Jehová feipifi tati pu israelita tañi lif chengeal engün. Feipifi tüfa: “Huesa dungu huitrameldunguyaulayaimi eimi tami troquiñche meu. Chumlayaimi rume tami cuñihun mu tucunoafiel tami chafche ñi mongen. Iñche ta Jehová” (Lev. 19:2, 16).

Ti texto feipi “cuñihun mu tucunoafiel tami chafche ñi mongen”. Hebreo huirintucun mu, ¿chem pi chi ta tüfa? Quiñe lifru nütramcalu ñi feipin Levítico feipi: “Feitachi dungu ñi feipin tüfachi versiculo, cüdaungefui tañi adümngeal. ¿Chumngelu cüdaungei? Hebreo quehun mu, tüfa feipi ñi huitralenoal inafül chem mu rume”.

Quiñeque che adümuulu, feipiquei tüfachi dungu ñi feipin ti versiculo nüucülei ti rupachi versiculo mu. Feipi: “Nor chengeaimi tami juzgacheal. Illamtulayafimi tati pofre ca doyümlayafimi rume tati ricu. Nor dungu mu juzgayafimi tami chafche” (Lev. 19:15). Feitachi dungu ñi feipin Levítico versiculo 16, feipiafui chi pu israelita ngelafui ñi femal norngenochi dungu quiñe juicio meu, negocian mu cam tañi familia mu no rume. Ca femlayafui huesaque dungu quisu tañi cümelcahual müten. Iñchiñ femlayafuiñ feitachi huesaque dungu. Huelu ca peafiyiñ chumngechi adümafuiñ ñi feipin ti versiculo 16.

Cüme ngüneduamafiyiñ ti hunen dungu ñi feipin ti versiculo 16. Jehová feipifi tati pu israelche ñi huitrameldunguyahulnoafiel ta che. Tati huitrameldungu doicülefui ta huesa dunguyecheliyiñ. Huesa dunguyecheliyiñ, huesalcacheafuiñ. Huelu huesa dungu huitrameldungufiliyiñ quiñe che, doi huesalcayafuiñ tati che (Prov. 10:19; Ecl. 10:12-14; 1 Tim. 5:11-15; Sant. 3:6). Tati huitrameldunguchelu re coilacaquei müten. ¿Chemu femquei? Tañi huesalcayafiel tati che ca ñi huesa raquiduamaeteu ta caquelu. Tati huitrameldunguchequelu, raquiduamquelai rume ñi cuñihun mu tucuafiel ñi mongen tati che. Femngechi dungu ta rupai Nabot. Quiñeque huentru huitrameldungueyu. Fei quiñeque che ütrüftucucaeyu cura mu fei langümngei (1 Rey. 21:8-13). Feimu chumngechi ñi feipin Levítico 19:16, quiñe che huitrameldunguchequelu cuñihun mu tucuafui ñi mongen tañi chafche.

¿Ca chem dungu mu quiñe che huitrameldunguafui ta cangelu che? Tañi üdefiel mu. 1 Juan 3:15 feipi: “Com tati üdequelu tañi peñi cam lamngen fei ta quiñe langümchefe reque felei. Eimün ta quimnieimün quiñe langümchefe no rume ta nielai rumel mongen”. Chau Jehová deu feipilu ñi feipin Levítico 19:16, fei hula feipi: “Tami piuque mu üdequefilnge tami peñi” (Lev. 19:17). Raquiduamfali tüfa.

Feimu llemai ñi feipin Levítico 19:16 quimeltueiñmu quiñe falin dungu. Famentuafiyiñ chem huesaque raquiduam taiñ nieel ca huitrameldungulayafiyiñ ta caquelu che. Cuñiutucuhuaiñ. Quiñeque mu, cüme yeuquelaiñ quiñeque che iñchiñ cam ayütuñmayafuiñ tañi nieel engün. Feimu huesa dungu huitrameldunguafuiñ quisu engün mu, femngechi pengelelafuiñ taiñ üdeniefiel. Huelu iñchiñ taiñ cristianongen ngelai taiñ üdeafiel ta che (Mat. 12:36, 37).