيەلى قۇدايمەن جاقىن قارىم-قاتىناستا بولۋ ٷشىن پەرىشتەلەر دە كيەلى بولۋلارى كەرەك، ٵرى ولار شىنىمەن دە كيەلى. سوندىقتان دا ەحوبانىڭ پەرىشتەسى كەلىپ، حابار ايتقان جەرلەر كيەلى بولىپ سانالعان. وسىنداي جاعدايلاردىڭ ٴبىرى پەرىشتە مۇساعا تىكەندى بۇتانىڭ اراسىنان جالىنداعان وت بولىپ كورىنگەندە ورىن العان (مۇس. 2-ج. 3:2—5؛ ەشۋا 5:15).
باس ٴدىني قىزمەتكەر «كيەلىلىك ەحوباعا تيەسىلى» دەگەن جازۋى بار التىن تاسپانى ماڭدايىنا تاعىپ جۇرگەن (6، 7-ابزاستاردى قاراڭىز)
6، 7. ا) مۇسانىڭ 2-جازباسى 15:1، 11 دەن كورىنەتىندەي، مۇسا ەحوبانىڭ كيەلىلىگىنە قالاي نازار اۋداردى؟ ٵ) ەحوبانىڭ كيەلى ەكەنىن نە نارسە حالىقتىڭ ەسىنە سالىپ تۇرعان؟ (مۇقاباداعى سۋرەتتى قاراڭىز.)
6 يسرايلدىكتەردى قىزىل تەڭىزدەن الىپ وتكەننەن كەيىن، مۇسا حالىققا ەحوبانىڭ كيەلى قۇداي ەكەنىن ايتقان (مۇسانىڭ 2-جازباسى 15:1، 11 وقىڭىز). جالعان تاڭىرلەرگە تابىناتىن مىسىرلىقتار مەن قاناحاندىقتار مۇلدەم كيەلى بولماعان. ولار بالالارىن قۇرباندىققا شالعان، جىنىستىق ازعىندىقپەن اينالىسقان (مۇس. 3-ج. 18:3، 4، 21—24؛ مۇس. 5-ج. 18:9، 10). ال ەحوبا ادامدى بۇزاتىن بۇنداي جامان ىستەردى ٶز قىزمەتشىلەرىنەن ەشقاشان تالاپ ەتپەگەن، ويتكەنى ول اسقان كيەلى. يسرايلدىكتەر وسىنى ٵردايىم ەستە ۇستاۋلارى ٷشىن، باس ٴدىني قىزمەتكەر «كيەلىلىك ەحوباعا تيەسىلى» دەگەن جازۋى بار التىن تاسپانى ماڭدايىنا تاعىپ جۇرەتىن (مۇس. 2-ج. 28:36—38).
7 ادامدار سول تاسپاداعى جازۋدى كورىپ، ەحوبانىڭ شىنىمەن دە كيەلى ەكەنىن ەستە ۇستاعان. ال ەگەر الدەكىمنىڭ باس ٴدىني قىزمەتكەرگە كەلىپ، سول جازۋدى كورەتىن مۇمكىندىگى بولماسا شە؟ ول وسى ماڭىزدى حاباردى بىلمەي قالا ما؟ جوق، ويتكەنى ەرلەردىڭ، ايەلدەردىڭ جانە بالالاردىڭ الدىندا مۇسا زاڭى وقىلعاندا، ٵربىر يسرايلدىك بۇل حاباردى ەستيتىن (مۇس. 5-ج. 31:9—12). ٴسىز سول زاماندا ٶمىر سۇرگەن بولساڭىز، مىنا سوزدەردى ۇنەمى ەستىر ەدىڭىز: «مەن قۇدايلارىڭ ەحوبامىن... كيەلى بولىڭدار، سەبەبى مەن كيەلىمىن... مەنىڭ الدىمدا كيەلى بولىڭدار، ويتكەنى مەن، ەحوبا، كيەلىمىن» (مۇس. 3-ج. 11:44، 45؛ 20:7، 26).
8. مۇسانىڭ 3-جازباسى 19:2 مەن پەتىردىڭ 1-حاتى 1:14—16 دەيىنگى تارماقتاردان نە بىلەمىز؟
8 ٴقازىر مۇسانىڭ 3-جازباسى 19:2 دەگى سوزدەرگە نازار اۋدارايىق. ول جەردە ەحوبا مۇساعا: «بۇكىل يسرايل قاۋىمىنا مىنانى ايت: — كيەلى بولىڭدار، سەبەبى مەن، قۇدايلارىڭ ەحوبا، كيەلىمىن»،— دەگەن. پەتىر ماسىحشىلەرگە «كيەلى بولىڭدار» دەگەندە، وسى تارماقتاعى سوزدەردى كەلتىرسە كەرەك (پەتىردىڭ 1-حاتى 1:14—16 وقىڭىز). ارينە، ٴقازىر ٴبىز مۇسا زاڭىن ۇستانبايمىز. ٴبىراق مۇسانىڭ 3-جازباسى 19:2-دەگى سوزدەردى پەتىردىڭ راستاعانىنان ەحوبانىڭ كيەلى ەكەنىن جانە ونى جاقسى كورەتىندەر دە كيەلى بولۋ كەرەكتىگىن بىلەمىز. كوكتە نە جەردە ٶمىر سۇرۋگە ۇمىتتەنبەيىك — كيەلى بولۋعا بارلىعىمىز دا ۇمتىلۋىمىز كەرەك (پەت. 1-ح. 1:4؛ پەت. 2-ح. 3:13).
«بارلىق ٸس-ارەكەتتەرىڭدە كيەلى بولىڭدار»
9. مۇسانىڭ 3-جازباسى 19-تاراۋدى قاراستىرعانىمىزدىڭ قانداي پايداسى بار؟
9 ٴبىز كيەلى قۇدايىمىزعا ۇنامدى بولۋدى قالاعاندىقتان، كيەلى بولۋدى ۇيرەنگىمىز كەلەدى. ەحوبا بىزگە بۇنىڭ جولدارىن كورسەتكەن. مىسالى، مۇسانىڭ 3-جازباسى 19-تاراۋ ارقىلى. وسى تاراۋعا قاتىستى ەۆرەي عالىمى ماركۋس كاليش بىلاي دەگەن: «بۇل تاراۋدى مۇسانىڭ 3-جازباسىنداعى ەڭ ماڭىزدى تاراۋ دەسەك بولادى. ٴتىپتى كيەلى كىتاپتىڭ العاشقى بەس كىتابىنىڭ ىشىندەگى ەڭ ماڭىزدىسى دەسەك تە قاتەلەسپەيمىز». ەسىمىزدە بولسا، مۇسانىڭ 3-جازباسى 19-تاراۋ «كيەلى بولىڭدار» دەگەن سوزدەرمەن باستالادى. ەندەشە، سول تاراۋداعى كيەلى بولۋعا كومەكتەسەتىن كەيبىر كەڭەستەردى قاراستىرايىق.
مۇسانىڭ 3-جازباسى 19:3 تەگى «انالارىڭ مەن اكەلەرىڭدى قۇرمەتتەڭدەر» دەگەن زاڭ ماسىحشىلەردى نە جايلى ويلاندىرۋ كەرەك؟ (10—12-ابزاستاردى قاراڭىز) *
10، 11. مۇسانىڭ 3-جازباسى 19:3 كە ساي، ٴبىز نە ىستەۋىمىز كەرەك جانە بۇل نەگە ماڭىزدى؟
10 يسرايلدىكتەرگە كيەلى بولۋدى ايتقاننان كەيىن، ەحوبا: «ٵرقايسىسىڭ انالارىڭ مەن اكەلەرىڭدى قۇرمەتتەڭدەر... مەن سەندەردىڭ قۇدايلارىڭ ەحوبامىن»،— دەگەن (مۇس. 3-ج. 19:2، 3).
11 ٴبىز قۇدايدىڭ «انالارىڭ مەن اكەلەرىڭدى قۇرمەتتەڭدەر» دەگەن نۇسقاۋىنا قۇلاق اسقىمىز كەلەدى. ٴبىر جىگىتتىڭ: «ماڭگىلىك ومىرگە يە بولۋ ٷشىن قانداي ىزگىلىك جاساۋىم كەرەك؟»— دەگەن سۇراعىنا يسانىڭ نە دەپ جاۋاپ بەرگەنى ەسىڭىزدە مە؟ ونىڭ جاۋابىندا «اكە-شەشەڭدى قۇرمەتتە» دەگەن سوزدەر دە بولدى (مات. 19:16—19). بۇل نۇسقاۋدى ورىنداماۋدىڭ بار امالىن جاسايتىن پارىزشىلدار مەن ٴدىن مۇعالىمدەرىن بولسا يسا قاتتى سوككەن. ولار سول ارەكەتتەرىمەن «قۇداي ٴسوزىنىڭ ٴقادىرىن تۇسىرەتىن» (مات. 15:3—6). ويتكەنى «قۇداي ٴسوزى» ون زاڭداعى «اكە-شەشەڭدى قۇرمەتتە» دەگەن بەسىنشى زاڭدى جانە مۇسانىڭ 3-جازباسى 19:3 تەگى سوزدەردى دە قامتيتىن (مۇس. 2-ج. 20:12). مۇسانىڭ 3-جازباسى 19:3 تەگى «انالارىڭ مەن اكەلەرىڭدى قۇرمەتتەڭدەر» دەگەن نۇسقاۋدىڭ ٴدال الدىندا «كيەلى بولىڭدار، سەبەبى مەن، قۇدايلارىڭ ەحوبا، كيەلىمىن» دەپ جازىلعانىن ۇمىتپايىق.
12. مۇسانىڭ 3-جازباسى 19:3 تەگى سوزدەردى قالاي ورىنداساق بولادى؟
12 ٴبىز: «مەن اتا-انامدى قۇرمەتتەپ ٴجۇرمىن بە؟»— دەپ ويلانعانىمىز ٴجون. وسى تۇستا دۇرىس جاساماعان جاقتارىڭىز بولسا، ٵلى دە كەش ەمەس. ٴبىز وتكەندى وزگەرتە المايمىز، ارينە. ٴبىراق ەندى اتا-انامىزعا كوبىرەك كوڭىل بولۋگە بەكىنسەك بولادى. مىسالى، ولارمەن بىرگە كوبىرەك ۋاقىت وتكىزەرمىز. نەمەسە ولاردى قارجىلاي، رۋحاني جانە ەموسيالىق جاعىنان كوبىرەك قولداي الارمىز. سوندا مۇسانىڭ 3-جازباسى 19:3 تەگى سوزدەردى ورىندايتىن بولامىز.
13. ا) مۇسانىڭ 3-جازباسى 19:3 تە تاعى قانداي كەڭەس جازىلعان؟ ٵ) لۇقا 4:16—18-دەيىنگى تارماقتارعا ساي، ٴبىز يسانىڭ ۇلگىسىنە قالاي ەلىكتەي الامىز؟
13 مۇسانىڭ 3-جازباسى 19:3 تەن كيەلى بولۋعا قاتىستى تاعى ٴبىر جايتتى بىلەمىز. ول جەردە: «دەمالىس كۇنىن ۇستانىڭدار»،— دەلىنگەن. ارينە، ماسىحشىلەر مۇسا زاڭىنا باعىنىشتى بولماعاندىقتان، دەمالىس كۇنىن ۇستانبايدى. ٴبىراق ٴبىز يسرايلدىكتەردىڭ دەمالىس كۇنىن قالاي ۇستانعانىنا جانە ونىڭ قانداي پايداسىن كورگەنىنە قاراپ، وزىمىزگە ماڭىزدى ساباق الامىز. ولار دەمالىس كۇنى ەشقانداي جۇمىس ىستەمەي، رۋحاني ىستەرگە كوڭىل بولەتىن *. يسا دا سول كۇنى ٶز قالاسىنداعى ٴماجىلىسحاناعا بارىپ، قۇداي ٴسوزىن وقيتىن (مۇس. 2-ج. 31:12—15؛ لۇقا 4:16—18 وقىڭىز). دەمەك، ٴبىز دە رۋحاني ىستەرگە كوبىرەك كوڭىل ٴبولۋ ٷشىن، كۇندەلىكتى كۇيبىڭ تىرلىكتەن ۋاقىت تابۋىمىز كەرەك. وسى جاعىنان جاقسارۋ كەرەك تۇستارىڭىز بار ما؟ رۋحاني ىستەرمەن جۇيەلى تۇردە اينالىسساڭىز، ەحوباعا جاقىنداي تۇسەسىز. ال بۇل كيەلى بولۋ ٷشىن اسا قاجەت.
ەحوبامەن قارىم-قاتىناسىڭىزدى بەكەمدەڭىز
14. مۇسانىڭ 3-جازباسى 19-تاراۋدا قانداي ماڭىزدى شىندىققا نازار اۋدارىلادى؟
14 مۇسانىڭ 3-جازباسى 19-تاراۋدا كيەلى بولىپ قالۋىمىزعا كومەكتەسەتىن ٴبىر ماڭىزدى شىندىق كوپ رەت قايتالانادى. 4-تارماقتىڭ سوڭىندا: «مەن سەندەردىڭ قۇدايلارىڭ ەحوبامىن»،— دەپ جازىلعان. وسى سياقتى سوزدەر 19-تاراۋدا 16 رەت كەزدەسەدى. بۇلار ون زاڭنىڭ «ەحوبا قۇدايىڭمىن. مەنەن باسقا قۇدايلارىڭ بولماسىن» دەگەن ەڭ العاشقى زاڭىن ەسكە تۇسىرەدى (مۇس. 2-ج. 20:2، 3). راسىندا دا، كيەلى بولعىسى كەلەتىن ٵربىر ٴماسىحشى ەشكىمنىڭ دە، ەشنارسەنىڭ دە ەحوبامەن قارىم-قاتىناسىنا سىزات تۇسىرۋىنە جول بەرمەۋى كەرەك. سونداي-اق ەحوبا كۋاگەرى دەگەن اتتى الىپ جۇرگەندىكتەن، ٴبىز قۇدايدىڭ كيەلى ەسىمىنە داق تۇسىرەتىن كەز كەلگەن ارەكەتتەن اۋلاقپىز (مۇس. 3-ج. 19:12؛ يشايا 57:15).
15. مۇسانىڭ 3-جازباسى 19-تاراۋداعى قۇرباندىقتارعا قاتىستى نۇسقاۋلار ٴبىزدى نە ىستەۋگە تالپىندىرۋ كەرەك؟
15 يسرايلدىكتەر ەحوبانى قۇدايىمىز دەپ مويىندايتىندارىن ونىڭ كوپتەگەن زاڭدارىن ۇستانۋلارىمەن كورسەتەتىن. مۇسانىڭ 3-جازباسى 18:4 تە: «مەنىڭ شەشىمدەرىمدى ورىنداڭدار، نۇسقاۋلارىمدى ۇستانىپ، سوعان ساي ارەكەت ەتىڭدەر. مەن سەندەردىڭ قۇدايلارىڭ ەحوبامىن»،— دەلىنگەن. ەحوبانىڭ سول «نۇسقاۋلارىنىڭ» كەيبىرى مۇسانىڭ 3-جازباسى 19-تاراۋدا جازىلعان. مىسالى، 19:5—8؛ 21، 22-تارماقتاردا مال قۇربانداعىن شالۋعا قاتىستى نۇسقاۋلار بار. يسرايلدىكتەر «ەحوباعا ارنالعان قاسيەتتى نارسەنى»، ياعني قۇرباندىقتى، ارامدالمايتىنداي ەتىپ شالۋ كەرەك بولعان. بۇل تارماقتار ٴبىزدى ەحوباعا ۇنامدى بولۋعا جانە وعان جاعىمدى قۇرباندىقتى، ياعني ماداقتاۋ قۇرباندىعىن ۇسىنۋعا تالپىندىرۋ كەرەك (ەۆر. 13:15).
16. مۇسانىڭ 3-جازباسى 19-تاراۋداعى قانداي پرينسيپ قۇدايعا قىزمەت ەتەتىندەر مەن ەتپەيتىندەردىڭ ايىرماشىلىعىنا نازار اۋدارادى؟
16 كيەلى بولۋ ٷشىن ٴبىز وسى دۇنيەدەن ەرەكشەلەنۋدەن قورىقپاۋىمىز كەرەك. ٴبىراق بۇل وڭاي ەمەس. ويتكەنى كەيدە سىنىپتاستار، ارىپتەستەر، سەنۋشى ەمەس تۋىسقاندار ەحوباعا ۇنامسىز نارسەنى ىستەۋگە قىسپاقتايدى. وسىندايدا دۇرىس ارەكەت ەتۋگە نە كومەكتەسەدى؟ مۇسانىڭ 3-جازباسى 19:19 دا ٴبىر ەرەكشە پرينسيپ جازىلعان. وندا: «ەشكىم... ەكى ٴتۇرلى جىپتەن توقىلعان كيىمدى كيمەسىن»،— دەلىنگەن. وسى زاڭدى ۇستانعاننىڭ ارقاسىندا يسرايلدىكتەر اينالاسىنداعى حالىقتاردان ەرەكشەلەنىپ تۇراتىن. بۇگىندە ٴبىز مۇسا زاڭىنا باعىنىشتى بولماعاندىقتان، شىت پەن جىبەك، زىعىر مەن ٴجۇن سياقتى جىپتەردەن توقىلعان كيىمدى كيە بەرەمىز. ٴبىراق نانىم-سەنىمدەرى مەن ٸس-ارەكەتتەرى كيەلى كىتاپقا قايشى ادامدارعا — مەيلى ول سىنىپتاسىمىز، ارىپتەسىمىز نە تۋىسقاندارىمىز بولسىن — ۇقساۋدان اۋلاقپىز. ارينە، ٴبىز تۋىسقاندارىمىز بەن باسقا دا ادامداردى جاقسى كورەمىز. ٴبىراق ماڭىزدى شەشىمدەر قابىلداۋعا كەلگەندە، ەحوبانىڭ حالقى رەتىندە ولاردان ەرەكشەلەنۋدەن قورىقپايمىز. ەسىمىزدە بولسا، «كيەلى بولۋ» قۇدايعا ارناپ بولەكتەپ الۋ دەگەن ماعىنا بەرەدى. دەمەك، كيەلى بولعىمىز كەلسە، وسى دۇنيەدەن بولەك بولعانىمىز اسا ماڭىزدى (قور. 2-ح. 6:14—16؛ پەت. 1-ح. 4:3، 4).
مۇسانىڭ 3-جازباسى 19:23—25-تارماقتاردان يسرايلدىكتەر قانداي ساباق العان، ال ٴسىز قانداي ساباق الدىڭىز؟ (17، 18-ابزاستاردى قاراڭىز) *
17، 18. مۇسانىڭ 3-جازباسى 19:23—25-تارماقتاردان قانداي ماڭىزدى ساباق الامىز؟
17 «مەن سەندەردىڭ قۇدايلارىڭ ەحوبامىن» دەگەن سوزدەر يسرايلدىكتەرگە ەحوبامەن قارىم-قاتىناستارى ومىردەگى ەڭ ماڭىزدى نارسە بولۋ كەرەكتىگىن ەستەرىنە سالعان. مىسالى، مۇسانىڭ 3-جازباسى 19:23—25 (وقىڭىز) دەيىنگى تارماقتاردا جازىلعان نۇسقاۋلاردى الايىقشى. ۋادە ەتىلگەن جەرگە قونىس تەپكەن سوڭ، يسرايلدىك ادام جەمىس اعاشىن وتىرعىزسا، ونىڭ جەمىسىن ٷش جىل بويى جەي المايتىن. ال ٴتورتىنشى جىلى جەمىستى جيناپ، قۇدايدىڭ كيەلى شاتىرىنا اپارۋ ٷشىن بولەك الىپ قوياتىن. ول ونىڭ جەمىسىن تەك بەسىنشى جىلى عانا جەي الاتىن. بۇل زاڭ يسرايلدىكتەرگە ٴبىرىنشى كەزەكتە ٶز قاجەتتىلىكتەرىن ويلاماي، قامقورشىلارى ەحوباعا سەنىم ارتۋعا جانە وعان عيبادات ەتۋدى باستى ورىنعا قويۋعا ۇيرەتكەن. ال ەحوبا ولاردى جەيتىن تاماقپەن قامدايتىن. وسىلاي قۇداي ولاردى عيباداتتىڭ ورتالىعى — كيەلى شاتىرعا جومارتتىقپەن سي-تارتۋ اكەلۋگە تالپىندىرعان.
18 مۇسانىڭ 3-جازباسى 19:23—25-تارماقتاردا جازىلعان زاڭ يسانىڭ تاۋداعى ۋاعىزىندا ايتقان سوزدەرىن ەسكە سالادى. ول: «نە ٸشىپ-جەيمىز دەپ... ۋايىمداۋدى قويىڭدار!.. بۇلاردىڭ ٴبارى سەندەرگە قاجەت ەكەنىن كوكتەگى اكەلەرىڭ بىلەدى عوي»،— دەگەن. ٴيا، ەگەر ەحوبا ٴتىپتى قۇستاردىڭ قامىن جاساسا، قىزمەتشىلەرىنىڭ قامىن ودان بەتەر ويلايدى عوي! (مات. 6:25، 26، 32). ٴبىز ەحوباعا قامقورشىمىز دەپ سەنىم ارتامىز. سوندىقتان مۇقتاج جاندارعا سي-تارتۋ بەرگەندە، ونى ەشكىمگە جار سالمايمىز. ٵرى قاۋىمنىڭ شىعىندارىن جابۋعا دا قۋانىشپەن ساداقا بەرەمىز. وسىلايشا ٴبىز مۇسانىڭ 3-جازباسى 19:23—25-تارماقتارداعى ٴپرينسيپتى قولدانىپ جاتقانىمىزدى كورسەتەمىز. ەحوبا جاساعان جومارتتىعىمىزدى بايقايدى، ٵرى مىندەتتى تۇردە قارىمتامىزدى قايتارادى (مات. 6:2—4).
19. مۇسانىڭ 3-جازباسىنداعى تارماقتاردى قاراستىرعانىمىز سىزگە نەسىمەن پايدالى بولدى؟
19 ٴبىز مۇسانىڭ 3-جازباسى 19-تاراۋداعى كەيبىر تارماقتاردى قاراستىرىپ، قاي جاعىنان ەحوبا سياقتى كيەلى بولا الاتىنىمىزدى كوردىك. وعان ەلىكتەسەك، «بارلىق ٸس-ارەكەتىمىزدە كيەلى بولۋعا» تىرىسىپ جاتقانىمىزدى كورسەتەمىز (پەت. 1-ح. 1:15). ٴبىزدىڭ جاقسى ٴجۇرىس-تۇرىسىمىز كوپ ادامعا ەحوبانى ماداقتاۋعا قوزعاۋ سالعان (پەت. 1-ح. 2:12). ٴبىز مۇسانىڭ 3-جازباسى 19-تاراۋدان بۇدان دا كوپ ساباق الا الامىز. ەندەشە، تاعى قاي جاعىنان كيەلى بولا الاتىنىمىزدى كەلەسى ماقالادان بىلەيىك.
80-ٵن «دامىن تاتىڭدار دا، ەحوبانىڭ ىزگىلىگىنە كوز جەتكىزىڭدەر»
^ ٴبىز ەحوبانى قاتتى جاقسى كورەمىز، سوندىقتان وعان ۇنامدى بولعىمىز كەلەدى. ەحوبا كيەلى بولعاندىقتان، ٴبىزدىڭ دە كيەلى بولعانىمىزدى قالايدى. الايدا كەمەلسىز ادامدار قالايشا كيەلى بولا الادى؟ وسى ماقالادا پەتىردىڭ ماسىحشىلەرگە ايتقان كەڭەسى جايلى جانە ەحوبانىڭ يسرايل حالقىنا بەرگەن نۇسقاۋلارى جايىندا وي جۇگىرتىپ، قالاي كيەلى بولا الاتىنىمىزدى بىلەمىز.
^ دەمالىس كۇنى مەن ودان قانداي ساباق الاتىنىمىز جايىندا كوبىرەك ٴبىلۋ ٷشىن، 2019-جىلدىڭ جەلتوقسان ايىنداعى «كۇزەت مۇناراسى» جۋرنالىنىڭ «ەڭبەك ەتەتىن جانە دەمالاتىن ۋاقىت بار» دەگەن ماقالاسىن قاراڭىز.
