1. Саво совет денѓа о апостол Петар е христијаненге хем соске шај те мислина кај адава совет нашти те применинел пе?

 БИЗИ разлика дали иси амен надеж те живина ко небо или теле ки Пхув, саринен амен шај те овел амен корист таро совет со о апостол Петар денѓа ла е помазиме христијаненге таро прво веко. О Петар пишинѓа: „Сар сој тано свето окова со викинѓа тумен, тумен да овен света ко са со керена соске тано пишимо: ’Овен света соске ме сиум свето‘“ (1. Пет. 1:15, 16). Таро акала лафија сикљоваја кај шај те џа пало е Јеховаскоро пример, о најшукар пример баши светост. Амен на само со шај, него хем мора те ова света ко са со кераја. Шај мислинаја аменге кај нашти те кера адава адалеске со сием несовршена. О Петар да грешинѓа ама лескоро пример сикавел аменге кај шај те ова света.

2. Башо кола пучиба ка добина одговорија ки акаја статија?

² Ки акаја статија ка добина одговор ко акала пучиба: Сој тани и светост? Со сикљоваја тари Библија баши е Јеховаскири светост? Сар шај те ова света ко са со кераја? Хем сар тане поврзиме и светост хем амаро амалипе е Јеховаја?

3. Со би вакерена бут мануша баши некаске сој свето ама коте шај те аракха точна информацие?

³ Кеда керела пе лафи баши некасте сој свето бут мануша мислинена ки некасте со на асала, кова со секогаш уравела религиозна шеја хем тано бут сериозно. Ама, окола сој света ни хари нане асавке. И Библија башо Јехова, кова сој свето, вакерела кај тано „бахтало Девел“ (1. Тим. 1:11). А окола со обожавинена ле тане исто аѓаар бахтале (Пс. 144:15). О Исус осудинела сине околен со уравена сине посебна шеја хем керена сине шукар буќа те шај о јавера те дикхен лен (Мат. 6:1; Мар. 12:38). Сар чачутне христијања амен џанаја со значинела те овел пе свето таро адава со сикљоваја тари Библија. Увериме сием кај о Девел мангела амен хем кај никогаш нане те родел амендар те кера нешто  со нашти кераја. Значи кеда о Јехова вакерела аменге: „Овен света“, тегани шај те ова сигурна кај шај те кера адава. Џанѓола пе, англедер те ова света ко са со кераја ваљани прво те хаљова сој тани и светост.

4. Со значинена о лафија „свето“ хем „светост“?

⁴ Сој тани и светост? Ки Библија о лафија „свето“ хем „светост“ обично користинена пе баши морално хем религиозно чистота. Акала лафија исто аѓаар користинена пе кеда некој тано биримо те служинел е Девлеске. Јавере лафенцар, амен сием света ако сием морално чиста, ако обожавинаја е Јехова ко исправно начин хем ако иси амен паше амалипе леа. Благодарна сием соске иако сием несовршена, а о Јехова тано свето, сепак ов мангела те овел паше амал аменцар.

5. Со шај те сикљова таро верна ангелија башо Јехова?

⁵ О Јехова тано свето хем чисто ко са. Акава дознајнаја ле таро адава со вакерѓе о серафимија — ангелија сој тане паше узо е Јеховаскоро престол. Несаве лендар вакерѓе: „Свето, свето, свето тано о Јехова о заповеднико е војскенгоро“ (Иса. 6:3). Џанѓола пе, те шај те овел лен паше амалипе е Девлеа кова сој тано свето о ангелија да мора те овен света хем ола тане света. Адалеске кеда о Јехова бичхалела сине јекхе ангеле теле ки Пхув те вакерел несаво хабери адава тхан овела сине свето. Адава случинѓа пе кеда о Мојсеј сине узи грмушка со тхабљола сине (2. Мој. 3:2-5; Ис. Нав. 5:15).

6-7. а) Спрема 2. Мојсеева 15:1, 11, сар о Мојсеј истакнинѓа е Девлескири светост? б) Со потсетинела сине е Израелцон кај о Девел тано свето? (Дикх и слика тари насловно страна.)

⁶ Откеда о Мојсеј водинѓа е Израелцон таро Црвено море, ов истакнинѓа ленге кај ленгоро Девел, о Јехова, тано свето. (Читин 2. Мојсеева 15:1, 11.) А о Египќања кола со обожавинена сине е ховавне девлен ни хари на сине света. Ни о Ханаанција кола со обожавинена сине е ховавне девлен на сине света. Ко ленгоро обожавибе сине вклучимо те ден пумаре чхавен сар жртва хем те овен лен одвратна сексуална односија (3. Мој. 18:3, 4, 21-24; 5. Мој. 18:9, 10). Ама, о Јехова тано бут поразлично таро акала ховавне девела, ов никогаш на би родела нешто асавко таро пле слуге. Лестар авела и светост! Те шај о Израелција те на бистрен акава, о првосвештенико пхиравела сине јекх златно плочка ко турбани коте со сине пишиме о лафија: „И светост припадинела е Јеховаске“ (2. Мој. 28:36-38).

⁷ Околенге со дикхена сине адаја плочка сине јасно кај о Јехова тано чаче свето. Ама, со ако несаво Израелцо никогаш на дикхља адаја плочка адалеске со нашти сине те авел паше узо првосвештенико? Дали ов понадари да ка џанел сине кај о Јехова тано свето? Оја. Са о Израелција шунѓе акаја порака кеда сине читимо о закони англо мурша, џувља хем чхаве (5. Мој. 31:9-12). Ако ту би овеа сине присутно адатхе ка шуне сине о лафија: „Ме сиум о Јехова, тумаро Девел. Овен света соске ме сиум свето. Мора те овен света англи манде соске ме, о Јехова, сиум свето!“ (3. Мој. 11:44, 45; 20:7, 26).

8. Со сикљоваја тари 3. Мојсеева 19:2 хем таро 1. Петрово 1:14-16?

⁸ Акана ка дикха нешто со вакерѓа о Јехова кај ваљани те читинел пе са е Израелцонге кова со аракхљола ки 3. Мојсеева 19:2. О Јехова вакерѓа е Мојсееске: „Вакер са е Израелцонге: ‘Овен света соске ме, о Јехова, тумаро Девел сиум свето‘“. О Петар најверојатно цитиринѓа акава стихо кеда вакерѓа е христијаненге те овен света. (Читин  1. Петрово 1:14-16.) Џанѓола пе, амен на сием више тело е Мојсеескоро закони. Сепак, адава со пишинѓа о Петар потврдинела адава со сиклилем тари 3. Мојсеева 19:2, кај о Јехова тано свето хем окола со мангена ле ваљани те трудинен пе те овен света. Адава важинела сариненге, бизи разлика дали иси амен надеж те живина ко небо или ко рај ки Пхув (1. Пет. 1:4; 2. Пет. 3:13).

9. Сави корист ка овел амен ако разглединаја о 19 поглавје тари 3. Мојсеева?

⁹ Адалеске со мангаја те кера амаре Девле бахтало, мангаја те сикљова сар те ова света. О Јехова дела амен практична советија те шај те џана сар те кера адава. Јекх таро адала советија шај те аракха лен ки 3. Мојсеева 19 поглавје. Јекх еврејско изучувачи кова со викинела пе Маркус Калиш пишинѓа: „Акава поглавје на само сој тано најважно поглавје тари цело 3. Мојсеева, него исто аѓаар таро са о панџ лила е Мојсеескере“. Те дикха некобор стихија таро акава поглавје коте со иси бут шуже советија башо несаве подрачја таро секојдневно живото. Џикоте кераја адава, шукар тано ма те бистра кај о 19 поглавје тари 3. Мојсеева почминела е лафенцар: „Овен света!“.

10-11. Спрема 3. Мојсеева 19:3, со ваљани те кера хем соске тано адава важно?

¹⁰ Откеда вакерѓа е Израелцонге кај ваљани те овен света, о Јехова исто аѓаар вакерѓа: „Секова јекх тумендар ваљани те поштујнел пе даја хем пе даде, ме сиум о Јехова, тумаро Девел“ (3. Мој. 19:2, 3).

¹¹ Јасно тано кај ваљани те шуна е Девлескири заповед те поштујна амаре родителен. Сетин тут со вакерѓа о Исус кеда јекх мануш пучља ле: „Саво шукарипе мора те керав те шај те добинав вечно живото?“ Јекх дело таро е Исусескоро одговор сине кај ваљани те поштујнел пе даде хем пе даја (Мат. 19: 16-19). О Исус чак осудинѓа е фарисеен хем е книжникон соске ола на мангена сине те грижинен пе хем те поштујнен пе родителен. Аѓаар, ола „керѓе е Девлескоро Лафи те на овел ле нисави вредност“ (Мат. 15:3-6). Ко е Девлескоро Лафи сине вклучими и панџто таро деш заповедија хем о лафија со аракхљона ки 3. Мојсеева 19:3 (2. Мој. 20:12). Хем сар со  дикхлем, на ваљани те бистра кај и заповед со аракхљола ки 3. Мојсеева 19:3 — те поштујнел пе е даја хем е даде — тани денди одма пали изјава: „Овен света, соске ме, о Јехова, тумаро Девел сиум свето“.

12. Сар шај те сикава кај шунаја и заповед тари 3. Мојсеева 19:3?

¹² Кеда ка размислина баши е Јеховаскири заповед те поштујна амаре родителен, шај ка пуча амен: „Дали поштујнава ме родителен?“ Ако мислинеа кај англедер на керѓан доволно, шај те чхиве туке цел акана те ове пошукар ко адава. Нашти те иране о време, ама акана шај те испрајне и ситуација аѓаар со ка накхе повише време тле родителенцар хем ка поможине ленге повише. Шај ли те грижине тут ленге повише ко материјално хем духовно поглед, или те охрабрине лен хем те утешине лен кеда ваљани ленге адава? Ако кереа акава, тегани ка ове послушно ки заповед со аракхљола ки 3. Мојсеева 19:3.

13. а) Кова јавер совет аракхљола ки 3. Мојсеева 19:3? б) Сар шај амен авдиве те џа пало е Исусескоро пример сој пишимо ко Лука 4:16-18?

¹³ О лафија со аракхљона ки 3. Мојсеева 19:3 сикавена амен нешто јавер да башо адава сар те ова света. Адатхе тано спомнимо те икерел пе о сабат. О христијања авдиве на ваљани те икерен пе ко Закони, адалеске амен на ваљани те икера о сабат. Сепак, шај бут те сикљова таро адава сар о Израелција икерѓе о сабат хем сави корист сине лен таро адава. О сабат сине време башо одмор тари бути хем време со ваљани сине те одвојнен ле башо духовна буќа. * Адалеске, адава диве о Исус џала сине ки синагога ки пли диз хем читинела сине таро е Девлескоро Лафи. (2. Мој. 31:12-15; Читин Лука 4:16-18.) И заповед сој пишими ки 3. Мојсеева 19:3, „икерен мле диве башо одмор“, ваљани те поттикнинел амен те одвојна аменге време таро секојдневна активностија те шај те овел амен повише време башо духовна буќа. Дали мислинеа кај ваљани те кере несаве промене ко акава подрачје? Ако редовно одвојнеа туке време башо духовна буќа, тегани ка ове попаше амал е Јеховаја, а адава тано бут важно те шај те ове свето.

14. Кова основно чачипе тано истакнимо ко цело 19 поглавје тари 3. Мојсеева?

¹⁴ Ко 19 поглавје тари 3. Мојсеева, бут пути спомнинела пе јекх основно чачипе кова со шај те поможинел аменге те ачхова света. О штарто стихо завршинела е лафенцар: „Ме сиум о Јехова, тумаро Девел“. Акала или слична лафија, аракхљовена 16 пути ко акава поглавје. Акава сетинкерела амен ки прво заповед: „Ме сиум о Јехова, тло Девел... Ма те овен тут јавера девела освен мандар“ (2. Мој. 20: 2, 3). Секова христијани кова со мангела те овел свето, мора те овел сигурно кај никој или ништо нане те овел леске поважно таро лескоро амалипе е Девлеа. Адалеске со пхираваја о анав е Јеховаскере сведокија, мора те ова одлучна те избегина те кера нешто со шај те лаџакерел лескоро свето анав (3. Мој. 19:12; Иса. 57:15).

15. Ко со ваљани те поттикнинен амен о стихија тари 3. Мојсеева 19 поглавје кеда керела пе лафи башо жртве?

¹⁵ О Израелција сикавѓе кај о Јехова тано ленгоро Девел аѓаар со сине леске послушна ко заповедија. Ки 3. Мојсеева 18:4 пишинела: „Постапинен спрема мле законија, икерен тумен ко мле одредбе хем живинен  спрема ленде. Ме сиум о Јехова, тумаро Девел“. Ко 19 поглавје иси несаве таро акала одредбе е Израелцонге. На пример, ко стихија 5-8, 21 хем 22, тане спомниме о животинска жртве. О Израелција ваљани сине те ден адала жртве ко начин колеа со нане сине те мељарен адава сој свето е Јеховаске. Акала стихија ваљани те поттикнинен амен те манга те угодина е Јеховаске хем те фалина ле аѓаар со ка да жртве сој леске прифатлива, сар со сием поттикниме ко Евреите 13:15.

16. Кова начело сетинкерела амен баши разлика машкар окола со служинена е Девлеске хем окола со на служинена леске?

¹⁶ Те шај те ова света, ваљани те ова спремна те разликујна амен таро јавера. Ама адава шај те овел пхаро. Понекогаш о соученикија, о колеге, и фамилија со нане Јеховаскере сведокија хем јавера, шај ка пробинен те убединен амен те кера нешто сој погрешно англо Јехова. Ако керена адава, ваљани те ана јекх бут важно одлука. Со шај те поможинел амен те ана и исправно одлука? Те дикха јекх дело таро начело со аракхљовела ки 3. Мојсеева 19:19. Адатхе пишинела: „Ма уравен шеја сој тане керде таро дуј различна материјалија“. Акаја заповед поможинѓа е Израелцонге те разликујнен пе таро јавера нацие. Адалеске со на сием више тело е Мојсеескоро закони, амен шај те урава шеја таро различна материјалија, сар сој памуко хем полиестер, волна хем свила. Ама на мангаја те ова сар о мануша со на верујнена хем на икерена пе ко библиска мерилија, чак адала мануша те овен амаре соученикија, колеге или фамилија. Џанѓола пе, амен мангаја амаре фамилија хем мангаја те сикава мангипе е јаверенге. Ама кеда анаја важна одлуке ко амаро живото, тегани сием спремна те разликујна амен таро јавера. Адава тано бут важно, соске ако мангаја те ова света тегани ваљани те ова одвојме башо Девел (2. Кор. 6:14-16; 1. Пет. 4:3, 4).

17-18. Која важно поука шај те сикљова тари 3. Мојсеева 19:23-25?

¹⁷ О лафија: „Ме сиум о Јехова, тумаро Девел“ ваљани сине те сетинкерен е Израелцон кај ваљани сине те чхивен пумаро амалипе е Јеховаја ко прво тхан ко живото. Ки 3. Мојсеева 19:23-25 дознајнаја јекх начин сар ваљани сине те керен адава. (Читин.) Размислин башо адава со значинена сине акала лафија е Израелцонге откеда кхувѓе ки Ветими пхув. Ако јекх мануш садинела сине каш, тегани ов на смејнела сине трин берш те хал о плоди таро адава  каш. А ко штарто берш, о плодија таро адава каш ваљани сине те дел лен ко е Јеховаскоро светилиште. Чак ко панџто берш шај сине те хал таро лескере плодија. Акава закони ваљани сине те поможинел е Израелцонге те хаљовен кај на ваљани те чхивен пумаре потребе ко прво тхан. Ваљани сине те овел лен доверба кај о Јехова ка грижинел пе ленге хем ваљани сине те чхивен о обожавибе ко прво тхан. О Јехова ка обезбединел сине ленге доволно хајбаске. Исто аѓаар, о Девел поттикнинѓа лен те ден прилогија ко светилиште — тхан коте со обожавинела пе сине е Девле.

¹⁸ О закони кова сој спомнимо ки 3. Мојсеева 19:23-25 сетинкерела амен ко е Исусескере лафија кола со спомнинѓа лен ки Проповед ки Гора. Ов вакерѓа: „Ма секиринен тумен со ка хан или со ка пиен“. О Исус исто аѓаар вакерѓа: „Тумаро Дад сој ко небо џанела кај ваљани туменге са акала буќа“. О Девел ка грижинел пе аменге исто сар со грижинела пе е чирикленге (Мат. 6:25, 26, 32). Иси амен доверба ко адава. Хем бизо те истакнина англо јавера поможинаја околенге со иси лен пхарипа. Исто аѓаар, сием бахтале со шај те да прилог башо е дворанакере трошакија. О Јехова дикхела кеда сием дарежлива хем ка наградинел амен башо адава (Мат. 6:2-4). Кеда сием дарежлива, сикаваја кај халилем и поука тари 3. Мојсеева 19:23-25.

19. Со сиклиљан таро стихија со аракхљона ки 3. Мојсеева?

¹⁹ Амен дикхлем само несаве делија тари 3. Мојсеева 19 поглавје хем адава поможинѓа аменге те хаљова сар шај те ова света сар амаро Девел. Амен сикаваја кај трудинаја амен „те ова света ко са со кераја“, аѓаар со џаја пало лескоро пример (1. Пет. 1:15). Бут џене кола со на служинена е Јеховаске приметинена адава шукар понашибе ко е Девлескоро народо. Уствари адава поттикнинѓа несавен те славинен е Јехова (1. Пет. 2:12). Ама иси панда бут буќа со шај те сикљова тари 3. Мојсеева 19 поглавје. Ки следно статија ка кера лафи башо јавера стихија таро исто поглавје кола со ка поможинен аменге те хаљова ко кола јавера начинија шај „те ова света“ сар со поттикнинѓа амен о Петар.