EKICWEKA C’OKWEGA 49
Ekitabo c’Abaleevi nikitwegesa oku turi kubasa kutwariza abandi
‘Okunde mutahi wawe, nk’oku oyekunda.’—LEV 19:18.
ECESHONGORO CA 109 Tukundane Munonga Twihire aha Mutima
EMPINYE *
1-2. Ni enki eki twashwijumire omu kicweka ecabandize eki, kandi shi ni enki eki twaza kushwijuma omuri eki kicweka?
OMU kicweka ecabandize eki tukashwijuma bumwe omu buhabuzi oburi omu Baleevi ekicweka ca 19. Ecokureberaho: Nk’oku biri omu runyiriri rwa kashatu, Yehova akagambira Abisirayeli ku babire bashemerire korobera abazire babo. Tukashwijuma oku turi kubasa kukuratiza obwo buhabuzi omuri obu bwire turi kufa aha bi abazire bitu bari kwetenga by’omubiri, tubafaho omu nyehurira n’omu by’omwika. Nambwenu omuri orwo runyiriri, Yehova akaba yagambire abahereza beye ku babire bashemerire kureba Sabato nk’ey’omuhendo. Tukareba ku n’obu tutari kukuratiza Sabato omuri obu bwire turi kubasa kukuratiza ogo musinge turi kuronda obwire bw’okwegaburira omu by’omwika. Twakikora tusyoya, nituba turi kwereka ku nitutaho amani kugira ngu tube abari kwera nk’oku biri kugambwa omu Baleevi 19:2 n’omuri 1 Petero 1:15.
2 Omuri eki kicweka, twaza kugumizamu kushwijuma ezindi nyiriri eziri omu Baleevi ekicweka ca 19. Ni bata oku eco kicweka kiri kubasa kutukwasa kwereka embabazi abine obumuga, kuba abesigwa omu mirimo yitu n’okwereka rukundo abandi? Ahabw’okuba turi kwenda kuba abari kwera nk’oku Ruhanga ari ori kwera, reka turebe oku turi kubasa kubikora.
GUMA OYEREKE EMBABAZI ABINE OBUMUGA
Ebiri omu Baleevi 19:14 nibitukwasa bita kweta ah’abatari kuhurira ninga kureba ge, kandi nihatushaba kubakorera ki? (Reba paragurafu ya 3-5) *
3-4. Tukuratize ebiri omu Baleevi 19:14, ni bata oku abatari kuhurira n’empumi babire bashemerire kutwarizibwa?
3 Shoma omu Baleevi 19:14. Yehova akashaba abahereza beye kwereka embabazi abine obumuga. Ecokureberaho: Akagambira Abisirayeli ku babire batashemerire kuceena omuteta; eco kikaba nikitwariramu kumugambira kubi ninga kumujuma. Mazima, eco kikaba kiri kubasa kushasha ogo muntu owafire amatu! Ahabw’okuba yabire atari kubasa kuhurira ebi bari kumugambaho akaba atari kubasa kwerwanirira.
4 Nambwenu omu runyiriri rwa 14, Ruhanga akaba yagambire abahereza beye ku babire batashemerire kutega empumi ekiri kubasa kuyiteza ensibo. Hine ekitabo acagambire aha bizibu by’abine obumuga, kiri kugira ngu: Omu bwire bwa kare, omu burugwizoba bwa rwagati bakaba nibabatwariza kubi munonga. Hakaba hariho abantu b’abagome ababire bari kubasa kutega empumi ekintu, bari kwenda ngu ehutare ninga shi bayisheke. Mazima obwo bukaba buri obugomi! Yehova akwasa abahereza beye birabire omuri eco kiragiro, kumanya oku babire bashemerire kutwariza abine obumuga.
5. Ni bata oku turi kubasa kwereka esaasi abine obumuga bw’aha mubiri?
5 Yesu akaba nayereka esaasi ababire bine obumuga. Omu butumwa obu yahire Yohana Omubatizi akagamba ati: ‘Empumi zihumwirwe, ebirema nibigenda, ababembe bashemezibwe, ebifa matu nibihurira, abafu bazorirwe.’ Abantu ku barebire ebyokutangaza bya Yesu, ‘bona bakasima Ruhanga.’ (Luk 7:20-22; 18:43) Abakristo nibashemerererwa kutoreza Yesu bari kwereka esaasi abine obumuga. Ni yo nshonga turi kubasaasibwa kandi tukabehanganira. Ni amazima, Yehova taratuhire obushoborozi bw’okukora ebyokutangaza. Konka akatuha omugisha g’okugambira abine obumuga bw’aha mubiri n’obw’omu by’omwika obutumwa burungi oburi kugamba ahari paradiso, ahu tutarije kugira obumuga bw’aha mubiri n’obw’omu by’omwika. (Luk 4:18) Obwo butumwa burungi burimu kukwasa abantu bingi kuhimbisa Ruhanga.
GUMA OBE OMWESIGWA AHA MURIMO
6. Ni bata oku ebiri omu Baleevi ekicweka ca 19 biri kubasa kutukwasa kukizaho kushoborocerwa ebiragiro ikumi?
6 Enyiriri eziri omu Baleevi ekicweka ca 19 nizongera aha biri kugambwa omu biragiro ikumi. Ecokureberaho: Ekiragiro ca munana nikigamba ngu: ‘Otariba.’ (Kur 20:15) Omuntu nabasa kutekateka ngu obu atakatwaragaho ekintu c’ondijo, nayorobera eco kiragiro. Konka, nabasa kwiba omu bundi buryo.
7. Ni bata oku omushubuzi ari kubasa kushisha ekiragiro ca munana ekiri kugamba aha kwiba?
7 Omushubuzi nabasa kutekateka ngu takibagaho, ahakuba atakatwaragaho ekintu c’ondijo. Konka shi ni omwesigwa omu bushubuzi bweye? Nk’oku biri kugambwa omu Baleevi 19:35, 36, Yehova akagamba ati: ‘Mutarikora ebitari by’oburyo omu kucwa emanja, omu kugera oburingwa, ninga oburemezi, ninga obwingi. Mugire eminzani ehikire, amabare gahikire, efa ehikire na hini ehikire.’ Obwe rero omushubuzi ori kukoresa eminzani etahikire naba ari kwiba abaguzi beye. Ezindi nyiriri eziri omu Baleevi ekicweka ca 19 nizikishoborora ge.
Tukuratize ebiri omu Baleevi 19:11-13, ni bata oku Omukristo ori omu bushubuzi ari kubasa kweshwijuma? (Reba paragurafu ya 8-10) *
8. Ni bata oku ebiri omu Baleevi 19:11-13 byabire nibikwasa Abisirayeli kuta omu bikorwa ekiragiro ca munana, kandi shi ni bata oku biri kutugasira?
8 Shoma omu Baleevi 19:11-13. Ebigambo ebiri kutandika omu Baleevi 19:11 nibigira ngu: ‘Mutariba.’ Orunyiriri rwa 13 nirwereka akakwate akari ahagati y’okwiba n’okutaba omwesigwa omu bushubuzi bwawe, ruri kugira ngu: ‘Otarita kubi mugenzi wawe ninga kumunyaga.’ Obwe rero omuntu yaba atabire omwesigwa omu bushubuzi bweye naba ari kwiba. Ekiragiro ca munana kikaba kiri kwereka ku kwiba kiri kibi, konka ebiri omu Baleevi bikaba nibibakwasa kumanya oku bari kubasa kuta omu bikorwa omusinge oguri omuri eco kiragiro. Nitugasirwa twareba oku Yehova ari kureba obutaribwesigwa n’okwiba. Nitubasa kwebuza ngu: ‘Mbehi ebiri omu Baleevi 19:11-13, nibinkwataho? Mbehi hine ebi ndi kukora omu bushubuzi bwange ninga omu ndijo mirimo ebi nshemerire kuhindura?’
9. Ni bata oku ekiragiro ekiri omu Baleevi 19:13 cabire kiri kukwasa abakozi abari kukorera omuzizi?
9 Nambwenu hine ebindi bintu ebi Omukristo ashemerire kutekatekaho yaba ari kukora obushubuzi. Omu Baleevi 19:13 nihagamba ngu: ‘Otarirara n’ebihembo ebi omukozi akorire okuhisya omu kasheshe.’ Omuri Isirayeli ya kare abakozi ababire bari kukora omu buhingi bakaba nibashashurwa omuzizi gwahwa. Ogo mukozi akaba nashashurwa ebi yakorera eryo izoba kugira ngu abase kubona ebi aragaburire ab’omu ka yeye. Yehova akagamba ngu: ‘Ni omworo, kandi ebihembo byeye ni byo atireho omutima.’—Bir 24:14, 15; Mat 20:8.
10. Ni enki eki turi kubasa kwegera aha kiragiro ekiri omu Baleevi 19:13?
10 Omuri obu bwire abakozi bingi noshanga bari kushashurwa rimwe omu kwezi ninga shi kabiri omu kwezi. Konka omusinge oguri omu Baleevi 19:13 gucayine omugasho. Hine abakama abu ori kushanga bari kushashura abakozi babo esente nce, okukira ezi bakorera. Abo bakozi nibagumizamu kukora n’obu bakuba bashashwirwe esente nce omu zi babire bashemerire kubashashura. Mazima abakama nk’abo, nibaba bari kuhemukira abakozi babo. Abakristo abine abakozi nibabasa kwegera byingi ahari eco kiragiro. Hati reka tushwijume ekindi kintu ekiri omu Baleevi ekicweka ca 19.
KUNDA MUTAHI WAWE NK’OKU OYEKUNDA
11-12. Ni enki eki Yesu yasindagirize obu yagambire ebigambo ebiri omu Baleevi 19:17, 18?
11 Ruhanga natuhiga kukunda abantu bona, atari abu turi kuzarwa hamwe kusha. Reba oku biri kugambwa omu Baleevi 19:17, 18. (Hashome.) Nihagambwamu ekiragiro ekiri kuhurirwa ekiri kugira ngu: ‘Okunde mutahi wawe, nk’oku oyekunda.’ Abakristo abari kwenda kuhimbisa Ruhanga bashemerire korobera obwo buhabuzi.
12 Tecereza oku Yesu yasindagirize ekiragiro ekiri omu Baleevi 19:18. Izoba rimwe, Omufarisayo akabuza Yesu ati: ‘Ekiragiro ekikuru omu biragiro ni kiha?’ Yesu akamugarukamu ku ‘ekiragiro ekikuru kandi ec’okubanza, ari okukunda Yehova n’omutima gwawe gona, n’amagara gawe gona, n’obwenge bwawe bwona.’ Bwanyima, Yesu akagamba ebiri omu Baleevi 19:18, ari kugira ati: ‘Eca kabiri ekiri kukishusha n’eki: Kunda mutahi wawe nk’oku oyekunda.’ (Mat 22:35-40) Hariho oburyo bwingi bw’okwerekamu ku nitukunda batahi bitu, konka nambwenu nitubasa kwegera byingi omu Baleevi ekicweka ca 19.
13. Ni bata oku enkuru eri kugamba ahari Yosefu eri kutuma twashoborocerwa ge ebyijire kuhandikwa omu Baleevi 19:18?
13 Oburyo bumwe obu turi kubasa kwerekamu ku nitukunda mutahi witu ni okukuratiza obuhabuza oburi omu Baleevi 19:18. Nihagira ngu: ‘Otarihora abantu b’ihanga ryawe, n’obu kwakuba okubagiraho enzika.’ Abamwe omuri itwe tukareba abantu abari kubikira abandi enzika, nk’abu bari kukorana aha murimo, abu bari kwegana, abanyabuzare, n’ab’omu maka gabo! Nangwa bamara emyaka myingi babikire enzika. Oyijuke ku bene Yosefu bamazire emyaka myingi bamubikire enzika, kandi eco kikabaretera kukora ekintu kibi munonga. (Kut 37:2-8, 25-28) Konka Yosefu we, taratwarize nkabo! N’obu yabire ayine obushoborozi kandi ari kubasa kugira eki yakora ahari benishe, nabwo akagumizamu kubereka embabazi. Yosefu tarababikire enzika, ahobwe akakuratiza obuhabuzi obwijire kuhandikwa omu Baleevi 19:18.—Kut 50:19-21.
14. Ni enki ekiri kwereka ku obuhabuzi oburi omu Baleevi 19:18 bucayine omugasho?
14 Ecokureberaho ca Yosefu c’okusaasira omu mwanya g’okubika enzika ninga okwehorera, ni ecokureberaho kirungi aha Bakristo abari kwenda kushemeza Ruhanga. Kandi ni co eki Yesu yagambire omu shara ya Tata witu w’omu iguru, obu yatushabire kusaasira abari kutushobeza. (Mat 6:9, 12) Ni co kimwe, entumwa Pawulo akeshengereza Abakristo bagenzi beye nagira ati: ‘Imwe abari kukundwa, mutehorera enzigu.’ (Rom 12:19) Akongera yabagambira ati: ‘Nimugumisiririzana; kandi ku harabe hariho oyine eki arikufa na mugenzi weye, musaasirane.’ (Kol 3:13) Emisinge ya Yehova teri kuhinduka. Emisinge eri omu kiragiro ekiri omu Baleevi 19:18, ecatwinire omugasho na hati.
Nk’oku kitari kirungi kugumizamu kukwatakwata aha kisebe, ni ko kitari kirungi okuguma turi kutekateka aha nshobe ezi batukorire; tushemerire kuzehuzya (Reba paragurafu ya 15) *
15. Ni kiha cokureberaho ekiri kwereka omugasho g’okusaasira abandi kandi tukebwa ebi batushobize?
15 Reka turebe ecokureberaho. Enyehurira eziri kushasha nizibasa kugeranisibwa n’obuhuta. Obumwe nibuba buri buce, obundi buri buhango. Ecokureberaho: Twaba turi kutegura eby’okuteka, hine obu turi kubasa kweceka aha rukumu. Cabaho nikitushasha, konka obwo busaasi nibumara obwire buce. Bwanyima y’ekiro kimwe ninga bibiri, hine obu turi kuba twanabyebirwe. Omu buryo nk’obwe, enshobe ezi bari kutukorera nizibasa kuba zitagumire. Ecokureberaho: Munywani witu nabasa kugamba ninga kukora ekintu eki atatecerizeho kitushasha, konka nikitworobera kurahuka kumusaasira. Konka twaba tuhutire omu buryo bugumire, nikitushaba kuza owa dokita, kandi atushemba. Twagumizamu kushembura eco kisebe ninga obuhuta, tihine eki biri kubasa kutugasira, orekire kutushasha. Omu buryo nk’obwe, hine obu omuntu ari kubasa kukora ekintu nk’eco hagira owamushasha. Nabasa kugumizamu kutekateka aha ku ogo muntu yamushashire n’oku camukwasireho. Konka abantu nk’abo abari kubika enzika nibaba bari kweshasha. Ni yo nshonga kiri kirungi korobera obuhabuzi oburi omu Baleevi 19:18!
16. Tukuratize ebiri omu Baleevi 19:33, 34, ni bata oku abanyamahanga ababire batwire omuri Isirayeli babire bashemerire kutwarizibwa, kandi shi ni enki eki turi kubyegeraho?
16 Yehova ku yahire Abisirayeli ekiragiro c’okukunda batahi babo, akaba atari kumanyisa ku babire bashemerire kukunda abu babuganisize obwoko ninga ab’omu ihanga ryabo kusha. Nambwenu akabaragira ngu bakunde abanyamahanga ababire babatwiremu. Obwo ni bwo butumwa oburi kushangwa omu Baleevi 19:33, 34. (Hashome.) Omunyamahanga akaba ashemerire kutwarizibwa nk’omunyihanga, kandi Abisirayeli bakaba bashemerire kumukunda nk’oku bari kwekunda. Ecokureberaho: Abisirayeli bakaba bashemerire kwikiririza abanyamahanga n’abacene kugasirwa n’entebekanisa y’okuhumba. (Lev 19:9, 10) Ogo musinge g’okukunda abanyamahanga n’abacene, nigukwata n’aha Bakristo b’omuri obu bwire. (Luk 10:30-37) Bata shi? Hariho abafuruki bingi munonga, kandi noshanga abamwe muturine. Ni ec’omugasho munonga kutwariza abo bashija, abakazi n’abana omu muringo gw’ekitinisa.
OMUSINGE OGWESHEREKIRE OMU BALEEVI EKICWEKA CA 19
17-18. (a) Ebiri omuri 1 Petero 1:15 n’omu Baleevi 19:2 nibituhiga kukora ki? (b) Ni guha murimo g’omugasho ogu entumwa Petero yatuhigire kukora?
17 Omuri 1 Petero 1:15 n’omu Baleevi 19:2 hombi nihashaba abahereza ba Ruhanga kuba abari kwera. Omu Baleevi ekicweka ca 19 harimu enyiriri nyingi eziri kubasa kutwereka ec’okukora kugira ngu Yehova atwikirize. Twamara kushwijuma enyiriri zimwe eziri kutwereka ebintu birungi ebi tushemerire kukora n’ebintu ebibi ebi tushemerire kwerinda. * Mazima, Ebyahandikirwe by’Orugiriika by’Abakristo nibyereka oku tushemerire kukuratiza eyo misinge omu kubaho kwitu. Konka hine ekindi eki entumwa Petero yagambireho.
18 Nitubasa kukora ebikorwa byingi by’omwika, kandi tukora n’ebindi bintu birungi. Konka Petero akagamba ekindi kintu eki tushemerire kukora. Petero atakatushabire ngu tube abari kwera omu mitwarize yitu akatwehanangiriza ati: ‘Mwezirice [aha murimo], mugume emitima.’ (1 Pet 1:13, 15) Ogo murimo ni guha? Petero akagamba ku Abakristo abashukirweho omwika babire bashemerire ‘koreka oburungi bw’Owabesire.’ (1 Pet 2:9) Omuri obu bwire Abakristo bona, bine omurimo oguri kukwasa abantu, okukiza ogundi gona. Mazima twine omugisha g’omutano nk’abantu abari kwera, g’okwekwatanisa omu murimo g’okukora n’amani omu kuburira n’okwegesa abantu! (Mak 13:10) Twakora cona eki turi kubasa ngu tute omu nkora emisinge eri omu Baleevi ekicweka ca 19, nituba twayereka ku nitukunda Ruhanga n’abatahi bitu. Kandi nituba twayereka ku turi kwenda ‘kuba abari kwera’ omu micwe yitu yona.
ECESHONGORO CA 111 Ebirikutureetera Kushemererwa
^ par. 5 Itwe Abakristo tituri kugendera aha biragiro bya Musa, konka ebyo biragiro birimu ebintu byingi ebi tushemerire kukora n’ebi tushemerire kwerinda. Kubishwijuma nibibasa kutukwasa kwereka abandi rukundo n’okuhimbisa Ruhanga. Eki kicweka caza kutukwasa kumanya oku turi kubasa kukuratiza ebiri omu Baleevi ekicweka ca 19 omu kubaho kwitu.
^ par. 17 Hariho ezindi nyiriri ezitari omuri ebi bicweka eziri kugamba aha kushorora, okugambura abandi, okurya eshagama, obufumu, okuraguza n’obushambani.—Lev 19:15, 16, 26-29, 31.—Reba “Ebibuzo by’abashomi” omuri egi magazini.
^ par. 52 EKISHUSHANI: Omuhamya ari kukwasa mwenetata otari kuhurira ngu abase kugamba na dokita.
^ par. 54 EKISHUSHANI: Mwenetata oyine bizinesi y’okusiga irangi ari kushashura omukozi esente zeye.
^ par. 56 EKISHUSHANI: Omunyanyazi nabasa kwebwa ahu yayeceka. Konka shi nabasa n’okwebwa ahu yayetema akagira obuhuta bw’amani?
