Jehova kwa tanterere Vaisraeli va kare vantu wokupongoka. Mokuninka asi va kare vana pongoka, age kwa va tanterere asi: “Walye omu hanesa yimpempa kwankenye ogu. Ano pokutokora kombinga zomwenyo gomuntu mombangwiliro, mu popera nsene asi undipo woge ku vhura kumukwafa. Ame nyame Hompa.”—Lev. 19:2, 16.

Nkango ‘nokutokwerasi kombinga zomwenyo’ kuna kara etoroko lyewa lyosisewe somoRuhebeli, nye yinke asi tanta? Buke zoVajuda ezi za zogera kuhamena Levitikus kwa tanta asi: “Ruha rovelise ezi . . . udigu kuzifaturura, morwa udigu kukwata egano eyi sa tamba nawa-nawa sisewe oso, esi asi tanta moRuhebeli asi ‘wa ha kara pepi.’”

Valirongi vamwe kugazara asi nkango ozo kwa likwatakana nononkango domovelise 15, ezi azi uyunga asi: “Kareni vahuguvali novahungami nsene tomu tokora nonkango pokupangura. Walye omu hama konohepere ndi mu tjire nongawo.” (Lev. 19:15) Mpangera zomovelise 16 zokudira ‘kutokora kombinga zomwenyo gomuntu’ kuvhura kutanta asi vantu vaKarunga va hepere kunyokera po kurugana vakwawo momudona yi kare asi mompanguro, mongesefa ndi mepata. Ntani kapisi va rugane yininke mokugwanena mo uwa tupu vene. Yimo ose kapi tatu vhuru kukwama yininke oyo, nye pwa kara simpe nkedi zongwa omu natu vhura kukwata nawa egano nonkango edi domovelise zo 16.

Tu tareni eyi azi uyunga velise ozo ketameko lyazo. Karunga kwa pangerere vantu vendi va dire kuhanesa yimpempa. Awo va hepere kudiworoka asi apa gumwe nga gamba wopeke, age kuvhura kuretesa po maudigu. Nye apa muntu nga hanesa yimpempa kuhamena gumwe, age kuvhura kuretesa po maudigu gomanene kupitakana kugamba. (Yis. 10:19; Muud. 10:12-14; 1 Tim. 5:11-15; Jak. 3:6) Muntu ogu a hanesa yimpempa, kuyiruganena mokunyatekesa ko edina lyagumwe. Muntu gwangoso kuvhura a gave umbangi woyipempa kuhamena mukwawo nampili ngomu ana yi diva asi kuvhura yi ture eparu lyamukwawo mosiponga. Diworokeni asi vantu woyimpempa kwa geve umbangi woyimpempa kuhamena Nabota, ngoyitundwamo, Nabota kwa mu dipagere. (1 Vah. 21:8-13) Ngomu tupu vana yi tumbura mwaLevitikus 19:16, muntu goyimpempa kuvhura kutokora kombinga zomwenyo gomuntu pokumuninkisa a fe.

Ntani hena, gumwe kuvhura kuuyunga yipempa kuhamena muntu gongandi morwa ga mu nyenga. 1 Johanesa 3:15, kutanta asi: “Nkenye ogu ga nyenga mukwawo, mudipagi ntani mwa yi diva asi kwato mudipagi ogu nga ka gwana mwenyo gwanarunye.” Konyima zapa Karunga ga uyungire asi: ‘Nokutokorasi kombinga zomwenyo gomuntu,’ age kwa uyungire hena asi: “Walye omu simbire vakweneni konomutjima.”—Lev. 19:17.

Yipo nye, mpangera ezi za kara mwaLevitikus 19:16 kwa gava epukururo lyomulyo koVakriste. Twa hepa kunyokera po nkenye magano gomadona ntani nokuhanesa yipempa. Monkango zimwe, nsene tu “tokora kombinga zomwenyo gomuntu” pokuhanesa yipempa kumuhamena morwa kapi twa mu hara ndi ose kumufira mfudu, eyi ngayi likida nawa-nawa asi ose twa nyenga muntu ogo. Vakriste va hepa kuyinyokera po oyo.—Mat. 12:36, 37.