Makalimay ci Yihofa padadotoc makorac ko Israil tamdaw, mihaenay palimoˈotay cangranan: ‘Aka pipayakayak to sowal a mitongangan to tamdamdaw, aka pikariˈang to ˈorip no tao. Ci Yihofa Kako.’—Lifi 19:2, 16.

O ‘pikariˈang’ itini no Hipray a sowal o kananaman a sowal konini. O mitilidan no micacekiway to Yutaya a tamdaw pakayni i Lifi a cudad sanay, onini kananaman a sowal tatodong i ‘aka tomireng i fafekang, i tatihi, i ngata,’ samanen pasangaray misaˈosi to tatodong nonini kananaman a sowal, pasangaray mihongyak tonini a sinael.

O roma mikingkiway a tamdaw palalitingan ko saˈosi no 16 sinael ato 15 sinael, sanay ko sowal no 15 sinael: ‘Ano misawkit to demak i, aka pisafelit to moecelay. Aka pisakakinih to manikaway a tamdaw, aka paˈading to cihafayay a tamdaw, masadafdaf ko pisawkit.’ (Lifi 19:15) Ano matatodongay konini pitadtad i, tatodong no saˈosi no 16 sinael, o Israil tamdaw cowa ka ngaˈay midokaˈ to tamdaw itini hoing, misasingdi anca misaysay to demak no paro no lomaˈ, cowa ka ngaˈay pakayni saka ngaˈay no niyah misafelit to demak. Manaokaniw cowa ka ngaˈay kita midemak to hatiniay a demak, kawra pakayni saˈosi no 16 sinael, iraayho ko ikakaay ko kangaˈay a pitadtad.

Satapang no 16 sinael, palimoˈotan ni Yihofa to Israil tamdaw aka payakayak to sapitongangan. O mitonganganay cowa ko miyakayakay aca to sowal, soˈlin miyakayakay to sowal pairaay to pasangaray, kawra ikakaay ko tatiih no mitonganganay. (Taneng 10:19; Patnakay 10:12-14; 1 Timoti 5:11-15; Yakop 3:6) Mitonganganay o padetengay misamangah, mipalakay to ngangan no tao. O mitonganganay to tao a tamdaw misakaniway misawacay alatek, soˈlin mihaen ko demak mamidokaˈ to ˈorip no tao, caay ka pisikol cingra. Tinakoen, ci Napot pakayniay pisakaniw no tao a misawacay mitongangan cingranan, hato tano fakelohan no tamdaw mipatay. (1 Hongti 21:8-13) Mihaenay, mitongangan to tao o mamidokaˈ to ˈorip no tamdaw, malecad o misowalan itini salikor no Lifi 19:16.

Roma i, mariˈang ko pitongangan no tamdaw to tao, maedeng pakayniay i kaˈinteh no falocoˈ. Saka 1 Yohani 3:15 sanay: ‘O ˈintehay to salikaka i, o mipatayay to tamdaw. Mafanaˈay kamo, o mipatayay to tamdaw i, awaay ko midaˈocay a ˈorip i lalomaˈ ningra.’ Sinanoten, maharek ci Yihofa somowal to limoˈot i Lifi 19:16, dotoc sanay: ‘Aka ˈinteh ko falocoˈ to salikaka.’—Lifi 19:17.

Mihaenay, pakaynien i Krisciyang ko sowal, o kalimlaan a sapalimoˈot ko Lifi 19:16 mirikec kitaanan aka a mitongangan to tao. Ano pakayniay kapiliˈ anca kaˈinap ita to tao a “mikariˈang” cangranan, malecaday o mitonganganay cangranan, tatodong nonini iraay ko ˈintehay no falocoˈ ita. Cowa ko ngangaˈay mihaen ko demak no Krisciyang.—Matay 12:36, 37.