1-2. Peuˬ taˉ ve teˇ lawn hkʼaw ngaˬ hui aˬ htoꞈ ma htaꞈ gʼa henˇ peuˬ˗oˬ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ ve le?

 Peuˬ taˉ ve teˇ lawn hkʼaw Oˉ kʼoˍ pui ve liꞈ kaˇ nanˉ uiˍ 19 hkʼaw daꞈ jaˇ ve beˆ maˍ laˇ taˍ ve htaꞈ ngaˬ hui gʼa henˇ˗oˬ ve yoˬ. Tawˇ pa haˉ te kʼo, kaˇ nanˉ ehˉ 3 hkʼaw kʼoˆ ve, Iˉsaˍreˍlaˆ chaw awˬ pa awˬ e htaꞈ yawˆ yan˗o tehꞈ Yaˬhoˉvaˬ kʼoˆ piˇ ve yoˬ. Chi beuꞈ teˇ co˗e ngaˬ hui kaꞈ beˆ maˍ laˇ ve chi htaꞈ gʼaꞈ te gʼa tuˬ, awˬ pa awˬ e yehˇ cawˇ ve awˬ ceuˬ vuiˬ tuˬ hpu piˇ ve, te hkʼaˇ dawˇ hkʼaˇ htaꞈ haꞈ shaˉ piˇ ve, leh yonˍ hkʼaˇ hpawˇ kaꞈ ga piˇ ve gʼa henˇ˗oˬ ve yoˬ. Chi hkʼoˆ kaꞈ, chi ve teˇ tawn hkʼaw Yaˬhoˉvaˬ Iˉsaˍreˍlaˆ chaw htaꞈ shinˉ nyi ve awˬ liˇ tawˇ hkawˇ htaꞈ gʼaꞈ te tuˬ kʼoˆ piˇ ve yoˬ. Chi beuꞈ teˇ co˗e ngaˬ hui shinˉ nyi ve awˬ liˇ tawˇ hkawˇ htaꞈ maˇ gʼaꞈ te˗o ve htawˇ, ngaˬ hui Yaˬhoˉvaˬ htaꞈ hkʼaˬ htaˆ kaꞈ oˉ kʼoˍ pui tuˬ, beˆ maˍ laˇ ve chi htaꞈ gʼaꞈ te gʼa sheˍ ve yoˬ. Ngaˬ hui chi hkʼe te ve kʼo, Oˉ kʼoˍ pui ve liꞈ 19:2 leh 1 Peˍtruˆ liꞈ 1:15 hkʼaw kʼoˆ ve hkʼe, daꞈ kehˬ ve chaw hpehꞈ tuˬ ngaˬ hui coˇ caˇ chehˇ ve yoˬ.

² Oˉ kʼoˍ pui ve liꞈ kaˇ nanˉ uiˍ 19 htaꞈ ngaˬ hui teˇ geh kʼawꞈ henˇ tuˬ sheˍ. Hkui luˬ laꞈ luˬ ve chaw htaꞈ ha kʼaˉ ve, tanˇ kaˬ te htaˇ gʼa hteˇ cawˇ ve, leh shu htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa tuˬ ve le, teˇ geh henˇ tuˬ yoˬ. Leh ngaˬ hui ve Gʼuiˬ sha daꞈ kehˬ leh ngaˬ hui kaꞈ daꞈ kehˬ gaˇ ve awˬ lawn chi ve teˇ geh henˇ tuˬ yoˬ.

3-4. Oˉ kʼoˍ pui ve liꞈ 19:14 hkʼaw kʼoˆ taˍ ve hkʼe, naˍ paw pawˇ ve chaw leh mehˆ cuˉ ve chaw htaꞈ ngaˬ hui hkʼaˬ hkʼe te piˇ cawˇ ve le?

³ Oˉ kʼoˍ pui ve liꞈ 19:14 gʼaw sheˍ. Yaˬhoˉvaˬ yawˇ ve chaw hkui luˬ laꞈ luˬ ve chaw htaꞈ ha kʼaˉ tcuh gaˇ ve yoˬ. Tawˇ pa haˉ te kʼo, Iˉsaˍreˍlaˆ chaw naˍ paw pawˇ ve chaw htaꞈ maˇ gʼa hkeu piˇ. Hkeu piˇ ve kʼo chaw oˇ ve teˇ gʼaˇ htaꞈ kawˆ ho piˇ ve maˇ heˆ leh deˇ piˇ ve yoˬ.  Naˍ paw pawˇ ve chaw htaꞈ chi hkʼe te piˇ ve lehˬ haiˬ jaˇ. Naˍ paw pawˇ ve chaw lehˬ shu yawˇ htaꞈ kʼoˆ ve yawˇ maˇ kaˇ ve pa taw yoˬ. Leh chi yawˇ awˬ to yawˇ haꞈ shaˉ maˇ gʼa.

⁴ Kaˇ nanˉ ehˉ 14 hkʼaw kʼoˆ sheˍ ve, “mehˆ cuˉ paˍ htaꞈ hkui htiˇ poˬ paiˍ tuˬ maˇ gʼa te.” Liꞈ kʼoˆ teˇ kʼoˆ hkʼaw kʼoˆ ve, “oˇ htaˇ teˇ co˗e mvuhˇ nyi tawˆ hpawˇ lo ve chaw, mehˆ cuˉ ve chaw htaꞈ haiˬ ve leh maˇ hteˇ maˇ cawˇ te piˇ ve yoˬ.” Yawˇ hui naˬ tuˬ leh yawˇ hui htaꞈ shu kʼoˆ guiˇ gʼuiˬ guiˇ piˇ tuˬ laiˉ gʼaˇ yawˇ hui htaꞈ chi hkʼe te piˇ ve yoˬ. Chi lehˬ haiˬ jaˇ ve awˬ ceuˬ hpehꞈ ve yoˬ. Yaˬhoˉvaˬ yawˇ ve chaw hkui luˬ laꞈ luˬ ve chaw htaꞈ ha kʼaˉ piˇ tuˬ, tawˇ hkawˇ chi ve Yaˬhoˉvaˬ yawˇ ve chaw htaꞈ piˇ ve ngaˬ hui mawˬ tuˬ te laˇ ve yoˬ.

5. Hkui luˬ laꞈ luˬ ve chaw htaꞈ ngaˬ hui hkʼaˬ hkʼe ha kʼaˉ piˇ gʼa tuˬ le?

⁵ Yeˍsuˆ hkui luˬ laꞈ luˬ ve chaw htaꞈ ha kʼaˉ ve yoˬ. Yeˍsuˆ awˬ nu ve chaw htaꞈ cuˇ leh Baˆtiˆsaˬ piˇ paˍ Yoˇhanˬ htaꞈ ca kʼoˆ piˇ tcuh ve htaꞈ dawˇ nyi sheˍ. Oˇ kaˬ lo kʼoˆ ve, “mehˆ cuˉ ve chaw hui mehˆ mawˬ la ve, hkui luˬ ve chaw hui yaꞈ kʼaw juˇ kʼai ve, hkiˬ tuꞈ keuˆ ve chaw hui daꞈ la kehˬ la ve, naˍ paw pawˇ ve chaw hui naˍ paw kaˇ la ve, suh ve chaw hui kʼawꞈ teꞈ tu la ve” yoˬ. Yeˍsuˆ anˇ tuˬ te leh chaw chi ve teˇ hpaˍ htaꞈ ga piˇ ve yoˬ. Leh mvuhˇ miˬ yaˇ chi ve htaꞈ gʼa mawˬ htaˇ, “Gʼuiˬ sha ve bon htaꞈ chiˇ mvuh ve yoˬ.” (Luˉkaꞈ 7:20-22; 18:43) Chi beuꞈ teˇ co˗e ve Hkriꞈ yaˇ kaꞈ Yeˍsuˆ htaꞈ henˇ yuˬ ve yoˬ. Ngaˬ hui shu htaꞈ ha kʼaˉ ve, yeunˇ hkanˍ piˇ ve, leh hkui luˬ laꞈ luˬ ve chaw htaꞈ ga piˇ ve yoˬ. Ngaˬ hui anˇ tuˬ te tuˬ Yaˬhoˉvaˬ kanˇ paˆ maˇ peꞈ laˇ ve htawˇ, yawˇ htaꞈ maˇ shiˍ leh awˬ tehˬ awˬ na mehˆ cuˉ ve chaw htaꞈ maˍ piˇ ve hkʼe, miˬ guiˬ hkʼoˆ naˆ hoꞈ ve hkʼaw chehˇ ve chaw htaꞈ daꞈ ve awˬ lawn sha tanˇ gʼa maˍ piˇ tuˬ daꞈ jaˇ ve awˬ vuiˬ ngaˬ hui cawˬ ve yoˬ. Maˇ maw ve awˬ yanˇ miˬ guiˬ awˬ suhˉ gaˬ la tuˬ, Yaˬhoˉvaˬ geh meuˆ daꞈ tuˬ, chehˇ sha cawˬ sha ve cawˬ tuˬ yoˬ tehꞈ, ngaˬ hui yawˇ hui htaꞈ gʼa kʼoˆ piˇ sheˍ ve yoˬ. (Luˉkaꞈ 4:18) Daꞈ ve awˬ lawn sha tanˇ htaꞈ pa taw, chi beuꞈ teˇ co˗e laiˉ gʼaˇ Yaˬhoˉvaˬ htaꞈ chiˇ mvuh la ve yoˬ.

6. Oˉ kʼoˍ pui ve liꞈ kaˇ nanˉ uiˍ 19 hkʼaw ve awˬ liˇ tawˇ hkawˇ 10 hkawˇ htaꞈ ngaˬ hui hkʼa dehꞈ na gʼa tuˬ hkʼaˬ hkʼe ga laˇ ve le?

⁶ Oˉ kʼoˍ pui ve liꞈ kaˇ nanˉ uiˍ 19 kaˇ nanˉ ehˉ teˇ tawn tawn hkʼaw awˬ liˇ tawˇ hkawˇ 10 hkawˇ htaꞈ ngaˬ hui hkʼa dehꞈ na gʼa tuˬ ga laˇ ve yoˬ. Awˬ liˇ tawˇ hkawˇ 8 hkawˇ teˇ hkawˇ hkʼaw “shu ve mawˇ htaꞈ nawˬ maˇ gʼa hkʼawˇ” tehꞈ kʼoˆ ve yoˬ. (Tawˆ kʼai ve 20:15) Shu ve mawˇ yuˬ veu laˇ leh a shu yawˇ ve  mawˇ hpehꞈ tuˬ maˇ te ve kʼo, yawˇ awˬ liˇ tawˇ hkawˇ chi ve teˇ hpaˍ htaꞈ na yuˬ ve tehꞈ chaw teˇ hpaˍ dawˇ ve yoˬ. Yaꞈ hkʼaˇ, yawˇ te ve teˇ ceuˬ ceuˬ lehˬ shu ve mawˇ hkʼawˇ ve htaꞈ shuˍ ve yoˬ.

7. Tanˇ kaˬ paˍ awˬ liˇ tawˇ hkawˇ 8 hkawˇ teˇ hkawˇ htaꞈ hkʼaˬ hkʼe te yaꞈ ve le?

⁷ Tanˇ kaˬ paˍ teˇ gʼaˇ yawˇ shu ve mawˇ htaꞈ maˇ yuˬ ve pa taw, shu ve mawˇ maˇ gʼa hkʼawˇ tehꞈ dawˇ ve yoˬ. Yaꞈ hkʼaˇ, yawˇ mawˇ hawˇ htaˇ, hkʼaˬ htaˆ kaꞈ hteˇ cawˇ˗aw laˇ? Oˉ kʼoˍ pui ve liꞈ 19:35, 36 hkʼaw kʼoˆ taˍ ve hkʼe, Yaˬhoˉvaˬ kʼoˆ ve, “maˇ cawˇ ve yaˍ cuˍ, maˇ cawˇ ve hkʼawˍ lawˇ htaꞈ yehˇ leh shu htaꞈ taˇ heˍ caˇ. Cawˇ ve yaˍ cuˍ leh cawˇ ve hkʼawˍ lawˇ htaꞈ ceh tiˉ yehˇ˗oˆ.” Tanˇ kaˬ paˍ mawˇ vuiˬ la ve chaw htaꞈ heˍ caˇ tuˬ yaˍ cuˍ yawˇ te taˍ ve kʼo, yawˇ shu ve mawˇ htaꞈ hkʼawˇ chehˇ ve yoˬ. Awˬ lawn chi ve htaꞈ ngaˬ hui hkʼa dehꞈ shiˍ tuˬ Oˉ kʼoˍ pui ve liꞈ kaˇ nanˉ uiˍ 19 htaꞈ teˇ geh nyi sheˍ.

8. Oˉ kʼoˍ pui ve liꞈ 19:11-13 hkʼaw Yuˇdaꞈ chaw awˬ liˇ tawˇ hkawˇ 8 hkawˇ teˇ hkawˇ htaꞈ yuˬ yehˇ tuˬ hkʼaˬ hkʼe ga piˇ ve le? Leh awˬ lawn chi ve ngaˬ hui awˬ pon awˬ bon hkʼaˬ hkʼe cawˬ ve le?

⁸ Oˉ kʼoˍ pui ve liꞈ 19:11-13 gʼaw sheˍ. Oˉ kʼoˍ pui ve liꞈ 19:11 tanˬ htaˇ hkʼaw kʼoˆ ve, “shu ve mawˇ taˇ hkʼawˇ.” Leh kaˇ nanˉ ehˉ 13 hkʼaw kʼoˆ ve, “shu htaꞈ taˇ heˍ caˇ.” Chi htaꞈ pa taw, tanˇ kaˬ hkʼaˇ te ve hkʼaˬ hkʼe ve hpawˇ htawˇ maˇ kʼoˆ, maˇ hteˇ maˇ cawˇ ve kʼo shu ve mawˇ hkʼawˇ ve yoˬ. Awˬ liˇ tawˇ hkawˇ 10 hkawˇ hkʼaw 8 hkawˇ teˇ hkawˇ kʼoˆ ve, shu ve mawˇ htaꞈ taˇ hkʼawˇ. Yaꞈ hkʼaˇ, Oˉ kʼoˍ pui ve liꞈ kaˇ nanˉ uiˍ 19 hkʼaw Yuˇdaꞈ chaw yawˇ hui a shaꞈ teꞈ kuiˬ hkʼaw awˬ liˇ tawˇ hkawˇ chi ve hkʼaˬ hkʼe te yuˬ yehˇ tuˬ ga piˇ ve yoˬ. Mawˇ hkʼawˇ ve leh maˇ hteˇ maˇ cawˇ ve htaꞈ Yaˬhoˉvaˬ hkʼaˬ hkʼe dawˇ ve htaꞈ ngaˬ hui shiˍ ve kʼo, chi beuꞈ teˇ co˗e ngaˬ hui awˬ pon kaꞈ awˬ bon gʼa ve yoˬ. Ngaˬ hui a shu yawˇ awˬ to htaꞈ na nyi cawˇ ve, “Oˉ kʼoˍ pui ve liꞈ 19:11-13 htaꞈ dawˇ nyi leh tanˇ kaˬ hpawˇ maˇ heˆ leh te hkʼaˇ dawˇ hkʼaˇ ngaˬ hui a shaꞈ teꞈ kuiˬ hkʼaw gʼa pa cawˇ ve tehꞈ shiˍ htaˇ pa˗aw laˇ?”

9. Oˉ kʼoˍ pui ve liꞈ 19:13 hkʼaw ve awˬ liˇ tawˇ hkawˇ kanˉ te tcuh ve chaw htaꞈ hkʼaˬ hkʼe haꞈ shaˉ piˇ ve le?

⁹ Hkriꞈ yaˇ hpehꞈ ve paw leˍ tanˇ kaˬ hpawˇ te ve gʼa hteˇ cawˇ ve awˬ lawn htaꞈ dawˇ nyi sheˍ. Oˉ kʼoˍ pui ve liꞈ 19:13 hkʼaw kʼoˆ ve, “nawˬ ve kanˉ te tcuh ve chaw htaꞈ laꞈ haˉ awˬ hpfuhˇ piˇ˗oˆ. Haˉ taˇ hkanˍ piˇ.” Oˇ htaˇ teˇ co˗e Iˉsaˍreˍlaˆ chaw mawˇ miˬ te caˇ ve, maˇ˗awˍ ve kʼo kanˉ te peuˬ hkʼawꞈ nawˉ hpu gʼa piˇ ve yoˬ. Paw leˍ yawˇ htaꞈ hpu maˇ piˇ ve kʼo, yawˇ yehˬ kʼa hkʼaw ve chaw htaꞈ caˇ tuˬ vuiˬ piˇ tuˬ hpu maˇ cawˬ. Yaˬhoˉvaˬ kʼoˆ ve, kanˉ te tcuh ve chaw chi teˇ hpaˍ lehˬ “yawˇ hpu loˍ leh gʼaˇ ga caˇ chehˇ ve yoˬ.”—Bon maˍ ve 24:14, 15; Maꞈhtehˍ 20:8.

10. Oˉ kʼoˍ pui ve liꞈ 19:13 hkʼaw ngaˬ hui htaꞈ aˬ htoꞈ ma maˍ laˇ ve le?

¹⁰ Chi beuꞈ teˇ co˗e gʼaˇ ga caˇ chehˇ ve chaw lehˬ, ha pa hpfuhˇ 1 ha pa ve hkʼaw 1 pawˆ maˇ heˆ leh 2 pawˆ gʼa ve yoˬ. Yaꞈ hkʼaˇ, Oˉ kʼoˍ pui ve liꞈ 19:13 hkʼaw ve awˬ liˇ awˬ hkʼaˇ yehˇ gʼa sheˍ ve yoˬ. Chi htaꞈ pa taw, paw leˍ lehˬ kanˉ te ve chaw htaꞈ kʼoˆ daꞈ taˍ ve hkʼe awˬ hpfuhˇ maˇ piˇ ve htawˇ, kanˉ te ve chaw kaꞈ maˇ te maˇ hpehꞈ ve pa taw te ve yoˬ. Hpu a ciˉ ceh tiˉ gʼa ve htawˇ, yawˇ hui yeunˇ hkanˍ leh kanˉ gʼa te sheˍ ve yoˬ. Paw leˍ chi hkʼe te ve lehˬ ‘kanˉ te tcuh ve chaw htaꞈ laꞈ haˉ awˬ hpfuhˇ maˇ piˇ’ ve htaꞈ shuˍ ve yoˬ. Chi beuꞈ teˇ co˗e ve Hkriꞈ yaˇ tanˇ kaˬ hpawˇ te htaˇ, awˬ lawn chi ve htaꞈ hkʼa dehꞈ tawnˇ taˍ cawˇ ve yoˬ. Yawˇ hteˇ ve cawˇ ve hkʼaw awˬ hpfuhˇ gʼa piˇ ve yoˬ. Oˉ kʼoˍ pui ve liꞈ kaˇ nanˉ uiˍ 19 hkʼaw ngaˬ hui htaꞈ aˬ htoꞈ ma maˍ laˇ sheˍ ve teˇ geh kʼawꞈ henˇ tuˬ yoˬ.

11-12. Oˉ kʼoˍ pui ve liꞈ 19:17, 18 hkʼaw Yeˍsuˆ kʼoˆ htaˇ, aˬ htoꞈ ma te tuˬ kʼoˆ ve le?

¹¹ Yaˬhoˉvaˬ lehˬ ngaˬ hui shu htaꞈ maˇ dawˇ haˍ tuˬ maˇ te piˇ tcuh gaˇ ve ceh maˇ heˆ. Yaꞈ hkʼaˇ, ngaˬ hui shu htaꞈ hkʼaˬ hkʼe te piˇ ve awˬ hkʼaˇ htaꞈ kaꞈ yawˇ a yeˇ yuˬ ve yoˬ. Awˬ lawn chi ve ngaˬ hui Oˉ kʼoˍ pui ve liꞈ 19:17, 18 hkʼaw mawˬ gʼa ve yoˬ. (Gʼaw sheˍ.) Choˬ kaˬ lo hkʼa tawˍ lehˆ kʼoˆ ve, “nawˬ awˬ to htaꞈ haꞈ ve hkʼe, nawˬ awˬ paˇ awˬ kui chehˇ ve chaw htaꞈ gʼa haꞈ ve yoˬ.” Ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve kʼo, chi ve htaꞈ ngaˬ hui gʼa gʼaꞈ te cawˇ ve yoˬ.

 ¹² Oˉ kʼoˍ pui ve liꞈ 19:17, 18 hkʼaw a yeˇ uiˍ jaˇ ve htaꞈ Yeˍsuˆ hpeuꞈ maw laˇ ve yoˬ. Hpaˍriˍsehˇ hui Yeˍsuˆ htaꞈ na piˇ ve, Moˉseˍ ve “awˬ liˇ tawˇ hkawˇ awˬ hkʼaw lo piˇ taˍ ve tawˇ hkʼaˬ ve teˇ hkawˇ hkʼa peu˗eˬ aꞈ kehˉ uiˍ ve le?” Yeˍsuˆ hkʼawꞈ piˇ ve, “piˇ taˍ ve tawˇ chi teˇ hkawˇ lehˬ, hkʼe peu˗eˬ aꞈ kehˉ uiˍ leh awˉ lawˉ peuˇ ve teˇ hkawˇ hpehꞈ ve” yoˬ. Oˇ ve lehˬ nawˬ ve nyi ma hkʼa peu˗eˬ, nawˬ ve co ha hkʼa peu˗eˬ leh nawˬ ve dawˇ hkʼaˇ hkʼa peu˗eˬ Yaˬhoˉvaˬ htaꞈ gʼa haꞈ ve yoˬ. Leh Yeˍsuˆ Oˉ kʼoˍ pui ve liꞈ 19:17, 18 hkʼaw kʼawꞈ kʼoˆ sheˍ ve, 2 hkawˇ teˇ hkawˇ kaꞈ “nawˬ awˬ to htaꞈ haꞈ ve hkʼe, nawˬ awˬ paˇ awˬ kui chehˇ ve chaw htaꞈ gʼa haꞈ ve yoˬ.” (Maꞈhtehˍ 22:35-40) Ngaˬ hui shu htaꞈ haꞈ ve tehꞈ hpeuꞈ maw piˇ gʼa ve laiˉ hkʼaˇ cawˬ ve yoˬ. Oˉ kʼoˍ pui ve liꞈ kaˇ nanˉ uiˍ 19 ngaˬ hui shu htaꞈ hkʼaˬ hkʼe te piˇ cawˇ ve kaꞈ ga laˇ ve yoˬ.

13. Yoˇsehꞈ ve awˬ lawn ngaˬ hui Oˉ kʼoˍ pui ve liꞈ 19:17, 18 hkʼaw hkʼa dehꞈ na gʼa tuˬ hkʼaˬ hkʼe ga laˇ ve le?

¹³ Ngaˬ hui shu htaꞈ haꞈ gʼa ve awˬ nu ve teˇ hkʼaˇ lehˬ, Oˉ kʼoˍ pui ve liꞈ 19:18 hkʼaw beˆ maˍ laˇ taˍ ve htaꞈ yuˬ yehˇ ve yoˬ. Oˇ kaˬ lo kʼoˆ ve, “chaw teˇ gʼaˇ htaꞈ kaꞈ nawˬ maˇ gʼa te hkʼawꞈ piˇ.” Liꞈ henˇ kuiˬ lo ve awˬ chawˇ, kanˉ teˇ geh te ve chaw, awˬ suhˍ awˬ sha hpawˇ ve awˬ viˉ awˬ nyi ngaˬ hui htaꞈ laiˉ hkʼawꞈ beuꞈ laˇ ve yoˬ. Yoˇsehꞈ ve awˬ viˉ paˍ 10 gʼaˇ Yoˇsehꞈ htaꞈ beuꞈ leh nyi bawˬ ve pa taw, haiˬ ve awˬ ceuˬ te piˇ ve htaꞈ dawˇ nyi sheˍ. (Awˬ hkuiˉ puiˍ 37:2-8, 25-28) Awˬ viˉ paˍ hui Yoˇsehꞈ htaꞈ peun daꞈ jaˇ. Yoˇsehꞈ kanˇ paˆ cawˬ leh awˬ viˉ paˍ hui htaꞈ te hkʼawꞈ piˇ kaꞈ gʼa ve htawˇ, yawˇ maˇ te. Yawˇ awˬ viˉ paˍ hui htaꞈ maˇ te hkʼawꞈ leh ha kʼaˉ ve tehꞈ hpeuꞈ maw piˇ ve yoˬ. Leh Oˉ kʼoˍ pui ve liꞈ 19:18 leh Awˬ hkuiˉ puiˍ ve liꞈ 50:19-21 hkʼaw kʼoˆ taˍ ve hkʼe yawˇ gʼaꞈ te ve yoˬ.

14. Oˉ kʼoˍ pui ve liꞈ 19:18 hkʼaw ve awˬ liˇ awˬ hkʼaˇ chi beuꞈ teˇ co˗e kaꞈ yehˇ gʼa sheˍ ve tehꞈ ngaˬ hui hkʼaˬ hkʼe te shiˍ gʼa ve le?

¹⁴ Hkriꞈ yaˇ lehˬ Yaˬhoˉvaˬ nyi hkʼaˇ suh tuˬ te piˇ gaˇ ve kʼo, Yoˇsehꞈ htaꞈ henˇ yuˬ leh maˇ beuꞈ leh maˇ te hkʼawꞈ. Yaꞈ hkʼaˇ, shu htaꞈ venˇ baˆ gʼa hpehˇ piˇ ve yoˬ. Ngaˬ hui chi hkʼe te ve kʼo, Yeˍsuˆ ve bon lawˬ hkawˇ hkʼaw ve awˬ lawn ngaˬ hui htaꞈ te yaꞈ laˇ ve chaw htaꞈ venˇ baˆ hpehˇ piˇ chehˇ ve yoˬ. (Maꞈhtehˍ 6:9, 12) Chi hkʼoˆ kaꞈ, Pawˇluꞈ Hkriꞈ yaˇ htaꞈ kʼoˆ piˇ ve, “haꞈ ve chaw teˇ hpaˍ˗oˬ, shu nawˬ hui htaꞈ te yaꞈ laˇ ve kʼo, nawˬ hui hkʼaˇ nawˬ hui taˇ kʼawꞈ te hkʼawꞈ piˇ.” (Roˉmaꞈ 12:19) Leh yawˇ kʼawꞈ kʼoˆ sheˍ ve, “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ.” (Kawˇlawˇsehˇ 3:13) Yaˬhoˉvaˬ ve awˬ liˇ awˬ hkʼaˇ maˇ pa ve tehꞈ ngaˬ hui hkʼa tawˍ lehˆ gʼa mawˬ ve yoˬ. Oˉ kʼoˍ pui ve liꞈ 19:18 hkʼaw ve awˬ liˇ awˬ hkʼaˇ chi beuꞈ teˇ co˗e hkʼa gaˬ yehˇ gʼa sheˍ ve yoˬ.

15. Ngaˬ hui shu htaꞈ venˇ baˆ hpehˇ piˇ leh maˇ tawnˇ taˍ cawˇ ve awˬ lawn na gʼa tuˬ aˬ htoꞈ ma ga laˇ ve le?

 ¹⁵ Awˬ lawn chi ve htaꞈ dawˇ nyi sheˍ. Nyi ma naˬ ve lehˬ teˇ ceuˬ ceuˬ shawˆ hkʼaw taˍ ve htaꞈ shuˍ ve yoˬ. Shawˆ hkʼaw taˍ ve lehˬ uiˍ ve leh i ve kaꞈ cawˬ ve yoˬ. Tawˇ pa haˉ te kʼo, laꞈ naw htaꞈ liꞈ kʼoˆ shawˆ heuˆ laˇ htaˇ, a ciˉ ceh tiˉ hkʼaw taˍ ve htawˇ naˬ ve yoˬ. Nyiˇ shehˆ nyi peuˬ hkʼawꞈ nawˉ na˗e leh hkʼaˬ teˇ hkʼaˇ lo shawˆ heuˆ ve htaꞈ tawnˇ maˇ gʼa˗o. Chi ve hkʼa shuˍ shuˍ, chaw teˇ gʼaˇ gʼaˇ kʼoˆ ve leh te laˇ ve ngaˬ hui nyi ma maˇ sha ve htawˇ, awˬ lawn maˇ uiˍ ve kʼo, yawˇ htaꞈ venˇ baˆ hpehˇ piˇ gʼa ve yoˬ. Yaꞈ hkʼaˇ, shawˆ hkʼaw taˍ ve uiˍ ve kʼo, ngaˬ hui saˍ laꞈ gʼonˍ geh kʼai leh htawˉ keu leh hpa hpeh tsuhꞈ laˇ ve yoˬ. Shawˆ hkʼaw taˍ ve htaꞈ juˆ heuˆ ve maˇ heˆ leh teˇ hkui teˇ hkui htawˇ heuˆ ve kʼo, maˇ na˗e leh gʼaˇ hteꞈ kʼawꞈ naˬ ve yoˬ. Chi ve hkʼa shuˍ shuˍ, chaw teˇ gʼaˇ ngaˬ hui nyi ma naˬ jaˇ tuˬ te laˇ leh maˇ daꞈ ve awˬ lawn oˇ ve htaꞈ tiˉ ngaˬ hui dawˇ nyi chehˇ ve kʼo, aˬ htoꞈ ma te yawˇ ngaˬ hui htaꞈ chi hkʼe te laˇ ve le, tehꞈ dawˇ nyi ve yoˬ. Yaꞈ hkʼaˇ, ngaˬ hui beuꞈ leh maˇ na˗e sheˍ ve kʼo, ngaˬ hui nyi ma naˬ tuˬ te chehˇ sheˍ ve yoˬ. Chi htaꞈ pa taw, Oˉ kʼoˍ pui ve liꞈ 19:18 hkʼaw beˆ maˍ laˇ taˍ ve htaꞈ ngaˬ hui na yuˬ cawˇ ve yoˬ.

16. Oˉ kʼoˍ pui ve liꞈ 19:33, 34 hkʼaw kʼoˆ taˍ ve hkʼe, Iˉsaˍreˍlaˆ chaw buiˇ shaˆ aˉ naˆ chaw htaꞈ hkʼaˬ hkʼe gʼa te piˇ cawˇ ve le? Leh awˬ lawn chi ve htaꞈ ngaˬ hui hkʼaˬ hkʼe henˇ yuˬ gʼa ve le?

¹⁶ Iˉsaˍreˍlaˆ chaw awˬ nu ve chaw htaꞈ haꞈ˗o tehꞈ Yaˬhoˉvaˬ kʼoˆ piˇ htaˇ, Iˉsaˍreˍlaˆ chaw htaꞈ ceh tiˉ haꞈ˗o tehꞈ maˇ gʼa kʼoˆ piˇ. Yaꞈ hkʼaˇ, yawˇ hui buiˇ shaˆ aˉ naˆ chaw htaꞈ kaꞈ gʼa haꞈ ve yoˬ. Oˉ kʼoˍ pui ve liꞈ 19:33, 34. (Gʼaw sheˍ.) Awˬ lawn chi ngaˬ hui hkʼa tawˍ lehˆ mawˬ tuˬ te laˇ ve yoˬ. Yawˇ hui chehˇ ve mvuhˇ miˬ hkʼaw ve chaw htaꞈ te piˇ ve hkʼe, buiˇ shaˆ aˉ naˆ chaw htaꞈ kaꞈ hkʼa shuˍ te piˇ tehꞈ kʼoˆ piˇ ve yoˬ. Yawˇ hui a shu yawˇ awˬ to htaꞈ haꞈ ve hkʼe, buiˇ shaˆ aˉ naˆ chaw htaꞈ kaꞈ gʼa haꞈ ve yoˬ. Tawˇ pa haˉ te kʼo, Iˉsaˍreˍlaˆ chaw lehˬ buiˇ shaˆ aˉ naˆ chaw leh haˍ gʼawˇ ve chaw htaꞈ yawˇ hui ve ti mi hkʼaw caˬ nu sheˆ taˍ ve htaꞈ gʼa gʼawˆ tcuh ve yoˬ. (Oˉ kʼoˍ pui ve 19:9, 10) Hkriꞈ yaˇ kaꞈ buiˇ shaˆ aˉ naˆ chaw htaꞈ haꞈ˗o tehꞈ kʼoˆ ve awˬ liˇ awˬ hkʼaˇ htaꞈ gʼa gʼaꞈ te ve yoˬ. (Luˉkaꞈ 10:30-37) Chi beuꞈ teˇ co˗e ve chaw laiˉ lanˬ gʼaˇ awˬ nu ve teˇ mvuhˇ miˬ lo gʼa ca chehˇ˗e ve yoˬ. Maˇ heˆ leh yawˇ hui nawˬ hui ve yehˬ paˇ lo chehˇ ve yoˬ hehˉ. Hawˉ hkʼaˆ, yaˇ miˇ, leh yaˇ ehˉ hpehꞈ ve htawˇ, nawˬ yawˇ hui htaꞈ gʼa yawˆ yan piˇ ve yoˬ.

17-18. (a) Oˉ kʼoˍ pui ve liꞈ 19:2 leh 1 Peˍtruˆ liꞈ 1:15 hkʼaw ngaˬ hui aˬ htoꞈ ma te tuˬ awˬ gʼaˇ peꞈ laˇ ve le? (b) Tcuh yaˇ Peˍtruˆ ngaˬ hui a yeˇ uiˍ ve kanˉ te tuˬ aˬ htoꞈ ma kʼoˆ laˇ taˍ ve le?

¹⁷ Oˉ kʼoˍ pui ve liꞈ 19:2 leh 1 Peˍtruˆ liꞈ 1:15 hkʼaw Yaˬhoˉvaˬ ve chaw daꞈ kehˬ ve chaw hpehꞈ tuˬ awˬ  gʼaˇ peꞈ laˇ ve yoˬ. Oˉ kʼoˍ pui ve liꞈ kaˇ nanˉ uiˍ 19 leh awˬ nu ve kaˇ nanˉ ehˉ hkʼaw Yaˬhoˉvaˬ nyi hkʼaˇ suh tuˬ ngaˬ hui aˬ htoꞈ ma te cawˇ ve shiˍ tuˬ ga laˇ sheˍ ve yoˬ. Ngaˬ hui te cawˇ ve awˬ ceuˬ leh maˇ te cawˇ ve awˬ ceuˬ kaˇ nanˉ uiˍ 19 hkʼaw kaˇ nanˉ ehˉ laiˉ tawn htaꞈ caˉ daꞈ ve ngaˬ hui gʼa henˇ kʼai peuˬ˗oˬ. * Oˉ kʼoˍ pui ve liꞈ kaˇ nanˉ uiˍ 19 hkʼaw kʼoˆ taˍ ve leh Heˍlaˍsaˆ ve Liꞈ hpu awˬ tawn hkʼaw kaꞈ ngaˬ hui te tuˬ kʼoˆ laˇ sheˍ ve yoˬ. Yaꞈ hkʼaˇ, tcuh yaˇ Peˍtruˆ ngaˬ hui gʼa te cawˇ ve awˬ nu ve awˬ ceuˬ kaꞈ kʼoˆ laˇ sheˍ ve yoˬ.

¹⁸ Ngaˬ hui Yaˬhoˉvaˬ htaꞈ hkʼaˬ htaˆ kaꞈ oˉ kʼoˍ pui leh awˬ nu ve chaw htaꞈ daꞈ ve te piˇ ve htawˇ, a yeˇ uiˍ jaˇ ve teˇ ceuˬ htaꞈ te tuˬ, Peˍtruˆ awˬ gʼaˇ peꞈ laˇ sheˍ ve yoˬ. Daꞈ kehˬ ve chaw hpehꞈ tuˬ Peˍtruˆ maˇ kʼoˆ sheˍ htaˇ, yawˇ kʼoˆ ve, “nawˬ hui nyi ma gu taˍ leh shaˍ tiꞈ taˍ chehˇ˗oˆ.” (1 Peˍtruˆ 1:13, 15) Kanˉ chi ve lehˬ aˬ htoꞈ ma le? Peˍtruˆ Yeˍsuˆ ve awˬ viˉ awˬ nyi Hkriꞈ yaˇ htaꞈ kʼoˆ piˇ ve, “yawˇ ve daꞈ jaˇ ve awˬ lawn shu htaꞈ kʼaoˍ maˍ piˇ˗oˆ” tehꞈ yawˇ hui htaꞈ kʼoˆ piˇ ve yoˬ. (1 Peˍtruˆ 2:9) Chi beuꞈ teˇ co˗e ve Hkriꞈ yaˇ kaꞈ hkʼa shuˍ shuˍ yoˬ. Shu htaꞈ hto maˍ piˇ leh Liꞈ hpu maˍ piˇ ve a yeˇ uiˍ jaˇ ve kanˉ hpehꞈ leh shu ve a shaꞈ htaꞈ ga piˇ ve daꞈ jaˇ ve kanˉ chi teˇ hpaˍ ngaˬ hui gʼa te ve ha lehˬ jaˇ! (Maˍkuˆ 13:10) Oˉ kʼoˍ pui ve liꞈ kaˇ nanˉ uiˍ 19 hkʼaw ve awˬ liˇ awˬ hkʼaˇ ngaˬ hui yuˬ yehˇ htaˇ, ngaˬ hui lehˬ Gʼuiˬ sha leh awˬ nu ve chaw htaꞈ haꞈ ve tehꞈ hpeuꞈ maw piˇ ve yoˬ. Ngaˬ hui “hkʼa te ve awˬ liˇ awˬ hkʼaˇ hkʼa peu˗eˬ awˬ hkʼaw lo daꞈ kehˬ” ve chaw hpehꞈ ve tehꞈ hpeuꞈ maw piˇ chehˇ ve yoˬ.