Iehova ese Israela taudia ia hamaoroa do idia helaga. Unai idia karaia totona, idia ia hamaoroa: “Namo lasi emu taunimanima huanai, haida edia ladana hadikaia hereva oi gwauraia loaloa. Namo lasi dala oi tahua emu varavara ena mauri oi hadikaia totona. Lau be Iehova.”​—Lev. 19:2, 16.

Heberu toretoredia ai, inai hereva “dala oi tahua emu varavara ena mauri oi hadikaia,” be idia torea “emu varavara ena rara dekenai oi gini.” “Dekenai oi gini” ena anina be dahaka? Buka ta ese Levitiko bukana ia herevalaia neganai, ia gwau: “Inai siri ena kahana . . . hahanaia totona be auka, badina Heberu gado ena laulau herevana, ‘ia latanai, badinai o kahirakahira dekenai oi gini lasi’ ena anina korikorina idia lalopararalaia lasi.” (The JPS Torah Commentary: Leviticus)

Baibel idia stadilaia diba bada taudia ese unai hereva be Levitiko 19:15 ida idia hatamonaia, ia gwau: “Namo lasi emui hahemaoro karana lalonai umui kara gageva. Namo lasi ta umui hebogahisi henia badina ia be ogogami tauna, eiava namo lasi ta umui matauraia bada badina ia be taga tauna. Namona be mai hahemaoro goeva ida emui varavara umui hahemaoro henia.” Unai amo ita itaia siri 16 ai ia noho taravatu, tau ta dekenai oi gini lasi, anina be Israela tauna ta be sibona ena namo totona, kota bona bisinesi karadia o famili lalonai koikoi karana ta do ia karaia lasi. Momokani, unai kara ita dadaraidia be namo, to siri 16 ena hereva be dala ma ta amo ita lalopararalaia diba.

Mani siri 16 ena matamana oi itaia. Dirava ese Israela taudia ia oda henia haida edia ladana hadikaia hereva do idia gwauraia loaloa lasi. Laloatao, ena be udu mauri ese hekwakwanai ia havaraia diba, to ta ena ladana hadikaia herevadia ese dika bada ia havaraia danu. (Aon. 10:19; Had. 10:12-14; 1 Tim. 5:11-15; Iam. 3:6) Unai bamona tauna ese koikoi herevadia amo ma ta ena ladana namona ia hadikaia. Hegeregere, ia ese kota dekenai ma ta ia samania koikoi, ena be iena hereva dainai unai tauna idia hamasea diba. Reana oi laloatao, tatau rua be Naboto idia samania koikoi, bona unai dainai idia hodoa mase. (1 Kin. 21:8-13) Oibe, ladana hadikaia hereva gwauraia loaloa taudia ese edia varavara ena mauri idia hadikaia diba, Levitiko 19:16 ena kahana iharuana ese ia hahedinaraia bamona.

Danu, reana tau ta ese ma ta ena ladana hadikaia herevadia ia gwauraia, badina ia ese unai tauna ia inai henia. Ioane Ginigunana 3:15 ia gwau: “Iena tadikaka ia inai henia tauna be ala-ala tauna, bona umui diba, ala-ala tauna dekenai mauri hanaihanai ia noho lasi.” Danu, Dirava ese Levitiko 19:16 ai ia noho hereva ia gwauraia murinai, ma ia gwau, “Namo lasi emu kudouna ai emu tadikaka oi inai henia.”​—Lev. 19:17.

Oibe, Levitiko 19:16 ena taravatu ese Keristani taudia ia sisiba henia auka. Namo lasi ma ta dekenai lalohadai dikadia ita abia, eiava iena ladana hadikaia herevadia ita gwauraia loaloa. Bema ta “dekenai ita gini” badina ia ita ura henia lasi o mama henia, bona iena ladana hadikaia herevadia ita gwauraia, unai ese do ia hamomokania ia ita inai henia. Keristani taudia ese ta ta inai henia karana idia dadaraia momokani be namo.​—Mat. 12:36, 37.