1. Uchebro vọ yen ọyinkọn Pita vwọ kẹ Inenikristi, kẹ diesorọ ọ sa vwọ bẹn re vwo ru nene uchebro yena?

Ọ DIANẸ wo vwo iphiẹrophiyọ wọ vwọ dia otọrakpọ na yẹrẹ odjuvwu, uchebro rẹ ọyinkọn Pita vwọ kẹ Inenikristi ra jẹreyọ vwẹ ẹgbukpe ujorin rẹsosuọ se fierere kẹ ihwo eje. Pita de si: “Kirobo rẹ ohwo ro se ovwan fonro na, ovwan gba fon vwẹ oma rẹ ovwan vwẹ uruemu rẹ ovwan ejobi; Kidie e siro nẹ, Ovwan ke fon, kidie me fonro.” (1 Pita 1:15, 16) Vwo nẹ eta yena rhe, e se yono obo ra sa vwọ vwẹrokere Jihova, rọ dia uvi rẹ udje rẹ ofuanfon. Ofori nẹ a dia fuanfon, ọyen obo re se ru. Ọ sa dia obo re bẹnre kidie avwanre gbare-e. O vwo ọkievo rẹ erọnvwọn vwọ chọ Pita obọ; ẹkẹvuọvo, udje rọyen djerephia nẹ avwanre sa “fon.”

2. Enọ vọ yen a cha kpahenphiyọ vwẹ uyono nana?

² Vwẹ uyono nana, a cha fuẹrẹn enọ nana: Die yen ofuanfon? Die yen Baibol na yono avwanre kpahen ofuanfon ri Jihova? Mavọ yen a sa vwọ dia ihwo re fonro vwẹ uruemu rẹ avwanre? Kugbe, mavọ yen ofuanfon vwo churobọsi oyerinkugbe rẹ avwanre vẹ Jihova?

3. A da ta ota kpahen ohwo rọ fonro, die yen ihwo buebun roro, kẹ tivọ yen a da sa mrẹ uyota na?

³ A da ta ota kpahen ohwo rọ fonro, ihwo buebun ki roro kpahen ohwo ro siẹ opharo phiyọ, rọ fobọ hwẹ-ẹ, ro kuẹ iwun efuanfon ride phiyọ. Jẹ, ọ dia ọtiọyen ọ hepha-a. E dje Jihova rọ dia ohwo rọ fonro kerẹ “Ọghẹnẹ rẹ oma vwerhan.” (1 Tim. 1:11) E se ihwo re vwẹ ẹga kẹ “Aghọghọ.” (Une 144:15) Jesu brorhiẹn hwe ihwo ri kuẹ iwun ride re fẹnẹre phiyọ ri dje oma rayen phia kerẹ evwata vwẹ obaro rẹ ihwo. (Mat. 6:1; Mak 12:38) Inenikristi riẹn oborẹ ofuanfon mudiaphiyọ fikirẹ oborẹ ayen yono vwo nẹ Baibol na rhe. O muẹro dẹn nẹ Ọghẹnẹ avwanre rọ pha fuanfon ro ji vwo ẹguọnọ na cha sa vwẹ iji ra cha sa yan nene-e vwọ kẹ  avwanre-e. Ọtiọyena, Jihova vwọ vuẹ avwanre nẹ, “ovwan ke fon,” o mu avwanre ẹro dẹn nẹ a sa ghene dia ihwo re fonro. Aphro herọ-ọ, tavwen a ke sa dia ihwo re fonro vwẹ uruemu rẹ avwanre, ofori nẹ e vwo ẹruọ rẹ oborẹ ofuanfon mudiaphiyọ.

4. Die yen eta na “fon” vẹ “ofuanfon” mudiaphiyọ?

⁴ Die yen ofuanfon? Vwẹ Baibol na, a vwẹ eta na “fon” vẹ “ofuanfon” vwo dje uruemu vẹ ẹga ro fiotọ yẹrẹ ọ rẹ ọsoso. A je sa vwẹ ota na vwo dje ohwo ra vwọ kpahotọ vwọ kẹ ẹga rẹ Ọghẹnẹ. Re vwo dje vwẹ idjerhe ọfa, a sa dia ihwo re fonro siẹrẹ uruemu rẹ avwanre de fiotọ, a da ga Jihova vwẹ idjerhe ro rhiabọreyọ, kugbe a vẹ ọyen de vwo uvi rẹ oyerinkugbe. O gbe avwanre unu nẹ Jihova rọ dia afonre na guọnọ sikẹrẹ avwanre ihwo re gbare-e.

5. Die yen se yono kpahen Jihova vwo mie emekashe ri fuevun?

⁵ Jihova pha fuanfon vwẹ kẹdia kẹdia. A mrẹ ọnana vughe vwo nẹ oborẹ emekashe re se seraph ri muẹdia kẹrẹ ekete ri Jihova tare. Evo rayen de ghwoghwo: “Ẹfuọn, ẹfuọn, ẹfuọn ọye Ọrovwohwo rẹ otuofovwi na.” (Aiz. 6:3) Emekashe nana vwo uvi rẹ oyerinkugbe vẹ Ọghẹnẹ rayen rọ pha fuanfon na kidie ayen fonro. Kọyensorọ asan rẹ emekashe da vwẹ ovuẹ phia kẹ ihworakpọ vwọ dia asan ọfuanfon. Ọnana yen obo re phiare ọke rẹ Mosis vwọ mrẹ erhanre vwẹ evun rẹ aghwa.—Eyan. 3:2-5; Jos. 5:15.

6-7. (a) Vwo nene obo rehẹ Eyanno 15:1, 11, mavọ yen Mosis vwọ karunumu ofuanfon ri Jihova? (b) Die yen emuọvo rọ karophiyọ ihwo rẹ Izrẹl ejobi kpahen ofuanfon rẹ Ọghẹnẹ? (Ni uhoho rọhẹ opharo ọbe na.)

⁶ Mosis vwo sun ihwo rẹ Izrẹl wan urhie ọvwavware na nu, ọ da karunumuo vwọ kẹ ayen nẹ Ọghẹnẹ rayen Jihova pha fuanfon. (Se Eyanno 15:1, 11.) Uruemu rẹ ihwo re ga eghẹnẹ rẹ Ijipt fonro kakaka-a. Ọtiọyen ihwo re je ga eghẹnẹ rẹ ẹkuotọ ri Kanan je hepha. Egagọ rayen churobọsi ọ rẹ ayen vwọ vwẹ emọ rayen vwo ze izobo vẹ irueru rẹ ọfanrhiẹn ra ghẹmrẹ. (Liv. 18:3, 4, 21-24; Urhi 18:9, 10) Jihova fẹnẹ eghẹnẹ efian yena. Ọ cha sa vuẹ ihwo re ga ọyen nẹ ayen vwobọ vwẹ oka rẹ uruemu ọtiọyena-a. Jihova afonre. Ihwo rẹ Izrẹl vwọ karophiyọ ọnana, o vwobo re si phiyọ obaro rẹ erhu rẹ orherẹn rode na. Obo re si phiyọ yen: “Ọfuanfon kẹ Ọrovwohwo.”—Eyan. 28:36-38.

⁷ Obo re si phiyọ erhu na cha nẹrhẹ o phẹn vwọ kẹ kohwo kohwo rọ mrẹrẹ nẹ Jihova ghene pha fuanfon. Kẹ, ohwo rẹ Izrẹl rọ sa mrẹ ọsete rọhẹ obaro rẹ erhu na-a kidie nẹ ọ cha sa mrẹ orherẹn rode na-a vwo? Ọna ko mudiaphiyọ ne ovuẹ ọghanghanre nana rhe che te obọ? Ọ dia ọtiọye-en! Ihwo rẹ Izrẹl ejobi nyo ovuẹ nana ọke re vwo se Urhi na vwọ kẹ eshare, eya, kugbe emọ rẹ ẹgborho na. (Urhi 31:9-12) Mane kẹ owẹ hẹ etiyin, wo rhe nyo eta nana: “Mẹvwẹ Ọrovwohwo rẹ Ọghẹnẹ wẹn; vwẹ ọtiọye na ovwan . . . ke dia fuanfon kidie Me pha fuanfon.” “Kẹ ovwan dia ọfuanfon kẹ vwẹ; kidie mẹvwẹ Ọrovwohwo na pha fuanfon.”—Liv. 11:44, 45; 20:7, 26.

8. Die yen yono vwo nẹ eta rehẹ Livitikọs 19:2 vẹ 1 Pita 1:14-16 rhe?

⁸ E ja tẹnrovi ota ọvo rọhẹ Livitikọs 19:2 re se vwọ kẹ ihwo Izrẹl eje. Jihova da vuẹ Mosis: “Ta kẹ ukoko rẹ ihwo rẹ Izrẹl ejobi, Ovwan dia fuanfon kidie Mẹvwẹ Ọrovwohwo rẹ Ọghẹnẹ rẹ ovwan na pha fuanfon.” Ọ sa dianẹ eta nana yen Pita rhoma vwariẹn ọke ro vwo phiuduphiyawọ rẹ Inenikristi nẹ ayen “gba fon.”  (Se 1 Pita 1:14-16.) Nonẹna, avwanre rha hẹ otọ rẹ Urhi ri Mosis na-a. Ẹkẹvuọvo, oborẹ Pita tare na kẹ avwanre imuẹro nẹ o vwobo re se yono vwo nẹ Livitikọs 19:2 rhe, o yono avwanre nẹ Jihova pha fuanfon ọtiọyena, ihwo ri vwo ẹguọnọ rọyen ke je davwẹngba vwọ dia fuanfon. Ọ dianẹ e vwo iphiẹrophiyọ ra vwọ dia odjuvwu yẹrẹ otọrakpọ na, avwanre eje cha davwẹngba vwọ dia fuanfon.—1 Pita 1:4; 2 Pita 3:13.

9. Erere vọ yen a cha mrẹ siẹrẹ a da fuẹrẹn Livitikọs uyovwin 19?

⁹ Avwanre guọnọ ru obo re cha vwerhen Ọghẹnẹ rẹ avwanre rọ pha fuanfon na ivun, kọyensorọ avwanre vwo vwo owenvwe re vwo yono kpahen obo ra sa vwọ dia fuanfon. Jihova kẹ avwanre odjekẹ evo kpahen obo re se vwo ru ọtiọyen. A sa mrẹ odjekẹ tiọyena vwẹ Livitikọs uyovwin 19. Ohwo ri Hebrew ọvo ro yono ẹbe kodo re se Marcus Kalisch de si: “Uyovwinrota nana sa dia ọ rọ ma ghanre vwẹ ọbe ri Livitikọs na, ọ je sa dia ọ rọ ma ghanre vwẹ usun rẹ ẹbe iyorin rẹsosuọ ri Baibol na.” E ja ta ota kpahen awọreta evo vwẹ uyovwinrota na ri djunute iyono eghanghanre evo ri shekpahen akpeyeren ri kẹdẹ kẹdẹ rẹ avwanre. E che vwo ru ọtiọyena, karophiyọ nẹ eta na: “Ovwan dia fuanfon” yen ton eta na phiyọ.

10-11. Die yen Livitikọs 19:3 tare nẹ e ru, kẹ diesorọ ọ vwọ dia obo re ghanre?

¹⁰ Rọ vwọ vuẹ ihwo rẹ Izrẹl nẹ ayen dia fuanfon nu, Jihova da je vwọba: “Ovwan ejobi mu ọghọ kẹ ọsẹ vẹ oni rẹ ovwan . . . Mẹvwẹ Ọrovwohwo rẹ Ọghẹnẹ rẹ ovwan.”—Liv. 19:2, 3.

¹¹ Ọyen obo re ghanre re vwo ru nene odjekẹ ri Jihova re vwo muọghọ kẹ esẹ vẹ ini rẹ avwanre. Karophiyọ ọke rẹ ọshare ọvo vwọ nọ Jesu: “Didi emu esiri mi se ru, mi vwo vwo arhọ ri bẹdẹ na?” Ẹbẹre ọvo rẹ ẹkpahọnphiyọ rẹ Jesu vwọ kẹ ọshare na yen o muọghọ vwọ kẹ ọsẹ vẹ oni rọyen. (Mat. 19:16-19) Jesu tobọ brorhiẹn hwe ihwo ri Farisi kugbe isiẹbe na kidie ayen ru oborẹ ayen se ru eje ayen vwo jẹ esẹ vẹ ini rayen ẹroevwote. Vwẹ idjerhe ọtiọyena, ayen “gbe urhi rẹ Ọghẹnẹ ku.” (Mat. 15:3-6) “Urhi rẹ Ọghẹnẹ” na churobọsi urhi rẹ iyorin vwẹ usun rẹ Irhi Ihwe  na vẹ obo re se mrẹ vwẹ Livitikọs 19:3. (Eyan. 20:12) Jokaphiyọ nẹ odjekẹ rọhẹ Livitikọs 19:3 re vwo muọghọ kẹ esẹ vẹ ini na vwomaphia vwẹ urhiẹn rọ vwọ kpahen eta nana: “Ovwan dia fuanfon kidie Mẹvwẹ Ọrovwohwo rẹ Ọghẹnẹ rẹ ovwan na pha fuanfon.”

12. Mavọ yen se vwo ru nene obo rehẹ Livitikọs 19:3?

¹² E de roro kpahen iji rẹ Jihova vwọ kẹ avwanre nẹ e muọghọ kẹ esẹ vẹ ini rẹ avwanre na, ka sa nọ oma rẹ avwanre, ‘Mi muọghọ kẹ ọsẹ vẹ oni mẹ?’ Wo de roro nẹ wo ru obo ro fori nẹ wo ru jovwo vwẹ obuko-o, wo se brorhiẹn ru wo vwo ru yovwinphiyọ enẹna. Wo rhe che se wene obo re phia wanre-e, jẹ, wo se ru oborẹ ẹgba wẹn muru enẹna wẹ vẹ ayen vwọ ghwọrọ ọke kugbe ji bicha ayen. Wọ sa dẹ ekuakua rẹ ayen guọnọre vwọ kẹ ayen, chọn ayen uko vwo sikẹrẹ Jihova phiyọ ji phiuduphiyọ ayen awọ ọkieje. Wo de se ru ọtiọyen, kọyen wo ruẹ nene obo rehẹ Livitikọs 19:3.

13. (a) Uchebro ọfa vọ yen a je mrẹ vwẹ Livitikọs 19:3? (b) Mavọ yen a sa vwọ vwẹrokere udje ri Jesu nonẹna kirobo ra niyẹnrẹn rọyen phiyọ Luk 4:16-18?

¹³ Livitikọs 19:3 ji yono avwanre emu ọfa kpahen ẹfuọn. O djunute ẹyọnrọn rẹ urhi rẹ edidjala na. Inenikristi rha hẹ otọ rẹ Urhi na-a, ọtiọyena, avwanre rha yọnrọn urhi rẹ ẹdidjala na-a. Ẹkẹvuọvo, o vwobo re ji se yono vwo nẹ oborẹ ihwo rẹ Izrẹl yọnrọn urhi na wan vẹ erere rẹ ayen mrẹ norhe. Ẹdidjala na yen ẹdẹ rẹ ayen vwo rovwoma vwo nẹ iruo rẹ ayen ruẹ, ayen me ga Ọghẹnẹ. * Kọyensorọ Jesu vwo kpo uwevwin rẹ ẹga rọhẹ orere rọyen vwẹ ẹdẹ yena re se Ota rẹ Ọghẹnẹ. (Eyan. 31:12-15; se Luk 4:16-18.) Ofori nẹ iji rẹ Ọghẹnẹ rọhẹ Livitikọs 19:3 rọ tare nẹ a “yọnrọn urhi rẹ edidjala” na mu avwanre vwọ rhuẹrẹ ọke phiyotọ vwọ kẹ ẹga rẹ Ọghẹnẹ vwẹ akpeyeren rẹ avwanre ri kẹdẹ kẹdẹ. Wo rori nẹ ofori wo vwo ru ewene evo vwẹ ẹdia yena? Wọ da sa rhuẹrẹ ọke phiyotọ vwọ kẹ ẹga rẹ Ọghẹnẹ ọkieje, ku wo che vwo uvi rẹ oyerinkugbe vẹ Jihova, rọ dia obo re ghanre mamọ ra sa vwọ dia ihwo re fonro.

14. Uyota ọghanghanre vọ yen a karunumu vwẹ Livitikọs uyovwin 19?

¹⁴ Livitikọs uyovwin 19 vwariẹn uyota ọghanghanre ọvo rọ sa chọn avwanre uko vwọ sẹro rẹ ofuanfon rẹ avwanre. Owọrota 4 kuphiyotọ vẹ eta nana: “Mẹvwẹ Ọrovwohwo Ọghẹnẹ rẹ ovwan.” A je mrẹ ọkpọ rẹ eta tiọyena abọ 16 efa vwẹ uyovwinrota na. Ọnana nẹrhẹ avwanre karophiyọ urhi rẹsosuọ na: “Mẹvwẹ Ọrovwohwo Ọghẹnẹ wẹn . . . Wo vwo ẹdjọ efa-a, mẹvwẹ ọvo.” (Eyan. 20:2, 3) Ofori nẹ Inenikristi eje re guọnọ dia fuanfon vwo imuẹro nẹ orọnvwọn ọvuọvo yẹrẹ ohwo ọvuọvo gbowọ phiyọ oyerinkugbe rayen vẹ Jihova-a. Kidie nẹ avwanre Iseri ri Jihova, avwanre vwo owenvwe ra vwọ kẹnoma kẹ kemu kemu ro che miovwo odẹ ọfuanfon rẹ Ọghẹnẹ.—Liv. 19:12; Aiz. 57:15.

15. Die yen aworeta rehẹ Livitikọs uyovwin 19 re ta ota kpahen izobo na che mu avwanre vwo ru?

¹⁵ Ihwo rẹ Izrẹl vwo djephia nẹ ayen mrẹ Jihova kerẹ Ọghẹnẹ rayen ko fori nẹ ayen nene irhi rọyen. Livitikọs 18:4 da ta: “Ovwan ru obo ri mi vwo ji urhi rere  ovwan yọnre iji mẹ rere ovwan yan vwẹ evun rayen. Mẹvwẹ Ọrovwohwo Ọghẹnẹ rẹ ovwan.” Uyovwin 19 djunute evo usun rẹ “iji” ri Jihova vwọ kẹ ihwo rẹ Izrẹl. Kerẹ udje, awọreta 5-8, 21, 22 ta ota kpahen izobo rẹ eranvwe. Ayen cha vwẹ izobo na phia vwẹ idjerhe rẹ ayen vwo jẹ ‘emu ọfuanfon ri Jihova emiovwo.’ E jẹ ẹkpo ri Baibol nana mu avwanre vwo vwo owenvwe ra vwọ vwẹ izobo rẹ Ọghẹnẹ che rhiabọreyọ vwọ kẹ kirobo rẹ Hibru 13:15 jiro kẹ avwanre nẹ e ru.

16. Die yen sa chọn avwanre uko vwọ karophiyọ ofẹnẹ rọ herọ vwẹ uvwre rẹ ihwo re ga Ọghẹnẹ vẹ ihwo re ga-a?

¹⁶ A sa vwọ dia fuanfon, ofori nẹ e muegbe ra vwọ dia ihwo re fẹnẹre. Ọnana sa dia obo re bẹnre. Ọkievo, ihwo ra vẹ ayen gbe kpo isikuru, e ra vẹ ayen gbe ruiruo, ihwo rẹ orua re ga Jihova-a, kugbẹ ihwo efa se kpokpo avwanre nẹ e vwobọ vwẹ irueru re vwọso irhi ri Jihova. Ayen de ru ọtiọyen, kọyen e vwo orhiẹn ọghanghanre re che bru. Die yen sa chọn avwanre uko vwo brorhiẹn rẹ abavo? Roro kpahen uvi rẹ uyono ri Baibol ọvo rọhẹ Livitikọs 19:19, ẹbẹre ọvo rọyen da ta: “Ovwan ji kuẹ ewun ra vwẹ oka rẹ iruru ivẹ vwo rhuon phiyọ-ọ.” [NW ] Urhi yena vwẹ ukẹcha phia vwo phi ofẹnẹ phiyọ uvwre rẹ ihwo rẹ Izrẹl vẹ ihwo rẹ ẹgborho efa re kẹrẹ ayen. Kidie nẹ avwanre rha hẹ otọ rẹ urhi na-a, ọ rha dia obo re chọre re vwo ku iwun ra vwẹ oka rẹ emwa sansan vwo ru phiyọ-ọ. Ẹkẹvuọvo, avwanre sen uruemu ra vwọ vwẹrokere ihwo rẹ iruemu rayen vwọso iyono ri Baibol na, ọ da tobọ dianẹ ayen ihwo ra vẹ ayen gbe kpo isikuru, e ra vẹ ayen gbe ruiruo kuẹgbe yẹrẹ ihwo rẹ orua dede. Aphro herọ-ọ, avwanre vwo ẹguọnọ rẹ ihwo rẹ orua rẹ avwanre vẹ irivẹ rẹ avwanre. Jẹ, o de te ẹdia re vwo brorhiẹn eghanghanre ri shekpahen akpeyeren, avwanre muegbe ra vwọ fẹnẹ oma rẹ avwanre kerẹ ihwo ri Jihova. Karophiyọ nẹ re vwo phi oma phiyọ akọkọ vwọ kẹ Ọghẹnẹ ọyen ẹbẹre ọvo rẹ oborẹ ofuanfon mudiaphiyọ. Ọyena obo re ghanre mamọ siẹrẹ a da guọnọ dia ihwo re fonro.—2 Kọr. 6:14-16; 1 Pita 4:3, 4.

17-18. Uyono ọghanghanre vọ yen e se yono vwo nẹ Livitikọs 19:23-25?

¹⁷ Eta na “Mẹvwẹ Ọrovwohwo Ọghẹnẹ wẹn” sa karophiyọ ihwo rẹ Izrẹl nẹ ayen phi oyerinkugbe rayen vẹ Jihova phiyọ ẹdia rẹsosuọ. Vwẹ idjerhe vọ? Livitikọs 19:23-25 dje idjerhe ọvo tiọyena phia. (Se.) Roro kpahen oborẹ eta nana se mudiaphiyọ vwọ kẹ ihwo rẹ Izrẹl ọke rẹ ayen da ro otọ rẹ ive na nu. Ohwo da kọn urhe rẹ emamọ vwẹ ẹgbukpe erha, ọ cha  re emamọ rẹ urhe na-a. Vwẹ ukpe rẹ ẹne rọyen, kọ cha vwẹ emamọ rọyen vwọ kpahotọ vwẹ asan ẹshẹ rẹ Ọghẹnẹ. Ukpe rẹ iyorin rọyen, ohwo ro vwo urhe na kọ sa re emamọ rẹ urhe na. Ọnana sa chọn ihwo rẹ Izrẹl uko vwọ riẹn nẹ ọ dia ọdavwẹ rayen yen karo-o. Ofori nẹ ayen vwẹroso Jihova kerẹ Ọrọvwẹrote ayen, ayen mi ji ru oborẹ ẹgba rayen muru vwo bicha ẹga rọyen. O che ru emueje rọ sa vwọ kẹ ayen oborẹ ayen guọnọre. Ọghẹnẹ jiro kẹ ayen nẹ ayen dia ihwo ri ruẹ itotoro ri ghwologhwolo ọke rẹ ayen de kpo asan ẹshẹ na rọ dia asan rẹ ayen da ga ẹga.

¹⁸ Urhi rọhẹ Livitikọs 19:23-25 na nẹrhẹ avwanre karophiyọ eta ri Jesu vwẹ enu ugbenu na. Ọ tare nẹ, “wọ rua ẹnwan . . . obo wọ cha re kugbe obo wọ cha da-a. Ọsẹ rẹ ovwan rọ hẹ obo odjuvwu riẹre nẹ ovwan guọnọ ayen.” Ọghẹnẹ cha kẹ avwanre oborẹ avwanre guọnọre kirobo ro ruẹ vwọ kẹ emephran na. (Mat. 6:25, 26, 32) Avwanre vwẹroso Jihova kerẹ Ọrọvwẹrote avwanre. Ọtiọyena, kẹ avwanre se “ru ẹse” vwọ chọn ihwo re guọnọ ukẹcha uko. Oma je vwerhan avwanre re vwo phiobọ phiyọ utoro kirobo rẹ ẹgba rẹ avwanre muru vwọ kẹ ẹyan-obaro rẹ ukoko na. Jihova jokaphiyọ okẹ ri ghwologhwolo ọtiọyena, ọ je cha hwosa kẹ avwanre. (Mat. 6:2-4) A da dia ihwo ri ruẹse, kọyen e ghini vwo ẹruọ rẹ obo re yono vwo nẹ Livitikọs 19:23-25 rhe.

19. Erere vọ yen wọ mrẹ nẹ ẹkpo sansan re yono vwo nẹ ọbe ri Livitikọs?

¹⁹ Ẹbẹre evo rẹ Livitikọs uyovwin 19 yen e yonore na, ẹbẹre re yono kpahen na dje kẹ avwanre idjerhe sansan ra sa vwọ dia kerẹ Ọghẹnẹ rẹ avwanre rọ pha fuanfon na. A da vwẹrokere, kọyen avwanre guọnọ dia ‘fuanfon vwẹ uruemu rẹ avwanre ejobi.’ (1 Pita 1:15) Ihwo re ga Jihova-a dede rhe mrẹ omamọ rẹ uruemu rẹ ihwo rẹ Ọghẹnẹ vughe re. Ọ tobọ mu ihwo evo vwo jiri Jihova re. (1 Pita 2:12) Jẹ, o ji vwo erọnvwọn efa buebun re se yono vwo nẹ Livitikọs uyovwin 19 na. Uyono rọ cha na cha ta ota kpahen awọreta efa vwẹ uyovwin 19 na, je chọn avwanre uko vwọ riẹn ẹbẹre sansan rẹ akpeyeren rẹ avwanre ro de fo nẹ a “fon” kirobo rẹ Pita jiro vwọ kẹ avwanre.