1-2. Rosai kawos kwar ro farkarkor ḇepon ya, ma rosai nari kawos ro farkarkor inera?

RO FARKARKOR ḇepon ya, kawos kwar parenta riḇeso ro Imamat 19. Imnis ra, ro mnuk ḇe 3 ya, Yahwe iwan er Israel sya fa sesyowi kma ma sna sesya. Bisa kosouser wos farkin ḇyena kuker kofamfon fandandun baken saprop, rur ma emosi sinan koḇesi. Ro mnuk ani kako, Allah iwan kawasa Ḇyesi fa sifrur Ras Mananai. Baboine kofrur Ras Mananai ḇa raryano, bisa kosouser wos farkin ḇyena kuker kobuk oras ro rasras koḇena faro fandandun rur koḇena. Kofrur rarirya ido, kofasnai koḇesewar fa kosren raris Allah koḇedi imnis ḇeḇekofen ro Imamat 19:2 ma 1 Petrus 1:15.

² Ro farkarkor ine, nari kawos mnuk-mnuk ḇese ro Imamat fasal 19. Mnuk-mnuk anna na nafnoḇek ko fa kofasnai frur pyum faro snonggaku ḇeknapro ma ḇepraf sya, kanggarkar ḇa fyor kofarḇaḇyan, ma kofasnai saswar faro min koḇesi. Inja, mgorama kofarkor roi anna insama kosren raris Allah koḇedi.

3-4. Ro Imamat 19:14, rariso er Israel sifrur pyum snonggaku ḇeknapro ma ḇepraf sya rai?

³ Wasya Imamat 19:14. Yahwe imarisen insama kawasa Ḇyesi sifrur pyum snonggaku ḇepro ma ḇepraf sya. Imnis ra, snonggaku Israel sipok sifras awer snonggaku ḇepro sya.  Wos fras ro mnuk ine, kyurfasnai ḇe smun ḇaido sawos fras snonggaku oso. Inja inema roi ḇepyum ḇa kaku! Snonggaku ḇepro ryower rosai snonggaku sikofen ḇe i na ḇa, inja na ibriwarek manggundi ḇa.

⁴ Ro mnuk ani kako, Yahwe dawos ḇe kawasa Ḇyesi sipok ḇaḇeri fa ”srir roi ḇedwarek ro ḇarpon snonggaku ḇepraf sya”. Syap oso ikofen, ”Ro Timur Tengah fafisu iwara [snonggaku ḇeknapro ma ḇepraf] sifrur pyum si ḇa ma smun ker si rarirya.” Imbude snonggaku oso ḇefawi ḇesawarwar ḇa ryir roi ḇedwarek ro ḇarpon snonggaku ḇepraf ani nyan ḇyena insa ifrur fa ḇyepar ḇaido ifrur rarirya insa snonggaku simbrifi. Inja roi inema roi ḇepyum ḇa kaku! Ro sasoser ḇero mnuk 14 ine, Yahwe fyasnaiḇair ḇe kawasa Ḇyesi fa sfasnai sawarwar faro ḇeknapro ma ḇepraf sya.

5. Rariso kofasnai sawarwar faro snonggaku ḇeknapro ma ḇepraf sya rai?

⁵ Yesus fyasnai sawarwar faro ḇeknapro ma ḇepraf sya. Komam pan rosai Yesus ikofenḇair ḇe Yohanes Ḇemasi ani: ”Snonkaku ḇepraf smam, snonkaku ḇepapipen simbran, snon ḇeduf pado seḇefasren, snon ḇepro simnaf, [ma] snon ḇemar sḇeḇeḇawes.” Ma rofafisu smam Yesus mujisat ḇyedi, ”kawasa ḇemam roi ḇeḇesya ani kako sisandik Allah”. (Luk. 7:20-22; 18:43) Snonggaku Kristen koine komarisen koso Yesus nyan ḇyena fa kofasnai sawarwar faro ḇeknapro ma ḇepraf sya. Komarisen kofasnai frur pyum ma kaḇaḇaḇ faro si. Kakuḇae, Yahwe byuk samambraḇ fa kofrur mujisat ḇa. Ḇape, kona fakamaman fa kobaryas abar ḇepyum faro snonggaku ḇepraf ro jasmani ma rohani sya. Kokofenḇair ḇe si snar ro fafisu iyama nari snonggaku sḇarek ro firdaus ro supswan ma siprei kaku ro jasmani ma rohani. (Luk. 4:18) Fyor srower abar ḇepyum ine, ḇebor sya simarisen sisandik Allah I.

6. Rariso Imamat fasal 19 ifnoḇek ko fa kofawi kaku Parenta Risamfur?

⁶ Ro mnuk riḇeso ro Imamat fasal 19 nafnoḇek ko fa kofawi kaku Parenta  Risamfur. Imnis ra, parenta ḇeḇewar ikofen, ”Kwarawraw awer.” (Kel. 20:15) Snonggaku oso imbude kyara fyor dun roi oso nya ḇa na, ima isouser kwar parenta ani. Ḇape, kofawi roi oso ḇese nasya na smam ḇe karawraw kako.

7. Rosai imbude ḇebaboḇ oso ifrur ya inja ḇyeyuk parenta ḇewar ya?

⁷ Ḇeḇaboḇ oso imbude kyara ima dakkarawraw ḇa snar dun roi oso nya ḇa na. Ḇape, rofyor ḇyaboḇ ḇaido ifrur farḇaḇyan ido danggarkar ḇa ke? Ro Imamat 19:35, 36, Yahwe ikofen, ”Mgopok mgobuk ukuran, wankyara, ma rosaser ḇekaku ḇa awer. Fandun fa mgobuk wankyara ḇekaku, karui wankyara ḇekaku, takaran ḇemnis faro roḇean ḇesyor na, ma takaran ḇemnis faro mani ḇaido cairan na.” Rofyor snonggaku ḇebaboḇ oso ḇyepake wankyara ḇaido takaran ḇekaku ḇa fa byukifrowes ḇekoḇes sya, ine namnis kuker kyaraw. Mnuk-mnuk ḇese ro Imamat fasal 19 nfasnaibos roi ani.

8. Rariso parenta ro Imamat 19:11-13 ifnoḇek snonggaku Yahudi sya fa sfawi kaku wos farkin ḇero parenta ḇewar ine rai, ma rosai fandun fa kofrur kaku ya?

⁸ Wasya Imamat 19:11-13. Imamat 19:11 ḇyerandak kuker wos: ”Mgokarawraw awer.” Ro mnuk 13 ikofen, ”Mgopok mganggar awer min mgoḇansi.” Parenta ḇeḇewar fyasnaiḇair karawraw ima syasar. Inja, rofyor snonggaku oso danggarkar ro farḇaḇyan ḇyena, inema namnis kuker kyarawraw. Ḇape, parenta oser-oser ḇesya ro syap Imamat ine ifnoḇek snonggaku Yahudi sya sfawi kaku wos farkin ḇero parenta ine. Fandun fa kokarauser Yahwe mamam Ḇyena faro snonggaku ḇeanggarkar ma ḇekarawraw sya. Bisa kokara fakfuken nane: ’Rofyor kofarkor Imamat 19:11-13, roi ono naisya fandun fa yafadwer ro kenem ayedi ro farḇaḇyan ma fararur yena ke?’

9. Rariso sasoser ro Imamat 19:13 kyadaunwarek snonggaku sor fa ḇefararur sya?

⁹ Roi ḇese ḇesya wer ro anggarkar ḇa. Inja snonggaku Kristen ḇefrur farḇaḇyan fandun fa smamuser kaku fyor sor snonggaku ḇesesya fa sfararur. Imamat 19:13 sisisen na kuker wos nane: ”Mgopok mgokarwarek gaji ro snonggaku mgoḇak sya isof ro meser arwo awer.” Ro Israel ido, na sḇak ḇefararur ro yaf sya ro ras ani ḇeri rofyor simnai sfararure. Rofyor skarwarek gaji sena ido nari sna pipi ḇa fa sfamfon fandandun ro kina sena ro ras ani. Yahwe ikofen ḇo doḇe, ”Isya ḇyesusa ma ikenem kuker gaji ikyar ani.”​—Ul. 24:14, 15; Mat. 20:8.

10. Rosai kofarkor wer ro Imamat 19:13 ine?

¹⁰ Ro baboine ido, ḇefararur sya sḇak gaji sena kali oser ḇaido suru ro paik oser na, ḇoi sḇak si ro ras nakam ḇa. Ḇape, wos farkin ro Imamat 19:13 ḇyefandun kaker. Ḇebukor ḇeḇeso ḇeyuf fararur na, sifrur mnis ḇefararur sya ḇa, kuker sbuk gaji ḇebaḇa kaku ḇe si. Sifawi ḇefararur sine imbude sismai fararur ḇese noḇa ma gaji sena nabaḇa raryano, na sfararur pdef ro moḇ ani. Ḇebukor ḇefrur rarirya, imnis ra ”kyarwarek gaji snonggaku oso dor fa ḇefararur” sya. Inja, snonggaku Kristen ḇefrur farḇaḇyan fandun fa myam kaku insama ḇefararur kukri sya ifrur mnis si kam. Kirine, mgorama kawos roi ḇese wer na kofarkor ro Imamat fasal 19 ine.

11-12. Kuker dap kaḇer Imamat 19:17, 18, rosai Yesus ikofenbos kaku ya?

¹¹ Allah imewer kaku kofrur roi ḇefrur samswen snonggaku ḇesesya. Ḇoi, imarisen  kofrur ḇepyum syadi wer. Imnis Allah parenta Ḇyena ro Imamat 19:17, 18. (Wasya.) Yahwe fyasnaibos kaku ḇo doḇe, ”Mgoswar min mgoḇesi raris mgoswar manggun mgo.” Inja, snonggaku Kristen oso fandun fa ifrur roi ani fyor imbe ifrur Allah imarisen.

¹² Yesus ikofenbos kaku snar parenta ḇeḇefas ro Imamat 19:18 ima fyandun kaku. Snonggaku Farisi oso raso ifuken ḇe Yesus i, ”Sasoser rosaiso ḇeba syadi ro sasoser Refo Yahudi?” Yesus kyarem faroi ”sasoser ḇepon ma beba syadi” isoine parenta fa waswar Yahwe kuker sne ḇesiper, kenem bedi ḇesiper, ma karkara ḇena ḇesiper. Mura, Yesus dap kaḇer Imamat 19:18 ḇo doḇe, ”Ḇeḇesuru ḇemnis kuker sasoser, ’Waswar min besi imnis waswar manggundaw.’” (Mat. 22:35-40) Inja, nyan nabor naisya bisa kofasnai saswar faro min koḇesi. Nyan ḇeḇeso na kofawi naro Imamat fasal 19 ine.

13. Rariso Yusuf iso mnis anun ḇero Imamat 19:18?

¹³ Nyan oser fa kofasnai saswar faro min koḇesi iso koso anun ḇero Imamat 19:18, isoine, ”Mgoḇemunsu awer ḇaido mgokram masasor awer faro min mgoḇesi.” Inja bar eba ro ko, imbude komam snonggaku ḇekram masasor faro bati ḇero moḇ fyararur, bati ro rumfarkor, karyer byesya baido oso ro kina ḇyesi rawo taun ḇe taun! Yusuf naek pari ḇesya sikram masasor faro i, inja sifrur roi ḇeḇyeḇa faro i. (Kej. 37:2-8, 25-28) Ḇape Yususf ifrur rariryaḇa faro naek ḇyesi! Nya swaf fa myun eḇa ḇyesi rariyano ifrur roi ani ḇa. Imḇape fyasnai sawarwar faro si. Roi ifrur anna namnis kuker anun ḇero Imamat 19:18.​—Kej. 50:19-21.

14. Rosai ḇefnai wos farkin ḇero Imamat 19:18 nefandun kaker isof ro kirine?

¹⁴ Snonggaku Kristen imbe ifrur Allah imarisen ido, fandun fa iso Yusuf nyan ḇyena, ḇemarisen ḇebuk ampun ḇe eba ḇyesi ma ḇemunsu si ḇa. Raris ḇefasnai ro nadi Yesus fyarkor na. Yesus doḇe fandun fa koḇuk ampun ḇe snonggaku ḇesasar faro konsya. (Mat. 6:9, 12) Manwawan Paulus ikako byuk anun ḇemnis  rarirya faro snonggaku Kristen. Doḇe, ”Naek srar yesi! Mkomunsu awer.” (Rm. 12:19) Ikofen kako, ”Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi.” (Kol. 3:13) Yahwe wos farkin Ḇyena ipok ifarwe ḇa. Inja, wos farkin ḇero Imamat 19:18 nefandun kaker isof ro kirine.

15. Sarber risai na ḇefnoḇek ko fa kofawi kaku koḇuk ampun ḇe snonggaku ḇese ma kokram masasor ḇa ine fyandun kaku?

¹⁵ Kokarapan sarber ine. Rofyor sne koḇena naduf ido, ine namnis kuker par. Par ono nasya nggasun, ma ono kako naba kaku. Imnis ra, rofyor kopansawek amplop, brampin koḇena imbude ḇyepar snar kertas kopansawek ani. Randak ya imbude kosyur kuker na mboi par anna nari fasaw kaku imas. Ras oser ḇaido suru kwar ido imbude komam par anya wer ḇa. Inja fyorno ido, snonggaku ḇesesya, sifrur sasar ḇebaḇa ḇe ko. Imnis ra, bati koḇedi oso imbude ikofen ḇaido ifrur roi oso ḇefrur duf sne koḇena, ḇape bisa kobuk maf ḇeri ḇe i. Rariso fyor par ani iba syadi kwar? Fyor dokter isip par ani na pyarkepen na, kopok kokyaren par ani ḇa. Snar kokyaren na ido, par ani iba syadi wer. Fyor snonggaku oso sifrur sneri iduf ido, imbude kyara ker roi snonggaku ani ifrur ḇe i na. Fyor snonggaku oso ikram masasor ido, nari ḇyesusa ro manggundi. Inja, ipyum kaku yaiso iso anun ro Imamat 19:18!

16. Ro Imamat 19:33, 34 ya, rariso er Israel sifrur pyum snonggaku mandaman sya raya, ma rosai kofarkor ro roi ine?

¹⁶ Rofyor Yahwe dor er Israel sya fa siswar min sesya, ima kyurfasnai ḇe min ro snonggaku Israel sya monda ḇa. Mboi dor si kako fa siswar snonggaku mandaman ḇero ris sesya. Iso ikofenbos ro Imamat 19:33, 34. (Wasya.) Fandun fa sifrur snonggaku mandaman sya ”raris snonggaku Israel ro moḇ ya”. Ma, Yahwe dor er Israel sya ḇo doḇe, ”Mgoswar si raris mgoswar manggun mgo”. Imnis ra, ro Sasoser Moses, fandun fa er Israel sbuk ḇe snonggaku mandaman sya ma snonggaku ḇesabarar sya fa siryur mnuk-mnuk ḇesapi na. (Im. 19:9, 10) Farkankin ḇero mnuk ani nefandun kaku faro snonggaku Kristen ro kirine. (Luk. 10:30-37) Rosai ḇefnai ya? Snar snonggaku yuta sya sia sifrar sibur ḇe sup ḇese, ma ḇeḇeso ro si imbude sḇarek fanam kuker ko. Inja, fandun  fa kofrur pyum si kuker komam rarwas si ḇa ma koḇesyowi si, isoine snon, bin ma romawa sya kam.

17-18. (a) Imnis Imamat 19:2 ma 1 Petrus 1:15 ya, rosai kofrur kaku ya? (b) Manwawan Petrus danun ḇe ko fa kofrur fararur ḇefandun risai?

¹⁷ Imamat 19:2 ma 1 Petrus 1:15 ikofenḇair snar Allah kawasa Ḇyesi fandun fa sisren. Ro Imamat pasal 19, mnuk nabor nasya ḇefnoḇek ko fa kofawi moḇsa kofrur Allah imarisen. Kawos kwar mnuk ḇeḇeso ḇefasnai roi fandun fa kofrur na, ma roi ḇepyum ḇa kopok kofrur ḇa na. * Ma, Kitab-Kitab Yunani Kristen fyasnaiḇair anun ḇero Imamat fasal 19 nefandun kaker fa koso na isof ro kirine. Ḇape, roi oso isya Manwawan Petrus ikofenḇair na.

¹⁸ Imbude koḇeari ker ḇe Yahwe I ma kofrur roi ḇepyum faro snonggaku ḇesesya kwar. Ḇape, roi oso ḇepyum syadi isya Petrus ikofen fa snonggaku Kristen sifrur na. Rofyor Petrus danun ḇaim ḇe ko fa kosren ro kankenem koḇena kam, ikofen ḇo doḇe ’Mgofasos swaruser mkoḇena oser-oser fa mgofararur marḇak.’ (1 Ptr. 1:13, 15) Fandun fa kofararur marḇak faro roi risai? Petrus doḇe snar Kristus naek ḇyesi ḇesmai ramrem sya, ’nari sḇaryas Allah fararur ḇeba Ḇyena ḇeyor si kwar’. (1 Ptr. 2:9) Ro kirine snonggaku Kristen sya kam sna fakamaman fa sifrur fararur ḇefandun kaku ine. Ro roi ḇebor kofrur kwar na, fararur ine iso ḇepyum ḇe snonggaku ḇesesya. Komarisen kaku snar bisa kosya ro kawasa ḇesren ine ḇebaryas ma ḇefarkor myaren ma ḇeryaḇ pdef! (Mrk. 13:10) Inja, rofyor koḇesewar fa koso wos farkin ḇero Imamat fasal 19, kofasnai kaku koswar Allah ma min koḇesi. Ma kofasnai snar imbe kosren roro kankenem koḇena kam.