1-2. Mwaha ovinre, naathokorenrye exeeni? Mwaha ola, ninrowa othokorerya exeeni?

MWAHA ovinre, noothokorerya malakiheryo annikhaliherya ari ekapiitulu 19 ya eliivuru ya Onamukuttho. Mwa ntakiheryo, ntoko naawenhe ahu eversiikulu 3, Yehova aahaaleela aisarayeli wira yaahaana waattittimiha anamuyari aya. Nave, naahoona wira olelo-va hiyo-tho, nihaana waakhapelela anamuyari ahu naavahaka itthu amprisari aya, waalipiha, waamaaliha ni waakhaliherya ohihiya olipiha waataana waya ni Yehova. Nave, naahoona wira nnaamwi olelo-va niheettelaka nihiku na Saabadu, nihaana otthara malakiheryo awo naavyaka okathi khula nihiku wira nivare muteko wa Yehova. Akhala wira nnoopaka itthu iyo, nnimooniherya wira ninniimananiha okhala oowaarya ntoko onnitumererya awe Onamukuttho 19:2 ni 1 Pedru 1:15.

² Mwaha ola, ninrowa othokorerya itthu sikina nniixutta ahu ekapiitulu 19 ya eliivuru ya Onamukuttho. Nave, mwaha ola nnoothokorerya itthu tthaaru nniixutta ahu ekapitulu 19 ya eliivuru ya Onamukuttho. Itthu sene tiiya: Waareerela murima atthu oorakala, ororomeleya vaavo nimmweetta ahu nakoso ni waaphenta atthu akina. Mwaha wa xeeni? Mwaha woowi nimphavela okhala oowaarya, maana Muluku toowaarya. Nrowe nithokorerye itthu iyo nniixutta ahu.

3-4. Moovarihana ni Onamukuttho 19:14, aisarayeli yaahaana waathokorerya sai atthu yahiiwa ni atthu yahoona?

³ Mmusome Onamukuttho 19:14. Yehova oniphavela wira atthu otheene animukokhorela yaareereleke murima atthu oorakala. Mwa ntakiheryo, Yehova aahaaruma aisarayeli wira ahinveeheke mutthu ohiniiwa. Onveeha iwo waahela muhina omulavulela  moolumo oohiloka aahiiso ompakela etthu yoohiloka. Tthiri, opaka etthu ntoko eyo, yaari etthu yootakhala. Mwaha woowi, okhala wira mutthu owo khaiwa etthu yaahimmwa, nto khaawerya ohimya etthu wira iisaakihe.

⁴ Nave eversiikulu 14, Muluku aahaaleela aisarayeli wira: “Muhimutekelelé miritta mulipa-òhona”. Yaalavulaka atthu oorakala, eliivuru emosa ehimmye so: “Mittetthe yaakhala aya aisarayeli ni mittetthe soowaattamela, atthu oorakala khiyaathokoreriwa saana ni yaanihasuliwa vanceene”. Woonasa wene, atthu ootakhala murima, yaanimureya etthu mutthu ahoona wira akwattuliwa vale omora, amutheyeke. Tthiri eyo, etthu yooriipiha murima. Nlamulo na Yehova niri eversiikulu 14, nanaakhaliherya atthu a Muluku, waamorela ikharari ni waareerela murima atthu oorakala.

5. Ninrowa owoonela sai othunku atthu oorakala?

⁵ Yesu aaniwoonela othunku atthu oorakala. Muupuweleke wira Yesu aahiruma oleeliwa Yohani Mpatisa wira: “Alipa-oorakala, anneetta oratteene. Anamakokho, annipenuxiwa. Alipa-oohiiwa, vano anniiwa. Alipa-ookhwa, annihihimuxiwa”. Nuumala oweha miiriirya iye Yesu aapaka awe, “atthu otheene yaahipacerya omuttottopela Muluku”. (Luka 7:20-22; 18:43) Makristau eekeekhai, onnaasivela otakiha othunku wa Yesu yaathokoreryaka oratteene atthu oorakala. Tthiri hiyo, onninsivela waareerela murima, waakhapelela ni waapixerya murima atthu oorakala. Ekeekhai wira, Yehova khonivanhe owerya woopaka miiriirya. Masi nookhalana eparakha ya waaleela atthu akina waahela muhina ale oorakala voohimya sa eparayiisu opuro yoowo atthu anrowa aya okhalana okumi wooloka ni waataana wooloka ni Muluku. (Luka 4:18) Ihapari iyo sooreera sinniwiiriha atthu anceene onvuwiha Muluku.

6. Onamukuttho ekapiitulu 19, onnikhaliherya sai wiiwelela Malamulo Muloko?

⁶ Iversiikulu sikina sa ekapiitulu 19 ya Onamukuttho, sinnitthokiherya oratteene ele yaahimwale Malamulo 10. Mwa ntakiheryo, nlamulo na neethanu neeraru [8], naahimya so: “Muhĩyé”. (Okhum. 20:15) Mutthu mukina, pooti wuupuwelaka wira akhala wira khaakuxa etthu ehikhanle yawawe, nto aaniiwelela nlamulo.  Masi hata vaari siiso, pooti wira mutthu owo aaniiya mwa inamuna sikina.

7. Mulipa a nakoso, aarowa ohiiwelela sai nlamulo na neethanu neeraru naalavula sa wiiya?

⁷ Mulipa a nakoso, pooti wuupuwelaka wira khoniiya mwaha woowi khotonko okuxa eetthu ehikhanle yawawe. Masi niireke okathi wotheene onniroromeleya okathi onimweetta awe nakoso? Onamukuttho 19:35, 36, Yehova aahimmye so: “Mwatumihaka, mutumihe n’ixariya, mphimeke-tho n’ixariya. Mukhalaneke miphimo sihinĩya, otumiha wohĩya; vano miyeryo sanyu sothene sihĩyeryeké”. Nto, vannooneya oratteene wira akhala wira mulipa a nakoso aanirumeela miphimo wala ipalansa soohiloka wira aawoke makiliyenti awe, owo aaniiya. Iversiikulu sikina sa Onamukuttho ekapiitulu 19, sinniiwanyeiha oratteene eponto eyo.

8. Onamukuttho 19:11-13, aakhaliherya sai ayuda weettela malakiheryo nakumihiwe aya nlamulo na neethanu neeraru? Hiyo ninttottela sai mureerelo malakiheryo awo?

⁸ Mmusome Onamukuttho 19:11-13. Moolumo oopacerya a Onamukuttho 19:11, ninsoma so: “Muhĩyeryaneké”. Eversiikulu 13, ennooniherya ovarihana okhanle eriyari ya wiiya ni ohiroromeleya vaavo mutthu onimweetta awe nakoso. Eyo enihimya so: “Muhimpuheryeké mukhw’inyu, hatá muhimwĩyeryeké”. Eversiikulu ela, ennooniherya wira onwoka mutthu okathi nimmweetta ahu nakoso, onoolikana ni wiiya. Nlamulo na neethanu neeraru, naahihimya oratteene wira wiiya etthu yoohiloka. Masi itthu sikina sinilavuliwa eliivuru ya Onamukuttho, saanaakhaliherya ayuda osuwela moota yaarowa ya weettela malakiheryo yaakumihiwe aya nlamulo nle, eyo piiyo, awo yaahaana ororomeleya mwa itthu sotheene yaapaka aya. Nto hiyo nihaana wuupuwela oratteene moota Yehova onoonela awe ohiroromeleya ni wiiya. Otheene ahu, nihaana wiikoha so: ‘Moovarihana ni Onamukuttho 19:11, kiireke yookhala etthu mookumini mwaka kinireerela aka opaka marukunuxo? Kiireke kihaana opaka marukunuxo sa moota kinimweetta aka nakoso ni muteko kinivara aka?’

9. Onamukuttho 19:13, aakhapelela sai anamuteko?

⁹ Yookhala enamuna ekina ya ororomeleya makristau anireerela aya ovaha ephoole okathi animweetta aya nakoso. Onamukuttho 19:13, onihimya so: “Muhipisé omuliva namuteko anyu mpakha mmeloni mwaya”. Wisarayeli wa khalai, anamuteko yaalima mmatta, yaahaana oliviwa musurukhu aya wanikisa wa khula nihiku. Ohimuliwa namuteko musurukhu awe, waanimwiiriha ohikhalana musurukhu woothuma yoolya para etthoko awe nihiku nlo. Yehova aahimmye so: “Onnilipelela n’uvelavela musurukhu awe”.—Otum. 24:14, 15; Math. 20:8.

10. Onamukuttho 19:13, onniixuttiha exeeni?

¹⁰ Olelo-va, anamuteko anceene, anniliviwa musurukhu aya ekwaha emosa wala ikwaha piili vamweerini, ohiya khula nihiku. Nto malakiheryo ari Onamukuttho 19:13, nlelo annivareleya muteko. Mapatarau manceene, anaapuherya anamuteko aya, yaalivaka musurukhu vakhaani. Awo annisuwela wira anamuteko aya khanoona woomalela, nto ahaana ovara muteko wira ahikhwe etala. Vanikhala ntoko wira mapatarau awo, khanaaliva anamuteko aya musurukhu aniphwanela aya. Mukristau onimweetta nakoso ni orina anamuteko awe, ohaana waathokorerya anamuteko awe mwa xariya ni waaliva musurukhu aya. Vano nrowe niwehe etthu ekina nniixutta ahu eliivuru ya Onamukuttho ekapiitulu 19.

11-12. Etthu xeeni Yesu aattittimihenrye awe vaavo aalavunle awe moolumo ari Onamukuttho 19:17, 18?

¹¹ Muluku oniphavela wira naathokoreryeke saana atthu akina ni nihaakumiheryeke mixankiho. Ninniweha eyo, Onamukuttho 19:17, 18. (Mmusome.) Nwehe etthu Yehova aahimmye awe mowiiwanyeya oriki: “Mumphente mukhw’inyu ntoko sinìphentanyu”. Mukristau  oniphavela omusiveliha Muluku, ohaana waaphenta atthu akina ntoko oniiphenta awe.

¹² Yesu, aahooniherya wira nlamulo niri Onamukuttho 19:18 nookhalana efaita yinceene. Nfarisi mmosa aahimukoha Yesu wira: “Tiivi eri yooruma yuulupalexa ya Nlamulo?” Omwaakhulaka, Yesu aahimuleela wira “yooruma yuulupalexa ni yoopacerya” tiila: Mumphenteke Yehova ni murima anyu wotheene, ni okumi anyu wotheene, ni muupuwelo anyu wotheene. Nuumala-vo, Yesu aahilavula moolumo ari Onamukuttho 19:18, oriki: “Yooruma ya nenli, yeeyo enlikana ni yoopacerya, tiila: ‘Mumphenteke mukhwiinyu ntoko muniiphenta anyu’”. (Math. 22:35-40) Sookhala inamuna sinceene nikhanle ahu oowooniherya wira ninnaaphenta atthu akina. Inamuna sikina nnooweha Onamukuttho ekapiitulu 19.

13. Yowiiraneya ya Yosefe, ennikhaliherya sai wiiwexexa miruku siri Onamukuttho 19:18?

¹³ Enamuna emosa nikhanle ahu oowooniherya wira ninnaaphenta atthu akina, ori weettela miruku siri Onamukuttho 19:18. Miruku iyo sinihimya so: “Muhiwunlelé ikuhu atthu a nloko nanyu”. Woonasa wene, nyuwo munnaasuwela atthu aniviriha okathi munceene ananariwe ene ni mutthu anivarana aya muteko, anisomana aya oxikola, mmusi aya wala mutthu mukina. Muupuweleke wira, axinnawe Yosefe 10, yaanimunlela ikuhu Yosefe. Nto mwaha waivaavo, awo yaahimwiiriha Yosefe etthu yootakhala. (Maph. 37:2-8, 25-28) Masi Yosefe khaathokorerya axinnawe mwa enamuna yoohiloka! Okathi Yosefe aarina okhulupale, owo anwerya owunlela ikuhu axinnawe, masi owo kaapanke eyo. Maana owo aahaamorela ikharari. Tthiri vannooneya oratteene wira Yosefe khaawunlenle ikuhu. Tthiri Yosefe aahitthara oratteene miruku siri Onamukuttho 19:18.—Maph. 50:19-21.

14. Etthu xeeni enooniherya wira malakiheryo ari Onamukuttho 19:18 nlelo annivareleya muteko?

¹⁴ Mukristau oniphavela omusiveliha Muluku, ohaana omutakiha Yosefe, yoowo aalevelenle axinnawe ohiya owunlela ikuhu. Eyo ennivarihana ni ele Yesu onitumerenrye awe opaka nivekelo na nlikanyiho. Maana, owo aahimmye wira nihaana waalevelela ale annitthekela. (Math. 6:9, 12) Nave murummwa Paulo, ohaatumererya makristau wira: “Axinnaka, muhinleke ikuhu”. (aRom. 12:19) Nave-tho, murummwa Paulo  oonitumererya oriki: “Nvilelaneke, mulevelelaneke ni murima wotheene ikwaha sotheene, hata musuwelaka wira mootthekeliwa”. (aKol. 3:13) Malakiheryo a Yehova, khanikhala-khala aturukeyaka. Nto vannooneya oratteene wira nihaana weettela malakiheryo yaakumihiwe aya nlamulo niri Onamukuttho 19:18.

15. Nlikanyiho xeeni ninnikhaliherya osuwela efaita orina aya olevelela?

¹⁵ Nkahaya nwehe ntakiheryo nla: Opweha mathowa vamurimani, onoolikana ni makhwatta. Makhwatta makina macikhaani, masi makina maalupale. Mwa ntakiheryo, vaavo nintherekela ahu ekhoovi wira naapeye, hiyo pooti wiithikila vakhaani ekatha. Ekeekhai wira nipuro niithikinle ahu pooti oniwereya. Masi moohipisa, pooti ovola. Nto nuumala ovira nihiku nimosa wala mahiku manli, hiyo pooti oliyala opuro niithikinle ahu. Mwa enamuna emosaru, itthu sikina nniireliwa ahu saamukhaani. Mwa ntakiheryo, mpatthani ahu pooti ohimya wala opaka etthu enniwereya, masi nnoowerya omulevelela moowaakuveya. Akhala wira nikhwatta nuulupale, meetiku pooti ottottha wala otthukwa nikhwatta nlo. Musuweleke wira, akhala wira nimmakela otuthula nikhwatta nlo, pooti wuncerereya wala ohivola niinaano. Mooriipiha murima, mutthu pooti opaka etthu emosaru akhala wira ohiireliwa etthu enwereyale vanceene. Nto owo, pooti omakelaka wuupuwela etthu yoohiloka iireliwe awe ni otepa oriipiwa murima. Masi musuweleke wira, atthu ale aninla ikuhu, anootepa wiikumiherya mixankiho. Nto ti vooloka otthara miruku siri Onamukuttho 19:18!

16. Moovarihana ni Onamukuttho 19:33, 34, Yehova aaphavela wira aisarayeli yaathokoreryeke sai anamurwa?

¹⁶ Okathi Yehova aarumme awe aisarayeli wira yaaphenteke atthu akina, khahiyo wira owo aaphavela ohimya wira yaahaana waaphenta atthu a nikhuli wala a elapo aya paahi. Owo aahaaleela wira yaahaana waaphenta atthu a elapo ekina, niire so, anamurwa. Malakiheryo awo ari Onamukuttho 19:33, 34. (Mmusome.) Aisarayeli yaahaana omuthokorerya namurwa ‘ntoko mutthu a mulaponi mwaya’. Nave yaahaana ‘omphenta’ namurwa ntoko yiiphenta aya. Mwa ntakiheryo, aisarayeli yaahileeliwa wira yaahaana omweemererya namurwa ni atthu oohaawa ottotta soolya mmatta mwaya. (Onam. 19:9, 10) Olelo-va, makristau ahaana weettela malakiheryo anihimya wira nihaana waaphenta anamurwa. (Luka 10:30-37) Masi ninrowa opaka sai eyo? Olelo-va, aakhala atthu imilyau sinceene  olumwenku wotheene athaamenle wala anikhala ilapo sikina, woonasa wene akina mavisiinyu anyu. Nto ti vooloka waattittimiha alopwana, athiyana ni anamwane anamurwa.

17-18. (a) Onamukuttho 19:2 ni 1 Pedru 1:15, onnitumererya opaka exeeni? (b) Muteko xeeni wa faita yinceene murummwa Pedru onitumerenrye awe opaka?

¹⁷ Onamukuttho 19:2 ni 1 Pedru 1:15, onnaatumererya atthu a Muluku okhala oowaarya. Iversiikulu sikina sa ekapiitulu 19 ya Onamukuttho, soonikhaliherya woona itthu ninreerela ahu opaka wira nikhalane waataana wooloka ni Yehova. Noothokorerya iversiikulu sinooniherya itthu sooloka ninreerela ahu opaka ni itthu soohiloka nihinreerela ahu opaka. * Soolempwa sa Ekereku sa Ekristau, sinnooniherya wira Yehova oniphavela wira neetteleke mookumini mwahu malakiheryo awo. Masi murummwa Pedru ohincererya etthu ekina.

¹⁸ Hiyo pooti wiimananiha vanceene omukokhorela Yehova ni waapakela itthu sooloka atthu akina. Masi, Pedru onnaatumererya makristau opaka etthu ekina ya efaita yinceene. Nuumala waatumererya makristau wira mweettelo aya wotheene okhaleke woowaarya, Pedru onnaatumererya oriki: “Mulokiherye muupuwelo anyu wira nvare muteko”. (1 Ped. 1:13, 15) Muteko xeeni owo? Pedru ohimmye wira axinnawe Kristu oothanliwa ahaana “‘olaleya sootikiniha sa Muluku’ yoowo owiihanne”. (1 Ped. 2:9) Tthiri, makristau otheene olelo-va, aakhalana eparakha ya ovara muteko owo wa efaita yinceene ovikana miteko sikina. Eparakha yuulupale nrina ahu ya okhala atthu oowaarya a Muluku, yaawo aniimananiha olaleya ni owiixuttiha ihapari sooreera! (Mar. 13:10) Vaavo nniimananiha ahu weettela malakiheryo ari Onamukuttho ekapiitulu 19, ninnooniherya wira ninnimphenta Muluku ni atthu akina. Nave ninnooniherya wira nimphavela wira mweettelo ahu wotheene “okhaleke woowaarya”.