1, 2. Σο ντικχλάμ κο γιαβέρ μάθημας, ντα σο κα ντικχάς ανταλέστε;

ΚΟ ΓΙΑΒΕΡ μάθημας, ντικχλάμ χάνικ συμβουλές κατά Λευιτικό κεφάλαιος 19 σο βοηθίνενα-αμέν αμαρέ ζωγιάτε. Για παράδειγμας, σαρ ντικχλάμ κο εδάφιος 3, ο Ιεχωβά ντινάς κο Ισραηλίτες ι συμβουλή τι σεβάνεν πουμαρέ νταντές ντα πουμαρέ νταγιά. Ντικχλάμ σαρ μπορίνασα τι κεράς ανταγιά συμβουλή αντιβές κάνα βοηθίνασα αμαρέ νταντές ντα αμαρέ νταγιά τι τθερέν οντουλά σο χρειαζίντιβενα, κάνα ντάσα-λεν ζορ ντα κοβλιαράσα λένγκι ντουκχ ντα κάνα βοηθίνασα-λεν τι αβέν λατσσέ αμαλά ι Ιεχωβάσαρ. Κο ίδιος εδάφιος, ο Ντεβέλ βακερντάς πι λαόσκε καζόμ σημαντικός ισί τι κερέν ο Σάββατος. Σικλιλάμ ότι, παρόλο σο να ισινάμ τελάλ κατά νόμος ι Σαββατόσκο αντιβές, μπορίνασα τι κεράς ανταγιά αρχή κάνα αρακχάσα σαάτι τι κεράς πράγματα ι Ιεχωβάσκε κάθε ντιβές. Άμα κα κεράς-λες ανταβά, κα σικαβάς ότι μαράσα-αμέν τι αβάς άγιοι, σαρ βακερένα αμένγκε ο εδάφια Λευιτικό 19:2 ντα 1 Πέτρου 1:15.

² Ανταλέ μαθημάστε, κα ντικχάς πο μπουτ εδάφια κατά Λευιτικό κεφάλαιος 19. Σαρ σικλιαρέλα-αμέν ανταβά κεφάλαιος τι σικαβάς λατσσιπέ οντουλένγκε σο τθερένα προβλήματα πουμαρέ σωμάστε, τι αβάς τίμιοι αμαρέ μπουτιάτε ντα τι μανγκάς ι γιαβερέν; Μανγκάσα τι αβάς άγιοι σαρ ο Ντεβέλ ισί άγιος, οτθάρ κα ντικχάς σο μπορίνασα τι σικλιάς.

3, 4. Σαρ έπρεπε τι συμπεριφερίντιβεν κο κασουκέ ντα κο κορορέ σαρ βακερέλα ο εδάφιος Λευιτικό 19:14;

³ Διαβάνεν Λευιτικό 19:​14. Ο Ιεχωβά μπεκλεντίνελας πι λαόσταρ τι σικαβέν λατσσιπέ οντουλένγκε σο τθερένας προβλήματα πουμαρέ σωμάστε. Για παράδειγμας, ο Ισραηλίτες δεν  έπρεπε τι ντεν αρμανιά εκχέ κασουκέ τζενές. Εκ ασακί αρμάν ισινέ τι βακερέν εκχέ τζενέσκε ότι κα κερένας λέσκε ζιάνι ή τι ντελεντίνεν τι αβέλ λέσκε κάτι μπέτι. Σο μπέτι πράγμας κα αβέλας ανταβά ι κασουκέσκε! Ναστί ασουνέλας οντουβά σο βακέρντιβελας λέσκε, οτθάρ ναστί υπερασπίνελας πο νεαυτός.

⁴ Επίσης, κο εδάφιος 14 σικλιάσα ότι ο υπηρέτες ι Ντεβλέσκε δεν έπρεπε “τι τσσουβέν εμπόδιος ανγκλάλ εκχέ κορορέστε”. Εκ βιβλίος βακερέλα ακαλά λάφια ι τζενένγκε σο τθερένας προβλήματα πουμαρέ σωμάστε: «Κι πουρανί Εγγύς Ανατολή, [ανταλέ τζενέν] μπουτ φαρ χουχαβένας-λεν ντα συμπεριφερίντιβενας λένγκε μπέτι». Εκ τζενό σο να πφαμπόλας ι γιαβερένγκε μπέκιμ τι τσσουβέλας εκ εμπόδιος ανγκλάλ εκχέ γιαβερέστε επειδή μανγκέλας τι κερέλ λέσκε ζιάνι ή για τι ασάλ πέσκε λέσαρ. Σο μπέτι πράγμας κα αβέλας ανταβά! Ανταλέ εντολιάσαρ, ο Ιεχωβά βοηθίνελας πι λαός τι αγαβέλ ότι έπρεπε τι πφαμπόλ οντουλένγκε σο τθερένας προβλήματα πουμαρέ σωμάστε.

5. Σαρ μπορίνασα τι πφαμπάς οντουλένγκε σο τθερένα προβλήματα πουμαρέ σωμάστε;

⁵ Ο Ιησούς πφαμπόλας οντουλένγκε σο τθερένας προβλήματα πουμαρέ σωμάστε. Ανέν τουμαρέ γκοντιάτε ο αμπέρι σο μπουτσσαντάς κο Ιωάννης κο Βαφτιστής: «Ο κορορέ ακανά ντικχένα, ο μπανγκέ πφιρένα, ο λεπροί αβένα λατσσές, ο κασουκέ ασουνένα [ντα] ο μουλέ ιστίνα». Αφού ντικχλέ ι Ιησούσκε θαύματα, «σαρό ο λαός . . . ντινάς δόξα ι Ντεβλές». (Λουκ. 7:​20-22· 18:​43) Ο Χριστιανοί μπεϊντίνενα τι πφαμπόν οντουλένγκε σο τθερένα προβλήματα κο σώμας, σαρ κερέλας ο Ιησούς. Οτθάρ, σικαβάσα ασακέ τζενένγκε λατσσιπέ ντα υπομονή. Ισί μπαγιά ότι ο Ιεχωβά να ντινάς-αμέν ι ζορ τι κεράς θαύματα. Τθεράσα όμως ο προνόμιος τι βακεράς, εμ οντουλένγκε σο ναστί ντικχένα εμ οντουλένγκε σο ισί κορορέ πνευματικά, ο λατσσέ αμπέρια εκχέ παραδεισόσκε σο κα αβέν σαρέ τέλειοι ντα κα αβέν λατσσέ αμαλά ι Ντεβλέσαρ. (Λουκ. 4:​18) Ανταλά λατσσέ αμπέρια κερένα μπουτέ τζενέν από ακανά τι δοξάνεν ι Ντεβλές.

6. Σαρ βοηθίνελα-αμέν ο Λευιτικός κεφάλαιος 19 τι αγαβάς πο λατσσές ο Ντες Εντολές;

⁶ Χάνικ εδάφια κατά Λευιτικό κεφάλαιος 19 βοηθίνενα-αμέν τι αγαβάς πο λατσσές ο Ντες Εντολές. Για παράδειγμα, η όγδοη εντολή  βακερέλας σάντε: «Δεν πρέπει τι τσορές». (Έξοδ. 20:​15) Εκ τζενό μπέκιμ τι σκεφτίνελας ότι, άμα να κα λέλας ποτές κάτι σο να ισινέ λέσκο, αζομάν κα ντέλας καν οντουλέ εντολιάτε. Όμως, μπέκιμ τι τσορέλας γιαβερέ τροπόντζαρ.

7. Σαρ μπέκιμ μα τι ντέλας καν εκ έμπορος κι όγδοη εντολή σο βακερέλα ι τσοριμάσκε;

⁷ Εκ έμπορος μπέκιμ τι καμαρώνελας σο να λιντάας ποτές κάτι σο να ισινέ λέσκο. Αλλά ισινέ πάντα τίμιος πι μπουτιάτε; Κο εδάφια Λευιτικό 19:​35, 36, ο Ιεχωβά βακερντάς: «Δεν πρέπει τι χουχαβέν κάνα γκινένα καζόμ ζούνι ντα πφαρό ισί εκ σέι ή καζόμ τθαν ασταρέλα. Πρέπει τι τθερέν ζυγαριά σο γκινέλα ντιπ σωστά». Εκ έμπορος σο να γκινέλας λατσσές οντουλά σο μπικινέλας για τι χουχαβέλ ι τζενέν σο κινένας λέσταρ κι πραγματικότητα τσορέλας. Ο Λευιτικό κεφάλαιος 19 ντέλα-αμέν τι αγαβάς-λες ανταβά πο λατσσές.

8. Σαρ οντουλά σο βακερένα ο εδάφια Λευιτικό 19:​11-13 βοηθίνενας ι Ιουδαιόν τι κερέν ι αρχή σο ισί παλάλ κατά όγδοη εντολή, ντα σαρ βοηθίντιβασα αμέν;

⁸ Διαβάνεν Λευιτικό 19:​11-13. Ο εδάφιος Λευιτικό 19:​11 αρχίνελα ακαλέ λαφίντζαρ: «Δεν πρέπει τι τσορέν». Ο εδάφιος 13 σικαβέλα ακαλέ λαφίντζαρ ότι ο χουχαϊπέ κι μπουτί τθερέλα σχέση ι τσοριμάσαρ: «Δεν πρέπει τι χουχαβές ι γιαβερέ τζενές». Οτθάρ, κάνα εκ τζενό χουχαβέλα ι γιαβερέν πι μπουτιάτε, τσορέλα. Η όγδοη εντολή βακερέλας ότι ο τσοριπέ ισί λάθος. Αλλά οντουλά σο βακερέλα ο Λευιτικός βοηθίνενας ι Ιουδαιόν τι αγαβέν σαρ τι κερέν ι αρχή σο ισί παλάλ κατά νόμος, δηλαδή σαρ μπορίνενας τι αβέν τίμιοι σαρέ οντουλέντε σο κερένας. Ισί λατσσό αμένγκε τι σκεφτίνας σαρ ντικχέλα ο Ιεχωβά ο χουχαϊπέ ντα ο τσοριπέ. Κα μπορίναας τι πουτσάς-αμέν: “Κάνα σκεφτίναβα ο εδάφια Λευιτικό 19:​11-13, αγαβάβα ότι μπέκιμ τι χρειαζίντιβελα τι κεράβ αλλαγές μι ζωγιάτε ντα πο μπουτ μι μπουτιάτε;”

9. Σαρ αρακχαβέλας ι τζενέν σο κερένας μπουτί ο νόμος σο ισί κο εδάφια Λευιτικό 19:13;

⁹ Εκ Χριστιανός σο τθερέλα τζενέν πι μπουτιάτε πρέπει τι τθερέλ πι γκοντιάτε εκ γιαβέρ-ντα πράγμας για τι αβέλ τίμιος. Ο εδάφιος Λευιτικό 19:​13 μπιτίνελα ακαλέ λαφίντζαρ: «Δεν πρέπει τι ατσσικιαρές σαρί ι ιράτ μέχρι κο ντισιπέ ο λοβέ ι τζενέσκε σο κερέλα μπουτί». Κο Ισραήλ, ο πο μπουτ τζενέ κερένας μπουτί κο χωράφια ντα έπρεπε τι ποκίντιβεν κάθε ντιβές σοράν κατά μπουτί. Άμα εκ τζενό να κα ποκίντιβελας σοράν κατά μπουτί, μπέκιμ μα τι τθερέλας ο λοβέ σο χρειαζίντιβελας για τι παρβαρέλ πι φαμιλί οντουβά ντιβές. Ο Ιεχωβά βακερντάς: «Τθερέλα ανάγκη ντα οντουλένταρ σο νικαβέλα ατσσόλα κι ζωή».​—Δευτ. 24:​14, 15· Ματθ. 20:8.

10. Σο σικλιάσα κατά εδάφιος Λευιτικό 19:13;

¹⁰ Αντιβές, μπουτ τζενέ σο κερένα μπουτί να ποκίντιβενα κάθε ντιβές, αλλά εκ ή ντούι φαρ κο μάσεκ. Η αρχή όμως ι εδαφιόσκι Λευιτικό 19:​13 ισί αμαρέ ντιβεσένγκε-ντα. Μερικοί σο τθερένα τζενέν πουμαρέ μπουτιάτε αδικίνενα-λεν κάνα ντένα-λεν μπουτ πο χάνικ λοβέ οντουλένταρ σο έπρεπε τι λεν. Τζανένα ότι οντουλά τζενέ τθερένα ανάγκη ι μπουτί ντα να κα τσσιναβέν τι κερέν μπουτί λένγκε παρόλο σο ντένα-λεν μπουτ χάνικ λοβέ. Κα μπορίναας τι βακεράς ότι ασακέ τζενέ “ατσσικιαρένα ο λοβέ ι τζενέσκε σο κερέλα μπουτί”. Εκ Χριστιανός πρέπει τι τθερέλ πι γκοντιάτε μα τι κερέλ-λες ανταβά οντουλένγκε σο κερένα λέσκε μπουτί. Για τι ντικχάς σο γιαβέρ μπορίνασα τι σικλιάς κατά Λευιτικό κεφάλαιος 19.

11, 12. Σο μανγκέλας τι σικαβέλ ο Ιησούς κάνα βακερντάς λάφια κατά εδάφια Λευιτικό 19:​17, 18;

¹¹ Ο Ντεβέλ να μανγκέλα σάντε μα τι κεράς ζιάνι κο γιαβερά. Ανταβά ντικχάσα-λες κο εδάφια Λευιτικό 19:​17, 18. (Διαβάνεν) Ντικχέν σο βακερντάς ο Ιεχωβά: «Πρέπει τι μανγκές ι γιαβερές σαρ μανγκέσα το νεαυτός». Εκ Χριστιανός πρέπει τι κερέλ-λες ανταβά άμα μανγκέλα τι κερέλ ο γκι ι Ντεβλέσκο.

 ¹² Ο Ιησούς σικαντάς καζόμ σημαντική ισί η εντολή κο εδάφιος Λευιτικό 19:​18. Εκ Φαρισαίος πουτσλάς εκ φαρ ι Ιησούς: «Καγιά ισί η πο μπαρί εντολή κο Νόμος;» Ο Ιησούς απαντιντάς ότι «η πο μπαρί ντα πρώτη εντολή» ισί τι μανγκάς ι Ιεχωβάς σαρέ αμαρέ γκίσαρ ντα σαρέ αμαρέ ψυχιάσαρ ντα σαρέ αμαρέ γκοντιάσαρ. Σοράν, βακερντάς ακαλά λάφια κατά εδάφιος Λευιτικό 19:​18: «Η δεύτερη σο ταιριάνελα ανταλάσαρ ισί: “Πρέπει τι μανγκές ι τζενές σο ισί πασέ τούτε σαρ μανγκέσα το νεαυτός”». (Ματθ. 22:​35-40) Ισί μπουτ τρόποι για τι σικαβάς ότι μανγκάσα ι γιαβερέν. Σικλιάσα χάνικ ανταλένταρ κατά Λευιτικό κεφάλαιος 19.

13. Σαρ βοηθίνελα-αμέν η ιστορία ι Ιωσηφίσκι τι αγαβάς οντουβά σο γραφισάλο πο σοράν κο εδάφιος Λευιτικό 19:18;

¹³ Εκ τρόπος για τι σικαβάς ότι μανγκάσα ι τζενέν σο ισί πασ’ αμέντε ισί κάνα κεράσα ι συμβουλή ι εδαφιόσκι Λευιτικό 19:​18: «Δεν πρέπει τι λες εκδίκηση ούτε τι ατσσικιαρές κακία». Ο πο μπουτ τζανάσα τζενέν σο ατσσικιαρντέ κακία εκχέ τζενέσκε σο κερένα λέσαρ μπουτί, εκχέ συμμαθητίσκε ή εκχέ τζενέσκε πι φαμιλιάταρ​—ντα μπάζιμα μπουτ μπρεσά! Ανέν τουμαρέ γκοντιάτε ότι ο ντες μιλαδέλφια ι Ιωσηφίσκε ατσσικιαρντέ λέσκε κακία ντα ανταβά τσσιντιντάς-λεν τι κερέν λέσκε ζιάνι. (Γέν. 37:​2-8, 25-28) Αλλά ο Ιωσήφ να συμπεριφερισάλο λένγκε μπέτι τροπόσαρ! Κάνα τθερέλας εξουσία ντα μπορίνελας τι λελ εκδίκηση, βοβ τζιτζισάλο λένγκε. Να ατσσικιαρντάς λένγκε κακία. Οκιά μπάνταρ, κερντάς ι συμβουλή σο γραφισάλι πο σοράν κο εδάφιος Λευιτικό 19:​18.​—Γέν. 50:​19-21.

14. Σο σικαβέλα ότι ο αρχές σο ισί κο εδάφιος Λευιτικό ισί αμαρέ ντιβεσένγκε-ντα;

¹⁴ Ο Χριστιανοί σο μανγκένα τι κερέν ο γκι ι Ντεβλέσκο πρέπει τι μοιάζεν κο Ιωσήφ, σο συγχωριντάς πι πφραλέν αντίς τι λελ εκδίκηση. Ανταβά βακερντάς ο Ιησούς-ντα κι προσευχή σο σικλιαρντάς-αμέν τι κεράς, κάνα βακερντάς τι συγχωρίνας ο λάθος σο κερντέ αμένγκε ο γιαβερά. (Ματθ. 6:9, 12) Ο απόστολος Παύλος-ντα βακερντάς ι Χριστιανόνγκε: «Μα λεν εκδίκηση τουμαρέ νεαυτόσκε, πφραλάλεν». (Ρωμ. 12:​19) Επίσης, βακερντάς λένγκε: «Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, ατζέ-ντα άμα εκ τζενό τθερέλα  παράπονος εκχέ γιαβερέσταρ». (Κολ. 3:​13) Ο αρχές ι Ιεχωβάσκε να αλλάνενα. Ο αρχές σο βασίντιβενα κο εδάφιος Λευιτικό 19:​18 ισί αμαρέ ντιβεσένγκε-ντα.

15. Σικαβέν εκχέ παραδειγμάσαρ σόσκε χρειαζίντιβελα τι μουκχάς παλ’ αμέντε ο προσβολές.

¹⁵ Για τι ντικχάς εκ παράδειγμας. Η ντουκχ σο ανέλα αμαρέ γκίστε εκ τζενό ισί σαρ εκ ντιπέ κο σώμας. Μερικά ντινίματα ισί χουρντέ, ντα γιαβερά ισί μπαρέ. Φιρειπείν, κάνα πουτράσα εκ φάκελος, μπέκιμ τι τσσινάς-αμέν χάνικ κο παρμάκι ι χαρτίσαρ. Ανταβά ντουκχάλα μπουτ, αλλά ανταγιά ντουκχ μπέκιμ μα τι ατσσόλ μπουτ βακίτι. Σοράν από εκ ή ντούι ντιβές, μπέκιμ τι μπιστράς-αμέν κατέ τσσιντάμ-αμέν. Αντικάς μερικές προσβολές-ντα ισί χουρντέ. Για παράδειγμας, εκ αμάλ μπέκιμ χωρίς τι σκεφτίνελ-λες τι βακερέλ ή τι κερέλ κάτι σο κα πφανγκέλ αμαρό γκι, αλλά ισί αμένγκε εύκολος τι συγχωρίνας-λες. Κάνα όμως εκ ντιπέ ισί πο μπαρό, ο γιατρός μπέκιμ τι σουβέλ-λες ντα τι πφάντελ-λες. Άμα αμέν κα ναμίναας ή κα ασταράας συνέχεια ο ντιπέ, σάντε αμένγκε κα κεράας ζιάνι. Δυστυχώς, εκ τζενό μπέκιμ τι κερέλα κάτι ασακό κάνα προσβαλιντέ-λες μπουτ. Μπέκιμ τι σκεφτίνελα συνέχεια ι ντουκχ σο τθερέλα αντρέ πι γκίστε ντα καζόμ μπουτ ντουκχαντάς-λες ο γιαβέρ τζενό. Οντουλά όμως σο ατσσικιαρένα κακία, σάντε πουμαρέ νεαυτόσκε κερένα ζιάνι. Καζόμ πο λατσσό ισί τι ντας καν κι συμβουλή κι εδαφιόσκι Λευιτικό 19:18!

16. Σαρ έπρεπε τι συμπεριφερίντιβεν ο Ισραηλίτες κο αμπατζήδες σαρ βακερένα ο εδάφια Λευιτικό 19:​33, 34, ντα αμέν σο σικλιάσα ανταλέσταρ;

¹⁶ Κάνα ο Ιεχωβά βακερντάς κο Ισραηλίτες τι μανγκέν ι γιαβερέν, να μανγκέλας τι βακερέλ ότι έπρεπε τι μανγκέν σάντε οντουλέν σο ισινέ κατά ίδια φυλή ή τθεμ. Βακερντάς λένγκε ότι έπρεπε τι μανγκέν ι αμπατζή τζενέν-ντα σο ισινέ λέντζαρ. Ανταβά μανγκένα τι βακερέν ο λάφια κο εδάφια Λευιτικό 19:​33, 34. (Διαβάνεν) Ο Ισραηλίτες έπρεπε τι συμπεριφερίντιβεν κο αμπατζής “σαρ εκ τζενό σο ισινέ λένγκε τθεμέσταρ” ντα “τι μανγκέν-λες” σαρ μανγκένας πουμαρό νεαυτός. Για παράδειγμας, έπρεπε τι μουκχέν εμ κο αμπατζήδες σο μπεσένας οτθέ εμ κο τσορορέ τι γκίντεν γκιβ. (Λευιτ. 19:9, 10) Η αρχή σο βακερέλα ότι πρέπει τι μανγκάς ι αμπατζή τζενέν ισί ι Χριστιανόνγκε-ντα αντιβές. (Λουκ. 10:​30-37) Σαρ; Ισί εκατομμύρια μετανάστες, ντα μπέκιμ κάποιοι λένταρ τζουβντιόνα πασέ τουμέντε. Ισί σημαντικός τι συμπεριφερίντιβας ανταλέ μουρσένγκε, τζουβλίνγκε ντα χουρντένγκε με σεβασμός.

17, 18. (α) Σο βακερένα αμένγκε ο εδάφια Λευιτικό 19:2 ντα 1 Πέτρου 1:​15 τι κεράς; (β) Καβά σημαντικός έργος βακερντάς αμένγκε ο απόστολος Πέτρος τι κεράς;

¹⁷ Εμ ο εδάφιος Λευιτικό 19:2 εμ ο εδάφιος 1 Πέτρου 1:​15 βακερένα ι Ντεβλέσκε λαόσκε τι αβέλ άγιος. Μπουτ γιαβερά εδάφια κο Λευιτικό κεφάλαιος 19 βοηθίνενα-αμέν τι ντικχάς σο τι κεράς για τι λας ι ευλογία ι Ιεχωβάσκι. Ντικχλάμ μερικά εδάφια σο σικαβένα σάντε χάνικ κατά λατσσέ πράγματα σο πρέπει τι κεράς ντα χάνικ κατά μπέτι πράγματα σο δεν πρέπει τι κεράς. * Ο Χριστιανικές Ελληνικές Γραφές σικαβένα ότι ο Ιεχωβά μανγκέλα τι κεράς ανταλά αρχές αμαρέ ζωγιάτε. Αλλά ο απόστολος Πέτρος βακερέλα κάτι γιαβέρ-ντα.

¹⁸ Παρόλο σο μπέκιμ τι ντάσα λατρεία ι Ιεχωβάς ντα τι κεράσα μπερεκέτι λατσσέ πράγματα ι γιαβερένγκε, ο Πέτρος κερντάς λάφι πο μπουτ εκχέ πραγμάσκε. Πριν τι βακερέλ αμένγκε ο Πέτρος τι αβάς άγιοι σαρέ οντουλέντε σο κεράσα, βακερντάς: «Ετοιμάνεν τουμαρί γκοντί για τι κερέν μπουτί ι Ντεβλέσκε». (1 Πέτρ. 1:​13, 15) Σο μπουτί ισί ανταγιά; Ο Πέτρος βακερντάς ότι ο χρισμέ πφραλά ι Χριστόσκε κα “«βακερένας σαριλένγκε ο λατσσίματα» οντουλέσκε σο ντινάς-λεν βίκος”. (1 Πέτρ. 2:9) Κι πραγματικότητα, σαρέ ο Χριστιανοί τθερένα ο προνόμιος τι κερέν ανταβά σημαντικός έργος, εκ έργος σο κερέλα ο πο μπαρό λατσσιπέ. Σο σουκάρ προνόμιος τθεράσα σαρ άγιος λαός τι βακεράς ντα τι σικλιαράς αντράλ αμαρέ γκίσταρ ο λατσσέ αμπέρια! (Μάρκ. 13:​10) Κάνα κεράσα σο νακχέλα αμαρέ βαστένταρ για τι αρακχάς ο αρχές σο ισί κο Λευιτικό κεφάλαιος 19, σικαβάσα ότι μανγκάσα αμαρέ Ντεβλές ντα ι γιαβερέν. Ντα σικαβάσα ότι μανγκάσα τι “αβάς άγιοι” σαρέ κο πράγματα σο κεράσα.