Sihol do Jahowa ase halak Israel gabe sada bangsa na pansing. Jadi nini Jahowa ma bani sidea, “Seng bulih ho jongjong marsaksi dompak daroh ni hasomanmu, ai Ahu do Jahowa.”​—3 Mus. 19:2, 16.

Istilah “jongjong marsaksi” sasintongni domma tangkas iarusi bani bahasa Ibrani na hinan. Tapi sonaha sonari on? Sada buku Jahudi na patorangkon pasal buku 3 Musa mangkatahon, “Istilah ai . . . susah tumang do iterjemahkon halani anggo iterjemahkon ai kata per kata artini gabe ‘ulang jongjong dohor.’”

Piga-piga pakar mangkatahon istilah ai dong do kaitanni pakon ayat 15 na mangkatahon, “Seng bulih papeolonnima uhum i paruhuman; seng bulih martonggor jumbak, halak na masombuh idoruni, ia halak na sangap iapiti; maningon pintor do panguhummu bani hasomanmu.” (3 Mus. 19:15) Anggo sonai do artini, berarti istilah na di ayat 16 ai mangartihon halak Israel lang boi mambahen na lang adil sanggah i pangadilan, sanggah marbisnis, atap bani kaluarga ni sidea. Anjaha sidea pe lang boi mangoto-otoi hasomanni laho mambuat untung bani dirini sandiri. Tontu lang ra hita mangkorjahon na sisonai homa. Tapi dong ope cara na legan ase boi iarusi hita istilah na isurat bani ayat 16 ai.

Pardiateihon hita ma kalimat na parlobei bani ayat ai. Ijai ihatahon Naibata do bani halak Israel lang boi sidea manukas-nukasi atap memfitnah hasomanni. Legan do artini memfitnah pakon margosip. Tongon gosip boi do parohkon bahat parsoalan. Tapi parahan do akibatni anggo dong na memfitnah. (Pod. 10:19; Par. 10:12-14; 1 Tim. 5:11-15; Jak. 3:6) Halak pemfitnah somalni domma ipingkirhon ia lobei na laho bahenonni laho pasambor-samborhon sasada halak. Atap ra homa ia gabe saksi palsu. Hape na ibahen ia ai boi do mambahayahon sasada halak. Umpamani songon na masa bani si Nabot. Halani dong saksi palsu na memfitnah ia, gabe ipargijig batu ma si Nabot ronsi matei. (1 Raj. 21:8-13) Jadi sahalak pemfitnah boi ihatahon ia domma jongjong marsaksi dompak daroh ni hasomanni songon na isurat bani 3 Musa 19:16. Mase sonai? Halani marhitei pambahenanni ai, boi do gabe matei sasada halak.

Somalni halani mardomdom do sasada halak ase gabe pemfinah ia. Songon na ihatahon bani 1 Johannes 3:15, “Barang ise na mardomdom bani hasomanni, sibunuh jolma do ai, anjaha ibotoh nasiam do, na so marianan totap hagoluhan na sadokah ni dokahni bani sagala sibunuh jolma.” Halani ai, dobkonsi ayat 16 bani buku 3 Musa bindu 19 ai ihatahon Naibata do use sonon, “Seng bulih ho mardomdom bani hasomanmu ibagas uhurmu.”​—3 Mus. 19:17.

Jadi humbani 3 Musa 19:16, dong sipasingat bani halak Kristen. Lang boi urah-urah hita curiga bani halak na legan atap pe memfitnah sidea. Anggo hita memfitnah halak na legan, lang marosuh janah simburu hita hu bani, on patuduhkon sogam do uhurta mangidahsi. Anggo ibahen hita sonai, boi ihatahon domma ‘jongjong hita marsaksi’ dompak hasomanta. Tontu lang boi halak Kristen mambahen sisonai.​—Mat. 12:36, 37.