1, 2. a) Ndiéjunʼ ndiʼyáá náa artículo dí nijngoo rá. b) Ndiéjunʼ guʼyáá náa artículo rígi̱ rá.

NÁA artículo dí nijngoo, ndiʼyáá tikhu ikha rí mambáyulú dí na̱ʼkha̱ náa capítulo 19 ndrígóo Levítico. Mbá xkri̱da náa versículo 3 naʼthí dí Jeobá niʼthúún bi̱ israelita dí mbuyamajkún anu̱ún ga̱jma̱a̱ rudún. Ndiʼyáá dí ma̱ndoo muʼnimbáníí consejo rúʼko̱ índo̱ nuxnún anu̱lú ga̱jma̱a̱ rudúlú dí nda̱ñúunʼ, dí naʼni maxmiéjúúnʼ ga̱jma̱a̱ rí mumbáñún mambaxúún májánʼ gajmiún Dios. Náa ikháá má versículo, Dios niʼthún xa̱bu̱ xuajñuu dí gíʼdoo numuu mbuyamajkuíí mbiʼi sábado. Maski ajndu ikháanʼlu na̱nguá eyóoʼ muʼnimbáníí xtángoo rúʼko̱, mú rígá mbá ikha dí niʼsngúlúʼ: Dí gíʼmaa muríyaʼ xúgíʼ mbiʼi mu̱ʼni̱ ñajuunʼ Dios. Xúʼko̱ nusngajmá dí nuʼnimíjna̱ manindxu̱lú kaʼwáánʼ xó má naʼthí náa Levítico 19:2 ga̱jma̱a̱ 1 Pedro 1:15.

² Náa artículo rígi̱, mu̱ʼgua̱ ruʼyáá xóó dí naʼthí náa Levítico 19. Mbuʼyáá xóo eʼsngúlú capítulo rígi̱ muʼniu̱u̱ṉ dí májánʼ bi̱ tsédxawíín o bi̱ tsíkruigu̱u̱n, muʼthá dí gajkhun o mu̱ʼni̱ xóo kaʼyoo náa nugujua̱ o náa nuraji̱i̱n xa̱bu̱ muñajunʼ ga̱jma̱a̱ rí maʼndulú kuʼñúún xa̱bu̱ numbaaʼ gajmiúlú. Numuu rí nandulú manindxu̱lú kaʼwáánʼ xóo Dios, guʼyáá ndiéjuunʼ gándoo gajmañulú.

3, 4. Xó má naʼthí náa Levítico 19:14, xú káʼnii gíʼmaa muniu̱u̱n israelita bi̱ tsédxuun ga̱jma̱a̱ tsíkruigu̱u̱n rá.

³ (Atraxnuu Levítico 19:14). * Jeobá nandoo dí xa̱bi̱i̱ muniu̱u̱n dí májánʼ bi̱ tsédxawíín o bi̱ tsíkruigu̱u̱n. Mbá xkri̱da, niʼthúún  bi̱ israelita dí xúthán dí raʼkhí ni má rí mutha wéñííʼ mbáa bi̱ tséʼdxuun. ¡Raʼkhí kayuuʼ dí muni̱i̱ xúʼko̱! Numuu rí tséʼdxuun dí nutháán, xa̱bu̱ buʼko̱ nda̱a̱ xóo maʼtámbayuminaʼ.

⁴ Ma̱ngaa náa versículo 14 naʼthí dí Dios niʼthúún xa̱bu̱ xuajñuu dí xúdriga “nimbá dí majngrádaaʼ bi̱ tsíkruigo̱o̱”. Náa mbá libro naʼthí xígi̱ ga̱jma̱a̱ numún xa̱bu̱ bi̱ xóo tsédxuun ga̱jma̱a̱ tsíkruigu̱u̱n: “Náa Oriente Medio nákha wájyúuʼ, xa̱bu̱ nuniu̱u̱n xó má eñún ga̱jma̱a̱ nuni gíníi”. Mbáa kúwá bi̱ nudriga kiejuunʼ dí majngrádaaʼ bi̱ tsíkruigo̱o̱ mu maʼni gawúminaʼ o mutsijmaa. ¡Phú raʼkhí kayuʼ rúʼko̱! Xó má kiʼtáñajunʼ dí naʼthí náa Levítico 19:14, Jeobá nimbáñún xa̱bu̱ xuajñuu dí gíʼmaa magáwi̱i̱nʼ a̱jkiu̱ún kuñún bi̱ tsédxuun ga̱jma̱a̱ bi̱ tsíkruigu̱u̱n.

5. Xú káʼnii gándoo magáwi̱i̱nʼ a̱jkiu̱lú kuʼñúún bi̱ tsédxawíín ga̱jma̱a̱ bi̱ tsíkruigu̱u̱n rá.

⁵ Jesús nigáwi̱i̱nʼ a̱jkiu̱u̱n kaʼñún xa̱bu̱ bi̱ guáʼdáá mbá nandii xóo xúʼko̱. Garmáʼáan a̱jkiu̱lú ajngáa dí nikunguanʼ maʼthúu̱n Juan bi̱ Nikumíinʼ iyááʼ xa̱bu̱: “Bi̱ tsíkruigu̱u̱n, nakrui̱gu̱u̱n. Bi̱ tsíyoo gágún, nandoo nagún, bi̱ guáʼdáá lepra naguma thanún, bi̱ tsédxawíín nandoo nudxuun. Bi̱ nikháñun nagabiín”. Ga̱jma̱a̱ índo̱ xa̱bu̱ ndiyáá milagro dí niʼni Jesús, ‹xúgíinʼ nini̱ mba̱a̱ Dios› (Luc. 7:20-22; 18:43). Ikháanʼ nduʼyaridáá Jesús, ni̱ndxu̱lú májáanʼ xa̱bu̱, nagáwi̱i̱nʼ a̱jkiu̱lú ga̱jma̱a̱ naʼngo̱o̱ a̱jkiu̱lú kuʼñúún bi̱ tsékruigu̱u̱n, tsédxuun o tséjmiin gágun. Gajkhun má, Jeobá na̱nguá nixnúlú tsiakii muʼni milagro. Mú nixnúlú mbá ñajunʼ dí muʼthúún ajngáa rí májánʼ bi̱ tsíkruigu̱u̱n ga̱jma̱a̱ tseniʼniiʼ Dios: Dí nánguá má mbayuuʼ marigá mbá ku̱ba̱ʼ mitsaanʼ náa xúgíinʼ xa̱bu̱ ni xáguáʼdáá nimbá nandii ga̱jma̱a̱ xúgíinʼ makuwá májánʼ gajmiún Dios (Luc. 4:18). Ajngáa rígi̱ naʼni dí mbaʼin xa̱bu̱ muni̱ mba̱a̱ Dios.

6. Xú káʼnii embáyulú capítulo 19 ndrígóo Levítico makru̱ʼu̱lú dí naʼthí náa Gu̱wa̱ʼ Kiʼtáñajunʼ rá.

⁶ Tikhuu versículo dí na̱ʼkha̱ náa capítulo 19 ndrígóo Levítico naʼthúlú itháan dí nambáyulúʼ makru̱ʼu̱lú dí naʼthí náa Gu̱wa̱ʼ Kiʼtáñajunʼ. Mbá xkri̱da, rí maʼni migiñuʼ xtángoo i̱ndó naʼthí: “Xátani kuʼwáʼ” (Éx. 20:15). Mbáa xa̱bu̱ ma̱ndoo mandxaʼwáminaʼ rí mu maʼnimbánuu  kiʼtáñajunʼ rígi̱ i̱ndó ndayóoʼ rí xáʼni kúwáʼ. Mú rígá i̱mba̱ xóo nuni̱ rígi̱.

7. Xú káʼni eʼni mbáa bi̱ nagujua̱ dí nanújngorámuuʼ kiʼtáñajunʼ dí migiñuʼ rá.

⁷ Mbáa bi̱ naʼtsingaa mbáa maʼthí dí ikhaa nditháan xáguánúu ga̱jma̱a̱ nimbá dí raʼkháa ndrígóo ikhaa. Lá naʼthí má xúʼko̱ dí gajkhun náa nagujua̱ xáʼ. Náa Levítico 19:35, 36, Jeobá niʼthí: “Xúni̱ dí ra̱májánʼ índo̱ gugiéwanʼ nguáthá mbaʼ, nguáthá kiwu̱u̱nʼ ga̱jma̱a̱ nguáthá mbaʼa. Gajmala balanza dí nagiéwan mbájmbu, dí nagiéwanʼ mbájmbu dí nijndoo ga̱jma̱a̱ dí nagiéwanʼ mbájmbu dí iyooʼ”. Mbáa bi̱ nagujua̱ naʼni kúwáʼ á mu najmuu balanza dí tsigiéwanʼ xóo gíʼmaa mu maʼninduwiinʼ xa̱bu̱ bi̱ nagún rutsi. Nakujmaa itháan kaʼwu rígi̱ náa i̱ʼwáʼ versículo dí na̱ʼkha̱ náa capítulo 19 ndrígóo Levítico.

8. a) Xú káʼnii nimbáñún judío dí na̱ʼkha̱ raʼthí náa Levítico 19:11-13 mu munimbaníí ikha dí nagájnuu náa migiñuʼ xtángoo rá. b) Xú káʼnii embáyulú ikháanʼ rá.

⁸ (Atraxnuu Levítico 19:11-13). * Levítico 19:11 nagi̱ʼdu̱u̱ naʼthí: “Ragíʼmaa muni kuʼwáʼ”. Ga̱jma̱a̱ náa versículo 13 naʼni mbríguii rí matani kuʼwáʼ ga̱jma̱a̱ rí matani nduwaʼ náa natagujua̱, índo̱ naʼthí: “Xúni̱ nduwaaʼ xa̱bu̱ numbaaʼ gajmiála”. Xtáa raʼni kúwáʼ mbáa á mu na̱nguá eʼthí dí gajkhun o na̱nguá eʼni xóo gíʼmaa náa nagujua̱ o náa nañajunʼ. Rí maʼni migiñuʼ xtángoo naʼthí dí ragíʼmaa miʼni kuʼwáʼ, mú dí na̱ʼkha̱ raʼthí náa Levítico nimbáñún judío makru̱ʼu̱u̱n munimbáníí ikha dí na̱ʼkha̱ náa xtángoo rúʼko̱. Májánʼ dí mundxaʼwáá edxu̱lúʼ xóo eʼyoo Jeobá rí muʼthá nduwaʼ o muʼni kuʼwáʼ. Guraximíjna̱: “Xó má naʼthí náa Levítico 19:11-13, lá rígá dí ndayóoʼ mariʼkuminaʼ xóo eni̱ náa nagujua̱ o náa nañajunʼ ráʼ”.

9. Xú káʼnii eñawu̱u̱n bi̱ nuñajunʼ xtángoo dí naʼthí náa Levítico 19:13 rá.

⁹ Rígá i̱mba̱ náa rí cristiano bi̱ gíʼdoo dí nagujua̱ gíʼmaa maʼthí dí gajkhun ga̱jma̱a̱ maʼni xóo gíʼmaa. Náa naguámbá Levítico 19:13 naʼthí: “Xáguanáʼ ga̱jma̱a̱ kañiʼ mbruʼun asndu i̱mba̱ néjtsuu mbújkho̱o̱ xa̱bu̱ bi̱ nañajunʼ”. Náa Israel, mbaʼin xa̱bu̱ nudu ga̱jma̱a̱ kúwá xa̱bu̱ bi̱ nuñajunʼ gajmiún eʼwíinʼ bi̱ nudaaʼ ikháá má mbiʼi rúʼko̱. Á mu bi̱ nañajunʼ na̱nguá eguma numáá mbiʼi rúʼko̱, na̱nguá gíʼdoo mbújkha̱a̱ maxnún dí muphu bi̱ kúwá náa goʼwóo mbiʼi rúʼko̱. Jeobá niʼthí: “Numuu rí ndayóoʼ ga̱jma̱a̱ ma̱ndoo maxtáa á mu nadaaʼ mbújkho̱o̱” (Deut. 24:14, 15; Mat. 20:8).

10. Ndiéjunʼ ikha ejmañuluʼ dí naʼthí náa Levítico 19:13 rá.

¹⁰ Rí mbiʼi xúgi̱ kúwá mbaʼiin wéñuuʼ xa̱bu̱ bi̱ nudaaʼ mbóó o a̱jma̱ nuthu dí mbá gu̱nʼ. Mú ikha dí na̱ʼkha̱ náa Levítico 19:13 gíʼdoo numuu xóó mbiʼi xúgi̱. Tikhun patrón nuni̱ gíníi bi̱ nuñajunʼ gajmiún numuu rí tséni numún xó má kaʼyoo. Nduyáá dí xa̱bu̱ buʼko̱ muñajunʼ má xúʼko̱ maski ajndu chíʼgíiʼ wéñuuʼ eni̱ numún. Patrón bi̱ ni̱ndxu̱ún xúʼko̱ naguanún “ga̱jma̱a̱ mbújkho̱o̱ bi̱ nañajunʼ”. Á mu mbáa cristiano gíʼdoo dí nagujua̱ ga̱jma̱a̱ kúwá bi̱ numbayíí, ndayóoʼ mbaʼyoo dí naʼnimbánuu ikha rígi̱. Guʼyáá i̱ʼwáʼ dí naʼsngúlú náa capítulo 19 ndrígóo Levítico.

11, 12. Ndiéjunʼ niʼthí dí nagájnuriyoʼ Jesús índo̱ niʼthí dí na̱ʼkha̱ náa Levítico 19:17, 18 rá.

¹¹ Jeobá raʼkháa i̱ndó naʼthúlú dí xúʼniu̱u̱n dí raʼkhí eʼwíinʼ. Naʼthúlú kaʼwu ndiéjunʼ gíʼmaa mu̱ʼni̱ náa Levítico 19:17, 18 (atraxnuu). * Ikhí naʼthí: “Gíʼmaa maʼndaaʼ xtayáá xa̱bu̱ numbaaʼ ga̱jma̱a̱ʼ xó má eyaʼ xtayaminaʼ ikháán”. Rígi̱ gíʼdoo  wéñuuʼ numuu maʼni mbáa cristiano bi̱ nandoo maʼni rí nanigu̱u̱ʼ Dios.

¹² Guʼyáá xóo niʼthí Jesús dí gíʼdoo numuu kiʼtáñajunʼ rí naʼthí náa Levítico 19:18. Mbá miʼtsú mbáa fariseo niraxu̱u̱: “Náa mbiʼyaa kiʼtáñajunʼ rí itháan gíʼdoo numuu rí na̱ʼkha̱ náa Xtángoo rá.” Jesús niriʼña̱a̱ “timbá kiʼtáñajunʼ rí itháan gíʼdoo numuu” nindxu̱u̱ rí maʼndulú kuʼyáá Jeobá ga̱jma̱a̱ xúgíʼ a̱jkiu̱lú, ga̱jma̱a̱ xúgíʼ xóo nindxulú ga̱jma̱a̱ xúgíʼ ku̱ma̱ ndrígúlú. Nda̱wa̱á niʼthí dí naʼthí náa Levítico 19:18: “Rí maʼni a̱jma̱ nambríguii ga̱jma̱a̱ rígi̱, naʼthí: ‹Gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán›” (Mat. 22:35-40). Rígá mbaʼa wéñuʼ xóo musngajmá dí nandulú kuʼñúún xa̱bu̱ numbaaʼ gajmiúlú, mú capítulo 19 ndrígóo Levítico nambáyulú mbuʼyáá tikhuu dí ikhaa.

13. Xú káʼnii niʼnimbánuu José ajngáa rí na̱ʼkha̱ náa Levítico 19:18 rá.

¹³ Mbá rí xóo ma̱ndoo musngajmá rí nandulú kuʼñúún xa̱bu̱ numbaaʼ gajmiúlú nindxu̱u̱ rí muʼnimbáníí dí naʼthí náa Levítico 19:18: “Ragíʼmaa matangaán matani̱i̱ xó má niʼniaʼ ragíʼmaa makiʼnán xtañún xa̱bu̱ bi̱ kuwa náa xuajñanʼ”. Mbáa xúgiáanʼ nuniʼníiʼ mbáa xa̱bu̱ bi̱ niyéxi̱ sia̱nʼ kaʼyoo mbayuuʼ tsiguʼ mbáa bi̱ niñajunʼ ga̱jma̱a̱ʼ o bi̱ na̱jkha̱ ga̱jma̱a̱ʼ escuela, o mbáa bi̱ kaʼyoo. Garmáʼáan a̱jkiu̱lú dí mbá gu̱wi̱nʼ a̱ngui̱i̱n José ra̱ʼkhá tháán nikiʼníin kuyáá rí asndu nigujua̱a̱ (Gén. 37:2-8, 25-28). Mú ikhaa na̱nguá nitanga̱a̱ maʼniún dí raʼkhí xó má nini̱i̱ ikhaa. Índo̱ nigiʼdoo mbá ñajunʼ mba̱a̱ ga̱jma̱a̱ nirígá xóo ma̱ndoo maʼniún dí raʼkhí xó má nini̱i̱ ikhaa, táʼni xúʼko̱, ikhaa niʼni mba̱a̱ a̱jkiu̱u̱n kaʼñún. Táyexi̱ sia̱nʼ kaʼñún, niʼni xó má nigumaraʼmáʼ nda̱wa̱á náa Levítico 19:18 (Gén. 50:19-21).

14. Náá numuu nduʼyáá rí kaʼníí gíʼdoo numuu rí mbiʼi xúgi̱ ajngáa rí na̱ʼkha̱ náa Levítico 19:18 rá.

¹⁴ Cristiano bi̱ nandoo maʼni rí nanigu̱u̱ʼ Dios, gíʼmaa mbaʼyáridoo José ga̱jma̱a̱ maʼni mba̱a̱ a̱jkiu̱u̱n kaʼyoo bi̱ niʼniuu dí raʼkhí, raʼkháa dí mayéxi̱ sia̱nʼ o rí maʼniuu xó má niʼniuu. Rígi̱ nambríguii ga̱jma̱a̱ mbá oración dí niniñuuʼ xóo xkri̱da Jesús, náa naʼthí dí gíʼmaa muʼni mba̱a̱ a̱jkiu̱lú kuʼñúún bi̱ nikiéʼkún ga̱jma̱á ni̱ndxu̱lú (Mat. 6:9, 12). Xúʼko̱ má ma̱ngaa, apóstol Pablo niʼthúún ajngáa rígi̱ cristiano: “Xútangáanʼ muni̱i̱ xó má niʼniala” (Rom. 12:19). Ga̱jma̱a̱ niʼthún: “Gaʼngo̱o̱ a̱jkia̱la ga̱jma̱a̱ guni  mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼka ga̱jma̱a̱ numuu i̱mba̱a̱” (Col. 3:13). Ikha ndrígóo Jeobá na̱nguá xtiʼkhuu. Rí mbiʼi xúgi̱ kaʼníí gíʼdoo numuu ikha rí nagájnuu náa xtángoo dí na̱ʼkha̱ náa Levítico 19:18.

15. Xkáʼnii xkri̱da nambáyulúʼ makru̱ʼu̱lú dí gíʼdoo wéñuʼ numuu mu̱ʼni̱ mba̱a̱ a̱jkiu̱lú ga̱jma̱a̱ mambumulú rá.

¹⁵ Rí muni̱ gawúnlú eʼwíinʼ nindxu̱u̱ xóo rí muthíín: Tikhuu nuthu chíʼgíiʼ ga̱jma̱a̱ tikhuu nuthu mba̱a̱. Mbá xkri̱da, nguáná índo̱ nurmbáʼtáá mbá sobre nuthu chíʼgíiʼ a̱ʼdióo ñawúnlú. Na̱ʼkhu̱ índo̱ núkhu ethu, mú tséjyúu má eʼni asndu nambumulú náá nithu. Xúʼko̱ kayuuʼ, mbáa nguáná bi̱ nambáxulúʼ gajmiúlú naʼthí o naʼni mbá rí naʼni gawúnlú, mú mbáa naʼni mingíjyúuʼ mu̱ʼni̱ mba̱a̱ a̱jkiu̱lú kuʼyáá. Ma̱ngaa á mu mba̱a̱ náa nuthu, mbáa ndayóoʼ dí mbáa médico maʼxmíi ga̱jma̱a̱ mambróʼoo venda. Á mu nuru̱ʼgua̱ má xúʼko̱ náa nithu, ikháanʼ má gúʼni̱ dí magawúnlú itháan náa nithu. Xúʼko̱ má kayuuʼ gáʼni ma̱ngaa á mu mbáa nagawúunʼ wéñuuʼ dí niʼni o niʼthí mbáa. Á mu na̱nguá eniñuuʼ randxaʼwáminaʼ rí xóo niʼni gawúunʼ, ikhaa má gáʼni gawúminaʼ itháan ga̱jma̱a̱ numuu sia̱nʼ dí gíʼdoo. Ikha jngóo itháan májánʼ rí muʼnimbáníí ikha dí naʼthí náa Levítico 19:18.

16. Xó má naʼthí náa Levítico 19:33, 34, xú káʼnii gíʼmaa muniu̱u̱n bi̱ naguwáʼ i̱mba̱ níʼkhá israelita, ga̱jma̱a̱ ndiéjunʼ ejmañuluʼ ikháanʼ rá.

¹⁶ Índo̱ Jeobá niʼtáñajúúnʼ bi̱ israelita rí maʼndún kuñún xa̱bu̱ numbaaʼ gajmiún, na̱nguá nindoo gáʼthi dí maʼndún kuñún i̱ndó xa̱bu̱ bi̱ naguwáʼ náa xuajñún ikhiin. Ma̱ngaa niʼthí dí gíʼmaa maʼndún kuñúún xa̱bu̱ bi̱ naguwáʼ i̱mba̱ níʼkhá bi̱ kúwá náa majñúnʼ ikhiin. Naʼthí kaʼwu rúʼko̱ náa Levítico 19:33, 34 (atraxnuu). * Gíʼmaa mbuyáá mbáa bi̱ na̱ʼkha̱ i̱mba̱ níʼkhá ‹xóo bi̱ xuajñuu náa xuajñún› ga̱jma̱a̱ maʼndún kuñúún xó má eñún kuyamijná ikhiin. Mbá xkri̱da, ndiyóoʼ muniña̱a̱ʼ rí bi̱ naguwáʼ i̱mba̱ níʼkhá ga̱jma̱a̱ xa̱bu̱ gíníi murajxi̱i̱ dí napídúúnʼ rí nijma̱a̱ nini̱ (Lev. 19:9, 10). Ikháanʼlu ma̱ngaa rí mbiʼi xúgi̱ gíʼmaa muʼnimbáníí kiʼtáñajunʼ dí maʼndulú kuʼñúún bi̱ naguwáʼ i̱mba̱ níʼkhá (Luc. 10:30-37). Xkáʼnii rá. Náa numbaaʼ dí kuwáánʼ, kúwá mbaʼiin wéñuuʼ xa̱bu̱ bi̱ naguwáʼ i̱mba̱ níʼkhá xuajin, mbáa tikhun dí ikhiin kúwá náa mijngii kuwáánʼ. Gíʼdoo wéñuuʼ numuu dí muʼniu̱u̱n  dí májánʼ ga̱jma̱a̱ maguaʼdáá gamajkulú náa xa̱bekha, gu̱ʼu̱ ga̱jma̱a̱ i̱ji̱n bugi̱.

17, 18. a) Ndiéjunʼ exkajxáanʼ muʼni dí naʼthí náa Levítico 19:2 ga̱jma̱a̱ 1 Pedro 1:15 rá. b) Ndiéjunʼ nindxu̱u̱ mbá ñajunʼ dí gíʼdoo wéñuʼ numuu mu̱ʼni̱ dí niʼthí apóstol Pedro rá.

¹⁷ Xó má náa Levítico 19:2 ga̱jma̱a̱ 1 Pedro 1:15 naʼthí dí xa̱bi̱i̱ Dios gíʼmaa mani̱ndxu̱ún mikaʼwiin. Náa capítulo 19 ndrígóo Levítico rígá i̱ʼwáʼ versículo dí nambáyulúʼ mbuʼyáá ndiéjunʼ gíʼmaa muʼni mu manigu̱u̱ʼ Jeobá. Ndiʼyáá tikhuu versículo dí nasngájmulú ndiéjunʼ gíʼmaa mu̱ʼni̱ ga̱jma̱a̱ ragíʼmaa mu̱ʼni̱. * Ga̱jma̱a̱ ndiʼyáá dí náa Escrituras Griegas naʼthí dí ikha rúʼko̱ ndayóoʼ muʼnimbaníí xóó rí mbiʼi xúgi̱. Mú apóstol Pedro niʼthí xóo itháan.

¹⁸ Bi̱ ni̱ndxu̱lú cristiano mbaʼa ñajunʼ rí nu̱ʼni̱ ga̱jma̱a̱ numuu Dios ga̱jma̱a̱ nu̱ʼni̱ mbaʼa ñajunʼ dí májánʼ. Mú Pedro niʼthí mbá rí gíʼdoo numuu. Nákha xóó tséʼthi dí gíʼmaa mani̱ndxu̱u̱ kaʼwu xúgíʼ dí gúʼni̱, niʼthí: “Gundxaʼwa̱a̱ májánʼ edxa̱la dí mu̱ni̱” (1 Ped. 1:13, 15). Ndiéjuunʼ nindoo gáʼthí xá. Ikhaa niʼthí rí a̱ngui̱i̱n Cristo bi̱ kaxtaʼwíin mutariya̱ʼ náa xúgíʼ numbaaʼ rí májánʼ wéñuʼ a̱jkiu̱u̱n bi̱ niraʼwíin (1 Ped. 2:9). Mbiʼi xúgi̱, bi̱ ni̱ndxu̱lú cristiano kajkuáa ñawúnlú mu̱ʼni̱ ñajunʼ rígi̱ dí gíʼdoo wéñuuʼ numuu, mbá rí itháan nambáñun xa̱bu̱. Ni̱ndxu̱u̱ mbá ñajunʼ kiejuunʼ dí kuaʼdáá xúgiáánʼ náa xuajñuu Dios bi̱ nindxu̱u̱ kaʼwii, dí muʼtáraʼa ga̱jma̱a̱ muʼsngáa xúgíʼ mbiʼi ga̱jma̱a̱ gagi (Mar. 13:10). Guʼnimijna muʼnimbáníí ikha dí nuxkamaa náa Levítico 19. Xúʼko̱ gusngajmá dí nandulú kuʼyáá Dios ndrígúlú ga̱jma̱a̱ xa̱bu̱ numbaaʼ gajmiúlú ma̱ngaa rí nandulú manindxu̱lú mikaʼwáánʼ náa xúgíʼ dí gúʼni̱.