Yéhôva a bi kal Lôk Israel le ba ba bapubhaga. Inyu hala nyen a kal bo le: “U nwemhege bañ ni minsoga ikété loñ yoñ; u telbak bañ ki to ikolba matjél ma mut woñ libôk. Men me yé Yéhôva.”—Lôk Lévi 19:2, 16.

Bibuk bini le ‘telep ikolba’ ba bi kobol gwo loñge kiki bi yé ni hop u Lôk Héber, ndi kii Bibel i nsômbôl kal ha homa nu? Kaat i Lôk Yuda yada i i mpôdôl kaat Lôk Lévi i nkal le: “I nlôñ unu u . . . nlet i nok inyule bibañga bi hop Lôk Héber bi yé mu, bi nkobla le ‘u yén bañ bebee, ipañ,’ di nyi bé kii ba nsômbôl kal ha.”

Ngim bayimam i nkal le bibañga bi bi nkiha ni nlôñ 15 u u nkal le: “Ni nlama bé kéés bôt i nya i téé bé sép. U nlama bé todol hiyeyeba, u nlama bé to yoñ pes i ngwañ mut.” (Lôk Lévi 19:15, MN.) Ibale hala nyen i yé, wee i mbén i yé nlôñ 16 i i nkal le mut a ‘telbak bañ ikolba’ maasañ i yé le i kobla le Lôk Israel i bé lama bé boñ mut wap libôk béba to i bikééhene, to i mam ma nyuñga, to ikété lihaa. Man Lôk Israel a bé lama bé to boñ minkoda mi mam inyu kôs nseñ. I yé maliga le di nlama bé boñ i mam mana, ndi di yé le di tibil nok bibañga bi yé hana i nlôñ 16 iloo ha.

Di béñge bibôdle bi nlôñ u. Yéhôva a nkal Lôk Israel le ba yônôs bañ mbok yosôna ni minsoga. Minsoga Bibel i mpôdôl hana mi ta bé nso hilégé, tolakii yak hilégé hi nlona mindañ. (Bingéngén 10:19; Ñañal 10:12-14; 1 Timôtéô 5:11-15; Yakôbô 3:6) Minsoga Bibel i mpôdôl hana mi yé bibuk mut a mpot inyu ôbôs we jôl. A nla telbene we mbôgi bitembee, a boñ yak le u wo. Di mbigda i jam li bi pémél Nabôt, ba bi ôm nye nsohi yañga hala a boñ le ba nol nye ngi njom. (1 Bikiñe 21:8-13) Hala a ñéba toi le kiki pes i nyônôs iba i kaat Lôk Lévi 19:16 i ñunda, mut minsoga a bé le a telep ikolba matjél ma mut wé libôk.

Mut a nla ki sok mut inyule a ñoo nye. Kaat 1 Yôhanes 3:15, i nkal le: “I mut a ñoo maasañ a yé mut manola, ndi ni nyi le niñ boga i nyégle bé ikété mut manola nye ki nye.” Di nyimbe ki le i ngéda Nyambe a bi mal kal bibañga di nléba i nlôñ 16 le ‘U telbak bañ ikolba matjél ma mut woñ libôk,’ a bi kônde le: “U ook bañ maasoñ i ñem woñ.”—Lôk Lévi 19:17.

Jon bibañga bi yé i kaat Lôk Lévi 19:16 bi yé le bi hélés bés, ndi maéba ma yé ha inyu yés ma gwé ngui ngandak. Di hoñlene bañ bôt béba, di ôbhak bañ to bôt jôl kekikel. Ibale di ‘ntelep ikolba’ mut, hala wee ibale di ñôbôs nye jôl inyule a nlémél bé bés tole inyule di ntam yom yé, hala a ñéba le di ñoo nye. Brikristen bi nlama bé oo bôt.—Matéô 12:36, 37.