ATUAQQISSAAGASSAQ 49
Allanik pinnittarneq pillugu Mosesimik allakkat pingajui qanoq ilinniarfigigigut
“Tullit ilittut asassavat.” – 3 MOS 19:18.
ERINARSUUT 107 Guutip asanninnermik najoqqutassiaa
QILANAARTUUT *
1-2. Allaaserisap siuliani suut sammivagut, maannalu suut sammissavagut?
ALLAASERISAP matuma siuliani siunnersuutit Mosesimik allakkat pingajuini kapitali 19-imiittut ilaat sammivagut. Assersuutigalugu versi 3-mi allassimasutut Jehovap Israelikkut oqarfigai angajoqqaatik ataqqissagaat. Angajoqqaatta timikkut, misigissutsikkut anersaakkullu pisariaqartitaannik isumaginnittarnikkut siunnersuut tamanna qanoq maleruarsinnaagipput sammivarput. Versi 3-mi aamma Guutip innuttai eqqaasinneqarput sabbatip nalliussisarnerata pingaaruteqassusianik. Paasivarput nalitsinni sabbatimik inatsit maleruartariaqanngikkaluarlugu najoqqutassiartaa atorsinnaagipput anersaakkut ittunik sammisaqarnissamut piffissaqartarnikkut. Taamaaliortarutta illernartoorusunnerput ersersissavarput, Mosesimik allakkat pingajui 19:2-mi aamma Petrusip allagai siulliit 1:15-imi allassimasut maleruarlugit.
2 Allaaserisami matumani Mosesimik allakkat pingajuini kapitali 19 samminerussavarput. Timikkut innarluutilinnut inussiarnisaarneq, niuernikkut unneqqarissuseq inoqatitsinnullu asannittuliorneq pillugit kapitalimi tamatumani suut ilinniarsinnaavagut? Guutitsitulli illernartoorusukkatta tamakku paasiniariartigit.
TIMIKKUT INNARLUUTILINNUT INUSSIARNISAARNEQ
3-4. Mosesimik allakkat pingajui 19:14 naapertorlugu tusilartut tappiitsullu qanoq pineqartassappat?
3 3 Mosesi 19:14 atuaruk. Jehovap kissaatigaa innuttani timikkut innarluutilinnut inussiarnersuussasut. Assersuutigalugu tusilartoq perloqqusassanngilaat, tassa sioorasaartassanngilaat ajortumilluunniit oqaluuserisarnagu. Taamaaliornermi ajorluinnartuuvoq! Oqaaserineqartut tusilartup tusaasinnaannginnamigit imminut illersorsinnaanngilaq.
4 Aamma versi 14-imi paasivarput Guutimut kiffaasut ‘tappiitsoq naakkiuffissalissanngikkaat’. Qinerlerfissiami timikkut innarluutillit pillugit ima allassimasoqarpoq: “Itsaq Kangiani Qiterlermi peqqarniitsumik pineqartarlutillu atornerlunneqartarput.” Immaqa tappiitsoq ajoquserniarlugu illaruaatiginiarluguluunniit aqqutissaani inupiluk naakkiuffissiisinnaavoq. Naakkittaassusia! Tamanna pillugu inatsiseqarmat Jehovap innuttaasa paasivaat innarluutilinnut inussiarnersuussallutik.
5. Timikkut innarluutillit qanoq misiginneqatigisinnaavagut?
5 Jiisusi timikkut innarluutilinnut inussiarnisaartarpoq. Johannesimut Kuisisumut ima oqariartortitsinera eqqarsaatigiuk: “Tappiitsut tappissipput, nukillaarsimasut pisupput, pupissut pupeerupput tusilartullu tusaapput; toqusut makipput.” Jiisusip tupinnartuliai takoreerlugit ‘inuit tamarmik Guuti nersorpaat’. (Luk 7:20-22; 18:43) Kristumiut Jiisusi ilaarlugu timikkut innarluutillit misiginneqatigerusuttarpaat. Taamaattumik inunnut taamaattunut inussiarnersuullutalu utaqqisinnaassuseqartarpugut. Jehovamit tupinnartuliorsinnaatitaanngikkaluarluta kikkut tamarmik paratiisimi peqqissilluinnarnissaat pillugu nutaarsiassanik nuannersunik timikkut anersaakkullu tappiitsut oqaluussiffiginissaat immikkut pisinnaatitaaffigaarput. (Luk 4:18) Inuppassuit nutaarsiassat nuannersut pissutigalugit Guuti unnersiutigisalersimavaat.
NIUERNERMI UNNEQQARISSUUNEQ
6. Mosesimik allakkat pingajuini kapitali 19 iluaqutigalugu Inassutit Qulit qanoq paasinerusinnaavagut?
6 Mosesimik allakkat pingajuini kapitali 19-imi versit ilaanni Inassutit Qulit nassuiarneqarnerupput. Assersuutigalugu inassutit arfineq-pingajuat imaappoq: “Tillissanngilatit.” (2 Mos 20:15) Isumaqartoqarsinnaavoq piginngisamik tigusinngisaannarnikkut inassut tamanna maleruarneqarsinnaasoq. Allatigulli tillittoqarsinnaavoq.
7. Niuertoq qanoq ilioruni inassutit arfineq-pingajuat unioqqutillugulu tillissava?
7 Niuertoq piginngisaminik tigusinngisaannarami eqqarsarsinnaavoq tillissimanngisaannarluni. Niuernerminili unneqqarissuusarpa? Mosesimik allakkat pingajui 19:35, 36-milu Jehova ima oqarpoq: “Iluanngitsuliussanngilasi eqqartuussigaangassi ussersaatit oqimaalutaaviillu imaqqortussutsimullu uuttuutit atoraangassigit. Oqimaalutaaviit, oqimaaluttat efamullu hinimullu uuttuutit eqqortut atussavasi.” Tassa niuertup pisiniartut sianiinaarniarlugit oqimaaluttat eqqunngitsut atorunigit tilliffigissavai. Tamanna Mosesimik allakkat pingajuini kapitali 19-imi versini allani aamma ersersinneqarpoq.
8. Inassutit arfineq-pingajuata najoqqutassiartaa juutit nalaanni nalitsinnilu qanoq maleruarneqarsinnaava? (3 Mosesi 19:11-13)
8 3 Mosesi 19:11-13 atuakkit. Versip 11-mi ima allassimavoq: “Tillissanngilasi … nunaqqatisilu ilumuunngitsuliorfiginagit.” Tassani tillinneq niuernikkut unneqqaserlunnermut tunngatinneqarpoq. Tassa niuertoq peqquserluttoq tillittutut nalilerneqarpoq. Israelikkut inassutit arfineq-pingajuanni paasivaat tillinneq eqqunngitsuliornerusoq. Mosesimilli allakkat pingajui iluaqutigalugit juutit inassutip najoqqutassiartaa, tassa tamatigut unneqqarissuussallutik, paasisinnaavaat. Jehovap unneqqaserlunnermut tillinnermullu isiginnittaasiata eqqarsaatigeqqissaarnissaa iluaqutigisinnaavarput. Uku eqqarsaatigisinnaavagut: ‘Mosesimik allakkat pingajui 19:11-13 eqqarsaatigalugit inuuninni arlaannik eqqumaffigisassaqarpunga? Niuernermi suliffinniluunniit iliuuserisartakkannik allannguisariaqarpunga?’
9. Inatsit Mosesimik allakkat pingajui 19:13-imi allassimasoq sulisut qanoq illersuutigaat?
9 Kristumiu sulisitsisoq allatigut qanoq unneqarissuusinnaanerluni aamma eqqarsaatigissavaa. Mosesimik allakkat pingajui 19:13-imi ima allassimavoq: “Sulisitassi akissarsisinnissaat aqagumut utaqqisissanngilarsi.” Israelimi inuit amerlanerit naasorissaasuupput, sulisullu ullormut akissarsisinneqartarput. Akissarsisinneqanngikkunik ilaquttatik ullormut inuussutissaqartinnissaannut akissaqarnaviarunanngillat. Tamanna pissutigalugu Jehova oqarpoq piitsup akissarsinissani atorfissaqartilluinnaraa. – 5 Mos 24:14, 15; Matt 20:8.
10. Mosesimik allakkat pingajui 19:13 qanoq ilinniarfigisinnaavarput?
10 Nalitsinni sulisut amerlanerit qaammammut ataasiarlutik marloriarlutilluunniit, ullormuunngitsoq, akissarsisinneqartarput. Taamaakkaluartoq Mosesimik allakkat pingajui 19:13-ip najoqqutassiartaa suli atuuppoq. Sulisitsisut ilaasa sulisutik annikippallaamik akissarsisittarpaat. Nalunngilaat sulisitatik akissarsiaat annikippallaaraluartut allatut ajornarmat suliinnartariaqartut. Sulisitsisut taamaattut sulisitatik “akissarsisinnissaat aqagumut” utaqqisittarpaat. Kristumiup sulisitsisup sulisitami naapertuilluartumik pineqarnissaat qulakkeertariaqarpaa. Maanna Mosesimik allakkat pingajuini kapitali 19 allatigut qanoq ilinniarfigisinnaaneripput sammeriartigu.
INOQATIT IMMINUT ASANITTUT ASASSAVAT
11-12. Mosesimik allakkat pingajui 19:17, 18-ilu issuaramigit Jiisusip suna erseqqissarpaa?
11 Guutip inoqatitsinnik qanoq pinnittarnissarput pillugu ilinniartikkamisigut allanik ajoqusiissannginnerput oqaatigiinnanngilaa. Mosesimik allakkat pingajui 19:17, 18-imilu. (Atuakkit). Erseqqissumik ima allassimavoq: “Tullit ilittut asassavat.” Kristumiu Jehovamit iluarisaarusukkuni taamaaliortariaqarpoq.
Tamanna atuarsinnaavarput12 Peqqussutip tamatuma pingaaruteqarnera Jiisusip qanoq ersersikkaa eqqarsaatigiuk. Ilaanni farisiiarip Jiisusi ima aperaa: “Inassut suna inatsisini annerua?” Jiisusi akivoq “inassutit annersaat siullersaallu” tassaasoq Jehova uummat tamakkerlugu, tarneq tamakkerlugu isumarlu tamakkerlugu asassagipput. Taava Jiisusi Mosesimik allakkat pingajui 19:18 issuarlugu ima oqarpoq: ‘Aappaata taamaaqatigaa: “Tullit ilittut asassavat.”’ (Matt 22:35-40) Assigiinngitsorpassuartigut inoqaterput asasinnaavarput, taakkualu ilaat Mosesimik allakkat pingajuini kapitali 19-imi allassimapput.
13. Josefimik oqaluttuap misissorneratigut Mosesimik allakkat pingajui 19:18 qanoq paasilluarnerusinnaavarput?
13 Inoqatitsinnik asanninnerput ilaatigut ersersissinnaavarput Mosesimik allakkat pingajui 19:18-imi allassimasut maleruarnerisigut. Ima allassimavoq: “Inuiaqatinnut akinialerituussanngilatit puttarsisaqarnalluunniit.” Suleqatiminik, atuaqatiminik ilaquttaminilluunniit – immaqa allaat ukiorpassuarni – puttarsisaqarfiginnittoqarnera amerlanersatta tusarsimassagunarpaat. Assersuutigalugu Josefip qatanngutaasa qulit taanna kamaatingaaramikku ajortumik pivaat. (1 Mos 37:2-8, 25-28) Josefi taakkunannga allaanerulluinnartumik iliorpoq! Qatanngutini nallittorpai akiniaaffiginissaannut oqartussaassuseqalereeraluarluni. Josefip puttarsinani siunnersuut kingusinnerusukkut Mosesimik allakkat pingajui 19:18-imi allanneqartoq maleruarpaa. – 1 Mos 50:19-21.
14. Mosesimik allakkat pingajui 19:18-ip najoqqutassiartaa suli atuuttoq qanoq nalunngilarput?
14 Kristumiut Guutimit iluarisaarusukkamik Josefi ilaarlugu inoqatertik akiniaaffiginagu isumakkeerfigissavaat. Taamaaliorunik Jiisusip Ataatarpuumi isumakkeerfiginnittaqqusinera maleruassavaat. (Matt 6:9, 12) Paulusip aamma uppeqatini ima siunnersorpai: “Nammineerlusi akiniaaqinasi, asasakka.” (Rom 12:19) Aamma ima kajumissaarivoq: “Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi.” (Kol 3:13) Jehovap najoqqutassiai allanngorneq ajorput. Inatsisip Mosesimik allakkat pingajui 19:18-imi allassimasup najoqqutassiartaa suli atuuppoq.
15. Sooq isumakkeerfiginnittarneq pingaaruteqarpa? Assersuuteqarit.
15 Assersuuteqariarta. Misigissutsikkut anniaateqarneq timikkut ikeqarnermut assersuunneqarsinnaavoq. Ikit ilaat soqutaannginnerusut allat annernarnerusinnaapput. Assersuutigalugu allakkat puuat ammarlutigu kilerfigisinnaavarput. Annernaraluartoq ajoquserujussuarnavianngilagut. Ullualuit qaangiuttut immaqa sumi ikeqarnerluta eqqaamanngilarput. Taamatuttaaq ajuallatsinneqarnerit ilaat soqutaavallaanngillat. Assersuutigalugu ikinnguterput eqqarsaqqaarnani annernartumik oqaaseqarsinnaavoq, isumakkeerfigeriaannaavarpullu. Kilernerli anginerusoq nakorsamit mersorneqarlunilu mattuserneqartariaqarsinnaavoq. Kilernerpulli attoqattaarutsigu imminut ajoqusiinnassaagut. Taamatuttaaq inuk ajuallangaarsimasoq ajuallatsinneqarsimanini aliasunninilu eqqarsaatigeqattaarunigit puttarsillunilu imminut ajoqusiinnassaaq. Mosesimik allakkat pingajui 19:18-imi siunnersuutip maleruarnera iluaqutiginerungaassavarput!
16. Mosesimik allakkat pingajui 19:33, 34-lu naapertorlugit Israelimi allamiut qanoq pineqartussaappat, uagullu tamanna qanoq ilinniarfigaarput?
16 Jehovap Israelikkut inoqatiminnik asannissasut peqqugamigit nunaqqatiminnik asannissasut piinnanngilaa. Aamma allamiut nunaminni najugaqartut asasussaavaat. Tamanna Mosesimik allakkat pingajui 19:33, 34-milu erseqqissumik allassimavoq. (Atuakkit). Israelikkut allamiut ‘nunaqqatimissut’ pisussaallugillu asasussaavaat. Assersuutigalugu piitsut allamiullu naasorissaasup narsaatimini qaangiinnagaanik nakkaasimasaanillu katersuisinnaatitaapput. (3 Mos 19:9, 10) Kristumiut aamma allamiunik asannittuusariaqarput. (Luk 10:30-37) Nunarsuaq tamakkerlugu nunasisorpassuaqarpoq, ilimanarporlu ilaat najugaqarfivit eqqaani najugaqartut. Pingaaruteqarpoq taakkua ataqqinnittumik pisarnissaat.
MOSESIMIK ALLAKKAT PINGAJUINI KAPITALI 19-IMI EQQAANEQANNGITSOQ
17-18. (a) Mosesimik allakkat pingajui 19:2 aamma Petrusip allagai siulliit 1:15 sunissatsinnut kajumississutigissavagut? (b) Apustilip Petrusip pingaarutilimmik sumik suliassaqarnerarpaatigut?
17 Mosesimik allakkat pingajui 19:2-mi aamma Petrusip allagai siulliit 1:15-imi Guutip innuttai illernartooqquneqarput. Kapitalimi tamatumani versit allarpassuit iluaqutigalugit qanoq Jehovamit iluarisaasinnaanerluta paasisinnaavarput. Iliuuserisassat iliuuserinaveersaagassallu tassani allaatigineqartut sammereerpagut. * Najoqqutassiat tamakku kristumiut aamma maleruassagaat Grækerisut Allakkani Illernartuni ersersinneqarpoq. Apustilili Petrusi allamik aamma ilanngussaqarpoq.
18 Anersaakkut ittunik arlalinnik sammisaqartarlutalu allat pillugit ajunngitsunik iliuuseqartarpugut. Petrusilli kristumiut pingaarutilimmik suliassaqarnerarpai. Sutigut tamatigut illernartooqqusinermi siuninnguatigut Petrusip ima kajumissaarpaatigut: “Eqqumaniaritsi isummassigullu piareersimallusi.” (1 Petr 1:13, 15) Sumut piareersimassaagut? Petrusi oqarpoq Kristusip qatanngutai tanitat ‘Guutip pissaaneranik nalunaajaassasut’. (1 Petr 2:9) Kristumiut tamarmik tamatuminnga pingaarutilimmik suliassinneqarnertik ataqqinaatigaat, tamannami iliuuserisartakkatsinnit tamanit inuit allat iluaqutiginerpaavaat. Guutip innuttaatut illernartutut aallussilluarluta oqaluussisinnaanerput ilinniartitsisinnaanerpullu immikkut pisinnaatitaaffigaarput! (Mark 13:10) Mosesimik allakkat pingajuini kapitali 19-imi najoqqutassiat maleruaqqissaaraangatsigit Guutitsinnik inoqatitsinnillu asanninnerput ersersittarparput. Sutigullu tamatigut ‘illernartoorusunnerput’ takutittarparput.
ERINARSUUT 111 Nuannaarnermut pissutaasut
^ par. 5 Kristumiut Mosesip inatsisaanik maleruaasariaqanngillat, inatsisinili taakkunani iliuuserisassatta iliuuserinaveersaagassattalu ilaat eqqaaneqarput. Tamakku paasigutsigit allanik asannittuliornissamut Guutimillu iluarisaanissamut iluaqutigissavarput. Allaaserisami matumani Mosesimik allakkat pingajuini kapitali 19 qanoq ilinniarfigisinnaaneripput sammineqarpoq.
^ par. 17 Allaaserisami matumani siulianilu versini sammineqanngitsuni uku pineqarput: Kinaassusersiorneq, nikassaalluni salluliuutiginninneq, aattalinnik nerineq, anersaarsiorneq, siulittuiniarneq kinguaassiuutitigullu assuarnartuliorneq. – 3 Mos 19:15, 16, 26-29, 31. – Takuuk atuagassiami matumani allaaserisaq “Atuartartut apeqqutaat”.
^ par. 52 ASSIMI MALUGISASSAT: Nalunaajaasup uppeqatini tusilartoq nakorsamik oqaloqatiginninnerani ikioraa.
^ par. 54 ASSIMI MALUGISASSAT: Qatanngutip qalipaataarniarfimmi ittuusup sulisuni akissarsisikkaa.
^ par. 56 ASSIMI MALUGISASSAT: Qatanngutip arnap kilernini soqutaanngitsoq puiupallassavaa. Annerusumilli ikeqaruni aamma taamaaliussava?