1-2. Cosa kita ya considera del ya pasa articulo y cosa kita hay considera na este articulo?

DEL ya pasa articulo, ya considera kita cuanto practical consejo que puede incuntra na Levitico capitulo 19. Por ejemplo como cosa ya habla na versiculo 3, ya manda si Jehova con el maga Israelita que respeta con el diila mayores. Ya discuti kita si paquemodo kita ahora puede aplica con ese consejo por medio que dale el fisical, emocional y espiritual necesidad del diaton mayores. Na ese mismo versiculo, ya hace acorda con el maga siervo del Dios que importante cumpli con el Sabbath. Ya puede kita aprende que maskin pa gendeh mas kita bajo na ley de Sabbath ahora, puede kita aplica con el principio si regular kita dale tiempo para hace el maga cosas que tiene que hace na diaton adoranza. Si hace kita se, ta dale kita mira que ta pricura kita queda sagrao, como cosa ya manda na Levitico 19:2 y 1 Pedro 1:15.

² Na este articulo, hay continua kita considera con el Levitico capitulo 19. Cosa este articulo ta enseña kanaton acerca si paquemodo dale mira consideracion con aquellos tiene limitacion na cuerpo, acerca si paquemodo queda honesto na diaton practica de negocio y acerca si paquemodo dale mira amor na diaton projimo? Quierre kita queda sagrao igual con Dios poreso mira kita si cosa kita puede aprende.

3-4. Asegun na Levitico 19:14, paquemodo debe trata con el maga bungul y bulak?

³ Le con el Levitico 19:14. Quierre si Jehova que el de suyu maga siervo hay dale mira consideracion con aquellos tiene maga limitacion na cuerpo. Por ejemplo, gendeh debe maldici  el maga Israelita con el un bungul. Incluido na maldicion que amenaza con el un persona o habla que tiene cosa malo sucede con ele. Un mal cosa gayot se para hace na un bungul! No puede le oi con el cosa ya habla con ele poreso gendeh le puede defende con el de suyu mismo cuerpo.

⁴ Mas pa, puede kita aprende na versiculo 14 que el maga siervo del Dios gendeh debe “pone sanggadura adelante del un bulak.” El un libro yan comento acerca na maga gente quien tiene limitacion na cuerpo: “Na Middle East del antes, ta maltrata y ta abusa [kanila].” Posible, el cuanto persona hay pone sanggadura adelante del un bulak para intencional hace sinti duele con ele o para re con ele. Gendeh gayot se bueno para hace! Por medio de ese mandamiento, ya ayuda si Jehova con el de suyu maga siervo para entende que debe sila dale mira compasion con aquellos tiene maga limitacion.

5. Paquemodo kita dale mira compasion con aquellos tiene maga limitacion na cuerpo?

⁵ Ya dale mira compasion si Jesus con aquellos tiene maga limitacion na cuerpo. Acorda con el mensaje que ya imbia le con Juan Bautista: “El maga bulag ya puede mira, el maga piang ya puede camina, el maga leproso ya queda limpio, el maga bungul ya puede oi, [y] el maga muerto ya levanta.” Despues sila mira el maga milagro de Jesus, todo el maga gente “ya alaba . . . con el Dios” (Luc. 7:20-22; 18:43) Alegre imita el maga Cristiano con el compasion que ya dale mira si Jesus con aquellos tiene maga limitacion na cuerpo. Poreso, ta dale kita mira consideracion y paciencia kanila. Deverasan, nuay kanaton dale si Jehova poder para hace maga milagro. Pero, tiene kita el privilegio para habla con aquellos bulak na fisical o espiritual el buen noticia acerca na un paraiso donde el maga gente hay queda ya perfecto y tiene ya un buen relacion con Dios. (Luc. 4:18) Este buen noticia ya causa ya con el manada para dale alabanza con Dios.

6. Paquemodo el informacion que puede incuntra na Levitico capitulo 19 ta hace mas claro con el cosa ya habla na Diez Mandamiento?

⁶ El cuanto versiculo na Levitico capitulo 19 ta hace mas claro si cosa ya habla na Diez  Mandamiento. Por ejemplo, el ika-ocho mandamiento ta habla lang: “No ruba.” (Ex. 20:15) El un persona posible pensa que si gendeh lang le saca un cosa que gendeh de suyu, ta obedece ya le con ese mandamiento. Pero, posible siempre le ruba na otro manera.

7. Paquemodo el un negociante posible ta viola con el ika-ocho mandamiento acerca na rubada?

⁷ El un negociante posible pensa que nuay le saca un cosa que gendeh de suyu. Pero, quetal na de suyu manera de negocio? Como cosa escribido na Levitico 19:35, 36, si Jehova ya habla: “No ustedes man maru si ta midi largor, pesades o monton. Debe ustedes usa justo pesador, justo pesades de piedra y justo medida para na maga seco cosas y na maga liquido.” Si el un negociante ta usa gendeh justo pesador o medida para engaña con el maga quien ta cumpra, dol aquel ta ruba siempre le kanila. El otro versiculo na Levitico capitulo 19 ta hace tambien claro con ese punto.

8. Paquemodo el maga detalle na Levitico 19:11-13 ya ayuda con el maga Judio para aplica con el principio del ika-ocho mandamiento y paquemodo kita puede beneficia con ese?

⁸ Le con el Levitico 19:11-13. El maga palabra na principio del Levitico 19:11 ta habla: “No ruba.” El versiculo 13 ya conecta con el rubada na maga deshonesto practica de negocio y ya habla: “No man maru con el de ustedes projimo.” Entonces si el un gente deshonesto na negocio, ta ruba le. El ika-ocho mandamiento ta habla que malo ruba. Pero, el maga detalle na Levitico puede ayuda con el maga Judio para entende si paquemodo sila aplica con el principio de ese ley. Puede kita beneficia si medita kita si cosa el mirada de Jehova na pagka-deshonesto y rubada. Puede kita pregunta na diaton mismo cuerpo: ‘Uyun na Levitico 19:11-13, tiene ba parte na de mio vida que debe yo dale atencion? Necesita ba yo hace maga cambio na de mio manera de negocio o trabajo?’

9. Paquemodo el ley na Levitico 19:13 ta protege con el maga trabajador?

⁹ Tiene pa otro aspeto acerca na pagka-honesto que debe considera el un Cristiano quien tiene negocio. El ultimo parte del Levitico 19:13 ta habla: “No hace mañana el pagada de sueldo del un trabajador.” Na Israel, mayoria del maga gente ta trabaja na simentera y ta paga con el maga trabajador na fin del cada dia. Si gendeh dale el sueldo del trabajador, posible nuay le cosa para dale come con el de suyu familia para na ese dia. Si Jehova ya explica: “Ta necesita le y el de suyu vida ta depende na de suyu sueldo.”—Deut. 24:14, 15; Mat. 20:8.

10. Cosa leccion kita puede aprende na Levitico 19:13?

¹⁰ Ahora, manada del maga empleado el ta ricibi con el diila sueldo una vez o dos beses na un mes, gendeh cada dia. Pero, aplicable siempre el principio na Levitico 19:13. El cuanto maga amo ta toma ventaja con el diila maga empleado y ta paga kanila mas menos na cosa era conviene. Sabe sila que posible nuay cosa puede hace este maga trabajador sino continua trabaja maskin pa diutay el diila sueldo. Este maga amo dol tiene cosa ta saca na sueldo del maga trabajador. El un Cristiano quien tiene maga trabajador asigurao quierre gayot pone na corazon este punto. Ahora, mira kita si cosa pa kita puede aprende na Levitico capitulo 19.

11-12. Cosa ya hace claro si Jesus cuando ya coteja le na Levitico 19:17, 18?

¹¹ Na diaton tratamiento con otro, ta expecta el Dios que gendeh lang kita basta evita hace sinti duele con el diaton projimo. Puede se kita mira na Levitico 19:17, 18. (Le.) Si Jehova claro ya habla: “Debe tu ama con el de tuyu projimo igual na de tuyu mismo cuerpo.” Importante  se hace el un Cristiano si quierre le hace alegre con Dios.

¹² Considera si paquemodo si Jesus ya hace claro con el importancia del mandamiento que puede le na Levitico 19:18. El un Fariseo ya pregunta con Jesus: “Cosa ba el mandamiento mas importante del Ley?” Si Jesus ya contesta que “el mas [importante] y el primero del maga mandamiento” amo que ama con Jehova con todo el diaton corazon, con todo el diaton alma y con todo el diaton pensamiento. Despues, si Jesus ya coteja na Levitico 19:18 y ya habla: “El segundo ta semeja con este: Ama con el dituyo vecinos, como ta ama tu con el dituyo mismo cuerpo.” (Mat. 22:35-40) Tiene manada manera para dale mira amor na diaton projimo pero puede kita aprende el cuanto na Levitico capitulo 19.

13. Paquemodo el istoria de Jose ya ilustra el punto que ya escribi na uliji na Levitico 19:18?

¹³ El un manera para dale mira amor con el diaton projimo amo si aplica kita con el consejo que puede incuntra na Levitico 19:18. Este ta habla: “No tu vengga ni siembra agrabio.” Mayoria kanaton el tiene conoce quien ya siembra agrabio contra na uban na trabajo, na escuela, pariente o un miembro na familia—tiene vez, por manada año! Acorda con el diez hermano de Jose quien ya siembra agrabio que ya guia kanila para hace un mal cosa contra con ele. (Gen. 37:2-8, 25-28) Bien diferente gayot el cosa ya hace si Jose! Cuando ya tiene le autoridad y puede era man balus con el de suyu maga hermano, ya dale le mira lastima kanila. Nuay siembra agrabio si Jose. Sino, ya actua le harmonia na consejo que ya escribi na uliji na Levitico 19:18.—Gen. 50:19-21.

14. Cosa ta dale mira que aplicable siempre ahora el maga principio na Levitico 19:18?

¹⁴ El maga Cristiano quien quierre hace alegre con Dios debe imita con Jose, quien ya perdona con el de suyu maga hermano en vez de siembra agrabio o man balus kanila. Harmonia tambien este na modelo rezo donde ya anima kanaton si Jesus que perdona con aquellos ta culpa contra kanaton. (Mat. 6:9, 12) Na igual manera, si apostol Pablo ya dale aviso con el maga Cristiano: “No venga maga hermano y hermana.” (Roma 12:19) Ya anima tambien le kanila: “Aguanta y perdona con uno y otro si  uno tiene reclamo con otro.” (Col. 3:13) Nuay cambia el maga principio de Jehova. Aplicable siempre ahora el principio de ese ley que puede incuntra na Levitico 19:18.

15. Cosa ilustracion el puede ayuda kanaton para entende si porque kita debe perdona y gendeh mas pensa acerca con ese?

¹⁵ Considera un ilustracion. Si tiene kanaton quien ya hace sinti duele, puede se compara na un irida. El cuanto diutay; el otro grande. Por ejemplo, si abri kita envelope, posible iri el diaton dedo na papel. Mahapdi gayot ese pero posible gendeh dura el dolencia. Gane despues del uno o dos dia, posible gendeh mas kita acorda si onde kita ya iri. Na igual manera, posible gendeh gayot grabe el cosa ya hace kanaton. Por ejemplo, el un amigo posible ya habla o ya hace un cosa que nuay pensa que ya hace sinti duele kanaton. Pero, facil lang kita con ele ya perdona. Pero si tiene kita mas grande irida, posible necesita cuci con ese el doctor y pone con ese bandage. Si pirmi kita mete con este, dura este queda bueno y queda lang mas grabe. Maka-triste, el un persona posible hace ansina si ya sinti gayot le duele na cosa ya hace con ele. Posible, pirmi le pensa con el dolor que ya sinti le y si cosa con ele ya hace el otro persona. Pero, aquellos quien ta siembra agrabio ta hace lang sinti duele con el diila mismo cuerpo. Poreso, mas bueno gayot que obedece con el consejo que puede incuntra na Levitico 19:18!

16. Asegun na Levitico 19:33, 34, paquemodo debe trata el maga Israelita con el maga estranjero y cosa kita puede aprende con ese?

¹⁶ Cuando ya manda si Jehova con el maga Israelita que ama con el diila projimo, gendeh le quierre decir que ama sila con aquellos lang igual diila raza o nacionalidad. Ya habla tambien kanila que ama con el maga estranjero quien ta queda junto kanila. Amo se el claro mensaje que puede mira na Levitico 19:33, 34. (Le.) Debe trata con el estranjero igual “como un nativo” y debe “ama con ele” el maga Israelita igual na diila mismo cuerpo. Por ejemplo, necesita permiti el maga Israelita con el maga estranjero y con el maga pobre que beneficia na cosa ya queda na simentera. (Lev. 19:9, 10) El principio acerca na amor para na maga estranjero aplicable siempre ahora na maga Cristiano. (Luc. 10:30-37) Na cosa manera? Tiene millones de gente na entero mundo el ya sale na diila nacion y posible el cuanto kanila ta queda cerca contigo. Importante para kanaton que trata con este maga hombre, mujer y bata con dignidad y respeto.

17-18. (a) Paquemodo debe afecta kanaton el Levitico 19:2 y 1 Pedro 1:15? (b) Cosa importante trabajo el ya anima kanaton que hace si apostol Pedro?

¹⁷ El Levitico 19:2 y 1 Pedro 1:15 ta anima con el maga siervo del Dios que queda sagrao. Manada otro versiculo na Levitico capitulo 19 el puede ayuda kanaton para mira si cosa kita puede hace para obtene el favor de Jehova. Ya discuti kita cuanto versiculo que ayuda kanaton para sabe el cuanto positivo cosas que debe kita hace y el cuanto negativo cosas que gendeh debe hace. * El Cristiano Griego Escritura ta dale mira que quierre siempre si Jehova que aplica kita con este maga principio na diaton vida. Pero, tiene pa cosa ya omenta si apostol Pedro.

¹⁸ Mientras ta participa kita na diferente espiritual actividad y ta hace maga buen trabajo, tiene un trabajo que ya hace claro si Pedro. Antes anima que queda sagrao na todo diaton conducta, si Pedro ya habla kanaton: “Prepara enbuenamente con el de ustedes pensamiento para na trabajo.” (1 Ped. 1:13, 15, NWT) Cosa envuelto na ese trabajo? Si Pedro ya habla que el maga iscujido hermano del Cristo hay “proclama el maga alabanza de Aquel quien ya llama” kanila. (1 Ped. 2:9) El deverasan, el todo Cristiano ahora tiene el privilegio para hace con ese de con todo importante trabajo que ta ayuda gayot con el maga gente. Que bien grande el diaton privilegio como maga sagrao siervo para regular y activo participa na trabajo predicacion y enseñada! (Mar. 13:10) Si hace kita el todo para aplica con el maga principio que puede incuntra na Levitico capitulo 19, ta dale kita mira que ta ama kita con el diaton Dios y con el diaton projimo. Y ta dale kita mira que quierre kita ‘queda sagrao’ na todo diaton conducta.