1-2. Fattlea lekhant ami kitem xiklolim, ani hea lekhant ami kitem xiktolim?

LEVI-XASTR pustoka thaun ami thoddim lisanvam fattlea lekhant xiklolim. Udharonnak, Levi-Xastr odheai 19 vers 3-ant, Jehovan ho kaido dilʼlo ki Israelitkaramnim aplea avoi-bapaik man diunk zai. Ho solʼlo aiz ami koso apnnaunk zata mhunn ami polloilem? Ami amchea avoi-bapaicheo gorzo polloun ghetat tednam, tankam urba ani buzvonn ditat tednam, ani Jehova sangata tanchi ixttagot samballunk modot kortat tednam ami hem korunk pavtat. Toxench, tea versant anik ek kaido dilʼlo ki Israelitkaramnim Sonvar dis vo Sabat pallunk zai. Aiz amkam ho kaido lagu zaina tem khorem. Punn tantunt ami ho totv xiktat ki dor disa Jehovachi bhokti korunk ami vell kaddunk zai. Ami oxem kortat tednam Levi-Xastr 19:2 ani 1 Pedru 1:15-nt sanglolem toxem povitr zaunk ami proitn kortat mhunn dakhoitolim.

² Hoi, amkam sogleank Jehova bhaxen povitr zaunk zai. Tor povitr zaunk Levi-Xastr odheai 19-a thaun anik koslim lisanvam ami xikonk zatat tem polloum-ia. Zoxem, ami opong asloleank doia koxi dakhounk zata? Ami promannikponnan veapar-dhondo koso korunk zata? Ani ami dusreancho mog koso korunk zata?

3-4. Levi-Xastr 19:14 pormonnem, Israelitkaramnim eka kuddʼddea vo bherea munxa sangata koxem vagonk zai aslem?

³ Levi-Xastr 19:14 vachat. Jehovan aplea lokank opong asloleam sangata doiall toren vagonk sanglolem. Udharonnak, tannem Israelitkarank bhereancher xirap ghalinakat mhunn  kaido dilʼlo. Hacho orth, tannim eka bherea munxak dhomkaunk vo tachea vixim vaitt ulounk pasun zainaslem. Karonn taka aikonk ienaslem dekhun to aplea pasot ulounk xokonaslo. Tor oxem korop kitlem vaitt nhoi!

⁴ Toxench, vers 14-nt Jehovan aplea lokank “kuddʼddeache vatter addkholl ghalum naka,” oso-i kaido dilʼlo. Israel ani tachea bhonvtonnim aslolea zagea voile lok adlea tempar opong lokam sangata onʼneai kortale ani tanchea sangata krur toren vagtale mhunn ek pustok sangta. Ghoddie oslim thoddim munxam eka kuddʼddea munxachim fokannam korunk vo taka dukhounk tachea vatter addkholl ghaltalim. Hem pasun kitlem vaitt zaun asa! Tor opong lokank oxem korchem nhoi, punn tankam doia dakhounk zai asli mhunn Jehovan ho kaido diun Israelitkarank dakhoun dilem.

5. Opong asloleam sangata ami doiall toren koxem vagonk zata?

⁵ Opong lokam sangata Jezu doiall toren vaglo. Juanv Batistak dhaddlolea sondexant tannem oxem mhunnttlem: “Kuddʼddim novean polleunk lagtat, thonttim cholunk lagtat, koddkaram nitoll zatat, bherim novean aikotat, melʼlim monxam jivont zatat.” Ani Jezun kelʼlim him soglim vizmitam polloun “sogllea lokan Devak vakhannlo.” (Lukas 7:20-22; 18:43) Jezuchi dekh gheun aiz ami opong asloleam sangata doiall toren ani pasiensan vagtat. Aiz ami Jezu bhaxen vizmitam korunk xokonant tem khorem. Punn kuddʼddeank ani Devachi vollokh naslolean eka orthan kuddʼddim asat tankam novea sonvsara vixim sangonk amkam ek vhodd sueog asa. Tea vellar soglim poripurnn astolim ani sogleank Deva lagim ek lagxilʼli ixttagot astoli. (Lukas 4:18) Ani hi bori khobor aikon zaite lok Devak vakhannunk pavleat.

6. Levi-Xastr odheai 19 amkam kitem somzonk modot korta ani koso?

⁶ Levi-Xastr odheai 19 ami vachtat tednam tantuntlea thoddea versamnim Dha Updesantle kaide ami koxe apnnaunk zatat tem bore toren somzailolem asa. Udharonnak, Dha Updesantlo attvo updes oso aslo:  “Chorum nakat.” (Sutt. 20:15) Tor eklo dusrea thaun ek vost chori korina zalear apunn to kaido palltta oxem taka dista aslem. Punn khorem mhunnttlear, to dusrea toren chorunk xoktalo. Tem koxem tem ami polloum-ia.

7. Ek veapar-dhondo korpi chori korpa vixim aslolo attvo updes koso moddunk xoktalo?

⁷ Apnnem kednam-i dusreanchem kainch kaddun gheunk na mhunnttoch apnnem chori korunk na oxem veapar-dhondo korpi eka munxak disot. Punn aplea veapar-dhondeant to chori korunk xokta kai? Levi-Xastr odheai 19:35, 36-ant Jehovan oxem sanglem: “Fottkirim mapam, zokhun zanv tokhun, vo mezun, kaich fottkirem vaprum nakat. Nitt tagddi, tthik zhokam, ani nigut kondde-fintam gheiat.” Tor hantuntlean amkam kollon ieta ki ek veapar-dhondo korpi dusreank nagounk fottkirim mapam uzar korta zalear to chori korta. Ani hench amkam Levi-Xastr odheai 19-achea herui versamnim sanglolem asa.

8. Levi-Xastr 19:11-13-ntlean, attvo updes koso apnnaunk zata tem somzonk Judevank koxi modot zali, ani hantuntlean amkam koso faido zata?

⁸ Levi-Xastr 19:11-13 vachat. Levi-Xastr 19:11-chim survatechim utram oxim mhunnttat: “Chorum nakat.” Vers 13 sangta: ‘Tujea peleak koslench vaitt korum naka vo nagoinaka.’ Tor hea utrantlean ek veapari dusreank nagoita tednam to chori korta. Attvea updesant chorum nakat mhunn sanglolem tem khorem, punn to updes koso lagu korunk zai tem Judevank Levi-Xastr pustoka udexim kollon ietalem. Tor, dusreank nagounchea vixim vo chorchea vixim Jehovak koxem dista tem amkam hantuntlean kollon ieta. Tor ami amkanch vicharunk zata: ‘Levi-Xastr 19:11-13-ntlean, hanv xikta tea lisanvam pormonnem mhojea jivitant, khas korun mhojea veapar-dhondeant hanvem bodlav korunk zai kai?’

9. Levi-Xastr 19:13-nt sanglolea kaidea thaun vavraddiank koxi modot zatali?

⁹ Kristanvamnim veapar kortana anik eke toren promannik asonk zai. Hem amkam Levi-Xastr 19:13-nt vachunk melltta: “Vavraddianchi mozuri dusro sokall porian dovrum naka.” Adlea kallar, choddxe Israelitkar xetant kam kortale. Tor vavraddiank dor disachea xevottak pagar ditale. Punn dor disak tankam tem pagar mellona zalear tanchea familik tannim posunk zaunchem naslem. Ani heach vixim Jehovan sanglolem: “Taka tachea pagarachi goroz asa ani tea udexim tacheo dispottʼtteo gorzo purnn zatat.”—D.S. 24:14, 15, NW; Mt. 20:8.

10. Levi-Xastr 19:13 thaun ami kitem xiktat?

¹⁰ Aiz choddxea kamdarank dor disak pagar mellona, punn ghoddie tankam mhoineant ek vo don pavtt pagar melltta. Tori astana, ami Levi-Xastr 19:13-nt dilʼlo solʼlo koso apnnaunk zata? Aiz thodde patranv aplea kamdarank unnea molan kam korunk laitat karonn tankam kamachi khub goroz asa mhunn te zannant. Ani hea pasot te unnea pagarakui kam kortole mhunn he patranv tancho faido ghetat. Oxem korun eke ritin te vavraddianchi mozuri addaun dovortat. Tor ami veapar-dhondo kortat zalear, ami amchea kamdaram sangata onʼneai korcho nhoi. Levi-Xastr odheai 19-ant ami anik kitem xikonk zata tem atam polloum-ia.

11-12. Levi-Xastr 19:17, 18-nt sanglolo kaido kitlo mhotvacho, tem Jezun koxem dakhoun dilem?

¹¹ Ami dusreank vaitt kelʼlem Jehova Devak naka. Punn itlench kelear puro kai? Ami Devak manovlolim zaunk zai zalear ami anikui kitem korunk zai. Tem amkam Levi-Xastr 19:17, 18-nt melltta. (Vachat.) Thoim Jehovan  spoxtt ritin sanglem: “Tuzoch mog kortai toso tujea peleacho kor.”

¹² Levi-Xastr 19:18-nt dilʼlo ho kaido kitlo mhotvacho, tem Jezun amkam dakhoilam. Ek pavtt eka Farizevan Jezuk oxem vicharlem: “Somurtichi vhoddli adnia ti khoinchi?” Jezun sanglem ki “soglleam-von vhoddli ani poili adnia” mhunnttlear soglea monan, kallzan, ani xokten Jehova Devacho mog korop. Ani uprant Levi-Xastr 19:18-nt sanglolim utram ulʼlekh korun Jezun mhunnttlem: “Punn hichech sarki dusri asa ti hi: ‘Tuzoch kortai toso, tujea peleacho mog kor.’” (Mt. 22:35-40) Ami zaitea vattamnim amchea peleacho mog korunk zata. Ani tantuntleo thoddeo vatto amkam Levi-Xastr odheai 19-antlean kollon ietat.

13. Juzechea udharonnantlean Levi-Xastr 19:18-nt dilʼlo solʼlo bore toren somzonk amkam koxi modot zata?

¹³ Hantuntli ek vatt amkam Levi-Xastr 19:18-nt melltta. Thoim sanglam: ‘Sudd gheum naka ani kallzant rag gheun ravum naka.’ Ami zaitim zannam oslea munxank vollkhotat astolim jim khub vorsam poriant dusreancho, zoxem tanchea sangata kam kortat, tanchea iskolant xiktat, tanchim soirim, vo tanchea familichea sodoxiancho rag gheun asat. Ani oxench Juzechea dha bhavamnim kelem. Tanchea kallzant Juzecho itlo rag aslo ki tannim taka vikun dilo. (Ut. 37:2-8, 25-28) Punn Juze tanchea sangata vaitt toren vagonk na. Karonn uprant, to odhikarant aslo tednam to tancho bodlo gheunk xoktalo. Punn tannem tankam doia dakhoili. Tor zaitea vorsam uprant Levi-Xastr 19:18-nt boroilʼlo solʼlo Juzen adim fuddench apnnailʼlo ani aplea bhavancho kallzant rag dovrunk na.—Ut. 50:19-21.

14. Levi-Xastr 19:18-nt sanglolem totv aiz pasun ami pallunk zai mhunn amkam koxem kolltta?

¹⁴ Juze bhaxen, aiz ami pasun Jehovak khuxal korunk zai zalear dusreancho rag dhorun ravchea bodlek eka-mekak bhogsunk zai. Karonn Jezu Kristan, amchea Bapa magnneant sanglem ki amcher chukloleank pasun ami bhogsunk zai. (Mt. 6:9, 12) Toxench, apostl Paulun sobhentlea bhav-bhoinnank mhunnttlolem: “Mogacheamno, peleacho sudd gheunk sodum nakat.” (Rom. 12:19) Ani uprant  tannem sanglem: “Dusreacher garannem korunk nimit aslear, tumi ekamekak sosunk zai ani bhogsunk zai.” (Kol. 3:13) Tor Levi-Xastr 19:18-nt sanglolem totv aiz pasun ami pallunk zai. Karonn Jehovachim totvam kednanch bodolnant.

15. Dusrim amkam dukhoitat tednam tankam bhogsop kiteak gorjechem tem somzaunk ek udharonn diat.

¹⁵ Amkam konnui dukhoita tednam ami tankam kiteak bhogsunk zai tem zannam zaunk ek udharonn polloum-ia. Ami kujnant bhaji katortat tednam thodde pavtti suri lagon amkam lhan ghavo zaunk puro. Punn uprant thoddea disamnim to pekon amkam thoim ghavo zalʼlo mhunn amkam ugddas pasun ascho na. Teach bhaxen, konnui amkam chintinastana kitem-i mhunnonk puro vo dukhounk puro. Tor tankam bhogsunk amkam ghoddie titlem kotthin zaunchem na. Punn thodde pavtti amchim ixttam vo konnui amkam itlim dukhounk puro ki tem ami amkam zalʼlea eka vhodd ghaveak sor korunk zata. To ghavo rokddoch pekona, ani taka dotoran vokhod lavun bandun dovrunk poddtta. Tor ami tea ghaveak hat lait ravlim vo khorpit ravlim zalear ami amkanch dukhoitolim. Teach bhaxen, amkam konnui dukhoita tednam amkam tannem kitlem dukhoilem tea vixim ami chintit ravlim zalear amkam asa ti dukh anik vaddttoli. Tor Levi-Xastr 19:18-nt dilʼlo solʼlo apnnailolean amkam kitlo faido zata!

16. Levi-Xastr 19:33, 34-a pormonnem, Israelitkaramnim porkea lokank koxe lekhunk zai aslem, ani tantuntlean ami kitem xiktat?

¹⁶ Jehova Devan Israelitkarank eka-mekacho mog korunk sanglo. Hacho orth, tannim fokot apleach desachea vo kullachea lokancho nhoi, punn tanchea modem ravtolea porkea lokancho pasun mog korunk zai aslo. Hem amkam Levi-Xastr 19:33, 34-antlean kollon ieta. (Vachat.) Tannim porkea lokank-ui ‘Israel-lokank lekhtat tech porim’ lekhunk zai aslem. Tannim apnnacho mog kortat toso ‘tancho-i mog korunk zai aslo.’ Udharonnak, Israelitkaramnim goribank toxench porkea lokank aplea xetant konnsam punzaunk diunk zai aslem. (Lev. 19:9, 10) Tor Kristanvamnim hem totv koxem apnnaunk zata? (Lukas 10:30-37) Aiz zaito lok veg-vegllea karonnak lagon aplem ganv-ghor soddun dusrea zagear ravonk voitat. Tor osle lok amchea bhonvtonnim asat zalear ami tankam manan ani respedan lekhunk zai.

17-18. (a) Levi-Xastr 19:2 ani 1 Pedru 1:15-nt amkam kitem korunk urba dilea? (b) Apostl Pedrun amkam khoinchem mhotvachem kam korunk urba dilea?

¹⁷ Tor atam meren ami Levi-Xastr 19:2 ani 1 Pedru 1:15-ntlean, ami povitr zalʼlim Jehova Devak zai mhunn xiklim. Ani Jehova Devak manvota tem korunk ami kitem korunk zai ani kitem korchem nhoi tem ami Levi-Xastr odheai 19-antlean polloilem. Punn Levi-Xastr odheai 19-ant anikui versam asat jim amkam Devak manvololim zaunk ami kitem korunk zai tem sangtat. * Tea bhair hea odheai-ant aslolim totvam ami aiz pasun apnnaunk zai mhunn ami Grek bhaxen boroilolea Bible-antlea pustokantlean zannam zalim. Punn ami anikui kitem korunk zai mhunn apostl Pedrun sanglem.

¹⁸ Ami sodanch Jehovachi bhokti ani dusreank borem kortat astolim. Punn ek mhotvachem kam korunk apostl Pedrun amkam urba dili. Ami soglea amchea chalint povitr zaunk zai mhunn sangchea poilim tannem oxem mhunnttlem: “Tumchim monam sarkim mekllim korun aitim ravat.” (1 Ped. 1:13, 15) Tor ami kitem korun amchim monam toiar korunk zai? Pedrun sanglem ki Jezuche obhixikt bhav ‘tannem kelʼlea “ojapachea kortutvam” vixim vakʼkhannttole.’ (1 Ped. 2:9) Ani aiz, Jehovachea povitr lokank, tem mhunnttlear, soglea Kristanvank dor disak urben hea porgottnnechea kamant bhag gheunk ek khas sueog asa. Ani hem kam ekdom mhotvachem zaun asa. Karonn hea vorvim zaitea lokank modot zata. (Marku 13:10) Tor Levi-Xastr odheai 19-ant dilʼlim totvam ami apnnaitat tednam, ami Devacho ani peleacho mog kortat ani soglea amchea chalint ‘povitr zaunk’ sodhtat mhunn ami dakhoun ditat.