1-2. Tiheeni nthokoronryaahu mmwaha ovirale, nave tiheeni nnahaalaahu othokororya mmwaha yoola?

MMWAHA ovirale, noothokororya miruku mikina inaphwanyeya mu Onamukutxho ekapitulu 19. Ntoko yootakiherya, mu eversikulu 3, noohuserya wi Yehova aahaaleela Aisarayeli wi yaacicimiheke asitiithi aya. Nohoona tho ti mwawiihai nnahaalaahu opharihela miruku imohamoha olelo wi naakhaviherye asitiithi ahu mmukhalelo woomwiilini, mmuupuweloni ni omunepani. Mu eversikulu emohamoha, Muluku aahiwuupuxerya achu awe ochuneya waya okhapelela nihiku na Sapata. Noohuserya wi naamwi nihithokororyaka nihiku na Sapata olelo, nnaphwanela ochariha nlakiheryo na nlamulo nenla ni wiivaha elukuluku mahiku oothene wi nthokororye ichu soomunepani. Mmukhalelo yoola, nnahaala wooniherya wi ninniilipixerya wi nikhale aweela ntoko Onamukutxho 19:2 ni 1 Pedro 1:15 onooniheryeiye.

² Mmwaha yoola, nnahaala otitelela othokororya ekapitulu 19 ya Onamukutxho. Tiheeni ekapitulu ela enanihusihaaya vooloca sa wooniherya opwacha wa yaale arino okumi wookotakota, okhala oororomeleya vaavaa nnampakaahu nakoso, ni wooniherya osivela wa akina? Hiyaano ninnachuna okhala aweela ntoko Muluku oreiye aweela, mwa yeeyo hankooni noone yeeyo nnaphwanelaahu weera.

3-4. Mwawiiwanana ni Onamukutxho 19:14, ti mwawiihai Aisarayeli yaaphwanelaaya waakhalihaka achu oohiiwa ni oohoona?

³ Mwaalakhanye Onamukutxho 19:14. Yehova onachuna wi alapeli awe ekhale ooreera murima ni yaale arino okumi wookotakota. Ntoko yootakiherya, owo aahaaleela Aisarayeli wi hiyaaphwanela  omuulumela muchu oohiiwa. Wuulumela iwo waavolowela omoopopiha muchu naari oloca ichu soonanara vooloca sa yoowo. Weerano yeeyo yaari echu yoonanaraxa! Muchu oohiiwa hi awerye wiiwa ichu soonanara seiho saalociwa vooloca sa yoowo, mwawiihiiha owo hi awerye wiisaakiha vooloca sa masu yaawo.

⁴ Nave tho, mu eversikulu 14 Muluku aahaaleela alapeli awe wi hiyaaphwanela “okuha ekhukulu ohoolo wa muchu oohoona.” Atharihaka vooloca sa achu yaawo yaarino okumi wookotakota mmahiku yaale, liivuru mmoha oriye: “O Oriyenti Metiyu akhalai [awo] yaanakhalihiwa moohookololowa ni yaanahooxiwa.” Akhweya muchu oonanara murima aanakuha echu ohoolo wa muchu oohoona wi oone waakhanle wi yaahaala omphoreiha naari wi aachuna omutheyaka yoowo. Ela yaari yoonanaraxa! Nlamulo nla naanaakhaviherya achu a Yehova wiiwexexa wi awo yaaphwanela okhala ooreera murima ni achu yaawo yaari ookotakota.

5. Ti mwawiihai nneeraahu nooniherye oreera murima wa yaale arino okumi wookotakota?

⁵ Yesu aanooniherya oreera murima wa yaale yaarino okumi wookotakota. Yesu aahirumiha michaka iha wa Yohani Mpatisi: “Oohoona annoona, oorakala anneeca, achu a ilepa annarehereryiwa, oohiwa anniiwa, [nave] achu ookhwa annaviihiwa.” Emanle woona sootikhiniha sa Yesu, “muloko woothene . . . waanamuthamala Muluku.” (Luka 7:20-22; 18:43) Ntoko Akristu ninnachuna omutakiherya Yesu ni okhala ooreera murima ni yaale arino okumi wookotakota. Ti nthowa nene nryaahu ooreera murima ni oopisa murima ni yaawo. Mweeparipari, Yehova hananivaha owerya wi nipakeno sootikhiniha ntoko Yesu. Naamwi hiihaa, hiyaano nookhalano ekari ya okawana ni alipa oohoona, mmukhalelo woomwiilini ni woomunepani ewehereryo yoomwaahiyu yeeyo nryaahuno ya okhala mu Parataiso mwemmo achu oothene anahaalaaya okhala oophaameya mmukhalelo woomwiilini ni woomunepani. (Luka 4:18) Michaka seiha saphaama sinnaakhaviherya ancipale omwaacamela Muluku.

6. Ti mwawiihai Onamukutxho ekapitulu 19 onanikhaviheryeiye wiiwexexa Malamulo Khumi?

⁶ Iversikulu ikina sa Onamukutxho ekapitulu 19 sinnanikhaviherya wiiwexexa phaama Malamulo Khumi. Ntoko yootakiherya, nlamulo  naneethanu nararu pahiru naaloca: “Ohiiye.” (Muk. 20:15) Ni masu yaala muchu aanwerya wuupuwela wi onniiwelela nlamulo nenla pahiru wakhala wi owo hantonko omwiiyerya muchu. Nyenya Onamukutxho 19 onnanikhaviherya woona wi aakhalavo makhalelo makina a wiiya.

7. Ti mwawiihai mulipa anakoso aahaaleiye ohiiwelela nlamulo naneethanu nararu vooloca sa wiiya?

⁷ Mulipa anakoso onanwerya wuupuwela wi owo toororomeleya woona wi hantonko omwiiyerya muchu. Apwanne mweeparipari owo aari oororomeleya vaavaa aamweeceiye nakoso ni achu akina? Mu Onamukutxho 19:35, 36, Yehova ooloca: “Maroca anyu mutumiheke mwa wookololowa. Miphimo sanyu, orekama waya, olimela waya, ni osareya waya, ikhaleke seekhayikhayi. Mweeryo woothene okhaleke woohiiya.” Wakhala wi mulipa anakoso ohootha vooloca sa mphimo ni ohokola wa maroca wi aawoke anamathuma awe, mweeparipari owo aanawiiyerya yaawo. Ela ennakhala yookwakwaleya vaavaa nnaalakhanyaahu iversikulu ikina sa ekapitulu 19 ya Onamukutxho.

8. Ti mwawiihai sooleeliherya sinaphwanyeya mu Onamukutxho 19:11-13 saakhaviheryaaya Aisarayeli wiiwexexa phaama nlamulo naneethanu nararu, nave nikoho taani nnaphwanelaahu wiipakela?

⁸ Mwaalakhanye Onamukutxho 19:11-13. Masu oopacerya a Onamukutxho 19:11 ani: “Muhiiyeke.” Eversikulu 13 ennalikanyiha wiiya ni ohookololowa variyari va ompaka nakoso. Eversikulu yeela eni: “Ohimphuce mukhwaa nari omwiiyerya.” Omuwoka muchu naari ohookololowa emohamoha omwiiyerya muchu. Nlamulo naneethanu nararu naanooniherya mookwakwaleya wi wiiya echu yoonanara. Nyenya sooleeliherya sinaphwanyeya mu Onamukutxho saanaakhaviherya Aisarayeli wiiwexexa ti mwawiihai yaaphwanelaaya opharihela nlakiheryo na nlamulo ni okhala awookololowa mu ichu soothene mu okumi aya. Ti woochuneya wuupuwela moonelo wa Yehova vooloca sa wiiya ni ohookololowa. Mwa yeeyo nnaphwanela wiikoha: “Mwawiiwanana ni Onamukutxho 19:11-13, apwanne yookhalavo echu kinaphwanelaaka opaka matorokelo, akhweya mmuteko aka naari mmukhalelo wa ompaka nakoso ni akina?”

9. Ti mwawiihai nlamulo nnaphwanyeya mu Onamukutxho 19:13 naakhapelelaaya anamalapa?

⁹ Wookhalavo tho mukhalelo mukina wa ororomeleya yoowo Mukristu onaphwaneleiye othokororya. Onamukutxho 19:13 onnaloca: “Ohipwahe nihiku naalakaniwe omuliva namuteko aa.” Elukuluku ya Aisarayeli, achu ancipale yaalapa mmacani, nave yaanaakhela wookuchulani wa nihiku. Mwawiihiiha, ohimuliva namalapa, yaari echu yoohookololowa. Namalapa ole haahaala okhalano ikhorowa wi avakulele echoko awe nihiku nenle. Yehova aahihiya mookwakwaleya vaavaa aalonceiye: “Ntakhara toohaawa nave okumi awe ori va yoolivela yeele.”—Malam. 24:14, 15; Mat. 20:8.

10. Echu taani ekina nnahuseryaahu mu Onamukutxho 19:13?

¹⁰ Olelo anamalapa ancipale anaakhela ikhorowa saya vamweerini, ohiya mahiku oothene. Nyenya nlakiheryo nnaphwanyeya mu Onamukutxho 19:13 nlelo ninnaphariheleya. Mapatarawu makina ennaalapiha vancipale anamalapa aya nyenya enaaliva ikhorowa vakhaani. Awo aasuwela wi namalapa haano yoothanla ekina ni ori oohaleeliheya nave onahaala weemererya ekhorowa vyakala. Mweeparipari, mapatarawu yaala annahalano ikhorowa sa anamuteko yaawo yaarempaaya. Mukristu yoowo orino anamalapa, onaphwanela wuupuwelela yeela ni okhala awookololowa. Vano nnahaala woona echu ekina nnahuseryaahu mu Onamukutxho ekapitulu 19.

11-12. Tiheeni Yesu otharinheiye mookwakwaleya vaavaa aaromonleiye yoorepa ya Onamukutxho 19:17, 18?

¹¹ Hiyaano hannaakhaliha moonanara achu nyenya Yehova onachuna wi neereno eyo moopwaha.  Ninnoona yeela mu Onamukutxho 19:17, 18. (Mwaalakhanye.) Mu yoorepa yeela Yehova ooloca: “Omukhweleke mukhwaa ntoko oniikhwelelaa weyo mwaneene.” Mukristu onaphwanela opaka yeela wakhala wi onnachuna omuhakalaliha Muluku.

¹² Yesu ohooniherya wi nlamulo nnaphwanyeya mu Onamukutxho 19:18 ti noochuneyaxa. Ekwaha emoha Mfarisi aahimpakela Yesu nikoho nla: “Wa malamulo oothene, ntokotokosha tinivi?” Yesu aahaakhula wi “nlamulo ntokotokosha ni noopacerya” ori omusivela Yehova ni murima ahu woothene, okumi ahu woothene, ni muupuwelo ahu woothene. Voocharela Yesu aahiromola masu anaphwanyeya mu Onamukutxho 19:18, owo aaloca: “Nanaawiili nnalikana ni nenle, ti nla: Omukhweleke mukhwaa ntoko oniikhwelelaa weyo mwaneene.” (Mat. 22:35-40) Nnanwerya wooniherya osivela wa akina mmikhalelo sincipale. Nyenya tho nnanwerya ohuserya mikina sa seiho mu Onamukutxho ekapitulu 19.

13. Ti mwawiihai yootakiherya ya Yosefe enanikhaviheryaaya opharihela yeeyo erempwe mu Onamukutxho 19:18?

¹³ Mukhalelo mmoha wa wooniherya osivela wa akina ori moorweela wa opharihela miruku inaphwanyeya mu Onamukutxho 19:18, BNM. Yoorepa ela eni: “Muhinleke ikuhu nari muhiwìtxe atxhu a nloko nanyu.” Ancipale a hiyaano nohaasuwela achu yaawo yaanyeenyen’ye ni asinthamwene aya oomutekoni, oxikola, amwaacamani, naari amusi aya mu iyaakha sincipale! Ti yaphaama wuupuwela wi asinnawe khumi a Yosefe yaampakela echu yoonanaraxa pahiru nthowa nawi yaakuha mathowa ni yoowo. (Map. 37:2-8, 25-28) Nyenya Yosefe aahaakhaliha asinnawe mmukhalelo woohiyana! Vaavaa aareiyeno ekari ya winla ikuhu ni asinnawe, owo heenreno yeeyo, moohiyana owo aari oolevelela. Yosefe haakunhe mathowa. Mweeparipari owo aapanke yeeyo ohoolo waya yaarempwe mu Onamukutxho 19:18.—Map. 50:19-21.

14. Tiheeni enooniherya wi nlelo nnaphwanela wiiwelela nlakiheryo nnaphwanyeya mu Onamukutxho 19:18?

¹⁴ Akristu olelo anaphwanela ochariha yootakiherya ya Yosefe ya ohikuha mathowa. Yesu tho oothariha mukhalelo oryaaya woochuneya waalevelela yaale ananchekela mu nivekelo na ntakiheryo. (Mat. 6:9, 12) Nave murummwa Paulo oovaha ekano yoolikana ni yeela vaavaa  aalonceiye: “Oosiveliwa, muhinleke ikuhu.” (Aro. 12:19) Owo tho ooloca ariki: “Muvilelane mukina ni mukhwaawe nave mukhurumuwelaneke, mukina akhalano mwaha ni mukhwaawe.” (Kol. 3:13) Malakiheryo a Yehova hanatorokeya. Mwa yeeyo nlakiheryo nnaphwanyeya mu Onamukutxho 19:18 ninnaphariheleya tho mmahiku ahu.

15. Niphwanaphwaniho taani nnanikhaviherya wiiwexexa wi nnaphwanela okhurumuwela ni ocuwala?

¹⁵ Muupuwele ela. Okhala oothanana ni oonyeenyeya onanwerya olikanyihiwa ni ophoreya. Makhwaca makina anakhala makhaani; makina matokweene. Ntoko yootakiherya, muchu onanwerya wiiphoreiha ekatha ni mwaalo, nave nikhwaca nlo nnanwerya wiicela nyenya hekhala echu etokweene. Nivinre nihiku nimoha naari meeli, onanwerya okhala woovila osuwela ti vaavi waaphoren’yevo. Ichu ikina ineereya wa hiyaano ti soolikana ni seiha. Ntoko yootakiherya, nthamwene onanwerya oninyeenyeiha nave eyo ekhale yookhweya olevelela. Nyenya wakhala wi nikhwaca ntokweene akhweya onamuchuneya wi totore asone ni omaka. Wakhala wi muchu onnatannya naari onnasuna nikhwaca, nlo hinni nivole nave nnahaala otepaka. Eyo enanwerya weereya wakhala wi ninnakhala oothanana naari oonyeenyeya ni muchu yoowo. Enahaala okhala ntoko wi nnatannya nikhwaca, eyo tiwi ohihiya wuupuwelela mukhalelo muchu owo oninyeenyeihaleiye. Weerano hiihaa nniihooxa mukhatiihu. Mweeparipari ti woochuneya ochariha miruku seiho inaphwanyeya mu Onamukutxho 19:18!

16. Mwawiiwanana ni Onamukutxho 19:33, 34, ti mwawiihai Yehova aachuneiye wi Aisarayeli yaakhaliheke anamarwa nave tiheeni nnahuseryaahuvo?

¹⁶ Vaavaa Yehova aaleenleiye Aisarayeli wi yaaphwanela omusivelaka mwaacamani aya, owo haaloca wi awo yaaphwanela waasivelaka pahiru Aisarayeli akhwaaya. Awo tho yaanaphwanela wooniherya osivela wa anamarwa yaawo yaakhala ni yaawo. Eyo ti yookwakwaleya mu Onamukutxho 19:33, 34. (Mwaalakhanye.) Yehova aachuna wi anamarwa ekhalihiweke hiihaa ntoko Muisarayeli. Muisarayeli aanaphwanela omusivelaka namarwa hiihaa ntoko mwaneene. Ntoko yootakiherya, Nlamulo naaloca wi Aisarayeli yaaphwanela oweemererya anamarwa ni Aisarayeli oohaawa ococela sa mmacani mwaya. (Onam. 19:9, 10) Akristu tho olelo anaphwanela ochariha nlakiheryo nimohamoha na waasivela anamarwa. (Luka 10:30-37) Nni neereno hai? Achu ancipale aathaamela ilapo ikina. Ti yawooneya wi akina a yaawo eri vakhiviru va nyuwaano. Nnaphwanela waakhalihaka alopwana,  athiyana, ni anamwane yaala mmukhalelo woosivela nooniheryaka ncicimiho wa yaawo.

17-18. (1) Tiheeni Onamukutxho 19:2 ni 1 Pedro 1:15 onaniceenyeryeiye opaka? (2) Muteko taani woochuneyaxa murummwa Pedro onceenyenryeiye wi nipake?

¹⁷ Onamukutxho 19:2 ni 1 Pedro 1:15 onnaaceenyerya achu a Muluku okhala aweela. Nyenya ninnaphwanya iversikulu sikina sa Onamukutxho ekapitulu 19 seiho sinanikhaviherya wiiwexexa tiheeni nnaphwanelaahu weera wi naakhele weemereryiwa ni Yehova. Hiyaano noohuserya iversikulu sikina sa seiho. * Ti woochuneya wuupuwela wi Soorepa sa Ekiriki, sinnooniherya wi Yehova onachuna wi niiweleleke malakiheryo yaala. Nyenya murummwa Pedro onnaloca echu ekina.

¹⁸ Omulapela Yehova ni waakhaviherya akina mweeparipari echu yoochuneyaxa. Nyenya murummwa Pedro ooloca muteko mukina yoowo nnaphwanelaahu opaka. Ahaakumve oloca sa ochuneya waya okhala aweela mu soothene nnapakaahu owo ooniceenyerya ariki: “Murehererye murima wi mphareke muteko.” (1 Ped. 1:13, 15, BNM) Muteko taani owo aaloceiye? Pedro olonce wi Akristu oothanliwa yaaphwanela ‘olokoha soomucicimihano yoowo aawiichanne.’ (1 Ped. 2:9) Nave Akristu oothene olelo aakhalano ekari ya opaka muteko ene yoowo, muteko woolaleerya ori muteko woochuneyaxa yoowo onaakhaviherya achu ancipale. Mweeparipari, ekari etokweene opaka makupa mu nloko nenla naweela ni owerya okhaviherya muteko woolaleerya ni ohusiha! (Mar. 13:10) Vaavaa nnapakaahu owetha wahu wi nipharihele malakiheryo anaphwanyeya mu Onamukutxho ekapitulu 19, ninnooniherya osivela wa Muluku ahu ni amwaacamani ahu. Nave ninnooniherya wi ninnachuna “okhala aweela” mmeecelo ahu oothene.