1. Mutumua Petro waabalandile Bakristu bakite ki, kabili juu ya ki kunti kyamoneka nangue tekikitika kukoonka ozo musoko?

 ANZIA kine kiswapilo kyetu ni kya kuya ku muulu ao ni kya kwikala pa kyalo, kunti twanoonkelamo kupitila kutoosia musoko wakue mutumua Petro waabapeele Bakristu babiikilue mafuta ba mu miaka mia ya ku ntendeko. Petro waaleembele eevi: “Nga Olia Mutakatiifu waamikuutile, ni mwemue aluke batakatiifu mwe beene mu lwendo lwenu loonse, paantu ileembelue eevi: ‘Mupalile kuya mwali batakatiifu, paantu neene ndi mutakatiifu.’” (1 Pet. 1:15, 16, NWT) Kupitila ezio milandu, twasambilila nangue kunti twamupala Yehova, mufuano uweeme saana wa butakatiifu. Kunti twaviinda kwaluka batakatiifu mu lwendo lwetu, kabili tupalile kwaluka evio. Kunti kyamoneka nangue tekikitika paantu te tupuililikile. Petro muine waakitile bilubo bingi, inzi mufuano wakue ulangiliile nangue kunti twaviinda ‘kwaluka batakatiifu.’

2. Tuli kulondoluela biipuzio ki mu leeli lyasi?

² Mu leeli lyasi, tuli kulondoluela biipuzio beebi: Butakatiifu ni kiki? Bibilia ili yatusambilizia ki palua butakatiifu bwakue Yehova? Kunti twaaluka siani batakatiifu mu lwendo lwetu? Kabili kuya twali batakatiifu kupateene siani ni bukibuza bwetu pamo ni Yehova?

3. Bantu bengi bali batontonkania nangue muntu mutakatiifu apalile kuya wali siani?

³ Bantu bengi bali batontonkania nangue muntu mutakatiifu, teezi kuseka-seka, kabili ali wavuala maubo a kidiini ni kuya wamonekele pa menso kuya wali muntu ali wamupupa Leeza. Inzi, bantu batakatiifu te beezi kusaangua evio. Yehova alondolwelue kuya wali “Leeza wansaansa.” (1 Tim. 1:11, NWT) Baalia bali bamupupa bali bakuutua nangue “bali ni nsaansa.” (Malum. 144:15) Kabili Yesu waabapontele baalia baali bavuala maubo  ebeleele, ni kwilangilila kuya bali ba kisinka ntaanzi ya bantu bange. (Mat. 6:1; Mark. 12:38) Bakristu ba kisinka bamanine mana ya butakatiifu kupitila beelia bili byalanda Bibilia palwakue Yehova. Twinikile kakiine nangue Leeza weetu mutakatiifu kabili wantono taviinda kutupeela malaizio atusiviinda kunakila. Pakaako, musita Yehova lwali watulanda nangue: “Mupalile kuya mwali batakatiifu” twinikile kakiine nangue keekio kunti kyakitika. Kakiine, ntaanzi ya kwaluka batakatiifu, tupalilenke kumana butakatiifu ni kiki.

4. Milandu “mutakatiifu” ni “butakatiifu” ili na mana ki?

⁴ Butakatiifu ni kiki? Mu Bibilia milandu “mutakatiifu” ni “butakatiifu” ilangiliile kusweta ao kusweta saana bila litaka kwa mibeele ni kwa kidiini. Kabili ezio milandu kunti yalangilila kuya wabiikilue pa mbali juu ya kumubombela Yehova. Mu milandu inge, kunti twamoneka kuya twali batakatiifu kine tuli ni lwendo luswetele, kine tuli twamupupa Yehova mu nzila yali waitabila kabili kine tuli ni bukibuza bwetu bunke kabili bwa peepi pamo nakue. Tuli twapapiiwa kumana nangue anzia kine te tupuililikile kabili Yehova ni mutakatiifu saana, inzi atonenesie kuya twali ni bukibuza bwa peepi pamo nakue.

5. Kunti twasambilila ki palwakue Yehova kupitila bamalaika ba kisinka?

⁵ Yehova aswetele mu nzila yonse. Tumanine evio paantu i vyaalandile bamaserafi, ao bamalaika bali peepi saana ni kitebe kya bukolo kyakue Yehova. Bamo pakati ka baabo bamalaika baapundile eevi: “Mutakatiifu, mutakatiifu, mutakatiifu ni Yehova wa bisepe.” (Is. 6:3) Kakiine pakunti bamalaika baye bali ni bukibuza pamo ni Leeza wabo mutakatiifu, bapalile kuya bali batakatiifu, kabili i vibali. Keekio, i kyaalengiizie mu fuasi mwali mwasaangua bamalaika eevi kupunda mpunda, mwaluke mutakatiifu. Keekio kyaakitikile musita Musa lwabanga wali peepi ni kimuti kiniini kya myunga.​—Kuf. 3:2-5; Yosh. 5:15.

6-7. (a) Nga vilandile Kufuma 15:1, 11, Musa waakonkomeene siani palua butakatiifu bwakue Yehova? (b) Ni kiki kyaali kyabalangulusia Baisraeli nangue Leeza ni mutakatiifu? (Mona foto ku ntendeko ya kazeeti.)

⁶ Kisia Musa kubatungulula Baisraeli baabuke pa Lyezi Lyakasi, waakonkomeene saana ku Baisraeli nangue Leeza wabo, Yehova, ni mutakatiifu. (Soma Kufuma 15:1, 11.) Baalia Bamisri babanga bapupa baleeza ba bufi, kakiine te babanga bali batakatiifu. Kabili ni baalia bantu ba mu Kanaani babanga bapupa baleeza ba bufi te babanga bali batakatiifu. Kabili, lupupo lwabo lwaali lwabiikile mukati kufumia ngeleelo ya baana ni kukita bintu bya bupungue. (Bal. 18:3, 4, 21-24; Mal Miz. 18:9, 10) Inzi, Yehova ebeleele ni babo baleeza ba bufi. Taviinda ata kaniini kubalanda bantu bakue bali bamupupa bakite kintu kyonse kifiitile. Yehova ni mutakatiifu mu nzila ipuililikile. Eevi Baisraeli baye balangulukile palua kaako, kubanga kwali kibandiko kya oro pa kilemba kyakue koani mukulu. Pa keekio kibandiko pabanga pali milandu yalandile eevi: “Butakatiifu ni bwakue Yehova.”​—Kuf. 28:36-38.

⁷ Milandu ibanga yali pa keekio kibandiko, ibanga yamulangilila buino kila muntu abanga waimona nangue Yehova ni mutakatiifu kakiine. Paange kwaali Mwisraeli unge asyaali na buviinde bwa kumona keekio kibandiko paantu taali waamupalama koani mukulu. Eba, i kulanda nangue waali wapitua ezio mpunda? Ata! Kila Mwisraeli waali waunvua ezio milandu, paantu Muzilo waali wasomua ntaanzi ya balalume, banakazi ni banike. (Mal Miz. 31:9-12) Ubengeko ni weewe, nga waaunvuile eezi milandu: ‘Neene ndi Yehova Leeza weenu, kabili mupalile . . . kuya mwali batakatiifu, paantu neene ndi mutakatiifu.’ “Mupalile kuya mwali batakatiifu kuli neene, paantu neene, Yehova ndi mutakatiifu.”​—Bal. 11:44, 45; 20:7, 26.

8. Twasambilila ki kupitila lileembo lya Balawi 19:2 ni 1 Petro 1:14-16?

 ⁸ Kansi tupooze maano ku milandu ili mu Balawi 19:2, yaasomeenue Baisraeli bonse. Yehova waamulandile eevi Musa: “Landa ku libumba lyonse lya Baisraeli, kabili babuile eevi, ‘Mupalile kuya mwali batakatiifu, paantu neene, Yehova Leeza weenu, ndi mutakatiifu.’” Kipalile Petro, waazimbuile milandu ili mu leelio lileembo musita lwaabasokele Bakristu nangue “aluke batakatiifu.” (Soma 1 Petro 1:14-16.) Kulanda kisinka, fwefue te tuli pensina pa Muzilo. Inzi, milandu yaaleembele Petro, yalangilila buino nangue bintu bitwasambilila mu Balawi 19:2, bilangiliile nangue Yehova ni mutakatiifu, kabili ni baalia bamutonene bapalile kwikwinda kuya bali batakatiifu. Tupalile kukita evio anzia kine tuli ni kiswapilo kya kuya ku muulu ao kya kwikala pa kyalo.​—1 Pet. 1:4; 2 Pet. 3:13.

9. Tuli kunoonkelamo siani kupitila kutoosia lileembo lya Balawi katue ka 19?

⁹ Paantu tutonene kumusaansamusia Leeza weetu mutakatiifu, tutonene saana kusambilila vya kwaluka batakatiifu. Yehova atupeele musoko wa kutukwasia tumane vya kuviinda kukita evio. Ozo musoko kunti twaupata mu lileembo lya Balawi katue ka 19. Musomi umo Mwebrania ali wakuutua Marcus Kalisch, waaleembele eevi: “Kaako katue kunti kaya kakililepo kuya kali ka mana mu kitabu kya Balawi ni mu bitabu bisano bya kuanza bya Bibilia.” Languluka nangue lileembo lya Balawi litendekele na eezi milandu: “Mupalile kuya mwali batakatiifu.” Loonu, tulondoluele milongo paleepale kufuma mu kaako katue ili yatusambilizia nzila paleepale ya kulangilila nangue tuli batakatiifu mu buikazi bwetu bwa kila busiku.

10-11. Lileembo lya Balawi katue ka 19, lilandile nangue tupalile kukita ki, kabili juu ya ki kukita evio ni kwa mana?

¹⁰ Kisia kulanda nangue Baisraeli baali bapalile kuya bali batakatiifu, Yehova waaongeziizie eevi: “Kila muntu pakati keenu apalile kumukindika mama wakue ni baba wakue . . . Neene ndi Yehova Leeza weenu.”​—Bal. 19:2, 3.

¹¹ Ni kintu kya mana kunakila malaizio akue Leeza a kukindika baviazi betu. Languluka Yesu vyaalandile musita mwalalume umo lwaaipuziizie eevi: “Nkite ki kiweeme pakuti mbe [ngie nali] ni bukose bwa muyayaya?” Pakati ka byasuko bibaamupeele ozo mwalalume, pabanga paali  kimo kyalandile kukindika ba baba ni mama. (Mat. 19:16-19) Yesu waapontele Bamafarisayo pamo ni bakaleemba, paantu baali bakita maka abo onse eevi tekuti bemene baviazi babo. Lubaali bakita evio, ‘baali baafuupula mafunde akue Leeza.’ (Mat. 15:3-6) “Mafunde akue Leeza,” i kulanda mulandu wakue Leeza, aali abiikile mukati muzilo wa busano pa elia mizilo likumi nga vili milandu ili mu Balawi 19:3. (Kuf. 20:12) Kabili languluka nangue malaizio ali mu Balawi 19:3, alandile kukindika mama ni baba, azimbuilue kisia milandu ilandile nangue “mupalile kuya mwali batakatiifu, paantu neene, Yehova Leeza weenu, ndi mutakatiifu.”

12. Kukoonkana ni musoko uli mu Balawi 19:3, ni biipuzio ki bitupalile kwiipuzia?

¹² Palua kukoonka musoko wakue Yehova wa kukindika baviazi, kila umo kunti waiipuzia eevi: ‘Eba neene ndi nakindika baviazi bane?’ Kine wamona nangue mu musita wakipita weewe te wakiba wakindika baviazi, upalile kupingula kwaluluka kutendekela loonu. Teuviinda kwalulula musita wakipita, inzi kunti wakita maka kutendekela loonu, eevi kubamba kupisia musita waleepele pamo ni baviazi bobe ni kubakwasia saana. Paange kunti waipanga buino eevi uye wapisia musita wingi pamo naabo. Wamona siani kine watontonkania palua kukila kubakwasia kimubili, kimupasi ao kwemena vibali baiunvua? Kukita evio kupateene ni milandu ilandilue mu Balawi 19:3.

13. (a) Ni musoko ki unge uli mu Balawi 19:3? (b) Loonu kunti twapala siani mufuano wakue Yesu uli mu Luka 4:16-18?

¹³ Balawi 19:3 yatusambilizia kintu kinge kabili palua kwaluka batakatiifu. Yalanda palua kukoonka Sabata. Bakristu tebali pensina pa Muzilo, pakaako tetwizi kukoonka Sabata ya kila mulungu. Inzi, kunti twasambilila bintu bingi kupitila kutoosia Baisraeli vibaali bakoonka Sabata, ni vibaali banoonkelamo lubaali bakita evio. Sabata ibanga nsita ya kutuuzia kufuma mu miilo ibaali babomba, ni kupooza maano ku bintu bya kimupasi. * Keekio i kyaalengele Yesu aye ku sinagogi, mu muzi wakue waavyaliilueko, ni kusoma maleembo kufuma mu Mulandu Wakue Leeza. (Kuf. 31:12-15; soma Luka 4:16-18.) Malaizio akue Leeza ali mu Balawi 19:3 alandile nangue “koonke Sabata [yakue].” Azo malaizio apalile kutukinkizia kukombola nsita mu miilo ituli twabomba kila busiku ni kupooza maano etu ku bintu bya kimupasi. Weewe pa lobe umwene nangue upalile kukita maka saana eevi kukindika azo malaizio? Kine lyonse upaangile musita wa kupooza maano ku bintu bya kimupasi, wakaba kukila kwaluka ni bukibuza bwa peepi pamo ni Yehova. Kabili bukibuza bobo ni bwa mana eevi muntu aaluke mutakatiifu.

14. Ni kisinka ki kya mana kikonkomeenue mu lileembo lya Balawi katue ka 19?

¹⁴ Lileembo lya Balawi katue ka 19 libuelulukile kuzimbula kisinka kya mana kili kuviinda kutukwasia kusiala twali batakatiifu. Mulongo wa 4 upuililiile na eezi milandu: “Neene ndi Yehova Leeza weenu.” Ozo musemua ao milandu inge ipaleene ni ezio, ili yasaangua mara 16 mu kaaka kenka katue. Keekio, kyatulangulusia muzilo wa kuanza ulandile eevi: “Neene ndi Yehova Leeza weenu . . . Te mupalile kuya mwali na baleeza bange bonse kukila pali neene.” (Kuf. 20:2, 3) Kila Mukristu atonene kwaluka mutakatiifu, apalile kusininkizia nangue te kuli kantu ao muntu ata umo, amonekele kuya wali wa mana kuliko bukibuza bwakue pamo ni Yehova. Kabili paantu tuli Bakasininkizia Bakue Yehova, tupinguile kutiina kukita kintu kyonse kili kukoosia mukinzi wa liina lyakue litakatiifu ao kulifisia.​—Bal. 19:12; Is. 57:15.

15. Ati, milongo ili mu Balawi katue ka 19 ilandiile palua ngeleelo ipalile kutusonsezia kukita ki?

 ¹⁵ Baisraeli baali balangilila nangue baali bamwitabila Yehova kuya wali Leeza wabo, kupitila kukindika mizilo yakue. Balawi 18:4 ili yalanda eevi: “Mupalile kukoonka bupinguzi bwane bwa nsaambu, kabili mupalile kukindika mizilo yane ni kuikoonka. Neene ndi Yehova Leeza weenu.” Katue ka 19 kabiikile mukati seemu ya mu ezio “mizilo” yaapeelue Baisraeli. Kwa mufuano, mu mulongo wa 5-8, 21, 22 muzimbuilue ngeleelo ya nama. Baisraeli baali bapalile kufumia ngeleelo ezio, mu aali isiviinda ‘kufiisia kintu kitakatiifu kyakue Yehova.’ Kusoma ezio milongo, kupalile kutulengia tutone kumusaansamusia Yehova, ni kumupeela bulumba bupaleene ni ngeleelo iitabiilue nga vili vyatusoka Baebrania 13:15.

16. Ni lifunde ki lili mu Balawi katue ka 19 lili kuviinda kutulangulusia kupusana kuli pakati ka bantu bali bamubombela Leeza ni baalia basiizi kumubombela?

¹⁶ Eevi twaluke batakatiifu, kipalile bantu baye batumona twapuseene ni bantu basiizi kumubombela Leeza. Keekio, kunti kyaya kyakolele. Nsita inge banafunzi neetu, bantu batwabomba naabo miilo, bantu ba mu lupua basizumiine pamo ni bange, kunti batutinta eevi tukite bintu bili kulengia tekuti tumupupe Yehova mu nzila yatonene. Kine keekio kyakitika, tupalile kukwata bupinguzi bwa mana. Ni kiki kili kutukwasia kukwata bupinguzi buweeme? Mona lifunde lya mana lili mu Balawi 19:19, lilandile eevi mu kifupi: “Te upalile kuvuala ngubo itengeneziiziwe na misango ibili ya uzi yali mumo.” Ozo muzilo waali wabakwasia Baisraeli baye bapuseene ni bantu ba ntundu yaali yabazyungulukiile. Paantu loonu fwefue te tukili pensina pa muzilo, te kibiipile Mukristu kuvuala ngubo ikitilue na bintu bipusene-puseene, nga evelia bupamba, nilo ni bingeko. Inzi, te tupalile kuya twali nga bantu bazumiine bintu bya bufi kabili kuya bakita bintu bisipateene ni beelia bilandile Bibilia, anzia kine babo bantu ni banafunzi neetu, basulu neetu ao bantu ba mu lupua lwetu. Kulanda kisinka, tubatonene bantu ba mu lupua lwetu kabili tuli twabalangilila ntono bantu batwikeele naabo. Inzi, bupinguzi butuli twakita mu buikazi bwetu, buli bwalangilila nangue tuli twamukindika Yehova, anzia kine keekio kili kulengia tupusane ni bantu batwikeele naabo. Languluka nangue kuya wali mutakatiifu kubiikile mukati kubiikua pa mbali juu yakue Leeza. Keekio, ni kya mana saana kine tuli mukwikwinda kwaluka batakatiifu.​—2 Bakor. 6:14-16; 1 Pet. 4:3, 4.

17-18. Ni lisomo ki lya mana litwapata mu lileembo lya Balawi 19:23-25?

¹⁷ Bulanzi, “Neene ndi Yehova Leeza weenu” bwaali bwapalile kubakwasia Baisraeli babiike pa ntaanzi bukibuza bwabo pamo ni Yehova. Bwaali bwapalile kubakwasia siani? Balawi 19:23-25 ilangiliile nzila imo. (Soma.) Mona eezi milandu  viibanga yali ni mana ku Baisraeli, kisia kwingila mu Kyalo kya Bulayo. Muntu lwaali wabyala bimuti bya mazabo, waali wapalile kukita miaka itatu bila kulia mazabo a ku bebio bimuti. Mu muaka wa buna, mazabo aali abiikua pa mbali eevi abombiiwe patakatiifu pakue Leeza. Muine waali wabyala bebio bimuti, waali walia mazabo a ku bebio bimuti mu muaka wa busano. Ozo muzilo waali wapalile kubalangulusia Baisraeli nangue te baali bapalile kubiika pa ntaanzi bintu byabo bibaali bakabiile. Baali bapalile kumuswapila Yehova kuya wali Wakubakwasia, kabili baali bapalile kubiika lupupo lwakue pa ntaanzi mu buikazi bwabo. Yehova waali wakusininkizia ku Baisraeli nangue bali ni byakulia bitosiizie. Kabili, Yehova waabakinkiziizie baye batwala ngeleelo mukwitonena pa fuasi ibaali bamupupila, i kulanda patakatiifu.

¹⁸ Muzilo uli mu Balawi 19:23-25 watulangulusia milandu yakue Yesu yaalandile mu Nsimiko wali ku Lupili. Waalandile eevi: “Tekuba mwasambooka . . . nangue muli kulia ki, ao nangue muli kumina ki.” Yesu waatwaliliile eevi: “Sinue [Baba weenu] wa mwiulu amanine byonse bimupalile kuya mwali nabio.” Leeza wakaba kutupeela beelia bitukabiile nga evelia vyali wapeela tooni. (Mat. 6:25, 26, 32) Tuswapiile nangue Yehova wakaba kutwemena. Kabili tuli twabapeela “bupe bwa luse” baalia bakabiile bupe bobo. Kabili, tuli twasekelela kufumia bulongio kukoonkana ni buviinde bwetu eevi kukwasia ma depanse paleepale a mu kilonghaano. Yehova ali wamona musita utuli twakwasia lupupo lwakue mukwitonena. (Mat. 6:2-4) Musita utuli twalangilila mibeele ya kupeelana, tuli twalangilila nangue twinikile masomo ali mu lileembo lya Balawi 19:23-25.

19. Weewe pa lobe, wanoonkelamo siani kupitila kutoosia seemu ya lileembo lya Balawi?

¹⁹ Twatoosiasie milongo iniini ya mu kitabu kya Balawi katue ka 19, kabili twamona vya kumupala Leeza weetu mutakatiifu. Kine twamupala weene, keekio kili kulangilila nangue tuli mukwikwinda eevi ‘twaluke batakatiifu fwe beene mu lwendo lwetu loonse.’ (1 Pet. 1:15) Bantu bengi basiizi kumubombela Yehova, bali baimwena lwendo luweeme lwa bantu bakue Leeza. Kakiine, loolu lwendo luli lwalengia bange bamupeele Yehova bulumba. (1 Pet. 2:12) Inzi, kuli bintu bingi bya kusambilila mu lileembo lya Balawi katue ka 19. Lyasi likoonkelepo lyakaba kulondoluela milongo inge ya mu kaako katue, kabili yakaba kutukwasia kukeba fuasi inge ya buikazi bwetu mutupalile ‘kwaluka batakatiifu,’ nga vyaasokele Petro.