1-2. (a) Cossa che ghemo imparà nel primo stùdio? (b) Cossa ndaremo imparar adesso?

NEL primo stùdio, ghemo imparà tante robe del capìtolo 19 de Levìtico. Par esémpio, nel versìcolo 3 de questo capìtolo, ghemo imparà che i fioi i ga de tender dei so genitori, giutarli a esser ancora pi amighi de Geovà e incoraiarli. Ghemo visto che, anca che no ne toca pi obedir ala lege de no laorar nel sabo, ghemo de torse el tempo tuti i giorni par far pi forte la nostra amicìssia con Geovà. Cossita, mostraremo che volemo esser santi come dise Levìtico 19:2 e 1 Piero 1:15.

² Adesso, ndaremo veder che el capìtolo 19 de Levìtico anca el ne insegna a (1) esser bondosi con quei che i ga problemi fìsichi, (2) far sempre le robe giuste quando femo negossi, e (3) mostrar che amemo i altri. Questi consili i ne giutarà a esser santi come Geovà l’è santo.

3-4. De acordo con Levìtico 19:14, come i israeliti i gavea de tratar quei che i gavea problemi fìsichi?

³ Ledi Levìtico 19:14. * Geovà el vol che mostremo bontà a quei che i ga problemi fìsichi. Par esémpio, i israeliti no i podea dirghe su a una persona che no la scoltea, parché no la saria bona de risponder. Sicuro che far  questo con una persona che no la scoltea, saria una roba tanto bruta.

⁴ El versìcolo 14 anca el dise che i israeliti no i podea meter gnente davanti de un orbo par farlo strabucarse. Cossita, lori i ga capio che i gavea de esser bondosi con quei che i gavea problemi fìsichi. Un libro che el parla sora come le persone le tratea quei che i gavea problemi fìsichi in quela època, el ga dito: “Lori i era imbroiadi e tratadi tanto mal.” Par esémpio, pol esser che arquanti i metesse qualcossa aposta davanti dei orbi sol par farli cascar. Che roba bruta!

5. Come che podemo mostrar bontà a quei che i ga problemi fìsichi?

⁵ Gesù l’era tanto bondoso con quei che i gavea problemi fìsichi. Lu el ga mandà dir a Gioani Batista: ‘I orbi i ze drio veder, i sòti i ze drio caminar, i leprosi i ze drio esser guaridi, quei che no i scolta i ze drio scoltar e i morti i ze drio tornar a viver.’ Par causa dei miràcoli de Gesù, ‘tute le persone che li ga visto le ga lodà a Dio’. (Luc. 7:20-22; 18:43) Anca se Geovà no’l ne dà poder par far miràcoli ancoi, podemo far compagno a Gesù. Come? Noantri ghemo de mostrar bontà e passiensa a quei che i ga problemi fìsichi. Par esémpio, podemo parlarghe sora la speransa che ghemo de viver nte un paradiso, de esser perfeti e de adorar a Dio de maniera perfeta. (Luc. 4:18) Sicuro che queste bone notìssie le ze belche drio giutar tante persone a esser amighe de Geovà.

6. Cossa che el capìtolo 19 de Levìtico el ne giuta a capir?

⁶ El capìtolo 19 de Levìtico el ne giuta a capir meio i Diese Comandamenti. Par esémpio, un dei Diese Comandamenti l’è de no ciavar i altri. (Éso. 20:15) Ma, sarà che ciavar una persona vol dir sol ciapar una roba che la ze soa? Nò! El capìtolo 19 el ne giuta a capir meio questo.

7. De che nantra maniera una persona la podaria ciavar i altri?

 ⁷ Fursi un israelita el pensesse che mai el gavea ciapà qualcossa de nantra persona. Sarà che questo volea dir che no’l gavea mai ciavà a qualchedun? Lu el gavea de ricordarse che, quando el fesse negossi, ghe tochea doperar i pesi e le mesure giuste e pesar e mesurar cada roba polito. (Lev. 19:35, 36) Alora, se questo israelita el fusse drio vender qualcossa e el doperesse i pesi e le mesure sbaliade, lu l’era drio ciavar. Vedemo questo anca in altri versìcoli del capìtolo 19 de Levìtico.

8. (a) Come che Levìtico 19:11-13 el giutea i israeliti a capir el comandamento de no ciavar i altri? (b) Che domanda ghemo de farse?

⁸ Ledi Levìtico 19:11-13. * El versìcolo 11 el disea ai israeliti par no ciavar e el versìcolo 13 par no imbroiar i altri quando i fesse negossi. Alora, lori i capia che se i imbroiesse una persona quando i fesse negossi, i saria anca drio ciavarla. Cossita, lori i era boni de meter in pràtica de maniera giusta el comandamento de no ciavar i altri. Anca noantri ghemo de capir cossa Geovà el pensa sora ciavar i altri. E ghemo de domandarse: “Sarà che mi go de cambiar qualcossa nel me laoro o nela maniera che mi fao i negossi?”

9. Come quel che dise Levìtico 19:3 giutea quei che i laorea par i altri?

⁹ I israeliti i gavea de ricordarse anca de nantra roba che dise in Levìtico 19:13. Questo testo el dise: “No sté restar tuta la note fin la matina coi soldi che quel che el ga laorà par valtri el mèrita.” In Israel, tanti i laorea in colònia par i altri, e tuti i giorni i ciapea i soldi de quela giornada. Se el paron no’l ghe desse i soldi del so laoro, quela persona no la saria bona de dar de magnar ala so fameia in quel giorno. Par quela che Geovà el ga dito che una persona, che no la ga quel che ghe ocore par viver, la ga tanto de bisogno dei soldi del so laoro. — Deu. 24:14, 15; Mat. 20:8.

10. Cossa che ancora imparemo de Levìtico 19:13?

¹⁰ Ancoi, quasi tuti i paroni i paga i so laoradori tuti i giorni, a cada due stimane o una volta al mese. Ma arquanti paroni i paga ben manco de quel che saria giusto. Questi paroni i ze drio tegner i soldi che saria giusto darghe a quei che i laora par lori. Ma un paron che el serve a Geovà el ga de ricordarse de Levìtico 19:13 e far tuto polito. Adesso, ndemo veder nantra roba che podemo imparar del capìtolo 19 de Levìtico.

11-12. Cossa Gesù el ga mostrà quando el ga parlà le parole de Levìtico 19:17, 18?

¹¹ L’è vera che no tratemo mal le persone, ma Geovà el vol che femo ancora de pi. Capimo questo quando ledemo Levìtico 19:17, 18. (Ledi. *) In questo testo, Geovà el dise: “Te ghè de  amar el to pròssimo come a ti stesso.” Alora, se volemo assar Geovà contento, ghemo de mostrar questo amor ale persone.

¹² Gesù el ga mostrà che el comandamento de Levìtico 19:18 l’è tanto importante quando el ga parlà con un fariseo. El fariseo el ghe ga domandà qual che l’era el comandamento pi importante dela Lege. Alora, Gesù el ghe ga dito che el primo e el pi importante comandamento l’era amar a Geovà de tuto el cuor, ànima e mente. Dopo, lu el ga doperà le parole de Levìtico 19:18 par dir che el secondo comandamento l’era amar i altri come a si stesso. (Mat. 22:35-40) El capìtolo 19 de Levìtico anca el ne giuta a capir come podemo mostrar amor par i altri.

13. Come che el esémpio de Giusepe el ne giuta a far quel che ghen’è in Levìtico 19:18?

¹³ In Levìtico 19:18 dise: “No stà vingarte e gnanca seita disgustà con qualchedun.” Fursi cognossemo una persona che la ze restada disgustada par tanti ani con qualchedun dela scola, del laoro o dela fameia. Ma ghemo de ricordarse che i fradei de Giusepe i ga seità disgustadi con lu e par causa de questo i ga fato una roba tanto bruta. (Gén. 37:2-8, 25-28) Ma Giusepe no’l ga seità disgustà con lori e gnanca no’l se ga vingà. Invesse, lu li ga perdonà. Lu el ga fato quel che dise in Levìtico 19:18. — Gén. 50:19-21.

14. Parché che ghemo de meter in pràtica el prinsìpio de Levìtico 19:18?

¹⁴ Invesse de seitar disgustà coi so fradei, Giusepe li ga perdonà. Noantri ghemo de far compagno a lu. In Mateo 6:9, 12, Gesù el ga mostrà che l’è tanto importante perdonar a quei che i ne ga disgustà. Anca el apòstolo Paolo el ga parlà sora questo. Lu el ga dito: ‘Seité a soportarve un al altro e a perdonarve del tuto un al altro, anca se qualchedun el ga rason par brontolar contra nantra persona.’ (Col. 3:13) Lu el ga anca dito: “Me cari, no sté mia vingarve.”  (Rom. 12:19) Alora, ghemo ancora de meter in pràtica el prinsìpio che ghen’è in Levìtico 19:18, parché i prinsipi de Geovà mai i càmbia.

15. Cossa che ne giuta a capir che l’è tanto importante perdonar i altri?

¹⁵ Par capir meio parché che ghemo de obedir el consìlio de Levìtico 19:18, pensa sora questo. Restar disgustà con qualchedun l’è come farse un taio. Pol esser che se femo un pìcolo taio nel deo e el ne fà tanto mal. Ma questo taio el guarisse tanto svelto che dopo de due o tre giorni gnanca no lo vedemo pi. La medèsima roba la pol suceder quando un amigo el ne disgusta, parché suito semo boni de perdonarlo. Ma se se ghemo fato un taio pi fondo, ghemo de ndar al dotor par far su punti e meter su fasse. Ghemo anca de assar star e no sfrugnar, senò mai el ndarà guarirse e el pol restar pedo ancora. La medèsima roba la sucede quando restemo tanto disgustadi con qualchedun. Ghemo de star atenti par no seitar a pensar in quel che ga sucedesto, parché se femo questo, ndaremo sofrir de pi. Alora, l’è tanto bon far quel che dise in Levìtico 19:18.

16. (a) De acordo con Levìtico 19:33, 34, come che Geovà el volea che i israeliti i tratesse i stranieri? (b) Cossa che imparemo de questo?

¹⁶ Quando Geovà el ga dito ai israeliti che i gavaria de amar el pròssimo, lu l’era anca drio parlar de amar a quei che no i era israeliti. Par esémpio, come dise Levìtico 19:33, 34, lori i gavea de mostrar amor ai stranieri che i era de star in meso de lori. (Ledi. *) Geovà el volea che i tratesse i stranieri come se i fussi israeliti e con tanto amor. Par quela che anca i stranieri e i poareti i podea tor su quel che vansea dei campi. (Lev. 19:9, 10) Cossa che imparemo de questo? Milioni de persone le vien de star nel nostro paese e fursi una de lore la ze de star darente dela nostra casa. Noantri ghemo de mostrar amor e rispeto par tuti lori. — Luc. 10:30-37.

17-18. (a) Cossa che Levìtico 19:2 e 1 Piero 1:15 dise che ghemo de far? (b) Che laoro importante Piero el ga dito che ghemo de far?

¹⁷ Levìtico 19:2 e 1 Piero 1:15 ne dise che ghemo de esser santi. Nel capìtolo 19 de Levìtico, ghemo imparà arquante robe che le ne giuta a esser santi, ma podemo imparar ancora de pi. * Parché che ghemo de seitar a far queste robe? Parché le Scriture Greche le mostra che Geovà ancora el vol che le femo. Ma vedemo nantra roba che el apòstolo Piero el ga dito che ghemo de far.

¹⁸ Vanti de parlar che l’è tanto importante esser santi, Piero el ga dito che ghemo de ‘pareciar la nostra mente par laorar’. (1 Pie. 1:13, 15) De che laoro Piero l’era drio parlar? Lu l’era drio dir che i untadi ndaria ‘parlar sora le bele qualità de Dio ai altri’. (1 Pie. 2:9) Anca noantri restemo tanto contenti de giutar a predicar e a insegnar. Questo laoro l’è el pi importante che ghen’è e l’è drio giutar tante persone a cognosser a Geovà. Restemo anca tanto contenti de far parte del pòpolo de Dio, che l’è santo. (Mar. 13:10) Alora, come ghemo visto in Levìtico capìtolo 19, l’è tanto importante adorar a Dio e giutar i altri. Cossita, ndaremo mostrar che amemo a Geovà e ai altri e che volemo esser santi.