1, 2. a) ¿Ambechi jorhenguarhiski máteru jorhenguarhikua jimbo? b) ¿Ambechi exeni jaua ini jorhenguarhikua jimbo?

MÁTERU jorhenguarhikua jimbochi exeaska konsejuechani máru engaksï Levítico 19 jimbo jaka. Pori ejemplu, bersikulu 3 jimbochi exeska eska Tata Diosï Jeoba arhiaspka israelitechani eskaksï janhanharhiapiringa imeecheri taatichani. Ka ístuchi exeska eskachi iásïjtu uaaka ísï úni engachi jarhuataaska juchaari taatichani imani ambe jingoni engaksï uétarhinchaaka ka paraksï sési jarhani Tata Diosï jingoni. Ima mismu bersikulu jimbo, Tata Diosï miátantaspti imeeri iretani para no ánchikuarhini sábadu jurhiatikua. Ka nájkirukachi jucha no jatsika para chúngumani indeni leini, jorhenguarhiskachi eskachi jatsiska para arhutani tiempu para Tata Diosïni marhuakuni. Engachi ísï úska xarhatani jauakachi eskachi jánguarhintaxaka parachi pímbinhasïini ísï eska na uandajka Levítico 19:2 ka 1 Pedru 1:15.

² Ini jorhenguarhikua jimbo, seguirini jauakachi jorhenguarhini Levítico kapitulu 19. ¿Nénajtsïni jarhuataa i kapitulu sési kaani imeechani engaksï nóteru újkia uánikua ambe úni? Parachi jurhimbitku úni ambe ma negosiuecharhu ka xénchaani máteruechani, ju je exeni ambe engachi uaaka jorhenguarhini parachi májkueni pímbinhasïini eska Tata Diosï.

3, 4. Eska na arhijka Levítico 19:14 jimbo, ¿israelitechaksï néna jatsipirini paraksï kaani kándichani ka sieguechani?

³ (Arhinta je Levítico 19:14). Tata Diosï Jeoba uékasïreendi eskaksï imeecha engaksï imeeri marhuarichepka sési kaapiringa  imeechani engaksï nóteru ueengia uánikua ambe úni. Pori ejemplu, arhiaspti israelitechani eskaksï no no sési arhipiringa kándini ma o arhinksï eska no sési úkuarhinchapiringa. ¡Inde ambe kánikua no sési japirindi! Jimboka no kurhaani japiringa ambe engaksï arhini japiringa, no úpirindi kuájpikuarhini.

⁴ Ístu, bersikulu 14 jimbo exesïngachi eska Tata Diosï arhispka imeeri iretani eska no jatsipiringa para peerani “ambe ma siegueri orhepani jimbo”. Libru ma ari ambe uandasïndi ima kʼuiripuecheri engaksï uánikua ambe nóteru újkia úni: “Jini ireta Israelisï, kʼuiripuechaksï fásili exeasïreendi ka no sésiksï kaasïreendi”. Nema úpirindi ambe ma jatsini siegueri orhepani jimbo para ima kuarhatseni o paraksï teresmarhuni. ¡Xáni no sési! Joperu ambe enga Tata Diosï Jeoba uandapka Levítico 19:14 jimbo, jarhuataspti imeeri iretani para pʼamojperakua jingoni kaani imeechani engaksï uánikua ambe nóteru ueengia úni.

5. ¿Nénachi uaa pʼamojperakua jingoni kaani imeechani engaksï nóteru újkia uánikua ambe úni?

⁵ Jesúsi pʼamojperakua jingoni kaaspti imeechani engaksï uánikua ambe nóteru ueengia úni. Ju je miáni ambe enga uandakua axakupka Juanuni enga itsï atauenga kʼuiripuechani, arhispti: ‘Sieguechaksï éskataranhantaxati, ka imeecha engaksï no ueenga xanharani, úsïngaksïa xanharani, ka ístu imeecha engaksï lepra pʼamenchenga, ambakeranhantaxati, ka imeecha engaksï no ueenga kurhandini, úsïngaksïa kurhandini, ka uarhiricha tambientu tsítanhantaxati’. Ka engaksï exeapka Jesúsiri milagruechani, “iámindu kʼuiripu [...] úndaspti kʼéri ambe arhini Diosïni” (Luk. 7:20-22; 18:43). Kristianuechachi tsípikua jingoni ísï úsïnga eska Jesúsi ka sésichi kaasïnga ka pʼamojkuani imeechani engaksï uánikua ambe nóteru újkia úni. Ísïisti eskajtsïni Tata Diosï Jeoba no íntskuska uinhapikua parachi milagruechani uáni, perujtsïni íntskusti sésikua parachi ambakiti ambe aianguani imeechani engaksï siegueka ka engaksï no ma ambe míteka Tata Diosïri ambe, arhiani: eska nóteru ióni jimbo jauaka paraisu ma nani enga nóteru nema pʼamenchakia ka engaksï uaaka sési pájperani Tata Diosï jingoni (Luk. 4:18). I ambakiti aianhperakua úxati eskaksï uánikuecha kʼéri ambe arhiaka Tata Diosïni.

6. ¿Nénajtsïni jarhuatasïni Levítico kapitulu 19 kurhanguni ambe engaksï uandeenga Diesi Mandamientuecha?

⁶ Máru bersikuluecha Levítico kapitulu 19 jimbo aiangusïndijtsïni sánderu ambe parachi úni kurhanguni ambe engaksï uandeenga Diesi Mandamientuecha. Pori ejemplu, mandamientu ochu uandasïreendi: “Asï sïpa” (Éx. 20:15). Nema úpirindi kurhanguni eska para kurhajchani ini mandamientuni solu uétarhisïreenga no méni pʼikutspini ambe ma, peru úpirindi ménderueni sïpani jarhani.

7. ¿Néna úpirini komersianti ma no ísï úni eska mandamientu ochu na uandeenga?

⁷ Komersianti ma úpirindi uandani eska seguru jarhaspka eska no méni pakatakuarhixapka ambe ma enga no imeeri ambeepiringa. Peru ¿méntkisï jurhimbikua jingoni jámasïreeni imeeri negosiurhu? Levítico 19:35, 36 jimbo, Tata Diosï Jeoba uandaspti: “Asï jáma je no sési tsʼeritani na enga xáni ióskaaka, kʼuetsapeni o na enga xáni kánikueuaka. Imani baskulechani úraa je engaksï sési tsʼeritaaka, pesechani engaksï sési jauaka, ma tsʼeritarakua enga sési jauaka para imani ambe enga kʼarhiri ambeeka ka máteru tsʼeritarakua enga sési jauaka para ima ambe enga likidueuaka”. Enga komersianti ma úrenga baskulechani ka pesechani engaksï no sési tsʼeritenga para enganiarpini, sïpani japirindi. Sánderuchi sési kurhanguaka íri ambe engachi exeauaka máteru bersikuluechani engaksï Levítico kapitulu 19 jimbo jaka.

8. ¿Néna jarhuataasïreeni Levítico 19:11-13 judiuechani parakaksï ísï úpiringa eska na uandeenga mandamientu ochu, ka nénajtsïni jarhuatasïni juchantsïni?

⁸ (Arhinta je Levítico 19:11-13). Levítico 19:11 ísï ueenasïndi uandani: “Asï sïpa je”. Ka bersikulu 13 uandasïndi eska sïpani ístu jindeeska no jurhimbitku jámani negosiuecharhu, jimboka jimini uandasïnga: “Asï sïpaku máteruni”. Ísï jimbo, enga nema no jurhimbikua jingoni jámaska negosiuecharhu, sïpani jauati. Mandamientu ochu juramusïreendi eska ma no sïpapiringa, joperu ambe enga Levítico uandaenga jarhuataasïreendi judiuechani parakaksï kurhangupiringa na engaksï jatsipiringa para ísï úni eska i lei na arhikuekeenga. Sési japirindi eskachi eratsentaaka na enga exejka Tata Diosï Jeoba enga nema no jurhimbikua jingoni újka ambe ma o enga sïpajka. Ju je kurhamarhikuarhini: “Indeni ambe jimbo enga Levítico 19:11-13 uandajka, ¿sési japirini eskani mójtakupiringa na engani uaajka negosiuechani ka na engani ánchikuarhijka?”.

9. ¿Néna kuájchakuasïreeni ánchikuarhirichani lei enga Levítico 19:13 jimbo jaka?

⁹ Ístu jarhasti máteru ambe enga jatsika para úni kristianu ma enga negosiu ma jatsika. Levítico 19:13 ísï kʼamarasïndi: “Asï pakata asta pauandikua jamberi sentabuni enga ánchikuarhiri ma andaka”. Ireta Israeli jimbo, sáno iáminduechaksï tarherispti ka imeecha engaksï ánchikuarhitspienga mándani jurhiatikuaksï maiamunhasïreendi engaksï na kʼamarengia ánchikuarhini. Enga ma ánchikuarhiri no maiamunheenga enga na kʼamarengia imeeri ánchikuarhitani, no jatsisïreendi sentabu para tʼirerani imeeri familiani ima jurhiatikua jimbo. Tata Diosï Jeoba uandaspti: “Uétarhinchaxati ka uétarhinchasïndi sentabuni para seguirini irekani” (Deut. 24:14, 15; Mat. 20:8).

10. ¿Ambejtsïni jorhendasïni Levítico 19:13?

¹⁰ Ini jurhiatikuechani jimbo, uánikua kʼuiripuechaksï no maiamunhasïndi pauani pauani, sino mándani kutsï o tsimandani semana jimbo. Peru i ambe enga uandajka Levítico 19:13 útasï marhuasïndi iásï jamberi. Máru engaksï ánchikuarhirichani kaajka nóksï xáni maiamuasïndi. Mítestiksï eskaksï inde kʼuiripuecha seguirini jauaka ánchikuarhini jimbokaksï uétarhinchasïnga nájkirukaksï sántku andaaka. Ísï úparini, pakatani jarhasïndiksï “sentabuni enga ánchikuarhiri andajka”. Enga kristianu ma kaajka ánchikuarhirichani imeeri negosiurhu, jatsisti para  jánguarhintani ísï úni eska i juramukua na uandajka. Ju je exeni ambe máteru ambejtsïni jorhendasïni Levítico kapitulu 19.

11, 12. ¿Ambe uandaspi Jesúsi eska jukaparhakua ambeeska enga uandapka ambe enga arhijka Levítico 19:17, 18?

¹¹ Tata Diosï Jeoba no solujtsïni arhisïndi eskachi no no sési úkuauaka máteruechani. I ambesï arhijti Levítico 19:17, 18 jimbo (arhinta je). Jimintsïni juramuchisïndi: “Xéncha máteru kʼuiripuni ísï eskari tʼu mismu na xénchakuarhijka”. Ima enga uéjka Tata Diosïni jaiapanherantani jatsisti para ísï úni.

¹² Ju je exeni ambe enga Jesúsi uandapka na enga xáni jukaparhakueka ambe enga uandajka Levítico 19:18. Ma xanhari fariseu ma kurhamarhispti: “¿Nákiski sánderu kʼéri mandamientu Leiri?”. Jesúsi arhispti “i jindeesti primeru mandamientu ka enga sánderu kʼéri ambeeka” xénchani Tata Diosï Jeobani iámindu mintsita jingoni, iámindu alma jingoni ka iámindu eratsekua jingoni. Ka tátsekua arhispti ambe enga uandajka Levítico 19:18: “Ka ístu máteru sáno májkueni jásï terukuntasïndi enga arhijka: ‘Uékaakari máteruni eska tʼujkumindu na uékakuarhijka’” (Mat. 22:35-40). Uánikua ambe jimbochi uaaka xarhatakuani máteruechani eskachi xénchaasïnga, joperu ambe enga arhijka Levítico kapitulu 19 jarhuatasïndijtsïni exeni nénachi uaa ísï úni.

13. ¿Néna ísï úspi José ambe enga uandajka Levítico 19:18 jimbo?

¹³ Uaakachi xénchperakua xarhatakuani máteruechani engachi ísï úska eska na arhijka Levítico 19:18: “Asï no sési úkuantaa chiiti iretarhu anapu uájpeechani nijtu jatanhekuani”. Sáno iáminduechachi míteska nemani enga jatanhekuka ánchikuarhitarhu anapu kompanieruni ma, o eskuelarhu anapuni ma, o familiarini ma, ménichani asta uánikua uéxurhini. Ju je miáni eskaksï Joséri 10 mediu ermanuecha jatanhekuspka ka inde ambe úspti eskaksï kánikua no sési ambe úkupiringa (Gén. 37:2-8, 25-28). Peru ima no májkueni ambe úkuantaspti. Enga juramukua jatsipkia úpirindi bengarikuarhini, peru no ísï úspti, sánderu sési pʼamojperakua xarhatakuaspti. Enbesi de jatanhekuani úspti ambe enga sánderu tátsekua karanhapka Levítico 19:18 jimbo (Gén. 50:19-21).

14. ¿Andichisï míti eskaksï prinsipiuecha enga Levítico 19:18 pʼitakata jaka útasïksï marhuasïnga iásï jamberi?

 ¹⁴ Ima kristianu enga uéjka jaiapanherantani Tata Diosïni, jatsisti para ísï úni eska José na úpka ka puátspentani ka no jámani jatanhetspini ni bengarikuarhini. I ambe sési terukuntasïndi padrenuestruni jingoni, nani enga Jesúsi uandapka eskachi jatsiska para puákuantani imeechani engajtsïni no sési úchika (Mat. 6:9, 12). Ístu, apostoli Pablu arhiaspti kristianuechani: “Asï jáma je maiamukuarhintani” (Rom. 12:19). Ka ístu arhiaspti: “Tekaatsperanta je ka puátsperantani enga nema jatsika arhijperakua máteruni jingoni” (Kol. 3:13). Tata Diosï Jeobaeri prinsipiuechaksï no mójtakurhisïndi. Útasïksï marhuasïndi inde prinsipiuecha enga pʼitakata jaka Lei enga Levítico 19:18 jimbo jaka.

15. ¿Náki ejemplujtsïni jarhuatasïni kurhanguni na enga xáni jukaparhakueka puátspentani?

¹⁵ Pori ejemplu, no sési pʼikuarhenhini ísïisti eska atakuarhini: ménichanisï sántkuesïndi ka ménichanisï kániini. Úpiringachi sántku uarhojkuni engachi sobreni ma mítani japiringa. Jamberi ueenani jámani kánikua pʼamepirindi, joperu no ióni jimbo, ambajkurhantanchia ka nóteruchi jamberi miáni nanichisï uarhojkupi. Májkueni, juchaari amigu ma úpirindi úni o uandani ambe ma engajtsïni no sési pʼikuastapiringa ka jamberichi no xáni úkua jukanchapiringa puákuntani. Joperu engachi kánikua uarojkupiringa, jamberi doktorijtsïni jatsipirindi para sïrimachintani ka irijkuni. Engachi méntku pʼajkuni japiringa ka pʼenomani, nóchi jurajkuni japiringa eska nimaaka. Sáno májkueni ambe úpirindi úni ima enga kánikua ikiani japiringa. Enga méntku miáni japiringa ambe enga úminhaka ka na enga xáni no sési pʼikuarherapka, jandiajku no sési úkuarhini japirindi. Ísï jimbo, sánderu sésisti úni ambe enga Levítico 19:18 arhijka.

16. Eska na uandajka Levítico 19:33, 34, ¿israelitechaksï néna jatsispi para kaani uérakua anapuechani, ka ambechi jorhenguarhisïni íri ambe?

¹⁶ Enga Tata Diosï Jeoba juramukuapka israelitechani eskaksï xénchaapiringa máteruechani, no arhikuekaxapti solu xénchaani imeechani engaksï israelitepka. Sino ístu arhiaspti eskaksï xénchaapiringa máteru nanisï anapuechani engaksï jima mismu irekani japka. Ísï uandasïndi Levítico 19:33, 34 (arhinta je). Uérakua anapunksï ma jatsipirindi para ísï exeni “eska imani paisi anapuni ma” ka xénchani ísï eskaksï imajkumindu na xénchakuarhienga. Pori ejemplu, jatsisptiksï para jurajkuani uérakua anapuechani ka pobrichani parakaksï úksïmapiringa ambe engaksï pʼikuntapiringa (Lev. 19:9, 10). Kristianuechajtuksï jatsisti para ísï úni ka xénchaani  uérakisï anapuechani (Luk. 10:30-37). ¿Néna? Parhakpinirhu, uánikua kʼuiripuechaksï jarhasti engaksï mótseka paraksï máteru paisi jimbo irekani ka máruksï jamberi jimeesïsï irekani jati engachi jucha irekaka. Jatsiskachi para sési kaani ini kʼuiripuechani ka respetu jingoni.

17, 18. a) ¿Ambejtsïni pʼímarhisïni úni Levítico 19:2 ka 1 Pedru 1:15? b) ¿Ambe ambakiti ánchikuarhita uandaspi apostoli Pedru eskachi jatsiska para úni?

¹⁷ Levítico 19:2 jimbo ka ístu 1 Pedru 1:15 uandasïndi eskaksï Tata Diosïri marhuaricha jatsiska para pímbinhasïini. Levítico kapitulu 19 jimbo uánikua máteru bersikuluechaksï jarhasti engajtsïni jarhuatajka exeni ambe engachi uaaka úni parachi jaiapanherantani Tata Diosï Jeobani. Exeaskachi máru bersikuluechani engajtsïni xarhatachika máru ambe engachi jatsika para úni ka máru ambe engachi no jatsika para úni. * Ka exeskachi eskaksï Karakata Griegaecha xarhatasïnga eskaksï i prinsipiuecha seguirixaka marhuani iásï jamberi. Peru apostoli Pedru uandasïndi sánderu ambe.

¹⁸ Kristianuechachi uánikua ambe úsïnga para Tata Diosïni marhuakuni ka jarhuataasïngachi máteruechantu. Peru Pedru máechakueri ambe uandaspti. Ante dejtsïni pʼímarhini parachi pímbinhasïini, uandaspti: “Jingontku ja je, ka miákua juka je” (1 Ped. 1:13 Táta Diósïri Uandakua Tata Jesukristueri Aiatsperakua; 1: 15). ¿Ambe arhikuekaxapti? Ima uandaspti eskaksï Kristueri ermanuecha engaksï erakukateka, iápurisï uandantapirindi na enga xáni kʼéri ambeeka ima enga erakuapka (1 Ped. 2:9). Ini jurhiatikuechani jimbo, iámindu kristianuechachi kʼéri kóntperata ma jatsiska para úni ini xáni ambakiti ánchikuarhitani enga sánderu marhuakuajka kʼuiripuechani. Xáni kʼéri kóntperata ma enga jatsika Tata Diosïri ireta enga pímbinhasïika para tsípikua jingoni ka no kuatantaparini aianhpini ka jorhentpini (Mar. 13:10). Jimajkani ju je jánguarhintani ísï úni eskaksï prinsipiuecha na uandajka engaksï Levítico kapitulu 19 jimbo jaka. Ísïchi xarhatani jauaka eskachi xénchasïnga juchaari Tata Diosïni ka ístu máteru kʼuiripuechani, ka eskachi uékasïnga pímbinhasïini iámindu ambe jimbo.