Iperentahken Jahwe bangsa Israel gelah kalak e badia. Emaka gelah banci kalak e tetap badia, nina Jahwe man kalak e, “Ula ceritaken kena si la tuhu kerna ise pe man kalak si deban. Ula sengajaken kena ngelakoken kai pe si banci erban kalak si deban mate. Aku kap Jahwe.”​—Im. 19:2, 16.

Bas bahasa Heber, kata-kata “ngelakoken kai pe si banci erban kalak si deban mate” erti situhuna eme “cinder ngelawan dareh kalak si deban.” Kai maksudna “cinder ngelawan”? Lit sada buku referensi Jahudi si mbahas kerna buku Imamat ngataken maka kata-kata e “mesera ngangkaisa perban la siteh kai kin erti situhuna arah istilah Heber [si igunaken i jenda], si erti situhuna eme ‘ula cinder i deher.’”

Piga-piga pakar hubungkenna kata-kata e ras ayat sebelumna si ngataken, “Sanga hakimi kena kalak si deban, ula kena la adil man bana. Ula bela kena sekalak jelma perban ia mesera ntah pe perban ia bayak. Arus hakimi kena kalak si deban alu adil.” (Im. 19:15) Adi memang payo kin bage, perentah bas ayat 16 si ngataken maka umat Dibata la banci “cinder ngelawan” kalak si deban maksudna la banci kalak e la adil bas pengadilen, bas masalah bisnis, ntah pe bas keluarga. Kalak e pe la banci ndatken keuntungen si la jujur. Memang, kita labo banci ngelakoken si e ndai kerina. Tapi, situhuna lit cara si lebih masuk akal guna ngangkai kata-kata si lit bas ayat 16 ndai.

Cuba perdiateken kalimat pertama arah ayat 16. Ikataken Dibata maka umatNa la banci katakenna kai si la tuhu ntah pe ipitnahna kalak si deban. Pitnah lebih berbahaya asangken cikurak, amin pe situhuna cikurak banci kang erban masalah. (Kua. 10:19; Peng. 10:12-14; 1 Tim. 5:11-15; Jak. 3:6) Tukang pitnah biasana erbual ia guna ncedai gelar kalak. Banci saja ikatakenna ka kai si la tuhu si banci mbahayaken kalak. E me si terjadi man Nabot. Perban piga-piga dilaki ngataken si la tuhu kerna Nabot, dungna ibenteri ia alu batu amin pe labo ia ersalah. (1 Raj. 21:8-13) Payo, tukang pitnah banci “cinder ngelawan” kalak si deban janah banna kalak si deban mate, bagi si ikataken bas kalimat si peduaken arah Imamat 19:16.

Banci saja ipitnah sekalak jelma kalak si deban perban segat atena. Ikataken Pustaka bas 1 Johanes 3:15, ‘Tiap kalak si segat tena turang seninana, pembunuh kap. Teh kena maka pembunuh la banci dat kegeluhen si rasa lalap.’ Selain si e, kenca ibereken Dibata perentah si lit bas Imamat 19:16, ikatakenNa ka, “Ula ate kena segat man kalak si deban bas pusuh kena.”​—Im. 19:17.

Emaka, kata-kata si icatat bas Imamat 19:16 mereken persinget si tegas man kalak Kristen. Arus sipedauh perukuren si la mehuli ras ula sipitnah kalak si deban. Adi sipitnah kalak perban la ateta bage ia ntah pe perban cian ateta, e ertina kita “cinder ngelawan” ia janah e pe banci ncidahken maka segat ateta ia. Kalak Kristen la banci segat atena kalak si deban.​—Mat. 12:36, 37.