1. Tcuh yaˇ Peˍtruˆ aˬ htoꞈ ma beˆ maˍ laˇ ve le? Leh yawˇ beˆ maˍ laˇ ve htaꞈ aˬ htoꞈ ma te ngaˬ hui te maˇ gʼa tehꞈ dawˇ ve le?

 Mvuhˇ naw ma hkʼoˆ leh miˬ guiˬ hkʼoˆ lo dawˇ law kuiˬ cawˬ ve chaw htawˇ maˇ kʼoˆ, Peˍtruˆ leuˆ yuˬ taˍ ve Hkriꞈ yaˇ htaꞈ beˆ maˍ piˇ ve ngaˬ hui kaꞈ awˬ bon gʼa ve yoˬ. Oˇ kaˬ lo kʼoˆ ve, “nawˬ hui htaꞈ kuˬ yuˬ ve teˇ gʼaˇ daꞈ kehˬ ve hkʼe, nawˬ hui hkʼa te ve awˬ liˇ awˬ hkʼaˇ hkʼa peu˗eˬ awˬ hkʼaw lo daꞈ kehˬ piˇ˗oˆ. Ngaˬ daꞈ kehˬ ve pa taw, nawˬ hui htawˇ daꞈ kehˬ piˇ˗oˆ tehꞈ, Liꞈ hpu hkʼaw bvuhꞈ taˍ ve yoˬ.” (1 Peˍtruˆ 1:15, 16) Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ leh ngaˬ hui lehˬ maˇ biˇ ve chaw yaˇ hpehꞈ ve yoˬ. Hkʼe te leh, ngaˬ hui yawˇ htaꞈ henˇ yuˬ tuˬ hpehꞈ kʼai maˇ gʼa tehꞈ dawˇ ve yoˬ. Yaꞈ hkʼaˇ, Peˍtruˆ ve tawˇ hkawˇ ngaˬ hui Gʼuiˬ sha htaꞈ henˇ yuˬ gʼa ve tehꞈ shiˍ tuˬ te laˇ leh, chi ngaˬ hui gʼa te cawˇ ve awˬ ceuˬ hpehꞈ ve yoˬ. Peˍtruˆ kaꞈ laiˉ pawˆ te yaꞈ jaw ve yoˬ. Yaꞈ hkʼaˇ, yawˇ ve awˬ lawn “daꞈ kehˬ ve” chaw hpehꞈ tuˬ te gʼa ve tehꞈ, ngaˬ hui mawˬ tuˬ te laˇ ve yoˬ.

2. Awˬ lawn chi ve hkʼaw ngaˬ hui aˬ htoꞈ ma na hkawˇ htaꞈ henˇ tuˬ le?

² Awˬ lawn chi ve hkʼaw daꞈ kehˬ ve aˬ htoꞈ ma htaꞈ kʼoˆ gaˇ ve le? Yaˬhoˉvaˬ ve daꞈ kehˬ ve awˬ lawn Liꞈ hpu hkʼaw ngaˬ hui htaꞈ hkʼaˬ hkʼe maˍ laˇ ve le? Daꞈ kehˬ ve chaw hpehꞈ tuˬ ngaˬ hui hkʼaˬ hkʼe gʼa te cawˇ ve le? Ngaˬ hui daꞈ kehˬ ve chaw hpehꞈ ve lehˬ Yaˬhoˉvaˬ geh meuˆ daꞈ ve htaꞈ awˬ bon hkʼaˬ hkʼe cawˬ ve le? Chi teˇ hpaˍ htaꞈ caˉ daꞈ ve teˇ geh henˇ tuˬ yoˬ.

3. Daꞈ kehˬ ve htaꞈ kʼoˆ htaˇ, laiˉ kaˬ lo ve chaw aˬ htoꞈ ma htaꞈ dawˇ mawˬ ve le? Awˬ lawn chi shiˍ gʼa tuˬ ngaˬ hui hkʼaˬ kaˬ lo ca gʼa ve le?

³ Daꞈ kehˬ ve htaꞈ kʼoˆ htaˇ, bon htaꞈ yonˍ hehnˇ jaˇ ve, nyi ma gawˬ lehˍ cawˬ tuˬ taꞈ iˉ chehˇ taˍ ve, bon liˇ ve veuꞈ kʼaˇ hkʼaˬ htaˆ kaꞈ veuꞈ ve, laiˉ kaˬ lo ve chaw chi hkʼe dawˇ mawˬ ve yoˬ. Yaꞈ hkʼaˇ, awˬ tehˬ kʼo daꞈ kehˬ ve kʼoˆ ve lehˬ, chi hkʼe ve htaꞈ kʼoˆ gaˇ ve maˇ heˆ. Awˬ  lawn kʼo, Liꞈ hpu hkʼaw kʼoˆ ve, Yaˬhoˉvaˬ lehˬ daꞈ kehˬ jaˇ leh “ha lehˬ ve Gʼuiˬ sha” hpehꞈ ve yoˬ. (1 Tiˆmoˉseˍ 1:11, Miˬ guiˬ awˬ suhˉ yuˬ tawˆ ve Liꞈ hpu) Yawˇ htaꞈ oˉ kʼoˍ pui ve chaw kaꞈ “ha lehˬ ve yoˬ.” (Chiˇ mvuh ve 144:15) Bon awˬ hoˉ aˉ poꞈ zuhꞈ ve htaꞈ deh leh shu mehˆ gʼuˇ suhˍ daꞈ ve hkʼe te ve htaꞈ Yeˍsuˆ deˇ piˇ ve yoˬ. (Maꞈhtehˍ 6:1; Maˍkuˆ 12:38) Awˬ tehˬ ve Hkriꞈ yaˇ lehˬ Liꞈ hpu htaꞈ henˇ ve pa taw, daꞈ kehˬ ve aˬ htoꞈ ma htaꞈ kʼoˆ gaˇ ve tehꞈ hkʼa dehꞈ shiˍ gʼa ve yoˬ. Daꞈ kehˬ jaˇ ve Gʼuiˬ sha ngaˬ hui htaꞈ haꞈ ve lehˬ, ngaˬ hui te maˇ gʼa ve awˬ leuˉ maˇ te tcuh laˇ ve tehꞈ yonˍ gʼa ve yoˬ. Yaˬhoˉvaˬ kʼoˆ ve, “nawˬ hui htawˇ daꞈ kehˬ piˇ˗oˆ.” Chi kʼoˆ gaˇ ve lehˬ, ngaˬ hui daꞈ kehˬ ve chaw hpehꞈ gʼa ve yoˬ. Ngaˬ hui daꞈ kehˬ ve chaw maˇ hpehꞈ sheˍ htaˇ, daꞈ kehˬ ve aˬ htoꞈ ma htaꞈ kʼoˆ gaˇ ve gʼa na gʼa cawˇ ve yoˬ.

4. “Daꞈ kehˬ ve” kʼoˆ ve lehˬ aˬ htoꞈ ma htaꞈ kʼoˆ gaˇ ve le?

⁴ Daꞈ kehˬ ve aˬ htoꞈ ma htaꞈ kʼoˆ gaˇ ve le? Liꞈ hpu hkʼaw kʼoˆ ve, “daꞈ kehˬ ve” lehˬ awˬ liˇ awˬ hkʼaˇ daꞈ ve htaꞈ kʼoˆ gaˇ ve yoˬ. Tawˇ hkawˇ chi ve lehˬ, Gʼuiˬ sha awˬ pon gʼa fuiˍ teh taˍ ve htaꞈ kaꞈ kʼoˆ gaˇ ve yoˬ. Chi htaꞈ pa taw, ngaˬ hui awˬ liˇ awˬ hkʼaˇ daꞈ ve htaꞈ te htaˇ, daꞈ kehˬ ve chaw hpehꞈ gʼa tuˬ yoˬ. Yaˬhoˉvaˬ haꞈ yuˬ laˇ ve hkʼe oˉ kʼoˍ pui leh yawˇ geh mehˆ daꞈ ve yoˬ. Liꞈ hpu hkʼaw kʼoˆ ve, ngaˬ hui Yaˬhoˉvaˬ geh meuˆ daꞈ gʼa ve lehˬ ha lehˬ jaˇ ve yoˬ. Awˬ lawn kʼo, Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ leh ngaˬ hui yawˇ geh meuˆ daꞈ tcuh gaˇ ve yoˬ.

5. Mvuhˇ naw ma tcuh yaˇ ka tiꞈ yeˬ ve awˬ lawn Yaˬhoˉvaˬ htaꞈ caˉ daꞈ ve ngaˬ hui shiˍ gʼa tuˬ hkʼaˬ hkʼe maˍ laˇ ve le?

⁵ Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ leh teˇ hpawˇ le le kaꞈ daꞈ kehˬ jaˇ. Gʼuiˬ sha awˬ paˇ lo chehˇ ve ka tiꞈ yeˬ ve mvuhˇ naw ma tcuh yaˇ ve awˬ lawn htaꞈ ngaˬ hui shiˍ gʼa ve yoˬ. Yawˇ hui kʼoˆ ve, “daꞈ kehˬ jaˇ. Daꞈ kehˬ jaˇ. Daꞈ kehˬ jaˇ. Kanˇ paˆ uiˍ ve Jawˇmawˇ Gʼuiˬ sha lehˬ daˬ kehˬ jaˇ.” (Iˉsaˍyaˆ 6:3) Mvuhˇ naw ma tcuh yaˇ chi ve teˇ hpaˍ Yaˬhoˉvaˬ geh meuˆ daꞈ gʼa tuˬ, yawˇ hui kaꞈ gʼa daꞈ kehˬ ve yoˬ. Leh mvuhˇ naw ma tcuh yaˇ chi ve teˇ hpaˍ lehˬ daꞈ kehˬ jaˇ. Hkʼe te leh, mvuhˇ naw ma tcuh yaˇ chi teˇ hpaˍ miˬ guiˬ hkʼoˆ lo Gʼuiˬ sha ve awˬ lawn ca hto la ve yoˬ. Yawˇ hui laˬ kuiˬ awˬ ti leh daꞈ kehˬ jaˇ. Moˉseˍ ve awˬ co˗e htaˇ suhˆ buiˇ hkʼaw aˬ miˍ toꞈ chehˇ ve awˬ lawn htaꞈ ngaˬ hui shiˍ gʼa ve yoˬ.—Tawˆ kʼai ve 3:2-5; Yawˇsuˆ 5:15.

6-7. (a) Tawˆ kʼai ve liꞈ 15:1, 11 hkʼaw kʼoˆ taˍ ve hkʼe, Moˉseˍ Gʼuiˬ sha ve daꞈ kehˬ ve htaꞈ hkʼaˬ hkʼe kʼoˆ taˍ ve le? (b) Yaˬhoˉvaˬ lehˬ daꞈ kehˬ ve Gʼuiˬ sha hpehꞈ ve tehꞈ Iˉsaˍreˍlaˆ chaw teˇ gʼaˇ le le hkʼaˬ htaˆ kaꞈ tawnˇ taˍ tuˬ aˬ htoꞈ ma ga piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁶ Moˉseˍ Iˉsaˍreˍlaˆ chaw htaꞈ shiˍ leh laˇ tsuhˇ gʼuiˬ nyi lo hpanˍ tawˆ la peuˬ hkʼawꞈ nawˉ, Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ ve tehꞈ yawˇ teˇ pawˆ kʼawꞈ kʼoˆ ve yoˬ. (Tawˆ kʼai ve 15:1, 11 gʼaw sheˍ.) Chi lehˬ Eˇjiˇtuꞈ mvuhˇ miˬ hkʼaw maˇ heˆ heˆ ve gʼuiˬ sha htaꞈ oˉ kʼoˍ pui ve chaw htaꞈ peun daꞈ jaˇ. Leh Hkaˍnanˍ mvuhˇ miˬ hkʼaw maˇ heˆ heˆ ve gʼuiˬ sha htaꞈ oˉ kʼoˍ pui ve chaw htaꞈ kaꞈ peun daꞈ jaˇ. Yawˇ hui a shu yawˇ ve yaˇ htaꞈ tuˉ tanˇ leh chaꞈ chiˆ jaˇ ve pehꞈ ve tzuhˆ ve kaꞈ te ve yoˬ. (Oˉ kʼoˍ pui ve 18:3, 4, 21-24; Bon maˍ ve 18:9, 10) Yaꞈ hkʼaˇ, Yaˬhoˉvaˬ htaꞈ oˉ kʼoˍ pui ve chaw chi hkʼe te tehꞈ yawˇ maˇ gʼa kʼoˆ piˇ jaw. Yaˬhoˉvaˬ lehˬ daꞈ kehˬ jaˇ ve yoˬ. Iˉsaˍreˍlaˆ chaw awˬ lawn chi htaꞈ tawnˇ gʼa tuˬ, paw hkuˇ lonˉ ve naˍ kʼaˍ pui hkʼoˆ lo shi muꞈ hkʼu ehˉ hkʼaw liꞈ bvuhꞈ keu taˍ ve yoˬ. Liꞈ oˇ ve lehˬ “Yaˬhoˉvaˬ lehˬ daꞈ kehˬ jaˇ” tehꞈ kʼoˆ ve yoˬ.—Tawˆ kʼai ve 28:36-38.

⁷ Paw hkuˇ lonˉ ve naˍ kʼaˍ pui hkʼoˆ lo shi muꞈ hkʼu ehˉ htaꞈ a shu teˇ gʼaˇ gʼa mawˬ ve htawˇ, Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ ve tehꞈ yawˇ laꞈ haˆ shiˍ ve yoˬ. Yaꞈ hkʼaˇ, liꞈ oˇ ve htaꞈ maˇ gʼa mawˬ jaw ve chaw lehˬ, yawˇ paw hkuˇ lonˉ awˬ paˇ lo maˇ kʼai jaw ve pa taw yoˬ. Yaˬhoˉvaˬ lehˬ daꞈ kehˬ jaˇ ve Gʼuiˬ sha hpehꞈ ve tehꞈ yawˇ maˇ shiˍ˗o ve laˇ? Chi hkʼe maˇ heˆ. Iˉsaˍreˍlaˆ chaw hawˉ hkʼaˆ, yaˇ miˇ, leh yaˇ ehˉ teˇ gʼaˇ le le htaꞈ Gʼuiˬ sha ve awˬ liˇ tawˇ hkawˇ gʼaw maˍ piˇ htaˇ, yawˇ hui gʼa kaˇ ve yoˬ. (Bon maˍ ve 31:9-12) Leh nawˬ kaꞈ oˇ kaˬ lo chehˇ ve kʼo, “ngaˬ lehˬ nawˬ ve Gʼuiˬ sha hpehꞈ ve yoˬ. Ngaˬ daꞈ kehˬ ve hkʼe, nawˬ hui htawˇ a shu yawˇ  awˬ to htaꞈ daꞈ kehˬ piˇ˗oˆ.” “Ngaˬ daꞈ kehˬ ve hkʼe, nawˬ hui htawˇ daꞈ kehˬ la piˇ˗oˆ” tehꞈ kʼoˆ ve htaꞈ gʼa kaˇ ve yoˬ.—Oˉ kʼoˍ pui ve 11:44, 45; 20:7, 26.

8. Oˉ kʼoˍ pui ve liꞈ 19:2 leh 1 Peˍtruˆ liꞈ 1:14-16 hkʼaw aˬ htoꞈ ma te ngaˬ hui a yeˇ yuˬ cawˇ ve le?

⁸ Oˉ kʼoˍ pui ve liꞈ 19:2 hkʼaw awˬ lawn teˇ lawn htaꞈ teˇ geh nyi sheˍ. Chi lehˬ Moˉseˍ Iˉsaˍreˍlaˆ chaw teˇ gʼaˇ le le htaꞈ gʼaw maˍ piˇ ve yoˬ. “Iˉsaˍreˍlaˆ chaw hui htaꞈ chi hkʼe kʼoˆ piˇ ve yoˬ. Ngaˬ daꞈ kehˬ ve hkʼe nawˬ hui htawˇ daꞈ kehˬ˗oˆ” tehꞈ Yaˬhoˉvaˬ Moˉseˍ htaꞈ kʼoˆ piˇ ve yoˬ. Yeˍsuˆ kaꞈ Hkriꞈ yaˇ htaꞈ shaˍ tiꞈ piˇ htaˇ, daꞈ kehˬ piˇ˗oˆ tehꞈ kʼoˆ ve yoˬ. (1 Peˍtruˆ 1:14-16 gʼaw sheˍ.) Chi beuꞈ teˇ co˗e ngaˬ hui Moˉseˍ ve awˬ liˇ tawˇ hkawˇ awˬ hawˉ lo maˇ kʼawꞈ chehˇ˗o. Yaꞈ hkʼaˇ, Peˍtruˆ Oˉ kʼoˍ pui ve liꞈ 19:2 hkʼaw kʼoˆ sheˍ ve, Yaˬhoˉvaˬ daꞈ kehˬ jaˇ leh yawˇ htaꞈ haꞈ ve chaw htawˇ daꞈ kehˬ ve chaw gʼa hpehꞈ ve yoˬ. Mvuhˇ naw ma hkʼoˆ leh miˬ guiˬ hkʼoˆ dawˇ law kuiˬ cawˬ ve chaw htawˇ, ngaˬ hui daꞈ kehˬ ve chaw gʼa hpehꞈ ve yoˬ.—1 Peˍtruˆ 1:4; 2 Peˍtruˆ 3:13.

9. Oˉ kʼoˍ pui ve liꞈ kaˇ nanˉ uiˍ 19 ngaˬ hui awˬ pon awˬ bon hkʼaˬ hkʼe cawˬ ve le?

⁹ Yaˬhoˉvaˬ Gʼuiˬ sha daꞈ kehˬ jaˇ ve htaꞈ ngaˬ hui ha lehˬ tuˬ te piˇ gaˇ ve yoˬ. Hkʼe te leh, ngaˬ hui daꞈ kehˬ ve chaw hkʼaˬ hkʼe te hpehꞈ gʼa tuˬ shiˍ gaˇ ve yoˬ. Yaˬhoˉvaˬ Oˉ kʼoˍ pui ve liꞈ kaˇ nanˉ uiˍ 19 hkʼaw teˇ ceuˬ ceuˬ beˆ maˍ laˇ taˍ ve yoˬ. Ma˗hka Ka˗li Heˍbrehˇ ve tawˇ hkawˇ hpawˇ chaˬ nyi paˍ kʼoˆ ve, “Oˉ kʼoˍ pui ve liꞈ kaˇ nanˉ uiˍ 19 a yeˇ uiˍ jaˇ ve teˇ puꞈ hpehꞈ leh Liꞈ hpu awˉ lawˉ 5 puꞈ ve hkʼaw Oˉ kʼoˍ pui ve liꞈ lehˬ a yeˇ uiˍ jaˇ ve teˇ puꞈ hpehꞈ ve yoˬ.” Oˉ kʼoˍ pui ve liꞈ kaˇ nanˉ uiˍ 19 awˉ lawˉ tanˬ htaˇ ve htaꞈ ngaˬ hui tawnˇ taˍ cawˇ ve yoˬ. Oˇ kaˬ lo kʼoˆ ve, “nawˬ hui htawˇ daꞈ kehˬ piˇ˗oˆ.” A shaꞈ teꞈ kuiˬ hkʼaw daꞈ kehˬ ve chaw hpehꞈ tuˬ, Oˉ kʼoˍ pui ve liꞈ chi ngaˬ hui htaꞈ hkʼaˬ hkʼe ga laˇ ve le, teˇ geh nyi sheˍ.

10-11. Oˉ kʼoˍ pui ve liꞈ 19:3 hkʼaw ngaˬ hui aˬ htoꞈ ma te tuˬ kʼoˆ laˇ ve le? Leh chi a yeˇ uiˍ jaˇ tehꞈ ngaˬ hui hkʼaˬ hkʼe te shiˍ gʼa ve le?

¹⁰ Yaˬhoˉvaˬ Iˉsaˍreˍlaˆ chaw htaꞈ nawˬ hui daꞈ kehˬ piˇ˗oˆ tehꞈ kʼoˆ piˇ ve yoˬ. Peuˬ leh yawˇ kʼawꞈ kʼoˆ ve, ‘nawˬ hui lehˬ, a shu yawˇ ve awˬ pa awˬ e htaꞈ gʼa yawˆ yan leh ngaˬ lehˬ nawˬ hui ve Gʼuiˬ sha hpehꞈ ve yoˬ.’—Oˉ kʼoˍ pui ve 19:2, 3.

¹¹ Gʼuiˬ sha ve tawˇ hkawˇ awˬ pa awˬ e htaꞈ yawˆ yan kʼoˆ ve htaꞈ ngaˬ hui gʼaꞈ te ve lehˬ a yeˇ uiˍ jaˇ tehꞈ shiˍ ve yoˬ. Hawˉ hkʼaˆ teˇ gʼaˇ Yeˍsuˆ htaꞈ ca na la ve awˬ lawn htaꞈ ngaˬ hui dawˇ nyi sheˍ. Oˇ kaˬ lo kʼoˆ ve, “co tiꞈ ha tiꞈ gʼa tuˬ, ngaˬ daꞈ ve kanˉ hkʼaˬ  ve teˇ maˬ htaꞈ gʼa te tuˬ le?” Yeˍsuˆ yawˇ htaꞈ laiˉ lawn kʼoˆ maˍ piˇ ve yoˬ. Yaꞈ hkʼaˇ, teˇ lawn lehˬ yawˇ awˬ pa awˬ e hkawˇ gʼa na yuˬ ve tehꞈ Yeˍsuˆ kʼoˆ piˇ ve yoˬ. (Maꞈhtehˍ 19:16-19) Chi hkʼoˆ kaꞈ, Hpaˍriˍsehˇ leh bon awˬ hoˉ teˇ hpaˍ awˬ pa awˬ e htaꞈ maˇ yawˆ yan tuˬ awˬ hkʼaˇ ca ve htaꞈ Yeˍsuˆ deˇ piˇ ve yoˬ. Yeˍsuˆ kʼoˆ ve, “Gʼuiˬ sha piˇ taˍ ve tawˇ hkawˇ htaꞈ nawˬ hui te pehˆ ve yoˬ.” (Maꞈhtehˍ 15:3-6) “Gʼuiˬ sha piˇ taˍ ve tawˇ hkawˇ” chi ve awˬ liˇ tawˇ hkawˇ 10 hkawˇ hkʼaw 5 hkawˇ teˇ hkawˇ hpehꞈ leh Oˉ kʼoˍ pui ve liꞈ 19:3 hkʼaw kaꞈ kʼoˆ taˍ ve yoˬ. (Tawˆ kʼai ve 20:12) Oˉ kʼoˍ pui ve liꞈ 19:3 hkʼaw awˬ pa awˬ e htaꞈ yawˆ yan˗o tehꞈ kʼoˆ ve lehˬ, Yaˬhoˉvaˬ ve tawˇ hkawˇ hpehꞈ ve yoˬ. Oˇ kaˬ lo kʼoˆ ve, “ngaˬ daꞈ kehˬ ve hkʼe nawˬ hui htawˇ daꞈ kehˬ piˇ˗oˆ.”

12. Oˉ kʼoˍ pui ve liꞈ 19:3 hkʼaw kʼoˆ ve tawˇ hkawˇ htaꞈ ngaˬ hui hkʼaˬ hkʼe te gʼaꞈ te gʼa tuˬ le?

¹² Awˬ pa awˬ e htaꞈ yawˆ yan˗o tehꞈ Yaˬhoˉvaˬ ve tawˇ hkawˇ htaꞈ ngaˬ hui dawˇ nyi cawˇ ve yoˬ. Leh ngaˬ hui a shu yawˇ awˬ to htaꞈ na nyi cawˇ ve, ‘ngaˬ hui awˬ tehˬ awˬ na awˬ pa awˬ e htaꞈ yawˆ yan chehˇ˗aw laˇ?’ Ponˬ laˬ htaˇ nawˬ awˬ pa awˬ e htaꞈ hkʼa dehꞈ maˇ yawˆ yan sheˍ tehꞈ dawˇ ve kʼo, chi teˇ hkui htaˇ tanˬ leh nawˬ te gʼa ve hkʼe te sheˍ. Nawˬ awˬ pa awˬ e geh awˬ yanˇ mawˬ chaweh chehˇ leh laiˉ ceuˬ teˇ geh te sheˍ. Tawˇ pa haˉ te kʼo, yawˇ hui yehˇ cawˇ ve awˬ ceuˬ vuiˬ tuˬ hpu piˇ ve maˇ heˆ leh yonˍ hkʼaˇ hpawˇ kaꞈ ga piˇ sheˍ. Chi hkʼoˆ kaꞈ, nawˬ yawˇ hui htaꞈ awˬ gʼaˇ piˇ gʼa leh te hkʼaˇ dawˇ hkʼaˇ htaꞈ kaꞈ nyi haꞈ shaˉ piˇ gʼa ve yoˬ. Nawˬ chi hkʼe te ve kʼo, Oˉ kʼoˍ pui ve liꞈ 19:3 hkʼaw gʼaꞈ te chehˇ ve yoˬ.

13. (a) Oˉ kʼoˍ pui ve liꞈ 19:3 hkʼaw aˬ htoꞈ ma kʼoˆ laˇ taˍ sheˍ ve le? (b) Leh Luˉkaꞈ liꞈ 4:16-18 hkʼaw Yeˍsuˆ ve awˬ lawn htaꞈ ngaˬ hui hkʼaˬ hkʼe te henˇ yuˬ gʼa tuˬ le?

¹³ Ngaˬ hui daꞈ kehˬ ve chaw hpehꞈ tuˬ, Oˉ kʼoˍ pui ve liꞈ 19:3 hkʼaw maˍ laˇ ve awˬ nu ve awˬ ceuˬ htaꞈ kaꞈ ngaˬ hui gʼaꞈ te cawˇ ve yoˬ. Chi ve teˇ tawn hkʼaw shinˉ nyi ve awˬ lawn kaꞈ kʼoˆ taˍ ve yoˬ. Hkriꞈ yaˇ Moˉseˍ ve awˬ liˇ tawˇ hkawˇ awˬ hawˉ lo maˇ chehˇ˗o ve pa taw, ngaˬ hui shinˉ nyi ve awˬ liˇ tawˇ hkawˇ htaꞈ gʼaꞈ te tuˬ maˇ loˍ. Yaꞈ hkʼaˇ, Iˉsaˍreˍlaˆ chaw shinˉ nyi ve awˬ liˇ tawˇ hkawˇ htaꞈ gʼaꞈ te leh yawˇ hui awˬ bon gʼa ve htaꞈ ngaˬ hui laiˉ ceuˬ henˇ yuˬ gʼa ve yoˬ. Shinˉ nyi htaˇ Iˉsaˍreˍlaˆ chaw kanˉ maˇ te leh Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ. * Yeˍsuˆ miˬ guiˬ hkʼoˆ lo chehˇ htaˇ, shinˉ nyi htaˇ yawˇ kaꞈ kanˉ maˇ te. Yawˇ Yuˇdaꞈ chaw ve hpawnˬ daꞈ kuiˬ hkʼaw kʼai leh Liꞈ hpu gʼaw ve yoˬ. (Tawˆ kʼai ve 31:12-15; Luˉkaꞈ 4:16-18 gʼaw sheˍ.) Chi htaꞈ pa taw, Oˉ kʼoˍ pui ve liꞈ 19:3 hkʼaw beˆ maˍ laˇ taˍ ve htaꞈ ngaˬ hui gʼaꞈ te tuˬ, “shinˉ nyi htaˇ daꞈ tuˬ kehˬ tuˬ gʼa te ve yoˬ.” Ngaˬ hui Yaˬhoˉvaˬ htaꞈ oˉ kʼoˍ pui tuˬ teˇ nyi leh teˇ nyi awˬ yanˇ hkʼa dehꞈ gʼa shawˍ teh taˍ ve yoˬ. Nawˬ dawˇ kʼo, awˬ lawn chi gʼa gu cawˇ˗aw laˇ? Nawˬ hkʼaˬ htaˆ kaꞈ Yaˬhoˉvaˬ htaꞈ oˉ kʼoˍ pui tuˬ awˬ yanˇ shawˍ teh ve kʼo, nawˬ Yaˬhoˉvaˬ geh meuˆ daꞈ leh daꞈ kehˬ ve chaw hpehꞈ tuˬ chi a yeˇ uiˍ jaˇ tehꞈ shawˍ ve yoˬ.

14. Oˉ kʼoˍ pui ve liꞈ kaˇ nanˉ uiˍ 19 hkʼaw awˬ tehˬ ve a yeˇ uiˍ ve laiˉ pawˆ aˬ htoꞈ ma htaꞈ kʼoˆ ve le?

¹⁴ Oˉ kʼoˍ pui ve liꞈ kaˇ nanˉ uiˍ 19 hkʼaw ngaˬ hui hkʼaˬ htaˆ kaꞈ daꞈ kehˬ ve chaw hpehꞈ tuˬ, a yeˇ uiˍ ve teˇ lawn htaꞈ laiˉ pawˆ kʼoˆ taˍ ve yoˬ. Oˉ kʼoˍ pui ve liꞈ 19:4 hkʼaw awˬ leh meuˇ teˇ tawn kʼoˆ ve, “ngaˬ lehˬ nawˬ hui ve Gʼuiˬ sha hpehꞈ ve yoˬ.” Oˉ kʼoˍ pui ve liꞈ kaˇ nanˉ uiˍ 19 hkʼaw chi ve htaꞈ shuˍ ve 16 pawˆ cawˬ ve yoˬ. Awˬ liˇ tawˇ hkawˇ 10 hkawˇ hkʼaw awˉ lawˉ teˇ hkawˇ htaꞈ ngaˬ hui dawˇ nawˇ tuˬ te laˇ ve yoˬ. Oˇ kaˬ lo kʼoˆ ve, ‘ngaˬ lehˬ, nawˬ hui ve Gʼuiˬ sha hpehꞈ ve yoˬ. Ngaˬ awˬ hkʼoˆ awˬ kaˍ awˬ nu gʼuiˬ sha htaꞈ nawˬ hui oˉ kʼoˍ maˇ gʼa pui.’ (Tawˆ kʼai ve 20:2, 3) Ngaˬ hui Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, daꞈ kehˬ ve chaw hpehꞈ gaˇ ve kʼo, awˬ nu ve awˬ ceuˬ aꞈ kehˉ Yaˬhoˉvaˬ geh meuˆ daꞈ ve a yeˇ uiˍ jaˇ. Yaˬhoˉvaˬ ve awˬ meh htaꞈ nyi cha leh yawˇ ve daꞈ kehˬ ve awˬ meh luˬ tuˬ ngaˬ hui maˇ te gaˇ.—Oˉ kʼoˍ pui ve 19:12; Iˉsaˍyaˆ 57:15.

15. Oˉ kʼoˍ pui ve liꞈ kaˇ nanˉ uiˍ 19 hkʼaw tuˉ tanˇ tuˬ htaꞈ caˉ daꞈ ve ngaˬ hui te gaˇ tuˬ aˬ htoꞈ ma te laˇ ve le?

 ¹⁵ Iˉsaˍreˍlaˆ chaw Yaˬhoˉvaˬ ve awˬ liˇ tawˇ hkawˇ htaꞈ na yuˬ ve lehˬ, Yaˬhoˉvaˬ yawˇ hui ve Gʼuiˬ sha hpehꞈ ve tehꞈ hpeuꞈ maw laˇ ve yoˬ. Oˉ kʼoˍ pui ve liꞈ 18:4 hkʼaw kʼoˆ ve, “ngaˬ ve awˬ liˇ tawˇ hkawˇ teˇ hpaˍ htaꞈ na yuˬ leh, ngaˬ kʼoˆ ve hkʼe te˗o. Ngaˬ lehˬ nawˬ hui ve Gʼuiˬ sha hpehꞈ ve yoˬ.” Oˉ kʼoˍ pui ve liꞈ kaˇ nanˉ uiˍ 19 hkʼaw Iˉsaˍreˍlaˆ chaw awˬ pon awˬ liˇ tawˇ hkawˇ teˇ ceuˬ ceuˬ cawˬ ve yoˬ. Kaˇ nanˉ ehˉ 5-8, leh 22 hkʼaw to nuˇ to shaˆ tuˉ tanˇ ve htaꞈ kʼoˆ taˍ ve yoˬ. Oˇ kaˬ lo kʼoˆ ve, Iˉsaˍreˍlaˆ chaw to nuˇ to shaˆ htaꞈ tuˉ tanˇ htaˇ, ‘Yaˬhoˉvaˬ htaꞈ tanˇ la ve tanˇ tuˬ htaꞈ chaꞈ chiˆ tuˬ’ yawˇ hui maˇ gʼa te. Ngaˬ hui awˬ pon kʼo, awˬ lawn chi teˇ hpaˍ htaꞈ gʼaw ve Yaˬhoˉvaˬ nyi hkʼaˇ suh tuˬ htaꞈ te piˇ gaˇ leh Heˍbrehˇ liꞈ 3:15 hkʼaw kʼoˆ taˍ ve hkʼe, Gʼuiˬ sha haꞈ yuˬ laˇ tuˬ hkʼaˬ htaˆ kaꞈ chiˇ mvuh ve tanˇ tuˬ teˇ ceuˬ htaꞈ ngaˬ hui tanˇ piˇ gaˇ ve yoˬ.

16. Oˉ kʼoˍ pui ve liꞈ kaˇ nanˉ uiˍ 19 hkʼaw ve awˬ liˇ awˬ hkʼaˇ Gʼuiˬ sha htaꞈ oˉ kʼoˍ maˇ pui ve chaw htaꞈ ngaˬ hui peun daꞈ ve tehꞈ hkʼaˬ hkʼe maˍ laˇ ve le?

¹⁶ Daꞈ kehˬ ve chaw hpehꞈ tuˬ Yaˬhoˉvaˬ ve kanˉ maˇ te ve chaw htaꞈ ngaˬ hui gʼa peun daꞈ ve yoˬ. Chi sha ve maˇ heˆ. Awˬ lawn ko, liꞈ henˇ kuiˬ lo ve awˬ chawˇ, kanˉ teˇ geh te ve chaw, awˬ suhˍ awˬ shaˍ hpawˇ ve awˬ viˉ awˬ nyi, maˇ heˆ leh Yaˬhoˉvaˬ maˇ dawˇ cawˇ ve awˬ ceuˬ htaꞈ te tuˬ nyiˉ laˇ ve yoˬ. Chi hkʼe te laˇ htaˇ ngaˬ hui gʼa leuˆ yuˬ cawˇ ve yoˬ. Leh ngaˬ hui cawˇ ve htaꞈ leuˆ yuˬ gʼa tuˬ aˬ htoꞈ ma ga laˇ ve le? Oˉ kʼoˍ pui ve liꞈ 19:19 hkʼaw ve awˬ liˇ awˬ hkʼaˇ htaꞈ ngaˬ hui dawˇ nyi sheˍ. Oˇ kaˬ lo kʼoˆ ve, “hpa nyiˇ ceuˬ yuˬ tawˉ taˍ ve veuꞈ kʼaˇ htaꞈ maˇ gʼa veuꞈ.” Awˬ liˇ tawˇ hkawˇ chi ve Iˉsaˍreˍlaˆ chaw awˬ paˇ awˬ kui lo chehˇ ve chaw htaꞈ peun daꞈ tuˬ te piˇ ve yoˬ. Chi beuꞈ teˇ co˗e ngaˬ hui hpa laiˉ ceuˬ yuˬ tawˉ taˍ ve htaꞈ veuꞈ ve lehˬ yaꞈ ve maˇ heˆ. Yaꞈ hkʼaˇ, liꞈ henˇ kuiˬ lo ve awˬ chawˇ, kanˉ teˇ geh te ve chaw, awˬ suhˍ awˬ shaˍ hpawˇ ve awˬ viˉ awˬ nyi, yawˇ hui jehˬ laˇ ve Liꞈ hpu hkʼaw ve awˬ liˇ awˬ hkʼaˇ htaꞈ maˇ hawˍ daꞈ ve kʼo ngaˬ hui maˇ yonˍ leh maˇ te. Yaꞈ hkʼaˇ, ngaˬ hui Gʼuiˬ sha ve tawˇ hkawˇ htaꞈ na yuˬ tuˬ gʼa leuˆ yuˬ cawˇ ve kʼo, ngaˬ hui awˬ nu ve chaw htaꞈ peun daꞈ ve tehꞈ gʼa hpeuꞈ maw piˇ cawˇ ve yoˬ. Ngaˬ hui daꞈ kehˬ ve chaw hpehꞈ gaˇ ve kʼo, Gʼuiˬ sha awˬ pon gʼa fuiˍ teh taˍ ve a yeˇ uiˍ jaˇ.—2 Kawˇrenˍhtuˆ 6:14-16; 1 Peˍtruˆ 4:3, 4.

17-18. Oˉ kʼoˍ pui ve liꞈ 19:23-25 hkʼaw ngaˬ hui htaꞈ aˬ htoꞈ ma maˍ laˇ ve le?

¹⁷ Ngaˬ lehˬ nawˬ hui ve Gʼuiˬ sha hpehꞈ ve tehꞈ kʼoˆ ve tawˇ hkawˇ lehˬ Iˉsaˍreˍlaˆ chaw Yaˬhoˉvaˬ geh meuˆ daꞈ ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ tuˬ shaˍ tiꞈ piˇ ve yoˬ. Chi ve yawˇ hui hkʼaˬ hkʼe te gʼa tuˬ le? Oˉ kʼoˍ pui ve liꞈ 19:23-25 hkʼaw te gʼa ve awˬ hkʼaˇ teˇ hkʼaˇ cawˬ ve yoˬ. (Gʼaw sheˍ.) Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw loꞈ˗e htaˇ, yawˇ hui hkʼaˬ hkʼe te ve le, teˇ geh nyi sheˍ. Iˉsaˍreˍlaˆ chaw iˉ shiˍ cehˬ ti ve kʼo, Gʼuiˬ sha ve awˬ liˇ tawˇ hkawˇ hkʼaw kʼoˆ ve, awˉ lawˉ 3 hkʼawꞈ htaˇ yawˇ  hui awˬ shiˍ maˇ gʼa caˇ. 4 hkʼawꞈ teˇ hkʼawꞈ htaˇ Gʼuiˬ sha htaꞈ gʼa tanˇ piˇ ve yoˬ. Yawˇ hui Gʼuiˬ sha ve daꞈ kehˬ ve awˬ ti lo gʼa tanˇ piˇ ve yoˬ. 5 hkʼawꞈ teˇ hkʼawꞈ htaˇ, yawˇ hui awˬ shiˍ oˇ ve htaꞈ caˇ hpehꞈ ve yoˬ. Yawˇ hui awˬ pon awˉ lawˉ maˇ gʼa dawˇ nyi tuˬ, Iˉsaˍreˍlaˆ chaw htaꞈ awˬ liˇ tawˇ hkawˇ chi piˇ ve yoˬ. Yawˇ hui loˍ ve awˬ ceuˬ Yaˬhoˉvaˬ peꞈ laˇ tuˬ yoˬ tehꞈ gʼa yonˍ leh yawˇ hui a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ. Leh Yaˬhoˉvaˬ yawˇ hui htaꞈ caˇ lawꞈ dawˬ lawꞈ piˇ ve yoˬ. Yawˇ hui cawˬ ve awˬ ceuˬ Yaˬhoˉvaˬ htaꞈ ha lehˬ ha kʼa piˇ laˇ tcuh gaˇ ve yoˬ.

¹⁸ Oˉ kʼoˍ pui ve liꞈ 19:23-25 hkʼaw Gʼuiˬ sha ve awˬ liˇ tawˇ hkawˇ Yeˍsuˆ hkʼaw pui hkʼoˆ lo bon maˍ ve htaꞈ ngaˬ hui dawˇ nyi tuˬ te laˇ ve yoˬ. Yawˇ kʼoˆ ve, “hkʼaˬ hkʼe te gʼa caˇ gʼa dawˬ tuˬ, nawˬ hui a shaꞈ teꞈ ve awˬ pon taˇ dawˇ hkiˉ.” Leh Yeˍsuˆ kʼawꞈ kʼoˆ sheˍ ve, “nawˬ hui loˍ ve htaꞈ mvuhˇ naw ma hkʼoˆ chehˇ ve nawˬ hui ve Awˬ pa shiˍ taˍ ve yoˬ.” Yaˬhoˉvaˬ ngaˆ htaꞈ nyi haꞈ shaˉ piˇ ve hkʼe, ngaˬ hui htaꞈ kaꞈ nyi haꞈ shaˉ laˇ leh loˍ ve awˬ ceuˬ yawˇ peꞈ laˇ tuˬ yoˬ tehꞈ ngaˬ hui yonˍ gʼa ve yoˬ. (Maꞈhtehˍ 6:25, 26, 32) Chi hkʼoˆ kaꞈ, ngaˬ hui te ve awˬ ceuˬ htaꞈ shu maˇ mawˬ ve htawˇ, ngaˬ hui shu htaꞈ ga piˇ cawˇ leh Hkriꞈ yaˇ awˬ moˍ hkʼaw kaꞈ hpu tanˇ tanˇ piˇ cawˇ ve yoˬ. Ngaˬ hui chi hkʼe te ve htaꞈ Yaˬhoˉvaˬ mawˬ leh yawˇ ngaˬ hui htaꞈ laꞈ shawnˍ peꞈ laˇ tuˬ yoˬ. (Maꞈhtehˍ 6:2-4) Ngaˬ hui piˇ gaˇ ve chaw hpehꞈ ve kʼo, Oˉ kʼoˍ pui ve liꞈ 19:23-25 hkʼaw ve awˬ lawn htaꞈ ngaˬ hui na gʼa ve tehꞈ hpeuꞈ maw piˇ ve yoˬ.

19. Awˬ lawn chi ve hkʼaw ngaˬ hui henˇ peuˬ˗oˬ ve hkʼe, Oˉ kʼoˍ pui ve liꞈ kaˇ nanˉ uiˍ 19 hkʼaw nawˬ aˬ htoꞈ ma awˬ bon gʼa ve le?

¹⁹ Oˉ kʼoˍ pui ve liꞈ kaˇ nanˉ uiˍ 19 hkʼaw nyi ma pfuhˇ lawꞈ lawꞈ ve awˬ lawn htaꞈ ngaˬ hui gʼa henˇ peuˬ˗oˬ. Gʼuiˬ sha daꞈ kehˬ ve hkʼe, ngaˬ hui kaꞈ hkʼaˬ hkʼe te leh daꞈ kehˬ ve chaw hpehꞈ gʼa tuˬ beˆ maˍ laˇ hkawˇ chi ngaˬ hui htaꞈ ga laˇ ve yoˬ. Ngaˬ hui Yaˬhoˉvaˬ htaꞈ henˇ yuˬ ve kʼo, “hkʼa te ve awˬ liˇ awˬ hkʼaˇ hkʼa peu˗eˬ awˬ hkʼaw lo daꞈ kehˬ” ve tehꞈ hpeuꞈ maw piˇ chehˇ ve yoˬ. (1 Peˍtruˆ 1:15) Yaˬhoˉvaˬ ve kanˉ maˇ te ve chaw lehˬ, Yaˬhoˉvaˬ ve kanˉ te ve chaw daꞈ ve awˬ ceuˬ htaꞈ yawˇ hui chaˬ nyi mawˬ ve yoˬ. Leh chaw teˇ hpaˍ kʼo, Yaˬhoˉvaˬ htaꞈ chiˇ uiˍ chiˇ mvuh tuˬ te piˇ ve yoˬ. (1 Peˍtruˆ 2:12) Oˉ kʼoˍ pui ve liꞈ kaˇ nanˉ uiˍ 19 hkʼaw ngaˬ hui henˇ yuˬ gʼa ve laiˉ ceuˬ cawˬ ve yoˬ. Gʼuˇ suhˍ teˇ lawn hkʼaw Oˉ kʼoˍ pui ve liꞈ kaˇ nanˉ uiˍ 19 leh awˬ nu ve kaˇ nanˉ ehˉ teˇ hpaˍ leh Peˍtruˆ kʼoˆ ve hkʼe ngaˬ hui “daꞈ kehˬ ve” chaw hpehꞈ tuˬ beˆ maˍ laˇ ve, chi teˇ hpaˍ ngaˬ hui a shaꞈ teꞈ kuiˬ hkʼaw hkʼaˬ hkʼe te yuˬ yehˇ gʼa tuˬ teˇ geh henˇ tuˬ yoˬ.