DJAMBA DJƐ WEKELO 48
‘Nyo ladjɛ ndjala ekina’
‘Nyoyale ekina lá nanghedji djɛnyo nkfumɔ.’—1 PƐ. 1:15.
YEEMBO 34 Tɔkɛndɛ lá nanghedji djɛso dj’ipa l’ɛkɔmɔ (lá Otetela)
LÁ YOPASƐ *
1. Dako djɛkɔnge ɔpɔstɔlɔ Pɛtɛlɔ ndapɛyɛ winande andjawodji, ko lamo dako djɛnde djɛsɔ ɛnamawɔ etengo mpakoke nanghema?
KAANGA ntsha nkongi djɛso oyɛwɔnde djɛ ntowika l’olongo kana lá looko, iso nkoka mba wapɔ má dako djɛ ɔpɔstɔlɔ Pɛtɛlɔ ndapɛyɛ Akristo w’ankfutami wa l’ɛtɛndɔ kɛ ntondo. Pɛtɛlɔ afunaka ante: ‘Etengo Kanga ekina lonyetisa, nyoyale ekina lá nanghedji djɛnyo nkfumɔ, ladjikɛnde afunamaka ante: ‘Nyo ladjɛ ndjala ekina, ladjikɛnde lemi ndekɔ ekina.’’ (1 Pɛ. 1:15, 16) Etepela wɛsɔ ntɛnyɛka djɛ iso nkoka ndjokola Yehova, kanga lolekɔ ndjɔmbɔmba keleka wɔlɔ kelendana la ndjala ekina. Iso nkoka ndjala ekina, edjinge iso ladjɛ ndjala ekina lá nanghedji djɛso. Nkambo djɛsɔ nkoka nyɛnama etengo mpakoke nanghema le anto wa ntshamba djɛ djɔ. Pɛtɛlɔ nyɔmɛlɛ ananghaka evunga efula, koko, ndjɔmbɔmba kɛnde ntɛnyɛka djɛ iso nkoka ‘ndjala ekina.’
2. Weepó wɛkɔnge w’ɔkɔpaso nshishima lá djamba djɛnɛ?
2 Lá djamba djɛnɛ, tongoshishima weepó wɛ wɔlama wɛnɛ: Ndjala ekina osakisolawɔ nge? Bible otolakanyɛnde nge lá kɛnɛ kelendana la ekina kɛ Yehova? Wopo wɔkɔnge w’okokaso ndjala ekina lá nanghedji djɛso? Edjinge djokanelo djɛkɔnge djelekɔ l’antenyɛ ndjala ekina la djokanelo djɛso la Yehova?
NDJALA EKINA OSAKISOLAWƆ NGE?
3. Ikanyi yɛkɔnge yelekɔ l’anto efula lá nkambo djɛ onto wolekɔ ekina, ko okokaso ndjisola nsɔsɔlɔ kɛ nkambo djɛsɔ lampe?
3 Anto efula nkanelaka ambɔ onto wolekɔ ekina apayalaka ɛnkɛkɛtɔla, alekɔ onto wɔlɔtaka ntshendja dj’ewandji wɛ ntolo, la wɔ vu efula. Koko onto wolekɔ ekina apayalaka nghɔsɔ. Bible ndjetaka Yehova kanga lolekɔ ekina ante ‘Ndjambe k’osasa.’ (1 Ti. 1:11) Wanɛ wɔtɛmɔla ndjetamaka ambɔ ‘anto w’osasa.’ (Yee. 144:15) Yeso atonaka wanɛ walɔtaki ntshendja djetshikitanyi edjinge wanɛ wananghaki akambo wa wɔlɔ ngo djɛ anto ndaawɛna. (Mat. 6:1; Mar. 12:38) Etengo Akristo, iso ndjewaka kɛnɛ kesakisola ndjala ekina má kɛnɛ k’ekaso má Bible. Iso ndashikikɛka ente Ndjambe kɛso k’ekina la kɛ ngandji apakoke kaanga ndambo daambi ntilela ɔlɛmbɛ wewande ante topangoyala l’akoka wa nɛmɛyɛ. Djɛkondeke winá wɔ Yehova otoshimelande ante: ‘Nyo ladjɛ ndjala ekina,’ topile kaanga ndambo k’ehamo ente nkambo djɛsɔ nkoka nanghema. Koko, dj’iso ndoyala ekina lá nanghedji djɛso, iso ladjɛ nsipisoyɛ ntondo kɛnɛ kesakisola ndjala ekina.
4. Totepela ‘ekina’ la ‘ndjala ekina’ osakisolawɔ nge?
4 Ndjala ekina osakisolawɔ nge? Lá Bible, totepela ‘ekina’ la ‘ndjala ekina’ ndendamaka ntondontondo la piyɔɔ kelá nanghedji la kelá ɔtɛmwɛlɔ. Totepela tɔsɔ nkoka nsakisola lonkina, ndjɛhama djɛ nkambela Ndjambe. Lá etepela enkina, tɔngɛnyɛ ente tolekɔ ekina ngo ntsha tolekɔ la nanghedji djɛ piyɔɔ, ntsha tɔtɛmɔla Yehova lá yopo yawolande, la ntsha tolekɔ la djokanelo djɛ wɔlɔ lande. Iso nkamɔka efula má ndjewa ente kaanga oyɛso anto wa ntshamba djɛ djɔ ko Yehova alekɔ ekina, nde nkɔpaka dj’iso ndjala tolongo tɔnde tɔ ma ma, pekapeka winá woshishimaso kɛnɛ ketepela Bible, lá nkambo djɛ ekina kɛ Yehova.
‘EKINA, EKINA, EKINA NDE YEHOVA’
5. Kɛkɔnge k’okokaso ndjeka me andjelo wa nkɔmano lá nkambo djɛ Yehova?
5 Yehova alekɔ piyɔɔ l’akambo ankfumɔ. Iso ndjewaka nkambo djɛsɔ má etepela wetepilisa asarafu, ntepela ente andjelo wemala entshupa la yɛɛkɔ yɛnde. Amɔtshi l’anteyi kɛwɔ mbeelaka ambɔ: ‘Ekina, ekina, ekina nde Yehova kanga lɔndjɛndjɛyi l’angala.’ (Iza. 6:3) Lá nsɔsɔlɔ, dj’iwɔ ndjala la djokanela djɛ ma ma la Ndjambe kɛwɔ k’ekina, andjelo yɔmɛlɛ ladjɛ ndjala ekina, ee nghɔsɔ ndeke oyɛwɔ. Djɛkondeke, edjena kenkfumɔ k’emala ondjelo wɔ Yehova lá looko winá w’otshɔnde ntotshika losango, nkomaka ekina. Kɛsɔ ndeke loyalisa winá wɔ Mɔsɛ ndayale lá ntondo kɛ itshitshiko yɛpɛtaki iyɛ.—Epo. 3:2-5; Yos. 5:15.
Etepela w’ente: “Yehova alekɔ kanga ekina” wefunamaka lá lonkaka lɔ mpaonyi l’iyasɔmɛka l’esendja kɛ nkfundji k’ekekete ndilaka l’ɔtɛ (Lenda itenyi 6-7)
6-7. a) Lá nkilika Eposelo 15:1, 11, wopo wɔkɔnge Mɔsɛ ndapike nghɔmɔ ɛsɔsɔ lá ekina kelekɔ la Ndjambe? b) Kɛkɔnge kevungolaki ase Isariyɛlɛ djɛ Ndjambe alekɔ ekina? (Lenda ntshango djɛ loposo.)
6 M’ɔkɔngɔ wɔ Mɔsɛ ndɔndjɛ ase Isariyɛlɛ lá Ndjale kɛ nkolankola, nde áshikikɛka ante Ndjambe kɛwɔ Yehova, alekɔ ekina. (Wala Eposelo 15:1, 11.) Ase Edjipito watɛmɔlaki tondjandjambi t’engolo watayalaki ekina kaanga ndambo daambi. Nghɔsɔ ndeke iyayalaka kaanga te ase Kanana, wanɛ watɛmɔlaki tondjandjambi t’engolo. Iwɔ walambolaki wana l’ɔtɛmwɛlɔ wɔwɔ la wananghaki wayi wa mbindo wa ntshɛngi. (Lew. 18:3, 4, 21-24; Mvu. 18:9, 10) Koko, Yehova ntshikitana la tondjandjambi t’engolo tɔsɔ, nde apalɔmbɛ enkambi wande dj’iwɔ nangha akambo wa wɛnyɛnyɛ wasɔ kaanga ndambo daambi. Nde alekɔ ekina l’akambo ankfumɔ. Kɛsɔ kɛnamaki papoo má efunelo w’iyafunaka lá lonkaka lɔ mpaonyi l’iyasɔmɛka l’esendja kɛ nkfudji k’ekekete ndadjingaka l’ɔtɛ. Efunelo wɛkɔnde: ‘Yehova alekɔ kanga ekina.’—Epo. 28:36-38.
7 Efunelo weyalaki lá lokaka lɔsɔ washikikɛki onto onkfumɔ wɛnaki lokaka lɔsɔ ante Yehova alekɔ nsɔsɔlɔ ekina. Iya otepelaso nge lá nkambo djɛ ose Isariyɛlɛ wotakokaki nyɛna lokaka lɔsɔ mande nde atakokaki nsukama nkfudji k’ekekete? Lasɔ nde atewaki losango lɔ djonyi lɔsɔ? Lako! Ose Isariyɛlɛ onkfumɔ okaki losango lɔ djonyi lɔsɔ winá w’iyawalaka Ɛlɛmbɛ lá ntondo kɛ ampame, amato, la dɛngɛ. (Mvu. 31:9-12) Otayalɛ l’eteyi, otakoka ndjoka etepela wɛnɛ: ‘Lemi ndeke Yehova Ndjambe kɛnyo. Nyo ladjɛ ndjala . . . ekina ladjikɛnde lemi ndekɔ ekina.’ ‘Nyo ladjɛ ndjala ekina le lemi, ladjikɛnde lemi Yehova ndekɔ ekina.’—Lew. 11:44, 45; 20:7, 26.
8. Olakanyelo wɔkɔnge w’owaso má Ase lewi 19:2 edjinge 1 Pɛtɛlɔ 1:14-16?
8 Nyontshɔ tokoshishima etepela welekɔ lá Ase lewi 19:2 w’iyawalaka lá ntondo k’anto ankfumɔ. Yehova ashimelaka Mɔsɛ ante: ‘Sawola nya owila onkfumɔ w’Isariyɛlɛ ndeke shimelawɔ ente: ‘Nyo ladjɛ ndjala ekina, ladjikɛnde lemi Yehova Ndjambe kɛnyo, ndekɔ ekina.’’ Mbala imɔtshi etepela wɛsɔ ndeke Pɛtɛlɔ ndawale winá wɔ ndakembɛka Akristo ante ‘nyoyale ekina.’ (Wala 1 Pɛtɛlɔ 1:14-16.) Lá nsɔsɔlɔ, topalekɔ lonkina l’anse k’Ɛlɛmbɛ wɛ Mɔsɛ. Koko, kɛnɛ kɛ Pɛtɛlɔ ndafune nshikikɛka olakanyelo w’owaso má Ase lewi 19:2, olakanyelo wɔkɔnde, Yehova alekɔ ekina edjinge iso wanɛ w’ɔkɔpa ladjɛ nangha la wolo djɛ ndjala ekina. Nkambo djɛsɔ ndekɔ nsɔsɔlɔ ayale kaanga tolekɔ la nkongi djɛ ntowika l’olongo kana lá paradiso kelá looko.—1 Pɛ. 1:4; 2 Pɛ. 3:13.
‘NYOYALE EKINA . . . LÁ NANGHEDJI DJƐNYO NKFUMƆ’
9. Wapɔ wɔkɔnge songowa má nshishima Ase lewi shapitrɛ 19?
9 Ladjikɛnde iso nkɔpaka nsasangɛ Ndjambe kɛso k’ekina, iso ndjalaka entshupa djɛ ndjeka wopo w’okokaso ndjala ekina. Yehova apɛyɛka alako amɔtshi wa kɔɔ lá wopo w’okokaso nangha nkambo djɛsɔ. Iso ntanaka alako wasɔ lá Ase lewi shapitrɛ 19. Marcus Kalisch ondjewi ɔmɔtshi wɔ wayi w’ase Hebero afunaka ante: “Mbala imɔtshi, shapitrɛ kɛsɔ ndeke loleka ndjokama papoo, ndeke lolekɔ l’akambo efula watshikitanyi edjinge ndeke loleka djonyi l’onkanda wɔ Ase lewi la l’enkanda etano wɛ ntondo welá Bible.” Tovungɔ ente Ase lewi shapitrɛ 19 mbangaka l’etepela wɛnɛ: ‘Nyo ladjɛ ndjala ekina.’ Winá wɔsɔ nyontshɔ toshishimake avɛrse amɔtshi w’imá shapitrɛ kɛsɔ watolakanyɛ topo toshikitanyi tokokaso ndjala ekina lá lowiko lɔso lɔ lofu la lofu.
Ɔlɛmbɛ wolendana l’ambotshi wotanaso lá Ase lewi 19:3 ladjɛ ntshinda Akristo djɛ ntɔnɔla lá nkambo djɛkɔnge? (Lenda itenyi 10-12) *
10-11. Ase lewi 19:3, otoshimelawɔ djɛ nangha nge, ko lamo oyɛwɔ djonyi nɛmɛyɛ dako djɛsɔ?
10 M’ɔkɔngɔ wɔ nde ntepela ante ase Isariyɛlɛ ladjɛ ndjala ekina, Yehova akotshɛka ante: ‘Onto onkfumɔ l’anteyi kɛnyo ladjɛ nɛmɛyɛ nyɔ la ise kɛnde . . . lemi ndeke Yehova Ndjambe kɛnyo.’—Lew. 19:2, 3.
11 Ndjokamaka papoo ente, alekɔ djonyi iso nɛmɛyɛ dako djɛ Ndjambe djɛ mpɛyɛ ambotshi waso lomo. Kovungɔ winá wɔ mpame kɛmɔtshi ndopola Yeso ante: ‘Nkambo djɛkɔnge dj’oyɛmi ladjɛ nangha djɛ mba lowiko l’etshinda?’ Etenyi kɛmɔtshi kɛ nsakiso kɛ Yeso ndɔpɛyɛnde, lɛmɛyɛ nyɔ kɛko la ise kɛko. (Mat. 19:16-19) Yeso ahamɛka kaanga Afarisɛ la asaduka ladjikɛnde iwɔ watonaki mpɛyɛ ambotshi wawɔ lomo lɔsɔ. Má nangha nghɔsɔ, iwɔ ‘wɔnyɔlaka otepela wɔ Ndjambe.’ (Mat. 15:3-6) L’anteyi kɛ akambo w’otanaso ‘l’otepela wɔ Ndjambe,’ ndeke otanaso lonkina ɔlɛmbɛ w’atano wolekɔ l’anteyi k’Ɛlɛmbɛ djomi edjinge kɛnɛ k’owalaso lá Ase lewi 19:3. (Epo. 20:12) Tovungɔ lonkina ente dako djotanaso lá Ase lewi 19:3, djétépelá djɛ nɛmɛyɛ isɔ la nyɔ, mbɔlama etepela wɛnɛ: ‘Nyo ladjɛ ndjala ekina, ladjikɛnde lemi Yehova Ndjambe kɛnyo ndekɔ ekina.’
12. Lá nkilika dako djelekɔ lá Ase lewi 19:3, woopó wɔkɔnge w’okokaso ndawopola?
12 Winá w’ɔtɔnɔlaso lá dako djɛ Yehova djɛ nɛmɛyɛ ambotshi waso, iso nkoka ndawopola isɔmɛlɛ ente, ‘Lemi, langolɛmɛyɛke ambotshi wami?’ Ntsha okanela ente otanangha nkambo djɛsɔ l’etsho wemboheta, wɛ nkoka ndɔsa nkano djɛ ndɔngɔsɔla akambo winá wɔsɔ. Opakoke ntshikitanyɛ akambo wamboheta, koko má winá wɔsɔ, wɛ nkoka ndɔsa nkano djɛ nangha kenkfumɔ k’okokɛ nangha lá nkambo djɛ ambotshi wako. Mbala imɔtshi wɛ nkoka ndɔsa nonghanyi kɛ mpetshɛ winá efula esanga lawɔ. Kana wɛ nkoka ndaakotshɛ má ndaasombelaka nkete dj’oyɛwɔ la djonyi, ndaakotshɛ dj’iwɔ ndjala entshupa la Yehova, kana ndaakembɛka la ndaasukaka. Ntsha wɛ nangha nghɔsɔ, ɔngɛnyɛ ente wɛ nɛmɛyɛka dako djelá Ase lewi 19:3.
13. a) Dako nkina djɛkɔnge dj’otanaso lá Ase lewi 19:3? b) Etengo yombofunama lá Luka 4:16-18, wopo wɔkɔnge w’okokaso ndjokola ndjɔmbɔmba kɛ Yeso lɔɔko kɛnɛ?
13 Ase lewi 19:3 ntolakanyɛka nkambo nkina lá kɛnɛ kelendana la ndjala ekina. Nkambo djɛkɔnde nɛmɛyɛ Sabata. Akristo wapalekɔ lonkina l’anse k’Ɛlɛmbɛ, djɛkondeke topalekɔ la djonyi djɛ nɛmɛyɛ Sabata lobengo tshɛ. Koko, iso nkoka ndjeka akambo efula me ase Isariyɛlɛ lá wopo wɔ yalɛmɛyɛka Sabata la lá wopo w’iyawaka wapɔ má nangha nkambo djɛsɔ. Lofu lɔ Sabata ayalaki lofu lɔ mpomola m’elemo wɛ wolo welá demba ko ndjila yimba l’akambo welá nyuma. * Djɛkondeke, mfu yɛ Sabata inkfumɔ, Yeso atshɔki tá shinangɔnga kelá mbandja kɛwɔ la awalaki Otepela wɔ Ndjambe. (Epo. 31:12-15; wala Luka 4:16-18.) Ndjewo kɛ Ndjambe kelekɔ lá Ase lewi 19:3 ketepela ante ‘nyovungɔke sabata yɛmi,’ ladjɛ ntotshindaka djɛ ntshungolaka winá lá lowiko lɔso lɔ lofu la lofu djɛ ndapɛyɛ l’akambo welá nyuma. Ɛna ente alɔmbama wɛ nangha etshikitano ɛmɔtshi lá nkambo djɛsɔ? Ntsha mbala la mbala wɛ ntshungolaka winá djɛ ndapɛyɛ l’akambo welá nyuma, ongoyala la djokanelo djɛ ma ma nya Yehova, nkambo djelekɔ djonyi efula djɛ ndjala ekina.
KEMBƐ DJOKANELO DJƐKO NYA YEHOVA
14. Nsɔsɔlɔ kɛkɔnge kɛ djonyi k’ohetolawɔ lá Ase lewi shapitrɛ 19?
14 Ase lewi shapitrɛ 19 ahetola nsɔsɔlɔ kɛmɔtshi kɛ djonyi kekoka ntokotshɛ dj’iso ntshikala ekina. Vɛrse 4 nkomaka l’etepela wɛnɛ: ‘Lemi ndeke Yehova Ndjambe kɛko.’ Etepela wɛsɔ kana wɛfɛna la wɛsɔ ntanemaka mbala 16 lá shapitrɛ kɛkɔ. Kɛsɔ ntovungola ɔlɛmbɛ wɔ ntondo wɔnɛ: ‘Lemi ndeke Yehova Ndjambe kɛko . . . Toyalake la ndjambe inkina má djiko djɛmi.’ (Epo. 20:2, 3) Okristo onkfumɔ wɔkɔpa ndjala ekina ladjɛ ndashikikɛ dj’ipa kaanga ekete kana onto ndeka djokanelo djɛnde nya Ndjambe djonyi. Lonkina, ladjikɛnde tolekɔ Ewakɛ wɛ Yehova, tombɔsa nkano djɛ ndjewɔ nanghedji nkfumɔ djekoka ntshita kana ndjila djiina djɛnde dj’ekina mbindo.—Lew. 19:12; Iza. 57:15.
15. Avɛrse walendana la elambo wotanaso lá Ase lewi shapitrɛ 19 ladjɛ ntotshinda djɛ nanghaka nge?
15 Ase Isariyɛlɛ wɛnyɛki ambɔ Yehova alekɔ Ndjambe kɛwɔ, má nɛmɛyɛ ɛlɛmbɛ wɛnde. Ase lewi 18:4 ntepelaka ante: ‘Nyongokilikake akano wami, nyongolamake ɛlɛmbɛ wɛmi, la nyongaalɛmɛyɛke. Lemi ndeke Yehova Ndjambe kɛnyo.’ ‘Ɛlɛmbɛ’ ɛmɔtshi wɛ yilela ase Isariyɛlɛ ntamemaka lá shapitrɛ 19. Ndjɔmbɔmba, vɛrse 5-8, 21, 22 ntepelaka nkambo dj’elambo w’anyama. Ase Isariyɛlɛ wayalaki ladjɛ ndambola elambo wɛsɔ lá yopo yɛ yopakoke ‘ndjila nkete dj’ekina djɛ Yehova mbindo.’ Ntangaká avɛrse wasɔ ladjɛ ntotshinda djɛ nsasangɛ Yehova la ndoolambolaka elambo wɛ lomo wawolama, etengo Hebero 13:15 otokembɛwɔ djɛ nangha.
16. Kɛkɔnge kekoka ntovungola otshikitano wolekɔ l’antenyɛ wanɛ wakambela Ndjambe la wapokambela?
16 Djɛ ndjala ekina, iso ladjɛ ndjala entshupa djɛ nyɛnyɛ ente iso ntshikitana l’anto wapakambela Ndjambe. Nkambo djɛsɔ nkoka ndjala itondo y’okakasano. Lá mbamba imɔtshi, winaso welá nkalasa, wel’olemo, boto djɛso djepalekɔ Ewakɛ wɛ Yehova, la anto ankina nkoka ntotshinda dj’iso ndjingela lá akambo amɔtshi wapokana l’etolo kɛso. Winá w’onanghawɔ nghɔsɔ, tolekɔ la nkano djɛ djonyi djɛ ndɔsa. Kɛkɔnge kekoka ntokotshɛ djɛ ndɔsa nkano djɛ wɔlɔ? Kolenda ikfɔ imɔtshi yotanaso lá Ase lewi 19:19, yetepela ante: ‘Tɔlɔtake esendja kenanghemisa la wepo w’eshinga epe.’ Ɔlɛmbɛ wɔsɔ wakotshɛki ase Isariyɛlɛ djɛ ndatshikitanyɛ la ewila enkina wadjingaki. Lɔɔko kɛnɛ, topalekɔ l’anse k’ɛlɛmbɛ, laasɔ lako nyɛtshi Okristo ndɔta esandja kembonanghema la wepo w’eshinga epe, ndjɔmbɔmba kɔtɔ la pɔlɛstɛrɛ kana wɛsa wɛ nyama la nilɔ. Koko iso ntonaka djɛ ndjokola anto walekɔ la djalelo edjinge la nanghedji djepokana l’elakanyelo wemá Bible, kaanga ntsha anto waso oyɛwɔnde winaso welá nkalasa, wel’olemo, kana boto djɛso. Lá nsɔsɔlɔ, iso nkɔpaka boto djɛso, edjinge iso ndjokaka winaso anto ngandji. Koko, winá wɔlɔmbamaso djɛ ndɔsa akano wa djonyi lá lowiko, iso nɛmɛyɛka Yehova kaanga ntsha nkambo djɛsɔ ndjengototshikitanyɛ l’anto ankina. Nkambo djɛsɔ dekɔ djonyi efula ladjikɛnde, ntsha iso nkɔpaka ndjala ekina, iso ladjɛ ndakakitola l’anto ankina lá nkambo djɛ Ndjambe.—2 Kɔ. 6:14-16; 1 Pɛ. 4:3, 4.
Elakanyelo wɛkɔnge ase Isariyɛlɛ iyayale ladjɛ ndjeka má Ase lewi 19:23-25, ko elakanyelo wɛkɔnge w’owɛ má avɛrse wasɔ? (Lenda itenyi 17-18) *
17-18. Elakanyelo wɛkɔnge wɛ djonyi w’okokaso mba má Ase lewi 19:23-25?
17 Itepela y’ente ‘lemi ndekɔ Yehova Ndjambe kɛko’ yayalaki ladjɛ nkotshɛ ase Isariyɛlɛ djɛ ndjila ndjokanelo djɛwɔ la Yehova l’edjena kɛ ntondo. Lá wopo wɔkɔnge? Ase lewi 19:23-25 ntɛnyɛka yopo imɔtshi. (Wala.) Tokolenda kɛnɛ kɛ etepela wɛsɔ yakoke nsakisola winá wɔ ase Isariyɛlɛ y’ingela lá Nkɛtɛ yɛ daka. Ntsha onto ambokona otamba w’elowa, nde atakokaki ndɛ elowa wɛsɔ lá ntondo kɛ ɛnɔnyi esato mpeta. L’ɔnɔnyi w’anɛyi, elowa wɛsɔ wawombamaki ngo djɛ nkamba la wɛkɔ lá tɛmpɛlɔ kɛ Ndjambe. Ngo l’ɔnɔnyi w’atano, ndeke kanga elowa ndakokaka ndɛ elowa wɛnde. Ɔlɛmbɛ wɔsɔ wakotshɛki ase Isariyɛlɛ dj’iwɔ nsipisoyɛ ambɔ wapakoke mpetshɛ mposɛ yɛwɔ l’edjena kɛ ntondo. Iwɔ wayalaki ladjɛ ndjala la djawo te Yehova ambɔ nde angaaseyɛ ehomba wɛwɔ ntsha wambila ɔtɛmwɛlɔ wɔnde l’edjena kɛ ntondo. Nde ayashikikɛki ante iwɔ walekɔ la kɛnɛ k’okokawɔ ndɛ. Edjinge Ndjambe ákembɛki dj’iwɔ mpɛyɛ epapɛyɛ wɛ l’ɛkɔpa lá tɛmpɛlɔ, edjena k’iyɔtɛmɔlaka.
18 Ɔlɛmbɛ wotanaso lá Ase lewi 19:23-25 ntovungolaka etepela wɛ Yeso w’indatepela lá Djamba djɛnde dj’elonkókó. Nde atepelaka ante: ‘Nyotshike ndakiyanyɛ ente . . . isɔngɔlɛ nge, isɔngɔnɔ nge.’ Yeso akindjɛka ante: ‘Papa kɛnyo kel’ololngo ndjewaka ante nyolekɔ la djonyi djɛ nkete nkfumɔ djɛsɔ.’ Ndjambe angotɔpɛyɛ kɛnɛ k’oyɛso la djonyi ngo ngete onanghelande kaanga tofulu. (Mat. 6:25, 26, 32) Tolekɔ la djawo ente Yehova angotoseyɛ ehomba wɛso. Edjinge iso mpɛyɛka ‘epapɛyɛ wɛ nkɛtshi’ lá wisisa djɛ nkotshɛ wanɛ walekɔ lá djonyi. Lonkina iso ndjalaka entshupa djɛ nsokola kɛnɛ kelekɔ laso djɛ nsuka adepansɛ wanenghema l’otshumano. Yehova nyɛnaka winá w’osukaso etolo kɛnde la lokapo l’onkfumɔ edjinge nde angotofuta. (Mat. 6:2-4) Má ndjala la lokapo, iso nyɛnyɛka ente tosipisoyɛ elakanyelo welekɔ lá Ase lewi 19:23-25.
19. Wapɔ wɛkɔnge ngombowa má nshishima avɛrse amɔtshi welá Ase lewi?
19 Tomboshishima ngo avɛrse amangha toko má Ase lewi shapitrɛ 19, edjinge wambotɛnyɛ wopo w’okokaso ndjala ekina etengo Ndjambe oyɛnde ekina. Djɛ ndoowokola, iso ladjɛ nangha la wolo djɛ ‘ndjala ekina lá nanghedji djɛso nkfumɔ.’ (1 Pɛ. 1:15) Efula k’anto wapakambela Yehova nyɛnaka la wiso wawɔ nanghedji djɛ wɔlɔ djɛsɔ djɛ enkambi wɛ Ndjambe. Lá nsɔsɔlɔ, kɛsɔ ntshindaka amɔtshi l’anteyi kɛwɔ djɛ mpɛyɛ Yehova lomo. (1 Pɛ. 2:12) Koko elakanyelo enkina efula welekɔ w’okokaso mba má Ase lewi shapitrɛ 19. Lá djamba djeyaye tongoshishima avɛrse ankina welá shapitrɛ kɛsɔ wangotokotshɛ djɛ nsipisoyɛ topo tonkina telá lowiko lɔso tokokaso ‘ndjala ekina’ etengo Pɛtɛlɔ ndatokembɛ.
YEEMBO 80 ‘Lɛta ko ɔngɛna ente Yehova alekɔ wɔlɔ’ (lá Otetela)
^ par. 5 Iso nkɔpaka Yehova lombombe, la iso nkɔpaka ndosasangɛ. Yehova alekɔ ekina, edjinge nde nkɔpaka djɛ enkambi wɛnde ndjala ekina. Nkambo djɛsɔ nkoka nanghema nsɔsɔlɔ le anto wa ntshamba djɛ djɔ? Ee, nkoka. Oshishimelo wɔ la nkɔmɛ wɔ dako djɛ ɔpɔstɔlɔ Pɛtɛlɔ te winande andjawodji la wɔ ɛlɛmbɛ wɛ Yehova ndilela ase Isariyɛlɛ wa ntondo, angotokotshɛ djɛ ndjewa wopo w’okokaso ndjala ekina lá nanghedji djɛso nkfumɔ.
^ par. 13 Djɛ ndjewa akambo akina efula walendana la Sabata la elakanyelo enkina w’okokaso mba m’eteyi, lenda djamba djelekɔ l’ɔtɛ wɔ djoyi ante: “Olimu la diomuyelo ‘wekɔ la etena kawɔ’” lá Etange k’Olami, Ngɔndɔ kɛ ndjomi l’ape 2019.
