Jiowa a pesei ekkewe chón Israel ar repwe pin. Ren án Jiowa epwe álisiir le pin, a ereniir: “Ousap fetalfeil lein aramasemi o luapas, ousap pwal föri och mi afeiengau ngeni manauen chon arumi, pun ngang ewe Samol mi Lapalap.”​—Lif. 19:2, 16.

Lón ewe popun kapasen Ipru, ekkewe kapas “föri och mi afeiengau” a pwal tongeni chiyakú ngeni ei, “útá me ú ngeni manawen chón órum.” Nge met weween? Iei alon eú néún chón Jus puk usun ewe puken Lifitikos: “Ena kinikin lón ena wokisin a . . . weires ach sipwe weweiti pokiten weiresin án emén epwe wesewesen silei weween ena mwitún lón kapasen Ipru mi wesewesen wewe ngeni ‘kosap útáátiw wóón, útá únúkkún, útá kkan ngeni.’”

Ekkóch sousile ra ekieki pwe ekkena kapas lón ena wokisin, ra riri ngeni wokisin 15, ewe mi erá: “Ousap sorei mine a pwüng lon ämi kapwüng. Ousap peni eman mi wöüngau ika awina eman mi lap, nge oupwe eäni kapwüng ngeni chon arumi fän pwüng.” (Lif. 19:15) Ika ina, iwe ewe allúk lón wokisin 16 pwe ousap “föri och mi afeiengau” ngeni manawen emén, a tongeni wewe ngeni án emén chón Israel esap féri met mi ekirikiringaw lón kapwúng, lón angangen business, are lón an we famili. Me emén chón Israel esap féri och mettóch mi erikirik ren an epwe chék achéchééi pwisin i. Pwúngún, itá úrúrún sisap féri ekkena sókkun mettóch, nge a tongeni ffatéch ach weweiti kapasen ena wokisin lón pwal eú napanap.

Nengeni pwe lepoputáán wokisin 16, Kot a allúkú ngeni néún kewe aramas ar resap achéúfetálei kapasen pweni. Chemeni pwe kapasen pweni a ngaw seni uwofós, nge uwofós a pwal tongeni efisi osukosuk. (SalF. 10:19; SalAf. 10:12-14; 1 Tim. 5:11-15; Jas. 3:6) Emén chón pweni a kan chofonatá pwóróusen emén pwe epwe eitengawa. Eli epwe kapas chofona usun inaamwo ika a tongeni atolonga ena emén lón osukosuk. Sipwe chemeni met a fis atun ekkewe mwán ra pweni Napot me chofonatá usun. Ra pwúnúngaw ngeni Napot pwe a ninniiló. (1 King 21:8-13) Ewer, usun met a mak lón oruuen kinikinin ewe wokisin lón Lifitikos 19:16, pwe emén chón pweni a tongeni féri och mettóch epwe tongeni efeiengawa manawen emén.

Pwal och, emén chón pweni mi kirikiringaw a tongeni chofonatá pwóróus usun emén pokiten a oput eménna. Iei met sia kúna seni 1 Johannes 3:15: “Eman mi oput pwiin, i eman chon niela aramas. Iwe, oua silei pwe eman chon niela aramas esap eäni manau esemüch lon manauan.” Pwal och, mwirin án Kot erá: “Ousap pwal föri och mi afeiengau ngeni manauen chon arumi,” a pwal erá: “Kosap oput pwiüm lon lelukom.”​—Lif. 19:17.

Ina popun, ewe allúk mi mak lón Lifitikos 19:16, a awora kapasen éúréúr mi chou ngeni Chón Kraist. Sipwe ttiisenikich ekiek ese pwúng me sisap pweni aramas. Ika sia ‘föri och mi afeiengau ngeni manauen chon aruch,’ weween ren ach pweni emén pokiten ach sise sani, are pokiten ach lólówóiti, iwe a ffat pwe sia oputa. A mmen lamot án Chón Kraist resap fókkun ina usun.​—Mat. 12:36, 37.