Yova pongʉeri Waizraeli dho kpa e watakatifu kʉ ná nrŭ. Ndiro ndi kó kpa tsotso kpa e watakatifu d’e, ke pongʉeri kpa dho: “Nidho nzá ringani ni nyá nrŭ djotso gba nalo nanga nrŭ kalu ri. Nidho nzá ringani ni tøni ni lai dhó shinga tsoro ri. Ma kʉ Yova.”​—Law. 19:2, 16.

Le ripo “nzɨ le tøni le tsoro” ná fø lo tu Kiebrania nǎ le po nalo nanga bblo pli, nde føri na mana ká kʉ addu? Wayaudi bbá ddikpa buku pori i Mambo ya Walawi djo: “Fø verse . . . le famu nari kʉ kpakpa dhonalo ri kʉ kpakpa le chu ngba lo ma le po Kiebrania dha nǎ nari. Kiebrania nǎ fø lo na mana nganga kʉ ‘nzɨ le tøni chøchø.’”

Nja kpa adi riddi na ri kʉ fø verse ti ddikpa lo verse 15 na: “Nidho nzá ringani ni d’ ilo nrŭ djo nga kʉ chø ná chulu ri. Nidho nzá ringani ni krø njedha dhi nrŭ nanga inga ni nja mali dhi nrŭ i mana na pli ri. Nidho ringani ni d’ilo ni lai djo chí kʉ ná chulu.” (Law. 19:15) Føri dho verse 16 nǎ le ripo nzɨ le “tøni le lai dhó shinga tsoro” ná føri na mana kʉ Waizraeli dho nzá ringangʉeni ndima nji nga kʉ chø nalo ro ddikpa lo kana ma ddiri, rie lod’idha dhi lo kana ma, inga familia nǎ lo kana ma ró. Ndirigoti Waizraeli dho nzá ringangʉeni ndima ne faida nja ke nǎ ro nga kʉ chø nalo chulu ri. Bbʉbbʉ dhé kodho nzá ringani ko nji fø lo ri, ro fø verse 16 nǎ kʉ nalo le ka le famu bí kʉ ná chulu.

Anja verse 16 tso ngani na nalo. Mungu pori ndidzá nrŭ dho nzɨ kpa nya nrŭ djotso gba nalo nanga. Bbʉbbʉ dhé nrŭ lo le ti nari ka ndi nya lo. Ro nrŭ djotso le gbá nari ka ndi nya lo bbo pli. (Mez. 10:19; Muh. 10:12-14; 1 Ti. 5:11-15; Yak. 3:6) Nrŭ djotso gba ná ke adi kali sha ndi lai djo ndiri na ndi sa kedhó heshima d’e. Nrŭ djotso gba ná ke adi kali dhi lo nanga nya ngba mai ndi churi føri ka ndi liri ri ndi d’ra djo ná ke dhó maisha hatari na ro. Anonga nari kʉ nrŭ djotso gba ná kpa shangʉe kali Naboti djo nari lingʉeri le bú ke dju na. (1 Fa. 21:8-13) Bbʉbbʉ dhé, nrŭ djotso gba ná ke ka ndi tøni nja ke dzá shinga tsoro Mambo ya Walawi 19:16 nǎ sehemu ya pili ripo naribbai.

Ndirigoti njale ka ndi gba nja ke djotso ndi ndro ke ndro nari dzá lodho. 1 Yohana 3:15 na ko rizø: “Ndrondro adjo ndi nari kʉ nrŭ hwi ná ke, ndirigoti ni churi nari kʉ nrŭ hwi ná ke nǎ nga kʉ nŭnŭ di ná shinga ro ri.” Godhé føri goti Mungu pongʉeri “nidho nzá ringani nili ni lai dhó shinga hatari na ri,” ke pongʉe ri ki: “Nidho nzá ringani ni ndro adjoni ni thí nǎ ri.”​—Law. 19:17.

Mambo ya Walawi 19:16 kpakpa kʉ ná shauri bbʉ Wakristo dho. Kodho ringani ko bbá che kʉ ná ngaddidha bbá ndirigoti nzɨ ko gba nja nrŭ djotso. Njati ko di “tøni nja ke tso ro” ko ji kedzá lo nzá nari dho inga ko kʉ dda na ke dho nari dho ró, føri ka ndi dhori ko ndro ke ndro. Wakristo dho nzá ringani ndima ndro ddikpa le ro maddi ri.​—Mt. 12:36, 37.