Yehova wakalwiita bene Isilaeli kuba bantu basalalite. Kwaamba ayi abacaafwe kucita boobo wakabalwiita ayi: ‘Tamweelete kuya cibekesha muntu nabi womwi, mutapi bukamboni bweenga bwalengesha buumi bwa shikamukobonyinaanu kunyonyoolwa. Nebo ndime Yehova.’—Lefi. 19:2, 16.

Ino maswi ngobakasebensesha muci Ebulu palilembo ili alasansulula nshi? Libuku limwi lyaba Juda lyaamba palilembo lya Bene Lefi lilicite maswi akwaamba ayi: “Lubasu ulu lwa vesi iyi . . . nduyumu kulunyumfwishisha mukwiinga nciyumu kushiba maswi akasebenseshekwa muci Ebulu aamba ayi ‘uteemikani pabuumi, na pafwiifwi’ ncaasansulula.”

Bantu bamwi bakeeya abuumbi balaamba ayi maswi akasebenseshekwa muci Ebulu alicatene aayo ngotucana muvesi 15 yaamba ayi: “Mulyeelete kushomeka akululika pakoombolosha. Mutabi akasalulushi kubantu bakandu nabi kuloonda babile.” (Lefi. 19:15) Aboobo, mulawo ngotucana muvesi 16 inga wasansulula ayi bantu bakwe Lesa ndyebatokoombolosha, kucita makwebo, na mumakani akumite mukwashi, tabakalinga kweelete kucita ceenga caleta mapensho pabuumi bwa musebenshinyinaabo. Alimwi mwine Isilaeli taakalinga kweelete kucita cintu cimwi munshila yakutashomeka kwaamba ayi acaninemo mpindu. Nabi kwaamba ayi ncakwiila aswebo tatweelete kucita boobo, kuli makani aamwi eenga atucafwa kunyumfwishisha maswi ngotucana muvesi 16.

Amuyeeye pamaswi ngotucana kumatalikilo a vesi 16. Mulawo wakwe Lesa ulaamba ayi bantu bakwe tabeelete kuya cibekesha muntu nabi womwi. Nabi kwaamba ayi ncakwiila kufuya bamwi kulaleta mapensho, kubekesha muntu kwalo kuleendaawo. (Tus. 10:19; Shiku. 10:12-14; 1 Timo. 5:11-15; Jemu. 3:6) Muntu shikubekesha bamwi ulaamba makani akubeca eenga abisha liina lya umwi. Shikubekesha inga waamba bukamboni bwakubeca pamuntu umwi, nabi kwaamba ayi kucita boobo inga kwanyonyoola buumi bwa muntu uyo ngwabekesha. Amwiibaluke kwaamba ayi bumboni bwakubeca mbobwakapa kwaamba ayi Naboti acaikwe. (1 Baam. 21:8-13) Aboobo ncakwiila, muntu waamba bukamboni bwakubeca inga ‘walengesha buumi bwa shikamukobonyina kunyonyoolwa, kweelana amaswi ngotucana palubasu lwabili lwa Bene Lefi 19:16.

Kwiilikaawo, muntu inga wabekesha umwi ceebo cakwaamba ayi alimupatite. Lilembo lya 1 Joni 3:15, lilaamba ayi: “Uyo woonse upatite mubye ngumucayi alimwi mulishi kwaamba ayi taaku mucayi ucite buumi butamaani muli nguwe.” Pesule lyakwaamba maswi ngotucana muvesi 16 Lesa wakaamba ayi: “Toeelete kupata shikamukobonyoko mumoyo wako.”—Lefi. 19:17.

Aboobo mulawo ngotucana pa Bene Lefi 19:16 nkululika kuyandika abuumbi ku Beneklistu. Tulyeelete kuleya kuyeeya shibiibi alimwi akwaamba makani akubeca pabamwi. Munshila imwi inga twaamba ayi kubekesha muntu kulatondesha ayi tulimupatite na kumunyumfwila munyono. Beneklistu tabeelete kupata muntu uli woonse.—Mate. 12:36, 37.