مطالعے دا مضمون نمبر 48
تُسی پاک ہووو
اپنے سارے چالچلن نُوں پاک کرو۔—1-پطرس 1:15۔
گیت نمبر 34 (خوشی نال گاؤ): وفا دی راہ تے چلو
مضمون تے اِک نظر *
1. پطرس رسول نے اپنے ہمایماناں نُوں کیہڑی ہدیت دِتی سی تے سانوں ایس ہدیت تے عمل کرنا ناممکن کیوں لگ سکدا اے؟
پطرس رسول نے پہلی صدی عیسوی چ پاک روح نال مسح ہوئے مسیحیاں نُوں اِک بڑی ودھیا ہدیت دِتی۔ اوس ہدیت تے غور کرن نال سانوں بڑا فائدہ ہو سکدا اے فیر بھانویں ساڈی امید اسمان تے ہمیشاں دی زندگی حاصل کرن دی ہووے یاں زمین تے۔اوہنے کہیا: اوس پاک خدا وانگوں بنو جنہے توانوں بلایا اے تے اپنے سارے چال چلن نُوں پاک کرو، کیونکہ لکھیا اے کہ پاک ہووو کیونکہ میں وی پاک آں۔ (1-پطرس 1:15، 16) ایس گل توں پتہ چلدا اے کہ اَسی یہوواہ دی مثال تے عمل کر سکنے آں جیہڑا کہ پاک ہون دی سب توں بہترین مثال اے۔ اَسی اپنے چال چلن نُوں پاک رکھ سکنے آں تے سانوں اِنج کرنا وی چاہی دا اے۔ ہو سکدا اے کہ سانوں اِنج کرنا ناممکن لگے کیونکہ عیبدار ہون دی وجہ توں ساڈے توں اکثر غلطیاں ہو جاندیاں نیں۔ پطرس رسول نے وی غلطیاں کیتیاں سن۔ پر اوہدی مثال توں پتہ چلدا اے کہ اَسی پاک بن سکنے آں۔
2. ایس مضمون چ اَسی کیہڑے سوالاں تے غور کراں گے؟
2 ایس مضمون چ اَسی ایہناں سوالاں تے غور کراں گے: پاک ہون دا کیہہ مطلب اے؟ بائبل چ یہوواہ دے پاک ہون بارے کیہہ دَسیا گیا اے؟ اَسی اپنے سارے چال چلن نُوں پاک کیویں رکھ سکنے آں؟ نالے پاک ہون چ تے یہوواہ نال ساڈے رشتے چ کیہہ تعلق اے؟
پاک ہون دا کیہہ مطلب اے؟
3. زیادہتر لوک کیہو جہے بندے نُوں پاک سمجھدے نیں؟ پر سانوں پاک ہون دا صحی مطلب کتھوں پتہ چل سکدا اے؟
3 زیادہتر لوک اوس بندے نُوں پاک سمجھدے نیں جیہڑا ہمیشاں سنجیدہ رہندا اے، مذہبی لباس پاندا اے تے بالکل ہسدا ہسدُا نئیں۔ پاک ہون دا ایہہ مطلب نئیں اے۔ ایہہ گل اَسی ایس لئی کہہ سکنے آں کیونکہ بائبل چ ساڈے پاک خدا یہوواہ بارے دَسیا گیا اے کہ اوہ خوشدل خدا اے۔ (1-تیمُتھیُس 1:11) جیہڑے لوک اوہدی عبادت کردے نیں اوہ مبارک نیں کیونکہ اوہ وی خوش رہندے نیں۔ (زبور 144:15) یسوع مسیح نے تے ایہو جہے لوکاں نُوں جھڑکیا جیہڑے دُوجیاں توں فرق نظر آن لئی خاص قسم دا لباس پاندے سن تے لوکاں دے سامنے نیک ہون دا دِکھاوا کر دے سن۔ (متی 6:1؛ مرقس 12:38) اَسی بائبل چوں پاک ہون بارے جو کجھ وی سکھیا اے اوہدے توں سانوں پتہ چلدا اے کہ اصل چ پاک ہون دا کیہہ مطلب اے۔ سانوں ایس گل دا پکا یقین اے کہ ساڈا پاک تے پیار کرن والا خدا سانوں کدی وی کوئی ایہو جیہا حکم نئیں دے گا جدے تے عمل کرنا ساڈے وَس چ نہ ہووے۔ ایس لئی جدوں یہوواہ سانوں کہندا اے کہ ”تُسی پاک ہووو“ تے ایہدے چ کوئی شک نئیں کہ اَسی اِنج کر سکنے آں۔ پر ظاہری گل اے کہ اپنے سارے چال چلن نُوں پاک کرن توں پہلاں سانوں ایہہ سمجھن دی ضرورت اے کہ پاک ہون دا مطلب کیہہ اے۔
4. پاک ہون دا کیہہ مطلب اے؟
4 بائبل چ جدوں لفظ” پاک“ تے ”مُقدس“ استمال ہوندا اے تے خاص طور تے ایہدا اشارہ نیک چال چلن تے مذہبی لحاظ نال پاک ہون وَل ہوندا اے۔ ایہناں لفظاں دا مطلب ایہہ وی ہوندا اے کہ اِک بندہ یہوواہ خدا دی خدمت کرن لئی مخصوص کر دِتا گیا اے۔ سو اَسی یہوواہ دِیاں نظراں چ اوہدوں پاک ہنے آں جدوں ساڈا چال چلن پاک ہوندا اے، جدوں اَسی خدا دی عبادت اوسے طریقے نال کرنے آں جیہڑا اوہنوں پسند اے تے جدوں اوہدے نال ساڈی پکی دوستی ہوندی اے۔ اَسی تے ایہہ گل سوچ کے ای حیران ہو جانے آں کہ یہوواہ جیہڑا ہر لحاظ نال پاک اے اوہ عیبدار انساناں نال دوستی کرنا چاہندا اے۔ تے جدوں اَسی ایس گل تے غور کرنے آں کہ بائبل چ اوہدے پاک ہون بارے کیہہ کجھ دَسیا گیا اے تے اَسی ہور وی زیادہ حیران ہنے آں۔
یہوواہ قدوس، قدوس، قدوس خدا اے
5. اَسی یہوواہ دے فرشتیاں توں اوہدے بارے کیہہ سکھ سکنے آں؟
5 یہوواہ خدا ہر لحاظ نال پاک اے۔ ایہہ گل سانوں سرافیم فرشتیاں دے اوہناں لفظاں توں پتہ چلدی اے جیہڑے اوہناں نے یہوواہ بارے کہے۔ سرافیم اصل چ ہر ویلے یہوواہ دے تخت دے کول کھڑے رہندے نیں۔اوہناں وچوں کجھ نے کہیا: فوجاں دا رب یہوواہ قدوس، قدوس، قدوس اے۔ (یسعیاہ 6:3) بے شک اپنے پاک خدا نال ایناں قریبی رشتہ رکھن لئی اوہ فرشتے آپ وی بڑے پاک ہون گے۔ جدوں یہوواہ دا اِک فرشتہ زمین تے کِتے آندا سی تے اوہ جگہ وی پاک ہو جاندی سی جیویں کہ اوہدوں ہویا جدوں موسیٰ نے اِک بلدی جھاڑی نُوں ویکھیا۔—خروج 3:2-5؛ یشوع 5:15۔
وڈے کاہن دی پگڑی تے سونے دی اِک پتری لگی ہوندی سی، جدے تے لکھیا ہوندا سی” یہوواہ لئی مقدس۔“ (پیراگراف نمبر 6، 7 نُوں ویکھو۔)
6، 7. (الف) خروج 15:1، 11 دے مطابق موسیٰ نے ایس گل تے کیویں زور دِتا کہ یہوواہ پاک اے؟ (ب) کیہڑی چیز دے ذریعے بنیاِسرائیل نُوں یاد دَوایا جاندا سی کہ یہوواہ پاک اے؟ (پہلے صفحے دی تصویر نُوں ویکھو۔)
6 جدوں بنی اِسرائیل نے بحرِقلزم (بحیرۂ احمر) نُوں پار کیتا تے موسیٰ نے ایس گل تے زور دِتا کہ اوہناں دا خدا یہوواہ پاک اے۔ (خروج 15:1، 11 نُوں پڑھو۔) جھوٹھے دیوتاواں دی پوجا کرن والے مصری بالکل وی پاک نئیں سن۔ کنعانی لوک وی اوہناں ورگے ای سن کیونکہ اوہ وی جھوٹھے دیوتاواں دی پوجا کردے سن۔ اوہناں دی عبادت چ تے بچیاں دی قربانی چڑھائی جاندی سی تے گندے جنسی کم ہوندے سن۔ (احبار 18:3، 4، 21-24؛ اِستثنا 18:9، 10) یہوواہ اوہناں جھوٹھے دیوتاواں وانگوں بالکل نئیں اے۔ اوہ کدی وی اپنے بندیاں نُوں کوئی ایہو جیہا کم کرن لئی نئیں کہندا جدی وجہ توں اوہ ناپاک ہو جان۔ یہوواہ ہر معاملے چ پاک اے تے اوہ چاہندا سی کہ بنی اِسرائیل ایہہ گل ہمیشاں یاد رکھن۔ ایس لئی اوہنے وڈے کاہن دی پگڑی تے سونے دی پتری لوائی جدے تے لکھیا سی: ”یہوواہ لئی مقدس۔“—خروج 28:36-38۔
7 جیہڑا وی بندہ اوس پتری تے لکھے پیغام نُوں ویکھدا سی اوہدے تے ایہہ گل واضح ہو جاندی سی کہ یہوواہ بوہت ای پاک خدا اے۔ پر کیہہ اوہ اِسرائیلی وی ایس گل نُوں جان دا سی جیہڑا کاہن دے نیڑے نئیں جا سکدا سی تے پتری تے لکھے پیغام نُوں پڑھ نئیں سکدا سی؟ جی بالکل۔ ہر اِسرائیلی ایہہ پیغام اوس ویلے سن دا سی جدوں مرداں، عورتاں تے بچیاں سامنے شریعت پڑھی جاندی سی۔ (اِستثنا 31:9-12) جے تُسی وی اوس ویلے اوہناں لوکاں چ ہوندے تے تُسی وی ایہہ گلاں سُن دے: میں یہوواہ تواڈا خدا واں۔ تُسی میرے لئی پاک بنے رہنا کیونکہ میں جو یہوواہ آں پاک آں۔—احبار 11:44، 45؛ 20:7، 26۔
8. اَسی احبار 19:2 تے 1-پطرس 1:14-16 چوں کیہہ سکھنے آں؟
8 آؤ ہُن احبار 19:2 چ لکھی گل تے غور کرئیے جیہڑی سارے اِسرائیلیاں نُوں پڑھ کے سنائی جاندی سی۔ یہوواہ نے موسیٰ نُوں کہیا: بنیاِسرائیل دے سارے لوکاں نُوں کہہ کہ تُسی پاک ہووو کیونکہ میں جو یہوواہ تواڈا خدا واں، پاک آں۔ پطرس شاید ایسے ایت دا حوالہ دے رہیا سی جدوں اوہنے کہیا کہ تُسی پاک ہووو۔ (1-پطرس 1:14-16 نُوں پڑھو۔) ایہہ گل سچ اے کہ اَج اَسی موسیٰ دی شریعت دے تحت نئیں آں۔ پر پطرس نے جیہڑی گل لکھی اوہدے توں احبار 19:2 چ لکھی ایہہ گل ثابت ہوندی اے کہ یہوواہ پاک اے تے جیہڑے لوک اوہنوں پیار کردے نیں اوہناں نُوں وی پاک ہون دی کوشش کرنی چاہی دی اے۔ فیر بھانویں اوہ اسمان تے ہمیشاں دی زندگی حاصل کرن دی امید رکھدے ہون یاں زمین تے۔—1-پطرس 1:4؛ 2-پطرس 3:13۔
اپنے سارے چال چلن نُوں پاک کرو
9. احبار 19باب تے غور کرن نال سانوں کیہہ فائدہ ہوئے گا؟
9 ساڈی دلی خواہش اے کہ اَسی اپنے پاک خدا نُوں خوش کرئیے۔ ایس لئی اَسی ایہہ جاننا چاہنے آں کہ اَسی کیویں پاک بن سکنے آں۔ یہوواہ اپنے کلام دے ذریعے سانوں ایہو جہیاں ہدیتاں دیندا اے جنہاں تے عمل کر کے اَسی پاک ہو سکنے آں۔ ایس سلسلے چ احبار دی کتاب دا 19 باب ساڈے بڑے کم آ سکدا اے۔ اِک عبرانی عالم مارکس کالش نے کہیا: ”ایس باب نُوں نہ صرف احبار دی کتاب دا سگوں بائبل دِیاں پہلیاں پنج کتاباں دا سب توں اہم حصہ کہیا جا سکدا اے۔“ آؤ ایس باب دِیاں کجھ ایتاں تے غور کرئیے جنہاں توں اَسی زندگی بارے کجھ اہم گلاں سکھ سکنے آں۔ ایہناں گلاں تے غور کردے ویلے یاد رکھو کہ ایس باب دی شروعات ایہناں لفظاں نال ہوندی اے: ”تُسی پاک ہووو۔“
احبار 19:3 چ جیہڑا حکم دِتا گیا اے اوہدے توں مسیحیاں نُوں کیہڑیاں گلاں بارے سوچنا چاہی دا اے؟ (پیراگراف نمبر 10-12 نُوں ویکھو۔) *
10، 11. احبار 19:3 چ پاک ہون بارے کیہڑی گل دَسی گئی اے تے ساڈے لئی ایس ہدیت تے عمل کرنا ضروری کیوں اے؟
10 بنیاِسرائیل نُوں ایہہ حکم دین دے بعد کہ اوہناں نُوں پاک ہونا چاہی دا اے، یہوواہ نے اوہناں نُوں ایہہ وی کہیا: تواڈے وچوں ہر اِک اپنے ماں پیو دی عزت کرے۔ میں یہوواہ تواڈا خدا واں۔—احبار 19:2، 3۔
11 ایہدے توں صاف پتہ چلدا اے کہ ساڈے لئی ایس ہدیت تے عمل کرنا بوہت ضرور ی اے کہ اَسی اپنے ماں پیو دی عزت کرئیے۔ یاد کرو کہ یسوع نے اوس بندے نُوں کیہہ کہیا جنہے اوہدے توں پچھیا کہ مینوں ہمیشاں دی زندگی پان لئی کیہڑے چنگے کم کرنے چاہی دے نیں۔ یسوع نے اوہنوں جیہڑیاں گلاں دَسیاں اوہناں وچوں اِک ایہہ سی کہ اوہنوں اپنے ماں پیو دی عزت کرن دی ضرورت اے۔ (متی 19:16-19) یسوع مسیح نے فریسیاں تے شریعت دے عالماں نُوں جھڑکیا جیہڑے اپنے ماں پیو دی دیکھبھال کرن توں جان چھڈاندے سن کیونکہ اِنج کرن نال اوہ خدا دے کلام نُوں بے اثر کر دیندے سن۔ (متی 15:3-6) خدا دے کلام چ احبار 19:3 چ لکھی گل تے دَس حکماں وچوں پنجواں حکم وی شامل اے۔ (احبار 20:12) غور کرو کہ جدوں یہوواہ نے ایہہ حکم دِتا کہ تُسی پاک ہووو کیونکہ میں جو یہوواہ تواڈا خدا واں پاک آں تے ایہدے فوراً بعد اوہنے احبار 19:3 چ ایہہ حکم دِتا کہ اپنے ماں پیو دی عزت کرو۔
12. اَسی احبار 19:3 چ لکھے حکم تے کیویں عمل کر سکنے آں تے سانوں اپنے آپ کولوں کیہڑا سوال پچھنا چاہی دا اے؟
12 جدوں اَسی یہوواہ دے ایس حکم بارے سوچنے آں کہ سانوں اپنے ماں پیو دی عزت کرنی چاہی دی اے تے سانوں اپنے آپ کولوں ایہہ سوال پچھنا چاہی دا اے: کیہہ میں اپنے ماں پیو دی عزت کرنا واں؟ جے توانوں لگدا اے کہ تُسی پہلاں اپنے ماں پیو لئی ایناں کجھ نئیں کر سکے تے تُسی ہُن ایس معاملے چ بہتری لیا سکدے او۔ ظاہر اے کہ تُسی گزرے وقت نُوں واپس تے نئیں لیا سکدے پر تُسی ایہہ عزم کر سکدے او کہ ہُن تُسی اپنے ماں پیو لئی جو کجھ کر سکدے او،اوہ ضرور کرو گے۔ تُسی سوچ سکدے او کہ اوہناں نال تُسی زیادہ توں زیادہ وقت کیویں گزار سکدے او۔ یاں شاید تُسی اوہناں دی ہور زیادہ مدد کر سکدے او تاکہ اوہ اپنے لئی ضرورت دِیاں چیزاں لے سکن۔ نالے یہوواہ دے نیڑے رہن تے اوہدی خدمت کرن چ تُسی اوہناں دی مدد کر سکدے او۔ یاں تُسی اپنیاں گلاں توں اوہناں دا ہور زیادہ حوصلہ ودھا سکدے او۔ اِنج تُسی احبار 19:3 چ لکھے حکم تے عمل کر رہے ہووو گے۔
13. (الف) احبار 19:3 چ یہوواہ نے ہور کیہڑی گل بارے حکم دِتا اے؟ (ب) لُوقا 4:16-18 چ یسوع مسیح نے ساڈے لئی جیہڑی مثال قائم کیتی اَسی اوہدے تے عمل کیویں کر سکنے آں؟
13 احبار 19:3 چوں اَسی پاک بنن بارے اِک ہور گل سکھنے آں۔ ایہدے چ سبت نُوں منان دا حکم دِتا گیا سی۔ مسیحی موسیٰ دی شریعت دے تحت نئیں نیں ایس لئی سانوں سبت منان دی لوڑ نئیں اے۔ پر بنی اِسرائیل جیس طریقے نال سبت مناندے سن تے اوہدے توں اوہناں نُوں جیہڑے فائدے ہوئے سن اوہدے توں اَسی بوہت کجھ سکھ سکنے آں۔ سبت دے دن بنیاِسرائیل نُوں اپنے روز دے کماں توں آرام کرن تے اپنی پوری توجہ یہوواہ دی عبادت تے رکھن دا موقع مِلدا سی۔ * ایسے لئی یسوع مسیح سبت دے دن اپنے شہر دی عبادتگاہ چ جاندا سی تے خدا دے کلام نُوں پڑھدا سی۔ (خروج 31:12-15؛ لُوقا 4:16-18 نُوں پڑھو۔) جدوں اَسی احبار 19:3 چ یہوواہ دے ایس حکم نُوں پڑھنے آں کہ تُسی میرے سبتاں نُوں منو تے اَسی ایہہ سکھنے آں کہ سانوں اپنی پوری توجہ یہوواہ دی عبادت تے رکھن لئی اپنے روز دے کماں چوں وقت کڈھنا چاہی دا اے۔ کیہہ توانوں لگدا اے کہ توانوں یہوواہ دے ایس حکم تے عمل کرن دے معاملے چ بہتری لیان دی ضرورت اے؟ جے تُسی باقاعدگی نال یہوواہ دی عبادت نال تعلق رکھن والے کماں لئی وقت کڈھو گے تے یہوواہ نال تواڈی دوستی ہور وی پکی ہو جائے گی جیہڑی پاک بنن لئی بوہت ضروری اے۔
یہوواہ نال اپنی دوستی پکی کرو
14. احبار 19 باب چ کیہڑی اہم سچائی دا وار وار ذکر کیتا گیا اے؟
14 احبار 19 باب چ وار وار اِک ایہو جہی اہم سچائی دا ذکر کیتا گیا اے جدے توں سانوں پاک رہن چ مدد مل سکدی اے۔ 4 ایت دے آخر چ ایہہ لفظ لکھے نیں: میں یہوواہ تواڈا خدا واں۔ ایس گل دا ذکر ایس باب چ 16 وار کیتا گیا اے۔ ایہدے توں سانوں یہوواہ دا دِتا ہویا ایہہ پہلا حکم یاد آندا اے: یہوواہ تیرا خدا میں آں۔ میرے حضور تُوں دُوجے خداواں نُوں نہ منیں۔ (خروج 20:2، 3) جیہڑا مسیحی پاک بننا چاہندا اے اوہنوں کسے وی چیز یاں بندے نُوں یہوواہ تے اوہدے نال اپنی دوستی وچ نئیں آن دینا چاہی دا۔ اَسی یہوواہ دے ناں توں پچھانے جانے آں ایس لئی سانوں کدی وی کوئی ایہو جیہا کم نئیں کرنا چاہی دا جدے توں اوہدے پاک ناں دی بدنامی ہوئے۔—احبار 19:12؛ یسعیاہ 57:15۔
15. احبار 19 باب چ جانوراں دی قربانی بارے جو کجھ دَسیا گیا اے اوہدے توں اَسی کیہہ سکھنے آں؟
15 یہوواہ دے حکماں تے عمل کر کے بنی اِسرائیل ظاہر کردے سن کہ اوہ اوہنوں اپنا خدا من دے نیں۔ احبار 18:4 چ یہوواہ نے اوہناں نُوں کہیا: تُسی میرے حکماں تے عمل کرنا تے میرے قانون مننا۔ میں یہوواہ تواڈا خدا واں۔ احبار 19 باب چ کجھ ایہو جہے قانون لکھے نیں۔ مثال لئی، 5-8، 21 تے 22 ایتاں چ جانوراں دی قربانی بارے کجھ قانون دِتے گئے نیں۔ بنی اِسرائیل نُوں قربانیاں ایس طریقے نال پیش کرنیاں سن کہ اوہ یہوواہ دی نظر چ ناپاک نہ ہون۔ایہناں ایتاں توں اَسی سکھ سکنے آں کہ سانوں یہوواہ نُوں خوش کرنا چاہی دا اے تے اوہدے حضور حمد دِیاں قربانیاں پیش کرنیاں چاہی دیاں نیں جیویں کہ عبرانیوں 13:15 چ کرن لئی کہیا گیا اے۔
16. احبار 19 باب چ لکھے کیہڑے اصول توں پتہ چلدا اے کہ یہوواہ دی عبادت کرن والیاں تے نہ کرن والیاں چ فرق ہونا چاہی دا اے؟
16 پاک بنن لئی ضروری اے کہ اَسی اوہناں لوکاں توں فرق نظر آئیے جیہڑے یہوواہ دی عبادت نئیں کردے۔ پر اِنج کرنا ہمیشاں اسان نئیں ہوندا۔ ہو سکدا اے کہ کدی کدار ساڈے نال سکول چ پڑھن والے بچے، ساڈے نال کم کرن والے لوک، ساڈے غیرایمان رشتےدار تے دُوجے لوک ساڈے تے ایہو جہے کم کرن دا دبا پان جدی وجہ توں اَسی یہوواہ دی مرضی دے مطابق اوہدی عبادت نہ کر سکئے۔ ایس صورت چ صحی فیصلہ کرن لئی کیہڑی چیز ساڈی مدد کر سکدی اے؟ ذرا احبار 19:19 چ لکھے ایس اصول تے غور کرو: ایہو جیہا کپڑا نہ پانا جیہڑا دو فرق فرق قسم دے دھاگیاں دا بنیا ہوئے۔ ایس گل تے عمل کرن نال بنیاِسرائیل اپنے آلے دوالے دِیاں قوماں توں فرق نظر آندے سن۔ اَسی شریعت دے تحت نئیں آں ایس لئی ساڈی نظر چ دو طرحاں دے کپڑیاں نال بنیا ہویا لباس پانا غلط نئیں اے جیویں کہ کاٹن، ریشم تے اُون دے بنے کپڑے۔ پر اَسی ایہو جہے لوکاں ورگے نئیں بن دے جنہاں دے عقیدے تے طورطریقے بائبل دی تلیم دے خلاف نیں۔ فیر بھانویں اوہ ساڈے نال سکول چ پڑھدے ہون، ساڈے نال کم کردے ہون یاں فیر ساڈے رشتےدار ہون۔ ایہہ سچ اے کہ سانوں اپنے رشتےدارں نال پیار اے تے اَسی اپنے گوانڈھی یعنی دُوجے لوکاں لئی محبت ظاہر کرنے آں۔ پر جدوں زندگی دے اہم معاملیاں بارے فیصلے کرن دی گل آندی اے تے سانوں یہوواہ دے بندیاں دے طور تے اپنے آپ نُوں دُنیا دے لوکاں توں وَکھ رکھن لئی تیار رہنا چاہی دا اے۔ یاد رکھو کہ اپنے آپ نُوں یہوواہ لئی مخصوص کرنا پاک ہون دا حصہ اے۔—2-کُرنتھیوں 6:14-16؛ 1-پطرس 4:3، 4۔
بنیاِسرائیل نے احبار 19:23-25 چوں کیہڑیاں گلاں سکھیاں ہون گیاں تے تُسی ایہناں ایتاں چوں کیہہ سکھیا اے؟ (پیراگراف نمبر 17، 18 نُوں ویکھو۔) *
17، 18. اَسی احبار 19:23-25 توں کیہڑا اہم سبق سکھنے آں؟
17 اِصطلاح ”میں یہوواہ تواڈا خدا واں“ توں بنیاِسرائیل یاد رکھ سکدے سن کہ اوہناں نُوں یہوواہ نُوں اپنی زندگی چ سب توں زیادہ اہمیت دینی چاہی دی اے۔ اِنج کرن دا اِک طریقہ احبار 19:23-25 چ دَسیا گیا اے۔ (ایتاں نُوں پڑھو۔) غور کرو کہ بنیاِسرائیل نُوں ایہناں لفظاں دی اہمیت اوس وقت کیویں پتہ چلی جدوں اوہ کنعان دے ملک چ پونچ گئے۔ یہوواہ نے اوہناں نُوں حکم دِتا کہ اوہ پہلے تِن سالاں تک اپنے لائے ہوئے درختاں دا پھل نہ کھان۔ چوتھے سال اوہ اپنے درختاں دا پھل یہوواہ دی عبادتگاہ چ دین تے پنجویں سال توں اوہناں نُوں کھان۔ ایس حکم توں بنیاِسرائیل ایہہ سمجھ پائے کہ اوہناں نُوں اپنیاں ضرورتاں توں زیادہ یہوواہ دی عبادت نُوں اہمیت دینی چاہی دی اے۔ اوہناں نُوں ایس گل تے بھروسا رکھنا سی کہ یہوواہ اوہناں دی دیکھ بھال کرے گا تے اوہناں دے کھان پین دا پورا خیال رکھے گا۔ یہوواہ نے اوہناں نُوں ہلاشیری دِتی کہ اوہ دل کھول کے اوہدی عبادتگاہ چ نذرانے دین۔
18 احبار 19:23-25 چ دِتے گئے حکم توں سانوں یسوع مسیح دی اوہ گل یاد آندی اے جیہڑی اوہنے پہاڑی وعظ چ کہی سی۔ یسوع نہ کہیا: ایہہ فکر نہ کرو کہ تُسی کیہہ کھاؤ پیو گے۔ فیر اوہنے کہیا: تواڈا اسمانی باپ جان دا اے کہ توانوں ایہناں چیزاں دی ضرورت اے۔ جے یہوواہ پرندیاں دِیاں ضرورتاں نُوں پورا کردا اے تے کیہہ اوہ ساڈیاں ضرورتاں نُوں پورا نئیں کرے گا؟ (متی 6:25، 26، 32) سانوں پورا یقین اے کہ یہوواہ ساڈا خیال رکھے گا۔ ایس لئی اَسی بغیر کوئی دکھاوا کیتے ضرورتمنداں دی مدد کرنے آں۔ ایہدے علاوہ اَسی خوشی نال کلیسیا دے خرچے پورے کرن لئی عطیات دینے آں۔ جدوں اَسی کھلے دل نال دُوجیاں دی مدد کرنے آں تے یہوواہ ویکھدا اے تے اوہ سانوں ایہدا اجر وی دَوے گا۔ (متی 6:2-4) جدوں اَسی کھلے دل توں کم لینے آں تے اَسی ظاہر کرنے آں کہ اَسی احبار 19:23-25 چ دِتے گئے سبق نُوں سمجھ گئے آں۔
19. اَسی احبار 19 باب دِیاں جیہڑیاں ایتاں تے غور کیتا اے اوہناں توں تُسی کیہہ سکھیا اے؟
19 اَسی احبار 19 باب دِیاں صرف کجھ ای ایتاں تے غور کیتا اے جنہاں توں اَسی جان سکے آں کہ اَسی اپنے پاک خدا وانگوں کیویں بن سکنے آں۔ جدوں اَسی یہوواہ دی مثال تے عمل کرنے آں تے اَسی ظاہر کرنے آں کہ اَسی اپنے سارے چال چلن نُوں پاک کرن دی پوری کوشش کر رہے آں۔ (1-پطرس 1:15) بوہت سارے لوک جیہڑے یہوواہ دی عبادت نئیں کردے اوہ وی ساڈے چنگے چال چلن نُوں من دے نیں۔ ایہناں وچوں کجھ تے یہوواہ دی وڈیائی وی کرن لگ پئے نیں۔ (1-پطرس 2:12) اَسی احبار 19 باب چوں ہور وی کئی اہم گلاں سکھ سکنے آں۔ اگلے مضمون چ اَسی ایسے باب دِیاں کجھ ہور ایتاں تے غور کراں گے تے ویکھاں گے کہ اَسی ہور کیہڑے طریقیاں نال پاک بن سکنے آں جدی پطرس نے وی ہلاشیری دِتی۔
گیت نمبر 7 (خوشی نال گاؤ): یہوواہ ساڈا زور اے
^ پیراگراف 5 اَسی یہوواہ خدا نُوں بوہت پیار کرنے آں تے اوہنوں خوش کرنا چاہنے آں۔ یہوواہ خدا پاک اے تے اوہ چاہندا اے کہ اوہدی عبادت کرن والے لوک وی پاک ہون۔ پر کیہہ عیبدار انساناں لئی پاک ہونا ممکن اے؟ جی ہاں۔ ایہہ جانن لئی کہ اَسی اپنے سارے چال چلن نُوں کیویں پاک رکھ سکنے آں اَسی پطرس رسول دی اوس ہدیت تے غور کراں گے جیہڑی اوہنے اپنے ہمایماناں نُوں دِتی سی۔ ایہدے علاوہ اَسی یہوواہ خدا دے اوس حکم تے وی غور کراں گے جیہڑا اوہنے بنیاِسرائیل نُوں دِتا سی۔
^ پیراگراف 13 سبت دے موضوع بارے ہور پڑھن لئی یاں ایہہ جانن لئی کہ ایس بندوبست توں اَسی کیہہ سکھنے آں اُردو زبان چ ”مینارِنگہبانی،“ دسمبر 2019 چ مضمون ”کام اور آرام کا ایک وقت ہے“ نُوں ویکھو۔
^ پیراگراف 57 تصویر دی وضاحت: اِک بندہ اپنے ماں پیو نال وقت گزار رہیا اے، اوہ اپنی بیوی تے دھی نال اوہناں نُوں مِلن آیا اے تے اوہ اپنے ماں پیو نال باقاعدگی نال گل بات کردا اے۔
^ پیراگراف 59 تصویر دی وضاحت: اِک اِسرائیلی کسان اوہناں درختاں دے پھلاں نُوں ویکھ رہیا اے جیہڑے اوہنے لائے نیں۔
