1. Miruku xeeni murummwa Pedru aavanhe awe makristau? Xeeni okathi mukina vanivila aya wiiwelela miruku iyo?

HATA nlipelelaka orowa okhala wiirimu wala valaponi vaava, otheene ahu nnoottottela mureerelo miruku murummwa Pedru aavanhe awe makristau a okathi wa arummwa. Pedru aalempe so: “Ohiya-vo, mweettelo anyu wotheene okhaleke woowaarya, okhala wira Muluku owiihanneni, toowaarya. Tthiri, voolempwa wira: ‘Mukhaleke oowaarya, okhala wira miyo koowaarya’”. (1 Ped. 1:15, 16) Moolumo ala, annooniherya oratteene wira nnoowerya omutakiha Yehova, yoowo ori ntakiheryo nuulupale na mutthu oowaarya. Nto, mweettelo ahu wotheene ohaana okhala woowaarya. Mwaha wookhala atthu oottheka, hiyo pooti wuupuwelaka wira eyo kheniweryaneya. Ikwaha sikina, murummwa Pedru aanipaka itthu soohiloka. Nto ntakiheryo nawe, ninnooniherya wira hiyo nnoowerya okhala atthu “oowaarya”.

2. Mwaha ola, ninrowa waakhula makoho xeeni?

² Mwaha ola, ninrowa waakhula makoho ala: Onitaphulela exeeni okhala oowaarya? Biibiliya onniixuttiha exeeni voohimya sa waarya wa Yehova? Ninrowa okhala sai oowaarya mweettelo ahu wotheene? Okhala oowaarya ni ompatthani ahu ni Yehova onvarihana sai?

3. Vaavo atthu anceene aniiwa aya nuulumo noowi waarya, anuupuwela exeeni? Ninrowa ophwanya woowi itthu seekeekhai?

³ Okathi atthu anceene aniiwa aya nuulumo noowi waarya, animuupuwela mutthu ohimpatthaneya, oniwara ikuwo sa etiini ni ohintheya. Masi eyo khenitaphulela okhala oowaarya. Maana Biibiliya onnimuhimya Yehova, yoowo ori oowaarya okhala “Muluku oohakalala”. (1 Tim. 1:11) Nave, atthu animukokhorela Yehova annihimmwa okhala atthu oohakalala. (Esal. 144:15) Yesu aahaapwapwela atthu ale yaawara ikuwo sa etiini ni waasivela opaka itthu sa exariya wira yooniweke ni atthu akina. (Math. 6:1; Mar. 12:38) Makristau eekeekhai annisuwela ele onitaphulela aya okhala oowaarya, mwaha wa itthu yiixuntte aya mBiibiliyani.  Hiyo ninnikupali ni murima wotheene wira Muluku ahu oophenta ni oowaarya, khonikhala-khala onirumaka opaka etthu nihinwerya ahu. Tivonto, vaavo Yehova onniruma awe wira: ‘Mukhaleke oowaarya’, ninnisuwela wira nnoowerya okhala oowaarya. Masi nihinatthi okhalana mweettelo woowaarya, nihaana osuwela ele onitaphulela aya okhala oowaarya.

4. Onitaphulela exeeni okhala “oowaarya?”

⁴ Onitaphulela exeeni okhala “oowaarya?” MBiibiliyani, nuulumo noowi waarya, nintaphulela okhala ooloka aahiiso okhalana mweettelo wooloka ohoolo wa atthu ni Muluku. Nave nuulumo nla, ninnirumeeliwa ohimmwaka mutthu othanliwe wira ovareke muteko wa Muluku. Nnoothokoreriwa okhala atthu oowaarya, akhala wira nookhalana mweettelo wooloka, ninnimukokhorela Yehova ntoko oniphavela awe ni akhala wira nookhalana waataana wooloka ni yena. Ninnihakalala osuwela wira nnaamwi niri ene atthu oottheka ni Yehova ori ene oowaarya, nnoowerya okhala apatthani awe.

5. Malaikha oororomeleya anniixuttiha exeeni voohimya sa Yehova?

⁵ Yehova tooloka ni tooratta mwa inamuna sotheene. Ninnisuwela eyo mwaha wa etthu yaahimmye aya malaikha aniihaniwa maserafi. Malaikha ale yaari ohoolo wa ehice ya Muluku. Malaikha awo yaahimya wira: “Òwarya, òwarya, òwarya t’apwiya [Yehova] òwerya sothene”. (Yes. 6:3) Ekeekhai wira malaikha ahaana okhala oowaarya wira akhalane waataana wooloka ni Muluku. Tthiri awo toowaarya. Nto opuro nlaikha na Yehova nneemela aya, nipuro nlo ninnikhala noowaarya. Eyo ti etthu yiiraneyale okathi Moise aawehale awe mwiri waapatta mooro.—Okhum. 3:2-5; Yox. 5:15.

6-7. (a) Moovarihana ni Okhuma 15:1, 11, Moise aattittimihenrye sai waarya wa Yehova? (b) Etthu xeeni yaakhaliherya aisarayeli wuupuwela wira Muluku toowaarya? (Nwehe elatarato ya ekaapa.)

⁶ Nuumala olapuwa Ephareya yooxeerya, Moise aahittittimiherya wira Yehova ti Muluku oowaarya. (Mmusome Okhuma 15:1, 11.) Mweettelo wa atthu yaakokhorela amuluku a weExiitu khahiyo waari woowaarya. Etthu emosaru, yaaniiraneya ni atthu yaakokhorela amuluku a oKanani. Okokhorela waya waahela muhina waapaha anamwane wira yaavahe mukuttho ni orupihana woohiloka. (Onam. 18:3, 4, 21-24; Otum. 18:9, 10) Yehova oovirikana vanceene ni amuluku eethiru. Owo khonikhala-khala aavekelaka ale animukokhorela opaka itthu sootakhala. Etthu yaawuupuxerya eyo anaIsarayeli, yaari eyuuma yoowaarya mukhulupale a anamukuttho aawara awe vayuuci. Eyo yaahilempwa moolumo oowi: “Òthanleliwa n’Apwiya”, niire so, waarya ti wa Yehova.—Okhum. 28:36-38.

⁷ Okathi khula mwisarayeli aaweha awe eyuuma ele yoowaarya, aanuupuwela wira Yehova toowaarya. Masi ankhi akhala wira mwisarayeli aari ottaiwene ohinawerya oweha eyuuma ele yoowaarya aawara awe mukhulupale a anamukuttho? Niireke eyo yaanimwiiriha ohuupuwela wira Yehova toowaarya? Nnaari! Mwaha woowi, aisarayeli otheene yaahiiwa okathi naasommwa aya Nlamulo ohoolo wa alopwana, athiyana ni anamwane. (Otum. 31:9-12) Vaakhanle wira nyuwo mwaahikhala okathi ole, mwaamwiiwa moolumo ala ani: “Miyo k’Apwiya Muluku anyu: tivó mukhalé òrera murima [oowaarya], okhala wira miyo ki òrera murima. Mukhaleke òwarya, okhala wira miyo ki òwarya”.—Onam. 11:44, 45; 20:7, 26.

8. Xeeni vari aya vooloka othokorerya etthu onihimya awe Onamukuttho 19:2 ni 1 Pedru 1:14-16?

⁸ Vano, nrowe niwehe etthu Yehova aamurumme awe Moise waaleela aisarayeli otheene.  Etthu ene, moolumo ari Onamukuttho 19:2. Yehova aahimuruma Moise waaleela aisarayeli wira: ‘Mwathukumanye atthu othene aIsarayeli, mwahimerye wira: Mukhalé atthu òrera murima [oowaarya], mana Miyo ki òrera murima [oowaarya]’. Woonasa wene, murummwa Pedru aahimya moolumo yaala okathi aatumerenrye awe makristau ‘okhala oowaarya’. (Mmusome 1 Pedru 1:14-16.) Ekeekhai wira hiyo khanneettela Nlamulo Muluku annvanhe awe Moise. Masi hata vari siiso, etthu Pedru aahimmye awe yeeyo eri Onamukuttho 19:2, ennooniherya wira Yehova toowaarya ni oniphavela wira atthu otheene animukokhorela yiimananiheke okhala oowaarya. Nto otheene ahu, nihaana okhala oowaarya hata nilipelelaka orowa okhala wiirimu wala mparayiisu valaponi vaava.—1 Ped. 1:4; 2 Ped. 3:13.

9. Xeeni vari aya vooloka othokorerya ekapiitulu 19 ya eliivuru ya Onamukuttho?

⁹ Otheene ahu, nimphavela omuhakalaliha Muluku ahu oowaarya. Nto, nihaana osuwela etthu nikhanle ahu oopaka wira nikhalane mweettelo woowaarya. Yehova, onninivaha malakiheryo annikhaliherya okhala oowaarya. Malakiheryo makina ari ekapiitulu 19 ya eliivuru ya Onamukuttho. Musomi mmosa a nttaava na eHeeberi oniihaniwa Marcus Kalisch, olempe so: “Ekapiitulu ela ti yoovara murima ni ennilavula itthu sinceene soovirikana. Nave ola mpantta wa faita yinceene wa eliivuru ya Onamukuttho ni wa iliivuru 5 soopacerya sa mBiibiliyani”. Nrowe nithokorerye iversiikulu vakhaani sa ekapiitulu ela ya Onamukuttho ni niwehe itthu nniixutta ahu, seiyo nikhanle ahu ooweettela khula nihiku. Vaavo ninrowa ahu othokoreryaka mwaha ola, muhiliyale wira itthu nniixutta ahu sinirwa nuumala nuulumo nni “mukhaleke òwarya”.

10-11. Etthu xeeni ninreerela ahu opaka onihimya awe Onamukuttho 19:3? Xeeni yooruma ela eri aya ya faita yinceene?

¹⁰ Nuumala waaleela aisarayeli wira yaahaana okhala oowaarya, Yehova aahincererya oriki: “Othene anyu mwattittimiheke atith’inyu n’amam’inyu . . . Miyo k’Apwiya, Muluku anyu”.—Onam. 19:2, 3.

¹¹ Moohaanyiherya, nihaana weettela ele Muluku onirumme awe wira naattittimiheke anamuyari ahu. Muupuweleke wira okathi mulopwana mmosa aamukonhe awe Yesu wira:  “Kipake exeeni yooloka wira kiphwanye okumi woohimala?” Enamuna Yesu aamwaakhunle awe, yaahela muhina waattittimiha apapa awe ni amama awe. (Math. 19:16-19) Yesu aahaapwapwela afarisi ni alipa-oolepa mwaha woowi yaanikhootta waakhapelela anamuyari aya. Mwaha woopaka eyo, Yesu aahihimya wira awo yaahiiriha “nuulumo na Muluku ohikhalana efaita”. (Math. 15:3-6) “Nuulumo na Muluku”, naahela muhina yooruma ya neethanu ya Malamulo 10. Nave yaahela muhina ele ninsoma ahu Onamukuttho 19:3. (Okhum. 20:12) Muhiliyale wira yooruma eri Onamukuttho 19:3 ya waattittimiha apapa inyu ni amama inyu, enirwa nuumala moolumo anihimya wira “mukhalé atthu òrera murima [oowaarya], mana Miyo ki òrera murima [oowaarya]. Miyo Apwiya, Muluku anyu”.

12. Ninrowa weettela sai yooruma eri Onamukuttho 19:3?

¹² Muupuwelaka yooruma ya Yehova ya waattittimiha anamuyari anyu, mwiikoheke so: ‘Kiireke miyo, kinnaattittimiha apaapa ni amaama?’ Akhala wira khalai khimwaapaka eyo, muhaana opaka marukunuxo. Ekeekhai wira nyuwo khamunwerya orukunuxa itthu mpanke anyu khalai, masi pooti wiimananiha vanceene waattittimiha anamuyari anyu niinaano-va. Woonasa wene, nyuwo pooti opaka eprokrama wira nviriheke okathi munceene muri ene ni anamuyari anyu. Nave mwakhaliheryeke mwaavahaka itthu ampirisari aya, waakhaliherya olipiha waataana waya ni Muluku ni waakhaliherya mukhalelo wa mmuupuweloni. Mwiira siiso, munimooniherya wira munneettela yooruma ya Onamukuttho 19:3.

13. (a) Miruku xeeni sikina nimphwanya ahu Onamukuttho 19:3? (b) Ninrowa otthara sai ntakiheryo na Yesu niri Luka 4:16-18?

¹³ Onamukuttho 19:3, onniniixuttiha etthu ekina ennikhaliherya okhala oowaarya. Eversiikulu ela, enilavula sa ottittimiha nihiku na Saabadu. Ekeekhai wira makristau khaneettela Nlamulo Muluku anvanhe awe Moise. Tivonto, hiyo khaninkhanyereriwa ottittimiha nihiku na Esaabadu. Masi hata vari siiso, sookhala itthu nniixutta ahu sa moota aisarayeli yaattittimiha aya nihiku na Saabadu ni moota yaattottela aya mureerelo ottittimiha nihiku na Saabadu. Musuweleke wira, nihiku na Saabadu waari okathi aisarayeli yaamumulela aya miteko saya wira amukokhoreleke Muluku. * Nto mwaha waivaavo, nihiku na Saabadu, Yesu aahilimalela orowa osinagoga ni osoma Nuulumo na Muluku. (Okhum. 31:12-15; mmusome Luka 4:16-18.) Yooruma ya Muluku eri Onamukuttho 19:3, yeeyo enihimya wira muttittimiheke nihiku na Saabadu, ehaana oniiriha khula nihiku waavya okathi wira nimukokhorele Muluku. Niireke nyuwo munoona wira muhaana opaka marukunuxo voohimya sa mwaha owo? Akhala wira nnimwaavyaka okathi wira nimukokhorele Yehova, eyo enoonikhaliherya okhalana waataana wooloka ni Yehova ni okhala atthu oowaarya.

14. Ekeekhai xeeni na efaita yinceene enittittimiheriwa Onamukuttho ekapiitulu 19?

¹⁴ Onamukuttho ekapiitulu 19, onnihimya ekeekhai emosa ennikhaliherya ohihiya okhala oowaarya. Eversiikulu 4, enimala ni moolumo oowi: “Miyo k’Apwiya, Muluku anyu”. ABiibiliya akina, moolumo awo antthikeliwa ikwaha 16, ekapiitulu emosaru. Eyo enninuupuxerya yooruma yoopacerya eni: “Miyo k’Apwiya. Miyo ki Muluku anyu . . . Muhikhalané muluku mukina kihikhanle miyo”. (Okhum. 20:2, 3) Khula mukristau oniphavela okhalana mweettelo woowaarya, oheemereryeke etthu nnakhala mutthu mukina okhalana efaita yinceene ovikana waataana wawe ni Yehova. Hiyo nniihaneliwa nsina na Anamoona a Yehova, noolakela ohipaka  etthu yaarowa ohonona nsina noowaarya na Yehova.—Onam. 19:12; Yes. 57:15.

15. Iversiikulu sa Onamukuttho ekapiitulu 19 sinlavula mikutthu sa inama, sihaana oniiriha opaka exeeni?

¹⁵ Aisarayeli, yaanimweemererya Yehova okhala Muluku aya yiiwelelaka malamulo manceene. Onamukuttho 18:4 onihimya so: “Mwetteleke ikano saka: mwiweleleke soruma saka. Miyo k’Apwiya, Muluku anyu”. Ekapiitulu 19, ennihimya ikano sikina yaavahiwe aya aisarayeli. Mwa ntakiheryo, iversiikulu 5-8, 21, 22, sinnilavula mikuttho sa inama. Iyo sahaana ovahiwa mwa enamuna yahaarowa aya “òveha etthu ettittimiheriwe Apwiya [Yehova]”. Osoma iversiikulu iya, sihaana oniiriha ophavela omusiveliha Yehova ni onvaha mikuttho oneemererya awe ntoko onnitumererya awe opaka aHeeberi 13:15.

16. Malakiheryo xeeni ari Onamukuttho 19, annikhaliherya wuupuwela ovirikana okhanle eriyari ya atthu animurumeela Muluku ni atthu ahinimurumeela?

¹⁶ Wira nikhale atthu oowaarya, nihaana okhalana mweettelo woovirikana ni atthu a olumwenku ola. Nto owo pooti okhala muxankiho muulupale. Okathi mukina, ale ninsomana ahu oxikola, ninvarana ahu muteko, amusi ahu ahikhanle Anamoona Yehova ni atthu akina, pooti onikhanyererya opaka itthu saarowa ohonona waataana wahu ni Yehova. Akhala wira eyo enimwiiraneya, nihaana opaka yoothanla ya faita yinceene. Etthu xeeni enrowa onikhaliherya opaka yoothanla yooloka? Nkahaya muupuwele malakiheryo oovara murima ari Onamukuttho 19:19. Yoolepa eyo enihimya so: “Muhiwareké ikuwo sovirikana otthaviwa”. Nlamulo nle, naaniwiiriha aisarayeli okhala oovirikana ni atthu a maloko makina. Ekeekhai wira olelo-va, khahiyo vootakhala owara ikuwo sitthaviwe ni itthu soovirikana ntoko nxotte ni sisaale. Hiyo ninnisuwela wira ti voohiloka waatakiha atthu ahineettela malamulo a mBiibiliyani. Atthu awo anihela muhina ale ninsomana ahu oxikola, ninvarana ahu muteko ni amusi ahu ahikhanle Anamoona a Yehova. Ekeekhai wira hiyo ninnaaphenta vanceene amusi ahu ni ninniimananiha waaphenta atthu akina. Masi hata vari siiso, okathi nimpaka ahu soothanla sa efaita yinceene mookumini mwahu, ninnooniherya wira ninnimwiiwelela Yehova hata yoothanla ahu evirikanaka ni atthu a olumwenku ola. Musuweleke wira opaka eyo etthu yooloka, mwaha woowi nimphavela okhala atthu oowaarya ni okhala atthu a Muluku.—2 aKor. 6:14-16; 1 Ped. 4:3, 4.

17-18. Onamukuttho 19:23-25, onniixuttiha exeeni?

¹⁷ Moolumo oowi “Miyo ka Apwiya, Muluku”, yaanaakhaliherya aisarayeli ohela nipuro noopacerya waataana waya ni Yehova. Moota xeeni? Onamukuttho 19:23-25 onnaakhula. (Mmusome.) Nkahaya muupuwele ele moolumo awo yaataphulela aya wa aisarayeli nuumala okela Elapo Yooleiheriwa. Akhala wira mutthu aanaala  mwiri wa muhokorokho, sahaana ovira iyaakha tthaaru ohilyiiye mihokorokho sa mwiri aalale awe. Vano mwaakha wa neexexe, mihokorokho iyo saahaana ovalaanyiwa wira sarumeeliweke empa ya Muluku. Mwaakha wa neethanu, aisarayeli yaahaana opacerya olya mihokorokho sa mwiri yaalale aya. Nlamulo nle, naanaakhaliherya aisarayeli osuwela ele yaareerela aya ohela nipuro noopacerya mookumini mwaya. Awo yaahaana omuroromela Yehova wira aamwaavaha itthu saathowa akhala wira yaamuhela nipuro noopacerya omukokhorela. Nave yaahaana osuwela wira Yehova aamwaavaha yoolya. Muluku aahaatumererya aisarayeli okhala atthu oovaha vaavo yaavaha aya musurukhu aya ni mireerelo saya sikina empa ya Muluku, opuro yoowo aakokhoreliwa awe.

¹⁸ Nlamulo niri Onamukuttho 19:23-25, ninninuupuxerya Mwaha Yesu Alavunle awe Vamwaako. Yesu aahimmye so: “Muhiye oxanka mwaha wa . . . etthu yoolya ni yoowurya, aahiiso etthu yoowara”. Nuumala-vo, aahincererya oriki: “Tiithi inyu ori wiirimu, onnisuwela wira itthu iya sotheene sinnoothowani”. Yehova onoonikhapelela onivahaka itthu sinnithowa ntoko siisaale onaakhapelela awe axipalame. (Math. 6:25, 26, 32) Ninnikupali wira Muluku onoonikhapelela onivahaka itthu sinnithowa. Nihaana waavaha “itthu sooreera” atthu oothoiwa wira naakhaliherye, masi khivanreerela olaleya. Nave nihaana osiveliwa ovaha musurukhu ahu wira nikhaliherye muloko ahu. Yehova onniweha vaavo nnaavaha ahu atthu akina ni ooleiherya wira onoonitthuvela. (Math. 6:2-4) Vaavo ninkhala ahu atthu oovaha, ninnooniherya wira nihiixutta etthu eliivuru ya Onamukuttho 19:23-25.

19. Etthu xeeni mwiixuntte anyu Onamukuttho ekapiitulu 19?

¹⁹ Mpakha-va, noothokorerya iversiikulu vakhaani sa ekapiitulu 19 ya eliivuru ya Onamukuttho. Iversiikulu iyo, soonikhaliherya osuwela moota woomutakiha Muluku ahu oowaarya. Vaavo nimmutakiha ahu, hiyo ninnooniherya wira ninniphavela okhalana ‘mweettelo woowaarya’. (1 Ped. 1:15) Atthu anceene ahinimurumeela Yehova, ahoona wira hiyo nookhalana mweettelo wooloka. Tthiri eyo ehaakhaliherya atthu akina onvuwiha Yehova. (1 Ped. 2:12) Hata vari siiso, sookhala itthu sikina nniixutta ahu siri eliivuru ya Onamukuttho ekapiitulu 19. Mwaha onittharelana, ninrowa othokorerya iversiikulu sikina sa ekapiitulu ela seiyo sinrowa onikhaliherya okhala atthu “oowaarya” mikhalelo sikina sa okumi ahu ntoko Pedru onitumerenrye awe.