1-2. Nama udah dikerandauka kitai ba artikel sebedau tu, lalu nama deka dipejuraika kitai ba artikel tu?

BA ARTIKEL sebedau tu, kitai udah belajarka jaku lalau ti bisi ba Adat Lewi bagi 19. Ambika chunto ba ayat 3, Jehovah ngasuh orang Israel bebasaka apai indai. Kitai udah berandauka baka ni kitai kemayaharitu ulih nitihka jaku lalau nya. Kitai ulih ngintu apai indai enggau nyediaka utai ti diguna sida, meransang sereta ngelantangka ati sida. Kitai mega deka nulung sida semak enggau Jehovah. Ba ayat ti sama, Petara madah orang Israel patut ngintu Hari Sabat. Kemayaharitu kitai enda ibuh ngintu Hari Sabat. Tang ari pesan nya kitai belajar, kitai patut meri awak ke pengawa sembah ngagai Jehovah ninting hari. Enggau nya, kitai nunjukka diri ngintu diri kudus, baka ke diasuh Adat Lewi 19:2 sereta 1 Peter 1:15.

² Ba artikel tu, kitai deka berandauka mayuh agi ayat ari Adat Lewi bagi 19. Kitai deka belajarka chara ngayanka pemanah ati ngagai sida ke timpang pendiau, baka ni kitai ulih mengkang lurus ba pengawa dagang sereta ngayanka pengerindu ngagai orang bukai. Baka Jehovah, kitai mega deka diau kudus. Diatu, aram kitai meda utai ke ulih dipelajarka kitai.

3-4. Nitihka Adat Lewi 19:14, baka ni orang Israel patut ngintu sida ke bengal enggau buta?

³ Bacha Adat Lewi 19:14. Jehovah dekaka nembiak Iya nunjukka pemanah ati ngagai sida ke bisi timpang pendiau.  Ambika chunto, orang Israel enda patut nyumpah orang ke bengal. Pengawa nya nyengkaum ngemba tauka nyebut utai ti enda manah pasal orang nya. Nya pengawa ti amat jai! Lebuh orang bejakuka iya, iya enda ulih ninga. Nyadi, iya enda ulih ngetanka diri empu.

⁴ Kelimpah ari nya, ayat 14 madahka orang Israel enda patut “ngasuh orang ke buta tesangkut.” Ku siti bup madah pasal orang ke bisi timpang pendiau: “Ba jeman Israel kelia, orang seruran ngambi ulih sereta jai ngagai [sida] ke bisi penimpang.” Engka bisi orang ngengkahka utai kena mempang jalai orang ke buta ngambika iya tesangkut lalu labuh. Udah nya sida ketawaka iya. Pengawa ke baka nya balat jai! Pesan ba ayat 14 tu nulung orang Israel nemu, sida patut ngayanka penyiru ngagai orang ke bisi penimpang.

5. Baka ni kitai ulih ngayanka penyiru ngagai sida ke timpang pendiau?

⁵ Jesus ngayanka penyiru ngagai sida ke timpang pendiau. Peratika pesan ke dianjung iya ngagai John Pemaptisa: “Orang ke buta meda, orang ke lemi bejalai, orang ke sakit lan, dituchi, orang ke bengal ninga, [sereta] orang ke mati diangkatka idup baru.” Ketegal pengawa ajih Jesus, ‘semua sida muji Petara.’ (Luk. 7:20-22; 18:43) Orang Kristian deka neladan Jesus enggau ngayanka penyiru ngagai sida ke bisi timpang pendiau. Kitai deka nunjukka pemanah ati sereta penyabar ngagai sida. Endang amat, Jehovah enda meri kitai kuasa kena ngereja pengawa ajih baka Jesus. Tang, semua kitai bisi basa ti besai madahka Berita Manah ngagai sida ke buta tauka ngagai sida ke begunaka pemendar. Gambarka pengaga ati sida lebuh sida belajarka pasal dunya Paradais, alai semua orang bisi pengerai ti sempurna sereta ngembuan kaul ti manah enggau Petara. (Luk. 4:18) Berita Manah tu udah nulung mayuh orang muji Petara.

6. Baka ni Adat Lewi bagi 19 ulih nulung kitai meretika agi Sepuluh Pesan?

⁶ Sekeda ayat ba Adat Lewi bagi 19 bisi meri mayuh agi penerang bekaul enggau Sepuluh  Pesan. Ambika chunto, pesan kelapan madahka: “Anang ngenchuri.” (P-sut. 20:15) Seseiku orang engka berunding seagi-agi iya enda ngambi utai enggi orang bukai, iya ngumbai diri enda ngenchuri. Tang, iya engka bisi ngenchuri ba chara ke bukai.

7. Baka ni seiku pedagang engka enda ngasika pesan kelapan pasal ngenchuri?

⁷ Seiku pedagang engka ngumbai diri enda ngenchuri laban iya enda kala ngambi utai enggi orang bukai. Tang kati iya seruran lurus ba pengawa dagang? Baka ke dipadah ba Adat Lewi 19:35, 36, Jehovah madah: “Anang ngakal orang lebuh kita nyukat, nimbang tauka nakar utai. Kena dachin ti betul, timbang ti betul, takar ti betul.” Seiku pedagang engka ngenchuri lebuh iya ngena dachin sereta takar ti enda betul ba pengawa dagang iya. Kitai deka mansik enggau dalam agi baka ni ayat bukai ba Adat Lewi bagi 19 nerangka pekara tu.

8. Baka ni Adat Lewi 19:11-13 nulung orang Israel nitihka prinsip ke bekaul enggau pesan ti kelapan, lalu baka ni tu ulih nulung kitai?

⁸ Bacha Adat Lewi 19:11-13. Adat Lewi 19:11 madahka: “Anang ngenchuri tauka nipu, tauka bula.” Nya alai, enti seseiku orang nipu tauka bula ba pengawa dagang, kebendar iya, iya ngenchuri. Pesan ti kelapan madahka ngenchuri nya salah. Taja pia ayat ba Adat Lewi nulung orang Israel meretika baka ni sida ulih nitihka pesan nya, iya nya lurus dalam semua utai ti dikereja sida. Kitai tau bulih penguntung enti kitai belematika runding Jehovah pasal ulah ti enda lurus sereta ngenchuri. Kitai ulih nanya diri empu: ‘Lebuh aku berundingka Adat Lewi 19:11-13, kati aku patut ngaga sekeda ubah ba pengidup, kelebih agi ba chara aku ngaga bisnis tauka gawa?’

9. Baka ni pesan ba Adat Lewi 19:13 nyaga pekereja?

⁹ Bisi siti agi chara ngayanka ulah ti lurus. Orang Kristian ke bisi ngaji orang bukai patut berundingka utai tu. Adat Lewi 19:13 madahka: “Anang enda mayar gaji orang ke gawa ke kita, semalam pen enda meh gaji nya tau ditejuka enda dibayar.” Maya jeman orang Israel kelia, mayuh orang gawa ba ladang lalu sida nerima gaji pengudah sida abis gawa sehari nya. Enti seiku pekereja enda nerima gaji iya ba maya ti ditetapka, iya engka nadai duit kena meli pemakai ke ruang bilik iya sehari nya. Ku Jehovah madah: “Sida begunaka duit nya, lalu ngarapka diri nerima duit nya.”—U-dat. 24:14, 15; Mat. 20:8.

10. Nama ulih dipelajarka kitai ari Adat Lewi 19:13?

¹⁰ Kemayaharitu, mayuh gaji pekereja dibayar sebulan sekali tauka sebulan dua kali, ukai ninting hari. Taja pia, prinsip ba Adat Lewi 19:13 agi ulih dikena kemayaharitu. Sekeda tuke ngambi ulih ari pekereja lebuh sida mayar gaji kurang agi ari ke patut. Sida nemu bala pekereja engka nadai daya lalu deka terus gawa taja pan nerima gaji ti mit. Kebendar iya tuke ke baka tu, baka ke “enda mayar gaji orang ke gawa.” Nya alai, orang Kristian ke bisi bisnis patut nentuka iya lurus ngagai bala pekereja iya. Diatu kitai deka meda utai bukai ke ulih dipelajarka kitai ari Adat Lewi bagi 19.

11-12. Nama utai ti dikemeratka Jesus lebuh iya nandu baru pesan ba Adat Lewi 19:17, 18?

¹¹ Petara ukai semina madah kitai enda patut ngemediska orang bukai. Kitai ulih beratika tu ba Adat Lewi 19:17, 18. (Bacha.) Jehovah enggau terang madahka: “Rinduka iya [‘orang bukai,’ NWT] baka nuan ti rinduka  diri empu.” Orang Kristian patut ngereja utai tu enti iya deka ngelantangka ati Petara.

¹² Jesus amat beberatka pesan ba Adat Lewi 19:18. Seiku orang Parisi kala nanya Jesus: “Ni pesan ti pemadu besai dalam Adat?” Jesus nyaut “pesan ti keterubah sereta pemadu besai” nya rinduka Jehovah enggau pengabis ati, pengabis semengat enggau pengabis runding. Udah nya, Jesus nandu baru Adat Lewi 19:18 lalu madahka: “Pesan ti kedua nya sebaka enggau nya: ‘Rinduka pangan nuan [“orang bukai,” NWT] baka nuan ke rinduka diri empu.’” (Mat. 22:35-40) Bisi mayuh agi chara kitai ulih nunjukka pengerindu ngagai orang bukai. Kitai ulih belajar sekeda chara nya ari Adat Lewi bagi 19.

13. Baka ni utai ke digaga Josep sejalai enggau lalau ba Adat Lewi 19:18?

¹³ Siti chara kena nunjukka pengerindu ngagai orang bukai iya nya enggau nitihka lalau ke dipadah ba Adat Lewi 19:18. Ayat nya madahka: “Anang malas, tauka begedika pangan nuan.” Kati nuan ngelala sapa-sapa ke agi ringat ngagai orang ke sama gawa, sama sekula, tauka diri sebilik? Lalu sekeda ari sida tu engka udah ringat pengelama betaun-taun! Sepuluh iku menyadi Josep amat ringat ngagai iya. Pengujung iya, sida ngereja utai ti amat jai ngagai Josep laban sida balat begedika iya. (P-kal. 37:2-8, 25-28) Tang perundingka chara Josep lebuh iya betemu baru enggau bala menyadi iya. Maya nya, iya bisi peluang malas penyai sida laban iya bisi penuduk enggau kuasa. Tang Josep enda begedika sida lalu milih deka ngampunka sida. Taja pan pesan ba Adat Lewi 19:18 bedau bisi maya nya, tang utai ti digaga Josep sejalai enggau pesan nya.—P-kal. 50:19-21.

14. Nama kebuah prinsip ba Adat Lewi 19:18 agi ulih dikena kemayaharitu?

¹⁴ Orang Kristian ke deka ngelantangka ati Petara patut neladan Josep. Josep ngampunka penyalah bala menyadi iya sereta enda malas penyai sida. Tu mega sejalai enggau utai ke diajar Jesus ba chunto sampi iya. Iya meransang kitai ngampunka orang ke salah enggau kitai. (Mat. 6:9, 12) Sama mega, rasul Paul meri lalau ngagai orang Kristian:  “Menyadi, anang malas.” (Rom. 12:19) Iya mega meransang sida: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri.” (Kol. 3:13) Jehovah enda kala berubah. Nya alai, kitai patut nitihka prinsip ba Adat Lewi 19:18.

15. Terangka sempama ke ulih nulung kitai nemu kebuah kitai patut ngampunka penyalah orang bukai.

¹⁵ Peratika siti sempama: Lebuh kitai pedis ati, tu ulih disemaka enggau abi telih. Sekeda telih nya mit, tang sekeda agi besai. Ambika chunto, kitai engka telih lebuh mutung sayur. Nya engka ulih ngasuh kitai pedis tang telih nya enda nganu nyawa kitai. Pengudah beberapa hari, kitai enda agi ingatka telih nya. Baka nya mega, sekeda penyalah ke digaga bala menyadi ngagai kitai, mit aja. Iya engka nyebut tauka ngereja utai ti ngemediska ati kitai. Taja pia, kitai ulih ngampunka iya. Tang enti sema kitai balat telih lebuh mutung sayur, lutur patut nyait abi telih nya lalu malut iya. Enti kitai seruran ngachau abi telih nya, abi nya enda ulih suman lalu nyadi balat agi. Sama mega, seseiku orang engka ngereja utai ti sama lebuh iya balat pedis ati. Iya engka enda ulih badu berunding pasal asai ati diri sereta orang ke udah ngemediska ati iya. Ulah tu kebendar iya semina ngenusahka iya empu. Nya alai, endaka manah agi enti kitai nitihka jaku lalau ba Adat Lewi 19:18?

16. Nitihka Adat Lewi 19:33, 34, baka ni chara orang Israel patut ngintu orang kampar, lalu nama ulih dipelajarka kitai ari nya?

¹⁶ Jehovah ukai semina meri pesan ti ngasuh orang Israel rinduka pangan diri, tang Iya mega deka sida ngayanka pengerindu nya ngagai orang kampar ke diau ngelingi sida. Pesan tu ulih ditemu ba Adat Lewi 19:33, 34. (Bacha.) Jehovah deka orang Israel ngintu orang kampar tauka orang ari bansa bukai sama baka sida ngintu orang Israel ke bukai. Lalu sida mega patut rinduka orang nya baka sida rinduka diri empu. Ambika chunto, orang Israel patut ngemendarka orang kampar sereta orang ke seranta ngumpul laluh ari utai ke diketau sida. (Lew. 19:9, 10) Kemayaharitu, orang Kristian mega ngayanka pengerindu ngagai orang bansa bukai tauka ari menua bukai. (Luk. 10:30-37) Ba serata dunya, bisi bejuta iku orang ke udah pindah ngagai menua bukai. Sekeda ari sida engka bisi diau semak nuan. Enda ngira  sapa sida, kitai deka ngayanka basa ngagai sida.

17-18. (a) Ari Adat Lewi 19:2 enggau 1 Peter 1:15, kitai diperansang ngereja nama? (b) Rasul Peter meransang kitai ngereja nama?

¹⁷ Ayat ba Adat Lewi 19:2 enggau 1 Peter 1:15 meransang nembiak Petara diau kudus. Ayat ke bukai ba Adat Lewi bagi 19 nulung kitai meda chara kitai ulih ngelantangka ati Jehovah. Kitai udah meresa sekeda ayat ke nulung kitai meda utai ke patut digaga sereta sekeda utai ke patut diseliahka. * Sempekat Baru nunjukka Jehovah agi deka kitai nitihka prinsip tu ba pengidup kitai. Tang Rasul Peter deka kitai ngereja siti agi pengawa.

¹⁸ Kitai engka seruran ngereja pengawa ke bisi kaul enggau sembah kitai ngagai Jehovah sereta ngereja pengawa manah ngagai orang bukai. Taja pia, Peter meransang orang Kristian ngereja siti agi pengawa ti beguna. Sebedau Peter meransang kitai ngintu diri kudus ba ulah, iya madah: “Sediaka runding kita ngereja pengawa.” (1 Pet. 1:13, 15) Nama pengawa nya? Peter madah orang Kristian ke dipilih ngagai serega deka ‘madahka pasal pemanah pengawa Petara ke udah ngangauka’ sida. (1 Pet. 2:9) Lalu semua orang Kristian kemayaharitu bisi peluang enggau ba pengawa ti istimewa tu. Ketegal kitai ngintu diri kudus, kitai ulih enggau pengawa nginjil sereta ngajar! (Mrk. 13:10) Lebuh kitai enggau naka ulih nitihka prinsip ba Adat Lewi bagi 19, kitai nunjukka diri rinduka Petara enggau orang bukai. Kitai mega nunjukka diri deka ‘ngintu diri kudus’ ba semua ulah kitai.