وقىرمان ساۋالدارى
مۇسانىڭ 3-جازباسى 19:16 دا: «ادامنىڭ ومىرىنە قاستاندىق جاساماڭدار»،— دەلىنگەن. بۇل بۇيرىقتان وزىمىزگە قانداي ساباق الامىز؟
يسرايل حالقى كيەلى بولۋ ٷشىن، ەحوبا ولارعا: «بىرەۋگە جالا جاۋىپ، مۇنى ەلگە تاراتپاڭدار. ادامنىڭ ومىرىنە قاستاندىق جاساماڭدار. مەن ەحوبامىن»،— دەگەن (مۇس. 3-ج. 19:2، 16).
مۇنداعى «ادامنىڭ ومىرىنە قاستاندىق جاساماڭدار» دەگەن سويلەم ٴتۇپنۇسقا تىلدە «ادامنىڭ قانىنا قارسى تۇرماڭدار» دەپ بەرىلگەن. مۇسانىڭ 3-جازباسى 19:16 داعى وسى سوزدەر تۋرالى ٴبىر ەۆرەي ەڭبەگىندە بىلاي دەلىنگەن: «تارماقتىڭ وسى بولىگىن اۋدارۋ وڭاي ەمەس، ويتكەنى «قانىنا قارسى تۇرۋ» دەگەن ەۆرەي تىركەسىنىڭ استارىندا قانداي وي جاتقانىن ٴبىلۋ وتە قيىن».
كەيبىر عالىمدار «قانىنا قارسى تۇرۋ» دەگەن تىركەستى ٴتۇسىندىرۋ ٷشىن ونى الدىڭعى تارماقپەن بايلانىستىرادى. وندا بىلاي دەلىنگەن: «سوتتا ادىلەتسىزدىك جاساماڭدار. كەدەيگە الالاۋشىلىق تانىتپاڭدار، بايعا دا ورىنسىز قۇرمەت كورسەتپەڭدەر، ٴبارىن ٵدىل سوتتاڭدار» (مۇس. 3-ج. 19:15). دەمەك، ولاردىڭ تۇجىرىمداۋىنشا، 16-تارماقتاعى «قانىنا قارسى تۇرۋ» دەگەن تىركەس يسرايلدىكتەردىڭ سوتتا، ىسكەرلىك ماسەلەدە جانە وتباسىندا ٵدىل بولۋلارى كەرەكتىگىن، ٶز پايدالارى ٷشىن ارامدىق جاساماۋلارى كەرەكتىگىن بىلدىرگەن. ٴيا، ٵدىل بولىپ، ارام ىستەردەن اۋلاق بولۋىمىز كەرەكتىگى راس. ٴبىراق بۇل تىركەستى سول 16-تارماقتىڭ وزىندەگى ويلارمەن بايلانىستىرساق، جاقسى تۇسىنەمىز.
16-تارماقتىڭ ٴبىرىنشى جارتىسىنا نازار اۋدارساق، قۇداي ٶز حالقىنا «بىرەۋگە جالا جاۋىپ، ەلگە تاراتپاۋدى» بۇيىرعان. بىرەۋگە جالا جابۋ — وسەك تاراتۋ سياقتى ەمەس. راس، وسەك تە ٴبىراز قيىندىق تۋدىرادى (ناق. س. 10:19؛ ۋاع. 10:12—14؛ ٴتىم. 1-ح. 5:11—15؛ جاق. 3:6). ٴبىراق جالا جابۋدىڭ ناتيجەسى بۇدان دا اۋىر. جالا جابۋشىنىڭ ماقساتى — بىرەۋدى ادەيىلەپ قارالاۋ. بىرەۋدىڭ ٶمىرىن قاتەرگە تىگەتىنىن بىلسە دە، جالا جابۋشى ول جايىندا وتىرىك ايتۋدان تايىنبايدى. وسىنىڭ ٴبىر مىسالى — نابۋتايمەن بولعان جاعداي. ەكى جالعان كۋاگەر وعان ادىلەتسىز جالا جاۋىپ، جۇرت ونى تاسپەن اتقىلاپ ولتىرەدى (پات. 1-ج. 21:8—13). دەمەك، جالا جاباتىن ادام بىرەۋدىڭ ومىرىنە قاستاندىق جاساۋى ابدەن مۇمكىن.
ادامنىڭ بەيكۇنا جانعا جالا جاپقانى ونى جەك كورەتىنىن بىلدىرەدى. جوحاننىڭ 1-حاتى 3:15 تە: «باۋىرلاسىن جەك كورەتىن اركىم — كىسى ٶلتىرۋشى. ال كىسى ولتىرۋشىدە ماڭگىلىك ٶمىر جوق ەكەنىن بىلەسىڭدەر»،— دەلىنگەن. مۇسانىڭ 3-جازباسى 19:16 داعى سوزدەردەن كەيىنگى تارماقتا «ەشكىم باۋىرىن ىشتەي جەك كورمەسىن» دەلىنگەنى بەكەر ەمەس.
كورگەنىمىزدەي، مۇسانىڭ 3-جازباسى 19:16 داعى «بىرەۋگە جالا جاپپاڭدار» دەگەن سوزدەر ماسىحشىلەر ٷشىن قاتاڭ ەسكەرتۋ بولىپ تابىلادى. ٴبىز وزگە ادام تۋرالى جامان ويلاپ، وعان جالا جابۋدان بارىنشا اۋلاق بولۋىمىز كەرەك. بىرەۋدى جاقتىرماعاندىقتان نەمەسە قىزعانعاندىقتان جالا جاپقانىمىز ونى جەك كورەتىنىمىزدى ٴبىلدىرۋى مۇمكىن. ماسىحشىلەر وزگەنى جەك كورۋدەن اباي بولۋلارى كەرەك (مات. 12:36، 37).
