1. Ano nga sagdon an iginhatag ni apostol Pedro ha iya mga igkasi-tumuroo, ngan kay ano nga an iya sagdon baga hin imposible masunod?

NAGLALAOM man kita nga mabuhi ha langit o ha tuna, makakapahimulos kita ha paghisgot han sagdon ni apostol Pedro ha dinihogan nga mga Kristiano ha siyahan nga siglo. Hiya nagsurat: “Pariho ha Baraan nga Dios nga nagtawag ha iyo, magin baraan kamo ha ngatanan niyo nga panggawi, kay nahisurat na: ‘Kinahanglan magin baraan kamo, kay ako baraan.’” (1 Ped. 1:15, 16) Hini nga mga pulong, aton nahibaroan nga masusubad naton hi Jehova, nga amo an pinakamaopay nga ehemplo han pagkabaraan. Kaya naton magin baraan ha aton panggawi, ngan kinahanglan naton buhaton ito. Baga hin imposible ito kay diri kita perpekto. Hi Pedro mismo nakahimo hin mga sayop; pero iginpapakita han iya ehemplo nga kaya naton “magin baraan.”

2. Ano nga mga pakiana an aton hihisgotan hini nga artikulo?

² Hini nga artikulo, aton hihisgotan ini nga mga pakiana: Ano an iginpapasabot han pagkabaraan? Ano an igintututdo ha aton han Biblia mahitungod han pagkabaraan ni Jehova? Paonan-o kita magigin baraan ha aton panggawi? Ano an koneksyon han pagkabaraan ngan han aton relasyon kan Jehova?

3. Ano an panhunahuna han damu nga tawo mahitungod han usa nga baraan nga tawo, pero diin kita makakabiling hin husto nga impormasyon?

³ Kon ginhuhunahuna han mga tawo an usa nga tawo nga baraan, naiimadyin han damu ha ira an usa nga indibiduwal nga nakasul-ot hin panrelihiyon nga bado, diri nahiyom, ngan seryoso kitaon. Pero diri sugad hito an baraan nga mga tawo. Hi Jehova, nga baraan, iginhuhulagway sugad nga “malipayon nga Dios.” (1 Tim. 1:11) Adton  mga nagsisingba ha iya gintatawag nga “malipayon.” (Sal. 144:15) Ginkondenar ni Jesus adton nagsul-ot hin espesyal nga mga bado ngan nagbuhat hin mag-opay nga mga butang basi la makita han mga tawo. (Mat. 6:1; Mar. 12:38) Sugad nga mga Kristiano, maaram kita han iginpapasabot han pagkabaraan tungod han aton nahibaroan ha Biblia. Kombinsido kita nga an aton baraan ngan mahigugmaon nga Dios diri gud maghahatag ha aton hin sugo nga diri naton kaya sundon. Salit han nagsugo hi Jehova ha aton: “Kinahanglan magin baraan kamo,” sigurado kita nga posible ini mahimo. Syempre, antes kita magin baraan ha aton panggawi, kinahanglan masabtan anay naton kon ano an pagkabaraan.

4. Ano an iginpapasabot han mga pulong nga “baraan” ngan “pagkabaraan”?

⁴ Ano an iginpapasabot han pagkabaraan? Ha Biblia, an mga pulong nga “baraan” ngan “pagkabaraan” kaurogan na nga nagtutudlok ha moral ngan relihiyoso nga kalimpyo o pagkasagrado. Mahimo liwat ito mangahulogan hin pagin iginlain basi mag-alagad ha Dios. Ha iba nga pagkayakan, masisiring nga baraan kita kon limpyo kita ha moral, nagsisingba kita kan Jehova ha paagi nga iya ginkakarawat, ngan may duok kita nga relasyon ha iya. Bisan an paghunahuna pa la nga puydi kita magkaada duok nga relasyon ha aton baraan nga Dios naiimpres na kita, labi na kon ikukonsiderar naton an igintututdo ha aton han Biblia mahitungod ha pagkabaraan ni Jehova.

5. Ano an aton mahibabaroan mahitungod kan Jehova tikang ha matinumanon nga mga anghel?

⁵ Hi Jehova putli ngan limpyo ha ngatanan nga paagi. Nahibaroan naton ini tikang ha diskripsyon ha iya han mga serapin—mga anghel nga hirani ha iya trono. An iba ha ira nagsiring: “Baraan, baraan, baraan hi Jehova han mga hugpo.” (Isa. 6:3) Syempre, basi an mga anghel magkaada duok nga relasyon ha ira baraan nga Dios, kinahanglan nira magin baraan—ngan baraan gud hira. Ngani, presensya pa la han usa nga anghel ni Jehova, mahimo na makapabaraan ha usa nga lugar ha tuna. Ito an nahitabo han hi Moises nakadto ha dapit nga may naglalaga nga tunukon nga tanom.—Ex. 3:2-5; Jos. 5:15.

6-7. (a) Sumala ha Exodo 15:1, 11, paonan-o ginpabug-atan ni Moises an pagkabaraan han Dios? (b) Ano an nagpapahinumdom ha ngatanan nga Israelita nga baraan an Dios? (Kitaa an retrato ha kobre.)

⁶ Katapos pangunahan ni Moises an mga Israelita ha pagtabok ha Dagat nga Pula, iya ginpabug-atan ha ira nga an ira Dios nga hi Jehova baraan. (Basaha an Exodo 15:1, 11.) An panggawi han mga magsiringba han mga dios ha Ehipto diri gud baraan. Diri liwat baraan an mga nagsisingba ha mga dios ha Canaan. Bahin han ira pagsingba an paghalad hin mga bata ngan maraot gud nga seksuwal nga mga buhat. (Lev. 18:3, 4, 21-24; Deut. 18:9, 10) Ha kabaliktaran, hi Jehova diri gud magsusugo ha iya mga magsiringba nga buhaton an bisan ano nga makakahugaw ha ira. Bug-os gud hiya nga baraan. Basi mapahinumdoman hito an mga Israelita, igin-ukit ha usa nga bulawan nga plaka ha putos ha ulo han hitaas nga saserdote an mga pulong: “An pagkabaraan kan Jehova.”—Ex. 28:36-38.

⁷ An mensahe nga aada hito nga plaka magpapahinumdom ha bisan hin-o nga nakakakita hito nga hi Jehova tinuod gud nga baraan. Pero kumusta man kon an usa nga Israelita diri makakita han plaka tungod kay diri hiya makakadaop ha hitaas nga saserdote? Diri ba niya mahibabaroan nga baraan hi Jehova? Mahibabaroan la gihapon. Nababatian han tagsa nga Israelita ito nga mensahe kon ginbabasa an Balaud ha atubangan han kalalakin-an, kababayin-an, ngan kabataan. (Deut. 31:9-12) Kon nakadto ka, mababatian mo ini nga mga pulong: “Ako hi Jehova nga iyo Dios, ngan kinahanglan . . . magin baraan kamo, kay ako baraan.” “Kinahanglan magin baraan kamo ha akon atubangan, kay ako, hi Jehova, baraan.”—Lev. 11:44, 45; 20:7, 26.

8. Ano an aton mahibabaroan ha Levitico 19:2 ngan 1 Pedro 1:14-16?

⁸ Aton usisahon an ginsiring ni Jehova nga  nakarekord ha Levitico 19:2 nga kinahanglan basahon ha atubangan han ngatanan nga Israelita. Hi Jehova nagsiring kan Moises: “Pakiistorya ha bug-os nga komunidad han mga Israelita ngan sumati hira, ‘Magin baraan kamo, kay ako, hi Jehova nga iyo Dios, baraan.’” Posible nga ito an ginkotar ni Pedro han gin-aghat niya an mga Kristiano nga “magin baraan.” (Basaha an 1 Pedro 1:14-16.) Syempre, diri kita sakop han Mosaiko nga Balaud. Pero an ginsurat ni Pedro nagkukompirma han aton nahibaroan ha Levitico 19:2, nga hi Jehova baraan ngan adton nahigugma ha iya dapat mangalimbasog nga magin baraan. Kinahanglan buhaton naton ini ha langit man o ha paraiso nga tuna an aton paglaom.—1 Ped. 1:4; 2 Ped. 3:13.

9. Paonan-o kita magpapahimulos ha pagkonsiderar han Levitico kapitulo 19?

⁹ Tungod kay karuyag naton lipayon an aton baraan nga Dios, karuyag gud naton nga mahibaroan kon paonan-o kita magigin baraan. Hi Jehova may iginhatag nga praktikal nga mga sagdon kon paonan-o naton ito mahihimo. An usa han maopay gud nga makukuhaan hito nga mga sagdon amo an Levitico kapitulo 19. An Hebreo nga eskolar nga hi Marcus Kalisch nagsurat: “Ini nga makatirigamnan nga kapitulo bangin amo an pinakadetalyado, an may pinakamagkadurodilain nga topiko, ngan ha pipira nga paagi, an pinakaimportante nga seksyon ha Levitico ngan ha Pentateuch.” Kitaon naton an pipira nga bersikulo hini nga kapitulo nga nagsusulod han importante nga mga leksyon mahitungod han mga aspekto han aton adlaw-adlaw nga pagkinabuhi. Samtang ginbubuhat naton ito, hinumdumi nga ini nga mga leksyon gin-unabi katapos han mga pulong: “Magin baraan kamo.”

10-11. Ano an ginsisiring han Levitico 19:3 nga kinahanglan naton buhaton, ngan kay ano nga importante nga sundon naton ito?

¹⁰ Katapos ni Jehova magsiring nga an mga Israelita kinahanglan magin baraan, nagsiring liwat hiya: “Irespeto han tagsa ha iyo an iya nanay ngan an iya tatay . . . Ako hi Jehova nga iyo Dios.”—Lev. 19:2, 3.

¹¹ Klaro nga kinahanglan naton sundon an sugo han Dios nga pasidunggan an aton mga kag-anak. Hinumdumi, han may lalaki nga nagpakiana kan Jesus: “Ano nga maopay an kinahanglan ko buhaton basi makarawat an kinabuhi nga waray kataposan?” Kaupod han baton ni Jesus, nagsiring  hiya nga kinahanglan pasidunggan han lalaki an iya tatay ngan nanay. (Mat. 19:16-19) Ginkondenar pa ngani ni Jesus an mga Pariseo ngan mga eskriba tungod han ira ginhimo nga pasangil basi diri nira maihatag ha ira mga kag-anak ito nga pagpasidungog. Hito nga paagi, ‘ginhimo nira nga waray pulos an pulong han Dios.’ (Mat. 15:3-6) Kaapi ha “pulong han Dios” an ikalima han Napulo nga Sugo pati na an aton nabasa ha Levitico 19:3. (Ex. 20:12) Makausa pa, hinumdumi nga an sugo nga mababasa ha Levitico 19:3—nga respetuhon han usa an iya nanay ngan tatay—gin-unabi katapos gud la han mga pulong: “Magin baraan kamo, kay ako, hi Jehova nga iyo Dios, baraan.”

12. Uyon ha sagdon nga mababasa ha Levitico 19:3, ano an mahimo naton ipakiana ha aton kalugaringon?

¹² Uyon ha sagdon ni Jehova nga pasidunggan an aton mga kag-anak, mahimo pakianhan naton an aton kalugaringon, ‘Kumusta ako hini nga bahin?’ Kon inaabat mo nga kulang pa an imo nabuhat ha naglabay, mahimo ka magdesisyon yana nga maghimo hin mga pagbag-o. Diri mo na mababag-o an naglabay, pero mahimo ka mangalimbasog tikang yana nga magbuhat hin dugang pa kaupod han imo mga kag-anak ngan maghimo hin mga paagi basi mas mabuligan pa hira. Bangin puydi ka maggahin hin dugang nga panahon basi makaupod hira. O bangin may dugang ka pa nga mahihimo basi mabuligan hira ha materyal, espirituwal, o emosyonal. Kon ginbubuhat mo ito, ginsusunod mo an sugo ha Levitico 19:3.

13. (a) Ano nga dugang nga sagdon an aton makikita ha Levitico 19:3? (b) Paonan-o naton masusubad an ehemplo ni Jesus, sugad han nakarekord ha Lucas 4:16-18?

¹³ An Levitico 19:3 nagtututdo ha aton hin usa pa nga butang mahitungod han pagin baraan. Gin-uunabi hito an pagtuman han Sabbath. An mga Kristiano diri sakop han Balaud, salit diri kita kinahanglan magsaurog han sinemana nga Sabbath. Pero damu an aton mahibabaroan kon paonan-o ginsaurog han mga Israelita an Sabbath ngan kon paonan-o hira nakapahimulos ha pagbuhat hito. An Sabbath usa nga panahon ha pagpahuway tikang ha mga buruhaton ngan paghatag hin atensyon ha espirituwal nga mga butang. * Salit ito an rason kon kay ano nga ha adlaw han Sabbath, hi Jesus napakadto ha sinagoga ha ira bungto ngan nagbabasa han Pulong han Dios. (Ex. 31:12-15; basaha an Lucas 4:16-18.) An sugo han Dios nga nakarekord ha Levitico 19:3 nga ‘tumanon an iya mga sabbath’ dapat magpagios ha aton nga ibanan an aton panahon ha adlaw-adlaw nga mga buruhaton basi makaghatag kita hin dugang nga atensyon ha espirituwal nga mga butang. Inaabat mo ba nga kinahanglan mo maghimo hin mga pagbag-o basi matuman ini nga sugo? Kon regular ka nga naggagahin hin panahon basi magpokus ha espirituwal nga mga butang, magkakaada ka hin duok nga relasyon kan Jehova, nga ginkikinahanglan para ha pagin baraan.

14. Ano nga importante nga kamatuoran an ginpapabug-atan ha bug-os nga Levitico kapitulo 19?

¹⁴ An Levitico kapitulo 19 pauroutro nga nag-uunabi hin importante nga kamatuoran nga makakabulig ha aton nga magpabilin nga baraan. An bersikulo 4 nagtatapos hini nga mga pulong: “Ako hi Jehova nga iyo Dios.” Ito nga ekspresyon o puropariho hito nga mga pulong mababasa hin 16 ka beses hini nga kapitulo. Nagpapahinumdom ini ha aton han siyahan nga sugo: “Ako hi Jehova nga imo Dios . . . Ayaw pagkaada hin iba nga mga dios labot ha akon.” (Ex. 20:2, 3) Kinahanglan siguruhon han tagsa nga Kristiano nga naruruyag magin baraan nga waray bisan ano o bisan hin-o nga magin mas importante kay ha iya relasyon ha Dios. Ngan tungod kay gintatawag kita nga mga Saksi ni Jehova, determinado kita nga likayan an bisan ano nga buhat nga magpapasipara han iya baraan nga ngaran.—Lev. 19:12; Isa. 57:15.

15. An mga bersikulo ha Levitico kapitulo 19 nga naghihisgot mahitungod han mga halad dapat magpagios ha aton nga buhaton an ano?

 ¹⁵ Iginpakita han mga Israelita nga ginkikilala nira hi Jehova sugad nga ira Dios pinaagi ha pagtuman han iya damu nga balaud. An Levitico 18:4 nasiring: “Sadang niyo tumanon an akon hudisyal nga mga desisyon, ngan sadang niyo sundon an mga surundon nga akon iginhatag ngan magkinabuhi kamo uyon hito. Ako hi Jehova nga iyo Dios.” An kapitulo 19 nag-uupod han pipira hito nga “mga surundon” para ha Israel. Pananglitan, an bersikulo 5-8, 21, 22 nag-uunabi mahitungod han mga halad nga hayop. An mga Israelita kinahanglan maghimo hito nga mga halad ha paagi nga diri ‘makakapasipara ha baraan nga butang ni Jehova.’ Ito nga mga bersikulo dapat magpagios ha aton nga lipayon hi Jehova ngan maghatag ha iya hin kinakarawat nga mga halad han pagdayaw, sugad han igin-aaghat ha aton han Hebreo 13:15.

16. Ano an bangin magpahinumdom ha aton han kaibahan hadton nag-aalagad ha Dios ngan hadton diri nag-aalagad ha iya?

¹⁶ Basi magin baraan, kinahanglan magin determinado kita nga magin iba tikang ha mga tawo nga diri nag-aalagad ha Dios. Mahimo ito magin makuri. Usahay, bangin presyuron kita han aton mga kaeskwela, mga katrabaho, diri tumuroo nga mga paryente, ngan iba pa nga makigbahin kita ha mga buruhaton nga makakaulang ha aton pag-alagad ha Dios. Kon ginpipresyur kita nira, kinahanglan naton maghimo hin importante nga desisyon. Ano an makakabulig ha aton nga makahimo hin tama nga desisyon? Tagda an usa nga makapainteres nga prinsipyo ha Levitico 19:19, nga an ultimo nga bahin hito nasiring: “Ayaw pagsul-ot hin bado nga hinimo ha duha nga klase hin inulang nga ginsalakot.” Ito nga balaud nakabulig nga makita an kaibahan han Israel ha kahigrani nga mga nasud. Diri na kita sakop han Balaud, salit diri sayop nga an usa nga Kristiano magsul-ot hin bado nga hinimo tikang ha ginhalo nga materyales, sugad han cotton ngan polyester. Pero diri naton karuyag nga magin pariho ha mga tawo nga an mga gintotoohan ngan binuhatan nakontra ha katutdoan han Biblia, bisan kon ito nga mga indibiduwal mga kaeskwela naton, mga katrabaho, o mga paryente. Syempre, hinigugma naton an aton mga paryente, ngan nagpapakita liwat kita hin gugma ha iba nga tawo. Pero may kalabotan ha importante nga mga aspekto han aton kinabuhi, determinado kita nga magin iba sugad nga katawohan ni Jehova. Hinumdumi nga an pagin iginlain para ha Dios bahin han pagin baraan. Importante gud ito kon nangangalimbasog kita nga magin baraan.—2 Cor. 6:14-16; 1 Ped. 4:3, 4.

17-18. Ano nga importante nga leksyon an aton mahibabaroan ha Levitico 19:23-25?

¹⁷ An mga pulong nga “Ako hi Jehova nga iyo Dios” nagpahinumdom ha mga Israelita nga dapat nira iprayoridad an ira relasyon kan Jehova. Paonan-o nira ito mahihimo? Iginpapakita han  Levitico 19:23-25 an usa nga paagi. (Basaha.) Tagda kon ano an mahimo igpasabot hini nga mga pulong para ha mga Israelita kon makasulod na hira ha Tuna nga Iginsaad. Kon an usa nga tawo magtanom hin mga kahoy para han iya pagkaon, diri hiya dapat kumaon han bunga hito ha sulod hin tulo ka tuig. Ha ikaupat ka tuig, an bunga hito ilalain para gamiton ha santuaryo han Dios. Mahimo la kumaon han bunga hito an tag-iya ha ikalima na ka tuig. Ini nga balaud nakabulig ha mga Israelita nga masabtan nga diri dapat nira unahon an ira mga panginahanglan. Kinahanglan nira sumarig kan Jehova sugad nga ira Paratagana ngan iprayoridad ha ira kinabuhi an pagsingba ha iya. Sisiguruhon niya nga diri hira magkukulang hin pagkaon. Ngan gindasig hira han Dios nga maghatag hin damu nga regalo ha santuaryo, an sentro han pagsingba ha iya.

¹⁸ An balaud nga nakarekord ha Levitico 19:23-25 nagpapahinumdom ha aton han mga ginsiring ni Jesus ha Sermon ha Bukid. Hiya nagsiring: “Ayaw na kamo pagkinabaraka . . . kon ano an iyo kakaunon o kon ano an iyo iinumon.” Hi Jesus nagpadayon: “An iyo Amay ha langit maaram nga ginkikinahanglan niyo ini ngatanan nga butang.” Tataganahan kita han Dios, sugad han iya ginbubuhat bisan ha mga tamsi. (Mat. 6:25, 26, 32) Nasarig kita kan Jehova sugad nga aton Paratagana. Ngan naghahatag kita ha mga nanginginahanglan hin “mga regalo tungod ha kalooy” pero diri naton ito ginpipinanumat ha iba. Nalilipay liwat kita nga magdonar para ha mga kagarastohan han kongregasyon. Nakikita ni Jehova an sugad nga pagin mahinatagon, ngan babalosan kita niya. (Mat. 6:2-4) Kon mahinatagon kita, iginpapakita naton nga nasasabtan naton an mga leksyon ha Levitico 19:23-25.

19. Paonan-o ka nagpahimulos ha pag-usisa han pipira nga bersikulo han Levitico?

¹⁹ Pipira la nga bersikulo han Levitico kapitulo 19 an aton gin-usisa, ngan nakabulig ito ha aton nga masabtan kon paonan-o kita magigin baraan pariho han aton baraan nga Dios. Kon ginsusubad naton hiya, iginpapakita naton nga nangangalimbasog kita nga ‘magin baraan ha ngatanan naton nga panggawi.’ (1 Ped. 1:15) Damu han mga diri nag-aalagad kan Jehova an nakakaobserbar han maopay nga panggawi han iya katawohan. Ngani, nagpagios ito ha pipira nga himayaon hi Jehova. (1 Ped. 2:12) Pero damu pa an aton mahibabaroan ha Levitico kapitulo 19. Hihisgotan ha sunod nga artikulo an iba pa nga bersikulo hito nga kapitulo, ngan mabulig ito ha aton nga masabtan kon ha ano pa nga mga bahin han aton kinabuhi mahimo kita “magin baraan,” sugad han igin-aghat ni Pedro.