1. Кыӵе визь-кенеш сётӥз Пётр христианъёслы но малы ми малпаны быгатомы, сое уже кутыны ум быгатэ шуыса?

 АСЛАЗ гожтэтаз апостол Пётр гожтӥз, христианъёслы Иеговалэсь адӟем кароно шуыса: «Тӥледыз ӧтем Дун-Сьӧлыктэмлэсь адӟем карыса, тӥ асьтэос но быдэс улон-вылонады дун-сьӧлыктэмесь луэлэ; Гожтэмын уго: „Дун-чылкытэсь луэлэ, Мон дун-чылкыт уго“» (1 Пётр 1:15, 16). Та кылъёсты Пётр зырӟем христианъёслы вераз ке но, соос пайда вайыны быгато музъем вылын улыны оскись адямиослы но. Кызьы адӟиське, Иегова тужгес но умой адӟем карон возьматэ, кызьы дун-сьӧлыктэм луоно. Озьыен, ми быгатӥськомы но, милемлы кулэ но котьку дун-сьӧлыктэмесь луыны. Кин ке но малпаны быгатоз, ми тырбыдэстэмесь бере, дун-сьӧлыктэмесь луыны ум быгатӥське шуыса. Пётр но янгышъёс лэсьтылӥз. Озьы ке но Иегова сое дун-сьӧлыктэм адямиен лыдъяз. Соин ик ми но дун-сьӧлыктэмесь луыны быгатӥськомы.

2. Кыӵе юанъёсты ми эскеромы та статьяын?

² Та статьяын ми эскеромы ньыль юанъёсты: 1) мар со сыӵе дун-сьӧлыктэм луон? 2) Мар Библиын вераське Иеговалэн дун-сьӧлыктэм луэмез сярысь? 3) Мар кароно, котьку но дун-сьӧлыктэм луон понна? 4) Малы дун-сьӧлыктэм луоно соослы, кинъёслэн Иеговаен матэгес луэмзы потэ?

3. Кызьы тросэз син азязы пукто дун-сьӧлыктэм адямиосты но мае лыдэ басьтоно валан понна, мар со сыӵе дун-сьӧлыктэм луон?

³ «Дун-сьӧлыктэм» кылэз кылыса, тросэз адямиос син азязы пукто адямиез, кудӥз ноку но паль уг поты но религиозной дӥськут нуллэ. Нош со шонер-а? Иегова дун-сьӧлыктэм. Библиын со сярысь вераське, со шудо Инмар шуыса (1 Тим. 1:11). Озьы ик отын гожтэмын: «Шудо калык, кудӥзлэн Инмарез Кузё-Инмар  луэ» (Пс. 143:15). Со сяна, Иисус Христос судъяз соосты, кинъёс нимысьтыз дӥськутъёсты нуллӥзы, адямиос шонерлыко ужъёссэс мед адӟозы шуыса (Матф. 6:1; Марк 12:38). Соин ик валан понна, мар со сыӵе дун-сьӧлыктэм луон, зэмос христианъёс лыдэ уг басьто адямиослэсь малпанъёссэс, нош сое, мар вераське Библиын. Ми оскиськомы, Инмар милемыз яратэ но лэсьтыны луонтэмзэ милесьтым уг куры шуыса. Иегова милесьтым куре: «Дун-сьӧлыктэмесь луэлэ». Соин ик ми быгатӥськомы сыӵеесь луыны. Нош котьку но дун-сьӧлыктэм луон понна, нырысь валаны кулэ, мар со сыӵе дун-сьӧлыктэм луон.

4. Мае возьмато «дун-сьӧлыктэм» но «дун-чылкыт» кылъёс?

⁴ Куке Библиын «дун-сьӧлыктэм» но «дун-чылкыт» кылъёс кутӥсько, ӵем дыръя соос возьмато вылӥ эсэпъёсъя улэмез, зэмос Инмарлы гинэ йыбыртъямез яке священной луэмез. Со сяна, та кылъёс возьмато, кин ке яке мар ке Инмарлы ужан-тыршон понна висъямын шуыса. Озьыен, вераны луоз, ми дун-сьӧлыктэмесь шуыса, куке вылӥ эсэпъёсъя улӥськомы, Иеговалы солэн курон-косонъёсызъя йыбыртъяськомы но милям соин матысь кусыпъёсмы вань. Малпалэ гинэ: ми быгатӥськомы дун-сьӧлыктэм Инмарлэн эшъёсыз луыны! Со тужгес но паймымон, лыдэ басьтоно ке сое, мар вераське Библиын Иеговалэн дун-сьӧлыктэм луэмез сярысь.

5. Мае ми тодӥськомы Иегова сярысь, Библиысь кылчинъёс сярысь лыдӟыкумы?

⁵ Иегова котьма ласянь дун-сьӧлыктэм но дун-чылкыт луэ. Тае возьмато серафимъёслэн кылъёссы: «Дун-Сьӧлыктэм, Дун-Сьӧлыктэм, Дун-Сьӧлыктэм Саваоф Кузё-Инмар!» (Ис. 6:3). Та кылчинъёс Иеговалэн престолэз вӧзын сыло. Валамон, дун-сьӧлыктэм Инмарен сокем матысь кусыпъёс мед луозы шуыса, соослы асьсэлы но дун-сьӧлыктэмесь луыны кулэ. Музъем вылысь инты, кытысен кылчинъёс Инмарлэсь иворзэ вераллязы, святой луыны быгатэ вал. Кылсярысь, озьы луиз, куке кылчин Моисеен «ӝуась тёрнпу куак пушкысен» вераськиз (Пот. 3:2—5; Иис. Н. 5:15).

6, 7. а) Кызьы Моисей возьматӥз, Иегова дун-сьӧлыктэм луэ шуыса? (Потон 15:1, 11). б) Мар тодаз вайытӥз израиль калык пӧлысь котькудӥзлы, Иегова дун-сьӧлыктэм шуыса? (Учке вылбамысь суредэз.)

⁶ Горд Кам зарезь пыр потэмзы бере Моисей израиль калыклэсь саклыксэ висъяз, Иегова Инмар дун-сьӧлыктэм шуыса. (Лыдӟе Потонэз 15:1, 11.) Адямиос, кудъёсыз Египетысь инмаръёслы йыбыртъязы, дун-сьӧлыктэмесь ӧй вал. Ханаан музъемысь инмаръёслы йыбыртъясьёс асьсэды озьы ик возизы. Инмаръёссылы йыбыртъян понна, соос нылпиоссэс курбонэ вайылӥзы но азон-калгонэн герӟаськем ужъёсын выризы (Лев. 18:3, 4, 21—24; К. Зак. 18:9, 10). Соослэн ужъёссы Иеговалы туж юрӟым вал. Солэн уг поты вал, ужась-тыршисьёсыз сыӵе ужъёсын мед вырозы шуыса. Иегова котьма ласянь дун-сьӧлыктэм луэ. Израиль калык та сярысь медаз вунэты шуыса, быдӟым священниклэн зарнилэсь лэсьтэм йыркерттэт пластинаез вылын гожтэмын вал: «Кузё-Инмарлэн Святыняез» (Пот. 28:36—38).

⁷ Та гожтэм котькинлы, кин сое адӟиз, тодаз вайытӥз, Иегова дун-сьӧлыктэм шуыса. Но израиль калык пӧлысь котькудӥз быдӟым священникез адӟыны ӧз быгаты. Возьматӥз-а со, соос Иеговалэн дун-сьӧлыктэм луэмез сярысь ӧз тодэ шуыса? Ӧз, ӧз возьматы. Вань пиосмуртъёс, кышномуртъёс но нылпиос та сярысь Моисейлэсь законзэ лыдӟыку кылӥзы (К. Зак. 31:9—12). Пуктэ син азяды: тӥ ваньмыныз ӵош сылӥськоды но таӵе кылъёсты кылӥськоды: «Мон — Кузё-Инмар, тӥляд Инмарды, дун-чылкытэсь луэ... уго Мон  дун-чылкыт». «Мон азьын дун-чылкытэсь луэ, уго Мон Кузё-Инмар дун-чылкыт» (Лев. 11:44, 45; 20:7, 26).

8. Маин тунсыко кылъёс, кудъёсыз гожтэмын Левитын 19:2 но 1 Пётрлэн 1:14—16?

⁸ Ойдолэ саклыкмес висъяломы курон-косонлы, кудӥз вань израиль калык азьын лыдӟемын вал. Со гожтэмын Левитын 19:2: «Дун-чылкытэсь луэлэ, уго Мон Кузё-Инмар, тӥляд Инмарды, дун-чылкыт». Пётр ӵапак та курон-косон сярысь вераз, вылды. (Лыдӟе 1 Пётрлэсь 1:14—16.) Христианъёс Моисейлэн законэзъя улыны кулэ ӧвӧл. Нош Пётр со сярысь вераз бере, со соосын но герӟаськемын. Иегова дун-сьӧлыктэм. Соин ик соослы но, кинъёс сое ярато, дун-сьӧлыктэм луыны тыршоно. Та герӟаськемын инмын но, рай музъем вылын но улыны оскись ужась-тыршисьёсыныз (1 Пётр 1:4; 2 Пётр 3:13).

9. Кыӵе пайда ми басьтомы, Левит книгаысь 19-тӥ люкетэз эскерыса?

⁹ Милям потэ дун-сьӧлыктэм Инмармылы ярамон луэммы. Соин ик милемлы тодыны кулэ, кызьы дун-сьӧлыктэмесь луоно. Иегова тае пыр-поч валэктэ. Троссэ тодыны луэ Левит книгаысь 19-тӥ люкетысь. Тани мар со сярысь гожтӥз Йозеф Герц раввин: «Та люкет [Левит] книгаын но Священной Гожтэмысь нырысетӥ вить книгаосын туж бадӟым инты басьтэ. Визьнодчиос та люкет сярысь веразы, со „законлэсь валтӥсь малпанзэ“ возьматэ но... [тросэз законъёс] та люкет вылэ пыкисько шуыса» b. Ойдолэ та люкетысь куд-ог кылбуръёсты эскеромы но валаны тыршомы, кызьы со милемлы котькуд нунал юрттыны быгатэ. Со дыре ик ум вунэтэ, законъёс, кудъёсыз та люкетын гожтэмын, «дун-сьӧлыктэмесь луэлэ» кылъёсын кутско шуыса.

10, 11. Мар милемлы кароно, Левитэз 19:3 лыдэ басьтыса, но малы со туж кулэ?

¹⁰ «Дун-чылкытэсь луэлэ» шуэмез бере Иегова израиль калыклы вераз: «Ваньды ас анайдылэсь, ас атайдылэсь кышкалэ... Мон Кузё-Инмар, тӥляд Инмарды» (Лев. 19:2, 3).

¹¹ Милемлы туж тыршоно быдэсъяны Инмарлэсь курон-косонзэ, анай-атайёсмес гажаны кулэ шуыса. Тӥ тодӥськоды на, дыр, кызьы огпол пияш Иисуслэсь юаз: «Быронтэм  улонэз басьтон понна мон мар умойзэ лэсьтыны кулэ?» Нош Иисус солы вераз, атайзэ но анайзэ гажаны кулэ шуыса (Матф. 19:16—19). Со сяна, Иисус судъяз фарисейёсты но книга тодӥсьёсты, соос анай-атайёссы сярысь ӧз сюлмаське шуыса. Озьы, Иисуслэн верамезъя, соос Инмарлэсь курон-косонзэ палэнтӥзы (Матф. 15:3—6). Нош та курон-косон пӧлы пыре Левитысь 19:3 закон но Дас курон-косонъёс пӧлысь витетӥез (Пот. 20:12). Ойдолэ ум вунэтэ: «Дун-чылкытэсь луэлэ, уго Мон Кузё-Инмар, тӥляд Инмарды, дун-чылкыт» кылъёс бере ик гожтэмын курон-косон, атаез но анаез гажаны кулэ шуыса.

12. Кызьы уже кутоно Левитысь 19:3 курон-косонэз?

¹² Аслэсьтыд юаны луоз: гажасько-а мон анай-атайме? Оло нош, тӥ валаськоды, куке но анай-атайдэс туж ик ӧд гажалэ шуыса. Ортчемзэ тупатыны уг луы ини. Но тӥ туннэ нуналысен ик быгатӥськоды ужпум пуктыны янгышъёсты вылын ужаны. Малпаське: быгатӥськоды-а тӥ анай-атаеныды тросгес дырдэс ортчытъяны? Кулэ-а соослы корка котыразы юрттыны? Быгатӥськоды-а тӥ соослы юрттыны Инмарен кусыпъёссэс юнматыны яке соосты буйгатыны? Таӵе эскерон юрттоз тӥледлы эшшо но умойгес уже кутыны Левитысь 19:3 Инмарлэсь курон-косонзэ.

13. а) Кыӵе эшшо курон-косон гожтэмын на Левитын 19:3? б) Мар кариз Иисус, Лукалэсь 4:16—18 лыдэ басьтыса, но кызьы ми солэсь адӟем карыны быгатӥськомы?

¹³ Левитын 19:3 Иегова израиль калыклы вераз, мар эшшо кароно на дун-сьӧлыктэм луон понна: «Мынэсьтым субботаосме утьыса улэ». Христианъёс Моисейлэн законэзъя уг уло бере, ми суббота сярысь курон-косонэз ум чаклаське. Озьы ке но ми тросэзлы дышетскыны быгатомы, пыр-почгес эскеримы ке та законэз но сое, кыӵе пайда со вае вал израиль калыклы. Суббота нуналэ израиль калык ӧз ужа но дырзэ висъяз Инмарлы йыбыртъян понна c. Соин ик паймонэз ӧвӧл, куке Иисус ӵапак субботае вордӥськем карысьтыз сӥнагогае мынӥз но адямиослы Инмарлэсь Кылзэ лыдӟыны кутскиз (Пот. 31:12—15; лыдӟе Лукалэсь 4:16—18). Мар карыны милесьтым мылкыдмес ӝутэ Инмарлэн суббота сярысь курон-косонэз вылын малпаськон? Кӧня гинэ ужъёсмы милям медам луэ, котькуд нунал Иеговалы йыбыртъян понна дыр висъяно. Быгатӥськоды-а тӥ озьы лэсьтыны яке тӥледлы мае ке но умоятоно? Тӥ котькуд нунал Инмарлы йыбыртъянэн герӟаськем ужъёслы дыр висъяды ке, соку Иеговаен кусыпъёстэс юнматоды, нош солы луыса дун-сьӧлыктэмесь луоды.

14. Кыӵе кулэ луись зэмлык кӧня ке пол пумиське Левитысь 19-тӥ люкетын?

¹⁴ Левитысь 19-тӥ люкетын кӧня ке пол пумиське кулэ луись зэмлык, кудӥз юрттоз милемлы дун-сьӧлыктэмесь луыны. Та люкетысь 4-тӥ кылбур тазьы йылпумъяське: «Мон Кузё-Инмар, тӥляд Инмарды». Таӵе яке та выллем кылъёс та люкетын 16 пол пумисько. Соос тупало Дас курон-косонъёс пӧлысь нырысетӥезлы: «Мон — Кузё-Инмар, тынад Инмаред... Мынам азям тынад мукет инмаръёсыд медаз луэ» (Пот. 20:2, 3). Христиан мурт, кудӥзлэн дун-сьӧлыктэм луэмез потэ, Инмарен кусыпъёссэ ваньмызлэсь кулэен лыдъяны кулэ. Ми Иеговалэн Адӟись-Ивортӥсьёсыз бере, ми ноку ум лэсьтэ сое, мар солэсь святой нимзэ саптасал (Лев. 19:12; Ис. 57:15).

15. Мар карыны мылкыдэз ӝуто курбонъёсты ваён сярысь курон-косонъёс, кудъёсыз гожтэмын Левитын 19-тӥ люкетын?

¹⁵ Израиль калык возьматӥз, Иеговаез аслаз Инмареныз лыдъяз шуыса, солэн законъёсызлэсь кылзӥськыса. Левитын 18:4  гожтэмын: «Мынэсьтым законъёсме быдэсъяса улэ, Мынэсьтым пуктон-косонъёсме быдэсъялэ, соосъя улэ. Мон тӥляд Инмарды Кузё-Инмар». Та курон-косонъёс пӧлысь куд-огъёсыз выльысь гожтэмын 19-тӥ люкетын. Кылсярысь, 5—8-тӥ, 21-тӥ но 22-тӥ кылбуръёсын вераське со сярысь, кызьы пудо-животъёсты курбонэ ваёно вал. Израиль калыкысь пиосмурт та курон-косонъёсты тӥясал ке, со «Кузё-Инмарлэсь святынязэ» саптасал. Нош мар карыны христианъёслэсь мылкыдзэс ӝуто та кылъёс? Кызьы гожтэмын Еврейёслы 13:15, Иеговалы «ушъян-данъян курбон» вайыны. Та сое туж шумпоттэ.

16. Левитысь 19-тӥ люкетысь кыӵе возет возьматэ, Инмарлэн ужась-тыршисьёсыз мукет адямиослэсь пӧртэм луыны кулэ шуыса?

¹⁶ Милям дун-сьӧлыктэмесь луэммы потэ ке, юн мылкыдмы луыны кулэ та дуннеысь адямиослэсь пӧртэм луыны. Но со капчи ӧвӧл. Куддыръя мукетъёсыз, кылсярысь, ӵош дышетскисьёсмы, ӵош ужасьёсмы яке Адӟись-Ивортӥсьёс луисьтэм ӵыжы-выжыосмы мылкыдмес ӝуто лэсьтыны сое, мар люкетысал милемлы Иеговалы солэн курон-косонъёсызъя йыбыртъяны. Сыӵе дыре милемлы кулэ луись быръён лэсьтоно. Мар юрттоз милемлы шонер ужпум кутыны? Висъялэ саклыктэс Левитысь 19:19 тунсыко возетлы: «Кык пумо шортъёслэсь... куэм дӥсянэз эн дӥся». Та законлы луыса израиль калык котырысьтыз калыкъёслэсь висъяськиз. Христианъёс та законъя уг уло бере, соос быгато нуллыны дӥськутэз, кудӥз кык пумо шортъёслэсь куэм басмалэсь вуремын, кылсярысь, етӥнлэсь но синтетикалэсь. Милям уг поты луэммы адямиос кадь, кудъёсызлэн осконзы но ужъёссы Библилы пумит мыно, соос пӧлы ӵош ужасьёсмы яке ӵыжы-выжыосмы пыро ке но. Ми ӵыжы-выжыосмес но матысь адямиосмес яратӥськомы ке но, Иеговалэн ужась-тыршисьёсыз луыса, милям мукетъёсызлэсь пӧртэм луэммы потэ. Милемлы вунэтоно ӧвӧл, дун-сьӧлыктэм луон понна, Инмарлы оскымон луоно шуыса (2 Кор. 6:14—16; 1 Пётр 4:3, 4).

17, 18. Малы ми дышетскыны быгатӥськомы, Левитэз 19:23—25 эскерыса?

¹⁷ «Мон Кузё-Инмар, тӥляд Инмарды» кылъёс израиль калыклы тодаз вайытыны кулэ вал, Иеговаен кусыпъёссэ улоназ нырысетӥ интые пуктоно шуыса. Та сярысь вераське Левитын 19:23—25 (лыдӟе). Ойдолэ малпаськомы, мае возьматӥзы та кылъёс израиль калык понна Сӥзем музъеме пыремез бере. Кыӵе ке писпуэз мерттыса, адямилы нырысетӥ куинь аръёс ӵоже солэсь емышъёссэ сиыны уг яра вал. Ньылетӥ араз та писпулэсь емышсэ Иеговалэн скинияяз вайыны кулэ вал. Витетӥ араз гинэ адями мерттэм писпуэзлэсь  емышсэ сиыны быгатӥз. Та закон Инмарлэн ужась-тыршисьёсызлы тодаз вайытӥз, соос нырысь ик асьсэос сярысь малпаськыны кулэ ӧвӧл шуыса. Нырысь ик соос Инмарлы йыбыртъяны кулэ вал. Со сяна, тодазы возёно вал: Инмар быгатэ соос сярысь сюлмаськыны но соослы тырмыт сиён сётыны. Озьы ик Инмар израиль калыклэсь мылкыдзэ ӝутӥз, солы йыбыртъян понна жалятэк кузьымъёс вайылыны.

¹⁸ Левитысь 19:23—25 закон кельше Иисуслэн кылъёсызлы, кудъёссэ со вераз, Гурезь йылын тодытыкуз: «Эн сюлмаське лулды понна,— мар сиём, мар юом, мугорды понна — мар дӥсялом шуыса». Собере Иисус валэктӥз, малы сюлмаськоно ӧвӧл: «Тӥляд Инмысь Атайды тодэ уго, ваньмыз таос тӥледлы кулэ шуыса». Инмар тылобурдоос сярысь но сюлмаське бере, со ми сярысь но сюлмаськоз (Матф. 6:25, 26, 32). Ми быдэсак оскиськомы Иеговалы. Озьы ик ми юрттӥськомы соослы, кинъёс секыт югдуре сюризы. Со сяна, ми дась луыса кенешлы коньдонэн юрттӥськомы. Ӟеч ужъёсмы сярысь ми мукетъёсызлы ум вераське ке но, шырыт сямо луэммес Иегова адӟе но со понна одно ик бакель кароз (Матф. 6:2—4). Шырыт сямо луыса, ми возьматӥськомы, Левитысь 19:23—25 возетэз уже кутӥськомы шуыса.

19. Кыӵе пайдаё малпанъёс тӥ шедьтӥды та статьяысь?

¹⁹ Ми Левит книгаысь 19-тӥ люкетысь куд-ог кылбуръёсты гинэ эскеримы но тодӥмы, кыӵе удысъёсын дун-сьӧлыктэм Инмармылэсь адӟем карыны быгатӥськомы. Озьы гинэ ми котьку но дун-сьӧлыктэмесь луомы (1 Пётр 1:15). Ӟеч ужъёсмес адӟыса, котырысьтымы адямиослэн мылкыдзы ӝутске Иеговаез данъяны (1 Пётр 2:12). Но Левитысь 19-тӥ люкетын вань на трос мукет пайдаё малпанъёс. Соосты ми вуоно статьяын эскеромы но тодомы, кызьы улонмылэн мукет удысъёсаз но уже кутоно Пётрлэсь «Дун-сьӧлыктэмесь луэлэ» шуыса визь-кенешсэ.