DJAMBA DJƐ WEKELO 49
Elakanyelo w’owaso má onkanda w’Ase lewi lá kɛnɛ kelendana la wopo wɔ nanghela anto ankina akambo
‘Kɔpa winako onto etengo oyakɔpɛ.’—LEW. 19:18.
YEEMBO 109 Tokane ngandji k’efula kɛ m’anse k’oloko (lá Otetela)
LÁ YOPASƐ *
1-2. Kɛkɔnge kɛ sɛnyi lá djamba djemboheta, ko kɛkɔnge k’ɛnaso lɔ lá djamba djɛnɛ?
LÁ DJAMBA djemboheta, tɛnaka alako amɔtshi wa djonyi má onkanda w’Ase lewi shapitrɛ 19. Ndjɔmbɔmba, lá vɛrse 3, tɛnaka djɛ Yehova ashimelaka ase Isariyɛlɛ djɛ nɛmɛyɛ ambotshi wawɔ. Tɛnaka wopo w’okokaso nkamba la dako djɛsɔ lɔɔko kɛnɛ má nseeyɛ ambotshi waso ehomba welá demba, wɛ ngandji, la welá nyuma. Ngo lá vɛrse djɛkɔ, wavungolaka enkambi wɛ Ndjambe djonyi djɛ nɛmɛyɛ Sabata. Tekaka ente kaanga sopalɔmbama djɛ nɛmɛyɛ ɔlɛmbɛ wɔ Sabata lɔɔko kɛnɛ, iso nkoka nkamba l’ikfɔ yɛsɔ má ntshungolaka winá mbala la mbala djɛ ndjeka akambo wa nyuma. Má nangha nghɔsɔ, tɔngɛnyɛ ente tonangha la wolo djɛ ndjala ekina, etengo onkanda w’Ase lewi 19:2 edjinge 1 Pɛtɛlɔ 1:15 ɔtɔlɔmbawɔ djɛ nangha.
2 Lá djamba djɛnɛ, tongokindjɛ nshishima onkanda w’Ase lewi shapitrɛ 19. Kɛkɔnge kɛ shapitrɛ kɛsɔ otolakanyɛwɔ lá kɛnɛ kelendana la ndɔsa wanɛ walekɔ la nkɔmɔ l’alemba la ntshina, ndjala sii winá wonanghaso opoto, edjinge lá kɛnɛ kelendana la ndjoka winaso anto ngandji? Iso nkɔpaka ndjala ekina etengo Ndjambe oyɛnde ekina, djɛkondeke nyontshɔ tolende elakanyelo w’okokaso mba.
TƆSHI WANƐ WALEKƆ LA NKƆMƆ L’ALEMBA LA NTSHINA
Ase lewi 19:14 ntokembɛka djɛ ndjala l’eyalelo edjinge la nanghedji djɛkɔnge te wanɛ walekɔ nyiimi la wanɛ wambowodjɛ wiso? (Lenda itenyi 3-5) *
3-4. Lá nkilika Ase lewi 19:14, wopo wɔkɔnge ase Isariyɛlɛ yayale ladjɛ nanghela wanɛ wapɛnyi la wapoke akambo?
3 Wala Ase lewi 19:14. Yehova ndɔmbaka enkambi wɛnde djɛ ndɔsa wanɛ walekɔ la nkɔmɔ l’alemba la ntshina. Ndjɔmbɔmba, ase Isariyɛlɛ watakokaki ndɔka kanga liimi. Dɔki djɛsɔ djasakisolaki ndoowana kana ndookombola lokolo lɔ nyɛtshi. Ɔsɔ ngo oyɛwɔ nyɛtshi nanghela kanga liimi nghɔsɔ! Nde apoke kɛnɛ k’otepalawɔ lá nkambo djɛnde, djɛkondeke apangoyala kaanga l’akoka wa ndáseela.
4 Lonkina, ngo lá vɛrse djɛkɔ 14 Ndjambe ashimelaka enkambi wɛnde djipa ‘ndjilela kanga lombowodjɛ wiso otamba wɔ ntakanyɛ.’ Onkanda ɔmɔtshi ntepelaka lá nkambo dj’anto walekɔ la nkɔmɔ l’alemba ante: “Lá angando yɛ ntondo yeyalaki entshupa l’owila w’Isariyɛlɛ wananghelaki ase nkɔmɔ akambo lá yopo yɛ ntshamba djɛ djɔ edjinge l’onkonda.” Mbala imɔtshi anto w’enkonda wilaki ekete kɛmɔtshi lá ntondo kɛ kanga lɔpɛnyi djɛ ndowomadjɛ kana djɛ ndɔwɔla. Ɔsɔngo onkonda! Má ndaawilela ɔlɛmbɛ wɔsɔ, Yehova akotshɛka anto wande dj’iwɔ nyɛna ambɔ iwɔ ladjɛ ndjala la djandji te wanɛ walekɔ la nkɔmɔ l’alemba.
5. Wopo wɔkɔnge w’okokaso nyɛnyɛ djandji djɛso te wanɛ walekɔ la nkɔmɔ l’alemba?
5 Yeso ayalaki la djandji te wanɛ wayalaki la nkɔmɔ l’alemba. Kovungɔ losango lɔ ndatomela Djɔanɛ Ombatizanyi: ‘Waambowodjɛ wiso wambɛna, ase ntshumbe wambɔkɛnda wɔlɔ, ase anghɛnyi wambɔkɔnɔ, nyiimi wamboka, la edjo wambokfundɔ.’ M’ɔkɔngɔ w’iwɔ nyɛna ansese wa Yeso wasɔ, ‘anto ankfumɔ walumɛka Ndjambe.’ (Luka 7:20-22; 18:43) Akristo walekɔ l’osasa djɛ ndjokola djandji djɛ Yeso te anto walekɔ la nkɔmɔ l’alemba. Djɛkondeke iso ndjalaka l’oloko wɔlɔ, edjinge la balentshitshi te anto wa nghɔsɔ la ndawɔsaka la ntshina. Nsɔsɔlɔ, Yehova atatɔpɛyɛ nkfulu kɛ nangha ansese etengo Yeso ndananghaka. Koko tolekɔ la mpeyi kɛ nshimela anto wambowodjɛ wiso, l’alemba kana lá nyuma losango lɔ wɔlɔ lolendana la paradiso, edjena k’anto yongotoyala l’alemba wa wɔlɔ lá demba kana lá nyuma. (Luka 4:18) Nsango yɛ wɔlɔ yɛsɔ ímbótshindáká anto efula djɛ mpɛyɛ Ndjambe lomo.
TOYALE SII WINÁ W’ONANGHASO OPOTO
6. Wopo wɔkɔnge onkanda w’Ase lewi shapitrɛ 19 otokotshɛwɔ djɛ nsipisoyɛ Ɛlɛmbɛ djomi wɔlɔ?
6 Avɛrse amɔtshi walekɔ l’onkanda w’Ase lewi shapitrɛ 19 mpakisolaka akambo w’otepelawɔ lá Ɛlɛmbɛ djomi. Ndjɔmbɔmba, ɔlɛmbɛ w’enanɛyi ntepelaka ngo ante: ‘Tɔngɔlake.’ (Epo. 20:15) Onto ɔmɔtshi nkoka nkanela ante ntsha mpɔsisa ekete kepalekɔ kɛmi, mbɔkoko lambɔlɛmɛyɛ ɔlɛmbɛ wɔsɔ. Koko, nde nkoka ndjɔngɔla lá topo tonkina.
7. Wopo wɔkɔnge onanghi w’opoto okokande mpendola ɔlɛmbɛ w’enanɛyi wolendana la ndjɔngɔla?
7 Onanghi w’opoto nkoka nkanela ante nde apɔngɔlaka ladjikɛnde apɔsaka nkete djɛ nkáná ɔsɔsa. Ko otepelaso mo lá lɛdji lonanghande opoto wɔnde? Lá onkanda w’Ase lewi 19:35, 36, Yehova ntepelaka ante: ‘Nyotakambake la nkete djɛ ndjɛdjɛ djɛ lokeso, winá wɛdjɛnyo nkete dj’etale, dj’edjito la djɛkɛla. Nyokambake la kilo yɛ djɔ, nkete djɛ ndjɛdjɛ edjito djɛ djɔ, nkete djɛ ndjɛdjɛ nkete djemboma djɛ djɔ, la nkete djɛ ndjɛdjɛ nkete djɛkela djɛ djɔ.’ Onanghi w’opoto wokamba la kilo kana la nkete djɛ ndjɛdjɛ djɛ lokeso ngo djɛ ndjimba akiliya yɛnde, áwɔngɔla lá lɛdji lɔmɔtshi. Vɛrse nkina djelá onkanda w’Ase lewi shapitrɛ 19 nsakisolaka nkambo djɛsɔ papoo lonkina.
Lá nkilika Ase lewi 19:11-13, kɛkɔnge k’Okristo okokande ndawopola nyɔmɛlɛ lá kɛnɛ kelendana la wopo wonanghande opoto? (Lenda itenyi 8-10) *
8. Wopo wɔkɔnge tokakambo tonkina totanema l’onkanda w’Ase lewi 19:11-13 yakotshɛka ase Juda djɛ nkamba l’ikfɔ y’isama l’ɔlɛmbɛ w’enanɛyi, ko kɛsɔ okokawɔ ntokotshɛ djɛ nangha nge?
8 Wala Ase lewi 19:11-13. Ase lewi 19:11 mbangaka l’etepela wɛnɛ ante: ‘Nyɔtɔngɔlake.’ Vɛrse 13 nyɛnyɛka djokanelo djelekɔ l’antenyɛ ndjɔngɔla la nkamba la topo tɔ lokeso l’opoto, má ntepela ante: ‘Todjimbake winako onto.’ Djɛkondeke ntsha onto ɔmɔtshi nkambaka la lokeso kana la lodjimbo winá wonanghande opoto mbɔ koko nde ndjɔngɔlaka. Winá w’ɔlɛmbɛ w’enanɛyi otepelande ante tɔngɔlake, tokakambo tonkina totanema l’onkanda w’Ase lewi, takotshɛki ase Juda dj’iwɔ nsipisoyɛ wopo w’iyakokaka nkamba l’ikfɔ y’isama lá wedji w’ɔlɛmbɛ wɔsɔ ntepela ente wopo wɔ yakokaka ndjala sii l’akambo ankfumɔ wonanghawɔ. Alekɔ wɔlɔ iso ntɔnɔlaka lá ikanyi yɛ Yehova yelendana la sii edjinge la ndjɔngɔla. Iso nkoka ndawopola isɔmɛlɛ ente: ‘Lá nkilika Ase lewi 19:11-13, nkambo mɔtshi dekɔ dj’oyɛmi ladjɛ nangha etshikitano lá lowiko lɔmi, pekapeka lá yopo yonanghami opoto kana yokambami olemo?’
9. Wopo wɔkɔnge ɔlɛmbɛ w’otanaso lá Ase lewi 19:13 yakotshɛka ase olemo?
9 Nkambo nkina djelendana la sii dekɔ, djɛ Okristo wonangha opoto oyɛnde ladjɛ ndjila yimba. Ase lewi 19:13 nkomeyɛka l’etepela wɛnɛ: ‘Totshikalake la lofuto l’ose olemo otsho w’otondo tii la nkɛsɛ.’ L’Isariyɛlɛ anto efula wakambaki awedji, ko ase elemo wa yɔsaká djɛ ntokamba wayalaki ladjɛ mfutama ngo l’ekomo kɛ lofu. Nsamba mfuta lofuto l’ose olemo wɔ nghɔsɔ akokaki ndookomɛ djɛ nde nsamba lofalanga loyɛnde la djonyi djɛ ndesɛ nkfumbo kɛnde lofu lonyi. Yehova asipisoyɛka ante: ‘Nde alekɔ lá osambo edjinge nde mbikaka ngo má lofuto lɔnde.’—Mvu. 24:14, 15; Mat. 20:8.
10. Olakanyelo wɔkɔnge w’okokaso mba m’onkanda w’Ase lewi 19:13?
10 Lɔɔko kɛnɛ, ase elemo efula mfutamaka mbala kɛmɔ kana mbala ipe lá ngɔndɔ, koko ape mfu inkfumɔ. Koko, ikfɔ y’otanaso lá Ase lewi 19:13 ilekɔ nsɔsɔlɔ tii lɔɔko. Ewandji w’elemo ɛmɔtshi nkesolaka ase elemo wawɔ má ndafuta ndambo kɛ lofuto lɔpɛlama kaanga ndambo daambi la kɛnɛ k’ɛdje dj’iwɔ ndongola. Iwɔ ndjewaka ambɔ ase elemo wawɔ wapalekɔ l’edjena kɛ ntshɔ la wangokindjɛ ndakambela kaanga ofutamawɔ daambi. Lá lɛdji lɔmɔtshi, ewandji wɛ nghɔsɔ ‘otshikalawɔnde la mfuto y’ase elemo wawɔ.’ Okristo wolekɔ l’ase elemo ladjɛ ndashikikɛ djɛ nde alekɔ sii te ase elemo wande. Winá wɔsɔ, nyontshɔ tolende olakanyelo w’okokaso mba má Ase lewi shapitrɛ 19.
KƆPA WINAKO ONTO NGO NGETE OYAKƆPƐ
11-12. Nkambo djɛkɔnge djɛ Yeso ndapike nghɔmɔ ɛsɔsɔ má mbala etepela welekɔ lá Ase lewi 19:17, 18?
11 Ndjambe ndjilaka yimba lá wopo wonanghelaso anto ankina akambo, nde apatoshimela ngo dj’ipa nanghela winaso anto nyɛtshi toko. Tokoka nyɛna nsɔsɔlɔ kɛ nkambo djɛsɔ lá Ase lewi 19:17, 18. (Wala.) Yehova ntepelaka papoo l’eteyi ante: ‘Kɔpa winako onto etengo oyakɔpɛ.’ Okristo ladjɛ nangha nghɔsɔ ntsha nde nkɔpaka nsasangɛ Ndjambe.
12 Kolenda wopo wɔ Yeso opikande nghɔmɔ ɛnsɔsɔ lá djonyi djelekɔ l’ɔlɛmbɛ wɔ Ase lewi 19:18 wɔsɔ. Lofu lɔmɔtshi Ofarisɛ ɔmɔtshi opolaka Yeso ante: ‘Ɔlɛmbɛ wɔkɔnge woleka ekekete l’anteyi k’Ɛlɛmbɛ?’ Yeso okadjimolaka ante ‘ɔlɛmbɛ woleka ekekete la wɔ ntondonde’ nkɔpa Yehova l’oloko wɔso onkfumɔ, l’anima waso ankfumɔ, edjinge la yimba yɛso inkfumɔ. Másɔ, Yeso awalaka onkanda wɔ Ase lewi 19:18, má ntepela ante: ‘W’ape wɔfɔna la wɔkɔ, wokinɛ: ‘Kɔpa winako onto ngo ngete oyakɔpɛ.’’ (Mat. 22:35-40) Topo tolekɔ efula t’okokaso nyɛnyɛ ente iso nkɔpaka winaso anto, koko lonkina tɛɛna topo tɔmɔtshi má Ase lewi shapitrɛ 19.
13. Wopo wɔkɔnge w’okokaso nsipisoyɛ kɔɔ ikanyi yelekɔ l’onkanda w’Ase lewi 19:18 winá w’ɔtɔnɔlaso lá ɔkɔndɔ welá Bible wolendana la Yosɛfu?
13 Yopo imɔtshi y’okokaso nyɛnyɛ ente iso nkɔpaka winaso anto nde má nkamba la dako dj’otanaso lá Ase lewi 19:18. Djetepela ante: ‘Tokawoyɛke nyɛtshi tá nyɛtshi kana mbomba onkomba.’ Efula l’anteyi kɛso nkoka ndjewa onto ɔmɔtshi wowombelisa winande w’olemo, welá nkalasa, ewoto kɛnde kɛmɔtshi, kana ewoto kɛnde kɛmɔtshi onkomba l’ilá kɛ ɛnɔnyi efula! Tovungɔ ente wananyɔ wa Yosɛfu wowombelaka onkomba, ko l’ekomo, kɛsɔ keyɛka ndaatshinda dj’iwɔ ndookapa. (Ewa. 37:2-8, 25-28) Koko Yosɛfu ánanghelaka akambo lá yopo yetshikitanyi! Winá wɔ ndookoma owandji la winá wɔ ndawa mbamba kɛ nkawoye wananyɔ wande nyɛtshi tá nyɛtshi, nde awokaka djandji. Yosɛfu atalama onkomba. Koko, nde ananghaka akambo lá yopo yokana la dako djeyisa ndofunama l’ɔkɔngɔ lá Ase lewi 19:18.—Ewa. 50:19-21.
14. Kɛkɔnge k’ɛnyɛ ente iso ladjɛ nkindjɛ nɛmɛyɛ tɔkfɔ totanaso lá Ase lewi 19:18?
14 Akristo wakɔpa nsasangɛ Ndjambe ladjɛ ndjokola Yosɛfu kanga limeyisa wananyɔ wande l’edjena kɛ ndakawoyɛ nyɛtshi tá nyɛtshi. Lonkina nkambo djɛsɔ ndjokanaka la kɛnɛ kɛ Yeso ndatepela lá lɔlɔmbɔ lɔ ndjɔmbɔmba winá wɔ ndatepela ante iso ladjɛ nyimeyɛ anto watonanghela nyɛtshi. (Mat. 6:9, 12) L’ikanyi yɛkɔ imɔ, ɔpɔstɔlɔ Poolo alakaka winande Akristo ante: ‘Wanyanghɛmɔko yɛ ngandji, nyotasɔmbɔlake.’ (Ɔrɔ. 12:19) Nde ákembɛka lonkina ante: ‘Nyokindjɛ nkfulumeyana nyɛtshi la nyimeyanake l’anteyi kɛnyo l’oloko ɔmɔ kaanga ntsha onto alekɔ la nkambo djɛ nkiyanela winande.’ (Kɔl. 3:13) Tɔkfɔ tɔ Yehova topatshikitana. Tɔkfɔ tisamá lá ɔlɛmbɛ welá Ase lewi 19:18 tokindjɛ ndjala djonyi tii lɔɔko kɛnɛ.
Ngo ngete yopalekɔ wɔlɔ nkindjɛ ndatshumbola lá mpota kɛ nsɔsɔlɔ, apalekɔ koko wɔlɔ nkindjɛ nkanela lá nyɛtshi kɛ yatonanghela. Iso ladjɛ mpona djɛ mvungɛ (Lenda itenyi 15) *
15. Ndjɔmbɔmba kɛkɔnge ketokotshɛ djɛ nsipisoyɛ lamo oyɛwɔ djonyi nyimeyɛ edjinge mvungɛ nyɛtshi kɛ yatonanghela?
15 Tɔkɔsa ndjɔmbɔmba kɛmɔtshi. Okiyano w’efula nkoka ndjɛlama la mpota kelá demba. Ampota imɔtshi ndjalaka tontshitshi, koko inkina ndjalaka nkekete. Ndjɔmbɔmba, winá w’ɔwɛkaso akɔla la lɔkɛngɔ, iso nkoka mpotala ipopota imɔtshi yɛ daambi lá lɔkɔla. Tokoka nsɔsɔlɔ ndjoka olando koko mbala imɔtshi olando wɔsɔ w’opangoyala ilá. M’ɔkɔngɔ wɔ lofu lɔmɔ kana mfu ipe mbala imɔtshi topangovungɔ kaanga idjena y’isahotala. Wopo wɔk’ɔmɔ ndeke evunga ɛmɔtshi welekɔ daambi efula. Ndjɔmbɔmba, ilongo yɛso imɔtshi nkoka ntepela kana nangha nkambo mɔtshi djekoka ntokiyanyɛ ipa la nde ndjewa, koko tongowimeyɛ ipa l’okakasano. Koko ntsha tombohotala mpota k’ekekete, dɔkɔtɛlɛ angɔtɔtɛla la angɔtɔwɔmba bandɛ l’eteyi. Koko ntsha tokotakota mpota kɛkɔ winá enkfumɔ, mbala imɔtshi kepangɔkɔnɔ edjinge kengosambɔ efula. Nkambo djɛ yɛnyi nde, onto nkoka nangha wopo wɔ nkambo djɛ nghɔsɔ winá w’onanghelawɔ nkambo mɔtshi djɛ nyɛtshi efula. Nde nkoka nkanelaka mbala la mbala wopo wɔ yokiyanyɛ la ekokolo k’ovunga kɛ yonanghela. Koko anto wáwombá onkomba ndananghelaka iyɔmɛlɛ nyɛtshi. Ɔsɔngo oyɛwɔ wɔlɔ nɛmɛyɛ dako dj’otanaso lá Ase lewi 19:18!
16. Lá nkilika Ase lewi 19:33, 34, wopo wɔkɔnge ase Isariyɛlɛ iyayale ladjɛ nanghelaka angangɛnda akambo, ko olakanyelo wɔkɔnge w’okokaso mba m’eteyi?
16 Winá wɔ Yehova ndilela ase Isariyɛlɛ ɔlɛmbɛ wɔ nkɔpa winawɔ anto, nde atakɔpa ntepela ante iwɔ ladjɛ nkɔpa ngo wanɛ walekɔ lawɔ loposo lɔmɔ lɔ demba kana ongidji ɔmɔ. Nde áshimelaka lonkina dj’iwɔ nkɔpa edjinge angangɛnda wawikaki esanga l’iwɔ. Ɔsɔ ndeke losango lokama papoo lotanaso lá Ase lewi 19:33, 34. (Wala.) Ase Isariyɛlɛ wayalaki ladjɛ nanghela angangɛnda akambo ‘etengo oyɛwɔnde wana wa mbandja kɛwɔ,’ la ‘ndaakɔpa’ etengo oyakɔpawɔ iyɔmɛlɛ. Ndjɔmbɔmba, ase Isariyɛlɛ wayalaki ladjɛ ntshika ayale angangɛnda kana ase ɔmvɔ ntatɔnghɔnaka nkete djetshikalaka l’awedji lá winá wɔ vukelo. (Lew. 19:9, 10) Ikfɔ yetepela djɛ nkɔpa angangɛnda ndendanaka koko l’Akristo wa lɔɔko kɛnɛ. (Luka 10:30-37) Lá wopo wɔkɔnge? Miliyɔ y’anto yemá andja w’otondo, wambɔsɛkɔka djɛ towika l’ewila enkina la wamɔtshi l’anteyi kɛwɔ nkoka ndjala wawika entshupa laso. Alekɔ djonyi iso nanghelaka ampame, amato, la wana wasɔ akambo lá yopo yɛnyɛ ente iso ndaawɔsaka la ntshina la ndaalɛmɛyɛka.
OLEMO WƆ DJONYI W’IYOPATEPELISA LÁ ASE LEWI SHAPITRƐ 19
17-18. a) Kɛkɔnge kɛ Ase lewi 19:2 edjinge 1 Pɛtɛlɔ 1:15 otokembɛwɔ djɛ nangha? b) Olemo wɔkɔnge wɔ djonyi ɔpɔstɔlɔ Pɛtɛlɔ otokembɛnde djɛ nangha?
17 Ase lewi 19:2 edjinge 1 Pɛtɛlɔ 1:15 akembɛ enkambi wɛ Ndjambe djɛ ndjala ekina. Avɛrse ankina efula wa l’onkanda w’Ase lewi shapitrɛ 19 nkoka ntokotshɛ djɛ nyɛna kɛnɛ k’okokaso nangha djɛ ndjawolama me Yehova. Tomboshishima ngo avɛrse amangha w’ɛnyɛ akambo amɔtshi wa wɔlɔ w’okokaso nangha la akambo amɔtshi wa pɔlɔ w’oyɛso ladjɛ ndjewɔ. * Efunelo w’Akristo w’ase Ngirika wɛmbɔtɛnyɛ djɛ Yehova akindjɛ ngo nkɔpa dj’iso nkamba la tɔkfɔ tɔsɔ lá lowiko lɔso lɔɔko kɛnɛ. Koko ɔpɔstɔlɔ Pɛtɛlɔ akotshɛ nkambo mɔtshi.
18 Iso nkokaka ntɛmɔla Yehova mbala la mbala la nanghelaka anto ankina akambo wa wɔlɔ, koko Pɛtɛlɔ akembeka Akristo djɛ nangha nkambo nkina djɛ djonyi. Ntondo kɛnde ndokoma djɛ ntokembɛ dj’iso ndjala ekina lá nanghedji djɛso nkfumɔ, nde atepelaka ante: ‘Nyɔlɔngɔsɔlɛ timba tɔ nyo djɛ nkamba olemo.’ (1 Pɛ. 1:13, 15) Olemo wɔkɔnge wɔsɔ? Pɛtɛlɔ atepelaka djɛ wananyɔ wande w’Akristo w’ankfutami ladjɛ ‘‘ndjewoyɛ lá djena nkfumɔ nanghedji djɛ wɔlɔ lombombe’ djɛ Kanga lawetisa’. (1 Pɛ. 2:9) Lá nsɔsɔlɔ, lɔɔko kɛnɛ Akristo ankfumɔ walekɔ la lomo lɔ nangha olemo wɔ djonyi wɔsɔ, wokotshɛ anto efula ndeka elemo enkina enkfumɔ. Ɔsɔngo mpeyi ketshikitanyi kelekɔ laso etengo oyɛso owila w’ekina djɛ ndapɛyɛka mbala la mbala edjinge l’entete l’olemo w’ipoposanyɛ la wɔ ndakanyɛ! (Mar. 13:10) Winá wonanghaso la welo wɛso enkfumɔ djɛ nkamba la tɔkfɔ t’otanaso lá Ase lewi shapitrɛ 19, iso nyɛnyɛka ente iso nkɔpaka Ndjambe la winaso anto. Lonkina iso nyɛnyɛka ente iso nkombolaka ‘ndjala ekina’ lá nanghedji djɛso nkfumɔ.
YEEMBO 111 Donga djelekɔ laso djɛ ndjala l’osasa (lá Otetela)
^ par. 5 Akristo wapalekɔ lonkina l’anse k’Ɛlɛmbɛ wɛ Mɔsɛ, koko Ɛlɛmbɛ wɛsɔ ntepelaka akambo efula w’oyɛso ladjɛ nangha la w’oyɛso ladjɛ ndjewɔ. Ndjeka akambo wasɔ nkoka ntokotshɛ djɛ ndjoka anto ankina ngandji la nsasangɛ Ndjambe. Djamba djɛnɛ djetepela wopo w’okokaso mba wapɔ má elakanyelo w’otanaso l’onkanda w’Ase lewi shapitrɛ 19.
^ par. 17 Lá djamba djɛnɛ la djemboheta, topashishimisa avɛrse watepela kɛnɛ kelendana la ndjala l’isɔnɔdji, ntshanghanyɛ akambo w’engolo lá nkambo dj’anto ankina, ndɛ ekila, nangha akambo wa manji, ntshɔ te wanɛ watepedjɛ djimo la wayi wa mbindo wa ntshɛngi.—Lew. 19:15, 16, 26-29, 31.—Lenda “Weepó w’antangi” welá numero kɛnɛ.
^ par. 52 NSAKISO Y’ASANGO: Owakɛ wɔ Yehova ɔmɔtshi akotshɛ wɔnanyɔ wɔ liimi djɛ nsawola nya dɔktɛlɛ mɔtshi.
^ par. 54 NSAKISO Y’ASANGO: Wɔnanyɔ wolekɔ la sɔsiete kɛ mokubu afuta ose olemo lofuto lɔnde.
^ par. 56 NSAKISO Y’ASANGO: Nkaana kɛmɔtshi nkoka mvungɛ lankeke ikakambo yɛ daambi yɛ yonanghelá. Iya nde angonangha wopo wɔk’ɔmɔ ntsha wamboonanghela nyɛtshi k’ekekete?
