NKHANI YAKUSAMBIRA 48
“Muŵenge Ŵatuŵa”
“Muŵe ŵatuŵa mu makhaliro ghinu ghose.”—1 PET. 1:15.
SUMU 34 Kwenda mu Urunji
IVYO VILI MU NKHANI IYI *
1. Kasi ni ulongozgi wuli uwo mpositole Petrosi wakaphalira Ŵakhristu ŵanyake, ndipo chifukwa wuli ulongozgi uwu ungawoneka nga ngwakusuzga kuwulondezga?
KWALI chigomezgo chithu ntcha kuchanya panji pa charu chapasi, tose tingasanga chandulo na ulongozgi uwo mpositole Petrosi wakapeleka ku Ŵakhristu ŵakuphakazgika mu nyengo ya Ŵakhristu ŵakwambilira. Petrosi wakalemba kuti: “Mwakuyana na Mutuŵa uyo wakamuchemani, namwe muŵe ŵatuŵa mu makhaliro ghinu ghose. Pakuti kuli kulembeka kuti: ‘Muŵenge ŵatuŵa, chifukwa ine nili mutuŵa.’” (1 Pet. 1:15, 16) Ku mazgu agha, tikusambirako kuti tingamuyezga Yehova uyo ntchiyelezgero chiwemi chomene pa nkhani ya utuŵa. Nase tingaŵa ŵatuŵa, ndipo tikwenera kuŵa ŵatuŵa mu makhaliro ghithu ghose. Nyengo zinyake ivi vingawoneka nga vingachitika yayi chifukwa chakuti ndise ŵambura kufikapo. Nanga ni Petrosi nayo wakanangiskapo vinthu vinyake, kweni ivyo wakachita vikulongora kuti nase ‘tingaŵa ŵatuŵa.’
2. Kasi tidumbiskanenge mafumbo wuli mu nkhani iyi?
2 Mu nkhani iyi, tidumbiskanenge mafumbo ghakulondezgapo agha: Kasi kuŵa ŵatuŵa chikung’anamurachi? Kasi Baibolo likutisambizga vichi vyakukhwaskana na utuŵa wa Yehova? Kasi tingaŵa wuli ŵatuŵa mu makhaliro ghithu? Ndipo kasi pali kukolerana wuli pakati pa utuŵa na ubwezi withu na Yehova?
KASI KUŴA ŴATUŴA CHIKUNG’ANAMURACHI?
3. Kasi ŵanthu ŵanandi ŵakughanaghana kuti munthu mutuŵa wakuŵa wuli? Kweni kasi ni nkhu uko tingasanga fundo zaunenesko?
3 Ŵanthu ŵanandi ŵakughanaghana kuti munthu mutuŵa ni uyo wakutemwa yayi kumwemwetera, wakuvwara malaya gha chisopa nga ni minjilira, ndipo wakulongora bweka cha jino. Kweni umu ndimo ŵanthu ŵatuŵa ŵakuŵira yayi. Yehova, uyo ni mutuŵa, Baibolo likumulongosora kuti ni “Chiuta wakukondwa.” (1 Tim. 1:11) Ndipo awo ŵakumusopa nawo ŵakuchemeka kuti “ŵakukodwa.” (Sal. 144:15) Nakuti Yesu wakaŵasuska awo ŵakavwaranga malaya ghapadera nga ni minjilira na kuchita waka vinthu na chilato chakuti ŵanji ŵaŵawone. (Mat. 6:1; Mrk. 12:38) Pakuŵa Ŵakhristu ŵaunenesko, tikumanya ng’anamuro la utuŵa kwizira mu Baibolo. Tikumanya kuti Chiuta wakutitemwa chomene, ndipo pa chifukwa ichi wangatiphalira yayi kuchita vinthu ivyo tingatondeka kukwaniska. Ntheura para Yehova wakutiphalira kuti: “Muŵenge ŵatuŵa,” ndikuti ntchamachitiko kuŵa ŵatuŵa. Kweni pambere tindaŵe ŵatuŵa mu makhaliro ghithu ghose, tikwenera dankha kupulikiska ng’anamuro la kuŵa ŵatuŵa.
4. Kasi mazgu ghakuti mutuŵa na utuŵa ghakung’anamurachi?
4 Kasi kuŵa ŵatuŵa chikung’anamurachi? Mu Baibolo, mazgu ghakuti “mutuŵa” na “utuŵa” ghakuyowoya chomene za kuŵa na nkharo yiwemi na kuŵa ŵatuŵa mwauzimu. Mazgu agha ghangang’anamuraso kujipeleka kuti titeŵetere Chiuta. Mu mazgu ghanyake tingati, tingaŵa ŵatuŵa para tili na nkharo yiwemi, tikusopa Yehova mu nthowa iyo wakukhumba, kweniso para tili paubwezi wakukhora na iyo. Ntchakukhozga chomene kumanya kuti nangauli ise tili ŵambura kufikapo ndipo Yehova ni mutuŵa chomene, kweni wakukhumba kuti tiŵe nayo paubwezi wakukhora.
“MUTUŴA, MUTUŴA, MUTUŴA NI YEHOVA”
5. Kasi tingasambirako vichi vyakukhwaskana na Yehova ku ŵangelo ŵakugomezgeka?
5 Yehova ni mutuŵa pa chilichose. Tikumanya fundo iyi chifukwa cha ivyo ŵaserafi panji kuti ŵangelo awo ŵali pafupi na chitengo chake ŵakayowoya. Ŵanyake ŵa iwo ŵakachemerezganga kuti: “Mutuŵa, mutuŵa, mutuŵa ni Yehova wa mawumba.” (Yes. 6:3) Ŵangelo aŵa nawo ŵali paubwezi wakukhora na Yehova uyo ni mutuŵa, chifukwa chakuti mbatuŵa. Lekani malo agho ŵangelo ŵakapelekerapo uthenga wa Yehova pano pa charu chapasi ghakuyowoyeka kuti ni malo ghatuŵa. Ndivyo vikachitika apo Mozesi wakawona chivwati chaminga chakugolera moto.—Eks. 3:2-5; Josh. 5:15.
Mazgu ghakuti “Utuŵa ngwa Yehova” ghakaŵanga pa kanthu kakupapatara ka golide ndipo kakaŵanga pa nduŵira ya wasembe mukuru (Wonani ndime 6-7)
6-7. (a) Kuyana na Ekisodo 15:1, 11, kasi Mozesi wakalongosora wuli mwakupulikikwa makora ku Ŵaisrayeli kuti Chiuta ni mutuŵa? (b) Kasi ntchivichi chikakumbuskanga Ŵaisrayeli kuti Chiuta ni mutuŵa? (Wonani chithuzi cha pa chikopi.)
6 Mozesi wati wadangilira Ŵaisrayeli kwambuka pa nyanja yiswesi, wakaŵadidimizgira fundo yakuti Chiuta wawo, Yehova, ni mutuŵa. (Ŵazgani Ekisodo 15:1, 11.) Ŵaeguputo awo ŵakasopanga ŵachiuta ŵatesi, ntchakumanyikwirathu kuti ŵakaŵa ŵatuŵa yayi. Mwakuyana waka, Ŵakenani awo ŵakasopanga ŵachiuta ŵatesi nawo ŵakaŵa ŵatuŵa yayi. Kusopa kwawo kukasazgangapo kupeleka ŵana kuŵa sembe kweniso kugonana kwaunyankhasi. (Lev. 18:3, 4, 21-24; Doto. 18:9, 10) Kweni Yehova wakupambana na ŵachiuta ŵatesi aŵa. Wangaphalira yayi awo ŵakumusopa kuti ŵachitenge vinthu viheni pakumusopa. Iyo ni mutuŵa chomene. Kuti waŵakumbuskenge Ŵaisrayeli fundo iyi, pakapangika kanthu kakupapatara kagolide ako kakaŵanga pa nduŵira ya wasembe mukuru. Pa kanthu aka, pakalembeka mazgu ghakuti: “Utuŵa ngwa Yehova.”—Eks. 28:36-38.
7 Mazgu agho ghakaŵa pa kanthu kakupapatara aka ghakasimikizgiranga waliyose uyo wakughawona kuti Yehova ni mutuŵa nadi. Kweni wuli kwa Muisrayeli uyo wakatondekanga kukawona kanthu aka chifukwa chakuti wakaŵavya mwaŵi wakuluta pafupi na wasembe mukuru? Kasi ndikuti uthenga wakuzirwa uwu ukamujumphanga? Yayi. Muisrayeli waliyose wakaŵa kuti wawupulika kale uthenga uwu apo dango likaŵazgikanga panthazi pa ŵanalume, ŵanakazi, na ŵana. (Doto. 31:9-12) Namwe muŵenge kuti mukaŵapo mphanyi mukaghapulika mazgu agha ghakuti: “Pakuti ine ndine Yehova Chiuta winu . . . muŵenge ŵatuŵa chifukwa ine nili mutuŵa.” “Muŵenge ŵatuŵa kwa ine, chifukwa ine Yehova nili mutuŵa.”—Lev. 11:44, 45; 20:7, 26.
8. Kasi tikusambirapo vichi pa lemba la Levitiko 19:2 na 1 Petrosi 1:14-16?
8 Tiyeni sono tiwone chinthu chinyake icho Yehova wakayowoya kuti chikwenera kuŵazgika ku Ŵaisrayeli wose, icho tikuchisanga pa Levitiko 19:2. Yehova wakaphalira Mozesi kuti: “Yowoya na wumba wose wa Ŵaisrayeli, uŵaphalire kuti: ‘Muŵenge ŵatuŵa, chifukwa ine Yehova Chiuta winu nili mutuŵa.’” Petrosi wakwenera kuti wakakora mazgu agha apo wakachiskanga Ŵakhristu kuti ‘ŵaŵenge ŵatuŵa.’ (Ŵazgani 1 Petrosi 1:14-16.) Mbunenesko kuti mazuŵa ghano tili pasi pa Dango la Mozesi yayi. Kweni ivyo Petrosi wakalemba vikusimikizgira ivyo tikusambira pa Levitiko 19:2, kuti Yehova ni mutuŵa, ndipo awo ŵakumutemwa ŵakwenera kuyezgayezga kuti nawo ŵaŵenge ŵatuŵa. Fundo iyi yikugwira ntchito kwa tose kwali chigomezgo chithu ntcha kuchanya panji mu paradiso pa charu chapasi.—1 Pet. 1:4; 2 Pet. 3:13.
“MUŴE ŴATUŴA MU MAKHALIRO GHINU GHOSE”
9. Kasi lemba la Levitiko chaputara 19 litovwirenge wuli?
9 Chifukwa chakuti tikukhumba kukondweska Chiuta withu uyo ni mutuŵa, ndise ŵakukhumbisiska chomene kumanya umo tingaŵira ŵatuŵa. Yehova wakutipa ulongozgi wa umo tingaŵira ŵatuŵa. Malo ghawemi agho tingasanga ulongozgi uwu ni mu buku la Levitiko chaputara 19. Nkhwantha yinyake ya Chihebere, zina lake Marcus Kalisch yikalemba kuti: “Chaputara ichi ndicho panji chingaŵa chaputara chakuzirwa chomene mu buku la Levitiko kweniso pa mabuku 5 ghakwambilira gha Baibolo.” Kumbukani kuti chaputara 19 cha Levitiko chikwamba na mazgu ghakuti “Muŵenge ŵatuŵa.” Sono tiwonenge mavesi ghanyake mu chaputara ichi agho muli fundo ziwemi chomene izo zingatovwira pa umo tingaŵira ŵatuŵa pa umoyo withu wa zuŵa na zuŵa.
Kasi dango lakukhwaskana na ŵapapi ilo likusangika pa Levitiko 19:3 likwenera kuchiska Ŵakhristu kuti ŵaghanaghanirepo vichi? (Wonani ndime 10-12) *
10-11. Kasi lemba la Levitiko 19:3 likuti tikwenera kuchita vichi, ndipo chifukwa wuli kuchita nthena nkhwakuzirwa?
10 Yehova wati wayowoya kuti Ŵaisrayeli ŵakwenera kuŵa ŵatuŵa, wakasazgirapo kuti: “Waliyose wa imwe wachindikenge anyina na awiske . . . Ine ndine Yehova Chiuta winu.”—Lev. 19:2, 3.
11 Ntchakuzirwa chomene kupulikira ulongozgi wa Chiuta wakuti tipulikirenge ŵapapi ŵithu. Kumbukirani ivyo Yesu wakazgora munthu munyake wati wamufumba kuti: “Kasi nichite chinthu wuli chiwemi kuti nisange umoyo?” Mu zgoro lake Yesu wakayowoyamoso kuti munthu uyu wakeneranga kuchindika anyina na awiske. (Mat. 19:16-19) Nakuti Yesu wakaŵasuska ŵalembi na Ŵafarisi chifukwa chakuti ŵakasurangako fundo iyi yakuti ŵapwelelerenge ŵapapi ŵawo. Apa ndikuti ‘ŵakazgora mazgu gha Chiuta kuŵa ghambura ntchito.’ (Mat. 15:3-6) “Mazgu gha Chiuta” ghakasazgangapo dango la nambara 5 pa Malango 10 kweniso na ivyo tikuŵazga pa Levitiko 19:3. (Eks. 20:12) Kweniso kumbukani kuti ulongozgi uwo ukusangika pa Levitiko 19:3, wakuchindika mama na dada, ukulondezgana na mazgu ghakuti: “Muŵenge ŵatuŵa, chifukwa ine, Yehova Chiuta winu nili mutuŵa.”
12. Kuyana na ulongozgi uwo ukusangika pa Levitiko 19:3, kasi ni fumbo wuli ilo tingajifumba?
12 Para tikughanaghanira ulongozgi wa Yehova wakuti tichindikenge ŵapapi ŵithu, nyengo zinyake tingajifumba kuti, ‘Kasi nkhuŵachindika ŵapapi ŵane?’ Usange mukujipulika kuti mphanyi mukachita vinandi kumasinda kuti mulongore kuti mukuŵachindika, mungawona apo sono mukwenera kusintha. Vyakumasinda mungavisintha yayi, kweni mungachita vyose ivyo mungafiska pasono kuti muchezgenge na ŵapapi ŵinu kweniso kuŵawovwira. Mungamba kuŵawovwira chomene mwakuthupi, mwauzimu panjiso maghanoghano. Para muchitenge nthena, mulongorenge kuti mukupulikira dango la pa Levitiko 19:3.
13. (a) Kasi ni dango wuli linyake ilo tikulisanga pa Levitiko 19:3? (b) Kuyana na Luka 4:16-18, kasi mazuŵa ghano tingamuyezga wuli Yesu?
13 Lemba la Levitiko 19:3 likutisambizga fundo yinyake pa nkhani ya kuŵa ŵatuŵa. Likuzunura za kusunga Sabata. Taŵakhristu tili pasi pa Dango yayi, ntheura tikusunga yayi Sabata. Kweni nipera tingasambirako vinandi ku Ŵaisrayeli pa nkhani ya kusunga Sabata kweniso uwemi uwo ukaŵangapo para ŵachita nthena. Sabata likaŵa zuŵa ilo ŵakapumuranga ku milimo yawo kuti ŵasope Chiuta. * Lekani pa Sabata, Yesu wakalutanga ku sunagoge mu tawuni yawo na kuŵazga Mazgu gha Chiuta. (Eks. 31:12-15; ŵazgani Luka 4:16-18.) Dango la Chiuta ilo lili kulembeka pa Levitiko 19:3 lakuti “musungenge masabata ghane” likwenera kutichiska ise kusanga nyengo zuŵa lililose kuti tisopenge Chiuta. Kasi imwe mukuwona kuti pali vinyake ivyo mukwenera kuchita kuti mupulikirenge dango ili? Usange nyengo zose mukupatura nyengo kuti musope Yehova, muŵenge paubwezi wakukhora na iyo, icho ntchinthu chakuzirwa icho chingamovwirani kuti muŵe ŵatuŵa.
KHOZGANI UBWEZI WINU NA YEHOVA
14. Kasi ni unenesko wuli wakuzirwa uwo ukuzunulika mwakuwerezgawerezga mu Levitiko chaputara 19?
14 Lemba la Levitiko chaputara 19 likuzunura mwakuwerezgawerezga unenesko wakuzirwa chomene uwo ungatovwira kuti tilutilire kuŵa ŵatuŵa. Vesi 4 likumalizga na mazgu ghakuti: “Ine ndine Yehova Chiuta winu.” Mazgu agha panji ghakuyanako nagho, ghakusangika mu malo 16 mu chaputara ichi. Ivi vikutikumbuska dango lakwamba lakuti: “Ine ndine Yehova Chiuta wako, . . . Ungaŵanga na ŵachiuta ŵanyake chara padera pa ine.” (Eks. 20:2, 3) Mkhristu waliyose uyo wakukhumba kuŵa mutuŵa wakwenera kuwoneseska kuti wangaŵikanga munthu panji chinthu chinyake kuŵa chakuzirwa chomene kuluska ubwezi wake na Chiuta yayi. Ndipo chifukwa chakuti ndise Ŵakaboni ŵa Yehova, tikuyezeska kugega kuchita chilichose icho chingabinkhiska zina lake lituŵa.—Lev. 19:12; Yes. 57:15.
15. Kasi mavesi ghanyake gha mu Levitiko chaputara 19 ghakukhwaskana na sembe, ghakwenera kutichiska kuchita vichi?
15 Ŵaisrayeli ŵakalongoranga kuti ŵazomera Yehova kuŵa Chiuta wawo para ŵakupulikira malango ghake. Lemba la Levitiko 18:4 likuti: “Mulondezge vyeruzgo vyane, musunge malango ghane na kwenda mwenemumo. Ine ndine Yehova Chiuta winu.” Chaputara 19 chikuzunurapo “malango” gha Yehova ku Ŵaisrayeli. Mwachiyelezgero, mavesi 5-8, 21, 22 ghakuzunura za sembe za viŵeto. Ŵaisrayeli ŵakeneranga kupeleka sembe izi munthowa yakuti zileke kuyuyura vinthu vyakupatulika vya Yehova. Mavesi agha ghakwenera kutichiska kuŵa na khumbo la kukondweska Yehova na kumupa sembe za malumbo izo wangakondwa nazo, nga umo lemba la Ŵahebere 13:15 likuyowoyera.
16. Kasi ni fundo wuli mu Levitiko chaputara 19 iyo yingatikumbuska kuti pakwenera kuŵa mphambano pakati pa ŵanthu awo ŵakusopa Chiuta na awo ŵakumusopa yayi?
16 Kuti tiŵe ŵatuŵa, tikwenera kuŵa ŵakukhumbisiska kuchita vinthu mwakupambanako na ŵanthu ŵambura kusopa Chiuta. Kweni kuchita nthena nyengo zinyake kungaŵa kwakusuzga. Nyengo zinyake awo tikusambira nawo sukulu, awo tikuchita nawo bizinesi, ŵabali ŵithu awo Mbakaboni yayi na ŵanyake, ŵangatichichizga kuti tichitengeko vinthu vinyake ivyo vingatitondeska kusopa Yehova umo iyo wakukhumbira. Para ŵakutichichizga, tikwenera kusankha vinthu mwamahara. Kasi ntchivichi chingatovwira kuti tisankhe mwamahara? Wonani fundo yakukondweska iyo tikuyisanga pa Levitiko 19:19, iyo chigaŵa chinyake yikuti: ‘Ungavwaranga chakuvwara cha wuzi wakupambana chara.’ Dango ili likawovwiranga kuti paŵenge mphambano pakati pa Ŵaisrayeli na mitundu iyo yikaŵazingilizga. Mazuŵa ghano chifukwa chakuti tili pasi pa Dango yayi, nkhwananga yayi kuti Ŵakhristu ŵavwarenge malaya ghakupangika na vinthu vyakupambanapambana kweniso ghakusoneka na wuzi wakupambana. Kweni tikukana kuŵa nga mbanthu awo vigomezgo vyawo vikukolerana yayi na ivyo Baibolo likusambizga, nanga ŵanthu aŵa ŵangaŵa awo tikusambira nawo sukulu, tikuchita nawo bizinesi panji ŵabali ŵithu. Mbunenesko kuti mwakawiro tikuŵatemwa ŵachibali ŵithu, ndiposo tikulongora chitemwa ku ŵanji. Kweni ivyo tikusankha pa umoyo withu vikulongora usange tikupulikira Yehova, nanga ivi vingapangiska kuti tiŵe ŵakupambana pakachitiro ka vinthu na ŵanthu awo tikukhala nawo. Tikwenera kukumbuka kuti kujipatura na chilato chakuti titeŵetere Yehova, ntchigaŵa cha kuŵa ŵatuŵa. Ndipo ichi ntchakuzirwa chomene para tikukhumba kuŵa ŵatuŵa.—2 Kor. 6:14-16; 1 Pet. 4:3, 4.
Kasi Ŵaisrayeli ŵakwenera kuti ŵakasambirapo fundo wuli pa Levitiko 19:23-25, ndipo ise tikusambirapo vichi pa mavesi agha? (Wonani ndime 17-18) *
17-18. Kasi ni sambiro wuli lakuzirwa ilo tikulisanga pa Levitiko 19:23-25?
17 Mazgu ghakuti “Ine ndine Yehova Chiuta winu” ghakaŵakumbuskanga Ŵaisrayeli kuti ŵakeneranga kuwona ubwezi wawo na Yehova kuŵa chinthu chakuzirwa chomene pa umoyo wawo. Kasi ŵakeneranga kuchita wuli nthena? Lemba la Levitiko 19:23-25 likuyowoya chimoza icho ŵakeneranga kuchita. (Ŵazgani.) Ghanaghanirani waka ivyo mazgu agha ghakang’anamuranga ku Ŵaisrayeli ŵati ŵanjira mu Charu cha Layizgano. Para munthu wapanda khuni lililose la kurya, wakeneranga yayi kurya vipambi vya khuni ili kwa vyaka vitatu. Mu chaka cha nambara 4, vipambi vyake wakeneranga kuvipatura kuti ŵakavigwiliskire ntchito mu malo ghakupatulika gha Chiuta. Ndipo mu chaka cha nambara 5 ndipo mweneko wakeneranga kurya vipambi vyake. Dango ili likwenera kuti likawovwiranga Ŵaisrayeli kumanya kuti ŵakeneranga kudangizga vyakukhumba vyawo yayi. M’malo mwake, ŵakeneranga kugomezga Yehova na kukhozgera kusopa kwake. Kweniso ŵakeneranga kugomezga kuti wawoneseskenge kuti ŵali na chakurya chakukwana. Ndipo Chiuta wakaŵachiskanga kuti ŵapelekenge vyawanangwa ku malo ghakusoperako.
18 Dango ilo lili pa Levitiko 19:23-25 likutikumbuska mazgu gha Yesu pa Upharazgi wake wa pa Phiri. Iyo wakati: “Lekani kwenjerwa . . . kuti muryengechi panji mumwengechi.” Yesu wakalutizga kuti: “Awiskemwe ŵakuchanya ŵakumanya kuti mukusoŵerwa vinthu vyose ivi.” Chiuta watipenge ivyo tikusoŵerwa nga umo wakuchitira na viyuni. (Mat. 6:25, 26, 32) Tikugomezga kuti Yehova watipwelelerenge. Ndipo tikupeleka “vyawanangwa vyalusungu” kuti tovwire awo ŵakukhumbikwira wovwiri. Kweniso tikupeleka vyawanangwa vinthu mwakukondwa kuti viwovwirenge pa mpingo. Yehova wakuwona para tikupeleka mwakukhumba kwithu kuti tikhozgere kusopa kwake ndipo wazamutitumbika. (Mat. 6:2-4) Para tikupeleka, tikulongora kuti tikupulikiska fundo izo tikusambira pa Levitiko 19:23-25.
19. Kasi imwe mwasanga chandulo wuli na fundo zinyake za mu Levitiko izo tadumbiskana?
19 Tadumbiskanapo fundo zichoko waka kufuma mu Levitiko chaputara 19, ndipo zatovwira kumanya umo tingayezgera Chiuta withu mutuŵa. Para tikumuyezga iyo, vikulongora kuti tikuyezeska kuti ‘tiŵe ŵatuŵa mu makhaliro ghithu ghose.’ (1 Pet. 1:15) Ŵanandi awo ŵakuteŵetera yayi Yehova mbakaboni pa fundo iyi ya makhaliro ghithu ghawemi. Ndipo ivi vyapangiska kuti ŵapeleke uchindami kwa Yehova. (1 Pet. 2:12) Kweni pali vinandi ivyo tingasambira mu Levitiko chaputara 19. Mu nkhani yakulondezgapo, tizamudumbiskana mavesi ghanyake mu chaputara ichi, ndipo ghazamutovwira kusanga nthowa zinyake za umo ‘tingaŵira ŵatuŵa,’ nga umo Petrosi wakachiskira.
SUMU 80 “Chetani Mwe, Muwone Kuti Yehova Ni Muwemi”
^ ndime 5 Tikumutemwa chomene Yehova, ndipo tikukhumba kumukondweska. Yehova ni mutuŵa, ndipo wakukhumba kuti awo ŵakumusopa nawo ŵaŵenge ŵatuŵa. Kasi ivi ni vyamachitiko ku ŵanthu ŵambura kufikapo? Enya ni vyamachitiko. Tingasambira kuŵa ŵatuŵa pa chilichose icho tikuchita para tingasambira ivyo mpositole Petrosi wakaphalira Ŵakhristu ŵanyake kweniso ivyo Yehova wakalangura mtundu wa Israyeli kuchita.
^ ndime 13 Usange mukukhumba kumanya vinandi pa nkhani ya Sabata kweniso ivyo tikusambirako wonani nkhani ya mutu wakuti “‘Pali Nyengo Yakutemeka’ Yakugwilira Ntchito na Yakupumura” mu Gongwe la Mulinda la Disembala 2019.
^ ndime 57 MAZGU GHAKULONGOSORA CHITHUZI: Wachinyamata wakuchezga na ŵapapi ŵake, wiza na muwoli na ŵana ŵake kuzakaŵawona, ndipo wakuyowoyeskana nawo nyengo zose.
^ ndime 59 MAZGU GHAKULONGOSORA CHITHUZI: Mulimi Wachiisrayeli wakulaŵiska vipambi ivyo khuni ilo wakapanda lapambika.
