Nüküjain Jeʼwaa namüin na israeliitakana wuleinjatüin nakuwaʼipa. Süpüla nountuin tia müshi nia namüin: «Nnojo püküjain alawaa nüchiki wanee wayuu namüin na waneinnua. Nnojo pütamaain nooʼomüin puwala. Taya tayakai Jeʼwaa» (Lev. 19:2, 16).

Pansaasü tü pütchikat «pütamaain nooʼomüin» sümaa tü aküjüneekalü achiki suluʼu hebreo. ¿Kasa aküjüneeka süka tia pütchikat? Anuu wanee pütchi nashajaka na judíokana süchiki tü karaloʼutakat Levítico: «Kapüleesü wayaawatüin saaʼu tü aküjüneekat süchiki tia pütchikat süka sümüin suluʼu hebreo ‹nnojoluinjatü shaʼwatüin nüʼütpaʼa›».

Jülüjasü naaʼin waneinnua wayuu ekirajaakana süchiirua sukuwaʼipa tü Bibliakat wayaawateerüin saaʼu tü sümakat wetsiikulo 16 sükajee tü sümakat wetsiikuloko 15, tü makat: «Nnojotsü anain kachekaraatarale jia soʼutku wayuu, lotuinjatü sukuwaʼipa tü kasa jaaʼinrakat. Nnojotsü koʼuinjatüin jukuwaʼipa sümüin wayuu eekai maʼletsein otta nnojotsü alanaʼaleeinjatüin jutuma nujutü chi eekai kaʼletsein. Lotuinjatü tü jaaʼinrakat junoutapa sukuwaʼipa wanee kasa» (Lev. 19:15). Shiimainreje tia, tü pütchikat «nnojo pütamaain nooʼomüin» aküjünaka suluʼu wetsiikulo 16 shia aküjüneeka achiki lotuinjatüin nakuwaʼipa na israeliitakana sünain akumajaa sukuwaʼipa kasa, sünain oikawaa, ayaʼlajaa otta sümaa napüshi. Nnojoluinjatü nemeejüin wayuu shiiʼiree anain nakuwaʼipa. Watüjaa aaʼu nnojoluinjatüin waaʼinrüin tia, eepejeʼe wane sukuwaʼipa wayaawateetka anainjee tü pütchi suluʼukat wetsiikulo 16.

Jülüja waaʼin tü pütchi suʼttianainjeekat wetsiikulo 16. Nüküjain yala Maleiwa namüin na israeliitakana nnojoliinjanain naküjain naʼalain süchiki wayuu namüin na waneinnua. Mayaainjeʼe eejeerüin kasa mojusü süküjünüle perulaa, mojuleepejeʼe maʼin süküjünüle alawaa nachiki na waneinnua (Prov. 10:19; Ecl. 10:12-14; 1 Tim. 5:11-15; Sant. 3:6). Eeshijaʼa nüküjale alawaa wanee wayuu nüchiki wane süpüla mojuin pütchi nüchiki natuma na waneinnua. Eesüjaʼa naaʼinrüle tia jaʼitashijaʼa nuʼutunuin aaʼin chia wayuukai sutuma tü alawaa nüküjakat nüchiki. Tia shia tü alatakat nümüin Nabot. Aküjünüsü alawaa nüchiki natuma waneinnua wayuu. Mayaainjeʼe maainjalain nia, oʼutuna aaʼinchi nia süka ipa saaliijee tia (1 Rey. 21:8-13). Chi wayuu aküjakai naʼalain nüchiki wanee wayuu müshi nütamaakai aaʼin nooʼomüin nuwala süpüla nuʼutuin naaʼin maʼaka süküjünüin sajaʼttiamüin wetsiikuloko 16.

Eeshijaʼa nüküjale wanee wayuu alawaa nüchiki wane sutuma üttüin naaʼin nünain. Anuu tü sümakat 1 Juan 3:15: «Chi eekai kanain naaʼin nuwalayuu, uwomuyuushi, maa aka naaʼin Caín». Jülüja waaʼin tü nüküjakat Jeʼwaa süchikijee nuluwataain na israeliitakana tü pütchi suluʼukat Levítico 19:16. Anuu nünüiki: «Nnojo üttüin paaʼin nünain chi puwalakai» (Lev. 19:17).

Tü pütchi aküjünakat namüin na israeliitakana suluʼuka Levítico 19:16 namüinjatia shiayaa na anoujashiikana maaʼulu yaa. Wasünneʼerüinjatü kasa mojusü suluʼujee wekii otta nnojoliinjana waya aküjain alawaa süchiki wayuu. Waküjale alawaa nüchiki wanee wayuu sutuma nnojoluin anain nüshoʼu wamüin jee shiale sutuma wachumujüin, eesüjaʼa waaʼinrüle tia sutuma üttüin waaʼin nünain. Nnojoluinjatü üttüin naaʼin wanee anoujashi nanain na waneinnua (Mat. 12:36, 37).