1-2. Kasi tikasambira vichi mu nkhani iyo yajumpha, ndipo tisambirenge vichi mu nkhani iyi?

MU NKHANI iyo yajumpha, tikasambira ulongozgi wakovwira uwo uli mu Levitiko chaputara 19. Mwachiyelezgero, mu vesi 3, Yehova wakaphalira Ŵaisrayeli kuti ŵakeneranga kuchindika ŵapapi ŵawo. Tikasambira umo tingalondezgera ulongozgi uwu mazuŵa ghano. Tikawona kuti tikwenera kupwelelera ŵapapi ŵithu mwakuthupi, umo ŵakujipulikira, kweniso mwauzimu. Mu vesi lenelili, tikasambiraso kuti Chiuta wakaphalira Ŵaisrayeli kuti ŵakwenera kusunga Sabata. Tikasambira kuti nangauli mazuŵa ghano tikulondezga dango la kusunga Sabata yayi, kweni tingalondezga fundo yake para nyengo zose tikupatura nyengo yakuchitira vinthu vyauzimu. Para tichitenge nthena, tilongorenge kuti tikuyezgayezga kuti tiŵe ŵatuŵa nga umo malemba gha Levitiko 19:2 na 1 Petrosi 1:15 ghakuyowoyera.

² Mu nkhani iyi, tidumbiskanengeso mavesi ghanyake gha mu Levitiko chaputara 19. Kasi chaputara ichi chikutisambizga vichi pa nkhani ya kulongora lusungu ŵanthu awo ŵali na masuzgo ghanyake mu thupi, kuchita vinthu mwaunenesko para tikuchita bizinesi, kweniso kutemwa ŵanthu? Tikwenera kuŵa ŵatuŵa pakuti Chiuta ni mutuŵa, ntheura tiyeni tiwone ivyo tingasambirako.

3-4. Kuyana na Levitiko 19:14, kasi ŵanthu ŵakumangwa na ŵachibulumutira ŵakeneranga kuchita nawo wuli?

³ Ŵazgani Levitiko 19:14. Yehova wakukhumba kuti ŵanthu ŵake ŵachitirenge lusungu ŵanthu awo ŵali na masuzgo ghanyake mu thupi. Mwachiyelezgero, wakaphalira Ŵaisrayeli kuti ŵaleke kutemba  munthu uyo ngwakumangwa panji kuti wali na suzgo la kupulika. Munthu wakatembanga munyake mwakumofya panji kuyowoya vinthu viheni kuti vimuchitikire. Kuchita nthena kukaŵa kuheni chomene kwa munthu wakumangwa. Wakatondekanga kujivikilira chifukwa chakuti wakapulikanga yayi ivyo munthu wakamutembanga.

⁴ Kweniso mu vesi 14 tikusambira kuti Chiuta wakaphalira ŵateŵeti ŵake kuti ŵaleke “kuŵika chinthu panthazi pa munthu wachibulumutira kuti wakhuŵaremo.” Buku linyake ilo likuyowoyapo za ŵanthu awo ŵali na masuzgo ghanyake mu thupi likuti: “Mu nyengo yakale, ku Middle East, kanandi ŵanthu ŵakalyeranga masuku pa mutu ŵanyawo na kuŵachitira nkhaza.” Ndipo nyengo zinyake munthu wambura lusungu wakaŵikanga chinthu kunthazi kwa munthu wachibulumutira kuti wakhuŵaremo na chilato chakuti wajipweteke panji ŵamuseke waka. Izi zikaŵa nkhaza zikuru chomene. Dango la mu vesi 14 ili, likawovwiranga ŵanthu ŵa Yehova kumanya kuti ŵakwenera kuchitira chiwuravi ŵanthu awo ŵali na masuzgo ghanyake mu thupi.

5. Kasi tingalongora wuli chiwuravi ku ŵanthu awo ŵali na masuzgo ghanyake mu thupi?

⁵ Yesu wakachitiranga chiwuravi ŵanthu awo ŵakaŵa na masuzgo ghanyake mu thupi. Kumbukani uthenga uwo wakatuma kwa Yohane Mubatizi, iyo wakati: “Ŵachibulumutira ŵakuwona, ŵakupendera ŵakwenda, ŵavyoni ŵakutozgeka, ŵakumangwa makutu ŵakupulika, [ndipo] ŵakufwa ŵakuwuskika.” Ŵanthu wose ŵakati ŵawona minthondwe iyo Yesu wakachitanga, “ŵakalumba Chiuta.” (Luka 7:20-22; 18:43) Ŵakhristu ŵakwenera kuyezga Yesu na kulongora chiwuravi ŵanthu awo ŵali na masuzgo mu thupi. Ntheura tikuŵalongora lusungu, kuŵaghanaghanira, kweniso tikuzikira nawo pakuchita vinthu. Mbunenesko kuti Yehova wandatipe nkhongono zakuchitira minthondwe. Kweni tili na mwaŵi wakuphalirako ŵanthu awo ŵali nadi na suzgo la kulaŵiska, panji awo mbachibulumutira mwauzimu uthenga uwemi wakuyowoya za charu chiwemi cha paradiso, umo waliyose wazamuŵa na umoyo uwemi, kweniso kuŵa paubwezi wakukhora na Chiuta. (Luka 4:18) Nakuti uthenga uwemi uwu ukovwira kale ŵanthu ŵanandi kulumba Chiuta.

6. Kasi lemba la Levitiko chaputara 19 likovwira wuli kupulikiska makora ivyo vikayowoyeka mu Malango Khumi?

⁶ Mavesi ghanyake mu Levitiko chaputara 19  ghakulongosora vinandi ivyo vikayowoyeka mu Malango Khumi. Mwachiyelezgero, dango la nambara 8 likuyowoya kuti: “Ungibanga chara.” (Eks. 20:15) Nyengo zinyake munyake wangaghanaghana kuti usange wakutora yayi chinthu chaŵene kwambura kuzomerezgeka, mbwe ndikuti wakupulikira dango ili. Nangauli vili nthena, kweni wangiba mu nthowa zinyake.

7. Kasi wabizinesi wangaleka wuli kulondezga dango la nambara 8 ilo likuyowoya za kwiba?

⁷ Nyengo zinyake uyo wakuchita bizinesi wangaghanaghana kuti wandibepo yayi chifukwa wandatorepo chinthu icho ntchaŵene. Kweni kasi nyengo zose wachitanga bizinesi mwaunenesko? Pa Levitiko 19:35, 36, Yehova wakati: “Mungaŵanga na vyakupimira vyauryarya yayi pakupima utali wa chinthu, uzito, na unandi wake. Mupimirenge masikelo ghawemi, uzito uwemi, efa muwemi, na hini muwemi.” Ntheura para wabizinesi wakupimira sikelo ziwemi yayi, panji wakugwiliskira ntchito vipimo vyautesi kuti wapusike makasitomara ghake, ndikuti wakwiba. Mavesi ghanyake gha mu Levitiko chaputara 19 ghakulongosora mwakupulikikwa makora chomene fundo iyi.

8. Kasi fundo izo zili pa Levitiko 19:11-13 zikawovwira wuli Ŵayuda kulondezga fundo iyo yili mu dango la nambara 8, ndipo nase zingatovwira wuli?

⁸ Ŵazgani Levitiko 19:11-13. Mazgu ghakwambilira pa Levitiko 19:11, tikuŵazga kuti: “Ungibanga chara.” Vesi 13 likuyaniska kwiba na munthu uyo wakuchita vinthu mwauryarya, likuti: “Ungalyeranga munyako vinthu vyake yayi.” Ntheura munthu uyo wakulyera ŵanyake para wakuchita bizinesi ndikuti wakwiba. Dango la nambara 8 likuti kwiba nkhuheni. Kweni fundo izo zili mu buku la Levitiko zikawovwiranga Ŵayuda kupulikiska makora umo ŵangalondezgera fundo yeneko ya dango ili, panji kuti umo ŵangaŵira ŵanenesko pa chilichose icho ŵakuchita. Nase vingatovwira chomene para tingaghanaghanira umo Yehova wakuwonera kuchita vinthu mwauryarya na kwiba. Tikwenera kujifumba kuti: ‘Kuyana na ivyo lemba la Levitiko 19:11-13 likuyowoya, kasi palipo apo nkhwenera kusintha? Kasi nkhwenera kusintha umo nkhuchitira bizinesi yane panji umo nkhugwilira ntchito?

9. Kasi dango la pa Levitiko 19:13 likawovwiranga wuli ŵantchito?

⁹ Paliso fundo yinyake pa nkhani iyi, iyo Mkhristu wakwenera kuyighanaghanira para wakuchita bizinesi. Pa Levitiko 19:13 pakuti: “Uleke kukhala na malipiro gha waganyu usiku wose m’paka mulenji.” Ku Israyeli, ŵanthu ŵanandi ŵakaŵanga na minda, ndipo ŵantchito ŵakaŵalipiranga paumaliro wa zuŵa lililose. Ndipo para bwana watondeka kumulipira wantchito wake zuŵa leneliro, wantchito wakatondekanga kusangira banja lake vyakukhumbikwa pa zuŵa ilo. Yehova wakalongosora kuti: “Chifukwa chakuti ngwakusoŵerwa ndipo umoyo wake ukuthemba pa malipiro ghake.”—Do. 24:14, 15; Mat. 20:8.

10. Kasi tikusambirapo vichi pa Levitiko 19:13?

¹⁰ Mazuŵa ghano ŵantchito ŵanandi ŵakupokera malipiro ghawo zuŵa leneliro yayi, kweni ŵakupokera kamoza panji kaŵiri pa mwezi. Ndipouli, fundo ya pa Levitiko 19:13 yichali kugwira ntchito m’paka sono. Kweni chachitima ntchakuti mabwana ghanyake ghakutemwa kulyera masuku pa mutu ŵantchito ŵawo mwakuŵapa malipiro ghachoko chomene. Iwo ŵakumanya kuti ŵantchito aŵa ŵangaleka yayi ntchito nanga malipiro ghangaŵa ghakukhira chomene, chifukwa kulije kunyake uko ŵangaluta. Mabwana agho ghakuchita nthena tingati ‘ghakukhala na malipiro gha ŵaganyu ŵawo.’ Mkhristu uyo wakuchita bizinesi wakwenera kuwoneseska kuti wakulondezga fundo ya pa lemba ili apo wakuchita vinthu na ŵantchito ŵake. Tiyeni tiwone vinyakeso ivyo tingasambiramo mu Levitiko chaputara 19.

11-12. Kasi Yesu wakadidimizga fundo wuli pakukora mazgu gha pa Levitiko 19:17, 18?

¹¹ Pali vinandi ivyo Chiuta wakukhumba kuti tichitirenge ŵanyithu padera pakugega waka kuŵapweteka. Ukaboni wa fundo iyi ukusangika pa lemba  la Levitiko 19:17, 18. (Ŵazgani.) Yehova wakayowoya mwakupulikikwa makora kuti: “Utemwenge munyako nga umo ukujitemwera wamwene.” Nakuti ivi ndivyo Mkhristu wakwenera kuchita kuti wakondweske Chiuta.

¹² Wonani umo Yesu wakalongolera kuti dango la pa Levitiko 19:18 ndakuzirwa chomene. Nyengo yinyake Mufarisi wakafumba Yesu kuti: “Kasi dango likuru chomene mu Malango ni ndi?” Yesu wakazgora kuti “dango likuru na lakwamba” ndakuti titemwenge Yehova na mtima withu wose, umoyo withu wose, na maghanoghano ghithu ghose. Kufuma apo Yesu wakakora mazgu gha pa Levitiko 19:18, wakati: “Lachiŵiri, lakuyanako nalo ni ili: ‘Utemwenge mzengezgani wako nga umo ukujitemwera wamwene.’” (Mat. 22:35-40) Pali nthowa zinandi izo tingalongolera kuti tikutemwa ŵanyithu, ndipo zinyake tingazisanga mu Levitiko chaputara 19.

13. Kasi nkhani ya mu Baibolo ya Yosefe yikulongora wuli fundo iyo pamanyuma yikazakalembeka pa Levitiko 19:18?

¹³ Nthowa yimoza iyo tingalongolera kuti tikuŵatemwa ŵanyithu, nkhulondezga ulongozgi wa pa Levitiko 19:18. Ulongozgi uwu ukuti: “Ungawezgeranga nduzga chara panji kuŵa na chimbimbiza.” Taŵanyake panji tikumanyapo ŵanyake awo ŵakusungira vyakusingo munyawo wa ku ntchito, ku sukulu, wachibali, panji wa mu banja lawo ndipo ŵachita nthena kwa vyaka vinandi. Kumbukani kuti Yosefe, ŵakuru ŵake 10 ŵakamukwiyira chomene, ndipo ivi vikapangiska kuti ŵamuchitire vinthu viheni chomene. (Gen. 37:2-8, 25-28) Kweni Yosefe wakawezgera uheni yayi. Pa nyengo iyo wakaŵa na mazaza, m’malo mwakuti wawezgere, iyo wakaŵalongora lusungu ŵakuru ŵake. Yosefe wakaŵasungira vyakusingo yayi ŵakuru ŵake. M’malo mwake, wakachita vinthu mwakukolerana na ulongozgi uwo pamanyuma ukazakalembeka pa Levitiko 19:18.—Gen. 50:19-21.

14. Chifukwa wuli nase tikwenera kulondezga fundo izo zikusangika mu dango ilo lili pa Levitiko 19:18?

¹⁴ Ŵakhristu awo ŵakukhumba kukondweska Chiuta ŵakwenera kuyezga Yosefe, iyo wakaŵagowokera ŵakuru ŵake m’malo mwakuŵasungira vyakusingo panji kuwezgera. Nakuti ivi vikukoleranaso na ivyo Yesu wakayowoya mu lurombo lwa chiyelezgero, kuti tikwenera kugowokera awo ŵakutinangira. (Mat. 6:9, 12) Mpositole Paulosi nayo wakachiska Ŵakhristu ŵanyake kuti: “Ŵakutemweka, kuwezgera nduzga mwekha yayi.” (Rom. 12:19) Kweniso wakaŵachiskaso  kuti: “Lutilirani kuzizipizgirana na kugowokerana na mtima wose usange munthu wali na chifukwa chakudandawulira na munyake.” (Kol. 3:13) Fundo za Yehova zikusintha yayi. Ntheura fundo izo tikuzisanga mu dango ilo lili pa Levitiko 19:18 zichali kugwira ntchito mazuŵa ghano.

15. Kasi ntchiyelezgero wuli icho chingatovwira kumanya chifukwa icho tikwenera kuleka kusunga vyakusingo?

¹⁵ Ghanaghanirani chiyelezgero ichi. Kukhalira waka kughanaghanira ivyo ŵanyithu ŵatibudira tingakuyaniska na ivyo vikuchitika para tajipweteka. Vilonda vinyake vikuŵa vikuru, vinyake vikuŵa vichoko. Mwachiyelezgero, nyengo zinyake para tikucheka mphangwe, tingajicheka pakanjoŵe. Pa nyengo iyo tajichekera, tingapulika vyakuŵinya chomene, kweni vyakuŵinya ivi vikulutilira yayi. Ndipo para pajumpha zuŵa limoza panji ghaŵiri, tikukumbukaso yayi apo tikajicheka. Mwakuyana waka, vinthu vinyake ivyo ŵanyithu ŵangatibudira ni vichokovichoko. Mwachiyelezgero, mwambura kumanya munyithu wangayowoya panji kuchita vinthu vinyake ivyo vingatikwenyerezga, ndipo tingagowoka mwaluŵiro. Kweni wuli usange munyithu watibudira vikuru? Ivi tingaviyaniska na chilonda chikuru, icho kuti chipore dokotala wangakhumbikwa kuchisona na kuchikaka bandeji. Ndipo usange tikukhalira waka kuchikolakora chilonda ichi, chingapora yayi ndipo chingakura chomene. Mwakuyana waka, ivi vingayana waka na ivyo vingachitika na munthu uyo wakhuŵazgika na munyake. Iyo wangakhalira waka kughanaghanira umo vikamuŵinyira na ivyo munyake wakachita panji kuyowoya. Kweni unenesko ngwakuti uyo wakusunga vyakusingo wakujipweteka waka yekha. Ntheura ntchamahara kupulikira waka ulongozgi uwo ukusangika pa Levitiko 19:18.

16. Kuyana na Levitiko 19:33, 34, kasi Yehova wakakhumbanga kuti Ŵaisrayeli ŵachitenge nawo wuli vinthu ŵalendo, ndipo kasi tikusambirako vichi?

¹⁶ Apo Yehova wakaphalira Ŵaisrayeli kuti ŵatemwenge ŵanyawo, wakang’anamuranga kuti ŵakwenera kutemwa ŵanthu ŵa mtundu wawo pera yayi panji Ŵaisrayeli ŵanyawo pera. Wakaŵaphaliraso kuti ŵakwenera kutemwaso ŵalendo awo ŵakakhalanga nawo lumoza. Fundo iyi ndiyo yikusangikaso pa Levitiko 19:33, 34. (Ŵazgani.) Yehova wakakhumbanga kuti Ŵaisrayeli ŵachitenge vinthu na mulendo nga kuti ŵakuchita na ‘yumoza wawo,’ kweniso kuti ‘ŵamutemwenge nga umo ŵakujitemwera ŵenecho.’ Mwachiyelezgero, Dango likatenge Ŵaisrayeli ŵakeneranga kuzomerezga ŵakavu na ŵalendo wuwo kuvulura mu minda yawo. (Lev. 19:9, 10) Fundo yakuti titemwenge ŵalendo yichali kugwira ntchito ku Ŵakhristu mazuŵa ghano. (Luka 10:30-37) Kasi yikugwira wuli ntchito? Mazuŵa ghano napo, pali ŵanthu  mamiliyoni ghanandi awo ŵali kusamira mu vyaru vinyake, ndipo panji ŵanyake mbazengezgani ŵinu. Ntheura ntchakuzirwa chomene kuchita nawo vinthu mwantchindi ŵanthu aŵa.

17-18. (a) Kasi malemba gha Levitiko 19:2 na 1 Petrosi 1:15 ghakutichiska kuchitachi? (b) Kasi mpositole Petrosi wali kutichiska kuchita ntchito wuli yakuzirwa?

¹⁷ Malemba ghose ghaŵiri, la Levitiko 19:2 na 1 Petrosi 1:15, ghose ghakuchiska ŵanthu ŵa Chiuta kuŵa ŵatuŵa. Ndipo mavesi ghanandi gha mu Levitiko chaputara 19 ghangatovwira kumanya ivyo tingachita kuti titemwekenge na Yehova. Tadumbiskana mavesi ghanyake agho ghatovwira kumanya ivyo tikwenera kuchita na vinthu vinyake ivyo tikwenera kugega. * Ndipo Malemba Ghachigiriki ghakulongora kuti Yehova wakukhumba kuti tilondezgenge fundo izo zikusangika mu malemba agha pa umoyo withu. Kweni mpositole Petrosi wakasazgiraposo chinthu chinyake.

¹⁸ Nangauli Taŵakhristu tingaŵa kuti tikusopa Yehova nyengo zose kweniso tikuchitira ŵanji vinthu viwemi, kweni Petrosi wakayowoyaso chinthu chinyake chakuzirwa chomene icho tikwenera kuchita. Pambere wandayowoye fundo yakuti tikwenera kuŵa ŵatuŵa mu makhaliro ghithu ghose, iyo wakayowoya kuti: “Vwarani zikhore mu maghanoghano ghinu kunozgekera ntchito.” (1 Pet. 1:13, 15) Kasi wakang’anamuranga ntchito wuli? Petrosi wakati Ŵakhristu ŵakuphakazgika ŵakwenera ‘kuzakapharazga kutali makhaliro ghapachanya gha uyo wakaŵachema.’ (1 Pet. 2:9) Nakuti mazuŵa ghano Ŵakhristu wose ŵali na mwaŵi wakuchitako ntchito yakuzirwa chomene iyi, iyo yikovwira chomene ŵanthu kuluska ntchito zose izo ŵanthu ŵakugwira. Ntheura pakuŵa ŵanthu ŵatuŵa, tiyeni tiŵikepo mtima kupharazga na kusambizga mwachikanga. (Mrk. 13:10) Para tiŵikengepo mtima kulondezga fundo izo zikusangika mu Levitiko chaputara 19, tilongorenge kuti tikutemwa Chiuta kweniso ŵanji. Ndipo tilongorenge kuti tikukhumba ‘kuŵa ŵatuŵa’ mu makhaliro ghithu ghose.