1. I mubel kaay waakady mupostol Pyeel mwaakish biin Krist nend, ni bwabiny umweemweek mukasakan bwa kumulond?

NING tut biikal ni kutakamin kwa kuy mu diiwul eecy kushaal ha bulab, tudy mwa kuhet dyambulwiish ku mubel waakady mupostol Pyeel mwaakish biin Krist bumb diisaby ba mu siyekel a kuuhal. Pyeel ufundiil neey: “Ki iikalaay baat bajilang mu kushikat kwiinun koos bu mudy Mawej wiinubiikeen mwiikal mujilang. Bwaal mukand a Mawej uleeleeb neey: ‘Iikalaay baat bajilang, bwaal mim nady mujilang.’” (1 Py. 1:15, 16) May aam, mitwambambulwiish bwa kwiidikij Yehow udy cileejel cilengel cyeeh cya kwiikal muut mujilang. Bikaam twiikal baat bajilang mu kushikat kwiitut. Bidy mwa kumweek bikasakan bwaal katwiish bawaakan. Pyeel ulongel bilem bivul menmen; cileejel cindiy cituleeleej neey: tudy mwa ‘kwiikal baat bajilang.’

2. I majooj kaay matwiiyiiy kwaalabul mu ciin bwaal eecy?

² Mu ciin bwaal eecy, twiiyiiy kukontonon majooj aam: Kwiikal muut mujilang kumvumvwiij biny? I biny bidy Bibl wiitulongweesh bwa bujilang bwa Yehow? I mushind kaay utudy mwa kwiikal baat bajilang mu kushikat kwiitut? I kuhetangan kaay kudy hakacy ha kwiikal muut mujilang ni bulund bwiitut ni Yehow?

3. Baat bavul balaalang bicy hadyobw baleeb bwa muut mujilang, ki i kweeh kutudy mwa kuhetel bujaalal bwa bwaal oobw?

³ Hady baat baleeb bwa muut mujilang, bavul balaalang neey: i muut udy mwiihoy-hoy, uvwaavwaal minzaby ni umweemweek ku mees bu muut a mulow. Ki kabiishoh bend naak. Bibl uleeleej neey: Yehow i “Mawej udy ni musangal.” (1 Tim. 1:11, NWT.) Baat bamuhahambidil bady ni “musangal.” (Mis. 144:15) Yeez waakady mufwiij naay baat baakady bakat kuvwaal minzaby ni biileej ku mees kwa baat mudyobw bawaakan. (Mat. 6:1; Mark 12:38) Biin Krist ba biin-biin, i bamanyik cidy kwiikal muut mujilang kumvwiij bwaal i bamanyik cidy Bibl uleeb. Tudy batwiishiibw neey: Taat iitut mujilang ni Mawej a lukat, kakwiitaboh bend bwa kwiitwaakish  diiy didy mwa kwiitukasakeen bwiitut kwiidikooyel. Ki bwabiny Yehow wiitwambambil neey: “Iikalaay baat bajilang,” twiitaatab neey: bidy mwa kulongek naak. Biin-biin, kuuhal kwiitut kwiikal baat bajilang mu shikacil iitut, bikaam tumanyik cidy bujilang bumvwiij.

4. Myaak eey “mujilang” ni “bujilang” yumvumvwiij biny?

⁴ Bujilang bumvumvwiij biny? Mu Bibl, hadyobw baleeb bwa myaak eey “mujilang” ni “bujilang” baleeleeb bwa myand yilengel ya muut eecy bwa biikadil bindiy bikiish byoonyek. Myaak eey yumvumvwiij cikwaabw kwiikal ku butamb bwa Mawej bwa kumukadil mudimw. Mu mushind mukwaabw, bady mwa kwiitwangat bu baat bajilang hatuloolong myand yilengel, hatuhahambidil Yehow mu mushind udyey mwanyish, ni hatudy-bady nend bulund bulengel. Bwaal oobw bwiitukeekemesh ning mutukiish bawaakan, Mawej i mujilang ni ukaakaam bwa tudy nend bulund busheem, nang-nang hatwangangat myand ya mu Bibl ni buseeb yitaatal bujilang bwindiy.

5. I biny bitudy mwa kulongel kudy banjel ba lulamat habitaatal Yehow?

⁵ Mu mishind yoos tumanyik neey: Yehow i mujilang ni kiish wa biikadil byoonyek. Tumaamanyik bwaal oobw kudyambulwiish dya banjel babiibikanobw neey: ba serafeh—bady banyungulukil ku kwaas indiy a lutumb. Bamw ba ku bab baakady baleeb neey: “Mujilang, mujilang, mujilang i Mawej [Yehow wa bilwiil,” NWT.] (Ye. 6:3) Biin-biin, bwa banjel kudyobw bulund ni Mawej aabab mujilang, byaakady bikaam banj biikal bajilang—bab biin i bajilang. Biin-biin, kwiikalok kwa mwanjel a Yehow ha cyaab kahand ha bulab kudy mwa kulong bwa cyaab aacy ciikal cijilang. I cicy cyaakady cilongekel Moyiz haakadyey ku diifuuk dya dilung a mudil.​—Cim. 3:2-5; Joz. 5:15.

6-7. a) Bilondeshel Cimwang 15:1, 11, i mushind kaay udy Moyiz muleej hatook neey: Mawej i mujilang? b) Bujilang bwa Mawej bwaakady buvulwiij biin Izaleel boos bwaal kaay? (Tal cifwaatul cya ha cizubw.)

⁶ Haanyim a Moyiz muman kulombol biin Izaleel bwa kusabukobw kaabuk-koony kasunz, wiibambiil ni uleeb bikasakan neey: Mawej aabab, Yehow, i mujilang. (Bal Cimwang 15:1, 11.) Biin Ejipit baakady bahambidil baamawej ba makos, kabaakadyoh bend bajilang. Ni biin Kanaan byaabw kabaakadyoh bend bajilang bwaal baakady bahambidil baamawej ba makos. Mu kuhambidil kwaabab baakady balambul baan ni bend masandy. (Lev 18:3, 4, 21-24; Kb 18:9, 10) Nook, Yehow kaakady mulomboh bend bahambidil bindiy bwa kulongobw bwaal kahand bwaakady mwa kwiiboony. Yiy mwiin i mujilang. Bwaal oobw bumweekel bwa biin-biin bwa cimanyin cyaakadyobw bafund ha citaat cya or cyaakady cilamik ha ciful cya mutam a balambul ba milambw. Ha citaat aah baakady bafundoh neey: “Bujilang i bwa Yehow.”​—Cim. 28:36-38, NWT.

⁷ Mufund waakady ha citaat eecy, waakady mwa kujaadikil muut woos waakady mwa kumutal neey: Yehow udy biin-biin mujilang. Mwiin Izaleel waakady kay mwa kutal citaat eecy bumwaakadyey kaay mwa kufweej habwiih ni mutam a balambul ba milambw waakady mwa kulong biny? Waakady mwa kuvulaminok musah a buseeb oow eeny? Waakweeh! Mwiin Izaleel woos waakady mumvw musah oow bu Mukenj waakadyobw babadil baan-balum, baan-bakaj ni baan. (Cim. 31:9-12) Bu uw mwiikaloh byeeb, waakady mwa kumvw may aam: “Mim nady Yehow Mawej iinun: iikalaay . . . bajilang, bwaal mim nady mujilang.” “Iikalaay bajilang bijidil bwa kuulongel mudimw, bwaal nady mujilang, mim Mawej.”​—Lev 11:44, 45; 20:7, 26.

8. Bwabiny bikaam twangat ni buseeb may mady mu Biin Leevy 19:2 ni 1 Pyeel 1:14-16?

⁸ Tutalayaak bwaal budy bufund mu Biin Leevy 19:2 bwaakady Yehow muleeb bwa kubadil baat boos. Yehow wambiil Moyiz neey: ‘Ambil cikong cituutul cya Izaleel may aam: “Iikalaay bajilang,  bwaal nady mujilang, mim Mawej, Mawej iinun.”’ Pyeel udy mwa kwiikal muteel may aam ambiley biin Krist neey: “iikalaay baat bajilang.” (Bal 1 Pyeel 1:14-16.) Biin-biin, katwiish muush mwa Mikenj ya Moyiz. Ki myand yifundil Pyeel yileeleej dilongweesh ditudy mwa kuhetel mukand a a Biin Leevy 19:2, i bwiin kuleeb neey: Yehow i mujilang, ni bikaam baat boos bady bamukat biikal bajilang. Bwaal oobw i bwa biin-biin ning tut ni kutakamin kwa kuy mu diiwul eecy kwa kushikat ha bulab bufutulul paradiiz.​—1Py. 1:4; 2 Py. 3:13.

9. I biny biikal mwa kwiitwambulwiish hatukookontonon may mady mu mukand a Biin Leevy shapitil 19?

⁹ Bu mutudy bakat kusangeej Mawej iitut mujilang, tudy bakat kulong bwa kumanyik mutudy mwa kwiikal baat bajilang. Yehow i mwiitwaakish mibel yitudy mwa kulond bwiitut kwiikal baat bajilang. Cyaab cilengel citudy mwa kusangan mibel eey, i mu mukand a Biin Leevy shapitil 19. Marcus Kalisch udy mumanyik ciin Ebreh i mufund nook: “Wiinoow i shapitil udy ni buseeb buvul umvumvwiik bilengel, ni mwiikal wa mu Mikand yitaan ya kuuhal yifundilobw kudy Moyiz.” Tutalayaak verseh yikwaabw ya mu shapitil oomw yidy ni malongweesh ma buseeb yidy mwa kwiitwambulwiish mu shikacil iitut wa mafuk moos. Tut balong nook, malongweesh aam mady mwa kwiikal diiy dya kutang naady mwiisamb dya neey: “Iikalaay bajilang.”

10-11. I biny bidy mukand a Biin Leevy shapitil 19 wiitulombw bwa kulong, ni i bwabiny bidy ni buseeb?

¹⁰ Hamanyiney kuleeb neey: biin Izaleel biikal bajilang, Yehow uleebel cikwaabw neey: ‘Muut woos wa kunudy aneemek taatend ni maamend . . . Nady Yehow Mawej iinun.’​—Lev 19:2, 3.

¹¹ Biin-biin, bikaam tukooyel diiy dya Mawej dya kuneemek balel biitut. Vuluk cyaakady Yeez muleeb hakady muut mukwaabw mumwiihanguj neey: “i myand kaay yilengel yinady mwa kulong bwa mim kuhet buumy bwa mwendelel?” Mu may makeeh Yeez waalabwiil muut aaw neey: bikaam aneemek taat indiy ni maam indiy. (Mat. 19:16-19) Yeez ufwiijil naay cikwaabw Bafarizey ni balongweesh ba may ma Mawej maheley Moyiz bwa mwaakadyobw balek kuneemek balel baababw. Hanuloolong nook, “noonyoony diiy dya Mawej bwa kulong myand yiinun ya kaabukul.” (Mat. 15:3-6) Mu “diiy dya Mawej” eedy mudy diiy diitaan dya mu May Diikumy mahelobw Moyiz ditubabal  mukand a Biin Leevy 19:3. (Cim. 20:12) Cikwaabw, lamaay mu meej diiy ditusaasangan mu Biin Leevy 19:3—dya neey: muut woos aneemek maam indiy ni taat indiy—bwaal diloolond diiy dya neey: ‘Iikalaay bajilang, bwaal nady mujilang, mim Yehow, Mawej iinun.’

12. Mu dyumvwangan ni mubel utusaasangan mu mukand a Biin Leevy 19:3, i diijooj kaay ditudy mwa kwiiyihanguj?

¹² Mu dyumvwangan ni mubel wa Yehow wa kuneemek balel biitut, tudy mwa kwiiyihanguj neey: ‘Nadyaakal naneemekok balel baam eeny?’ Uw mutal neey: i bwaal buwaakady mwa kulong koos aak, udy mwa kwangat diihangadik kaabaak dya kulongolol myand. Kwiish mwa kushiitulul myand yiwulongel ha kal, ki udy mwa kwangat diihangadik teng kaabaak bwa kulongel balel biibuh myand yivul yilengel. Misang yikwaabw udy mwa kulongolol program iibuh bwa kuhitij naab diib divul. Eecy kwiin mwa kwiibambulwiishok ni biit bikaakaamobw, kwiibambulwiish ni myand ya mu spirit, eecy kwiibakashish eeny? Kulong nook kuheehetangan ni cidy mukand a Biin Leevy 19:3 uleeb.

13. a) I mubel kaay mukwaabw utusaasangan mu mukand a Biin Leevy 19:3? b) I mushind kaay utudy mwa kwiidikij leeloow cileejel cya Yeez cidy mu mukand a Luuk 4:16-18?

¹³ Biin Leevy 19:3 wiituloolongweesh bwaal bukwaabw habitaatal kwiikal baat bajilang. Baleeleebomw bwa kuneemek diifuk dya Sabaat. Biin Krist kabiin muush mwa May ma Mawej maheeley Moyiz, bwa kuneemekel diifuk dya Sabaat luming loos. Cikwaabw, tudy mwa kulong myand yivul yitaatal mushind waakady biin Izaleel baneemekel diifuk dya Sabaat ni mushind waakadyobw bahet musangal hakulong nook. Diifuk dya Sabaat dyaakady ciisang cya kwiikish bwa midimw yaakadyobw bakal ni cya kutumobw meej maabab ku myand ya mu spirit. * Ki bwabingany, diifuk dya Sabaat, Yeez waakady uy mu mazubw ma kukongakeen ma mu Nazaret ni waakady ubal Diiy dya Mawej. (Cim. 31:12-15; bal Luuk 4:16-18.) Diiy dya Mawej didy mu mukand a Biin Leevy 19:3 dya neey: ‘neemek diifuk dya sabaat’ diitusaasak bwa kwiisumbil diib mu midimw iitut ya diifuk dyoos bwa twiikal ni kiihacil ka kutum nang-nang meej miitut mu myand ya mu spirit. Udy mutalok neey: udy mwa kulongololok myand kahand bwa kukooyel diiy eedy eeny? Uw mulong program a kulong myand ya mu spirit ha ciibidil, wiiyiiy kwiikal ni musangal, ni wiiyiiy kudy bulund bulengel ni Yehow, budy ni buseeb bwa kwiikal muut mujilang.

14. I myand kaay ya biin-biin yidy ni buseeb yidyobw bend ni Kwambulul mu shapitil woos wa 19 wa mukand a Biin Leevy?

¹⁴ Mukand a Biin Leevy shapitil 19 mudy myand ya biin-biin yidyobw bambulul yidy mwa kwiitwambulwiish bwa kwiikal baat bajilang. May ma bulekel ma verseh 4 mady nook: ‘Nady Yehow, Mawej iinun.’ Cyambil eecy, eecy may maakaabumw aam, twiimasasangan misang 16 mu shapitil oow. Bwaal oobw bwiituvuvulwiij diiy dya kuuhal dya mu may diikumy dya neey: ‘Nady Yehow, Mawej iinun . . . Kwiish mwa kwiikal ni baamawej bakwaabw kuuhal kwa mim.’ (Cim. 20:2, 3) Mwiin Krist woos ukaakaam kwiikal muut mujilang, bikaam atwiishibw neey: kakwiin ciit eecy muut bidy mwa kwiikal ni buseeb buvul bihitok bulund bwindiy ni Mawej. Bu mwiitubiibikanobw neey: Batemw ba Yehow, tudy biswiik bwa kulek bilong bidy mwa kunyang diijin dindiy dijilang​—Lev 19:12; Ye. 57:15.

15. Milambw yidyobw baleeb mu verseh yitusaasangan mu mukand a Biin Leevy shapitil 19 yitusaasak bwa kulong biny?

¹⁵ Bwa biin Izaleel kwiitabobw neey: Yehow waakady Mawej aabab, baakady mwa kukooyel may mindiy. Mukand a Biin Leevy 18:4 uleeleeb neey: ‘Nulong bu muleeleeb may ma mim ni nulam bijil bininumbumbil, bwaal mim i yiy  Yehow, Mawej iinun.’ Mu shapitil a 19 mudy “bijil” bikwaabw byaakadyobw bumbil biin Izaleel. Cileejel, mu verseh 5-8, 21, 22 baleeleebomw cikwaabw bwa milambw ya nyam. Biin Izaleel baakady mwa kutwaal milambw eey mu mushind waakadyobw kabay mwa ‘koony ciit cijidil cya Yehow.’ Kubal kwa verseh eey, kwiitusaasak bwa kusangeej Yehow ni bwa kumwaakish milambw yilengel yimutuutumbish, bu mudy mukand a Biin Ebreh 13:15 wiitwambil bwa kulong.

16. I biny bidy mwa kwiitwiiyil mu meej bwa kushilangan kudy hakacy ha baat bakaakadil Mawej mudimw ni bady kabay bamukadil mudimw?

¹⁶ Bwiitut kwiikal baat bajilang, bikaam tulong myand yishilangan ni baat bady kabay bamanyik Mawej. Ki bidy mwa kwiitukasakeen bwa kulong nook. Misang yikwaabw balony biitut ba mu kalaas, biin mudimw neet, baan-beet ba mu cisak bady kabay bakadil Yehow mudimw, ni baat bakwaabw bady mwa kwiitusak bwa kwiidit mu midimw kahand yidy kayiy yihetangan ni kuhambidil kwiitut. Bab bitulongel myand ya nook, bikaam twangat mahangadik ma meej. I biny bidy mwa kwiitwambulwiish bwa kwangat diihangadik dilengel? Tukontononaay diiy ditam dya buseeb ditusaasangan mu mukand a Biin Leevy 19:19, dileeleeb neey: “Kanwiish mwa kuvwaal bizang biluk ni mand mabidy.” Mukenj oow waakady mwambulwiish biin Izaleel bwa biikal bashilangan ni bis bya baat baakady bibanyungulukil. Bu mutukiish katuy muush mwa may ma Mawej maheeley Moyiz, kabiin bibiih bwa biin Krist kuvwaal bizang bya polyester ni bya len eecy bilong ni ndand. Ki katwiin bakat kwiikal bu baat bady ni malongweesh ni bilel bidy kabiy bihetangan ni malongweesh ma mu Bibl, ning baat aab biikal: balony neet, biin mudimw neet, eecy baan-beet ba mu cisak. Cya biin, tudy bakat baan-beet ba mu cisak, ni tuleeleej mutudy bakat baat bakwaabw. Mahangadik matwangangat mu shikacil, ki mady mwa kuleej ning tukookooyel Yehow hatuloolong myand yileeleej neey: tudy bashilangan ni baat bady biitunyungulukil. Vuluk neey: kwiikal ku butamb bwa Mawej kuloolong bwa twiikal bajilang. Bwaal oobw i bwa buseeb tut biikashishomw bwa kwiikal baat bajilang.​—2 Kor. 6:14-16; 1 Py. 4:3, 4.

17-18. I dilongweesh kaay dya buseeb dituheehetel mu mukand a Biin Leevy 19:23-25?

¹⁷ Cyambil eecy “Nady Yehow, Mawej iinun” cyaakady mwa kwambulwiish biin Izaleel bwa kutekobw bulund bwaabab ni Yehow ha cyaab cya kuuhal. Mushind kaay? Mukand a Biin Leevy 19:23-25 uleeleej cyaakadyobw mwa kulong. (Bal.) Kontononaay cidy may aam mwa kumvwiij bwa biin Izaleel haakadyobw mwa kutweel musang umw mu Bulab Bulay. Hiikal muut mukun mitond ya mamum ma kudy, kaakadyoh bend mwa kudy mamum ma mitond eey mu mivw yisat. Ha muvw mwiinaay, bakady mwa kukal mudimw ni mamum aam ha cyaab cijilang cya Mawej. Mwiin  mutond waakady mwa kudy mamum ma mutond indiy teng mu muvw mwiitaan. Mukenj oow waakady wambulwiish biin Izaleel bwa kumanyikobw neey: kabaakady mwa kuteek myand yaakadyobw bakaam ha cyaab cya kuuhal. Baakady bateekel Yehow micim bwaal waakady wiibakumbajil byaakadyobw Bakaam ni baakady bateek kuhambidil kwindiy ha cyaab cya kuuhal. Waakady mwiibajaadikil neey: biiyiiy kwiikal teng ni byaakudy bikumban. Ni Mawej waakady mwiibakashish bwa biikal batwaal bya bukish byaabab ku nzubw indiy, cyaab cyaakadyobw bamuhambidil.

¹⁸ Mukenj udyobw bafund mu mukand a Biin Leevy 19:23-25 wiituvuvulwiij may ma Yeez maleebeley mu Mwiisamb indiy a ku Mulund. Uleebel neey: “Kanutat bend ni micim bwa byaakudy biinun kudy.” Yeez utuutungunuk ni uleeb neey: “Ki Taat iinun udy mu diiwul, i mumanyikok ney, nwiibikaakaam.” Mawej wiiyiiy kwiitwambulwiish teng bu muloolongeley toony. (Mat. 6:25, 26, 32) Tuteetekel Yehow micim bwaal wiitwambambulwiish ni Bitukaakaam. Ni hawaakakish balam-lam “biit bya bukish” kukaam bend neey: baat bakwaabw bamanyik. Tudy mwa kutwaalok bya bukish eecy fwalang bidy mwa kwambulwiish cisumbw bwa kukumbajok myand kahand. Yehow utaatal mututwaat kuhambidil kwindiy nyam ku mikon, ni wiiyiiy kwiitufut. (Mat. 6:2-4) Tut balong nook tuleeleej mutudy bumvw malongweesh matudy bahetel mu mukand a Biin Leevy 19:23-25.

19. Myand yitudy bakontonon mu mukand a Biin Leevy i yikwambulwiish mushind kaay?

¹⁹ Tudy bakontonon teng myand yikeeh ya mu mukand a Biin Leevy shapitil 19, yileeleej mishind yidy mwa kwiitwambulwiish bwa kwiidikij Mawej iitut mujilang. Hatumwiimwiidikij, twiikaakashishomw bwa ‘kwiikal baat bajilang mu kushikat kwiitut koos.’ (1 Py. 1:15) Baat bavul bady kabay bakadil Yehow mudimw i batal bilong biinun bilengel. Biin-biin, bilong biinun bilengel i bisak bamw baat bwa kwaakishobw Yehow lutumb. (1 Py. 2:12) Ki kudy myand yivul yitudy mwa kulongel mu mukand a Biin Leevy shapitil 19. Mu ciin bwaal cikwaabw ciloolond twiiyiiy kwiisambil a verseh yikwaabw ya mu shapitil oomw yiikal mwa kwiitwambulwiish bwa kujingunun mishind yikwaabw yiituloolomb bwiitut ‘kwiikal baat bajilang mu kushikat kwiitut,’ teng bu muleebel Pyeel.