LARTIK LETID 48
“Zot Bizin Sin”
“Zot bizin vinn sin dan zot konportman.”—1 PIER 1:15.
KANTIK 34 Mars ar Lintegrite
REZIME *
1. Ki konsey lapot Pier ti donn bann Kretien, ek kifer nou kapav panse ki sa konsey-la inposib pou met an pratik?
NINPORT ki lesperans nou ena, ki li lesperans pou viv dan lesiel ouswa lor later, nou kapav gagn bann bienfe kan nou reflesi lor konsey ki lapot Pier ti donn bann Kretien dan premie siek. Pier ti dir: “Parey kouma Bondie ki finn apel zot, li sin, zot osi zot bizin vinn sin dan zot konportman. Lekritir dir, ‘Zot bizin sin parski mo sin.’” (1 Pier 1:15, 16) Sa bann parol-la montre nou ki nou Bondie Zeova Li sin, ek ki nou kapav imit Li. Wi, nou kapav ek nou bizin vinn sin dan nou konportman. Kitfwa nou kapav panse ki sa li inposib parski nou inparfe. Anplis, lapot Pier limem ti fer boukou erer. Selman, so lexanp montre nou ki nou kapav “vinn sin.”
2. Ki kestion nou pou reponn dan sa lartik-la?
2 Dan sa lartik-la, nou pou reponn sa bann kestion-la: Ki savedir “vinn sin”? Ki kitsoz Labib ansegn nou lor Zeova, nou Bondie ki sin? Kouma nou kapav vinn sin dan nou konportman? Nou’nn aprann ki nou bizin vinn sin, me ki lien sa ena avek nou lamitie avek Zeova?
KI SAVEDIR VINN SIN?
3. Pou boukou dimounn, kouma enn kikenn ki sin ete, me kotsa nou kapav gagn bann linformasion lor-la?
3 Kan zot mazinn enn kikenn ki sin, boukou dimounn mazinn enn kikenn ki met bann linz relizie, ki paret bien serye, ek ki pa riy zame. Me se pa koumsa ki enn kikenn ki sin ete. Zeova, nou Bondie ki sin, Li osi enn ‘Bondie ki ere.’ (1 Tim. 1:11, NW) Ek bann ki ador Zeova, zot osi zot “ere.” (Ps. 144:15) Zezi ti kondann bann dimounn ki ti met bann linz spesial ek ki ti fer bann bon aksion zis pou ki dimounn trouv zot. (Mat. 6:1; Mark 12:38) Gras-a Labib, bann vre Kretien kone ki savedir vinn sin. Nou kone ki Bondie kontan nou ek ki zame Li pa pou demann nou pou fer enn kitsoz ki nou pa kapav fer. Alor, kan Zeova dir nou: “Zot bizin vinn sin,” nou sir ki nou kapav vinn sin. Me biensir, pou nou kapav vinn sin dan nou konportman, nou bizin konpran ki savedir vinn sin.
4. Ki savedir “vinn sin”?
4 Ki savedir vinn sin? Dan Labib, mo “sin” fer referans ar seki sakre ek pir lor plan moral ek relizie. Sa mo-la kapav osi fer referans ar enn kikenn ouswa enn kitsoz ki’nn rezerve zis pou servi Bondie. Alor, nou vinn enn kikenn ki sin si nou pir lor plan moral, si nou ador Bondie dan bon fason, ek si nou ena enn bon lamitie avek Li. Mem si nou inparfe ek ki Zeova Li sin, Li anvi ki nou vinn so bon kamarad. Sa extraordiner, pa vre!
ZEOVA “LI SIN, SIN, SIN”
5. Ki nou kapav aprann lor Zeova gras-a bann anz?
5 Zeova Li sin dan tou domenn. Nou konpran sa gras-a seki bann serafin, bann anz ki bien pre ar tronn Bondie, ti dir. Sertin parmi zot ti dir: “Zeova, Sef bann larme, Li sin, sin, sin.” (Iza. 6:3) Sa bann anz-la ena enn bon relasion avek Zeova, zot Bondie, parski zot osi zot sin. Se pou sa rezon-la ki, kan bann anz ti vinn lor later pou transmet mesaz Bondie, bann plas kot zot ti ete ti vinn sin. Se seki ti arive kan Moiz ti devan sa pie pikan ki pa ti pe brile la.—Ex. 3:2-5; Zozwe 5:15.
Lor enn plak an or ki ti lor tirban gran pret, ti ekrir “Zeova Li Sin” (Get paragraf 6-7)
6-7. (a) Dan Exod 15:1, 11, ki Moiz ti dir konsernan Bondie? (b) Ki kitsoz ti fer bann Izraelit rapel ki Bondie Li sin? (Get zimaz lor kouvertir.)
6 Apre ki bann Izraelit ti travers Lamer Rouz, Moiz ti fer bann Izraelit konpran ki zot Bondie Zeova, Li enn Bondie ki sin. (Lir Exod 15:1, 11. *) Li kler ki bann fos bondie ki bann Ezipsien ti pe adore, pa ti sin. Bondie bann Kananeen osi pa ti sin. Dan zot ladorasion, bann Kananeen ti fer sakrifis bann zanfan ek zot ti fer bann pratik sexiel degoutan. (Lev. 18:3, 4, 21-24; Det. 18:9, 10) Me Zeova bien diferan ar sa bann fos bondie-la. Zeova zame pa pou demann so bann serviter pou fer enn kitsoz ki imoral. Zeova bien-bien sin. Pou ki bann Izraelit rapel ki Zeova Li sin, ti ena enn plak an-or lor tirban gran pret, ek lor sa plak-la ti ekrir “Zeova Li Sin.”—Ex. 28:36-38.
7 Bann dimounn ki ti trouv bann lekritir ki ti ena lor sa plak-la, ti konpran dan enn fason bien kler ki Zeova Li bien-bien sin. Me si enn Izraelit ti lwin ar gran pret ek ki li pa ti trouv mesaz ki ti ena lor sa plak-la, eski li pa ti pou kone ki Zeova Li sin? Non! Sak Izraelit ti tann sa mesaz-la kan ti lir Lalwa devan lepep. (Det. 31:9-12) Si to ti la dan sa moman-la, to ti pou tann sa bann parol-la: “Mwa mo Zeova zot Bondie, ek zot bizin . . . sin parski mo sin.” “Zot bizin montre ki zot sin pou mwa, parski mwa Zeova, mo sin.”—Lev. 11:44, 45; 20:7, 26.
8. Ki nou aprann dan Levitik 19:2 ek 1 Pier 1:14-16?
8 Kan ti lir Lalwa, tou bann Izraelit ti tann bann parol ki trouv dan Levitik 19:2. Zeova ti dir Moiz: “Koz avek tou bann Izraelit ek dir zot, ‘Zot bizin sin, parski mwa, Zeova zot Bondie, mo sin.’” Kitfwa Pier ti pe sit sa verse-la, kan li ti ankouraz bann Kretien pou “vinn sin.” (Lir 1 Pier 1:14-16.) Azordi, nou nepli anba Lalwa Moiz. Selman, seki Pier ti dir an-akor avek seki ena dan Levitik 19:2, setadir ki Zeova Li sin ek ki tou bann ki kontan Li, ki zot ena lesperans pou viv dan lesiel ouswa lor later, zot bizin fer zefor pou vinn sin.—1 Pier 1:4; 2 Pier 3:13.
“VINN SIN DAN ZOT KONPORTMAN”
9. Ki bienfe nou gagne kan nou examinn Levitik sapit 19?
9 Nou anvi fer plezir nou Bondie ki sin. Akoz sa, nou anvi aprann kouma nou kapav vinn sin. Nou pou kone kouma nou kapav vinn sin gras-a bann konsey ki Zeova donn nou. Nou kapav trouv sertin parmi sa bann konsey-la dan Levitik sapit 19. Marcus Kalisch, enn Biblis Ebre, ti ekrir: “Sa sapit-la kitfwa sapit pli inportan dan liv Levitik ek osi dan sink premie liv Labib.” Levitik sapit 19 koumans par sa bann parol-la, “Zot bizin sin.” Alor, anou get sertin verse dan sa sapit-la ki pou ansegn nou kouma nou kapav vinn sin dan diferan domenn nou lavi.
Lalwa ki ena dan Levitik 19:3 ek ki konsern bann paran, bizin motiv bann Kretien pou fer ki kitsoz? (Get paragraf 10-12) *
10-11. Dapre Levitik sapit 19:3, ki nou bizin fer, ek kifer sa inportan?
10 Apre ki Zeova ti dir bann Izraelit ki zot bizin sin, Li ti dir zot: “Sakenn parmi zot bizin respekte so mama ek so papa. . . . Momem Zeova zot Bondie.”—Lev. 19:2, 3.
11 Li bien inportan ki nou obeir lord pou respekte nou bann paran. Enn fwa, enn zom ti demann Zezi: “Ki bon kiksoz mo bizin fer pou gagn lavi eternel?” Dan repons ki Zezi ti donn li, li ti dir li ki li bizin onor so papa ek so mama. (Mat. 19:16-19) Zezi ti mem kondann bann Farizien ek bann skrib parski zot ti tir bann pretext pou bann dimounn pa onor zot paran. Kan zot ti fer sa, “zot pa [ti] respekte parol Bondie.” (Mat. 15:3-6) Dan Parol Bondie, ena sinkiem lalwa ki trouv dan Dis Komannman ek osi seki nou kapav lir dan Levitik 19:3. (Ex. 20:12) Alor, fode zame nou bliye ki lord ki trouv dan Levitik 19:3, setadir lord pou respekte nou mama ek nou papa, li vinn zis apre, “Zot bizin sin, parski mwa, Zeova zot Bondie, mo sin.”
12. Kouma nou kapav obeir lord ki trouv dan Levitik 19:3?
12 Kan to reflesi lor lord ki Zeova inn donn nou pou obeir nou bann paran, to kapav demann tomem, ‘Eski mo pe onor mo bann paran?’ Si to panse ki dan lepase, to pa’nn fer ase pou onor to bann paran, kitfwa to kapav fer plis asterla. To pa kapav sanz lepase, me to kapav fer zefor depi asterla pou to fer plis pou to bann paran. Par exanp, kitfwa to kapav pas plis letan avek zot, ouswa to kapav ed zot plis lor plan materyel, spiritiel, ek afektif. Kan to fer sa, to pou viv an-akor avek Levitik 19:3.
13. (a) Ki lot konsey ena dan Levitik 19:3? (b) Dapre Lik 4:16-18, kouma nou kapav swiv lexanp Zezi azordi?
13 Levitik 19:3 koz lor enn lot kitsoz ki nou bizin fer pou nou vinn sin. Sa verse-la koz lor Saba. Selman, bann Kretien nepli anba Lalwa Moiz, alor nou nepli bizin gard Saba. Kanmem sa, nou kapav tir bann leson ar seki bann Izraelit ti pe fer pandan Saba, ek bann bienfe ki zot ti gagne kan zot ti fer sa. Zour Saba, bann Izraelit ti bizin pa travay ek zot ti bizin ador Bondie. * Se pou sa rezon-la ki, enn zour Saba, Zezi ti dan sinagog ek li ti pe lir Parol Bondie. (Ex. 31:12-15; lir Lik 4:16-18.) Lord ki Bondie ti done dan Levitik 19:3, setadir pou ‘gard Saba,’ bizin ankouraz nou pou rezerv letan sak zour pou bann kitsoz spiritiel. Eski to panse ki to bizin fer plis pou to obeir sa komannman-la? Si to rezerv letan toulezour pou bann kitsoz spiritiel, to pou vinn pli pros ar Zeova, ek sa li bien inportan pou ki to kapav vinn sin.
RANFORSI TO LAMITIE AVEK ZEOVA
14. Ki verite bien inportan mansione plizir fwa dan Levitik sapit 19?
14 Dan Levitik sapit 19, ena enn verite bien inportan ki mansione plizir fwa. Ek sa verite-la kapav ed nou pou res sin. Lafin verse 4 dir: “Momem Zeova zot Bondie.” Nou trouv sa lexpresion-la ouswa sa lide-la 16 fwa dan sa sapit-la. Ek sa rapel nou premie komannman: “Momem Zeova to Bondie. . . . Fode pa to ena lezot bondie apart mwa.” (Ex. 20:2, 3) Alor, si enn Kretien anvi vinn sin, li bizin fer sir ki nanye ek personn pa vinn pli inportan pou li ki so lamitie avek Zeova. Nou bien determine pou pa fer nanye ki kapav zet dezoner lor nom Zeova ki sin.—Lev. 19:12; Iza. 57:15.
15. Dan Levitik sapit 19, bann verse ki koz lor sakrifis bizin motiv nou pou fer ki kitsoz?
15 Bann Izraelit ti montre ki zot ti aksepte Zeova kouma zot Bondie kan zot ti obeir so bann lalwa. Levitik 18:4 dir: “Zot bizin swiv mo bann lalwa ek obeir mo bann komannman, ek viv an-akor avek zot. Momem Zeova zot Bondie.” Dan Levitik sapit 19, nou trouv sertin parmi bann “komannman” ki Zeova ti donn Izrael. Par exanp, verse 5-8, 21, 22 koz lor bann sakrifis zanimo. Bann Izraelit ti bizin fer sa bann sakrifis-la dan fason ki Zeova ti demann zot. Sinon, zot ti pou montre ki zot pa respekte bann kitsoz ki sin pou Zeova. Sa bann verse-la bizin motiv nou pou ena dezir pou fer Zeova plezir, ek pou fer bann sakrifis pou Li, parey kouma Ebre 13:15 ankouraz nou pou fer.
16. Dan Levitik sapit 19, ki prinsip rapel nou ki ena enn diferans ant bann ki pa servi Bondie ek bann ki servi Li?
16 Pou nou vinn sin, nou bizin diferan ar bann dimounn ki pa servi Bondie. Ek parfwa, sa kapav bien difisil. Par exanp, bann kamarad lekol, bann koleg travay, bann paran ki pa Kretien, ek lezot ankor, kapav met presion lor nou pou nou fer bann laktivite ki kapav anpes nou pou servi Zeova kouma bizin. Kan enn kitsoz koumsa arive, nou ena enn desizion inportan pou pran. Ki kitsoz kapav ed nou pou pran enn bon desizion? Anou get enn prinsip interesan ki trouv dan Levitik 19:19. Enn parti sa verse-la dir: “Fode pa to met enn linz ki’nn fer ar de kalite difil.” Gras-a sa lalwa-la, ti kapav fer diferans ant bann Izraelit ek bann lezot nasion. Azordi, nou nepli bizin swiv sa lalwa-la, alor nou kapav met bann linz ki’nn fer ar diferan kalite difil. Me nou pa’le resanble bann dimounn ki ena bann krwayans ouswa ki fer bann kitsoz ki pa an-akor avek bann lansegnman Labib, mem si sa bann dimounn-la nou bann kamarad lekol, nou bann koleg travay, ouswa nou fami. Biensir, nou kontan nou fami, ek antan ki Kretien, nou bizin kontan nou prosin. Me bann desizion ki nou pran bizin montre ki nou anvi obeir Zeova, mem si akoz sa bann desizion-la, nou diferan ar lezot dimounn. Sa li bien inportan, parski si nou anvi vinn sin, tou dimounn bizin kapav trouv diferans ant nou, ki pe servi Bondie, ek bann ki pa servi Bondie.—2 Kor. 6:14-16; 1 Pier 4:3, 4.
Ki leson bann Izraelit ti aprann dan Levitik 19:23-25, ek ki leson to aprann dan sa bann verse-la? (Get paragraf 17-18) *
17-18. Ki leson bien inportan nou kapav aprann dan Levitik 19:23-25?
17 Lexpresion “Momem Zeova zot Bondie,” ti bizin rapel bann Izraelit ki zot lamitie avek Zeova ti bizin kitsoz pli inportan dan zot lavi. Kouma zot ti kapav fer sa? Levitik 19:23-25 montre nou enn fason pou fer sa. (Lir. *) Reflesi lor seki sa bann parol-la ti pou inplike pou bann Izraelit apre ki zot ti pou rant dan Later Promiz. Si enn zom ti plant enn pie, li pa ti pou kapav manz so frwi pandan trwa premie lane. Lor katriem lane, li ti bizin rezerv frwi-la pou ladorasion Zeova, ek lor sinkiem lane, li ti pou kapav manz so frwi. Sa lalwa-la ti ed bann Izraelit pou konpran ki zot bann lintere personel pa ti enn priorite. Zot ti bizin ena konfians ki Zeova ti pou pran zot swin, ek zot ti bizin fer zot ladorasion pou Zeova pas an premie dan zot lavi. Zeova ti pou fer sir ki zot ena tou seki zot bizin. Anplis, Zeova ti ansegn zot ki zot ti bizin zenere ek fer bann don pou tabernak, plas kot zot ti ador Li.
18 Bann parol Levitik 19:23-25 rapel nou seki Zezi ti dir dan so Sermon lor Montagn. Li ti dir: “Pa fatig zot ar . . . seki zot pou manze ou bwar.” Apre sa, li ti dir: “Zot Papa ki dan lesiel, li kone ki sa bann kiksoz ki neseser pou zot.” Zeova pou pran nou swin, parey kouma Li fer avek bann zwazo. (Mat. 6:25, 26, 32) Alor, nou bizin ena konfians ki Zeova pou pran nou swin. Ek nou bizin montre nou zenere anver bann ki bizin led. Nou bien kontan osi pou fer bann donasion pou bann depans lasanble. Zeova trouve kan nou zenere, ek Li pou beni nou pou sa. (Mat. 6:2-4) Kan nou fer sa bann kitsoz-la, nou montre ki nou konpran leson ki ena dan Levitik 19:23-25.
19. Ki bienfe to finn gagne kan to’nn examinn sertin verse dan Levitik sapit 19?
19 Dan sa lartik-la, nou’nn examinn de-trwa verse dan Levitik sapit 19, ek nou’nn trouve kouma nou kapav vinn sin parey kouma nou Bondie. Kan nou fer zefor pou imit Zeova, nou montre ki nou anvi ‘vinn sin dan nou konportman.’ (1 Pier 1:15) Boukou dimounn, ki pa servi Zeova, inn remarke ki bann serviter Zeova ena enn bon konportman. Ek akoz sa, sertin parmi zot inn koumans servi Zeova. (1 Pier 2:12) Me ena lezot kitsoz ankor ki nou kapav aprann dan Levitik sapit 19. Dan prosin lartik, nou pou examinn lezot verse dan sa sapit-la, ek nou pou gete kouma nou kapav “vinn sin” dan lezot domenn nou lavi.
KANTIK 80 ‘Goute, Gete Ki Zeova Li Bien Bon’
^ par. 5 Nou bien kontan Zeova ek nou anvi fer Li plezir. Zeova Li sin, ek Li atann ki so bann serviter osi sin. Me, eski li posib ki bann imin inparfe “vinn sin”? Wi, li posib. Nou kapav aprann kouma pou vinn sin dan nou konportman kan nou etidie seki lapot Pier ti dir bann Kretien ek seki Zeova ti demann nasion Izrael pou fer.
^ par. 6 Exod 15: 1, 11: “1 Sa lepok-la, Moiz ek bann Izraelit ti sant sa sante-la pou Zeova: ‘Sant pou Zeova, parski Li finn gagn enn gran laglwar. Seval ek so kavalie, Li finn zet zot dan lamer. 11 Kisannla kouma twa parmi bann bondie, A Zeova? Kisannla kouma twa, twa ki bien-bien sin? Twa pou ki nou bizin ena lakrint ek sant bann louanz, twa ki fer bann mervey.’”
^ par. 13 Pou konn plis lor Saba ek bann leson ki nou kapav aprann lor Saba, get lartik “‘Ena enn Ler Fixe’ pou Travay ek pou Repoze” dan Latour Degard Desam 2019.
^ par. 17 Levitik 19:23-25: “23 Kan zot pou rant dan pei-la ek ki zot pou plant enn pie ki donn bann frwi, zot bizin konsider bann frwi-la kouma inpir ek ki interdi. Zot pa pou gagn drwa manz frwi sa pie-la pandan trwa-z-an.24 Me lor katriem lane, so bann frwi pou sin pou ki zot zwaye devan Zeova.25 Ek lor sinkiem lane, zot pou kapav manz frwi-la ek azout li dan zot bann rekolt. Momem Zeova zot Bondie.”
