1-2. Со дикхлем ки англуни статија, хем башо со ка кера лафи ки акаја статија?

 КИ АНГЛУНИ статија дикхлем несаве практична советија со аракхљовена ки 3. Мојсеева 19 поглавје. На пример, ко трито стихо читинаја кај о Јехова вакерѓа е Израелцонге те поштујнен пумаре родителен. Дикхлем сар шај те применина адава совет аѓаар со ка грижина амен башо амаре родителенгере физичка, емоционална хем духовна потребе. Ко исто стихо е Девлескоро народо сине потсетимо башо адава кобор тано важно те икерел пе о сабат. Дикхлем кај иако аменге авдиве на важинела о закони башо сабат, сепак амен шај те применина о начело таро адава закони аѓаар со секова диве ка одвојна аменге време те шај те кера нешто башо Јехова. Ако кераја аѓаар ка сикава кај трудинаја амен те ова света сар со поттикнинена амен о стихија тари 3. Мојсеева 19:2 хем 1. Петрово 1:15.

² Ки акаја статија ка кера лафи башо јавера да стихија тари 3. Мојсеева 19 поглавје. Со шај те сикљова таро акава поглавје башо адава сар те понашина амен околенцар сој физички ограничиме, сар те ова поштена ки амари бути хем сар те сикава мангипе е јаверенге? Бут тано важно те дикха акала поуке ако мангаја те ова света сар о Девел.

3-4. Спрема 3. Мојсеева 19:14, сар ваљани сине о Израелција те понашинен пе е кашукенцар хем е короленцар?

³ Читин 3. Мојсеева 19:14. О Јехова очекујнела сине таро пло народо те понашинел пе шукар околенцар со сине физички ограничиме. На пример, ов вакерѓа е Израелцонге те на ден арман некас сој кашуко. Ко адава сине вклучими  и закана или те вакерел пе нешто лошно леске. Адава сине чаче лошно те керел пе некаске сој кашуко! Ов нашти сине те шунел со вакерела пе баши лесте, хем адалеске нашти сине те бранинел пе.

⁴ Исто аѓаар, ко 14 стихо о Девел вакерѓа пле слугенге „те на чхивен пречка англо короло“. Ко јекх лил кова со керела лафи башо мануша со сине лен физичка ограничувања пишинела: „Ко пурано Близок Исток о јавера бут пути понашинена пе сине ленцар сурово хем малтретиринена лен сине“. Шај несаво лошно мануш ка чхивел сине нешто англо короло мануш те шај те поврединел ле или те асал леске. Кобор лошно сине адава! Преку акаја заповед о Јехова поможинѓа пле народоске те дикхел кај ваљани те сикавел сочувство околенге сој физички ограничиме.

5. Сар шај те сикава сочувство околенге сој физички ограничиме?

⁵ О Исус сине сочувствително околенцар со сине физички ограничиме. Сетин тут саво хабери бичхалѓа е Јованеске кова со крстинѓа ле: „О короле акана дикхена, о сакатија пхирена, о лепрозна чистинена пе, о кашуке шунена хем о муле уштена“. Откеда дикхле е Исусескере чудија, „са о мануша почминѓе те фалинен е Девле“ (Лука 7:20-22; 18:43). О христијања мангена те џан пало е Исусескоро пример хем те сикавен сочувство околенге сој физички ограничиме. Адалеске, амен сием шукар хем стрплива ленцар. Џанѓола пе, о Јехова на денѓа амен моќ те кера чудија сар о Исус со керѓа. Ама, иси амен чест те вакера хем околенге со дословно на дикхена хем околенге духовно со на дикхена о шукар хабери башо рај коте со сарине ка овен физички хем духовно састе (Лука 4:18). Акава хабери панда акана поможинела буте џененге те фалинен е Девле.

6. Сар и 3. Мојсеева 19 поглавје поможинела аменге пошукар те хаљова о деш заповедија?

⁶ Несаве стихија тари 3. Мојсеева 19 поглавје поможинена аменге пошукар те хаљова о деш заповедија. На пример, и офтото заповед јасно вакерела: „Ма чор“ (2. Мој.  20:15). Некој шај те мислинел песке кај са џикоте тано послушно ки акаја заповед те на лел нешто со нане лескоро, ов икерела пе ки заповед. Ама ов шај ко јавер начин те чорел.

7. Сар шај јекх трговцо те на икерел и офтото заповед башо чорибе?

⁷ Јекх трговцо шај те мислинел песке кај ов на чорела адалеске со на леља нешто со нане лескоро. Ама дали тано секогаш поштено кеда бикинела нешто е јаверенге? Сар со пишинела ки 3. Мојсеева 19:35, 36 о Јехова вакерѓа: „На смејнена те користинен ховавне мерке кеда меринена должина, пхарипа хем течност. Ваљани те овел тумен точно вага, точна тегија хем точна мерке“. Јекх трговцо кова со користинела ховавне ваге хем мерке те шај те ховавел пле муштериен, ов уствари чорела лендар. Јавера да стихија тари 3. Мојсеева 19 поглавје потврдинена акава.

8. Сар о деталија сој пишиме ки 3. Мојсеева 19:11-13 поможинѓа е Евреенге те применинен о начело со бешела пали офтото заповед, хем сар шај те овел амен корист таро адава?

⁸ Читин 3. Мојсеева 19:11-13. О 11 стихо тари 3. Мојсеева 19 поглавје почминела е лафенцар: „Ма чорен“. О 13 стихо вакерела: „Ма искористин тле пашутне“. Значи ако некој нане поштено ки бути со керела ла, ов уствари чорела. Иако и офтото заповед јасно вакерела кај о чорибе тано погрешно, о деталија сој тане пишиме ки 3. Мојсеева поможинѓе е Евреенге те хаљовен сар шај те применинен о начело со бешела пали адаја заповед. Шукар тано амен да те размислина башо адава сар дикхела о Јехова ко ховајбе хем ко чорибе. Шај те пуча амен: „Кеда размислинава баши 3. Мојсеева 19:11-13, дали дикхава кај иси нешто со ваљани те менинав ко мло живото, посебно ко мо начин сар керава бути“?

9. Сар о закони тари 3. Мојсеева 19:13 заштитинела сине е работникон?

⁹ Јекх христијани коле со иси ле работникија ваљани те размислинел башо јавер да аспекти тари чесност. И 3. Мојсеева 19:13 завршинела е лафенцар: „И плата е работникоскири на ваљани те ачхол ки туте цело рат џи тајса сабајле“. Ко Израел побаро дело таро мануша керена сине ко ниве бути хем о работникија сине платиме ко крајо таро диве. Ако на дела пе сине и дневница е работникоске ко крајо таро адава диве, шај нане те овел ле сине паре те шај те кинел пле фамилијаке хајбаске. О Јехова вакерѓа: „Ов тано ки неволја хем лескоро живото зависинела тари лескири плата“ (5. Мој. 24:14, 15; Мат. 20:8).

10. Со шај те сикљова тари 3. Мојсеева 19:13?

¹⁰ Авдиве бут работникија лена плата јекх пути или дуј пути ко масек, а на секова диве. Ама, о начело со аракхљола ки 3. Мојсеева 19:13 панда важинела. Несаве газдија искористинена пумаре работникон аѓаар со платинена лен бут похари него кобор со ваљани. Ола џанена кај акале работникон нане лен јавер избор хем кај ка ачхон те керен бути иако тане бут хари платиме. Јавере лафенцар, асавке газдија на дена е работниконге ленгири плата. Јекх христијани коле со иси ле работникија мора те овел фер спрема ленде. Акана те дикха со јавер шај те сикљова тари 3. Мојсеева 19 поглавје.

11-12. Со истакнинѓа о Исус адалеа со цитиринѓа о лафија тари 3. Мојсеева 19:17, 18?

¹¹ О Девел очекујнела амендар бут повише него само те пазина те на повредина е јавере манушен. Акава шај те дикха ле тари 3. Мојсеева 19:17, 18. (Читин.) О Јехова јасно  вакерѓа: „Манг тле пашутне сар коркори тут“. Јекх христијани мора те керел акава ако мангела те керел е Девлескири волја.

¹² Приметин сар о Исус истакнинѓа кобор тани важно и заповед тари 3. Мојсеева 19:18 кеда јекх фарисеи пучља ле: „Која тани и најбари заповед ко закони?“ О Исус одговоринѓа кај и најбари хем и прво заповед тани те манга е Јехова са амаре вилеа, са амаре душаја хем са амаре гоѓаја. Пало адава о Исус цитиринѓа о лафија со аракхљовена ки 3. Мојсеева 19:18: „И дујто, слично сар лате тани акаја: ’Манг тле пашутне сар коркори тут‘“ (Мат. 22:35-40). Иси бут начинија сар те сикава мангипе е јаверенге, хем несаве лендар шај те сикљова лен тари 3. Мојсеева 19 поглавје.

13. Сар шај пошукар те хаљова о лафија тари 3. Мојсеева 19:18 кеда размислинаја башо е Јосифескоро случај?

¹³ Јекх начин сар шај те сикава мангипе амаре пашутнеске тано аѓаар со ка применина о совет со аракхљола ки 3. Мојсеева 19:18. Атхе пхенела: „Ма одмаздин тут ни ма икер холи“. Повише џене амендар џанаја некас со бершенцар икерѓа холи пле колегаја, соученикоја или некасаја тари пли фамилија. Сетин тут кај е Јосифескере пхраља икерѓе холи спрема лесте, хем ко крајо икалѓе ла упри лесте (1. Мој. 37:2-8, 25-28). Ама о Јосиф на понашинѓа пе ленцар лошно. Ле сине ле прилика те иранел ленге башо адава со керѓе леске, ама ов сепак сикавѓа ленге милост. На икерѓа холи спрема ленде. Наместо адава, ов постапинѓа спрема о совет со покасно сине пишимо ки 3. Мојсеева 19:18 (1. Мој. 50:19-21).

14. Со сикавела аменге кај о начелија со аракхљовена ки 3. Мојсеева 19:18 важинена авдиве да?

¹⁴ О христијања кола со мангена те керен е Девлескири волја ваљани те џан пало е Јосифескоро пример кова со простинѓа пле пхраленге наместо те икерел холи спрема ленде хем те иранел ленге. Адава вакерѓа ле о Исус да ки пли најпенџарди молитва кеда вакерѓа кај ваљани те простина околенге со грешинѓе аменге (Мат. 6:9, 12). Исто аѓаар о апостол Павле денѓа совет е христијаненге: „Ма одмаздинен тумен, ме мангле“ (Рим. 12: 19). Ов исто аѓаар охрабринѓа лен: „Трпинен  тумен јекх јекхеа хем цело вилеа простинен туменге чак кеда некој ка вреџинел тумен“ (Кол. 3:13). Е Јеховаскере начелија на менинена пе. Понадари да важинена аменге о начелија со бешена пало закони тари 3. Мојсеева 19:18.

15. Која споредба поможинела аменге те хаљова соске ваљани те простина хем те бистра?

¹⁵ Размислин баши акаја споредба. О повредиме чувствија шај те споредина лен дословно раненцар, несаве ране тане тикне а јавера побаре. На пример, џикоте спреминаја хајбаске шај хари те чхина амен ко нај. Адава шај бут те дукхал, ама сигате накхела хем сасљола. Пало јекх или дуј диве шај ни нане те сетине тут коте чхинѓан тут. Слично, некој шај те вакерел или те керел нешто колеа со ка поврединел амен, ама адалеске со нане добором сериозно амен посигате простинаја леске. Ама ако и рана тани похор, тегани шај ка ваљани те џа ко доктори те шај те сивел пе хем те пхандел пе завојеа. Ако цело време пипинаја ки рана тегани веројатно нане те сасљол хем ка овел полошно. Жално тано адава со некој шај те керел нешто слично кеда тано бут повредимо. Ов шај цело време те размислинел башо адава кобор бут о јавер поврединѓа ле. Ама окола со икерена холи керена песке штета. Бут пошукар тано те шуна о совет со аракхљола ки 3. Мојсеева 19:18.

16. Спрема 3. Мојсеева 19:33, 34, сар ваљани сине о Израелција те понашинен пе спрема о јабанџие, хем со шај амен те сикљова таро адава?

¹⁶ Кеда о Јехова заповединѓа е Израелцонге те манген пумаре пашутнен, ов на мислинѓа кај ола ваљани те сикавен мангипе само е јавере Израелцонге, него исто аѓаар ваљани сине те манген е јабанџиен со живинена машкар ленде. Адава сине јасно вакердо ки 3. Мојсеева 19:33, 34. (Читин.) О Јехова мангела сине о Израелција те понашинен пе е јабанџиенцар сар е јавере Израелцонцар хем те манген лен сар песте. На пример, о Закони вакерела сине кај о Израелција ваљани те мукхен хем е јабанџиен хем е чоролен те кхеден таро ниве (3. Мој. 19:9, 10). О христијања авдиве ваљани те применинен о начело башо мангипе спрема о јабанџие (Лука 10:30-37). Сар шај те кера адава? Авдиве иси милиоња мануша ко цело свето кола со геле те живинен ки јавер пхув, хем шај несаве лендар тане тле комшие. Бут тано важно те сикава  поштовање спрема асавке мурша, џувља хем чхаве.

17-18. а) Ко со поттикнинена амен о стихија тари 3. Мојсеева 19:2 хем 1. Петрово 1:15? б) Која важно бути поттикнинела амен о апостол Петар те кера?

¹⁷ Сар со дикхлем хем ки 3. Мојсеева 19:21 хем ко 1. Петрово 1:15, о Јехова поттикнинела пле слуген те овен света. Ки 3. Мојсеева 19 поглавје иси јавера да стихија колендар со дикхела пе со ваљани те кера те шај те угодина е Јеховаске. Дикхлем несаве лендар со сикавена кола буќа ваљани те кера а кола буќа ваљани те избегина. * Таро христијанска грчка списија дикхлем кај о Јехова понадари да мангела те применина о начелија кола со бешена пало адала законија. Ама о апостол Павле вакерѓа панда нешто.

¹⁸ Шај сием зафатиме ко различна духовна активностија хем кераја шукарипе јаверенге. Ама о Петар истакнинѓа кај ваљани те кера панда нешто сој тано бут важно. Англедер те поттикнинел амен те ова света ко са со кераја ов вакерѓа: „Спреминен тумари годи баши напорно бути“ (1. Пет. 1:13,15). Ки сави бути мислинѓа? О Петар вакерѓа кај е Христосескере помазиме пхраља ка објавинен о шукар особине околескере со викинѓа лен (1. Пет. 2:9). Уствари, авдиве са е христијанен иси лен чест те учествујнен ки акаја бут важно активност колатар со е манушен шај те овел лен најбари корист. Сар Девлескоро свето народо, иси амен бари чест редовно хем ревно те проповедина хем те сикава (Мар. 13:10). Кеда даја амендар са те шај те применина о начелија тари 3. Мојсеева 19 поглавје сикаваја кај мангаја е Девле хем е пашутнен, хем кај мангаја те ова света ко са со кераја.