Mi Chɛhowa dimul Isɔluɛiya le ma wa a diandaa. Le nda malaa ma tosa hei, mbo dimul nda aa: “Wana belu a diola waŋndo o sondo ma tɛɛmbuu ndu tɔɔ waŋnda tɛɛŋ te. Nduyɛ wana tosa isɔɔ o isɔɔ i tosa mi yoomu chaaŋ numndo o wa o kpundɔɔ niŋ te. Ya cho Mɛlɛka Yaawɛɛ ni.”—Lɛvi. 19:​2, 16.

Diomndaŋ ndaŋ “tosa isɔɔ o isɔɔ i tosa,” tɛɛsial naa nyɛkɛndɛi diomnda maHibuluila wa o bolle Baabuileŋ niŋndaŋ. Kɛ yɛɛ la sim yɛ? Mi yau pilɛ o Chuda niŋ, o soo a yau Lɛvitikɔɔ wo okɔɔ wo dimi aa: “I cho bɔɔ ikala le kpeŋgii diiŋ nduɛi o bolle Baabuileŋ niŋ biyɔɔ bila kanifuule, diomndaŋ ndaŋ ‘sim ndu choo ɔɔ sim ndu ikɛi le’ nda poonyiaa leniŋ ni.”

Wanaa sinaa dɛniaa apum dimi maa diomndaŋ ndaŋ la chɛlaŋ a diomnda cho o sɔɔŋ 15 niŋndaŋ. Nduyɛ sɔɔŋ 15 dimi aa: “Te a wa waŋnda yamɛi kiolɔɔ tɛɛŋ pɛ, wa sakpo o ndi kiolɔɔ niŋ, nduyɛ ma dimi tonyaa. Sim waŋndo kɔɔli, le mɛɛ o cho wana [bala fondo,] ɔɔ wana sulaa yɛ ma ke ndu dioo le.” (Lɛvi. 19:​15) O hei niŋ, ŋ dimi maa diomndaŋ ndaŋ o sɔɔŋ 16 niŋ, “tosa isɔɔ o isɔɔ i tosa” sim maa, wanaa Mɛlɛkaa ndaa nɔ ma wa sakpo o yamaŋ kiolɔɔ niŋ, sɔɔŋ leyulaŋ, ɔɔ o sɔɔŋ leyuŋgoŋ niŋ. Ndaa nɔ ma tosa lakafa le halikpeŋ ma sɔla tɔnɔɔ leniŋ te. I cho tonya maa, ŋ tosa sɔɔŋ muŋ te, kɛ nɛi cheleŋ cho vɛlɛ o naŋ nɔ le nyɛ sɔɔŋ 16 dimi wo biyɔɔ bila wo.

Tofawɔ nyɛ dimiŋ o bolle Baabuileŋ ndeŋ niŋndo. Mi Mɛlɛka dimul wanaa nduaa maa a nɔ ma tɛɛmbuu chaaŋaa ndaa tɔɔ le. Kɛsiŋ o kɔl maa, waŋndo tɔɔ tɛɛmbuuwo hiou choŋgulaŋ, mi che bɛɛ mi choŋgulaŋ la hiŋ a bahawɛilaŋ waŋnda tɛɛŋ. (Pulɔ. 10:​19; Ikili. 10:​12-14; 1 Timo. 5:​11-15; Chemi. 3:​6) Mi wana tɛɛmbuu waŋndo tɔɔ wo dimul acheleŋnda sɔɔŋ wɔɔŋndoŋ a ndu okɔɔ le halikpeŋ mbo tɛɛmbuu diola ndɔlaŋ. Mi wana waa nuaa timbul vɛlɛ waŋndo seile lakafaleŋ o yɔŋ bɛɛ mi yoomu wana koŋ wa o kpundɔɔ niŋ. Loonuŋ maa, mi wanaa waa nuaa timbi seile lakafaleŋ a Nabɔti okɔɔ, nduyɛ mi hei tosa ma vii vii ndu a poutaŋ haaa mbo sɔla piɔmndo. (1 Masaa. 21:​8-13) A tonya, mi wana tɛɛmbuu waŋndo tɔɔ wo tosa isɔɔ o isɔɔ i tosa mi yoomu wana koŋ wa o kpundɔɔ niŋndo, a mɛɛ kpeŋgii diiŋ nduɛi o Lɛvitikɔɔ 19:​16 niŋ dimi yɛ.

Le handɔɔ lechoo, mi waŋndo tɛɛmbuu chaaŋ ndɔ tɔɔ le mɛɛ o tul ndu leyɛ yɛ. 1 Chɔŋ 3:​15 dimi aa: “Wana o wana tul pɛ puaapilɛnɔ ndɔɔ leyɛ, mɛɛ wana diyaa o cho ni. Nduyɛ la sina maa wana o wana cho wana diyaa, o sɔla yoomu fafɛɛŋndo le.” Mɛɛ Mɛlɛka chii diomnda cho o Lɛvitikɔɔ 19:​16 niŋndaŋ dimi, mbo dimi aa: “Wana nɔ yɛle tulaale chaaŋ numndeŋ o kɔl te.”—Lɛvi. 19:​17.

A tonya, diomnda cho o Lɛvitikɔɔ 19:​16 niŋndaŋ la ke Kilisiɔŋnda sila sɔvɛ sɔviɔɔ. Ŋ nɔ miŋ fafaŋ yiyaŋnda wɔɔŋndaŋ nɔɔ a acheleŋnda tɔɔ tɛɛmbuuwo. Lelaŋ te ŋ hɛnaŋ a waŋndo le ɔɔ miŋ tul ndu leyɛ, keŋ cho naa nyindɔɔ miŋ “tosa isɔɔ o isɔɔ i tosa” miŋ tɛɛmbuu wana koŋ tɔɔ wo. Kilisiɔŋnda nɔ ma tosa hei kposoŋ te.—Maa. 12:​36, 37.