1. Wanem kaonsel nao aposol Peter talem lo olketa Christian, and why nao maet iumi tingse datwan no fitim iumi?

KAONSEL wea aposol Peter talem lo olketa anointed Christian lo first century savve helpem iumi, nomata iumi garem hope for go lo heven or stap lo earth. Peter sei: “Iufala mas holy long evri samting wea iufala duim, olsem datfala Holy God wea hem chusim iufala, bikos olketa Holy Raeting sei: ‘Iufala mas holy bikos mi nao mi holy.’” (1 Pet. 1:15, 16) Toktok blo Peter showimaot iumi savve followim example blo Jehovah wea barava holy, and iumi savve holy and mas holy lo evri samting wea iumi duim. Bat maet iumi tingse from iumi no perfect, iumi no savve holy. Nomata Peter duim samfala mistek, example blo hem showimaot iumi savve holy tu.

2. Olketa wanem kwestin nao bae disfala article ansarem?

² Lo disfala article, bae iumi ansarem fofala kwestin: Wanem nao hem minim for holy? Lo wanem wei nao Jehovah hem holy? Hao nao iumi savve holy long evri samting wea iumi duim? And taem iumi holy, hao nao datwan helpem iumi for fren gud witim Jehovah?

3. Wanem nao tingting blo samfala abaotem samwan wea holy, bat wanem nao helpem iumi for savve wanem hem minim for holy?

³ Taem samfala tingim samwan wea holy, olketa maet tingim olketa bigman blo religion wea werem spesol kaleko, no savve smile, and barava serious. Bat pipol wea holy no olsem bikos Bible sei Jehovah wea holy, hem “datfala hapi God.” (1 Tim. 1:11) Olketa wea worshipim Jehovah  olketa “hapi.” (Sams 144:15) Jesus no tinghae lo olketa wea werem spesol kaleko and act olsem olketa raeteous for mekem pipol lukim olketa. (Matt. 6:1; Mark 12:38) For iumi olketa Christian, Bible helpem iumi for savve wanem hem minim for holy. From God hem lovem iumi, hard for hem talem iumi for holy sapos iumi no fit for duim datwan. So from Jehovah sei iumi “mas holy,” hem savve iumi fit for holy. Bat bifor iumi savve holy lo wanem iumi duim, iumi need for savve wanem hem minim for holy.

4. Wanem nao hem minim for holy?

⁴ Wanem nao hem minim for holy? Lo Bible datfala toktok “holy” hem minim iumi mas followim olketa standard blo Jehovah, worshipim hem followim hao hem laekem, and fren gud witim hem. Iumi tinghae lo Jehovah from hem laek for fren witim iumi nomata iumi no perfect, especially taem iumi tingim wanem Bible teachim abaotem hao Jehovah hem holy tumas.

5. Wanem nao iumi lanem abaotem Jehovah from olketa angel?

⁵ Jehovah hem barava holy. Samfala angel wea stap klosap lo throne blo Jehovah sei olsem abaotem Jehovah: “Hemi barava holi tumas.” (Aesaea 6:3) Olketa angel hia fren gud witim Jehovah, datfala holy God, bikos olketa tu holy. Dastawe taem samfala angel kam for talemaot message blo Jehovah lo olketa man, ples wea olketa kam lo hem kamap holy. Hem nao samting wea happen taem wanfala angel story lo Moses lo taem wea wanfala smol tree hem bone.​—Eksodas 3:2-5; Joshua 5:15.

6-7. (a) Olsem Eksodas 15:1, 11 storyim, wanem nao Moses talem wea showimaot God hem barava holy? (b) Wanem nao helpem olketa Israelite for luksavve hao God hem holy tumas? (Lukim piksa lo front page.)

⁶ Bihaen Moses and olketa Israelite lusim Egypt and katkros lo Red Sea, Moses mekhae lo hao Jehovah, God blo olketa Israelite, hem holy tumas. (Readim Eksodas 15:1, 11.) Pipol lo Egypt, wea worshipim olketa false god, olketa nating holy. Pipol lo Canaan, wea worshipim olketa false god, olketa no holy tu. Lo worship blo olketa, olketa savve sakrifaesim olketa pikinini and savve durong. (Levitikas 18:3, 4, 21-24; Diutronomi 18:9, 10) Bat from Jehovah hem holy, hard for hem talem olketa wea worshipim hem for duim nogud samting olsem. Toktok wea olketa karvem lo gold hedband lo hat blo hae priest hem sei: “Jehovah hem barava holy.” Diswan remindim olketa Israelite hao Jehovah hem holy tumas.​—Eksodas 28:36-38.

⁷ Nomata maet olketa Israelite no savve lukim datfala toktok lo hedband blo hae priest from olketa no savve go klosap lo hem, waswe, bae olketa savve Jehovah hem holy? Ia, bikos taem olketa priest readim Law for olketa man, woman, and olketa pikinini lo Israel, evriwan savve herem hao Jehovah hem holy. (Diutronomi 31:9-12) Olketa savve herem disfala toktok: “Mi nao [Jehovah], God blong yufala, so yufala mas . . . stap holi bikos mi nao mi stap holi.” “Yufala mas stap holi bikos mi nao, [Jehovah], mi holi.”​—Levitikas 11:44, 45; 20:7, 26.

8. Wanem nao iumi savve lanem from Levitikas 19:1, 2 and 1 Peter 1:14-16?

⁸ Distaem bae iumi storyim toktok blo Jehovah lo Levitikas 19:1, 2 wea evriwan  lo Israel herem. Jehovah sei lo Moses: “Talemaot long evriwan blong Israel . . . , ‘Mi nao [Jehovah], God blong yufala, so yufala mas stap holi, bikos mi nao mi stap holi.’” Taem Peter talem olketa Christian for “mas holy,” luk olsem hem quotem toktok blo Jehovah from datfala scripture. (Readim 1 Peter 1:14-16.) Distaem iumi no stap anda lo Law blo Moses. Bat from Peter quotem datfala toktok, iumi lanem hao Jehovah hem holy and olketa wea lovem hem shud traem best for holy tu, nomata olketa wea garem hope for go lo heven or for stap lo paradaes lo earth.​—1 Pet. 1:4; 2 Pet. 3:13.

9. Why nao hem gud for iumi storyim samfala verse lo Levitikas chapter 19?

⁹ From iumi laek for mekem God hapi, iumi laek for lanem hao iumi savve holy. Jehovah givim samfala kaonsel lo hao for holy. Datfala kaonsel hem stap lo Levitikas chapter 19. Maracus Kalisch, wea studyim Hebrew languis, hem sei: “Chapter 19 hem barava important chapter insaed buk blo Levitikas, and insaed lo first faevfala buk blo Bible tu.” Lo start blo Levitikas chapter 19 hem storyim hao God laekem iumi for holy, then olketa verse bihaen storyim wanem for duim mekem iumi holy. So distaem bae iumi storyim samfala verse hia.

10-11. Wanem nao Levitikas 19:3 sei iumi mas duim, and why nao hem important for duim datwan?

¹⁰ Bihaen Jehovah talem olketa Israelite for holy, hem sei moa: “Yufala evriwan mas tinghae long olketa mami an dadi blong yufala, . . . bikos mi nao [Jehovah], God blong yufala.”—Levitikas  19:1-3.

¹¹ Hem important for followim disfala kaonsel blo God for respectim parents blo iumi. Tingim samting wea Jesus talem taem wanfala man askem hem: “Wanem gud samting nao mi mas duim for kasem laef olowe?” Wanfala samting Jesus talem, hem for mas respectim mami and dadi blo hem. (Matt. 19:16-19) Narataem, Jesus tok lo olketa Pharisee and scribe bikos olketa no laek for lukaftarem  parents blo olketa, and hem sei from datwan olketa “mekem toktok bilong God hem iusles nomoa.” (Matt. 15:3-6) Mek-faev komand lo Ten Komandment hem sei for mas respectim parents, olsem Levitikas 19:3 storyim tu. (Eksodas 20:12) Disfala kaonsel lo Levitikas 19:3 for respectim mami and dadi hem first samting Jehovah storyim bihaen hem sei: “Mi nao [Jehovah], God blong yufala, so yufala mas stap holi, bikos mi nao mi stap holi.”

12. Hao nao iumi savve followim kaonsel lo Levitikas 19:3?

¹² Maet hem gud for iumi tingim disfala kaonsel blo Jehovah for respectim parents blo iumi. Sapos iu luksavve iu need for duim moa samting for helpem parents blo iu, hard for changem samting wea happen finis, bat iu savve disaed for duim moa samting distaem. Olsem example, maet iu savve spendem moa taem witim parents blo iu. Or maet iu savve duim samting for help lo physical or spiritual saed blo olketa. Taem iu duim olsem, iu followim kaonsel lo Levitikas 19:3.

13. (a) Wanem moa Levitikas 19:3 sei iumi mas duim for holy? (b) Hao nao iumi savve followim example blo Jesus wea Luke 4:16-18 storyim?

¹³ Iumi savve lanem moa samting abaotem hao for holy lo Levitikas 19:3, wea sei for mas keepim Sabbath. Olketa Christian distaem no followim Law blo Moses, so iumi no need for keepim Sabbath. Bat iumi savve lanem samting from hao olketa Israelite keepim Sabbath and hao datwan helpem olketa. Sabbath hem taem for rest from waka blo olketa and for tingim olketa spiritual samting. * Dastawe lo day blo Sabbath Jesus bae go lo sinagog and readim olketa Holy Raeting. (Eksodas 31:12-15; readim Luke 4:16-18.) Lo Levitikas 19:3 Jehovah sei for keepim Sabbath, bat for iumi datwan hem minim for spendem taem evriday for duim spiritual samting. Waswe, iu tingim eni samting iu savve changem mekem iu fit for duim datwan? Sapos iumi duim olketa spiritual samting evriday iumi bae fren gud witim Jehovah, and datwan bae helpem iumi for holy.

14. Wanem important samting nao Levitikas 19 storyim wea iumi mas duim for holy?

¹⁴ Levitikas chapter 19 storyim nara important samting wea savve helpem iumi for holy. Lo end blo verse 4 hem sei: “Mi nao [Jehovah], God blong yufala.” Kaen toktok olsem hem kamap staka taem lo chapter 19. Datwan mekem iumi tingim firstfala komand wea sei: “Mi nao [Jehovah], God blong yufala. . . . Yufala mas wosipim mi seleva nomoa.” (Eksodas 20:2, 3) From iumi olketa Christian laek for holy, iumi mas mek sure no eni samting spoelem hao iumi fren witim Jehovah. And from iumi Olketa Jehovah’s Witness, iumi no laek duim eni samting wea bae spoelem holy nem blo God.​—Levitikas 19:12; Aesaea 57:15.

15. Olketa verse lo Levitikas chapter 19 wea storyim olketa sakrifaes, helpem iumi for laek duim wanem samting?

¹⁵ From Jehovah hem God blo olketa Israelite, olketa followim olketa law blo hem. Levitikas 18:4 sei: “Mi nao [Jehovah], God blong yufala, so yufala mas obeim olketa lo blong mi, an yufala mas falom tingting blong mi.” Chapter 19 storyim samfala law hia. Olsem example,  lo verse 5-8, 21, 22 hem storyim olketa animal sakrifaes. Olketa Israelite mas sakrifaesim olketa animal followim hao Jehovah bae acceptim. Olketa verse hia shud helpem iumi for laek duim samting for praisem Jehovah followim hao hem laekem, olsem Hebrew 13:15 storyim.

16. Hao nao principle lo Levitikas 19:19 showimaot olketa wea worshipim God mas difren from olketa wea no worshipim hem?

¹⁶ Iumi savve holy sapos iumi willing for difren tu from pipol wea no worshipim God. Maet datwan no isi bikos samfala taem olketa skul fren, pipol iumi waka witim, olketa relative wea no worshipim Jehovah, and olketa narawan, maet laekem iumi for duim samting wea Jehovah no laekem. Taem olketa duim olsem, wanem nao savve helpem iumi for disaedem stret samting? Tingim principle lo Levitikas 19:19 wea sei: “Yufala mas no werem kaleko wea olketa wakem long tufala deferen samting olsem koton an wul.” So olketa Israelite mas werem kaleko wea olketa wakem lo wanfala samting nomoa, and datwan mekem olketa difren from pipol lo olketa kantri raonem olketa. Distaem, hem no rong for iumi werem kaleko wea olketa mixim, olsem cotton and polyester. Bat iumi no laek olsem pipol wea no duim wanem Bible talem, nomata olketa skul fren blo iumi, pipol iumi waka witim, or olketa famili member wea iumi lovem. Iumi laek for obeyim Jehovah lo evri samting, nomata datwan mekem iumi difren from olketa hia. Diswan hem barava important sapos iumi laek for holy.​—2 Cor. 6:14-16; 1 Pet. 4:3, 4.

17-18. Wanem nao iumi savve lanem from Levitikas 19:23-25?

¹⁷ Disfala toktok “mi nao [Jehovah], God blong yufala” hem helpem olketa Israelite for tingim main samting lo laef blo olketa hem for worshipim Jehovah. Levitikas 19:23-25 storyim wanfala wei wea olketa savve duim datwan. (Readim.) Bihaen olketa Israelite go insaed Promis Land, sapos olketa plantim olketa tree for kaikaim frut blo hem, olketa shud no kaikaim for thrifala year. Lo mek-foa year olketa mas givim frut hia for olketa iusim lo tabernacle. Lo mek-faev year nao olketa wea ownim tree savve kaikaim frut blo hem. Disfala law helpem olketa Israelite for trustim hao Jehovah bae provaedem wanem olketa needim and for luksavve worship blo Jehovah shud main  samting lo laef blo olketa. Jehovah mek sure olketa garem inaf kaikai, and encouragem olketa tu for givim staka samting for olketa iusim lo tabernacle.

¹⁸ Law wea stap lo Levitikas 19:23-25 remindim iumi lo wanem Jesus talem lo Sermon lo Maunten. Jesus sei: “No wari abaotem wanem iufala bae kaikaim and drinkim.” Hem sei tu: “Dadi bilong iufala long heven savve iufala needim olketa samting hia.” God bae provaedem wanem iumi needim, olsem hem duim for olketa bird. (Matt. 6:25, 26, 32) Iumi trustim Jehovah for provaedem wanem iumi needim, and iumi hapi for duim “gud samting” for olketa wea needim help. Iumi hapi tu for givim donation for olketa samting wea kongregeson need for peim. Jehovah bae lukim datwan and bae hem blessim iumi. (Matt. 6:2-4) Taem iumi duim olsem, iumi showimaot iumi followim principle lo Levitikas 19:23-25.

19. Wanem nao iumi lanem from olketa verse wea iumi storyim from Levitikas chapter 19?

¹⁹ Lo disfala study iumi storyim samfala verse from Levitikas chapter 19, and olketa verse hia helpem iumi for savve hao for holy olsem God. Taem iumi followim example blo God, datwan showimaot iumi laek for ‘holy long evri samting wea iumi duim.’ (1 Pet. 1:15) Staka wea no worshipim Jehovah lukim gudfala wei blo pipol blo God. From datwan, samfala mekhae lo Jehovah. (1 Pet. 2:12) Bat iumi savve lanem staka samting moa from Levitikas chapter 19. Lo next article bae iumi storyim samfala verse moa from datfala chapter, wea bae helpem iumi for luksavve lo olketa nara samting wea iumi savve duim for “holy,” olsem Peter encouragem iumi for duim.